Lua Samuele

13 Neʼe ʼi ai te tokolua ʼo Apesalone, te foha ʼo Tavite, neʼe finemui pea neʼe higoa ko Tamale.+ Neʼe manako ia Amenone,+ te foha ʼo Tavite, ia ia. 2 Neʼe hoha ʼaupito ia Amenone, ʼo liliu ai ʼo mahaki ʼuhi ko Tamale tona tokolua, he neʼe kei nofo taupoʼou, pea neʼe hage kia Amenone ʼe mole feala ke ina fai he meʼa kia ia. 3 Kae neʼe kaumeʼa ia Amenone mo Sonatape,+ te foha ʼo Simia,+ tehina ʼo Tavite. Pea ko Sonatape neʼe ko he tagata kaka ʼaupito. 4 Neʼe ina ui age ki ai: “He koʼe koa ʼe ke hoha ʼaupito feia ʼi te uhu fuli, ia koe ʼae ko te foha ʼo te hau? He koʼe ʼe mole ke fakaha mai?” Neʼe tali age e Amenone: “ ʼE au manako ia Tamale, te tokolua+ ʼo toku tehina ko Apesalone.” 5 Neʼe ui age leva e Sonatape ki ai: “Alu ʼo takoto ʼi tou palepale, ke ui pe la ʼe ke mahaki. Ka haʼu tau tamai ʼo fakasiosio koe, ui age ki ai: ‘Fakalelei siʼou loto, kae tuku mai muʼa ia Tamale, toku tokolua ke haʼu ʼo ʼaumai haku meʼa kai. Kapau ʼe ina teuteuʼi ʼi ʼoku muʼa te meʼa kai ʼae ʼe foaki ki te kau mahaki,* pea mo ina ʼaumai, ʼe au kai anai.’ ”

6 Koia, neʼe alu ai ia Amenone ʼo takoto ke ui pe la ʼe mahaki, pea neʼe haʼu te hau ʼo fakasiosio ia ia. Neʼe ui e Amenone ki te hau: “Fakalelei siʼou loto, kae tuku mai muʼa ia Tamale, toku tokolua, ke haʼu ʼo teuteuʼi ʼi ʼoku muʼa he ʼu foʼi keke ʼe lua, pea ke ina ʼaumai ke au kai.” 7 Neʼe fekauʼi ai e Tavite he tahi ke alu kio Tamale ʼo ui age ki ai: “Fakalelei siʼou loto, kae ke alu ki te fale ʼo Amenone, tou tokolua ʼo teuteuʼi hana meʼa kai.”* 8 Neʼe alu ai ia Tamale ki te fale ʼo tona tokolua ko Amenone, ʼae neʼe takoto ai. Neʼe ina toʼo te falena ʼae neʼe kua natu, ʼo ina fai ʼi ʼona muʼa he ʼu foʼi keke ʼe lua, pea neʼe ina fakamoho. 9 Neʼe ina toʼo leva te fakapaku ʼo ina foaki age te ʼu foʼi keke. Kae neʼe mole fia kai ia Amenone, pea neʼe ina ui: “Kotou olo fuli ki tuʼa!” Neʼe natou olo fuli ai ki tuʼa.

