TETELONOME

1 Neʼe palalau leva ia Moisese ki te kau Iselaele fuli ʼi te toafa ʼae ʼe ovi ki te Solotane, ia te toafa ʼae ʼe haga ki Sufi, ʼi te vaha ʼo Palani, mo Tofele, mo Lapane, mo Aseloti pea mo Tisasapi. 2 ʼE ʼaho 11 ia te fagona mai Olepe ki Katesi-palenea,+ ʼi te ala ʼo te Moʼuga ʼo Seili. 3 Neʼe palalau ia Moisese ki te kau Iselaele,* ʼi te 40 taʼu,+ ʼi te ʼaho ʼuluaki ʼo te 11 mahina, ʼo mulimuli ki te ʼu meʼa fuli ʼae neʼe fakatotonu age e Sehova ke ina fakaha kia natou. 4 Neʼe ina fai te faʼahi ʼaia ʼi tana ʼosi malo ia Sihone,+ te hau ʼo te kau Amole, ʼae neʼe nofo ʼi Heseponi pea mo Oke,+ te hau ʼo Pasani, ʼae neʼe nofo ʼi Asetaloti, ʼi Etelei.+ 5 Neʼe fakamahino e Moisese ia te Lao+ ʼi te potu fenua ʼo te Solotane, ʼi te fenua ʼo Moape. Neʼe ina ui:

6 “Neʼe palalau mai ia Sehova, totatou ʼAtua, ʼi te moʼuga ʼo Olepe, ʼo ina ui mai: ‘Kua feʼauga takotou nonofo ʼi te potu moʼugaʼia ʼaeni.+ 7 Kotou olo ki te potu moʼugaʼia ʼo te kau Amole,+ pea mo te ʼu potu fuli ʼae ʼi ʼona tafaʼaki: ko te Alapa,+ mo te potu moʼugaʼia, mo te Sefela, mo te Nekepe, pea mo te matafenua.+ Kotou olo ki te fenua ʼo te kau Kanaane. Kotou olo ʼo kaku ki Lipane*+ pea mo te vai tafe lahi ko Efalate.+ 8 Pea kotou sisio, kua au tuku atu te fenua ki ʼokotou muʼa. Kotou olo ʼo toʼo maʼa koutou ia te fenua ʼae neʼe fakapapau e Sehova ke ina foaki ki ʼakotou tamai, ia Apalahamo, mo Isaake+ pea mo Sakopo,+ ʼo feia mo tonatou hologa.’+

9 “Pea ʼi te temi ʼaia, neʼe au ui kia koutou: ‘ ʼE mole feala ke au taki tokotahi ia koutou.+ 10 Kua fakahahaʼi koutou e Sehova tokotou ʼAtua, pea kua kotou liliu ʼi te ʼaho nei ʼo kaugamalie ohage ko te ʼu fetuʼu ʼo te lagi.+ 11 ʼOfa pe ke haga ia Sehova, te ʼAtua ʼo ʼakotou kui, ʼo fakaliliu koutou ke kaugamalie+ ʼo tuʼa afe age pea ke ina tapuakiʼi koutou ohage pe ko tana fakapapauʼi atu kia koutou.+ 12 ʼE feafeaʼi haku fakatokatoka tokotahi ʼokotou fihifihia pea mo ʼakotou kē?+ 13 Kotou filifili ʼi ʼokotou telepi he ʼu tagata popoto, mo ʼatamai pea mo faiva, pea ʼe au fakanofo anai natou ko hokotou ʼu pule.’+ 14 Pea neʼe kotou tali mai: ‘ ʼE lelei ʼosi te tonu ʼaia ʼe ke ui mai.’ 15 Neʼe au toʼo ai te ʼu pule ʼo ʼokotou telepi, ia te ʼu tagata popoto mo faiva, pea neʼe au fakanofo natou ko hokotou ʼu pule: ko he ʼu pule ki te toko afe, mo he ʼu pule ki te toko teau, mo he ʼu pule ki te toko nimagofulu, mo he ʼu pule ki te toko hogofulu pea mo he kau takitaki ʼo ʼokotou telepi.+

16 “ ʼI te temi ʼaia, neʼe au foaki te ʼu fakatotonu ʼaeni ki ʼakotou tuʼi fakamau: ‘Ka hoko he fihi ʼi ʼokotou tehina pea ka olo atu kia koutou, ʼe tonu ke kotou fakamauʼi tonatou aluʼaga ʼaki te faitotonu,+ tatau aipe pe ʼe ko he fihi ʼe hoko ʼi he ʼu Iselaele ʼe lua peʼe ko he Iselaele mo he matapule.+ 17 ʼE mole tonu ke kotou fakapalatahi ʼi takotou faifakamau.+ ʼE kotou fagono fakatatau anai ki ʼae ʼe mole maʼuhiga pea mo ia ʼae ʼe maʼuhiga.+ ʼE mole tonu ke kotou matataku ki te tagata,+ koteʼuhi ʼe ʼa te ʼAtua te fakamau.+ Pea kapau ʼe faigataʼa fau kia koutou ia he aluʼaga, ʼe kotou fakaha mai anai kia au, pea ʼe au fagono anai ki ai.’+ 18 ʼI te temi ʼaia, neʼe au foaki atu he ʼu fakatotonu ʼo ʼuhiga mo te ʼu meʼa fuli ʼae ʼe tonu ke kotou fai.

19 “Neʼe tou mavae leva mai Olepe ʼo fakalaka ʼi te toe toafa lahi mo fakamataku+ ʼae neʼe kotou sisio ki ai ʼi tatatou olo ʼae ki te potu moʼugaʼia ʼo te kau Amole,+ ohage ko tona fakatotonu mai e Sehova totatou ʼAtua. Pea neʼe tou tau leva ki Katesi-palenea.+ 20 Neʼe au ui leva kia koutou: ‘Kua kotou tau ki te potu moʼugaʼia ʼo te kau Amole, ʼae ʼe foaki mai e Sehova, totatou ʼAtua kia tatou. 21 Kotou sisio, ʼe tuku atu e Sehova tokotou ʼAtua ia te fenua kia koutou. Kotou olo ʼo toʼo maʼa koutou ia te fenua, ohage pe ko tona fakaha atu e Sehova, te ʼAtua ʼo ʼakotou kui.+ ʼAua naʼa kotou matataku.’

22 “Kae neʼe kotou fakaovi fuli mai kia au ʼo ui mai: ‘Tou fekauʼi he ʼu tagata ke olo ʼo vakaʼi ia te fenua, pea ke natou toe liliu mai ʼo fakaha mai te ala ʼae ʼe tonu ke tou olo ai, pea mo fakamatala mai pe ʼe feafeaʼi te ʼu kolo ʼae ʼe tou kaku anai ki ai.’+ 23 Neʼe au leleiʼia takotou manatu, koia neʼe au filifili ai he ʼu tagata ʼe toko 12, ko he tagata ʼe tahi ʼi ʼokotou telepi takitahi.+ 24 Neʼe natou olo ai ʼo hake ki te potu moʼugaʼia,+ pea neʼe natou kaku leva ki te Vai Tafe* ʼo Esekoli ʼo natou vakavakaʼi ai te fenua. 25 Neʼe natou toʼo ai he ʼu fuaʼi ʼakau ʼo te fenua ʼo ʼaumai kia matou, pea neʼe natou ui mai: ‘Ko te fenua ʼae ʼe foaki mai e Sehova, totatou ʼAtua, ʼe lelei.’+ 26 Kae neʼe mole kotou fia olo, pea neʼe kotou talagataʼa ki te fakatotonu ʼa Sehova tokotou ʼAtua.+ 27 Neʼe kotou meo tuʼumaʼu pe ʼi ʼokotou fale la, ʼo ui: ‘ ʼE fehiʼa ia Sehova ia tatou, ko te tupuʼaga la ʼaia ʼo tana fakamavae tatou mai te fenua ʼo Esipito ʼo tuku tatou ki te ʼu nima ʼo te kau Amole pea ke fakaʼauha ai tatou. 28 ʼE feafeaʼi koa te koga meʼa ʼaeni ʼe tou olo ki ai? Kua matou lotovaivai ʼuhi ko ʼomatou tehina,+ ʼi tanatou ui mai: “ ʼE ko he hahaʼi ʼe malolohi mo lalahi age ia tatou, pea ʼe lalahi ʼonatou kolo pea ʼe ʼa kaupa ʼo kaku ki te lagi,*+ pea neʼe matou sisio ki te ʼu foha ʼo te kau Anake.” ’+

29 “Pea neʼe au tali kia koutou: ‘ ʼAua naʼa kotou matataku ʼuhi ko natou.+ 30 ʼE alu anai ia Sehova tokotou ʼAtua ʼi ʼokotou muʼa, pea ʼe tau anai maʼa koutou,+ ohage pe ko tana fai ʼi Esipito ʼo kotou sisio mata ki ai.+ 31 Pea neʼe kotou sisio ʼi te toafa ki tokotou fua e Sehova tokotou ʼAtua, ohage pe ko te fua e he tamai tona foha, ʼi te ʼu potu fuli pe ʼae neʼe kotou olo ki ai, ʼo kaku ki takotou tau mai ki te koga meʼa ʼaeni.’ 32 Kae logo la te ʼu faʼahi fuli ʼaia, neʼe mole kotou tui kia Sehova tokotou ʼAtua,+ 33 ʼae neʼe alu ʼi ʼokotou muʼa ʼo kumi he koga meʼa ke fakatuʼu ai tokotou nofoʼaga. Neʼe nofo mo koutou ʼi te poʼuli ʼaki he afi pea ʼi te ʼaho ʼaki he ʼao ke ina fakaha atu te ala ʼae ʼe tonu ke kotou olo ai.+

