Lua Petelo
1 Ko au Simone Petelo, ko he tagata kaugana pea mo he apositolo ʼa Sesu Kilisito,* ʼe au faitohi atu kia koutou ʼae kua kotou maʼu ohage ko matou, he tui ʼe maʼuhiga* ʼaki te faitotonu ʼo totatou ʼAtua pea mo ʼae ʼo Sesu Kilisito, te Fakamaʼuli:
2 Ke tuputupu ia koutou te ʼofa makehe ʼo te ʼAtua pea mo te tokalelei ʼaki te ʼatamai malama totonu+ ʼo ʼuhiga mo te ʼAtua pea mo Sesu totatou ʼAliki, 3 koteʼuhi neʼe foaki* mai kia tatou e te malohi ʼo te ʼAtua ia meʼa fuli ʼae ʼe ʼaoga ke tou maʼuʼuli ʼo pipiki ki te ʼAtua, he ʼe kua tou maʼu te ʼatamai malama totonu ʼo ʼuhiga mo Ia ʼae neʼe ina pauʼi tatou+ ʼaki tona kololia pea mo tona agalelei.* 4 ʼAki te ʼu faʼahi ʼaia, neʼe ina foaki* mai kia tatou te ʼu fakapapau maʼuhiga pea mo taulekaleka,+ ke feala ai hakotou maʼu te ʼu kalitate ʼo te ʼAtua,+ he neʼe kotou hao mai te agakovi ʼo te malamanei ʼae ʼe tupu mai te ʼu holi ʼae ʼe kovi.
5 Koia, kotou faiga fakamalotoloto+ ke kotou hilifaki ki takotou tui te faitotonu,*+ ki takotou faitotonu te ʼatamai malama,+ 6 ki tokotou ʼatamai malama te lotololomi, ki takotou lotololomi+ te faʼa kataki, ki takotou faʼa kataki te pipiki ki te ʼAtua,+ 7 ki takotou pipiki ki te ʼAtua te ʼofa fakatautehina, pea ki tokotou ʼofa fakatautehina te ʼofa ki te hahaʼi fuli.+ 8 Koteʼuhi kapau ʼe kotou maʼu te ʼu kalitate ʼaia pea mo haga tuputupu ia koutou, ʼe mole kotou fakaʼaoʼaoganoa anai pea ʼe fua lelei anai+ takotou maʼuliʼi te ʼatamai malama totonu ʼo ʼuhiga mo totatou ʼAliki ko Sesu Kilisito.
9 Koteʼuhi ko ʼae ʼe mole ina maʼu te ʼu kalitate ʼaia ʼe kivi ia, ʼe ina moeʼi ʼona mata ke mole sio ki te malama,*+ pea kua ina galoʼi tona fakamaʼa mai ʼana agahala+ ʼae ʼi te temi muʼa. 10 Koia, ʼu tehina, kotou faiga malohi ke kotou taupau maʼu te pilivilesio ʼae ko tokotou pauʼi+ pea mo tokotou filifili, he ʼe kapau ʼe kotou haga maʼu te ʼu kalitate ʼaia, ʼe mole kotou higa anai ʼi he temi.+ 11 ʼI takotou fai te faʼahi ʼaia, ʼe avahi lahi atu anai kia koutou te huʼaga ʼo te Puleʼaga ʼae ʼe heʼe gata+ ʼo Sesu Kilisito, totatou ʼAliki pea mo totatou Fakamaʼuli.+
12 Ko te tupuʼaga la ʼaia ʼo taku faiga tuʼumaʼu ke au fakamanatuʼi atu te ʼu meʼa ʼaia, logo la kua kotou iloʼi pea kua kotou tutuʼu malohi ʼi te moʼoni ʼae neʼe kotou ako. 13 Kae ʼe au manatu ʼe lelei ke au uga koutou ʼaki he ʼu fakamanatu+ ʼi te temi ʼae ʼe kei au nofo ai ʼi te tapenakulo* ʼaeni,+ 14 he ʼe au iloʼi kua ovi mai te temi ʼae ka toʼo ai toku tapenakulo, ohage pe foki ko tona fakaha lelei mai kia au e totatou ʼAliki ko Sesu Kilisito.+ 15 Pea ʼe au faiga fakamalotoloto anai, ke feala, hili taku mavae, hakotou manatuʼi* te ʼu meʼa ʼaia.
16 Neʼe matou fakaha atu kia koutou te malohi pea mo te ʼi heni* ʼo totatou ʼAliki ko Sesu Kilisito, ʼo mole matou mulimuli ki he ʼu fakamatala loi neʼe fakakaukauʼi lelei, kae neʼe matou sisio mata ki tona kololia.+ 17 Koteʼuhi neʼe foaki age kia te ia e te ʼAtua te Tamai ia te fakaʼapaʼapa mo te kololia, ʼi te temi ʼae neʼe ui age ki ai e te ʼAtua ʼo te kololia: “Ko toku ʼAlo ʼaeni, toku ʼofaina, ʼae ʼe au fiafia ai.”+ 18 ʼEi, neʼe matou logo ki te ʼu palalau ʼaia neʼe haʼu mai te lagi ʼi tamatou nonofo mo ia ʼi te moʼuga taputapu.
19 Koia ʼe kua malohi age tatatou falala ki te ʼu lea fakapolofeta. Pea ʼe lelei ke kotou tokagaʼi te ʼu lea fakapolofeta ohage ko he malama+ ʼe mu ʼi he koga meʼa fakapoʼuli ʼae ko ʼokotou loto, ʼo kaku ki te mafoa ʼo te ʼaho pea mo te hopo ake ʼo te fetuʼu ʼaho.+ 20 Koteʼuhi ʼe kotou iloʼi te faʼahi maʼuhiga ʼaeni: ʼE mole he lea fakapolofeta ʼo te ʼu Tohi Taputapu ʼe haʼu mai he manatu ʼa he tagata. 21 Koteʼuhi neʼe mole he temi neʼe fakaha ai he lea fakapolofeta ʼaki te finegalo ʼo te tagata,+ kae neʼe takitaki* e te laumalie maʼoniʼoni he ʼu tagata ke natou fai he ʼu palalau ʼe haʼu mai te ʼAtua.+