Tuʼi Fakamau
15 Ki muli age, ʼi te temi ʼae ʼe tuʼusi ai te fulumeto, neʼe alu ia Samisoni ʼo fakasiosio tona ʼohoana mo he tao kei mui. Neʼe ina ui: “ ʼE au fia hu ki te koga fale ʼo toku ʼohoana.” Kae neʼe mole tali e te tamai ʼo tona ʼohoana. 2 Neʼe ina fakamahino age: “Neʼe au manatu ai: ‘ ʼE mahino ia, kua fehiʼa ia Samisoni ia ia.’+ Koia neʼe au foaki ia ia ki he tahi ʼi te ʼu tama tupulaga ʼae neʼe olo fakatahi mo koe ʼi tau haʼu ʼo ʼohoanaʼi ia ia.+ ʼE mole finemui age koa la tona kiʼi tehina veliveli? Fakalelei siʼou loto, ʼave koe ia ia.” 3 Kae neʼe ui e Samisoni: “ ʼI te faiʼaga leva ʼaeni, ʼe mole feala anai ke tukugakoviʼi au e te kau Filisitini, mo kapau ʼe au fai he meʼa ʼe kovi kia natou.”
4 Neʼe alu ai ia Samisoni ʼo puke lenato ʼe 300, pea ina toʼo taki lua ʼo haʼi ʼi ʼonā hiku. Neʼe ina toe haʼi ki ai he taume. 5 Neʼe ina tutu leva te ʼu taume pea ina tuku age te ʼu lenato ke olo ki te ʼu gaueʼaga ʼa te kau Filisitini. Neʼe kei maʼu ai te fulumeto. Neʼe vela ai ia meʼa fuli: te ʼu fuhiga fulumeto mo te fulumeto ʼae neʼe heʼeki tuʼusi, ʼo feia mo te ʼu gaueʼaga vite pea mo te ʼu fuʼu oliveto.
6 Neʼe fehuʼi e te kau Filisitini: “Ko ai ʼae neʼe ina fai te meʼa ʼaeni?” Neʼe tali age kia natou: “Ko Samisoni, te tama ʼae ʼe ʼohoana mo te ʼofafine ʼo te tagata Timenea. Neʼe ina fai te faʼahi ʼaia koteʼuhi neʼe foaki e te tagata Timenea ʼaia tona ʼofafine ki he tahi tama tupulaga.”+ Pea neʼe olo leva te kau Filisitini ʼo tutu te fafine ʼaia mo tana tamai.+ 7 Neʼe ui e Samisoni kia natou: “Kapau ʼe feia takotou aga, ʼe hoki au fimalie pe anai moka au ʼosi lagavaka.”+ 8 Pea neʼe ina matematehi ia natou, ʼo lahi ai te mātea. Hili ʼaia, neʼe alu ʼo nofo ʼi he ʼana,* ʼi te fuʼu maka ʼo Etami.
9 Ki muli age, neʼe olo te kau Filisitini ʼo fakatuʼu tonatou nofoʼaga ʼi te fenua ʼo te telepi ʼo Suta. Neʼe natou feoloʼaki ʼi Lehi.+ 10 Neʼe fehuʼi age e te ʼu tagata ʼo Suta kia natou: “He koʼe ʼe kotou ʼomai ʼo tauʼi ia matou?” Neʼe tali e te kau Filisitini: “Neʼe matou ʼomai ʼo puke* ia Samisoni ke matou fai kia ia te meʼa ʼae neʼe ina fai kia matou.” 11 Pea neʼe hihifo leva he ʼu tagata ʼo Suta ʼe toko 3 000 ki te ʼana* ʼi te fuʼu maka ʼo Etami. Pea neʼe natou ui kia Samisoni: “He koʼe neʼe ke fai te faʼahi ʼaia, kae ʼe ke iloʼi lelei pe ʼe puleʼi tatou e te kau Filisitini?”+ Neʼe ina tali age: “Neʼe au fai pe kia natou te meʼa ʼae neʼe natou fai mai kia au.” 12 Kae neʼe natou ui age ki ai: “Neʼe matou ʼomai ʼo puke* mo ʼave koe ki te kau Filisitini.” Pea neʼe ui e Samisoni kia natou: “Kotou fakapapau mai ʼe mole kotou fai mai anai he meʼa ʼe kovi.” 13 Neʼe natou tali age ki ai: “ ʼIo, ʼe matou haʼi pe anai koe ʼo ʼave ki te kau Filisitini, kae ʼe mole matou matehi anai koe.”
Neʼe natou haʼi ai ia ia mo he ʼu maea ʼe lua ʼe kei foʼou, pea neʼe natou hake ai mo ia mai te ʼana. 14 Neʼe kaku leva ia Samisoni ki Lehi, pea neʼe kalaga fakafiafia te kau Filisitini ʼi tanatou sisio ki ai. Kae neʼe hifo leva te laumalie ʼo Sehova kia Samisoni, ʼo malohi ai.+ Neʼe liliu te ʼu maea ʼae neʼe haʼi ʼaki ʼona nima ohage ko he ʼu filo lino neʼe tutu pea neʼe mavete ai.+ 15 Neʼe ina maʼu leva he kaugao ʼo he asino neʼe heʼeki fualoa tana mate. Pea neʼe ina toʼo ʼo matehi ʼaki tagata ʼe toko 1 000.+ 16 Pea neʼe ui e Samisoni:
“Neʼe au fai he tuʼuga ʼe tahi, ʼei he ʼu tuʼuga ʼe lua ʼaki te kaugao ʼo he asino!
Neʼe au matehi tagata ʼe toko 1 000 ʼaki te kaugao ʼo he asino.”+
17 ʼI tana ʼosi palalau ʼaia, neʼe ina li mamaʼo te kaugao. Neʼe ina fakahigoaʼi leva te koga meʼa ʼaia ko Lamati-lehi.*+ 18 Pea neʼe kovi ʼosi tona fia inu. Neʼe pauʼi ai kia Sehova ke tokoni age, ʼo ina ui: “Neʼe ke foaki mai te toe malo lahi ʼaeni. Pea ʼe ke tuku anai au ke au mate ʼi te fia inu pea ke puke au e te hahaʼi heʼe silikosisio ʼaeni?”* 19 Neʼe avahi ai e te ʼAtua he luo ʼi Lehi pea neʼe puna mai ai te vai.+ Neʼe inu leva e Samisoni pea neʼe toe malohi ai mo lototoʼa. Koia neʼe ina fakahigoaʼi te matapuna vai ʼaia ko Ene-akole.* ʼE kei tuʼu pe ʼi Lehi ia ʼaho nei.
20 Pea neʼe ina fakamauʼi ia Iselaele lolotoga taʼu ʼe 20, ʼi te temi ʼae neʼe pule ai te kau Filisitini.+