Tuʼi Fakamau

11 Pea ko Sefeteo,+ te tagata Kileate, neʼe ko he tagata tau malohi. Neʼe ko te tama ʼa he fafine paomutu pea ko tana tamai neʼe ko Kileate. 2 Kae neʼe toe fanauʼi foki e te ʼohoana ʼo Kileate hona ʼu foha. ʼI tanatou kua lalahi, neʼe natou kapu ia Sefeteo, ʼo natou ui ki ai: “ ʼE mole ke maʼu tofiʼa anai ʼi te famili ʼo tatatou tamai, he ʼe ko koe ko te tama ʼa he tahi fafine.” 3 Neʼe hola mamaʼo ai ia Sefeteo mai ʼona tehina, pea neʼe alu ʼo nofo ʼi te fenua ʼo Tope. Neʼe fakatahi age kia Sefeteo he ʼu tagata neʼe tataka noa, pea neʼe natou olo ai ʼo ʼohofi ʼonatou fili.

4 Hili ki ai he temi, neʼe tauʼi e te kau Amone ia Iselaele.+ 5 ʼI tanatou tauʼi ʼaia ia Iselaele, neʼe olo atu aipe te kau takitaki ʼo Kileate ki te fenua ʼo Tope, ʼo kole kia Sefeteo ke toe liliu mai. 6 Neʼe natou ui kia Sefeteo: “Haʼu mo matou. Pea ke ke liliu ko te pule ʼo tamatou foʼi kautau ke feala ai hatatou tauʼi te kau Amone.” 7 Kae neʼe tali age e Sefeteo ki te kau takitaki ʼo Kileate: “Neʼe mole koa la kotou kapu au mai te ʼapi ʼo taku tamai he neʼe kovi ʼosi takotou fehihiʼa kia au?+ He koʼe kua kotou ʼomai leva ʼo kole tokoni mai, ʼi te temi ʼae ʼe kotou lotomamahi ai?” 8 Pea neʼe ui e te kau takitaki ʼo Kileate kia Sefeteo: “ ʼE ke moʼoni pe koe, kae ʼi te temi nei ʼe matou kole atu ke ke tokoni mai. Kapau ʼe ke haʼu mo matou ʼo tauʼi te kau Amone, ʼe ke pule anai kia matou pea mo te hahaʼi fuli ʼo Kileate.”+ 9 Pea neʼe tali leva e Sefeteo ki te kau takitaki ʼo Kileate: “Kapau ʼe au toe liliu mo koutou ʼo tauʼi te kau Amone, pea kapau ʼe tokoni mai ia Sehova ke au malo ia natou, ʼe au liliu moʼoni anai ko tokotou pule.” 10 Pea neʼe ui e te kau takitaki ʼo Kileate kia Sefeteo: “Ke liliu ia Sehova ko hatatou fakamoʼoni,* ʼe matou fai anai ohage ko tau ui.” 11 Neʼe alu ai ia Sefeteo mo te kau takitaki ʼo Kileate. Pea neʼe fakanofo ia ia e te hahaʼi ko tonatou pule pea ko te pule ʼo tanatou foʼi kautau. Pea ʼi Misipa,+ neʼe toe fai e Sefeteo te ʼu palalau fuli ʼae neʼe ina fai ʼi muʼa atu. Neʼe ina fai te faʼahi ʼaia ia muʼa ʼo Sehova.

12 Pea neʼe fekauʼi e Sefeteo he ʼu tagata ʼave logo ke olo ʼo ui ki te hau ʼo te kau Amone:+ “He koʼe ʼe ke haʼu ʼo tauʼi toku fenua? Kotea te meʼa kovi ʼae neʼe au fai atu kia koe?” 13 Pea neʼe tali age e te hau ʼo te kau Amone ki te ʼu tagata ʼave logo ʼaia: “ ʼI te ʼomai ʼa te kau Iselaele mai Esipito, neʼe natou toʼo toku fenua,+ mai te Alenone+ ʼo kaku ki te Sapoke pea mo te Solotane.+ Koia ke ke toe liufaki mai toku fenua ʼi te lakaga nei, pea ʼe ta tokalelei anai.” 14 Kae neʼe toe fekauʼi e Sefeteo he ʼu tagata ʼave logo ke olo ki te hau ʼo te kau Amone. 15 Neʼe tonu ke natou ui age ki ai:

