Te ʼu Gaue ʼa Te Kau Apositolo

17 Neʼe natou fakalaka ʼi Amifipoli mo Apolonia pea neʼe natou tau leva ki Tesalonika,+ ʼae neʼe tuʼu ai te sinakoka ʼo te kau Sutea. 2 Pea ohage ko tana fai mahani,+ neʼe ulu ia Paulo ki tonatou sinakoka. Lolotoga sapato ʼe tolu, neʼe faipalalau mo natou ʼo fakatafito ki te ʼu Tohi Taputapu.+ 3 Neʼe ina fakaʼaogaʼi ni vaega moʼo fakamahino pea mo fakamoʼoni neʼe tonu ke mamahi ia Kilisito*+ pea ke fakatuʼuake mai te kau mate.+ Neʼe ina ui: “Ko Sesu ʼae ʼe au talanoa atu ki ai, ʼe ko ia ia Kilisito.” 4 Koia neʼe tui ʼihi ia natou pea neʼe natou fakatahi age kia Paulo mo Silasi,+ ʼo feia mo te hahaʼi kaugamalie ʼi te kau Keleka ʼae neʼe atolasio ki te ʼAtua pea mo te ʼu fafine maʼuhiga ʼe tokolahi.

5 Kae neʼe maheheka ai te kau Sutea.+ Koia neʼe natou fakatahitahiʼi he ʼu tagata agakovi neʼe ʼeva noa ʼi te fakatauʼaga koloa, ʼo natou fakapupu ai mo fakamaveuveuʼi te kolo. Neʼe natou ulufi te ʼapi ʼo Sasone ʼo natou kumi ia Paulo mo Silasi, ke ʼave naua kia muʼa ʼo te hahaʼi. 6 ʼI tanatou mole maʼu ia naua, neʼe natou toho ia Sasone mo ʼihi tehina kia muʼa ʼo te ʼu pule ʼo te kolo, ʼo natou kalaga: “Ko te ʼu tagata ʼaia ʼe nā fakamaveuveu ia te kele katoa, pea kua nā kaku mai foki ki heni.+ 7 Pea neʼe fakatalitali ia naua e Sasone ʼi tona ʼapi. Ko te ʼu tagata fuli ʼaeni ʼe natou fakafeagai ki te ʼu fakatotonu ʼa Sesale,* ʼo natou tala ʼe ʼi ai te tahi age hau, ko Sesu.”+ 8 ʼI te logo ʼa te hahaʼi pea mo te ʼu pule ʼo te kolo ki te ʼu palalau ʼaia, neʼe natou iita ai. 9 Pea neʼe natou tuku age leva ke natou olo ʼi te ʼosi foaki e Sasone mo te ʼu tehina te paʼaga ʼae neʼe fakamaʼua age.

10 ʼI te poʼuli, neʼe fakamavae atu aipe e te ʼu tehina ia Paulo mo Silasi ke nā olo ki Pelea. ʼI tanā tau atu ki ai, neʼe nā hu ki te sinakoka ʼo te kau Sutea. 11 Neʼe lahi age te fia ako ʼa natou ʼaia ia natou ʼae ʼi Tesalonika, koteʼuhi neʼe natou tali fakamalotoloto te folafola, ʼo natou vakavakaʼi fakalelei te ʼu Tohi Taputapu ʼi te ʼaho fuli, pe ʼe moʼoni te ʼu meʼa ʼae neʼe fakaha age kia natou. 12 Koia tokolahi ia natou neʼe tui, ʼo feia mo te ʼu fafine Keleka maʼu tuʼulaga ʼe tokolahi pea mo he ʼu tagata. 13 Kae ʼi te logo ʼa te kau Sutea ʼo Tesalonika ʼe toe tala e Paulo te folafola ʼa te ʼAtua ʼi Pelea, neʼe natou ʼomai ʼo fakakoviʼi mo fakamaveuveuʼi te hahaʼi.+ 14 Koia neʼe foimo fakamavae e te ʼu tehina ia Paulo ke alu ʼo kaku ki te tai,+ kae nonofo ia Silasi mo Timoteo. 15 Ko natou ʼae neʼe kaugā olo mo Paulo neʼe natou ʼave ia ia ʼo kaku ki Ateni. Pea neʼe natou toe liliu leva, mo te fakatotonu kia Silasi mo Timoteo+ ke nā olo fakavilivili kia Paulo.