34 “Lolotoga te temi katoa ʼaia, neʼe logoʼi e Sehova ʼakotou palalau. Neʼe kovi ʼosi ai tona ita pea neʼe ina fakapapau:+ 35 ‘ ʼE mole sio anai he tagata ʼo te taʼiake agakovi ʼaeni ki te fenua lelei ʼae neʼe au fakapapau ke au foaki ki ʼakotou kui,+ 36 gata pe kia Kalepo, te foha ʼo Sefune. ʼE sio anai ki te fenua, pea ʼe au foaki anai kia ia mo ʼona foha te fenua ʼaia neʼe haʼele ai, he neʼe mulimuli kia Sehova ʼaki tona loto katoa.+ 37 (Pea neʼe toe ita foki ia Sehova kia au ʼuhi ko koutou, pea neʼe ina ui: “ ʼE mole ke hu anai mo koe ki te fenua.+ 38 Ko tau tagata faifekau+ ko Sosue, te foha ʼo Nune, ʼe ko ia ʼae ka hu anai ki te fenua.+ Ke ke fakalotomalohiʼi ia ia,*+ koteʼuhi ʼe ina taki anai te kau Iselaele ke natou maʼu te fenua.”) 39 Tahi ʼae meʼa, ko ʼakotou fanau ʼae neʼe kotou ui ʼe ʼave popula anai+ pea ko ʼokotou foha ʼae ʼe mole natou iloʼi ʼi te temi nei te meʼa ʼae ʼe lelei mo te meʼa ʼae ʼe kovi, ʼe natou hu anai ki te fenua pea ʼe au foaki anai maʼa natou.+ 40 Kae ko koutou, ke kotou toe liliu mai ʼo olo ki te toafa, ʼi te ala ʼo te Tai Kula.’+

41 “Pea neʼe kotou ui mai: ‘Neʼe matou agahala kia Sehova. ʼE matou hake anai ʼo tau, ohage pe ko tona fakatotonu mai e Sehova tomatou ʼAtua!’ Neʼe kotou tahi toʼo ai ʼana mahafu tau, pea neʼe kotou manatu ʼe ko he meʼa faigafua pe ia takotou hake ki te moʼuga.+ 42 Kae neʼe ui mai e Sehova kia au: ‘Ke ke ui kia natou: “ ʼE mole tonu ke kotou hake ʼo tau, koteʼuhi ʼe mole au nofo anai mo koutou.+ Kapau ʼe kotou hake, ʼe malo anai ʼokotou fili ia koutou.” ’ 43 Koia, neʼe au palalau ai kia koutou, kae neʼe mole kotou fakalogo. Neʼe kotou talagataʼa ki te fakatotonu ʼa Sehova pea neʼe kotou falala pe kia koutou totonu, ʼo kotou faiga ai ke kotou hake. 44 Neʼe ʼomai leva te kau Amole, ʼae ʼe maʼuʼuli ʼi te moʼuga ʼaia, ʼo tauʼi koutou. Neʼe natou kapu koutou, ohage ko tona fai e te ʼu lago meli, pea neʼe natou fakamavetevete koutou ʼo kaku ki Holema, ʼi Seili. 45 Neʼe kotou toe liliu ai leva ʼo fetagihi ia muʼa ʼo Sehova, kae neʼe mole fagono atu ia Sehova pea neʼe mole ina tokagaʼi koutou. 46 Ko te tupuʼaga la ʼaia ʼo takotou nonofo fualoa feia ʼi Katesi.

2 “Pea neʼe tou toe maliu mai ʼo olo ki te toafa, ʼi te ala ʼo te Tai Kula, ohage pe ko tona fakatotonu mai e Sehova,+ pea neʼe tou haʼele ʼi te ʼu tafaʼaki ʼo te Moʼuga ʼo Seili lolotoga ni tuʼuga ʼaho. 2 Neʼe ui mai leva e Sehova: 3 ‘Kua feʼauga takotou haʼele ʼi te ʼu tafaʼaki ʼo te moʼuga ʼaeni. ʼI te lakaga leva ʼaeni, kotou olo ki te potu noleto. 4 Ke ke fakatotonu ki te hahaʼi: “ ʼE kotou fakalaka ovi anai ʼi te tuʼakoi ʼo te fenua ʼo ʼokotou tehina, ia te hologa ʼo Esau,+ ʼae ʼe nonofo ʼi Seili.+ ʼE natou matataku anai ia koutou.+ Koia, ʼe tonu anai ke kotou nonofo tokaga. 5 ʼAua naʼa kotou laga tau kia natou, koteʼuhi ʼe mole au foaki atu anai hakotou meʼa ʼi tonatou fenua, maʼiape la mo he koga meʼa ke tuʼu ai ʼokotou vaʼe, he neʼe au foaki te Moʼuga ʼo Seili kia Esau.+ 6 ʼE kotou foaki anai kia natou he falā moʼo totogi ʼaki te meʼa kai ʼae ka kotou kai pea mo te vai ʼae ka kotou inu.+ 7 Koteʼuhi neʼe tapuakiʼi koutou e Sehova tokotou ʼAtua ʼi te ʼu meʼa fuli ʼae neʼe kotou fai. Neʼe ina leʼoleʼo koutou ʼi takotou haʼele ʼi te toe toafa lahi ʼaia. Lolotoga te ʼu taʼu ʼaia ʼe 40, neʼe nofo ia Sehova tokotou ʼAtua mo koutou, pea neʼe kotou maʼu tuʼumaʼu pe te ʼu meʼa ʼae neʼe ʼaoga kia koutou.” ’+ 8 Koia, neʼe tou fakalaka ovi ai ʼi ʼotatou tehina, te hologa ʼo Esau,+ ʼae ʼe nonofo ʼi Seili, ʼo tou mamaʼo mai te ala ʼo te Alapa, mo Elati pea mo Esioni-kepele.+

“Pea neʼe tou afe ai ʼo toʼo te ala ʼae ʼe alu ki te toafa ʼo Moape.+ 9 Pea neʼe ui mai e Sehova kia au: ‘ ʼAua naʼa ke gaohi koviʼi ia te kau Moape peʼe ke tauʼi ia natou, koteʼuhi ʼe mole au foaki atu anai he meʼa ʼi tonatou fenua. ʼE kua au foaki te kolo ko Ali ki te hologa ʼo Lote.+ 10 (ʼI te temi muʼa, neʼe maʼuʼuli ʼi ai te kau Emime,+ neʼe ko he hahaʼi malolohi, mo kaugamalie pea mo lalahi ohage pe ko te kau Anake. 11 Neʼe toe hage pe foki te kau Lefaimi+ ko te kau Anake,+ koia ʼae neʼe fakahigoaʼi ai natou e te kau Moape ko te kau Emime. 12 ʼI muʼa atu, neʼe nonofo te kau Holi+ ʼi Seili. Kae neʼe toʼo leva e te hologa ʼo Esau tonatou fenua, mo pulihi ia natou pea mo natou nonofo leva ʼi ai,+ ohage pe ko te meʼa ʼae ka fai anai e Iselaele ki te fenua ʼae ko tonatou tofiʼa, ia te fenua ʼae ʼe foaki moʼoni anai e Sehova kia natou.) 13 ʼI te temi ʼaeni, kotou fakalaka ʼi te Vai Tafe* ʼo Selite.’ Neʼe tou fakalaka ai leva ʼi te Vai Tafe* ʼo Selite.+ 14 Ko te temi ʼae neʼe tou haʼele ai mai Katesi-palenea ki te Vai Tafe* ʼo Selite neʼe ko taʼu ʼe 38, ʼo aʼu ki te mamate fuli ʼo te taʼiake ʼo te ʼu tagata tau, ohage pe ko tona fakaha e Sehova kia natou.+ 15 Neʼe hiki e Sehova tona nima kia natou ke ina pulihi natou ʼi te nofoʼaga, ʼo kaku ki tonatou mamate.+

16 “ ʼI te ʼosi mamate ʼa te ʼu tagata tau fuli ʼaia,+ 17 neʼe ui mai e Sehova: 18 ‘ ʼI te ʼaho nei, ʼe ke fakalaka ovi anai ki te fenua ʼo Moape, ʼae ko Ali. 19 Ka ke fakaovi anai ki te kau Amone, ʼaua naʼa ke gaohi koviʼi natou peʼe ke laga tau kia natou, koteʼuhi ʼe mole au foaki atu anai he meʼa ʼi te fenua ʼo te kau Amone. Neʼe kua au foaki te fenua ʼaia ki te hologa ʼo Lote.+ 20 Neʼe toe ui foki ʼe ko te fenua ʼaia ʼo te kau Lefaimi.+ (ʼI muʼa atu, neʼe nonofo ai te kau Lefaimi, pea neʼe fakahigoaʼi natou e te kau Amone ko te kau Samisumi. 21 Neʼe ko he hahaʼi malolohi, mo kaugamalie pea mo lalahi ohage pe ko te kau Anake.+ Neʼe fakaʼauha e Sehova ia natou ia muʼa ʼo te kau Amone, pea neʼe kapu natou e te kau Amone, kae natou nonofo ai leva. 22 Neʼe ko te faʼahi ʼaia neʼe ina fai maʼa te hologa ʼo Esau, ʼae ʼe nonofo nei ʼi Seili:+ neʼe ina fakaʼauha te kau Holi+ ʼi ʼonatou muʼa, ke feala ai hanatou maʼu ia te fenua pea mo nonofo ai ʼo kaku mai ki te ʼaho nei. 23 Kae neʼe nonofo te kau Avime ʼi te ʼu kolo liliki ʼo te potu fenua ʼo Kasa+ ʼo kaku ki te ʼomai ʼa te kau Kafetolimi,+ mai Kafetoli* ʼo pulihi natou, pea neʼe natou nonofo ai leva ʼi tonatou fenua.)

