ʼUluaki Hau

16 Neʼe fakaha leva e Sehova ʼaki ia Seu,+ te foha ʼo Hanani+ tana tauteaʼi ia Paesa, ʼo ina ui: 2 “Neʼe au toʼo ake koe mai te efu ʼo au fakanofo koe ke ke pule ki Iselaele, taku hahaʼi.+ Kae neʼe ke haga faʼifaʼitakiʼi pe te aga ʼa Selopoamo pea mo ke uga ia Iselaele, taku hahaʼi ke natou agahala, ʼo natou fakatupu ai toku hauhau ʼuhi ko ʼanatou agahala.+ 3 Koia Paesa, ʼe au tafiʼi anai ia koe mo tou famili, pea ʼe au fai anai ki tou famili te meʼa pe ʼae neʼe au fai ki te famili ʼo Selopoamo,+ te foha ʼo Nepate. 4 Ko he tahi pe ʼo tou famili ʼe mate ʼi te kolo, ʼe kai anai e te ʼu kuli. Pea ko he tahi pe ʼo tou famili ʼe mate ʼi te tuʼa kolo, ʼe kai anai e te ʼu manulele.”

5 Pea ko te toe ʼo te hisitolia ʼo Paesa, te ʼu meʼa ʼae neʼe ina fai pea mo tona malohi, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 6 Neʼe mate leva ia Paesa* pea neʼe ʼavaifo ʼi Tilitesa.+ Pea neʼe hau tona foha ko Ela, ʼo fetogi ia ia. 7 Tahi ʼae meʼa, neʼe fakaha e Sehova ʼaki te polofeta ko Seu, te foha ʼo Hanani, tana tauteaʼi ia Paesa mo tona famili ʼuhi ko te ʼu agakovi fuli ʼae neʼe ina fai ia muʼa ʼo Sehova. Neʼe ina fakatupu ai tona hauhau ʼuhi ko ʼana aga, pea neʼe liliu ai ohage ko te famili ʼo Selopoamo. Pea neʼe toe tauteaʼi foki ʼuhi ko tana matehi ia ia.*+

8 ʼI te 26 taʼu ʼo te pule ʼa Asa, te Hau ʼo Suta, neʼe liliu leva ia Ela, te foha ʼo Paesa ko te hau ʼo Iselaele ʼi Tilitesa, pea neʼe pule lolotoga taʼu ʼe lua. 9 Pea ko tana tagata faifekau ko Simili, te pule ʼo te vaelua ʼo te kau solia taki saliote, neʼe ina fakatuʼutuʼu ke ina matehi ia ia. Neʼe nofo ia Ela ʼi Tilitesa ʼo inu ai ki tana konahia ʼosi ʼi te fale ʼo Aletesa, ʼae neʼe tokaga ki te fale hau. 10 Neʼe haʼu ai ia Simili ʼo matehi ia ia+ ʼi te 27 taʼu ʼo te pule ʼa Asa, te Hau ʼo Suta, pea neʼe hau leva ʼo fetogi ia ia. 11 ʼI te temi pe ʼae neʼe hau ai, pea neʼe heka ai ki tona hekaʼaga fakahau, neʼe ina matehi te famili katoa ʼo Paesa. Neʼe mole ina tuku ke hao he tagata* ʼi ʼona kaiga* pea mo ʼona kaumeʼa. 12 Neʼe pulihi katoa ai e Simili te famili ʼo Paesa, ohage ko tona fakaha e Sehova ʼaki te polofeta ko Seu ʼo ʼuhiga mo tana tauteaʼi ia Paesa.+ 13 Neʼe hoko te faʼahi ʼaia ʼuhi ko te ʼu agahala fuli ʼae neʼe fai e Paesa mo tona foha ko Ela pea mo te ʼu agahala ʼae neʼe nā uga ke fai e Iselaele, ʼo natou fakatupu ai te hauhau ʼo Sehova, te ʼAtua ʼo Iselaele ʼaki ʼanatou fakatata vaʼiganoa.+ 14 Pea ko te toe ʼo te hisitolia ʼo Ela, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele?

15 ʼI te 27 taʼu ʼo te pule ʼa Asa, te Hau ʼo Suta, neʼe hau leva ia Simili ʼi Tilitesa lolotoga ʼaho ʼe fitu. ʼI te temi ʼaia, neʼe fakatuʼu e te kau solia tonatou nofoʼaga ʼo ovi ki Kipetoni+ ke natou tauʼi ai te kolo ʼaia, ʼae neʼe maʼu e te kau Filisitini. 16 Neʼe logo leva te kau solia ʼae ʼi te nofoʼaga ki te ui: “Neʼe fakatuʼutuʼu e Simili ke ina matehi te hau, pea neʼe ina matehi leva te hau.” Koia, ʼi te ʼaho ʼaia, ʼi te nofoʼaga, neʼe fakanofo e te kau solia fuli* ia Omeli,+ te pule ʼo te foʼi kautau, ke hau ki Iselaele. 17 Neʼe mavae ia Omeli mo te kau solia fuli* mai Kipetoni ʼo natou olo ʼo ʼa takai ia Tilitesa. 18 ʼI te sio leva ʼa Simili ki te kua to ʼo te kolo, neʼe alu ki te tule malohi ʼo te fale hau, ʼo ina tutu te fale hau, ʼo mate ai ʼi loto.+ 19 Neʼe hoko te faʼahi ʼaia ʼuhi ko te ʼu agahala ʼae neʼe ina fai, ʼi tana fai te meʼa ʼae ʼe kovi kia mata ʼo Sehova ʼo ina faʼifaʼitakiʼi te aga ʼa Selopoamo, pea ʼuhi ko te agahala ʼae neʼe ina uga ke fai e Iselaele.+ 20 Pea ko te toe ʼo te hisitolia ʼo Simili pea mo te meʼa ʼae ʼe kovi neʼe ina fakatuʼutuʼu, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele?