10 Neʼe ui age leva e Amenone kia Tamale: “ ʼAumai te meʼa kai* ki toku koga fale ke feala ai haku kai.” Neʼe toʼo ai e Tamale te ʼu foʼi keke ʼae neʼe ina fai ʼo ina ʼave ki tona tokolua ko Amenone, ʼi te koga fale. 11 ʼI tana ʼave te ʼu foʼi keke ʼaia ke ina kai, neʼe puke ia ia e Amenone ʼo ina ui age ki ai: “Siʼoku tokolua, haʼu ke ta momoe.” 12 Kae neʼe ina ui age: “ ʼOho ia, siʼoku tokolua, ʼaua naʼa ke fakalainoaʼi au, he ʼe mole fai te taʼi aga ʼaia ʼi Iselaele.+ ʼAua naʼa ke fai te meʼa fakalialia ʼaia.+ 13 ʼE au lava katakiʼi feafeaʼi anai toku ufiufi? Pea ʼe sioʼi anai koe ohage ko he tagata aga fakalialia ʼi Iselaele. Fakalelei siʼou loto, kae ke palalau ki te hau, pea ʼe ina tali anai tau kole ʼo ʼuhiga mo au.” 14 Kae neʼe mole fia fakalogo ia ki ai. Neʼe ina puke fakamalohi ia ia, ʼo ina fakalainoaʼi mo fakaʼalikiʼi. 15 Neʼe fehiʼa likoliko leva ia Amenone ia ia pea neʼe lahi age tona fehiʼa ʼi tana manako ʼae ki ai. Neʼe ui e Amenone ki ai: “Tuʼu ʼo alu!” 16 Kae neʼe ina ui age: “ ʼOho ia, siʼoku tokolua, he ʼe kovi age tau haga ʼae ʼo kapu au ʼi te meʼa ʼae neʼe ke fai mai kia au!” Kae neʼe mole fia fakalogo ia ki ai.

17 Neʼe ina pauʼi tana tagata gaue tupulaga, ʼo ina ui age: “Fakalelei siʼou loto, ʼave ia ia ʼaeni ki tuʼa, pea ke fakamaʼu te matapa.” 18 (Neʼe ina tui he kofu makehe,* ʼae ʼe tui e te ʼu ʼofafine ʼo te hau ʼae ʼe kei nonofo taupoʼou.) Neʼe ʼave ai e te tagata gaue ia ia ki tuʼa, pea neʼe ina fakamaʼu leva te matapa. 19 Neʼe tu leva e Tamale te lefulefu ki tona ʼulu+ pea mo ina hae tona kofu matalelei. Neʼe ina hili ʼona nima ki tona ʼulu ʼo alu ai pea mo tagi leʼo lahi.

20 Neʼe fehuʼi leva e Apesalone,+ tona tokolua ki ai: “Neʼe ko tou tokolua koa ko Amenone ʼae neʼe ina fai te meʼa ʼaeni kia koe? Siʼoku tokolua, nofo fakalogologo. ʼE ko tou tokolua.+ Tuku tau toe manatu ki te faʼahi ʼaia.” Neʼe nofo ai ia Tamale ʼi te fale ʼo Apesalone, tona tokolua, pea neʼe mole toe felogoi mo he tahi. 21 ʼI te logo ʼa te Hau ko Tavite ki te ʼu meʼa fuli ʼaia, neʼe kovi ʼosi ai tona ita.+ Kae neʼe mole ina fia fakamamahiʼi te loto ʼo Amenone tona foha, koteʼuhi neʼe ʼofa ʼi ai he neʼe ko tona ʼuluaki foha. 22 Neʼe mole palalau ia Apesalone kia Amenone ʼo ʼuhiga mo he meʼa ʼe kovi peʼe ko he meʼa ʼe lelei, he neʼe fehiʼa+ ia Apesalone ia Amenone ʼuhi ko tana fakalainoaʼi tona tokolua ko Tamale.+

23 Hili ki ai taʼu ʼe lua, neʼe nonofo te ʼu tagata ʼa Apesalone ʼae neʼe natou tele te faga ovi ʼi Paale-atesoli, ʼo ovi ki Efalaimi,+ pea neʼe fakaafe e Apesalone te ʼu foha fuli ʼo te hau.+ 24 Neʼe haʼu ia Apesalone ki te hau ʼo ina ui age: “ ʼE tele e taku hahaʼi ʼaku ovi. Koia, fakalelei siʼou loto, siʼoku hau, kae ke haʼu mo au ʼo feia mo ʼau hahaʼi faifekau.” 25 Kae neʼe ui e te hau kia Apesalone: “Kailoa, siʼoku foha. Kapau ʼe matou olo fuli mo koe, ʼe matou fakakavega atu anai kia koe.” Logo la tana faiga malohi ʼae ke olo mo ia, neʼe mole loto ki ai te hau, kae neʼe ina tapuakiʼi ia ia. 26 Neʼe ui leva e Apesalone: “Fakalelei siʼou loto, kapau ʼe mole ke haʼu, pea ke tuku toku tehina ko Amenone ke haʼu mo matou.”+ Pea neʼe ui e te hau ki ai: “He koʼe ʼe alu anai mo koe?” 27 Kae neʼe faiga malohi ia Apesalone ke alu mo ia, pea neʼe tuku ai e te hau ʼona foha fuli ke olo mo Amenone.

