ʼUluaki Hau

15 ʼI te 18 taʼu ʼo te pule ʼa te Hau ko Selopoamo,+ te foha ʼo Nepate, neʼe hau leva ia Apisame ki Suta.+ 2 Neʼe pule lolotoga taʼu ʼe tolu ʼi Selusalemi. Neʼe higoa tana faʼe ko Maaka,+ ko te mokopuna ʼo Apesalone.* 3 Neʼe ina toe fai pe te ʼu agahala fuli ʼae neʼe fai e tana tamai ʼi muʼa atu, pea neʼe mole* katoa tona loto kia Sehova, tona ʼAtua, ʼo mole hage ko te loto ʼo Tavite, tana kui. 4 Kae neʼe foaki age kia Apisame e Sehova ʼAtua ia he malama* ʼi Selusalemi ʼuhi ko Tavite,+ ʼaki tana fakanofo hau tona foha ke ina fetogi ia ia pea mo tana tuku ʼae ia Selusalemi ke tuʼu maʼu. 5 Koteʼuhi neʼe fai e Tavite te meʼa ʼae ʼe lelei kia mata ʼo Sehova, pea ʼi tona maʼuli katoa neʼe mole maliu kehe mai he fakatotonu ʼe tahi neʼe Ina fai age kia ia, gata pe ki te faʼahi ʼae ʼo ʼuhiga mo Ulia, te tagata Heti.+ 6 Pea neʼe fetauʼaki ia Lopoame mo Selopoamo ʼi tona maʼuli katoa.+

7 Pea ko te toe ʼo te hisitolia ʼo Apisame, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta?+ Neʼe toe fetauʼaki foki ia Apisame mo Selopoamo.+ 8 Neʼe mate leva ia Apisame,* pea neʼe ʼavaifo ʼi te Kolo ʼo Tavite. Neʼe hau leva tona foha ko Asa+ ʼo fetogi ia ia.+

9 ʼI te 20 taʼu ʼo te pule ʼa te Hau ko Selopoamo ki Iselaele, neʼe kamata hau ia Asa ki Suta. 10 Neʼe pule ʼi Selusalemi lolotoga taʼu ʼe 41. Neʼe higoa tana kui fafine ko Maaka,+ ko te mokopuna ʼo Apesalone. 11 Neʼe fai e Asa te meʼa ʼae ʼe lelei kia mata ʼo Sehova,+ ohage ko Tavite, tana kui. 12 Neʼe ina kapu ʼi te fenua te hahaʼi paomutu ʼo te fale lotu*+ pea mo ina pulihi te ʼu fakatata fakalialia* fuli ʼae neʼe fai e ʼana kui.+ 13 Neʼe ina toe fakahifo foki mo Maaka+ tana kui mai tona tuʼulaga fineʼaliki, he neʼe ina fai he fakatata fakalialia maʼa te tauhi ʼo te pou ʼakau taputapu.* Neʼe maumauʼi leva e Asa te fakatata fakalialia ʼaia,+ pea neʼe ina tutu ʼi te Vai Tafe* ʼo Kitelone ʼae kua mamaha.+ 14 Kae neʼe mole ina pulihi te ʼu faʼahi maʼoluga.+ Logo la te faʼahi ʼaia, kae neʼe katoa* pe te loto ʼo Asa kia Sehova ʼi tona maʼuli katoa.* 15 Pea neʼe ina ʼaumai ki te fale ʼo Sehova te ʼu meʼa ʼaeni neʼe ina fakamaʼoniʼoniʼi mo tana tamai: te siliva, mo te aulo pea mo te ʼu faʼahiga meʼa kehekehe.+