“Koʼeni te meʼa ʼae ʼe ui e Sefeteo: ‘Neʼe mole toʼo e te kau Iselaele te fenua ʼo te kau Moape+ pea mo te fenua ʼo te kau Amone.+ 16 ʼI tanatou mavae mai Esipito, neʼe natou haʼele ʼi te toafa ʼo kaku ki te Tai Kula,+ pea neʼe natou tau leva ki Katesi.+ 17 Pea neʼe fekauʼi leva e te kau Iselaele he ʼu tagata ʼave logo ke olo ʼo ui ki te hau ʼo Etome:+ “Fakalelei siʼou loto, tuku ke matou fakalaka ʼi tou fenua.” Kae neʼe mole tali e te hau ʼo Etome. Neʼe natou toe fekauʼi he ʼu tagata ʼave logo ke olo ki te hau ʼo Moape,+ pea neʼe feia mo ia neʼe mole ina tali ia tanatou kole. Koia neʼe hoko atu pe tanatou nonofo ʼi Katesi.+ 18 Pea neʼe natou hoko atu leva tanatou haʼele ʼi te toafa, ʼo natou fakalaka ʼi te ʼu tafaʼaki ʼo te fenua ʼo Etome+ pea mo te fenua ʼo Moape. Neʼe natou olo ai ʼi te potu esite ʼo te fenua ʼo Moape,+ pea neʼe natou fakatuʼu tonatou nofoʼaga ʼi te potu fenua ʼo te Alenone. Neʼe mole natou fakalaka ʼi te tuʼakoi ʼo Moape,+ koteʼuhi ko te Alenone neʼe ko te tuʼakoi ʼaia ʼo Moape.

19 “ ‘Hili ʼaia, neʼe fekauʼi e te kau Iselaele he ʼu tagata ʼave logo ke olo kia Sihone, te hau ʼo te kau Amole, ʼae neʼe pule ʼi Heseponi. Neʼe natou ui ki ai: “Fakalelei siʼou loto, tuku ke matou fakalaka ʼi tou fenua ke matou kaku ai ki te koga meʼa ʼae ʼe matou olo ki ai.”+ 20 Kae neʼe mole tali e Sihone ke fakalaka te kau Iselaele ʼi tona fenua, he neʼe mole falala ia kia natou. Neʼe ina fakatahiʼi ai ʼana tagata solia fuli pea neʼe ina fakatuʼu tona nofoʼaga ʼi Saatesi. Neʼe ina tauʼi ai leva te kau Iselaele.+ 21 Pea neʼe tuku leva e Sehova, te ʼAtua ʼo Iselaele ia Sihone mo ʼana tagata solia fuli ki te ʼu nima ʼo te kau Iselaele. Neʼe malo ai te kau Iselaele ia natou. Koia neʼe maʼu ai e te kau Iselaele te fenua katoa ʼo te kau Amole, ʼae neʼe nonofo ʼi te faʼahi ʼaia.+ 22 Neʼe natou maʼu te fenua katoa ʼo te kau Amole, mai te Alenone ʼo kaku ki te Sapoke pea mai te toafa ʼo kaku ki te Solotane.+

23 “ ‘ ʼE ko Sehova, te ʼAtua ʼo Iselaele ʼae neʼe ina kapu te kau Amole mai tonatou fenua, ke ina foaki age ki tana hahaʼi.+ Kae ʼi te temi nei, kua ke fia kapu leva koe te kau Iselaele? 24 ʼE mole ke maʼu koa la te meʼa ʼae neʼe foaki atu e Kemosi+ tou ʼatua? Koia ʼe matou toe maʼu pe anai te fenua ʼae ʼe foaki mai anai e Sehova, tomatou ʼAtua.+ 25 ʼE ke maʼuhiga age koa koe ʼi te hau ʼo Moape ko Palaka,+ te foha ʼo Tesipoli? Neʼe heʼeki he temi neʼe fihi ai te hau ʼaia mo te kau Iselaele, mo ina tauʼi natou. 26 ʼE nonofo te kau Iselaele ʼi Heseponi mo te ʼu kolo liliki ʼae ʼi ʼona tafaʼaki,+ mo Aloele mo te ʼu kolo liliki ʼae ʼi ʼona tafaʼaki, pea mo te ʼu kolo fuli ʼae ʼe tuʼu ʼi te ʼu kauvai ʼo te Alenone. Pea kua taʼu 300 nei tanatou nonofo ai. He koʼe neʼe mole ke faiga ke ke toe toʼo te ʼu kolo ʼaia ʼi te ʼu taʼu ʼaia?+ 27 Neʼe mole au agahala kia koe. ʼE ko koe ia ʼae ʼe hala ʼi tau haʼu ʼo tauʼi au. Ke fai ʼi te ʼaho nei e Sehova, te Tuʼi Fakamau+ he tonu ʼo ʼuhiga mo te fihifihia ʼae ʼe hoko ʼi te hahaʼi ʼo Iselaele mo te hahaʼi ʼo Amone.’ ”

28 Kae neʼe mole fia tokagaʼi e te hau ʼo te kau Amone te ʼu palalau ʼaia ʼa Sefeteo, ʼae neʼe fakaha age e ʼana tagata ʼave logo.