24 “ ‘Kotou olo ʼo fakalaka ʼi te Vai Tafe* ʼo Alenone.+ Koʼeni, ʼe au tuku atu ki ʼokotou nima ia te tagata Amole ko Sihone,+ te hau ʼo Heseponi. Kotou tauʼi ia ia pea kotou toʼo tona fenua. 25 ʼE au fakatupu anai ʼi te hahaʼi fuli ʼae ʼi te fuga ʼo te kele* he mataku kia koutou ʼo kamata atu ʼi te ʼaho nei, he ʼe natou logo anai ki te ʼu palalau ʼae ʼe fai ʼo ʼuhiga mo koutou. ʼE natou lotohoha mo tete anai* ʼuhi ko koutou.’+

26 “Pea neʼe au fekauʼi he ʼu tagata ʼave logo mai te toafa ʼo Ketemoti+ ke olo kia Sihone, te hau ʼo Heseponi ʼo fakaha age te ʼu folafola ʼaeni ʼo te tokalelei:+ 27 ‘Tuku ke au fakalaka ʼi tou fenua. ʼE au alu pe anai ʼi te ala lahi pea ʼe mole au afe anai ki te faʼahi mataʼu peʼe ki te faʼahi hema.+ 28 ʼE au kai pe anai te meʼa kai mo inu te vai ʼae ka ke fakatau mai. Koia, fakagafua mai pe ke au fakalaka lalo ʼi tou fenua 29 (ohage pe ko tona fai mai kia au e te hologa ʼo Esau, ʼae ʼe nonofo ʼi Seili, pea mo te kau Moape, ʼae ʼe nonofo ʼi Ali) ʼo kaku ki taku fakalaka ʼi te Solotane ke au hu ki te fenua ʼae ʼe foaki mai e Sehova tomatou ʼAtua.’ 30 Kae neʼe mole tali e Sihone, te hau ʼo Heseponi, ke tou fakalaka, koteʼuhi neʼe tuku e Sehova tokotou ʼAtua, ke uigataʼa+ mo lotofefeka, ke tuku ai ia ia ki ʼokotou nima, ohage pe ko tana fai ʼi te ʼaho nei.+

31 “Pea neʼe ui mai e Sehova kia au: ‘Sio, kua au kamata tuku atu ki ʼou nima ia Sihone pea mo tona fenua. Ke ke tauʼi ia ia mo toʼo tona fenua.’+ 32 ʼI te haʼu ʼa Sihone mo ʼana tagata fuli ʼo tauʼi tatou ʼi Saatesi,+ 33 neʼe tuku ai e Sehova, totatou ʼAtua ia ia ki ʼotatou nima, ʼo tou malo ai ia ia, mo ʼona foha pea mo ʼana tagata fuli. 34 ʼI te temi ʼaia, neʼe tou maʼu ʼona kolo fuli pea mo maumauʼi te ʼu kolo takitahi ʼaia, ʼo feia mo te hahaʼi tagata, mo te hahaʼi fafine pea mo te fanau. Neʼe mole tou tuku ke maʼuli he tahi.+ 35 Neʼe tou ʼave pe te faga manu mo te ʼu koloa ʼo te ʼu kolo ʼae neʼe tou maʼu. 36 Neʼe mole pe he kolo ʼe tahi neʼe malohi age ia tatou mai te kolo ko Aloele,+ ʼae ʼi te vaʼe Vai Tafe* ʼo Alenone (ʼo kau ki ai te kolo ʼae ʼi te vai tafe), ʼo kaku ki Kileate. Neʼe tuku fuli e Sehova, totatou ʼAtua, ki ʼotatou nima.+ 37 Kae neʼe mole kotou fakaovi ki te fenua ʼo te kau Amone,+ mo te kauvai ʼo te Vai Tafe* ʼo Sapoke,+ mo te ʼu kolo ʼo te potu moʼugaʼia, pea mo te ʼu koga meʼa ʼae neʼe tapuʼi atu e Sehova, totatou ʼAtua ke kotou fakaovi ki ai.

3 “Pea neʼe tou maliu leva ʼo hake ʼi te Ala ʼo Pasani. Pea neʼe haʼu ia Oke, te hau ʼo Pasani mo tana foʼi kautau katoa, ʼo tauʼi tatou ʼi Etelei.+ 2 Neʼe ui mai e Sehova kia au: ‘ ʼAua naʼa ke mataku ia ia, he ʼe au tuku atu anai ki ʼou nima, ʼo feia mo tana foʼi kautau katoa pea mo tona fenua. Pea ʼe ke fai anai kia ia ohage pe ko te meʼa ʼae neʼe ke fai kia Sihone, te hau ʼo te kau Amole, ʼae neʼe nofo ʼi Heseponi.’ 3 Neʼe toe tuku foki e Sehova, totatou ʼAtua ia Oke, te Hau ʼo Pasani ki ʼotatou nima, ʼo feia mo tana foʼi kautau katoa. Neʼe tou malo ia natou pea neʼe mole hao he tahi. 4 Neʼe tou toʼo leva ʼonatou kolo fuli, neʼe mole pe he kolo ʼe tahi neʼe tou tuku: neʼe ko kolo ʼe 60 ʼi te potu fenua katoa ʼo Alekopi, ʼae ko te puleʼaga ʼo Oke, ʼi Pasani.+ 5 Neʼe ko he ʼu kolo tau pea neʼe ʼi ai ʼonatou kaupa maʼoluga, mo ʼonatou matapa pea mo ʼonatou ʼakau fakamaʼu. Neʼe lahi foki mo te ʼu kolo neʼe mole ʼa kaupa ʼae neʼe tou toe maʼu. 6 Kae neʼe tou maumauʼi te ʼu kolo fuli ʼaia,+ ohage pe ko te meʼa ʼae neʼe tou fai kia Sihone, te Hau ʼo Heseponi, pea neʼe tou matehi te hahaʼi tagata, mo te hahaʼi fafine pea mo te fanau.+ 7 Pea neʼe tou toʼo maʼa tatou te faga manu fuli pea mo te ʼu koloa ʼo te ʼu kolo.

8 “ ʼI te temi ʼaia, neʼe tou maʼu te fenua ʼo te ʼu hau ʼe lua ʼo te kau Amole,+ ʼi te potu fenua ʼo te Solotane, mai te Vai Tafe* ʼo Alenone ki te Moʼuga ʼo Helemoni+ 9 (ko te moʼuga ʼaia neʼe fakahigoaʼi e te kau Sitoni ko Silioni pea neʼe fakahigoaʼi e te kau Amole ko Senili), 10 mo te ʼu kolo fuli ʼo te potu maʼoluga, mo Kileate katoa, mo Pasani katoa, ʼo kaku ki Salaka pea mo Etelei,+ te ʼu kolo ʼo te puleʼaga ʼo Oke ʼi Pasani. 11 Ko Oke, te Hau ʼo Pasani neʼe ko ia pe ʼae neʼe kei toe ʼi te kau Lefaimi. Neʼe fai tona puha mate ʼaki te ukamea,* pea ʼe kei tuku nei ʼi Lapa, te kolo ʼo te kau Amone. Neʼe fasiga nima hiva tona loa pea mo fasiga nima fa tona laulahi,* ʼo mulimuli ki te faʼahiga fakafuafua ʼae neʼe fai mahani. 12 ʼI te temi ʼaia, neʼe tou maʼu leva te fenua ʼaia: neʼe kamata mai Aloele,+ ʼae ʼe ovi ki te Vai Tafe* ʼo Alenone, pea neʼe kau ai te vaelua ʼo te potu moʼugaʼia ʼo Kileate. Neʼe au foaki te ʼu kolo ʼae ʼe tuʼu ʼi ai ki te kau Lupeni mo te kau Kate.+ 13 Pea neʼe au foaki ki te vaelua ʼo te telepi ʼo Manase te toe ʼo Kileate pea mo Pasani katoa, ia te puleʼaga ʼo Oke.+ Neʼe fakahigoa te potu fenua katoa ʼo Alekopi, ʼae ʼe kau ʼi Pasani, ko te fenua ʼo te kau Lefaimi.

14 “Neʼe toʼo e Saile,+ te foha ʼo Manase, te potu fenua katoa ʼo Alekopi+ ʼo kaku ki te tuʼakoi ʼo te kau Kesuli mo te kau Maakate.+ Pea neʼe ina fakahigoaʼi te ʼu kolo liliki ʼaia ʼo Pasani ko Havote-saile,*+ ohage pe ko tona higoa. ʼE ko tonatou higoa ʼaia ʼo kaku mai ki te ʼaho nei. 15 Pea neʼe au foaki kia Makile ia Kileate.+ 16 Pea neʼe au foaki ki te kau Lupeni mo te kau Kate,+ te fenua ʼae ʼe kamata mai Kileate ki te Vai Tafe* ʼo Alenone. Pea ko te lotomalie ʼo te vai tafe ʼaia ʼe ko tona tuʼakoi. Neʼe au toe foaki ia te fenua ʼaia ʼo kaku ki Sapoke, te vai tafe ʼo te tuʼakoi ʼo te kau Amone, 17 ʼo feia mo te Alapa, mo te Solotane pea mo tona kauvai, mai Kineleti ki te Tai ʼo Alapa, ia te Tai Kona,* ʼi te vaʼe moʼuga ʼo Pisika, ʼi te potu esite.+

18 “Neʼe au fakatotonu leva kia natou: ‘Neʼe foaki atu e Sehova tokotou ʼAtua te fenua ʼaeni, ke kotou toʼo maʼa koutou. Koia, ke toʼo e ʼakotou tagata toʼa fuli ʼanatou mahafu, pea ke kotou fakalaka ʼi te Solotane, ʼi muʼa ʼo ʼokotou tehina, ia te kau Iselaele.+ 19 ʼE gata pe anai ki ʼokotou ʼohoana, mo ʼakotou fanau pea mo takotou faga manu (ʼe au iloʼi lelei ʼe lahi takotou faga manu) ʼe nonofo anai ʼi te ʼu kolo ʼae neʼe au foaki atu, 20 ʼo aʼu ki te foaki e Sehova te malolo ki ʼokotou tehina, ohage ko tana fai kia koutou, pea ke natou toe maʼu mo natou te fenua ʼae ʼe foaki anai e Sehova tokotou ʼAtua kia natou, ʼae ʼe tuʼu ʼi te tahi kauvai ʼo te Solotane. Hili ʼaia, ʼe kotou tahi liliu mai anai ki tona kele ʼae kua au foaki atu.’+

21 “ ʼI te temi ʼaia, neʼe au fakatotonu kia Sosue:+ ‘Neʼe ke sio mata ki te ʼu meʼa ʼae neʼe fai e Sehova tokotou ʼAtua, ki te ʼu hau ʼaia ʼe lua. ʼE toe fai feia pe anai e Sehova ki te ʼu puleʼaga fuli ʼae ʼe ke alu anai ki ai ʼi te tahi kauvai ʼo te Solotane.+ 22 ʼAua naʼa kotou matataku, he ʼe ko Sehova tokotou ʼAtua ʼae ʼe tau maʼa koutou.’+

