Kia Filemone

1 Ko au Paulo, he tagata pilisoni+ ʼuhi ko Kilisito* Sesu, pea mo totatou tehina ko Timoteo,+ ʼe au faitohi kia Filemone toma kaugā gaue ʼofaina, 2 mo toma tuagaʼane ko Afia, mo Alikipo+ te tagata solia ʼa Kilisito ohage ko maua, pea mo te kokelekasio ʼae ʼe fakatahitahi ʼi tou ʼapi:+

3 Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei.

4 ʼE au fakafetaʼi tuʼumaʼu ki toku ʼAtua moka au manatuʼi ia koe ʼi ʼaku faikole,+ 5 koteʼuhi ʼe au logo tuʼumaʼu ki te palalauʼi ʼo tau tui mo te ʼofa ʼae ʼe ke maʼu ʼo ʼuhiga mo* te ʼAliki ko Sesu ʼo feia aipe ki te kau maʼoniʼoni fuli. 6 ʼE au faikole ke tokoni atu te tui ʼae ʼe ke maʼu fakatahi mo ʼihi, ke ke iloʼi neʼe tou maʼu ia meʼa lelei fuli ʼaki ia Kilisito. 7 Neʼe lahi toku fiafia pea mo toku fimalie ʼi taku logo ki tou ʼofa, tehina, he neʼe ke fakafimalieʼi te loto ʼo te kau maʼoniʼoni.

8 Koia ʼe feala pe ke au palalau fakahagatonu atu ʼi te huafa ʼo Kilisito pea mo fakatotonu atu kia koe te meʼa ʼae ʼe tonu ke ke fai. 9 Kae ʼe au leleiʼia age haku kole mamahi atu kia koe ʼo mulimuli ki te ʼofa, koteʼuhi ko au Paulo ko he tagata kua matuʼa, ʼei, pea mo pilisoni ʼi te temi nei ʼuhi ko Kilisito Sesu. 10 ʼE au fia fai atu taku kole ʼo ʼuhiga mo taku tamasiʼi, ia Onesimo,+ ʼae neʼe au liliu ko tana tamai+ ʼi taku nofo pilisoni.* 11 ʼI te temi muʼa neʼe mole ʼaoga kia koe, kae ʼi te temi nei ʼe ʼaoga kia koe pea mo au. 12 ʼE au toe fekauʼi atu ia ia kia koe, ʼei, ia ia ʼae ʼe au ʼofa mamahi ai.

13 ʼE au loto ke haga nofo mo au ʼi heni, ke ina fetogi koe ʼo tauhi au lolotoga taku nofo pilisoni ʼuhi ko te logo lelei.+ 14 Kae ʼe mole au fia fai he meʼa ʼe mole ke loto ki ai, koteʼuhi ʼe mole tonu ke hage tou ʼofa ko he fakamaʼua, kae ʼe tonu ke ke fai ʼaki he lotolelei.+ 15 ʼE lagi ko te tupuʼaga la ʼaia ʼo tana hola ʼi he kiʼi temi nounou,* ke feala ai ke ke toe maʼu ia ia ʼo talu ai, 16 ʼo mole kei hage leva ko hau kaugana,+ kae ʼe lahi age ia ʼi he kaugana, he ʼe ko hou tehina.+ ʼE au ʼofa lahi ia ia, pea ʼe ke ʼofa lahi age anai koe ia ia, ʼi tona ʼuhiga kaugana pea mo tona ʼuhiga tehina Kilisitiano. 17 Koia kapau ʼe ke fakaʼuhiga au ko hou kaumeʼa, fakatalitali lelei ia ia ohage pe ko hau fakatalitali au. 18 Tahi ʼae, kapau neʼe ina fai atu he meʼa ʼe kovi peʼe tuʼu maʼua kia koe, fakatuʼu te meʼa ʼaia kia au. 19 Ko au Paulo, ʼe au fai atu te tohi ʼaeni pea mo fakapapau atu ʼe hoki au toe huʼi atu pe anai ʼona maʼua. Kae ʼe ke iloʼi pe la ʼe ke toe tuʼu maʼua mo koe kia au. 20 ʼEi, tehina, ʼe au fia maʼu he tokoni mai ia koe ʼi te huafa ʼo te ʼAliki, ke ke fakafimalieʼi toku loto ʼi te huafa ʼo Kilisito.

21 Koia ʼe au faitohi atu kia koe, he ʼe au falala ʼe ke fai anai te meʼa ʼae ʼe au kole atu, pea ʼe au iloʼi ʼe ke fai anai ʼo laka age ʼi te ʼu meʼa ʼae ʼe au ui atu. 22 Pea ke ke toe teuteuʼi mo hoku nofoʼaga, he ʼe au fakaʼamu ʼe fakaʼateainaʼi anai au ʼuhi ko ʼakotou faikole pea ʼe feala ai leva ke au alu atu.+

23 ʼE ʼofa atu ia Epafalasi,+ ʼae ʼe pilisoni fakatahi mo au ʼuhi ko Kilisito Sesu, 24 ʼo toe feia aipe mo Maleko, mo Alisitake,+ mo Temasi+ pea mo Luka,+ ʼoku kaugā gaue.

25 Ke tapuakiʼi te faʼahiga manatu ʼae ʼe kotou fakaha ʼaki te ʼofa makehe ʼo te ʼAliki ko Sesu Kilisito.