Te ʼu Gaue ʼa Te Kau Apositolo

18 Hili ia, neʼe mavae mai Ateni ʼo alu ki Kolonito. 2 Neʼe ina maʼu ai te tagata Sutea neʼe higoa ko Akila,+ neʼe tupu ʼi te koga fenua ʼo Ponito. Neʼe hoki tau age pe mai Italia mo tona ʼohoana ko Pilisila, koteʼuhi neʼe fakatotonu e te hau ko Kolote ke mavae te kau Sutea fuli ʼi Loma. Neʼe alu leva ia Paulo kia naua. 3 Neʼe tatau tanatou gaue, ʼae ko te faʼu ʼo he ʼu fale la, koia neʼe nofo ai ʼi tonā ʼapi ʼo gaue mo naua.+ 4 Pea ʼi te sapato fuli,+ neʼe faiakonaki ia Paulo ʼi te sinakoka+ ʼo fakalotoʼi te kau Sutea mo te kau Keleka ke natou tui.

5 ʼI te hifo mai ʼa Silasi+ mo Timoteo+ mai Masetonia, neʼe tokaga tafito leva ia Paulo ʼo fakamafola te folafola, ʼo fakamoʼoni ki te kau Sutea ko Sesu ʼe ko Kilisito.*+ 6 Kae ʼi tanatou haga fakafeagai mo laukovi kia ia, neʼe ina tūtū leva ʼona kofu+ pea mo ina ui kia natou: “Kapau ʼe mole haofaki koutou, ʼe ko takotou pe hala,+ ʼe mole ko taku ia hala.+ ʼI te temi leva ʼaeni, ʼe au alu anai ki te hahaʼi ʼae ʼe mole Sutea.”+ 7 Koia neʼe mavae mai ai* ʼo alu ki te ʼapi ʼo Titiasi Susito, ko he tagata neʼe atolasio ki te ʼAtua pea neʼe pipiki tona ʼapi ki te sinakoka. 8 Kae neʼe tui leva ki te ʼAliki ia Kilisipusi,+ te pule ʼo te sinakoka, ʼo feia mo tona loto fale katoa. Pea tokolahi te kau Kolonito ʼae neʼe fagono ki te logo lelei, neʼe natou tui mo papitema. 9 Pea neʼe ui e te ʼAliki kia Paulo ʼi te meʼa neʼe ha age ki ai ʼi te poʼuli: “ ʼAua naʼa ke mataku, kae ke haga palalau pea ʼaua naʼa ke fakalogologo, 10 koteʼuhi ʼe au nofo mo koe.+ ʼE mole he tahi anai ʼe ina ʼohofi pea mo gaohi koviʼi koe, he ʼe lahi taku hahaʼi ʼi te kolo ʼaia ʼe kei toe ke fakatahiʼi.” 11 Koia neʼe nofo ʼi ai ʼi te taʼu katoa mo mahina ʼe ono, ʼo ina akoʼi kia natou te folafola ʼa te ʼAtua.

12 ʼI te temi ʼae neʼe kovana ai ia Kalione ʼi Akaia, neʼe fakafeagai fakatahi te kau Sutea kia Paulo mo natou ʼave ki te fakamauʼaga. 13 Neʼe natou ui: “ ʼE akoʼi e te tagata ʼaeni ia te hahaʼi ke natou atolasio ki te ʼAtua ʼi hona faʼahiga fai ʼe fakafeagai ki te lao.” 14 Kae ʼi te ʼamanaki palalau ʼa Paulo, neʼe ui e Kalione ki te kau Sutea: “Hahaʼi Sutea, kapau ʼe ko he aga ʼe kovi peʼe ko he hala mamafa, ʼe lelei anai ke au kataki ʼo fagono atu. 15 Kae kapau ʼe ko he ʼu fihi ʼo ʼuhiga mo he ʼu kupu, mo he ʼu higoa pea ʼo ʼuhiga mo takotou lao,+ ʼe ʼa koutou pe tona fakatokatoka. ʼE mole au loto ke au fakamauʼi te ʼu faʼahi ʼaia.” 16 Hili ia, neʼe ina kapu natou mai te fakamauʼaga. 17 Neʼe natou puke fuli leva ia Sositene,+ te pule ʼo te sinakoka, pea natou ta ʼi muʼa ʼo te fakamauʼaga. Kae neʼe mole tokagaʼi e Kalione te ʼu faʼahi ʼaia.

18 Neʼe nofo fualoa ia Paulo ʼi ai, hili leva, neʼe tauʼine ki te ʼu tehina pea neʼe folau vaka ki Silia, fakatahi mo Pilisila mo Akila. Neʼe kosi mumutu tona ʼulu ʼi Senikelea,+ koteʼuhi neʼe ina fai he fakapapau. 19 Neʼe natou tau leva ki Efeso, pea neʼe ina tuku naua ʼi ai, kae neʼe hu ia ki te sinakoka ʼo faipalalau mo te kau Sutea ʼo fakatafito ki te ʼu Tohi Taputapu.+ 20 Logo la tanatou haga kole ʼae ke nofo mo natou, neʼe mole loto ia ki ai 21 kae neʼe tauʼine kia natou ʼo ina ui: “ ʼE au toe liliu mai anai mo kapau ʼe ko te finegalo ʼaia ʼo Sehova.”* Neʼe heka leva ki he vaka ʼi Efeso 22 ʼo hifo ki Sesalea. Pea neʼe hake* ʼo fakafelaveʼi mo te kokelekasio pea neʼe hifo leva ki Atiokia.+

23 Hili tana nofo ai ʼi he kiʼi temi, neʼe mavae leva ʼo alu ʼo ʼaʼahi te ʼu koga meʼa kehekehe ʼo te fenua ʼo Kalate pea mo Filisia,+ ʼo fakalotomalohiʼi te ʼu tisipulo fuli.+

24 Neʼe tau leva ki Efeso ia Apolose,+ te tagata Sutea neʼe tupu ʼi Alesatelia. Neʼe ko he tagata poto palalau pea neʼe ina iloʼi lelei te ʼu Tohi Taputapu. 25 Neʼe akoʼi* age ki ai te ala ʼo Sehova,* pea ʼaki te laumalie maʼoniʼoni neʼe faʼafai, pea neʼe totonu tana faiakonaki mo tana palalau ʼo ʼuhiga mo Sesu. Kae neʼe mahino pe ia ki te papitema ʼa Soane. 26 Neʼe palalau leva mo he lototoʼa ʼi te sinakoka. ʼI te logo ʼa Pilisila mo Akila+ ki ai, neʼe nā toʼo ia ia ʼo nā fakamahino lelei age te ala ʼo te ʼAtua. 27 ʼI tana fia alu leva ki Akaia, neʼe faitohi ai te ʼu tehina ki te ʼu tisipulo, ʼo natou kole ke natou fakatalitali leleiʼi ia ia. Pea ʼi tana tau atu, neʼe tokoni lahi kia natou ʼae neʼe liliu ko he ʼu tisipulo ʼuhi ko te ʼofa makehe ʼo te ʼAtua. 28 Neʼe ina fakamoʼoni fakamalotoloto ia muʼa ʼo te hahaʼi ʼe hala te manatu ʼa te kau Sutea, ʼo ina fakaha kia natou ʼaki te ʼu Tohi Taputapu ko Sesu ʼe ko Kilisito.+