ʼUluaki Kolonito

8 Ko te meʼa kai leva ʼae neʼe momoli ki te ʼu taula ʼatua,+ ʼe tou iloʼi ʼe tou maʼu fuli ia te ʼatamai malama ʼo ʼuhiga mo te faʼahi ʼaia.+ ʼE fiameʼalahi ia ia ʼae ʼe manatu ʼe lahi te ʼu meʼa ʼae ʼe ina iloʼi, kae ko ʼae ʼe ʼofa ʼe ʼaʼasili malohi ia.+ 2 Kapau ʼe manatu ia he tahi ʼe ina iloʼi he meʼa, ʼe heʼeki ina iloʼi katoa te faʼahi ʼaia. 3 Kae kapau ʼe ʼofa he tahi ki te ʼAtua, ʼe iloʼi e te ʼAtua ia ia ʼaia.

4 Ko te kai leva ʼo te ʼu meʼa kai ʼae ʼe momoli ki te ʼu taula ʼatua, ʼe tou iloʼi ko he taula ʼatua ʼe ko he meʼa noa+ pea ʼe ko te ʼAtua pe ʼe tahi.+ 5 Koteʼuhi logo la ʼe ʼi ai ia natou ʼae ʼe higoa ko he ʼu ʼatua, ʼi te lagi peʼe ʼi te kele,+ ohage pe ko te kaugamalie ʼo te ʼu “ ʼatua” mo te ʼu “ ʼaliki,” 6 kae kia tatou, ʼe ko te ʼAtua pe ʼe tahi,+ ia te Tamai,+ ʼae neʼe ina fakatupu ia meʼa fuli pea ʼe tou maʼuʼuli maʼa te ia.+ Pea ko te ʼAliki pe ʼe tahi, ia Sesu Kilisito,* ʼae neʼe fakatupu ia meʼa fuli ʼaki ia ia+ pea ʼe tou maʼuʼuli ʼaki ia ia.

7 Kae ʼe mole tou maʼu fuli ia te ʼatamai malama ʼaia.+ Ko ʼihi ʼae neʼe tauhi ki te ʼu taula ʼatua ʼi te temi muʼa, ka natou kai he meʼa pea ʼe hage ʼe natou kai te meʼa kai ʼae ʼe momoli ki he taula ʼatua,+ pea ʼe ʼulihi ai ʼonatou leʼo ʼo loto ʼae ʼe vaivai.+ 8 Kae ʼe mole tou fakaovi lahi age tatou ki te ʼAtua ʼaki te meʼa kai.+ ʼE mole fua kovi anai kia tatou moka ʼe mole tou kakai, pea ʼe mole fua lelei anai kia tatou moka ʼe tou kakai.+ 9 Kae kotou tokakaga naʼa liliu te fealagia ʼae ke kotou filifili, ko he meʼa fakatupu tukia kia natou ʼae ʼe vaivai.+ 10 Koteʼuhi kapau ʼe sio atu he tahi kia koe, ʼae ʼe ke maʼu ia te ʼatamai malama, ʼe ke lolotoga kai ʼi te fale lotu ʼo he taula ʼatua, ʼe mole ke fakaneke anai koa ia ia ʼae ʼe vaivai tona leʼo ʼo loto ke ina kai te ʼu meʼa ʼae ʼe momoli ki te ʼu taula ʼatua? 11 Koia ʼaki te ʼatamai malama ʼae ʼe ke maʼu, ʼe ke maumauʼi ai te tui ʼa te tagata ʼae ʼe vaivai, tou tehina ʼae neʼe mate ia Kilisito maʼa ia.+ 12 Ka kotou agahala feia ki ʼokotou tehina pea mo lavea ai ʼonatou leʼo ʼo loto,+ ʼe kotou agahala kia Kilisito. 13 Koia kapau ʼe tukia toku tehina ʼuhi ko te meʼa kai, ʼe mole au toe kai anai he kanoʼi manu, ke mole au fakatupu tukia ai ki toku tehina.+