ʼUluaki Hau

18 Hili he temi ki ai, ʼi te tolu taʼu,+ neʼe ui e Sehova kia Elia: “Alu kia Akapo, pea ʼe au fakato anai te ʼua ki te fuga kele.”+ 2 Neʼe alu ai ia Elia kia Akapo, pea neʼe kua kovi ʼosi te hoge+ ʼi Samalia.

3 Lolotoga te temi ʼaia, neʼe pauʼi e Akapo ia Apetiasi, ʼae neʼe tokaga ki te fale hau. (Neʼe manavasiʼi lahi ia Apetiasi kia Sehova. 4 ʼI te temi ʼae neʼe tamateʼi ai e Sesapele+ te kau polofeta ʼa Sehova, neʼe toʼo e Apetiasi he kau polofeta ʼe toko 100 ʼo fakanono natou, ʼo taki toko 50 ʼi te ʼana. Neʼe ina ʼave leva kia natou he ʼu foʼi pane pea mo he vai.) 5 Pea neʼe ui e Akapo kia Apetiasi: “Alu ʼi te fenua ki te ʼu matapuna vai mo te ʼu vai tafe fuli. ʼE lagi feala anai ke tou maʼu he luna moʼo fafaga ʼaki te ʼu hosi mo te ʼu asino lalahi naʼa mamate ʼatatou manu fuli.” 6 Neʼe nā vaevae ai te fenua ʼae neʼe tonu ke nā olo ai. Neʼe alu tokotahi leva ia Akapo ʼi te tahi ala kae alu tokotahi ia Apetiasi ʼi te tahi age ala.

7 ʼI te alu ʼaia ʼa Apetiasi, neʼe haʼu ia Elia ʼo fakafelaveʼi ki ai. Neʼe ina iloʼi atu aipe ko ia, pea neʼe tulolo ifo ʼo ina ui age: “ ʼE ko koe koa, siʼoku ʼaliki ko Elia?”+ 8 Neʼe ina tali age: “ ʼEi, ko au. Alu pea ke ui ki tou ʼaliki: ‘ ʼE ʼi heni ia Elia.’ ” 9 Kae neʼe ina ui age: “Kotea koa te agahala ʼae neʼe au fai ke ke tuku ai au ki te ʼu nima ʼo Akapo ke ina matehi au? 10 ʼE au tala moʼoni atu ia muʼa ʼo Sehova, tou ʼAtua maʼuli, neʼe fekauʼi e toku ʼaliki ke olo ni tagata ʼo kumi koe ʼi te ʼu fenua mo te ʼu puleʼaga fuli. Pea ʼi te ʼosi ui e te hahaʼi ʼo te ʼu puleʼaga mo te ʼu fenua ʼaia: ‘ ʼE mole ʼi heni,’ neʼe ina fakatotonu ke natou fakapapau neʼe mole feala ke natou maʼu koe.+ 11 Pea ʼi te temi leva ʼaeni, ʼe ke ui mai: ‘Alu ki tou ʼaliki ʼo ke ui age: “ ʼE ʼi heni ia Elia.” ’ 12 Ka au mavae anai mai ia koe, ʼe ʼave anai koe e te laumalie ʼo Sehova+ ki he faʼahi ʼe mole au iloʼi anai, pea kapau ʼe au fakaha age kia Akapo ʼe ke ʼi heni kae mole ina maʼu koe, ʼe ina matehi moʼoni anai au. Kae ʼe au manavasiʼi kia Sehova talu mai taku kei veliveli. 13 Siʼoku ʼaliki, neʼe mole fakaha atu koa la te meʼa ʼae neʼe au fai ʼi te temi ʼae neʼe matehi ai e Sesapele te kau polofeta ʼa Sehova, ʼi taku fakanono he ʼu polofeta ʼa Sehova ʼe toko 100, ʼo taki toko 50 ʼi te ʼana pea mo taku ʼave kia natou he ʼu foʼi pane pea mo he vai?+ 14 Kae ʼe ke ui mai leva koe ʼi te temi nei: ‘Alu ki tou ʼaliki ʼo ke ui age: “ ʼE ʼi heni ia Elia.” ’ ʼE ina matehi moʼoni anai au.” 15 Kae neʼe ui age e Elia: “ ʼE au tala moʼoni atu ia muʼa ʼo Sehova ʼo te ʼatu kautau ʼae ʼe au tauhi ki ai,* ʼe au tuʼu anai ʼi te ʼaho nei ia muʼa ʼo te hau.”

16 Neʼe alu ai ia Apetiasi kia Akapo pea neʼe ina fakaha age ki ai. Neʼe alu leva ia Akapo ʼo fakafelaveʼi kia Elia.

17 ʼI te temi pe ʼae neʼe sio ai ia Akapo kia Elia, neʼe ina ui age: “ ʼE ko koe koa ʼae ʼe ke fakatupu te mamahi lahi ʼaeni ʼi Iselaele?”