21 ʼI te temi ʼaia, neʼe vaelua ai leva te hahaʼi ʼo Iselaele. Neʼe mulimuli te tahi vaelua ʼo te hahaʼi ia Tipeni, te foha ʼo Kinate, ʼo natou fia fakanofo hau ia ia, pea neʼe mulimuli te tahi age vaelua ia Omeli. 22 Kae neʼe malo te hahaʼi ʼae neʼe mulimuli ia Omeli ʼi te hahaʼi ʼae neʼe mulimuli ia Tipeni, te foha ʼo Kinate. Neʼe mate leva ia Tipeni, pea neʼe hau ia Omeli.

23 ʼI te 31 taʼu ʼo te pule ʼa Asa, te Hau ʼo Suta, neʼe hau leva ia Omeli ki Iselaele pea neʼe pule lolotoga taʼu ʼe 12. Neʼe pule ʼi Tilitesa lolotoga taʼu ʼe ono. 24 Pea neʼe ina totogi kia Samele te moʼuga ʼo Samalia ʼaki ia taleta* siliva ʼe lua, pea neʼe ina laga he kolo ʼi te moʼuga ʼaia. Neʼe ina fakahigoa te kolo ʼae neʼe ina laga ko Samalia,*+ he neʼe higoa ko Samele ia ia ʼae neʼe ʼaʼana* te moʼuga. 25 Neʼe haga fai pe e Omeli te meʼa ʼae ʼe kovi kia mata ʼo Sehova, pea neʼe kovi age tana aga ia natou fuli ʼae neʼe muʼamuʼa atu ia ia.+ 26 Neʼe ina faʼifaʼitakiʼi te ʼu aga fuli ʼa Selopoamo, te foha ʼo Nepate pea mo te agahala ʼae neʼe uga e Selopoamo ke fai e Iselaele, ʼo natou fakatupu ai te hauhau ʼo Sehova, te ʼAtua ʼo Iselaele ʼaki ʼanatou fakatata vaʼiganoa.+ 27 Pea ko te toe ʼo te hisitolia ʼo Omeli, te ʼu meʼa ʼae neʼe ina fai pea mo ʼana malo ʼi te tau, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 28 Neʼe mate leva ia Omeli* pea neʼe ʼavaifo ʼi Samalia. Pea neʼe hau leva tona foha ko Akapo,+ ʼo fetogi ia ia.

29 Neʼe hau te foha ʼo Omeli ko Akapo ki Iselaele ʼi te 38 taʼu ʼo te pule ʼa Asa, te Hau ʼo Suta. Pea neʼe pule te foha ʼo Omeli ko Akapo ki Iselaele ʼi Samalia+ lolotoga taʼu ʼe 22. 30 Kia mata ʼo Sehova, neʼe kovi age te aga ʼa te foha ʼo Omeli ko Akapo ia natou fuli ʼae neʼe muʼamuʼa atu ia ia.+ 31 Neʼe mole feʼauga kia ia tana faʼifaʼitakiʼi te ʼu agahala ʼae neʼe fai e Selopoamo,+ te foha ʼo Nepate, kae neʼe toe ʼohoana foki mo Sesapele,+ te ʼofafine ʼo Etepaale, te hau ʼo te kau Sitoni.+ Pea neʼe kamata tauhi kia Paale+ pea mo tulolo ʼi ʼona muʼa. 32 Tahi ʼae meʼa, neʼe ina laga he ʼaletale kia Paale ʼi te fale* ʼo Paale+ ʼae neʼe ina laga ʼi Samalia. 33 Neʼe toe fai foki e Akapo he pou ʼakau taputapu.*+ Neʼe lahi age te ʼu meʼa ʼae neʼe fai e Akapo moʼo fakatupu te hauhau ʼo Sehova, te ʼAtua ʼo Iselaele ʼi te ʼu hau fuli ʼo Iselaele ʼi muʼa atu.

34 Lolotoga te pule ʼa Akapo, neʼe toe laga e Hiele, te tagata mai Petele ia Seliko. Neʼe mate tona foha lahi ko Apilame ʼi te temi ʼae neʼe ina fakatuʼu ai te ʼu fakatafito, pea neʼe mate tona foha muli ko Sekupe ʼi te temi ʼae neʼe ina ʼai ai te ʼu matapa, ohage pe ko tona fakaha e Sehova ʼaki ia Sosue, te foha ʼo Nune.+