Pesalemo
Pesalemo ʼa Tavite. Hiva ki te fakatapuʼi ʼo te fale.
30 Sehova e, ʼe au fakakololiaʼi anai koe, he neʼe ke lagaʼi ake au,
Neʼe mole ke tuku ʼoku fili ke fakafiafia ʼo ʼuhiga mo au.+
2 Sehova e, siʼoku ʼAtua, neʼe au tagi kia te koe pea neʼe ke fakamalolo au.+
3 Sehova e, neʼe ke fakatuʼu ake au mai te Faitoka,*+
Neʼe ke taupau toku maʼuli ke ʼaua naʼa au to ki te luo.*+
4 Kau agatonu, kotou hiva ni fakavikiviki* kia Sehova,+
Kotou vikiʼi tona huafa taputapu,+
5 Koteʼuhi ʼe fakatemi pe tona ita ki he tahi,+
Kae ʼe ina maʼu anai tona ʼofa ʼi tona maʼuli katoa.+
ʼE feala ke tagi ʼi te afiafi kae ʼi te uhu ake ʼe kalaga fakafiafia anai.+
6 ʼI te temi ʼae neʼe au maʼuli fimalie ai, neʼe au ui:
“ ʼE mole au tukia anai ʼi he temi.”
7 Sehova e, ʼi te temi ʼae neʼe au maʼu ai tou ʼofa, neʼe ke fakamalohiʼi au ohage ko he moʼuga.+
Kae neʼe au mataku leva ʼi te temi ʼae neʼe ke haga kehe ai.+
8 Sehova e, ko koe ʼae neʼe au pauʼi tuʼumaʼu ki ai,+
Sehova e, neʼe au kole tuʼumaʼu atu tou manavaʼofa.
9 Kotea koa te ʼuhiga ʼo taku mate, peʼe ko taku hifo ki te luo?*+
ʼE vikiʼi anai koa koe e te efu?+ ʼE fakaha anai koa e te efu tau agatonu?+
10 Sehova e, fagono mai mo fakaha mai tou ʼofa,+
Sehova e, haofaki au.+
11 Neʼe ke fakaliliu toku putu ko he fakafiafia,
Neʼe ke toʼo kehe toku taga* pea ʼe ke teuteuʼi au ʼaki te fiafia,
12 Ke feala ai haku hiva ni fakavikiviki kia te koe kae ʼe mole au nofo fakalogologo.
Sehova e, siʼoku ʼAtua, ʼe au vikiʼi anai koe ʼo talu ai.