23 “ ʼI te temi ʼaia, neʼe au kole mamahi kia Sehova: 24 ‘Tuʼi ʼAliki ko Sehova, neʼe ke kamata fakaha mai kia au ʼaeni ko tau tagata faifekau tou maʼoluga pea mo tou nima mafimafi.+ ʼE ko te ʼatua fea ʼi te lagi mo te kele ʼe ina lava fakahoko he ʼu gaue fakaofoofo ohage ko koe?+ 25 Fakalelei siʼou loto, tuku ke au fakalaka ʼo sio ki te fenua lelei ʼae ʼi te tahi kauvai ʼo te Solotane, ia te potu moʼugaʼia mo lelei ʼaia ʼo feia mo Lipane.’+ 26 Kae neʼe kei ita pe ia Sehova kia au ʼuhi ko koutou,+ pea neʼe mole fia fakalogo mai. Neʼe ui mai e Sehova: ‘Kua feʼauga! ʼAua naʼa ke toe palalau mai ʼi he temi ki te faʼahi ʼaia. 27 Ke ke hake ki te tumutumu ʼo Pisika,+ pea ke sio ki te potu uesite, mo te potu noleto, mo te potu saute pea mo te potu esite ʼo ke mamata ki te fenua, koteʼuhi ʼe mole ke fakalaka anai ʼi te Solotane.+ 28 Ke ke fakanofo ia Sosue ko honatou pule,+ pea ke fakalotomalohiʼi ia ia, koteʼuhi ʼe ko ia ʼae ka fakalaka ʼi te Solotane+ ʼo alu ia muʼa ʼo te hahaʼi pea ʼe ko ia ʼae ka ina taki natou ke natou maʼu te fenua ʼae ka ke sio ki ai.’ 29 Neʼe hoko te ʼu faʼahi fuli ʼaia ʼi tatatou kei nonofo ʼi te potu fenua ʼae ʼe haga ki Pete-peoli.+

4 “Hahaʼi ʼo Iselaele, ʼi te lakaga leva ʼaeni, kotou fakalogo ki te ʼu lekula mo te ʼu lao ʼae ʼe au akoʼi atu ke kotou mulimuli ki ai, ke kotou maʼuʼuli,+ mo hu pea mo maʼu ia te fenua ʼae ʼe foaki atu e Sehova, te ʼAtua ʼo ʼakotou kui. 2 ʼE mole tonu ke kotou hilifaki he meʼa ki te ʼu fakatotonu ʼae ʼe au foaki atu pea ʼe mole tonu ke kotou toʼo he meʼa mai ai,+ kae ke kotou taupau te ʼu fakatotonu ʼa Sehova tokotou ʼAtua ʼae ʼe au foaki atu.

3 “Neʼe kotou sisio mata ki te meʼa ʼae neʼe fai e Sehova ʼuhi ko Paale ʼo Peole: Neʼe fakaʼauha e Sehova tokotou ʼAtua ʼi te lotolotoiga ʼo koutou, ia natou fuli ʼae neʼe mulimuli ia Paale ʼo Peole.+ 4 Kae ko koutou ʼae ʼe pipiki kia Sehova tokotou ʼAtua, ʼe kei kotou maʼuʼuli fuli ʼi te temi nei. 5 Koʼeni, kua au akoʼi atu kia koutou te ʼu lekula mo te ʼu lao,+ ohage pe ko tona fakatotonu mai e Sehova toku ʼAtua, ke feala hakotou mulimuli ki ai ʼi te fenua ʼae ʼe kotou maʼu anai. 6 ʼE tonu ke kotou mulimuli fakalelei ki ai,+ he ʼe ko te hahaʼi ʼae ka logo anai ki te ʼu lekula fuli ʼaia, ʼe natou sisio anai ki tokotou poto+ mo tokotou ʼatamai,+ pea ʼe natou ui anai: ‘ ʼE mahino ia, ko te puleʼaga lahi ʼaeni ʼe ko ni hahaʼi popoto mo ʼatamai.’+ 7 ʼE ko te puleʼaga lahi fea ʼae ʼe ovi age ʼona ʼatua ki ai ohage ko te ovi mai ʼa Sehova, totatou ʼAtua kia tatou moka tou pauʼi kia te ia?+ 8 Pea ko te puleʼaga lahi fea ʼae ʼe ina maʼu he ʼu lekula mo he ʼu lao faitotonu ohage ko te Lao katoa ʼaeni ʼe au tuku atu kia koutou ʼi te ʼaho nei?+

9 “Kae ke kotou nonofo tokakaga, ke ʼaua naʼa kotou galoʼi te ʼu meʼa ʼae neʼe kotou sisio mata ki ai kae ke kotou taupau maʼu ʼi ʼokotou loto lolotoga tokotou maʼuli katoa. ʼE tonu foki ke kotou fakamatala te ʼu meʼa ʼaia ki ʼokotou foha pea mo ʼokotou mokopuna.+ 10 ʼI te ʼaho ʼae neʼe kotou tutuʼu ai ia muʼa ʼo Sehova tokotou ʼAtua, ʼi Olepe, neʼe ui mai e Sehova kia au: ‘Fakatahiʼi mai te hahaʼi kia te au ke feala hanatou logo ki ʼaku folafola+ pea mo ako ke natou manavasiʼi kia te au+ ʼi te temi fuli pe ʼae ʼe natou maʼuʼuli ai ʼi te kele, pea ke feala ai hanatou akoʼi ʼonatou foha.’+

11 “Koia, neʼe kotou fakaovi ai mo tutuʼu ʼi te vaʼe moʼuga, pea neʼe ʼi ai he afi ʼi te moʼuga ʼo kaku ki te lagi. Neʼe fakapoʼuli te takafoli, neʼe fakapoʼuli gaogao pea neʼe ʼi ai he ʼao.+ 12 Pea neʼe kamata palalau atu ia Sehova kia koutou mai te afi.+ Neʼe kotou logo ki he tahi ʼe palalau, kae neʼe mole kotou sisio ki ai,+ neʼe ko tona leʼo pe.+ 13 Pea neʼe ina fakaha atu tana fuakava,+ ʼae neʼe ina fakatotonu atu ke kotou mulimuli ki ai: ia te ʼu Folafola ʼe Hogofulu.+ Hili ʼaia, neʼe ina tohi ki ni lauʼi maka ʼe lua.+ 14 ʼI te temi ʼaia, neʼe fakatotonu mai e Sehova ke au akoʼi atu te ʼu lekula mo te ʼu lao, ʼae ʼe tonu anai ke kotou mulimuli ki ai ʼi te fenua ʼae ka kotou hu ki ai pea mo maʼu anai.

15 “Neʼe mole kotou sisio ki he tahi ʼi te ʼaho ʼae neʼe palalau atu ai ia Sehova ʼi Olepe mai te afi, koia ke kotou nonofo tokakaga, 16 ke ʼaua naʼa kotou heʼe agatonu ʼo kotou fai he fakatata ʼo he taula ʼatua, ia te fakatata ʼo he tagata peʼe ko he fafine,+ 17 peʼe ko te fakatata ʼo he manu ʼi te kele peʼe ko te fakatata ʼo he manulele,+ 18 peʼe ko te fakatata ʼo he manu ʼe totolo ʼi te kele peʼe ko te fakatata ʼo he ika ʼi te ʼu vai.+ 19 Pea ka kotou hiki ake ʼokotou mata ki te lagi, ʼo kotou sisio ai ki te laʼa, mo te mahina pea mo te ʼu fetuʼu, ia te foʼi kautau katoa ʼaia ʼo te ʼatu lagi, kotou tokakaga naʼa fakahalaʼi koutou, ʼo kotou tulolo pea mo tauhi ki ai.+ Neʼe foaki e Sehova tokotou ʼAtua te ʼu meʼa ʼaia ki te hahaʼi fuli ʼae ʼi te lalo lagi. 20 Kae neʼe filifili koutou e Sehova pea neʼe ina fakamavae koutou mai Esipito, mai te gutuʼumu haka ukamea, ke kotou liliu ko tana hahaʼi,+ ohage pe ko te ʼaho nei.

21 “Neʼe ita ia Sehova kia au ʼuhi ko koutou,+ pea neʼe ina fakaha mai ʼe mole au fakalaka anai ʼi te Solotane pea mo hu ki te fenua lelei ʼae ʼe foaki atu anai e Sehova tokotou ʼAtua, ohage ko hokotou tofiʼa.+ 22 Koteʼuhi ʼe au mate anai ʼi te fenua ʼaeni. ʼE mole au fakalaka anai ʼi te Solotane,+ kae ʼe kotou fakalaka anai ʼi ai pea ʼe kotou maʼu anai te fenua lelei ʼaia. 23 Kotou tokakaga naʼa kotou galoʼi te fuakava ʼae neʼe fai e Sehova tokotou ʼAtua mo koutou,+ pea ʼaua naʼa kotou fai he ʼu fakatata ʼo he meʼa pe neʼe tapuʼi atu kia koutou e Sehova, tokotou ʼAtua.+ 24 Koteʼuhi ko Sehova tokotou ʼAtua ʼe ko he afi kakaha,+ ʼei, ko he ʼAtua ʼe ina fakamaʼua ke pipiki ʼateaina pe kia te ia.+

25 “Kapau ʼe kotou maʼu hokotou ʼu foha mo hokotou ʼu mokopuna, mo kotou maʼuʼuli fualoa ʼi te fenua, pea kapau ʼe kotou heʼe agatonu ʼo kotou fai he fakatata+ ʼo he meʼa pe, pea mo kotou fai te meʼa ʼae ʼe kovi kia mata ʼo Sehova tokotou ʼAtua, ʼo tupu ai tona hauhau,+ 26 ke liliu ʼi te ʼaho nei ia natou fuli ʼae ʼi selo pea mo te kele ko ʼaku fakamoʼoni ʼi taku fai te ʼu palalau ʼaeni: ʼE kotou mamate moʼoni anai pea ʼe vave anai tokotou pulihi ʼi te fenua ʼae ʼe kotou maʼu anai ʼi takotou ʼosi fakalaka ʼi te Solotane. ʼE mole kotou maʼuʼuli fualoa anai ʼi ai, kae ʼe fakaʼauha katoa anai koutou.+ 27 ʼE fakamavetevete anai koutou e Sehova ʼi te ʼu puleʼaga,+ pea ʼe ko te tokosiʼi pe anai ia koutou ka hao+ ʼi te ʼu puleʼaga ʼae ʼe ʼave koutou ki ai e Sehova. 28 ʼE kotou tauhi anai ʼi ai ki he ʼu ʼatua neʼe fai ʼaki te ʼakau pea mo te maka, pea ʼe ko te gaue ʼo te ʼu nima ʼo te tagata,+ ʼei, ko he ʼu ʼatua ʼe mole feala hanatou sisio, mo logo, mo kai pea mo mamanu ki he meʼa.

