Sopo

1 ʼI te fenua ʼo Usia neʼe ʼi ai te tagata neʼe higoa ko Sopo.*+ Neʼe agatonu mo faitotonu.+ Neʼe manavasiʼi ki te ʼAtua pea neʼe fakamamaʼo mai te meʼa ʼae ʼe kovi.+ 2 Neʼe ko ʼona foha ʼe toko fitu mo ʼona ʼofafine ʼe toko tolu. 3 Ko tana faga manu neʼe ko ovi ʼe 7 000, mo kamelo ʼe 3 000, mo pipi ʼe 1 000,* mo asino* ʼe 500. Pea neʼe kaugamalie ʼaupito ʼana hahaʼi faifekau, ʼo maʼuhiga tokotahi ai ʼi te hahaʼi fuli ʼo te potu Esite.

4 Neʼe tahi fefakahoahoaʼaki ʼona foha ʼo fai* tana kaitahi. Neʼe natou fakaafe ʼonatou tokolua ʼe toko tolu ke natou kakai mo iinu fakatahi io natou.* 5 ʼI te ʼosi ʼo te ʼu kaitahi ʼaia, neʼe pauʼi natou e Sopo ke ʼomai ke ina fakamaʼoniʼoniʼi* ia natou. Pea neʼe tuʼu ake leva ʼi te mafoata ʼo momoli ni holokoseta*+ maʼa natou takitahi, he neʼe ina ui: “Neʼe lagi agahala ʼoku foha pea mo laukovi ki te ʼAtua ʼi ʼonatou loto.” Neʼe ko te agamahani ʼaia ʼa Sopo.+

6 Neʼe hoko mai leva te ʼaho ʼae neʼe olo ai te ʼu foha ʼo te ʼAtua moʼoni*+ kia muʼa ʼo Sehova,+ pea neʼe kau ai mo Satana.+

7 Koia neʼe fehuʼi ai e Sehova kia Satana: “ ʼE ke haʼu ʼaena maifea?” Neʼe tali e Satana kia Sehova: “Neʼe au fealuʼaki pe ʼo foliʼi te kele.”+ 8 Pea neʼe ui age e Sehova kia Satana: “Neʼe ke tokagaʼi la taku kaugana ko Sopo? ʼE mole he tahi ʼi te kele ʼe tatau mo ia. Ko he tagata agatonu mo faitotonu,+ ʼe manavasiʼi ki te ʼAtua pea ʼe fakamamaʼo mai te meʼa ʼae ʼe kovi.” 9 Kae neʼe tali age e Satana kia Sehova: “ ʼE mole ʼi ai koa la he tupuʼaga ʼo te manavasiʼi ʼa Sopo ki te ʼAtua?+ 10 Neʼe mole koa la ke fakatuʼu he ʼa moʼo puipui ia ia,+ mo tona ʼapi, pea mo ʼana meʼa fuli? Neʼe ke tapuakiʼi tana gaue,+ pea kua tuputupu tana faga manu ʼi te fenua. 11 Kae haga muʼa ʼo faoʼi tou nima ʼo fāfā ki ʼana meʼa fuli, pea ʼe laukovi anai kia koe.” 12 Neʼe tali leva e Sehova kia Satana: “Koʼeni, ʼe au tuku atu ki ʼou nima ʼana meʼa fuli. Kae ʼaua pe naʼa ke fāfā kia ia!” Neʼe mavae ai ia Satana mai te ʼafioʼaga ʼo Sehova.+

13 ʼI te tahi ʼaho neʼe kakai mo inu vino te ʼu foha mo te ʼu ʼofafine ʼo Sopo ʼi te ʼapi ʼo tonatou taʼokete.+ 14 Neʼe haʼu leva he tagata ʼave logo ʼo ui age kia Sopo: “Neʼe fuli kele te ʼu pipi pea neʼe kakai te ʼu asino ʼi ʼonatou tafa, 15 pea neʼe ʼohofi matou e te kau Sapeane. Neʼe natou ʼave te ʼu manu, mo matematehi te hahaʼi faifekau ʼaki te heleta. Ko au tokotahi pe ʼae neʼe hola mai ʼo fakaha atu te logo.”

16 Neʼe kei lolotoga palalau kae haʼu te tahi ʼo ui: “Neʼe to mai te lagi he afi mai te ʼAtua.* Neʼe vela ai te ʼu ovi pea mo te hahaʼi faifekau, ʼo natou mamate fuli ai! Ko au tokotahi pe ʼae neʼe hola mai ʼo fakaha atu te logo.”

17 Neʼe kei lolotoga palalau kae haʼu te tahi ʼo ui: “Neʼe ʼohofi te ʼu kamelo e ni kutuga Kaletea+ ʼe tolu. Neʼe natou ʼave te ʼu manu, mo matematehi te hahaʼi faifekau ʼaki te heleta. Ko au tokotahi pe ʼae neʼe hola mai ʼo fakaha atu te logo.”

18 Neʼe kei lolotoga palalau kae haʼu te tahi ʼo ui: “Neʼe kakai mo inu vino ʼou foha mo ʼou ʼofafine ʼi te ʼapi ʼo tonatou taʼokete. 19 Kae fokifa pe, neʼe to ki te ʼapi he tuʼani matagi mai te toafa, ʼo holo ai ki ʼau fanau, pea natou mamate fuli ai. Ko au tokotahi pe ʼae neʼe hola mai ʼo fakaha atu te logo.”

20 Neʼe tuʼu ake leva ia Sopo, ʼo hae tona kofu pea mo kosi tona ʼulu. Neʼe tuʼutuli mo tulolo ai, 21 ʼo ina ui:

Neʼe foaki e Sehova+ pea neʼe toe toʼo e Sehova.

Ke hoko atu te vikiʼi ʼo te huafa ʼo Sehova.”

22 Logope la te ʼu meʼa fuli ʼaia, kae neʼe mole agahala ia Sopo pea neʼe mole ina tukugakoviʼi te ʼAtua.