29 Pea neʼe hifo leva te laumalie ʼo Sehova kia Sefeteo.+ Koia neʼe fakalaka ai ia Sefeteo ʼi te potu fenua ʼo Kileate mo te fenua ʼo Manase ke alu ki Misipa,* ʼi Kileate.+ Pea neʼe hoko atu pe tona fagona mai Misipa* ʼi Kileate ke alu ai ʼo tauʼi te kau Amone.

30 Pea neʼe fai e Sefeteo te fakapapau ʼaeni+ kia Sehova: “Kapau ʼe ke tokoni mai ke au malo ʼi te kau Amone, 31 ʼe au foaki atu anai kia koe, Sehova e, ia ia ʼae ka hu mai ki tuʼa ʼi toku ʼapi ʼo fakafelaveʼi mai kia au. ʼEi, ʼe au foaki atu anai ia ia ʼaia moka au toe liliu mai ʼi te tokalelei ʼi taku ʼosi tauʼi te kau Amone.+ Pea ʼe au momoli anai ohage ko he holokoseta.”*+

32 Pea neʼe alu ai ia Sefeteo ʼo tauʼi te kau Amone, pea neʼe tokoni age ia Sehova ke malo ia natou. 33 Neʼe lahi ʼaupito te mātea neʼe fai e Sefeteo mai Aloele ʼo kaku ki Miniti (neʼe ina maʼu ʼonatou kolo ʼe 20), pea mo Apele-kelamime. Koia neʼe malo ai te kau Iselaele ʼi te kau Amone.

34 Neʼe toe liliu leva ia Sefeteo kio ia ʼi Misipa.+ Pea koʼeni, neʼe ko tona ʼofafine ʼae neʼe haʼu ʼo fakafelaveʼi kia ia mo tana nafa pea mo meʼe! Neʼe ko tana fanau pe ʼaia ʼe tahi. Neʼe mole hona foha peʼe ko hona tahi age ʼofafine. 35 ʼI tana sio ki tona ʼofafine, neʼe ina hae ʼona kofu pea neʼe ina ui: “Oiaue, siʼoku ʼofafine! Kua ke fakalotomamahiʼi au, he ʼe ko koe ʼae ʼe tonu ke au tuku ke alu. ʼEi, kua au fai he fakapapau kia Sehova, pea ʼe mole feala ke au fetogi.”+

36 Kae neʼe ina tali age: “Siʼaku tamai, kapau kua ke fai he fakapapau kia Sehova, pea ke ke fai kia au te meʼa ʼae neʼe ke fakapapau ki ai,+ koteʼuhi neʼe tokoni atu ia Sehova ke ke lagavaka ki ʼou fili, ia te kau Amone.” 37 Pea neʼe ina toe ui ki tana tamai: “Ko te meʼa pe ʼaeni ʼe au kole atu: Ke au nofo tokotahi ia mahina ʼe lua pea ke au alu ki te ʼu moʼuga. ʼE au tagi ai anai mo ʼoku kaumeʼa he ʼe mole au ʼohoana anai ʼi he temi.”*

38 Pea neʼe ina ui: “ ʼIo, pea alu.” Neʼe ina tuku ai ke alu ʼo mahina lua. Neʼe alu leva mo ʼona kaumeʼa ki te ʼu moʼuga, pea neʼe tagi ai he ʼe mole ʼohoana anai ʼi he temi. 39 Hili mahina ʼe lua, neʼe toe liliu ki tana tamai. Neʼe fakahoko leva e tana tamai te fakapapau ʼae neʼe ina fai ʼo ʼuhiga mo ia.+ Koia neʼe mole he temi neʼe momoe ai mo he tagata. Pea neʼe liliu leva te faʼahi ʼaeni ko he agamahani* ʼi Iselaele: 40 ʼI te taʼu fuli ia ʼaho ʼe fa, neʼe olo ai te ʼu taʼahine ʼo Iselaele ʼo vikiʼi te ʼofafine ʼo Sefeteo, te tagata Kileate.