Sopo
9 Neʼe tali e Sopo:
2 “ ʼE au iloʼi ʼe feia.
Kae ʼe lava malo feafeaʼi he tagata ʼi te ʼAtua ʼi he faifakamau?+
3 Kapau ʼe fia fihi he tahi mo Ia,*+
ʼE mole pe ina lava tali ki he fehuʼi ʼe tahi ʼo ʼAna fehuʼi ʼe afe.
4 ʼE poto ia pea ʼe mafimafi.+
Ko ai koa ʼae ʼe feala ke ina tauʼi ia ia pea hao mai ai?+
5 ʼE ina hiki te ʼu moʼuga kae ʼe mole iloʼi e he tahi.
Pea ʼi tona hauhau ʼe ina holoʼi te ʼu moʼuga.
6 ʼE ina luluʼi te kele ʼo to kehe mai tona tuʼuʼaga,
ʼO galulu ai ʼona pou.+
7 ʼE ina fakatotonu ki te laʼa ke mole mu,
Pea ʼe ina ʼuʼufi te malama ʼo te ʼu fetuʼu.+
8 Ko ia tokotahi pe ʼae ʼe ina folahi te lagi,+
Mo haʼele ʼi te ʼu peau maʼoluga ʼo te tai.+
9 Neʼe ina fakatupu te ʼu pupuga fetuʼu ʼo Ase,* mo Kesile* pea mo Kima,*+
ʼO feia mo te ʼu pupuga fetuʼu ʼo te potu saute.
10 ʼE ina fai ni meʼa lalahi pea mo ni meʼa ʼe mole feala he mahino ki ai,+
Pea ʼe mole malau te ʼu meʼa fakaofoofo ʼae ʼe ina fai.+
11 ʼE fakalaka ʼi ʼoku tafa, kae ʼe mole au sio ki ai,
ʼE fakalaka ʼi ʼoku muʼa, kae ʼe mole au iloʼi.
12 Ka ina puke he meʼa, ko ai ʼae ʼe feala ke fakafeagai ki ai?
Ko ai ʼae ʼe feala ke ina ui age: ‘Kotea ʼae ʼe ke fai?’+
13 ʼE mole taʼofi anai e te ʼAtua tona hauhau,+
Maʼiape la mo natou ʼae ʼe lagolago kia Laape,*+ ʼe natou tulolo anai ʼi ʼona muʼa.
14 Koia, ka au tali ki ai,
ʼE tonu ke au filifili lelei ʼaku kupu moka ma faipalalau!
15 Tatau aipe pe ʼe au tonu, kae ʼe mole au tali anai ki ai.+
ʼE au kole mamahi anai te manavaʼofa ʼo toku tuʼi fakamau.*
16 Kapau ʼe au tagi ki ai, ʼe ina tali mai anai koa?
ʼI taku manatu ʼe mole fakalogo anai ia ki toku leʼo,
17 He ʼe ina fakamamahiʼi au ʼaki he afā
Pea ʼe ina fakalahi ʼoku mamahi kae ʼe mole hona tupuʼaga.+
18 ʼE mole ina tuku ke fakatau muʼa taku manava.
ʼE ina fakato tuʼumaʼu pe ni ʼoku malaʼia.
19 Kapau ʼe tou palalau ʼo ʼuhiga mo te malohi, ʼe ko te ʼAtua ʼae ʼe malohi.+
Kapau ʼe tou palalau ʼo ʼuhiga mo te faitotonu, ʼe ina ui anai: ‘Ko ai ʼae ʼe feala ke ina fakafihiʼi au?’
20 Kapau ʼe au tonu, ʼe fakatuʼā anai au e toku gutu.
Tatau aipe pe ʼe au agatonu, kae ʼe ina tukugakoviʼi pe anai au.
21 ʼEi, tatau aipe pe ʼe au agatonu, kae ʼe mole au iloʼi anai pe kotea ʼae ka hoko kia au.
ʼE mole au loto* ki te maʼuli ʼaeni.
22 ʼE mole hona kehekehe. Koia ʼe au ui ai:
‘ ʼE ina matehi ia ia ʼae ʼe mole ina fai he meʼa ʼe kovi ohage pe ko ia ʼae ʼe agakovi.’
23 Ka hake fakapunamaʼuli te vai ʼo tupu ai te mate,
ʼE ina manukiʼi te lotomamahi ʼo natou ʼae ʼe mole natou fai he meʼa ʼe kovi.
24 Neʼe ina tuku te kele ki te kau agakovi.+
ʼE ina ʼuʼufi te ʼu mata ʼo te kau tuʼi fakamau.
Kae kapau ʼe mole ko ia, pea ko ai?
25 ʼI te temi nei, ʼe fakalaka vave ʼoku ʼaho ohage ko te lele vave ʼa he tagata ʼave logo.+
ʼE feholaki te ʼu ʼaho kae ʼe mole hoko he meʼa ʼe lelei.
26 ʼE gaholo ohage ko ni vaka kaho,
Ohage pe ko te ʼohofi e te ʼu akuila tanatou meʼa kai.
27 Tatau aipe pe ʼe au ui: ‘ ʼE au galoʼi anai taku meo,
ʼE au fetogi anai toku fofoga pea ʼe au fiafia anai,’
28 Kae ʼe au mataku pe ʼuhi ko ʼoku mamahi,+
Pea ʼe au iloʼi ʼe ke ui anai ʼe au lakahala.
29 ʼE ke tukugakoviʼi anai au.*
Kotea la te ʼuhiga ʼo ʼaku faiga?+
30 Kapau ʼe au maʼanu ʼi te nive ʼae kua huhuʼa
Pea mo fakamaʼa ʼoku nima ʼaki te sota,+
31 ʼE ke fakauku anai au ki te pela,
ʼO fakalialia ai ʼoku teu kia au.
32 Kae ʼe mole ko he tagata ʼe hage ko au ke au faitali ki ai,
Ke ma olo fakatahi ai ki te fakamauʼaga.+
33 ʼE mole he tahi ʼe ina fai he tonu kia* maua,
ʼEi, ʼe mole he tahi ʼe tuʼi fakamau kia maua.
34 Kapau la ʼe tuku tana ta au
Pea mo tana fakamatakuʼi au,+
35 ʼE au palalau faʼifaʼitaliha anai ki ai,
He ʼe mole he tupuʼaga ʼo haku mataku ʼi te palalau ki ai.