Pesalemo
Ki te pule ʼo te kau faimaholo. Pesalemo ʼa Tavite, ʼo mulimuli ki te fasi ʼo te hiva “Te Tia Fafine ʼo Te Mafoata.”
22 Siʼoku ʼAtua, siʼoku ʼAtua, he koʼe neʼe ke liʼaki au?+
He koʼe ʼe ke nofo mamaʼo kae ʼe mole ke haofaki au,
Pea mo logo ki ʼaku tagi mamahi?+
2 Siʼoku ʼAtua, ʼi te ʼaho katoa ʼe au tagi atu kia te koe, kae ʼe mole ke tali mai.+
ʼI te poʼuli, ʼe mole au nofo fakalogologo.
3 Kae ʼe ke maʼoniʼoni,+
Pea ʼe vikiʼi koe e Iselaele.
5 Neʼe natou tagi kia te koe, pea neʼe ke haofaki natou.
Neʼe natou falala kia te koe, pea neʼe mole natou fakahemala.+
6 Ko au ko he ʼunukele, kae ʼe mole ko he tagata,
ʼE manukiʼi pea mo meʼa noaʼi au e te hahaʼi.+
8 “Kae neʼe falala kia Sehova. Ke ina haofaki ia ia!
Ke haofaki ia ia e te ʼAtua, he ʼe ko tona ʼofaina!”+
9 Ko koe ʼae neʼe ke toʼo au mai te fatu ʼo taku faʼe,+
Pea neʼe ke fakafimalieʼi au ʼi te fatafata ʼo taku faʼe.
10 Talu taku tupu, neʼe tuku atu au ke ke pusiaki,
Talu mai taku nofo ʼi te fatu ʼo taku faʼe, ko koe toku ʼAtua.
11 ʼAua naʼa ke nofo mamaʼo ia au, he ʼe kua ovi mai te malaʼia,+
Pea ʼe mole ʼi ai he tahi age ke ina haofaki au.+
12 ʼE lahi te ʼu vitulo kei mui ʼe natou ʼa takai au,+
ʼEi, ʼe ʼa takai au e ni vitulo malohi ʼo Pasani.+
13 ʼE natou avahi lahi ʼonatou gutu ʼo fakafeagai kia au,+
Ohage ko he laione ʼe gugulu mo ina hae he manu.+
14 Kua puli toku malohi, ohage ko he vai neʼe liligi,
Kua mahuʼi ʼoku hui fuli.
15 ʼE mole kei hoku malohi, kua au hage ko he kogaʼi ipu kele,+
ʼE pipiki toku ʼalelo ki ʼoku kaulamu,+
ʼE ke fakahifo au ki te efu ʼo te mate.+
16 Kua ʼa takai au e ni kuli,+
ʼE natou fakaovi mai kia au ohage ko he kutuga agakovi,+
ʼE natou hage ko he laione ʼe ina ʼohofi ʼoku nima mo ʼoku vaʼe.+
17 ʼE au lava lau ʼoku hui fuli.+
ʼE natou hahaga mai pea mo sioʼi fakamamaʼu au.
18 ʼE natou vaevae ʼoku mutuʼi meʼa,
Pea mo natou toho ke natou iloʼi pe ko ai ʼae ka ina maʼu toku kofu.+
19 Sehova e, ʼaua naʼa ke tuʼu mamaʼo!+
Ko koe toku malohi, haʼu fakavilivili ʼo haofaki au.+
20 Haofaki au mai te heleta,
Haofaki toku maʼuli mai te ʼu vaʼe ʼo te ʼu kuli,+
21 Haofaki au mai te gutu ʼo te laione+ pea mo te ʼu tala ʼo te ʼu vitulo vao,
Tali mai pea mo haofaki au.
22 ʼE au fia fakaha tou huafa ki ʼoku tehina,+
ʼI te lotolotoiga ʼo te hahaʼi, ʼe au vikiʼi anai koe.+
23 Koutou ʼae ʼe manavasiʼi kia Sehova, kotou vikiʼi ia ia!
Koutou fuli ʼae ko te hakoga ʼo Sakopo, kotou fakakololiaʼi ia ia!+
Kotou fakaʼapaʼapa kia te ia, ia koutou fuli ʼae ko te hakoga ʼo Iselaele.
24 Neʼe mole ina meʼa noaʼi mo fehiʼa ki te mamahi ʼo ia ʼae neʼe gaohi koviʼi,+
Neʼe mole haga kehe ia mai ia ia.+
Neʼe logo ki te tagi ʼa ia ʼae neʼe gaohi koviʼi.+
25 ʼE au vikiʼi anai koe ʼi te fakatahi lahi,+
ʼE au fakahoko anai ʼaku fakapapau ia muʼa ʼo natou ʼae ʼe manavasiʼi kia te koe.
26 ʼE kakai anai ʼo makokona te kau agavaivai,+
Ko natou ʼae ʼe natou kumi ia Sehova ʼe natou vikiʼi anai ia ia.+
Fakaʼamu pe ke kotou maʼuʼuli ʼo talu ai!
27 ʼE manatuʼi anai e te hahaʼi fuli ʼo te ʼu potu taupotu ʼo te kele ia Sehova pea ʼe natou haga tahi anai kia te ia.
Pea ʼe tulolo anai ʼi ʼou muʼa te ʼu famili fuli ʼo te ʼu puleʼaga.+
28 ʼE maʼu e Sehova te pule fakahau,+
ʼE pule ki te ʼu puleʼaga.
29 ʼE kakai anai mo tulolo te hahaʼi maʼu koloa fuli ʼo te kele,
Ko natou fuli ʼae ʼe hihifo ki te efu ʼe natou tuʼutuli anai ʼi ʼona muʼa,
ʼE mole feala anai ke haofaki e he tahi tona maʼuli.
30 ʼE tauhi anai ʼonatou hakoga kia te ia,
Pea ʼe logo anai te taʼiake ka haʼu ki he ʼu fakamatala ʼo ʼuhiga mo Sehova.
31 ʼE natou ʼomai anai mo fakaha tana faitotonu.
ʼE natou tala anai ki te hahaʼi ʼae ka tutupu te meʼa ʼae neʼe ina fai.