29 “Kapau ʼe kotou kumi ia Sehova, tokotou ʼAtua ʼi takotou nonofo ʼi ai, ʼe kotou maʼu moʼoni anai ia ia,+ mo kapau foki ʼe kotou kumi ia ia ʼaki tokotou loto katoa mo tokotou maʼuli* katoa.+ 30 Pea ʼi te ka haʼu, moka lahi ʼaupito tokotou lotomamahi pea mo hoko kia koutou te ʼu meʼa fuli ʼaia, ʼe kotou toe liliu mai anai kia Sehova, tokotou ʼAtua pea mo fakalogo ki tona leʼo.+ 31 Koteʼuhi ko Sehova, tokotou ʼAtua, ʼe ko he ʼAtua manavaʼofa.+ ʼE mole ina liʼaki anai koutou, mo tuku anai ke kotou mamate, pea ʼe mole ina galoʼi anai te fuakava ʼae neʼe ina fai mo ʼakotou kui.+

32 “ ʼI te lakaga nei, kotou kumi pe kotea te ʼu meʼa ʼae neʼe hoko ʼi te temi muʼa, ʼi muʼa ʼo tokotou temi, talu mai te ʼaho ʼae neʼe fakatupu ai e te ʼAtua ia te tagata ʼi te kele. Kotou fai he ʼu fekumi mai ʼae potu taupotu ʼo te lagi ki ʼae potu taupotu ʼo te lagi. Neʼe kua hoko koa he meʼa lahi feia? Pe neʼe kua logo koa he tahi ki he meʼa feia?+ 33 Neʼe kua logo koa he tahi age hahaʼi ki te leʼo ʼo te ʼAtua ʼe palalau mai he afi, ohage ko takotou logo ki ai kae ʼe kei kotou maʼuʼuli pe?+ 34 Pe neʼe kua faiga koa e te ʼAtua ke ina toʼo hona puleʼaga mai he tahi age puleʼaga? Pea neʼe kua ina fakahoko koa he ʼu fakamau,* mo he ʼu fakailoga, mo he ʼu milakulo,+ mo he tau,+ pea mo fakaʼaogaʼi tona nima malohi+ mo tona mafimafi, pea mo fai he ʼu gaue fakamataku+ ke ina maʼu te puleʼaga ʼaia, ohage ko tona fai e Sehova tokotou ʼAtua kia koutou ʼi Esipito ʼi ʼokotou muʼa? 35 Neʼe fakaha atu te ʼu meʼa ʼaia kia koutou ke kotou iloʼi ai ʼe ko Sehova te ʼAtua moʼoni,+ pea ʼe mole ʼi ai he tahi ʼe hage ko ia.+ 36 Neʼe palalau atu mai te lagi ʼo ina fakatonutonuʼi koutou, pea ʼi te kele, neʼe ina fakaha atu he afi lahi, pea neʼe kotou logo ki ʼana palalau mai te afi.+

37 “Neʼe alu mo koutou ʼi tana fakamavae koutou mai Esipito ʼaki tona mafimafi, he neʼe ʼofa ki ʼakotou kui pea neʼe ina filifili tonatou hologa.+ 38 Neʼe ina kapu ʼi ʼokotou muʼa te ʼu puleʼaga ʼae neʼe lalahi age mo malolohi age ia koutou, ke ina fakahu koutou ki tonatou fenua pea mo foaki atu ko hokotou tofiʼa, ohage ko te ʼaho nei.+ 39 Koia, ʼi te ʼaho nei, ke kotou iloʼi mo manatuʼi, ʼe ko Sehova te ʼAtua moʼoni ʼi te lagi pea mo te kele.+ ʼE mole he tahi age ʼatua.+ 40 ʼE tonu ke kotou taupau ʼana lekula mo ʼana fakatotonu ʼae ʼe au foaki atu kia koutou ʼi te ʼaho nei, ke fua lelei ai kia koutou mo ʼokotou foha, pea ke feala hakotou maʼuʼuli fualoa ʼi te fenua ʼae ʼe foaki atu e Sehova, tokotou ʼAtua.”+

41 ʼI te temi ʼaia, neʼe tuku keheʼi e Moisese he ʼu kolo ʼe tolu ʼi te potu esite ʼo te Solotane.+ 42 Kapau neʼe matehi e he tagata he tahi kae neʼe mole loto ki ai pea neʼe mole fehiʼa ki ai ʼi muʼa atu,+ ʼe tonu anai ke hola ki he kolo ʼi te ʼu kolo ʼaia ke haofaki ai tona maʼuli.+ 43 Koʼeni te ʼu higoa ʼo te ʼu kolo ʼaia: ko Petesele,+ ʼe tuʼu ʼi te toafa ʼae ʼi te potu maʼoluga maʼa te kau Lupeni, mo Lamoti+ ʼi Kileate maʼa te kau Kate, pea mo Kolani+ ʼi Pasani maʼa te kau Manase.+

44 Koʼeni te Lao+ ʼae neʼe tuku e Moisese ki te hahaʼi ʼo Iselaele. 45 Koʼeni te ʼu fakamanatu, mo te ʼu lekula pea mo te ʼu lao ʼae neʼe foaki e Moisese ki te kau Iselaele hili tanatou mavae mai Esipito.+ 46 Neʼe hoko te faʼahi ʼaia ʼi te potu fenua ʼo te Solotane, ʼi te koga meʼa ʼae ʼe haga ki Pete-peoli,+ ʼi te fenua ʼo Sihone, te Hau ʼo te kau Amole, ʼae neʼe nofo ʼi Heseponi.+ Neʼe malo ia Moisese mo te kau Iselaele ia ia ʼi tanatou ʼosi mavae ʼae mai Esipito.+ 47 Neʼe natou maʼu tona fenua ʼo feia mo te fenua ʼo Oke,+ te Hau ʼo Pasani. Neʼe ko te ʼu hau ʼaia ʼe lua ʼo te kau Amole ʼae neʼe ʼi te potu fenua esite ʼo te Solotane. 48 Neʼe kamata te fenua ʼaia mai Aloele,+ ʼae ʼi te vaʼe Vai Tafe* ʼo Alenone, ʼo kaku ki te Moʼuga ʼo Sioni, ʼae ko Helemoni,+ 49 pea mo te Alapa katoa ʼi te potu fenua esite ʼo te Solotane, ʼo kaku ki te Tai ʼo Alapa,* ʼae ʼi te vaʼe moʼuga ʼo Pisika.+

5 Neʼe pauʼi leva e Moisese ia Iselaele katoa pea neʼe ina ui kia natou: “Hahaʼi ʼo Iselaele, kotou fagono ki te ʼu lekula mo te ʼu lao ʼae ʼe au tala atu kia koutou ʼi te ʼaho nei. Pea ʼe tonu anai ke kotou ako te ʼu lekula mo te ʼu lao ʼaia pea mo mulimuli fakalelei ki ai. 2 Neʼe fai e Sehova, totatou ʼAtua, he fuakava mo tatou ʼi Olepe.+ 3 Neʼe mole fai e Sehova te fuakava ʼaia mo ʼatatou kui, kae neʼe ina fai mo tatou, ia tatou fuli ʼaeni ʼe kei maʼuʼuli ʼi te ʼaho nei. 4 Neʼe palalau fakahagatonu ia Sehova mo koutou mai te afi, ʼi te moʼuga.+ 5 ʼI te temi ʼaia, neʼe au tuʼu ʼi te vaha ʼo Sehova pea mo koutou,+ ʼo fakaha atu te folafola ʼa Sehova, he neʼe kotou matataku ki te afi, pea neʼe mole kotou hake ai ki te moʼuga.+ Pea neʼe ui e te ʼAtua:

6 “ ‘Ko au ia Sehova tou ʼAtua, ʼae neʼe ina fakamavae ia koe mai te fenua ʼo Esipito, ʼae neʼe fakapopulaʼi ai ia koe.*+ 7 ʼE tonu ke ke atolasio kia au tokotahi pe. ʼE mole tonu ke ke atolasio ki he tahi age ʼu ʼatua.+

8 “ ‘ ʼE mole tonu ke ke fai he fakatata+ peʼe ko he meʼa ʼe fakata ki he meʼa ʼi selo, peʼe ʼi te kele, peʼe ʼi te ʼu vai. 9 ʼE mole tonu ke ke tulolo ʼi ʼonatou muʼa pea mo tauhi kia natou,+ koteʼuhi ko au, ia Sehova tou ʼAtua, ko he ʼAtua ʼe ina fakamaʼua ke pipiki ʼateaina pe kia te ia.+ ʼE au tauteaʼi te ʼu foha ʼuhi ko te hala ʼo ʼanatou tamai ʼae ʼe fehihiʼa kia te au, pea ʼe au toe tauteaʼi mo te tolu taʼiake mo te fa taʼiake.+ 10 Kae ʼe au fakaha toku ʼofa agatonu ki te afe taʼiake, ʼae ʼe hifo mai ia natou ʼae ʼe ʼoʼofa ia te au pea mo taupau ʼaku fakatotonu.

11 “ ‘ ʼE mole tonu ke ke moamoagaʼi te huafa ʼo Sehova tou ʼAtua,+ koteʼuhi ʼe mole tuku anai e Sehova ke hala tautea ia ia ʼae ʼe ina moamoagaʼi tona huafa.+

12 “ ‘Ke ke fai te ʼaho ʼo te Sapato pea ke taputapu te ʼaho ʼaia kia koe, ohage pe ko tona fakatotonu atu e Sehova tou ʼAtua.+ 13 ʼE tonu ke ke fai ʼau gaue fuli lolotoga ʼaho ʼe ono,+ 14 kae ko te fitu ʼaho ʼe ko he sapato ia kia Sehova tou ʼAtua.+ ʼE mole tonu ke ke fai he gaue,+ ʼo feia mo ʼau fanau, mo tau tagata kaugana, mo tau fafine kaugana, mo tau vitulo, mo tau asino, mo tau manu lalata pea mo te matapule ʼae ʼe nofo ʼi ʼou kolo,*+ ke feala ai ke malolo tau tagata kaugana peʼe ko tau fafine kaugana, ohage pe ko koe.+ 15 Ke ke manatuʼi neʼe ke liliu ko he kaugana ʼi Esipito pea neʼe fakamavae koe e Sehova tou ʼAtua mai ai, ʼaki tona nima malohi mo tona mafimafi.+ Ko te tupuʼaga la ʼaia ʼo te fakatotonu atu e Sehova tou ʼAtua ke ke fai te ʼaho ʼo te Sapato.

