Pesalemo
Ki te pule ʼo te kau faimaholo. Pesalemo ʼa Tavite.
140 Sehova e, haofaki au mai te kau agakovi,
Puipui au mai te hahaʼi agamalohi,+
2 Mai ia natou ʼae ʼe natou fakakaukauʼi ni fakatuʼutuʼu kovi,+
Pea mo fakatupu ni fihi ʼi te ʼaho katoa.
3 ʼE masila ʼonatou ʼalelo ohage ko te ʼalelo ʼo te gata,+
ʼE maʼu te kafokona ʼo te ʼu gata ʼi ʼonatou laugutu.+ (Sela)
4 Sehova e, puipui au mai te ʼu nima ʼo te kau agakovi.+
Haofaki au mai te hahaʼi agamalohi
ʼAe ʼe natou faiga ke au tukia.
5 ʼE fufu e te kau fiameʼalahi he hele kia au,
ʼE natou toho he kupega ʼi te vaʼe ala ʼaki ni maea.+
ʼE natou fai ni hele kia au.+ (Sela)
6 ʼE au ui kia Sehova: “Ko koe toku ʼAtua.
Sehova e, fagono mai ki ʼaku tagi atu.”+
7 Sehova e, siʼoku Tuʼi ʼAliki, siʼoku Haofakiʼaga mafimafi,
ʼE ke puipui toku ʼulu ʼi te ʼaho ʼo te tau.+
8 Sehova e, ʼaua naʼa ke fakahoko te ʼu holi ʼo te kau agakovi.
ʼAua naʼa ke tuku ke iku ʼanatou fakatuʼutuʼu, ke mole natou fiameʼameʼa ai.+ (Sela)
9 Ke hoko kia natou ʼae ʼi ʼoku tafaʼaki
Te ʼu laukovi ʼae neʼe natou fai.+
10 Ke to kia natou he ʼua mamala kakaha.+
Ke li natou ki te afi,
Ki ni luo loloto+ ke mole natou toe tutuʼu ake ʼi he temi.
11 Ke mole maʼu e te tagata fasituʼu hona nofoʼaga ʼi te kele.*+
Ke hoko te malaʼia ki te hahaʼi agamalohi pea ke pulihi ai ia natou.
12 ʼE au iloʼi ʼe haofaki anai e Sehova ia natou ʼae ʼe liliki,
Pea ʼe ina fakamauʼi anai te kau masisiva ʼi te faitotonu.+
13 ʼE vikiʼi moʼoni anai e te kau faitotonu tou huafa.
Pea ʼe nonofo anai ʼi ʼou muʼa ia natou ʼae ʼe aga fakahagatonu.+