16 Neʼe fetauʼaki tuʼumaʼu pe ia Asa mo Paesa,+ te hau ʼo Iselaele. 17 Koia, neʼe haʼu ai ia Paesa te Hau ʼo Iselaele ʼo tauʼi ia Suta, pea neʼe ina toe laga* ia Lama,+ ke ʼaua naʼa mavae he tahi mai te fenua ʼo Asa, te Hau ʼo Suta peʼe ke alu he tahi ki ai.+ 18 Neʼe toʼo leva e Asa te siliva mo te aulo fuli ʼae neʼe kei toe ʼi te ʼu tanakiʼaga koloa ʼo te fale ʼo Sehova pea mo te ʼu tanakiʼaga koloa ʼo te fale hau, ʼo ina fakatoʼo age ki ʼana hahaʼi faifekau. Pea neʼe fekauʼi leva natou e te Hau ko Asa ke natou olo kia Pene-atate, te foha ʼo Tapilimone, te foha ʼo Esione, te hau ʼo Silia,+ ʼae neʼe nofo ʼi Tamaso, pea ke natou ui age ki ai: 19 “Neʼe ta fai he fuakava, pea neʼe fai e taku tamai he fuakava mo tau tamai. ʼE au momoli atu he meʼa ʼofa, ʼe ko he siliva mo he aulo. Kae ʼe au kole atu ke ke maumauʼi te fuakava ʼae neʼe ke fai mo Paesa, te Hau ʼo Iselaele, ke mavae ʼi toku fenua.” 20 Neʼe fakalogo ia Pene-atate ki te Hau ko Asa, ʼo ina fekauʼi ai te ʼu pule ʼo ʼana foʼi kautau ke natou olo ʼo tauʼi te ʼu kolo ʼo Iselaele. Pea neʼe natou toʼo ai ia Isone,+ mo Tane,+ mo Apele-pete-maaka, mo Kineleti katoa pea mo te fenua katoa ʼo Nefetali. 21 ʼI te logo ʼa Paesa ki ai, neʼe ina tuku atu aipe tana toe laga* ia Lama pea neʼe haga nofo leva ʼi Tilitesa.+ 22 Neʼe pauʼi leva e te Hau ko Asa ia Suta katoa, neʼe mole puli he tahi, pea neʼe natou fetuku te ʼu foʼi maka mo te ʼu lalago ʼae neʼe laga ʼaki e Paesa ia Lama. Pea neʼe fakaʼaogaʼi e te Hau ko Asa te ʼu meʼa ʼaia moʼo toe laga* ia Kepa,+ ʼi Pesamino pea mo Misipa.+

23 Pea ko te toe ʼo te hisitolia ʼo Asa, mo tona malohi, mo te ʼu meʼa fuli ʼae neʼe ina fai pea mo te ʼu kolo ʼae neʼe ina laga,* ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? Kae ʼi tana kua matuʼa, neʼe mahaki leva, neʼe ko ʼona vaʼe.+ 24 Neʼe mate leva ia Asa* pea neʼe ʼavaifo ʼi te Kolo ʼo Tavite tana kui, ohage ko ʼana kui. Pea neʼe hau leva ia Sosafate tona foha+ ʼo fetogi ia ia.

25 Pea neʼe liliu ia Natape,+ te foha ʼo Selopoamo ko te hau ʼo Iselaele ʼi te lua taʼu ʼo te pule ʼa Asa te Hau ʼo Suta. Pea neʼe pule ia Natape ki Iselaele lolotoga taʼu ʼe lua. 26 Neʼe ina haga fai pe te meʼa ʼae ʼe kovi kia mata ʼo Sehova, mo ina faʼifaʼitakiʼi te aga ʼa tana tamai+ pea mo te ʼu agahala ʼae neʼe uga e tana tamai ke fai e Iselaele.+ 27 Pea neʼe fakatuʼutuʼu leva e Paesa te foha ʼo Akisa, mai te telepi ʼo Isakale, ke ina matehi ia ia. Neʼe matehi leva e Paesa ia ia ʼi Kipetoni,+ te kolo ʼae neʼe maʼu e te kau Filisitini. ʼI te temi ʼaia, neʼe ʼa takai e Natape mo Iselaele katoa ia Kipetoni. 28 Koia, neʼe matehi e Paesa ia ia ʼi te tolu taʼu ʼo te pule ʼa Asa te Hau ʼo Suta, pea neʼe liliu ai ko te hau, ʼo fetogi ia ia. 29 ʼI te temi pe ʼae neʼe liliu ai ko te hau, neʼe ina matehi te famili katoa ʼo Selopoamo. Neʼe mole ina tuku ke maʼuli he tahi ʼo te famili ʼo Selopoamo. Neʼe ina pulihi katoa natou ʼo mulimuli ki te folafola ʼa Sehova ʼae neʼe ina fakaha ʼaki tana tagata faifekau ko Akisa, te tagata Silo.+ 30 Neʼe hoko te faʼahi ʼaia ʼuhi ko te ʼu agahala ʼae neʼe fai e Selopoamo mo te ʼu agahala ʼae neʼe ina uga ke fai e Iselaele, pea ʼuhi ko tana fakatupu te hauhau ʼo Sehova, te ʼAtua ʼo Iselaele. 31 Pea ko te toe ʼo te hisitolia ʼo Natape, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 32 Pea neʼe fetauʼaki tuʼumaʼu pe ia Asa mo Paesa, te Hau ʼo Iselaele.+

33 ʼI te tolu taʼu ʼo te pule ʼa Asa, te Hau ʼo Suta, neʼe liliu ia Paesa, te foha ʼo Akisa ko te hau ʼo Iselaele katoa, pea neʼe pule lolotoga taʼu ʼe 24 ʼi Tilitesa.+ 34 Kae neʼe ina haga fai pe te meʼa ʼae ʼe kovi kia mata ʼo Sehova,+ mo ina faʼifaʼitakiʼi te aga ʼa Selopoamo pea mo ina fai te ʼu agahala ʼae neʼe uga e Selopoamo ke fai e Iselaele.+