Pesalemo

17 Sehova e, fagono mai ki taku tagi ʼo ʼuhiga mo te faitotonu.

Tokagaʼi taku kole tokoni.

Fagono ki taku faikole fakamalotoloto.+

 2 Fakahoko he fakamau faitotonu ʼo ʼuhiga mo au.+

ʼOfa pe ke sio ʼou mata ki te faitotonu.

 3 ʼE ke sivisivi toku loto, ʼe ke vakavakaʼi au ʼi te poʼuli,+

ʼE ke fakamaʼa toku loto.+

Neʼe ke iloʼi ai neʼe mole au fakatuʼutuʼu ke au fai he meʼa ʼe kovi,

Pea ʼe mole au lakahala anai ʼi ʼaku palalau.

 4 ʼE mole au hage ko ʼihi,

ʼE mole au haʼele ʼi te ʼu ala ʼo te tagata agakovi, ʼo mulimuli pe ki ʼau folafola.+

 5 ʼOfa pe ke au haʼele tuʼumaʼu ʼi ʼou ala,

Ke mole tukia ʼoku vaʼe.+

 7 Fakaha mai tou ʼofa agatonu ʼi hona aluʼaga fakaofoofo,+

Ia koe ʼae ʼe ke haofaki natou ʼae ʼe kumi nonoʼaga ʼi tou toʼomataʼu

Mai ia natou ʼae ʼe agatuʼu kia te koe.

 8 Puipui au ohage ko ʼou kanoʼi mata,+

Fakamalumaluʼi au ʼi ʼou lalo pakakau.+

 9 Haofaki au mai te kau agakovi ʼae ʼe natou tauʼi au,

Mai te ʼu fili ʼae ʼe natou ʼa takai au ke natou matehi au.+

10 Kua natou liliu ʼo lotofefeka,

ʼE natou palalau fiameʼameʼa.

11 ʼI te temi nei, kua natou ʼa takai matou,+

ʼE natou lamalama he faigamalie ke natou fakatukiaʼi matou.

12 ʼE hage te fili ko he laione kua tokalelei ke ina kai he manu,

Ko he laione mui ʼe nono ke ina ʼohofi he manu.

13 Sehova e, tuʼu ake ʼo tauʼi ia ia+ pea ke ke malo ia ia.

Haofaki au mai te agakovi ʼaki tau heleta.

14 Sehova e, ʼaki tou nima, haofaki au

Mai te ʼu tagata ʼo te malama ʼaeni, ʼae ʼe natou maʼu tonatou vahe ʼi te maʼuli ʼaeni,+

Ia natou ʼae ʼe makokona ʼi te ʼu meʼa lelei ʼae ʼe ke foaki age,+

Pea ʼe natou tuku he tofiʼa ki ʼonatou foha kaugamalie.

15 Kae ko au ʼe au sio anai ki tou fofoga ʼi te faitotonu.

ʼE au fiafia ʼaupito ʼi taku ʼala ake ʼi ʼou tafa.+