Pesalemo
Ki te pule ʼo te kau faimaholo. Pesalemo ʼa Tavite.
41 Ke manuʼia te tagata ʼae ʼe tokaga kia ia ʼae ʼe veliveli.+
ʼE haofaki anai ia e Sehova ʼi te ʼaho ʼo te malaʼia.
2 ʼE puipui anai ia e Sehova pea ʼe ina taupau anai tona maʼuli.
Pea ʼe fakaha anai ʼe fiafia ʼi te kele.+
ʼE mole ke tuku anai ʼi he temi ke faʼifaʼitaliha ʼona fili ki ai.+
3 ʼE tokoni anai ia Sehova kia ia ʼi te palepale ʼo te mahaki.+
ʼI tona temi mahaki, ʼe ke fetogi anai ʼona meʼa moe.
4 Neʼe au ui: “Sehova e, fakaha mai tou manavaʼofa.+
Fakamalolo au+ he neʼe au agahala kia te koe.”+
5 Kae ʼe palalau kovi ʼoku fili ʼo ʼuhiga mo au, ʼo natou ui:
“ ʼE mate anai koa ʼafea, pea ʼe puli anai ʼafea tona higoa?”
6 Ka haʼu he tahi ia natou ʼo fakasiosio au, ʼe ina fai he ʼu palalau kaka.
ʼE ina kumi he ʼu palalau kovi moʼoku fakamamahiʼi.
Pea ʼe alu leva ia ʼo fakamafola ʼi te ʼu potu fuli.
7 ʼE fefanafanaʼaki ia natou fuli ʼae ʼe fehihiʼa ia au.
ʼE natou fai ni fakatuʼutuʼu kovi ʼo ʼuhiga mo au, ʼo natou ui:
8 “Neʼe hoko he aluʼaga fakamataku kia ia.
ʼI te temi nei kua tuku ʼi lalo, ʼe mole toe tuʼu ake anai.”+
9 Maʼia mo te tagata ʼae neʼe ma tokalelei, ʼae neʼe au falala ki ai,+
ʼAe neʼe kai mo au taku pane, neʼe ina hiki ake tona mulivaʼe ʼo fakafeagai mai kia te au.+
10 Sehova e, fakaha mai tou manavaʼofa pea mo ke fakatuʼu ake au,
Ke au liufaki age te meʼa ʼae ʼe tuha mo natou.
11 ʼE au iloʼi anai ʼe ke ʼofa ia au ʼuhi ko te meʼa ʼaeni:
Moka ʼe mole toe malo anai ʼoku fili ia au.+
Ameni, Ameni.