16 “ ‘Fakaʼapaʼapa ki tau tamai pea mo tau faʼe,+ ohage pe ko tona fakatotonu atu e Sehova tou ʼAtua, ke ke maʼuli fualoa ai pea mo fua manuʼia kia koe ʼi te fenua ʼae ʼe foaki atu e Sehova tou ʼAtua.+

17 “ ‘ ʼE mole tonu ke ke faifakapo.+

18 “ ‘ ʼE mole tonu ke ke tono.+

19 “ ‘ ʼE mole tonu ke ke kaihaʼa.+

20 “ ‘ ʼE mole tonu ke ke fai he fakamoʼoni loi ʼo ʼuhiga mo tou tatau.+

21 “ ‘ ʼE mole tonu ke ke holi ki te ʼohoana ʼo tou tatau.+ Pea ʼe mole tonu ke ke holi ki te ʼapi ʼo tou tatau, peʼe ko tana gaueʼaga, peʼe ko tana tagata kaugana, peʼe ko tana fafine kaugana, peʼe ko tana vitulo, peʼe ko tana asino, peʼe ko he meʼa pe ʼe maʼu e tou tatau.’+

22 “Neʼe fakaha atu e Sehova te ʼu fakatotonu* ʼaia kia koutou fuli ʼi te moʼuga, ʼi tana palalau atu mai te afi, mo te ʼao, pea mo te fakapoʼuli gaogao,+ ʼaki he leʼo malohi, pea neʼe mole ina hilifaki he tahi age meʼa ki ai. Neʼe ina tohi leva te ʼu fakatotonu ʼaia ʼi ni lauʼi maka ʼe lua pea neʼe ina foaki mai kia au.+

23 “Kae ʼi te temi pe ʼae neʼe kotou logo ai ki te leʼo mai te fakapoʼuli, kae lolotoga ulo te moʼuga,+ neʼe ʼomai te ʼu pule fuli ʼo ʼokotou telepi pea mo te kau takitaki kia au. 24 Pea neʼe kotou ui: ‘Koʼeni, kua fakaha mai e Sehova totatou ʼAtua, tona kololia mo tona mafimafi, pea neʼe matou logo ki tona leʼo mai te afi.+ ʼI te ʼaho nei, neʼe matou sisio ai ʼe feala pe ki he tagata ke maʼuli moka palalau mo te ʼAtua.+ 25 Koia, he koʼe ʼe matou mamate anai? Koteʼuhi ʼe feala pe ke tutu matou e te toe afi lahi ʼaia. Kapau ʼe hoko atu tamatou fakalogo ki te leʼo ʼo Sehova, totatou ʼAtua, ʼe mahino ia ʼe matou mamate anai. 26 Neʼe kua ʼi ai koa he tahi neʼe kei maʼuli ʼi tana ʼosi logo ki te leʼo ʼo te ʼAtua maʼuli, ʼe palalau mai te afi, ohage ko tana palalau mai kia matou? 27 Koia, alu pe koe ʼo fakalogo ki te ʼu meʼa fuli ʼae ka tala atu anai e Sehova, totatou ʼAtua, pea ʼe ko koe anai ka ina fakaha mai te ʼu meʼa fuli ʼae ka tala atu e Sehova, totatou ʼAtua. Pea ʼe matou fagono anai pea mo mulimuli ki ai.’+

28 “Koia, neʼe logo ia Sehova ki te ʼu palalau neʼe kotou fai mai, pea neʼe ui mai e Sehova: ‘Neʼe au logo ki te ʼu palalau ʼae neʼe fai atu e te hahaʼi ʼaena kia koe. Pea ko te ʼu meʼa fuli ʼae neʼe natou ui, ʼe lelei.+ 29 Ka na feia age la ʼe natou lotolelei tuʼumaʼu pe ke natou manavasiʼi kia te au+ pea mo taupau ʼaku fakatotonu fuli,+ ʼe fua lelei pe anai kia natou mo ʼonatou foha ʼo talu ai!+ 30 Alu ʼo ui age kia natou: “Ke kotou toe liliu ki ʼokotou fale la.” 31 Kae ko koe ʼe ke nofo anai mo au ʼi heni. Pea ʼe au fakaha atu anai te ʼu fakatotonu, mo te ʼu lekula pea mo te ʼu lao fuli ʼae ʼe ke akoʼi age anai kia natou, pea ʼe tonu anai ke natou mulimuli ki ai ʼi te fenua ʼae ʼe au foaki age kia natou.’ 32 Koia, ʼi te temi nei, kotou tokakaga ʼo fai te ʼu meʼa ʼae ʼe fakatotonu atu e Sehova, tokotou ʼAtua.+ ʼE mole tonu ke kotou olo ki te faʼahi mataʼu peʼe ki te faʼahi hema.+ 33 ʼE kotou mulimuli pe anai ʼi te ala ʼae ʼe fakatotonu atu e Sehova tokotou ʼAtua,+ ke feala ai hakotou maʼuli lelei mo fualoa ʼi te fenua ʼae ka kotou maʼu.+

6 “Pea koʼeni te ʼu fakatotonu, mo te ʼu lekula, pea mo te ʼu lao ʼae neʼe foaki mai e Sehova, tokotou ʼAtua ke akoʼi atu kia koutou, ke feala ai hakotou mulimuli ki ai ʼi te fenua ʼae ʼe kotou maʼu anai ʼi takotou ʼosi fakalaka ʼi te Solotane. 2 Pea ko koutou, mo ʼokotou foha, pea mo ʼokotou mokopuna, ʼe kotou manavasiʼi anai kia Sehova tokotou ʼAtua. ʼE kotou taupau anai ʼana lao mo ʼana fakatotonu fuli ʼae ʼe au foaki atu ʼi tokotou maʼuli katoa,+ ke feala ai hakotou maʼuʼuli fualoa.+ 3 Pea hahaʼi ʼo Iselaele, kotou fakalogo pea mo mulimuli fakalelei ki ai, ke fua manuʼia ai kia koutou pea ke kotou liliu ai ʼo kaugamalie ʼaupito ʼi te fenua ʼae ʼe tafe ai te huʼa pipi mo te meli, ohage pe ko tona fakapapau atu e Sehova, te ʼAtua ʼo ʼakotou kui.

4 “Iselaele, fakalogo mai: Ko Sehova totatou ʼAtua, ʼe ko te Sehova pe ʼe tahi.+ 5 ʼE tonu ke ke ʼofa kia Sehova tou ʼAtua ʼaki tou loto katoa, mo tou maʼuli* katoa+ pea mo tou malohi katoa.+ 6 ʼE tonu anai ke ke taupau ʼi tou loto te ʼu folafola ʼaeni ʼe au fakatotonu atu ʼi te ʼaho nei, 7 pea ʼe tonu anai ke ke akoʼi* te ʼu folafola ʼaia ki ʼou foha,+ pea mo ke palalau ki ai moka ke nofo ʼi tou ʼapi, peʼe ke haʼele ʼi te ala, peʼe ke takoto pea moka ke tuʼu ake anai.+ 8 ʼE ke haʼi anai te ʼu folafola ʼaia ki tou nima ke ke manatuʼi ai, pea ke liliu ko he fakailoga ʼi tou laʼe.*+ 9 Pea ʼe ke tohi anai ʼi ʼou kaumatapa pea mo te ʼu matapa ʼo te kolo.

10 “ ʼI te kua ʼosi fakahu koutou e Sehova tokotou ʼAtua ki te fenua ʼae neʼe ina fakapapau ki ʼakotou kui ko Apalahamo, mo Isaake, pea mo Sakopo ke ina foaki atu,+ ko he fenua ʼe tuʼu ai he ʼu kolo ʼe lalahi mo matalelei neʼe mole kotou laga,+ 11 mo he ʼu ʼapi ʼe fonu ai ko ni meʼa lelei kehekehe neʼe mole kotou tanaki, mo he ʼu vai keli neʼe mole kotou keli, pea mo he ʼu gaueʼaga vite mo he ʼu fuʼu oliveto neʼe mole kotou to, pea ka kotou ʼosi kakai mo makokona,+ 12 kotou tokakaga naʼa kotou galoʼi ia Sehova+ ʼae neʼe ina fakamavae koutou mai te fenua ʼo Esipito, ʼae neʼe fakapopulaʼi ai koutou.* 13 Ko Sehova tokotou ʼAtua ʼae ʼe kotou manavasiʼi+ mo tauhi anai kia te ia,+ pea ʼe kotou fai anai ʼakotou fakapapau ʼi tona huafa.+ 14 ʼE mole tonu anai ke kotou muliʼi he tahi age ʼu ʼatua, te ʼu ʼatua ʼo te hahaʼi ʼae ʼi ʼokotou tafaʼaki,+ 15 koteʼuhi ko Sehova tokotou ʼAtua, ʼae ʼe nofo ʼi te lotolotoiga ʼo koutou, ʼe ko he ʼAtua ʼe ina fakamaʼua ke pipiki ʼateaina pe kia te ia.+ Kapau ʼe kotou muliʼi he tahi age ʼu ʼatua, ʼe to anai te hauhau ʼo Sehova tokotou ʼAtua kia koutou,+ pea ʼe ina fakaʼauha anai koutou ʼi te fuga ʼo te kele.+

16 “ ʼE mole tonu ke kotou ʼahiʼahiʼi ia Sehova tokotou ʼAtua+ ohage ko takotou ʼahiʼahiʼi ia ia ʼi Masea.+ 17 ʼE tonu ke kotou mulimuli fakalelei ki te ʼu fakatotonu ʼa Sehova tokotou ʼAtua, mo ʼana fakamanatu, pea mo ʼana lekula ʼae neʼe ina fakatotonu atu ke kotou mulimuli ki ai. 18 ʼE tonu ke kotou fai te meʼa ʼae ʼe totonu mo lelei kia mata ʼo Sehova, ke fua manuʼia ai kia koutou, pea ke kotou hu pea mo maʼu te fenua lelei ʼae neʼe fakapapau e Sehova ke ina foaki ki ʼakotou kui.+ 19 ʼE kotou kapu anai ʼokotou fili fuli ʼi ʼokotou muʼa, ohage ko tona fakapapau e Sehova.+