18 Neʼe ina tali age: “Neʼe mole au fakatupu he mamahi ʼi Iselaele, kae ʼe ko koe mo te famili ʼo tau tamai, he neʼe kotou liʼaki te ʼu fakatotonu ʼa Sehova pea mo kotou tauhi ki te ʼu Paale.+ 19 Pea ʼi te temi nei, ke ke fakamaʼopoʼopo mai ia Iselaele katoa kia au ʼi te Moʼuga ʼo Kalemelo,+ ʼo feia mo te kau polofeta ʼe toko 450 ʼa Paale pea mo te kau polofeta ʼe toko 400 ʼae ʼe tauhi ki te pou ʼakau taputapu,*+ ʼae ʼe kakai ʼi te laupapa ʼa Sesapele.” 20 Neʼe fekauʼi ai e Akapo he ʼu tagata ʼave logo ke natou olo ki te hahaʼi fuli ʼo Iselaele pea neʼe ina fakatahitahiʼi ai te kau polofeta ki te Moʼuga ʼo Kalemelo.

21 Neʼe fakaovi leva ia Elia ki te hahaʼi fuli pea neʼe ina ui age: “ ʼE kaku anai ki ʼafea takotou lotolotolua?+ Kapau ko Sehova ʼe ko te ʼAtua moʼoni, kotou muliʼi ia ia,+ kae kapau ʼe ko Paale, kotou muliʼi ia ia!” Kae neʼe mole fegufi te hahaʼi. 22 Pea neʼe ui e Elia kia natou: “ ʼE ko au tokotahi pe ʼi te kau polofeta ʼa Sehova ʼae kei toe,+ kae ko te kau polofeta ʼa Paale ʼe ko te toko 450 tagata. 23 Kotou foaki mai he ʼu vitulo mui ʼe lua, pea ke natou filifili hanatou vitulo mui, pea ke natou taʼataʼaga pea mo hili ki te fafie, kae ʼaua naʼa natou tutu. ʼE au teuteuʼi anai te tahi vitulo mui, pea mo au hili anai ki te fafie, kae ʼe mole au tutu anai. 24 Pea ʼe tonu anai ke natou pauʼi te huafa ʼo tonatou ʼatua,+ pea ko au, ʼe au pauʼi anai te huafa ʼo Sehova. Pea ko te ʼAtua ʼae ka tali mai ʼaki tana tutu te sakilifisio, ʼe ina fakaha anai ʼe ko ia te ʼAtua moʼoni.”+ Neʼe tali age e te hahaʼi fuli: “ ʼE lelei ʼau palalau.”

25 Neʼe ui leva e Elia ki te kau polofeta ʼa Paale: “ ʼE ko koutou ʼae ka kotou ʼuluaki filifili hakotou vitulo mui pea mo teuteuʼi, he ʼe kotou kaugamalie. Pea kotou pauʼi leva te huafa ʼo tokotou ʼatua, kae ʼaua naʼa kotou tutu takotou sakilifisio.” 26 Koia, neʼe natou toʼo ai te vitulo mui ʼae neʼe foaki age kia natou, pea neʼe natou teuteuʼi mo haga pauʼi te huafa ʼo Paale, mai te uhu ʼo kaku ki te fetapa, ʼo natou ui: “Paale, tali mai kia matou!” Kae neʼe mole ha he leʼo pea neʼe mole tali age e he tahi.+ Neʼe hoko atu pe tanatou makahopohopo ʼi te takafoli ʼo te ʼaletale ʼae neʼe natou fai. 27 ʼI te vaʼevaʼe fetapa, neʼe kamata manukiʼi natou e Elia, ʼo ina ui: “Kotou pauʼi ʼi tokotou malohi katoa, he ʼe ko ia ko he ʼatua!+ ʼE lagi tuku tana fakakaukau ki he tahi age meʼa, peʼe kua alu ia ki te tuʼa meʼa.* Peʼe lagi moe, pea ʼe tonu ke fafagu ia ia e he tahi!” 28 Neʼe natou pauʼi ai ʼi tonatou malohi katoa pea mo hifi ʼonatou sino ʼaki ni hele mo ni tao, ʼo mulimuli ki tanatou agaʼi fenua, ʼo kaku ki te hali ʼo tonatou toto ki tonatou sino katoa. 29 Neʼe kua ʼosi fakalaka te fetapa kae neʼe hoko atu pe tanatou memeʼe ʼi tonatou malohi katoa* ʼo kaku ki te temi ʼae ʼe momoli ai te molaga meʼa kai ʼo te afiafi. Kae neʼe mole ha he leʼo pea neʼe mole tali age e he tahi. Neʼe mole tokagaʼi natou e he tahi.+

