Numelo
30 Neʼe palalau leva ia Moisese ki te ʼu pule+ telepi ʼo Iselaele, ʼo ina ui age: “Koʼeni te fakatotonu ʼae neʼe fai e Sehova: 2 Kapau ʼe fakapapau e he tagata+ kia Sehova ʼe ina fai anai he meʼa, peʼe fakapapau ke fakafisi ki he meʼa pe ʼo ina fakamoʼoni ʼaki he fuakava,+ ʼe mole tonu anai ke ina holoʼi tana fakapapau ʼaia.+ ʼE ina fai anai te ʼu meʼa fuli ʼae neʼe ina fakapapau.+
3 “Pea kapau ko he taʼahine ʼe kei nofo ʼi te ʼapi ʼo tana tamai, pea ʼe ina fakapapau kia Sehova ʼe ina fai anai he meʼa, peʼe fakapapau ke fakafisi ki he meʼa pe, 4 pea ʼe iloʼi e tana tamai tana fakapapau ʼaia peʼe ko tana fakapapau ke fakafisi ki he meʼa pe, kae ʼe loto ki ai, ʼe maʼua anai ki te taʼahine ke ina fakahoko ʼana fakapapau fuli, ʼo feia mo tana fakapapau ʼae ke fakafisi ki he meʼa pe. 5 Kae kapau leva ʼe iloʼi e tana tamai neʼe ina fai he ʼu fakapapau pe neʼe fakapapau ke fakafisi ki he meʼa pe, kae ʼe mole loto ki ai, ʼe mole fakamaʼua anai ke ina fakahoko. ʼE fakamolemole anai ia Sehova kia ia, he neʼe mole loto ki ai tana tamai.+
6 “Kapau leva ʼe ʼohoana kae ʼe kei maʼua ke ina fakahoko tana fakapapau peʼe ko he fakapapau neʼe ina fai kae neʼe mole ina fakakaukauʼi 7 pea ʼe iloʼi e tona ʼohoana kae ʼe loto ki ai ʼi te ʼaho pe ʼaia, ʼe maʼua anai ki te fafine ʼaia ke ina fakahoko ʼana fakapapau peʼe ko ʼana fakapapau ʼae ke fakafisi ki he meʼa pe. 8 Kae kapau ʼe iloʼi e tona ʼohoana kae ʼe mole loto ki ai ʼi te ʼaho pe ʼaia, ʼe feala anai ke ina holoʼi te fakapapau ʼae neʼe ina fai peʼe ko te fakapapau ʼae neʼe ina fai kae neʼe mole ina fakakaukauʼi.+ ʼE fakamolemole anai ia Sehova kia ia.
9 “Kae kapau ʼe fai e he fafine vitua peʼe ko he fafine kua mavete mo tona ʼohoana hana fakapapau, ʼe maʼua anai ke ina fakahoko te ʼu meʼa fuli ʼae neʼe ina fakapapau.
10 “Kae kapau ʼe fai e he fafine ʼohoana he fakapapau peʼe fakapapau ke fakafisi ki he meʼa pe, 11 pea ʼe iloʼi e tona ʼohoana kae ʼe loto ki ai, ʼe maʼua anai ke ina fakahoko ʼana fakapapau fuli peʼe ko tana fakapapau ke fakafisi ki he meʼa pe. 12 Kae kapau ʼe iloʼi e tona ʼohoana pea ina holoʼi fuli ʼi te ʼaho pe ʼaia te ʼu fakapapau ʼae neʼe ina fai peʼe ko te fakapapau ke fakafisi ki he meʼa pe, ʼe mole maʼua anai ke ina fakahoko.+ Neʼe holoʼi e tona ʼohoana te ʼu fakapapau ʼaia, pea ʼe fakamolemole anai ia Sehova kia ia. 13 ʼE vakaʼi pe anai e tona ʼohoana pe ʼe tonu anai ke ina fakahoko peʼe kailoa he fakapapau neʼe ina fai peʼe ko tana fakapapau ke fakafisi ki he meʼa pe* ʼo ina fakamoʼoni ʼaki he fuakava. 14 Kae kapau ʼe loto ki ai tona ʼohoana ʼi te ʼu ʼaho ʼae ʼe hoa mai ki ai, ʼe ina fakagafua ai ke ina fakahoko ʼana fakapapau fuli pea mo ʼana fakapapau ke fakafisi ki he meʼa pe. ʼE ina fakagafua ke ina fakahoko koteʼuhi ʼi te ʼaho ʼae neʼe ina iloʼi ai neʼe ina fai te ʼu fakapapau ʼaia, neʼe loto pe ki ai. 15 Kae kapau ʼe ina holoʼi te ʼu fakapapau ʼaia ki muli age, hili he temi ki te ʼaho ʼae neʼe ina iloʼi ai, ʼe ina utu pe anai te ʼu fua ʼo te hala ʼo tona ʼohoana.+
16 “ ʼE ko te ʼu lekula ʼaia neʼe fakatotonu e Sehova kia Moisese ʼo ʼuhiga mo he tagata mo tona ʼohoana pea mo he tamai mo tona ʼofafine kei finemui, ʼae ʼe kei nofo ʼi tona ʼapi.”