Lua Petelo
2 Kae neʼe toe ʼi ai foki mo he kau polofeta loi ʼi te lotolotoiga ʼo te hahaʼi, ʼo toe feia pe ʼe toe ʼi ai anai he kau faiako loi ia koutou.+ ʼE natou fakahu fakafufu anai he ʼu magaʼi lotu moʼo maumauʼi takotou tui, ʼe natou fakafisi anai kia ia ʼae neʼe ina totogi natou,+ pea ʼe iku atu aipe anai ki tonatou fakaʼauha. 2 Pea ʼe mulimuli anai te hahaʼi tokolahi ki ʼanatou aga fakalialia,*+ pea ʼuhi ko natou ʼaia, ʼe laukoviʼi anai te ala ʼo te moʼoni.+ 3 Pea ʼi tanatou lotomanumanū, ʼe natou fakaʼaogaʼi anai ni loi ke natou maʼu ai he ʼu lelei mai ia koutou. Kae ko tonatou fakamau, ʼae kua fakatuʼutuʼu talu mai fualoa,+ ʼe mole tauhala anai, pea ʼe hoko moʼoni anai tonatou fakaʼauha.+
4 Neʼe tauteaʼi e te ʼAtua te kau ʼaselo ʼae neʼe agahala,+ ʼo ina li natou ki te Taletale,*+ mo seiniʼi natou ʼi te* fakapoʼuli gaogao ʼo fakaatalitali ki te fakamau.+ 5 Pea neʼe ina tauteaʼi he malama ʼafeā,+ kae neʼe ina haofaki ia Noe, te tagata faifakamafola ʼo te faitotonu,+ pea mo te foʼi toko fitu+ ʼi te temi ʼae neʼe ina fakato ai he tulivio ki he malama ʼe mole fakaʼapaʼapa ki te ʼAtua.+ 6 Pea ʼi tana tutu katoa te ʼu kolo ko Sotoma mo Komola, neʼe ina tauteaʼi natou,+ ʼo ina tuku ai ki te hahaʼi ʼae ʼe mole fakaʼapaʼapa ki te ʼAtua he faʼifaʼitaki ʼo te ʼu meʼa ʼae ʼe tonu ke hoko mai.+ 7 Pea neʼe ina haofaki te tagata faitotonu ko Lote,+ ʼae neʼe lotomamahi ʼaupito ʼuhi ko te ʼu aga fakalialia* ʼa te hahaʼi agakovi 8 (koteʼuhi ʼi te ʼaho fuli neʼe mamahi te loto* ʼo te tagata faitotonu ʼaia ʼuhi ko te ʼu agakovi ʼae neʼe sio pea mo logo ki ai ʼi tana nofo ʼi te lotolotoiga ʼo natou). 9 Koia, ʼe iloʼi e Sehova* te haofaki mai te ʼahiʼahi ia te hahaʼi ʼae ʼe pipiki kia te ia,+ mo te taupau ʼo te hahaʼi heʼe faitotonu ke fakaʼauha natou ʼi te ʼaho ʼo te fakamau,+ 10 tafito ia natou ʼae ʼe natou kumi ke natou fai he ʼu felaveʼi fakasino mo ʼihi ke ʼulihi ai natou,+ pea mo natou meʼa noaʼi ia ia ʼae ʼe takitaki.*+
ʼE natou agapauʼu, mo logogataʼa pea ʼe mole natou matataku ʼi te laukoviʼi ia natou ʼae ʼe fakamaʼuhigaʼi e te ʼAtua, 11 kae ko te kau ʼaselo, logo la ʼe lahi age tonatou malohi pea mo ʼonatou fealagia, ʼe mole natou tukugakoviʼi te kau faiako loi ʼaki ni palalau kovi, he ʼe natou fakaʼapaʼapa kia* Sehova.*+ 12 Kae ko te ʼu tagata ʼaia, ʼe natou laukovi ʼo ʼuhiga mo ni meʼa ʼe mole natou iloʼi.+ ʼE fakaʼauha anai natou ʼuhi ko ʼanatou aga ʼae ʼe kovi, he ʼe natou hage ko te ʼu manu ʼae ʼe mole fakakaukau kae ʼe natou mulimuli pe ki tonatou faʼahiga poto, pea neʼe tutupu ke puke mo fakaʼauha. 13 ʼE tau anai te ʼu tagata ʼaia mo te ʼu mamahi, ko te fua ʼaia ʼo ʼanatou agakovi.
ʼE natou fiafia ʼi te fakahoko ʼo ʼonatou holi ʼo te kakano,+ maʼia mo te ʼaho. ʼE natou hage ko he ʼu pulepule pea mo he ʼu mele, ʼe natou leleiʼia* ʼanatou akonaki kaka lolotoga tanatou kakai ʼae mo koutou.+ 14 ʼE fonu ʼonatou mata ʼi te tono,+ ʼe mole feala ke natou liʼaki te agahala pea ʼe natou fakahalaʼi natou* ʼae ʼe vaivai. ʼE fonu ʼonatou loto ʼi te manumanū.* ʼE natou malaʼia. 15 Kua natou hehe koteʼuhi neʼe natou liʼaki te ala ʼae ʼe totonu. Neʼe natou muliʼi te ala ʼo Palaame,+ foha ʼo Peoli, ʼae neʼe ina fia maʼu te totogi ʼo te aga ʼae ʼe kovi,+ 16 kae neʼe fakatonutonuʼi ia ia he neʼe talagataʼa ki te meʼa ʼae ʼe totonu.+ Ko te asino ʼe ko he manu ʼe mole palalau, kae neʼe palalau ʼaki te leʼo ʼo te tagata moʼo taʼofi te agavale ʼa te polofeta.+
17 Ko natou ʼaia ʼe ko he ʼu matapuna vai mamaha, mo he kakapu ʼe feʼaveʼaki ʼi he afā, pea kua taʼofi maʼa natou te fakapoʼuli gaogao.+ 18 ʼE natou fiaha ʼi ʼanatou palalau kae ʼe ko he ʼu palalau vaʼiganoa. ʼAki tanatou fakaʼaogaʼi te ʼu holi ʼo te kakano+ pea mo te ʼu aga fakalialia,* ʼe natou fakahalaʼi te hahaʼi ʼae neʼe hoki hao mai ia natou ʼae ʼe maʼuʼuli ʼi te agahala.+ 19 ʼE natou fakapapauʼi age te ʼateaina, kae ʼe natou popula mo natou ki te agahala.+ Koteʼuhi ʼe popula he tahi ki ʼae* ʼe pule kia ia.+ 20 ʼE mahino ia, kapau ʼe natou toe fai te ʼu meʼa kovi ʼaia pea mo puleʼi natou e te ʼu meʼa ʼaia, hili tanatou hao mai te ʼuli ʼo te malamanei+ ʼaki te ʼatamai malama totonu ʼo ʼuhiga mo Sesu Kilisito* te ʼAliki mo te Fakamaʼuli, kua kovi age tonatou aluʼaga fakamuli ʼi tona kamata.+ 21 Neʼe lelei age kia natou hanatou mole iloʼi lelei te ala ʼo te faitotonu, ʼi hanatou iloʼi pea mo natou lituʼa ki muli age ki te fakatotonu maʼoniʼoni ʼae neʼe fakaha age kia natou.+ 22 Kua hoko kia natou te taʼaga lea ʼaeni: “Kua toe liliu te kuli ʼo kai tona lua pea ko te siga manu ʼae neʼe fakamaʼa kua toe liliu ʼo teka makafulifuli ʼi te pela.”+