30 Ki muli age leva, neʼe ui e Elia ki te hahaʼi fuli: “Kotou fakaovi mai.” Neʼe fakaovi age te hahaʼi fuli kia ia. Neʼe ina toe faʼu foki te ʼaletale ʼo Sehova ʼae neʼe kua maumauʼi.+ 31 Pea neʼe toʼo e Elia te ʼu foʼi maka ʼe 12, ʼo mulimuli ki te lahi ʼo te ʼu telepi ʼo te ʼu foha ʼo Sakopo, ʼae neʼe ui age e Sehova ki ai: “ ʼE ke higoa anai ko Iselaele.”+ 32 Neʼe ina faʼu ʼaki te ʼu foʼi maka ʼaia he ʼaletale+ ki te huafa ʼo Sehova. Neʼe ina keli leva he tafega vai ʼi te takafoli ʼo te ʼaletale, neʼe tatau te lahi ʼo te faʼahi ʼae neʼe ʼa takai e te tafega vai mo he gaueʼaga neʼe nunusi ai he fua sea* pulapula ʼe lua. 33 Hili ʼaia, neʼe ina teuteuʼi te fafie, mo taʼataʼaga te vitulo mui, pea neʼe ina hili leva ki te fafie.+ Pea neʼe ina ui: “Kotou fakafonu he ʼu ʼaiʼaga vai lalahi ʼe fa pea mo kotou huhua ki te holokoseta mo te fafie.” 34 Neʼe ina ui leva: “Toe ʼai!” Neʼe natou toe ʼai ai. Pea neʼe ina toe ui: “Toe ʼai ko tona tuʼa tolu ʼaia.” Neʼe natou toe ʼai ai ko tona tuʼa tolu ʼaia. 35 Pea neʼe tafe leva te vai ʼi te ʼu tafaʼaki ʼo te ʼaletale pea neʼe ina toe fakafonu foki mo te tafega vai.

36 ʼI te temi ʼae ʼe momoli ai te molaga meʼa kai ʼo te afiafi,+ neʼe fakaovi te polofeta ko Elia ki te ʼaletale pea neʼe ina ui: “Sehova e, te ʼAtua ʼo Apalahamo,+ mo Isaake+ pea mo Iselaele, ke iloʼi ʼi te ʼaho nei ko koe te ʼAtua ʼo Iselaele pea ko au ko tau tagata faifekau, pea neʼe au fai te ʼu meʼa fuli ʼaeni he neʼe ke fakatotonu mai.+ 37 Sehova e, ke ke tali mai! Tali mai, ke iloʼi ai e te hahaʼi ʼaeni ko koe Sehova te ʼAtua moʼoni pea ʼe ke loto ke toe maliu mai ʼonatou loto kia te koe.”+

38 ʼI te temi pe ʼaia, neʼe hifo mai leva te afi ʼa Sehova ʼo tutu te holokoseta,+ mo te fafie, mo te ʼu maka pea mo te efu, pea neʼe toe magemage ai foki mo te tafega vai.+ 39 ʼI te sisio ʼa te hahaʼi fuli ki te meʼa ʼaia, neʼe natou tulolo atu aipe pea mo ui: “Ko Sehova ʼe ko te ʼAtua moʼoni! Ko Sehova ʼe ko te ʼAtua moʼoni!” 40 Pea neʼe ui leva e Elia kia natou: “Kotou puke te kau polofeta ʼa Paale! ʼAua naʼa kotou tuku ke hola he tahi ia natou!” Neʼe natou puke atu aipe ia natou, ʼo ʼave ai e Elia ki te vai tafe ʼo Kisone+ pea neʼe ina matehi ai natou.+

41 Pea neʼe ui e Elia kia Akapo: “Hake, pea ke kai mo inu, he ʼe au logo ki te logoaʼa ʼo he toe ʼua lahi.”+ 42 Neʼe hake ai Akapo ʼo kai pea mo inu, kae neʼe alu ia Elia ki te tumutumu ʼo te moʼuga ʼo Kalemelo pea neʼe tulolo ki te kele.+ 43 Neʼe ina ui leva ki tana tagata faifekau: “Fakalelei siʼou loto, kae ke ke hake ʼo sio ki te tai.” Neʼe alu ai ʼo sio pea neʼe ina ui: “ ʼE mole ʼi ai he meʼa.” Neʼe tuʼa fitu te ui age e Elia ki ai: “Toe hake.” 44 ʼI tona tuʼa fitu leva, neʼe ui e tana tagata faifekau: “Koʼeni, ʼe malaga ake mai te tai he kiʼi ʼao veliveli pe ohage ko te nima ʼo he tagata.” Neʼe ina ui age: “Alu ʼo ui kia Akapo: ‘Teuteuʼi tau saliote, pea ke hifo naʼa maʼu mai koe e te ʼua!’ ” 45 Lolotoga te temi ʼaia, neʼe fakapoʼuli katoa te lagi, mo agi lalahi leva te matagi pea neʼe to he toe ʼua lahi.+ Pea neʼe kei alu pe ia Akapo ʼi tana saliote ki Siseleele.+ 46 Kae neʼe foaki e Sehova te malohi kia Elia, pea neʼe ina haʼi tona kofu ki tona koga loto pea neʼe lele leva ʼo kaku ki Siseleele, ʼo ina mulihi ia Akapo.