ʼUluaki Kolonito

6 Ka fihi he tahi ia koutou mo he tahi age,+ ʼe lava feafeaʼi hanā olo ki te fakamauʼaga ia muʼa ʼo he ʼu tagata heʼe faitotonu, kae mole nā olo kia muʼa ʼo te kau maʼoniʼoni? 2 Peʼe mole kotou iloʼi koa la ʼe fakamauʼi anai e te kau maʼoniʼoni te malamanei?+ Kapau ʼe tonu ke kotou fakamauʼi te malamanei, pea ʼe mole kotou popoto koa ʼi te fakamauʼi ʼo te ʼu meʼa liliki? 3 ʼE mole kotou iloʼi koa la ʼe tou fakamauʼi anai he ʼu ʼaselo?+ Koia ʼe mole feala koa ke tou fakamauʼi te ʼu fihifihia ʼo te maʼuli ʼaeni? 4 Pea kapau ʼe maʼua ke fakamauʼi he ʼu fihifihia ʼo te maʼuli ʼaeni,+ ʼe kotou toʼo anai koa he ʼu tagata ʼe mole fakaʼapaʼapaʼi e te kokelekasio ke natou fakamauʼi koutou? 5 ʼE au palalau feia atu ke kotou ufiufi ai. ʼE mole koa la ʼi ai he tagata poto ia koutou ʼe feala ke ina fakatokatoka te ʼu fihifihia ʼae ʼe hoko ʼi ʼona tehina? 6 Kae ʼe ʼave e he tehina he tahi age tehina ki te fakamauʼaga, pea ʼe fakamauʼi naua e he ʼu hahaʼi ʼe mole tui.

7 ʼE mahino ia, ʼe ko he aluʼaga fakaufiufi kia koutou moka kotou ʼave tokotou tehina ki te fakamauʼaga. He koʼe ʼe mole kotou tali ke fai atu he kovi kia koutou?+ He koʼe ʼe mole kotou tuku ke kakaʼi koutou? 8 Kae ʼe ko koutou totonu ʼae ʼe kotou fai te kovi pea mo kaka, pea ʼe kotou fai te ʼu meʼa ʼaia ki ʼokotou tehina.

9 Pe ʼe mole kotou iloʼi koa la ʼe mole maʼu anai e te hahaʼi heʼe faitotonu ia te Puleʼaga ʼo te ʼAtua?+ ʼAua naʼa kotou faihala.* Ko te hahaʼi ʼae ʼe natou fai he ʼu felaveʼi fakasino heʼe ʼaoga,*+ mo te kau tauhi taula ʼatua,+ mo te kau tono,+ mo te hahaʼi agaʼi fafine,*+ mo te kau faitagata,+ 10 mo te kau kaihaʼa, mo te kau manumanū,+ mo te kau inu kava fakavalevale,+ mo te hahaʼi leakovi pea mo natou ʼae ʼe natou faʼao te ʼu koloa ʼa he tahi, ʼe mole natou maʼu anai ia te Puleʼaga ʼo te ʼAtua.+ 11 Pea neʼe feia ʼihi ia koutou. Kae neʼe fakamaʼa+ koutou, mo fakamaʼoniʼoniʼi+ koutou, pea kua kotou faitotonu+ ia muʼa ʼo te ʼAtua ʼi te huafa ʼo te ʼAliki ko Sesu Kilisito* pea ʼaki te laumalie ʼo totatou ʼAtua.

12 ʼE gafua kia au ia meʼa fuli pe, kae ʼe mole ʼaoga ia meʼa fuli.+ ʼE gafua kia au ia meʼa fuli pe, kae ʼe mole au tuku anai ke puleʼi au e he meʼa. 13 Ko te meʼa kai maʼa te fatu pea ko te fatu maʼa te meʼa kai, kae ʼe maumauʼi anai e te ʼAtua te ʼu faʼahi ʼaia.+ ʼE mole tonu ke fakaʼaogaʼi te sino ki te ʼu felaveʼi fakasino heʼe ʼaoga* kae ki te gaue ʼa te ʼAliki,+ pea ʼe tokaga ia te ʼAliki ki te sino. 14 Kae neʼe fakatuʼuake e te ʼAtua ia te ʼAliki+ pea ʼe ina fakatuʼuake anai mo tatou mai te mate+ ʼaki tona mafimafi.+

15 ʼE mole kotou iloʼi koa la ko ʼokotou sino ʼe ko he ʼu koga sino ʼo Kilisito?+ Koia ʼe au toʼo anai koa te ʼu koga sino ʼo Kilisito ʼo fakatahiʼi ki he fafine paomutu? Kailoa ia! 16 ʼE mole kotou iloʼi koa la ko ʼae ʼe fakatahi mo he fafine paomutu ʼe nā liliu ko he sino ʼe tahi? Koteʼuhi ʼe ui e te ʼAtua: ‘ ʼE nā liliu anai ko he kakano ʼe tahi.’+ 17 Kae ko ʼae ʼe fakatahi mo te ʼAliki ʼe manatu tahi mo ia.+ 18 Koia kotou feholaki mai te ʼu felaveʼi fakasino heʼe ʼaoga!*+ ʼE mole he tahi age agahala ʼe tatau mo te agahala ʼaia. Ko ʼae ʼe ina fai he ʼu felaveʼi fakasino heʼe ʼaoga, ʼe agahala ia ki tona sino totonu.+ 19 ʼE mole kotou iloʼi koa la ko tokotou sino ʼe ko te fale lotu+ ʼo te laumalie maʼoniʼoni ʼae ia koutou pea neʼe kotou maʼu mai te ʼAtua?+ Pea ʼe kotou kaugana ki te ʼAtua,+ 20 he neʼe ina totogi koutou ʼaki he totogi lahi.+ Koia kotou fakakololiaʼi te ʼAtua+ ʼaki ʼokotou sino.+