ʼUluaki Koloniko
28 Neʼe fakamaʼopoʼopo leva e Tavite ki Selusalemi te kau ʼaliki fuli ʼaeni ʼo Iselaele: ko te kau ʼaliki ʼo te ʼu telepi, mo te ʼu pule ʼo te ʼu kalasi+ ʼae ʼe gaue ki te hau, mo te kau pule ʼo he toko afe pea mo te kau pule ʼo he toko teau,+ mo te kau pule ʼae neʼe tokakaga ki te ʼu koloa fuli ʼo te hau, mo ʼana faga manu fuli+ pea mo ʼona foha.+ Neʼe toe kau ai mo natou ʼae ʼe gaue ʼi te fale hau pea mo te ʼu tagata malolohi fuli ʼae neʼe tuha mo te falala.+ 2 Neʼe tuʼu ake leva ia te Hau ko Tavite ʼo ina ui:
“Kotou fagono mai, naʼi ʼoku tehina mo siʼaku hahaʼi. Neʼe au loto moʼoni ke au laga he fale ke tuku ki ai te aleka ʼo te fuakava ʼa Sehova ʼo talu ai pea ke liliu ko he hiliʼaga vaʼe ʼo totatou ʼAtua,+ pea neʼe au teuteuʼi he ʼu meʼa ki tona laga.+ 3 Kae neʼe ui mai e te ʼAtua moʼoni: ‘ ʼE mole ke laga anai he fale ke fakakololiaʼi ai toku huafa,+ koteʼuhi ko koe ko te tagata tau pea neʼe ke fai he ligi toto.’+ 4 Kae neʼe filifili au e Sehova te ʼAtua ʼo Iselaele ʼi te loto fale katoa ʼo taku tamai, ke au hau ki Iselaele ʼo talu ai.+ Koteʼuhi neʼe ina filifili ia Suta ko te tagata takitaki,+ pea neʼe ina filifili ʼi te telepi ʼo Suta ia te loto fale ʼo taku tamai.+ Pea ʼi te ʼu foha ʼo taku tamai, neʼe ko au ʼae neʼe ina leleiʼia, ʼo ina fakanofo au ke au hau ki Iselaele katoa.+ 5 Neʼe kaugamalie te ʼu foha ʼae neʼe foaki mai e Sehova. Kae ʼi ʼoku foha fuli,+ neʼe ina filifili toku foha ko Salomone+ ke heka ʼi te hekaʼaga fakahau ʼo Sehova pea ke pule ki Iselaele.+
6 “Neʼe ina ui mai: ‘ ʼE ko tou foha ko Salomone ʼae ka ina laga toku fale pea mo ʼoku malaʼe, he neʼe au filifili ia ia ke liliu ko toku foha pea ʼe au liliu anai ko tana tamai.+ 7 ʼE au fakatuʼu anai tana pule ke malohi ʼo talu ai,+ mo kapau ʼe mulimuli fakalelei ki ʼaku fakatotonu pea mo ʼaku lao,+ ohage pe ko tana fai ʼi te temi nei.’ 8 Koia, ʼe au tala ia muʼa ʼo Iselaele katoa, ia te hahaʼi ʼa Sehova, pea ia muʼa ʼo totatou ʼAtua: Kotou faiga ke kotou iloʼi pea mo fakalogo ki te ʼu fakatotonu fuli ʼa Sehova tokotou ʼAtua, ke feala hakotou maʼu te fenua lelei ʼaia+ pea mo kotou tuku holo ki ʼokotou foha ohage ko he tofiʼa ʼo talu ai.
9 “Pea ko koe, siʼoku foha ko Salomone, ke ke iloʼi te ʼAtua ʼo tau tamai pea mo ke tauhi kia te ia ʼaki he loto katoa+ pea mo he lotofiafia,* koteʼuhi ʼe sivisivi e Sehova te ʼu loto fuli,+ pea ʼe ina iloʼi te ʼu manatu mo te ʼu holi fuli.+ Kapau ʼe ke kumi ia ia, pea ʼe ina tuku anai ke ke maʼu,+ kae kapau ʼe ke liʼaki ia ia, pea ʼe ina liʼaki anai ia koe ʼo talu ai.+ 10 Neʼe filifili koe e Sehova ke ke laga he fale ke liliu ko he sagatualio. Koia, ke ke lototoʼa pea ke fakahoko te gaue ʼaia.”