20 “ ʼI te ka haʼu, ka fehuʼi atu e ʼokotou foha: ‘Kotea te fakaʼuhiga ʼo te ʼu fakamanatu, mo te ʼu lekula, pea mo te ʼu lao ʼae neʼe foaki atu e Sehova totatou ʼAtua?’ 21 ʼe kotou tali age anai: ‘Neʼe matou popula kia Falaone ʼi Esipito, kae neʼe fakamavae matou e Sehova mai ai ʼaki tona nima malohi. 22 Neʼe haga fakahoko pe e Sehova ʼi ʼomatou muʼa he ʼu fakailoga mo he ʼu milakulo fakaofoofo mo fakatupu maumau, ʼo fua kovi ai ki te fenua ʼo Esipito,+ mo Falaone pea mo tona loto fale katoa.+ 23 Pea neʼe ina fakamavae matou mai ai ʼo ina ʼaumai matou ki heni, ke ina foaki mai te fenua, ohage ko te fakapapau ʼae neʼe ina fai ki ʼatatou kui.+ 24 Neʼe fakatotonu mai leva e Sehova ke matou mulimuli ki te ʼu lekula fuli ʼaia pea mo manavasiʼi kia Sehova totatou ʼAtua ke fua manuʼia tuʼumaʼu pe kia matou,+ pea ke feala hamatou maʼuʼuli,+ ohage pe ko te temi nei. 25 Pea ʼe lau anai ʼe tou faitotonu mo kapau ʼe tou tokakaga ʼo mulimuli ki te ʼu fakatotonu fuli ʼaia ʼo tou fakalogo kia Sehova totatou ʼAtua, ohage ko te meʼa ʼae neʼe ina fakatotonu mai.’+

7 “Ka fakahu koutou e Sehova, tokotou ʼAtua ki te fenua ʼae ʼe kotou ʼamanaki maʼu,+ ʼe ina toe kapu foki anai ʼi ʼokotou muʼa te ʼu puleʼaga ʼaeni ʼe hahaʼi ʼaupito:+ ko te kau Heti, mo te kau Kilikasi, mo te kau Amole,+ mo te kau Kanaane, mo te kau Pelesite, mo te kau Hevi pea mo te kau Sepusi,+ ko te ʼu puleʼaga ʼaia ʼe fitu ʼe hahaʼi mo malolohi age ia koutou.+ 2 ʼE tuku atu anai e Sehova, tokotou ʼAtua ia te ʼu puleʼaga ʼaia ki ʼokotou nima, pea ʼe kotou malo anai ia natou.+ ʼE tonu anai ke kotou tamateʼi ia natou.+ ʼE mole tonu anai ke kotou fai he fuakava mo natou pea mo lotomanavaʼofa kia natou.+ 3 ʼE mole tonu anai ke kotou feʼohoanaʼaki. ʼE mole kotou foaki anai ʼokotou ʼofafine ki ʼonatou foha pea ʼe mole kotou toʼo anai ʼonatou ʼofafine maʼa ʼokotou foha.+ 4 Koteʼuhi ʼe natou fakaneke anai ʼokotou foha ke tuku tanatou tauhi mai kia te au, kae ke natou tauhi ki he tahi age ʼu ʼatua.+ Pea ʼe to anai te hauhau ʼo Sehova kia koutou, pea ʼe ina fakaʼauha fakavilivili anai koutou.+

5 “Kae koʼeni te meʼa ʼae ʼe tonu anai ke kotou fai kia natou: ʼE kotou maumauʼi anai ʼonatou ʼaletale, mo laliki ʼonatou pou maka taputapu,+ mo taʼaga ʼonatou pou ʼakau taputapu,*+ pea mo tutu ʼonatou fakatata.+ 6 Koteʼuhi ko koutou ʼe ko he hahaʼi maʼoniʼoni kia Sehova tokotou ʼAtua, pea neʼe filifili koutou e Sehova tokotou ʼAtua ʼi te hahaʼi fuli ʼae ʼi te fuga ʼo te kele, ke kotou liliu ko tana hahaʼi, ko tona koloa makehe.+

7 “Neʼe mole filifili koutou e Sehova ʼuhi he neʼe kotou kaugamalie ʼaupito age ʼi te hahaʼi fuli, kae he neʼe ʼofa ia kia koutou.+ ʼEi, ko koutou ʼae neʼe tokosiʼi age ʼi te hahaʼi fuli.+ 8 Koia neʼe fakamavae koutou e Sehova pea mo ina fakaʼateainaʼi* koutou ʼaki tona nima mafimafi mai te fenua ʼae neʼe fakapopulaʼi ai ia koutou*+ pea mai te malohi* ʼo Falaone, te hau ʼo Esipito, koteʼuhi neʼe ʼofa ia Sehova kia koutou pea neʼe ina fakahoko te fakapapau ʼae neʼe ina fai ki ʼakotou kui.+ 9 ʼE kotou iloʼi lelei pe ko Sehova tokotou ʼAtua, ʼe ko te ʼAtua moʼoni, te ʼAtua agatonu, ʼae ʼe ina taupau tana fuakava pea mo fakaha tona ʼofa agatonu ki te afe taʼiake, ʼae ʼe hifo mai ia natou ʼae ʼe ʼoʼofa kia te ia pea mo taupau ʼana fakatotonu.+ 10 Kae ko natou ʼae ʼe fehihiʼa kia te ia, ʼe ina liufaki fakahagatonu age anai te meʼa ʼae ʼe tuha mo natou, pea ʼe ina fakaʼauha ia natou.+ ʼE mole fakatuatuai anai tana tauteaʼi ia natou ʼae ʼe fehihiʼa kia te ia. ʼEi, ʼe ina liufaki fakahagatonu age anai te meʼa ʼae ʼe tuha mo natou. 11 Koia, ke kotou tokakaga ʼo taupau te ʼu fakatotonu, mo te ʼu lekula pea mo te ʼu lao ʼae ʼe au foaki atu kia koutou ʼi te ʼaho nei, ʼo kotou mulimuli ki ai.

12 “Kapau ʼe kotou haga fakalogo ki te ʼu lao ʼaia, mo mulimuli ki ai pea mo kotou maʼuliʼi, ʼe taupau anai e Sehova, tokotou ʼAtua tana fuakava pea ʼe ina fakaha anai tona ʼofa agatonu, ohage pe ko tana fakapapau ki ʼakotou kui. 13 ʼE ʼofa anai kia koutou, mo ina tapuakiʼi pea mo ina fakahahaʼi anai koutou. ʼEi, ʼe ina tapuakiʼi anai koutou, ʼo ina foaki atu he ʼu fanau ʼe kaugamalie+ ʼi te fenua ʼae neʼe ina fakapapau ki ʼakotou kui ke ina foaki atu,+ pea ʼe ina toe tapuakiʼi anai te ʼu fua ʼo takotou gaueʼaga, mo takotou fulumeto,* mo takotou vino foʼou, mo takotou lolo,+ mo te ʼu ʼuhiʼi pipi pea mo te ʼu akeno ʼo takotou faga manu. 14 ʼE kotou liliu anai ko te hahaʼi ʼae ʼe tapuakina lahi age ʼi te hahaʼi fuli.+ ʼE mole he tagata peʼe ko he fafine ʼi te lotolotoiga ʼo koutou ʼe hala fanau anai, pea ʼe fanaunau pe anai ʼakotou faga manu.+ 15 ʼE fakamamaʼo anai e Sehova mai ia koutou te ʼu mahaki fuli, pea ʼe mole ina tauteaʼi anai koutou ʼaki te ʼu taʼi mahaki fakamataku ʼae neʼe kotou sisio ki ai ʼi Esipito.+ Kae ʼe ina tauteaʼi ʼaki anai ia natou fuli ʼae ʼe fehihiʼa kia koutou. 16 ʼE kotou pulihi anai te hahaʼi fuli ʼae ʼe tuku atu e Sehova, tokotou ʼAtua ki ʼokotou nima.+ ʼE mole tonu ke kotou lotomanavaʼofa kia natou,+ pea ʼe mole tonu ke kotou tauhi ki ʼonatou ʼatua,+ koteʼuhi ʼe ko he hele anai kia koutou.+

17 “Kapau leva ʼe kotou ui ʼi tokotou loto: ‘ ʼE kaugamalie age te ʼu puleʼaga ʼaia ia matou. ʼE lava feafeaʼi anai hamatou kapu ia natou?’+ 18 ʼe mole tonu ke kotou matataku ia natou.+ Ke kotou manatuʼi te meʼa ʼae neʼe fai e Sehova, tokotou ʼAtua kia Falaone pea mo Esipito katoa,+ 19 ia te ʼu tautea* fakamataku ʼae neʼe kotou sisio mata ki ai, ʼo feia mo te ʼu fakailoga mo te ʼu milakulo+ pea mo te fakaʼaogaʼi e Sehova, tokotou ʼAtua tona nima malohi mo tona mafimafi moʼo fakamavae ʼo koutou mai ai.+ ʼE toe fai feia pe anai e Sehova, tokotou ʼAtua ki te hahaʼi fuli ʼae ʼe kotou matataku ai.+ 20 ʼE natou lotovaivai* anai ʼuhi ko Sehova, tokotou ʼAtua. Pea ʼe mamate anai ia natou fuli ʼae kei toe,+ maʼia mo natou ʼae neʼe fenonoʼi ʼi ʼokotou muʼa. 21 ʼAua naʼa kotou matataku ʼuhi ko natou, he ʼe nofo ia Sehova, tokotou ʼAtua mo koutou,+ pea ʼe ko he ʼAtua ʼe lahi mo fakamanavahe.+

22 “ ʼE mahino ia, ʼe kapu mamalie anai e Sehova, tokotou ʼAtua te ʼu puleʼaga ʼaia ʼi ʼokotou muʼa.+ ʼE mole tonu anai ke kotou pulihi fakavilivili ia natou, ke mole lahi ai te ʼu manu ʼo te vao pea ke mole tuʼutamaki ai ʼokotou maʼuli. 23 ʼE tuku atu anai e Sehova tokotou ʼAtua ia natou ki ʼokotou nima, pea ʼe malo katoa anai tokotou ʼAtua ia natou ʼo kaku ki tonatou fakaʼauha.+ 24 ʼE ina tuku anai ki ʼokotou nima ʼonatou hau,+ pea ʼe kotou molehi anai ʼonatou higoa ʼi te fuga ʼo te kele.+ ʼE mole fakafeagai anai he tahi kia koutou,+ ʼo kaku ki takotou pulihi ia natou.+ 25 ʼE tonu anai ke kotou tutu te ʼu fakatata ʼo ʼonatou ʼatua.+ ʼE mole tonu ke kotou holi ki te siliva mo te aulo ʼo te ʼu fakatata ʼaia peʼe kotou toʼo maʼa koutou,+ ke mole liliu te ʼu meʼa ʼaia ko he hele kia koutou, koteʼuhi ʼe ko he ʼu meʼa fakalialia ia kia Sehova, tokotou ʼAtua.+ 26 ʼE mole tonu ke kotou ʼaumai he meʼa fakalialia ki ʼokotou ʼapi, naʼa pulihi ia koutou ʼo feia mo te meʼa fakalialia ʼaia. ʼE tonu anai ke kotou fakalialia mo fehiʼa moʼoni ki ai, koteʼuhi ʼe ko he meʼa ʼe tonu ke pulihi.

