Taʼaga Lea

13 ʼE tokagaʼi e he foha poto te akoako ʼae ʼe foaki age e tana tamai,+

Kae ko ia ʼae ʼe vava ʼe mole fakalogo ia ki te fakatonutonu.+

 2 ʼE kai e he tagata te meʼa ʼae ʼe lelei ʼuhi ko ʼana palalau,+

Kae ʼe holi te tagata kaka ki te agamalohi.

 3 Ko ia ʼae ʼe tokaga ki ʼana palalau ʼe ina puipui tona maʼuli,+

Kae ʼe malaʼia anai ia ia ʼae ʼe lahi fau tana palalau.+

 4 ʼE lahi te ʼu holi ʼa te tagata pikoʼelo kae ʼe mole hana meʼa,+

Kae ʼe fimalie anai ia ia ʼae ʼe faʼa gaue.+

 5 ʼE fehiʼa te tagata faitotonu ki te loi,+

Kae ʼe maʼu pe te ufiufi mo te fakalainoa ʼi te ʼu gaue ʼa te tagata agakovi.

 6 ʼE puipui ia ia ʼae neʼe mole ina fai he meʼa ʼe kovi ʼi tana faitotonu,+

Kae ʼe higa anai te tagata agahala ʼi tana agakovi.

 7 ʼE ʼi ai he tahi ʼe fia maʼu koloa kae ʼe mole hana meʼa,+

Mo he tahi age ʼe fia masiva kae ʼe lahi ʼona koloa.

 8 ʼE feala ke totogi e he tagata tona maʼuli ʼaki ʼona koloa,+

Kae ʼe mole pe la tuʼutamakiʼia te kau masisiva.+

 9 ʼE mu malohi te malama ʼo te kau faitotonu,+

Kae ʼe mate anai te malama taki ʼo te kau agakovi.+

10 ʼE fakatupu kē pe te fiameʼalahi,+

Kae ʼe maʼu te poto e natou ʼae ʼe kole tokoni.+

11 ʼE puli anai te ʼu koloa ʼae neʼe maʼu vave,+

Kae ʼe lahi anai te ʼu koloa ʼo ia ʼae neʼe ina tanaki mamalie.

12 ʼE lotomamahi ia ia ʼae ʼe mole hoko vave tana fakaʼamu,+

Kae ka hoko he fakaʼamu ʼe hage ko he fuʼu ʼakau ʼo te maʼuli.+

13 ʼE fua kovi anai te meʼa noaʼi ʼo te ʼu fakatotonu,+

Kae ʼe fakapale anai ia ia ʼae ʼe fakaʼapaʼapa ki ai.+

14 Ko te faiakonaki ʼa te poto ʼe ko he matapuna ia ʼo te maʼuli,+

ʼE ina fakahao mai te mate.

15 ʼE leleiʼia ia ia ʼae ʼe fakasiosio poto,

Kae ʼe tokakovi te ala ʼo te hahaʼi kaka.

16 ʼE fakapotopoto ia ia ʼae ʼe ina fakaʼaogaʼi te ʼatamai malama,+

Kae ʼe fakaha pe e te vale tana agavale.+

17 ʼE malaʼia te tagata ʼave logo agakovi,+

Kae ʼe maʼu te malolo mai te tagata agatonu ʼae neʼe fekauʼi.+

18 ʼE masiva anai mo ufiufi ia ia ʼae ʼe mole ina tokagaʼi te fakatonutonu,

Kae ʼe fakakololiaʼi anai ia ia ʼae ʼe ina tali tona akonakiʼi.+

19 Ko he meʼa lelei te hoko ʼo he fakaʼamu,+

Kae ʼe mole fia maliu kehe te kau agavale mai te kovi.+

20 Ko ia ʼae ʼe haʼele mo te kau popoto ʼe liliu anai ia ʼo poto,+

Kae ʼe faigataʼaʼia anai ia ia ʼae ʼe fakatahi mo te kau agavale.+

21 ʼE tuli te kau agahala e te malaʼia,+

Kae ʼe lahi anai te fakapale ʼo te kau faitotonu.+

22 ʼE tuku e te tagata agalelei he tofiʼa ki ʼona mokopuna,

Kae ʼe taupau anai te ʼu koloa ʼo te tagata agahala maʼa te tagata faitotonu.+

23 ʼE lahi te meʼa kai ʼe maʼu mai te kele ʼae neʼe gaueʼi e te masiva,

Kae ʼe feala ke puli* ʼuhi ko te aga heʼe faitotonu.

24 ʼE fehiʼa ki tona foha ia ia ʼae ʼe mole ina fakaʼaogaʼi tana kauʼi ʼakau,*+

Kae ko ia ʼae ʼe ʼofa ki tona foha ʼe tokaga ʼo fakatonutonuʼi.*+

25 ʼE kai te tagata faitotonu pea ʼe makona ia,+

Kae ʼe gaʼasi te fatu ʼo te tagata agakovi.+