28 Neʼe fakatotonu leva e Apesalone ki ʼana hahaʼi gaue: “Kotou nonofo tokaga. ʼI te temi pe ʼae ʼe fiafia ai te loto ʼo Amenone ʼuhi ko te vino, ʼe au ui atu anai: ‘Kotou matehi ia Amenone!’ ʼE tonu anai ke kotou matehi ia ia. ʼAua naʼa kotou matataku. ʼE mole ko au koa la ʼae ʼe ina fakatotonu atu te faʼahi ʼaia? Ke kotou lotomalohi mo lototoʼa.” 29 Pea neʼe mulimuli fakalelei te hahaʼi gaue ʼa Apesalone ki te ʼu meʼa ʼae neʼe ina fakatotonu age ke natou fai kia Amenone. Neʼe tutuʼu ake ai te ʼu foha fuli ʼo te hau ʼo natou tahi feholaki ʼi tana asino. 30 ʼI tanatou toe liliu mai ʼaia, neʼe tau age te logo ʼaeni kia Tavite: “Siʼoku hau, neʼe matehi e Apesalone ʼou foha fuli, pea neʼe mole hao he tahi.” 31 Neʼe tuʼu ake ai te hau ʼo hae ʼona kofu pea mo takoto ki lalo, pea neʼe tutuʼu ʼana hahaʼi faifekau fuli ʼi ʼona tafa mo ʼonatou kofu makahaehae.

32 Kae neʼe ui e Sonatape,+ te foha ʼo Simia,+ tehina ʼo Tavite: “Siʼoku ʼaliki, ʼaua naʼa ke manatu kua mamate ʼou foha fuli, he ʼe ko Amenone tokotahi pe ʼae kua mate.+ Neʼe ko te fakatotonu ʼaia ʼa Apesalone, ʼae neʼe ina fakatuʼutuʼu ke ina fai te faʼahi ʼaia+ talu mai te ʼaho ʼae neʼe fakalainoaʼi ai e Amenone ia Tamale,+ tona tokolua.+ 33 Koia, siʼoku ʼaliki hau, ʼaua naʼa ke tui ki* te logo ʼae neʼe ui kua mamate ʼou foha fuli. ʼE ko Amenone tokotahi pe ia ʼae kua mate.”

34 Lolotoga te temi ʼaia, neʼe hola ia Apesalone.+ Ki muli age, neʼe hiki ake e te tagata leʼo ʼona mata ʼo sio ki te ʼomai ʼa te hahaʼi kaugamalie ʼi te ala ʼae ʼe tafa ki te moʼuga. 35 Pea neʼe ui leva e Sonatape+ ki te hau: “Koʼeni, siʼoku hau, kua toe liliu mai ʼou foha ohage pe ko taku ui atu.” 36 ʼE ʼosi atu pe tana palalau kae tau mai te ʼu foha ʼo te hau pea neʼe natou fetagihi leʼo lahi. Neʼe toe fetagihi foki mo te hau pea mo ʼana hahaʼi faifekau fuli ʼi tonatou lotomamahi. 37 Kae neʼe hola ia Apesalone ʼo alu kia Talamai,+ te foha ʼo Amiute, te hau ʼo Kesuli. Pea neʼe putu ia Tavite lolotoga ni ʼaho ʼi te mate ʼo tona foha. 38 Neʼe hola ia Apesalone ki Kesuli+ ʼo nofo ai taʼu ʼe tolu.

39 Ki muli age, neʼe fakaʼamu leva ia te Hau ko Tavite ke alu ʼo sio kia Apesalone, he neʼe kua ina tali leleiʼi pe te mate ʼo Amenone.