16 ʼI te atalitali ʼa Paulo kia naua ʼi Ateni, neʼe ita leva ʼi tana sio ki te fonu ʼo te ʼu taula ʼatua ʼi te kolo. 17 Koia neʼe faipalalau ʼi te sinakoka mo te kau Sutea mo ʼihi hahaʼi neʼe atolasio ki te ʼAtua, pea mo faipalalau ʼi te ʼaho fuli mo natou ʼae neʼe ʼi te fakatauʼaga koloa. 18 Kae neʼe fihi mo ia ʼihi tagata faifilosofia Epikula* mo Setoika,* pea neʼe feʼekeʼaki e ʼihi: “Kotea koa ʼae ʼe talanoa ki ai ia te tagata gutu palalau ʼaia?” Pea neʼe ui e ʼihi: “ ʼE hage ia ʼe palalau ʼo ʼuhiga mo he ʼu ʼatua matapule.” Koteʼuhi neʼe ina tala te logo lelei ʼo ʼuhiga mo Sesu pea mo te fakatuʼuake.+ 19 Neʼe natou puke leva ia ia ʼo ʼave ki te Aleopasi,* ʼo natou ui: “ ʼE matou fia iloʼi pe kotea te akonaki foʼou ʼaena ʼe ke palalau ki ai. 20 Koteʼuhi ʼe ke palalau ki he ʼu meʼa ʼe matafaikehe kia matou, pea ʼe matou fia iloʼi tona fakaʼuhiga.” 21 Ko te hahaʼi fuli ʼo Ateni mo te kau matapule ʼae neʼe nonofo ai,* neʼe natou fakaʼaogaʼi pe tonatou temi malolo moʼo palalau pea mo fakalogo ki he ʼu logo foʼou. 22 Neʼe tuʼu leva ia Paulo ʼi te lotomalie ʼo te Aleopasi+ ʼo ina ui:

“ ʼU tagata ʼo Ateni, ʼe au sio ʼe hage ʼe lahi age takotou manavasiʼi ki te ʼu ʼatua* ʼi te ʼu faʼahi fuli, ʼi ʼihi age hahaʼi.+ 23 Ohage la, ʼi taku taka ʼi te kolo pea mo au sioʼi lelei te ʼu meʼa ʼae ʼe kotou tauhi ki ai, neʼe au tokagaʼi he ʼaletale neʼe tohi ai: ‘Ki He ʼAtua ʼe Mole Matou Iloʼi.’ Ko te ʼatua ʼaia ʼe kotou atolasio ki ai kae ʼe mole kotou iloʼi, ʼe ko ia ʼae ʼe au tala atu. 24 Ko te ʼAtua ʼae neʼe ina fakatupu te ʼatulaulau pea mo te ʼu meʼa fuli ʼae ʼe maʼu ai, ko te ʼAliki ʼo te lagi mo te kele,+ ʼe mole nofo ia ʼi te ʼu fale lotu ʼae neʼe faʼu e te tagata.+ 25 ʼE mole ina kole ke tokoni age te tagata kia te ia, ohage ʼe ʼaoga kia te ia he meʼa,+ koteʼuhi ʼe ko ia ʼae ʼe ina foaki ki te hahaʼi fuli te maʼuli, mo te manava+ pea mo te ʼu meʼa fuli pe. 26 Pea mai te tagata ʼe tahi+ neʼe ina fakatupu te ʼu puleʼaga fuli ke nonofo ʼi te fuga kele katoa.+ Neʼe kua ina fakatuʼutuʼu te ʼu temi pea mo te ʼu tuʼakoi ʼo te nofoʼaga ʼo te tagata,+ 27 ke natou kumi ia te ʼAtua. Pea kapau ʼe natou kumi fakataufa ia ia, ʼe feala pe hanatou maʼu moʼoni.+ ʼE mahino ia ʼe mole mamaʼo ia tatou takitokotahi. 28 Koteʼuhi ʼaki ia ia, ʼe tou maʼuʼuli, mo gaugaue pea mo tou ʼi heni, ohage pe ko tona ui e ʼihi ʼo ʼakotou tagata palalau fakatuketuke: ‘Mo tatou foki ʼe ko ʼana fanau.’*

29 “Koia mai tona aluʼaga ʼae ko tatou ko te ʼu fanau ʼa* te ʼAtua,+ ʼe mole tonu ke tou manatu ʼe tatau te ʼAtua mo te aulo, mo te siliva pea mo te maka, peʼe tatau mo he meʼa neʼe togi e te tagata ʼo mulimuli ki tana fakakaukau mo tona poto.+ 30 ʼE moʼoni, neʼe mole tokagaʼi e te ʼAtua te ʼu temi ʼae neʼe fakapoʼuli ai te hahaʼi,+ kae ʼi te temi leva ʼaeni, ʼe ina tala ki te hahaʼi ʼo te ʼu potu fuli ʼe tonu ke natou fakahemala. 31 Koteʼuhi neʼe ina fakatuʼutuʼu he ʼaho ke ina fakamauʼi+ ai te kele katoa ʼi te faitotonu ʼaki he tagata neʼe ina fakanofo. Pea neʼe ina foaki ki te hahaʼi fuli he fakamoʼoni ʼi tana fakatuʼuake ia ia mai te kau mate.”+

32 ʼI tanatou logo ki tana palalau ki te fakatuʼuake ʼo te kau mate, neʼe vaʼi e ʼihi,+ kae neʼe ui e ʼihi: “Hoki matou toe fagono atu anai ki te faʼahi ʼaia ʼi he tahi ʼaho.” 33 Neʼe mavae leva ia Paulo ia natou, 34 kae neʼe fakatahi age kia ia ʼihi tagata pea neʼe natou liliu ko he ʼu tisipulo. Neʼe kau ai ia Tenisio, neʼe ko he tuʼi fakamau ʼi te fakamauʼaga ʼo te Aleopasi, mo te fafine neʼe higoa ko Tamalisi pea mo ʼihi atu.