11 Neʼe foaki leva e Tavite ki tona foha ko Salomone te pāki+ ʼo te fakamalumaluʼaga,+ mo te ʼu koga fale kehekehe, mo te ʼu fale tanakiʼaga meʼa, mo te ʼu koga fale fata, mo te ʼu koga fale loto, pea mo te fale ʼo te faifakalelei.*+ 12 Neʼe ina foaki age te pāki ʼo te ʼu meʼa fuli ʼae neʼe fakaha ki ai ʼaki te laumalie ʼo te ʼAtua ʼo ʼuhiga mo te ʼu malaʼe+ ʼo te fale ʼo Sehova, mo te ʼu fale kai fuli ʼae ʼi te ʼu tafaʼaki, mo te ʼu fale tanakiʼaga koloa ʼo te fale ʼo te ʼAtua moʼoni pea mo te ʼu fale tanakiʼaga koloa ʼo te ʼu meʼa ʼae neʼe fakamaʼoniʼoniʼi.*+ 13 Neʼe ina toe foaki age foki mo he ʼu fakatotonu ʼo ʼuhiga mo te ʼu kalasi ʼo te kau pelepitelo+ pea mo te kau Levite, mo te ʼu gaue fuli ʼae neʼe tonu ke fai ʼi te fale ʼo Sehova, mo te ʼu meʼa kehekehe fuli ʼae neʼe fakaʼaogaʼi ki te tauhi ʼae neʼe fai ʼi te fale ʼo Sehova. 14 Neʼe ina fakaha age te mamafa ʼo te aulo, ia te aulo ʼae neʼe tonu ke fai ʼaki te ʼu meʼa kehekehe fuli ʼae ka fakaʼaogaʼi ki te tauhi, pea mo te mamafa ʼo te ʼu meʼa kehekehe fuli ʼae neʼe tonu ke fai ʼaki te siliva, ʼae ka fakaʼaogaʼi ki te tauhi. 15 Neʼe ina toe fakaha age foki mo te mamafa ʼo te ʼu tuʼulaga malama aulo+ pea mo ʼonatou malama aulo, mo te mamafa ʼo te ʼu tuʼulaga malama kehekehe pea mo ʼonatou malama, pea mo te mamafa ʼo te ʼu tuʼulaga malama siliva, ia te ʼu tuʼulaga malama takitahi pea mo ʼonatou malama, ʼo mulimuli ki tonatou fakaʼaogaʼi. 16 Neʼe ina toe fakaha age mo te mamafa ʼo te aulo ʼae neʼe tonu ke fai ʼaki te ʼu laupapa ʼo te ʼu pane ʼae ʼe hili fakatuʼuga,*+ ia te ʼu laupapa takitahi, ʼo feia mo te siliva ʼae neʼe tonu ke fai ʼaki te ʼu laupapa siliva, 17 mo te mamafa ʼo te aulo maʼa ʼae neʼe tonu ke fai ʼaki te ʼu huki, mo te ʼu ipu, mo te ʼu ʼaiʼaga vai, pea mo te mamafa ʼo te ʼu kiʼi ipu aulo+ takitahi, pea mo te mamafa ʼo te ʼu kiʼi ipu siliva takitahi. 18 Neʼe ina toe fakaha age mo te mamafa ʼo te aulo ʼae neʼe fakamaʼa pea neʼe tonu ke fai ʼaki te ʼaletale ʼo te iseso,+ pea mo te meʼa ʼae ʼe ina fakata ia te saliote,+ ia te ʼu kelupimi+ aulo, ʼae neʼe nā folahi ʼonā pakakau ke malumalu ai te aleka ʼo te fuakava ʼa Sehova. 19 Neʼe ui e Tavite: “Neʼe takitaki au e Sehova, pea neʼe ina foaki mai te poto ke au tohi te ʼu meʼa fuli ʼo te pāki ʼaeni.”+
20 Pea neʼe ui leva e Tavite ki tona foha ko Salomone: “Ke ke lotomalohi mo lototoʼa, pea ke fakahoko te gaue. ʼAua naʼa ke mataku he ʼe ko Sehova ʼAtua, toku ʼAtua, ʼe nofo mo koe.+ ʼE mole ina tuku anai koe pea ʼe mole ina liʼaki anai koe,+ kae ʼe nofo anai mo koe ʼo kaku ki te fakaʼosi ʼo te ʼu gaue fuli ʼo te fale ʼo Sehova. 21 Pea koʼeni te ʼu kalasi ʼo te kau pelepitelo+ pea mo te kau Levite+ ʼae ka natou fakahoko ʼanatou gaue fuli ʼi te fale ʼo te ʼAtua moʼoni. ʼE ke maʼu he kau gaue ʼe natou lotolelei mo popoto ʼi te fai ʼo he ʼu faʼahiga gaue kehekehe,+ ʼo feia mo te kau ʼaliki+ pea mo te hahaʼi katoa ʼae ka natou fakahoko ʼau fakatotonu fuli.”