8 “ ʼE kotou tokakaga anai ʼo mulimuli ki te ʼu fakatotonu fuli ʼae ʼe au foaki atu kia koutou ʼi te ʼaho nei, ke feala ai hakotou maʼuʼuli,+ mo liliu ʼo hahaʼi, pea mo maʼu te fenua ʼae neʼe fakapapau e Sehova ke ina foaki ki ʼakotou kui.+ 2 Kotou manatuʼi tokotou fakahaʼele ʼae e Sehova tokotou ʼAtua ʼi he ala loaloaga, ʼi te toafa lolotoga te ʼu taʼu ʼaeni ʼe 40,+ ke ina fakamalaloʼi ai koutou pea mo ʼahiʼahiʼi koutou,+ ke ina iloʼi te meʼa ʼae ʼi ʼokotou loto,+ pe ʼe kotou mulimuli anai ki ʼana fakatotonu peʼe kailoa. 3 Neʼe ina fakamalaloʼi ai koutou mo tuku ke kotou halofia+ pea neʼe ina fafaga leva koutou ʼaki te mane,+ ʼae neʼe heʼeki kotou sisio ki ai pea neʼe heʼeki sisio ki ai ʼakotou tamai, ke kotou mahino ai ʼe mole maʼuli pe te tagata ki te pane kae ki te ʼu folafola fuli ʼae ʼe haʼu mai ia Sehova.+ 4 Neʼe mole popo ʼokotou teu pea neʼe mole fufula ʼokotou vaʼe ʼi te ʼu taʼu ʼaia ʼe 40.+ 5 ʼE kotou iloʼi lelei pe neʼe fakatonutonuʼi koutou e Sehova tokotou ʼAtua, ohage pe ko te fakatonutonuʼi e he tamai tona foha.+

6 “Pea ʼe tonu ke kotou taupau te ʼu fakatotonu ʼa Sehova tokotou ʼAtua, ʼo kotou haʼele ʼi ʼona ala pea mo manavasiʼi kia te ia. 7 Koteʼuhi ʼe fakahu koutou e Sehova tokotou ʼAtua ki he fenua ʼe lelei,+ ko he fenua ʼe maʼu ai ni vai tafe mo ni matapuna vai ʼe tafe ki te potu fenua laulelei pea mo te potu moʼugaʼia, 8 ko he fenua ʼe fua ai te fulumeto, mo te olose, mo te ʼu fuʼu vite, mo te ʼu fuʼu fiku, mo te ʼu kelenate,+ ko he fenua ʼe fonu ai ko te lolo oliveto mo te meli,+ 9 ko he fenua ʼe mahu ai te meʼa kai pea ʼe maʼu fuli ai pe te ʼu meʼa ʼae ʼe ʼaoga kia koutou, ko he fenua ʼe maʼu ai te ukamea pea ʼe kotou keli anai ʼona moʼuga ke maʼu ai te kapa.

10 “Ka kotou ʼosi kakai pea mo makokona, ʼe tonu anai ke kotou fakavikiviki kia Sehova tokotou ʼAtua, ʼuhi ko te fenua lelei ʼae neʼe ina foaki atu.+ 11 Kotou tokakaga naʼa kotou galoʼi ia Sehova tokotou ʼAtua, ʼo mole kei kotou taupau ʼana fakatotonu, mo ʼana lao pea mo ʼana lekula ʼae ʼe au foaki atu kia koutou ʼi te ʼaho nei. 12 Ka kotou kakai mo makokona pea ka kotou laga hokotou ʼu ʼapi matalelei pea mo nonofo ai,+ 13 ka lahi takotou faga pipi mo takotou faga ovi, ʼo feia mo takotou siliva mo takotou aulo, pea ka tuputupu ʼo lahi ʼakotou meʼa fuli, 14 ʼaua naʼa kotou fiameʼalahi,+ pea mo kotou galoʼi leva ia Sehova tokotou ʼAtua, ʼae neʼe ina fakamavae koutou mai te fenua ʼo Esipito, ʼae neʼe fakapopulaʼi ai koutou.*+ 15 Neʼe ina fakahaʼele koutou ʼi he toe toafa lahi mo fakamataku,+ ʼae neʼe kele magemage pea neʼe mole he vai, pea neʼe maʼu ai he ʼu gata kafokona mo he ʼu sekolopio. Neʼe ina fakahali mai te fuʼu maka fefeka he vai,+ 16 pea neʼe ina fafaga koutou ʼi te toafa ʼaki te mane,+ ʼae neʼe heʼeki sisio ki ai ʼakotou tamai, ke ina fakamalaloʼi ai koutou+ pea mo ʼahiʼahiʼi koutou, ke fua lelei ai kia koutou ʼi te ka haʼu.+ 17 Kapau ʼe kotou ui ʼi ʼokotou loto: ‘Kua matou koloaʼia ʼaki pe tomatou malohi pea mo te gaue ʼo ʼomatou nima,’+ 18 kotou manatuʼi ʼe ko Sehova tokotou ʼAtua, ʼae ʼe ina foaki atu kia koutou te malohi ke kotou maʼu koloa,+ ke ina taupau ai te fuakava ʼae neʼe ina fai mo ʼakotou kui, ohage ko te ʼaho nei.+

19 “Kae kapau ʼe kotou galoʼi ia Sehova tokotou ʼAtua pea mo kotou muliʼi he tahi age ʼu ʼatua, ʼo kotou tauhi kia natou pea mo tulolo ʼi ʼonatou muʼa, ʼe au tala moʼoni atu kia koutou ʼi te ʼaho nei, ʼe kotou mamate anai.+ 20 ʼEi, ʼe matehi anai koutou ohage ko te ʼu puleʼaga ʼae ʼe fakaʼauha e Sehova ʼi ʼokotou muʼa, ʼuhi ko takotou mole fakalogo ki te leʼo ʼo Sehova, tokotou ʼAtua.+

9 “Hahaʼi ʼo Iselaele, kotou fakalogo mai! ʼI te ʼaho nei, ʼe kotou fakalaka ʼi te Solotane+ pea ʼe kotou maʼu anai he fenua ʼe nonofo ai he ʼu puleʼaga lalahi mo malolohi age ia koutou,+ pea ʼe tuʼu ai he ʼu kolo lalahi mo ʼa kaupa ʼo kaku ki te lagi,*+ 2 pea ʼe lalahi ʼanatou hahaʼi, ia te ʼu foha ʼo te kau Anake,+ ʼae ʼe kotou iloʼi pea neʼe kotou logo neʼe ui ʼo ʼuhiga mo natou: ‘Ko ai ʼae ʼe feala ke ina tauʼi te ʼu foha ʼo Anake?’ 3 Koia, ʼe tonu ke kotou iloʼi ʼi te ʼaho nei, ʼe fakalaka anai ia Sehova, tokotou ʼAtua ʼi ʼokotou muʼa ʼi te vai tafe ʼo Solotane.+ ʼE ko he afi kakaha,+ pea ʼe ina fakaʼauha anai ia natou. ʼE ina tuku atu anai natou, ke feala ai hakotou kapu fakavilivili pea mo matehi ia natou, ohage ko tona fakapapau atu e Sehova.+

4 “Pea ka kapu anai natou e Sehova tokotou ʼAtua ʼi ʼokotou muʼa, ʼaua naʼa kotou ui ʼi ʼokotou loto: ‘ ʼE fakahu tatou e Sehova ki te fenua ʼaeni ke tou maʼu ʼuhi he ʼe tou faitotonu.’+ Kailoa ia, kae ʼe kapu e Sehova te ʼu puleʼaga ʼaia ʼi ʼokotou muʼa ʼuhi pe ko tanatou agakovi.+ 5 ʼE mole kotou hu anai mo maʼu tonatou fenua ʼuhi he ʼe kotou faitotonu mo agatonu. Kae ʼe kapu e Sehova tokotou ʼAtua te ʼu puleʼaga ʼaia ʼi ʼokotou muʼa ʼuhi pe ko tanatou agakovi,+ pea ke fakahoko ai e Sehova te fakapapau ʼae neʼe ina fai ki ʼakotou kui, ia Apalahamo,+ mo Isaake+ pea mo Sakopo.+ 6 Koia, ke kotou iloʼi ʼe mole foaki atu e Sehova tokotou ʼAtua te fenua lelei ʼaia ke kotou maʼu, ʼuhi he ʼe kotou faitotonu. Kailoa ia, he ʼe ko koutou ko he hahaʼi uigataʼa.*+

7 “Kotou manatuʼi, pea ʼaua naʼa kotou galoʼi ʼi he temi takotou fakatupu te ita ʼo Sehova tokotou ʼAtua ʼi te toafa.+ Neʼe kotou agatuʼu kia Sehova talu mai te ʼaho ʼae neʼe kotou mavae ai mai te fenua ʼo Esipito, ʼo kaku ki takotou tau mai ki te koga meʼa ʼaeni.+ 8 Neʼe kotou fakatupu te ita ʼo Sehova ʼi Olepe. Pea neʼe kovi ʼosi te ita ʼo Sehova kia koutou, ʼo ina fia fakaʼauha ai ia koutou.+ 9 ʼI taku hake ki te moʼuga ke ina foaki mai te ʼu lauʼi maka,+ ia te ʼu lauʼi maka ʼo te fuakava ʼae neʼe fai e Sehova mo koutou,+ neʼe au nofo ai ʼaho ʼe 40 mo po ʼe 40,+ pea neʼe mole au kai ai mo inu. 10 Neʼe foaki mai leva e Sehova te ʼu lauʼi maka ʼe lua ʼae neʼe tohi ʼaki tona nima.* Neʼe tuʼu ai te ʼu folafola fuli ʼae neʼe fakaha atu e Sehova kia koutou mai te afi, ʼi te moʼuga, ʼi te ʼaho ʼae neʼe kotou fakatahitahi ai.+ 11 ʼI te ʼosi ʼo te ʼu ʼaho ʼe 40 mo po ʼe 40, neʼe foaki mai e Sehova te ʼu lauʼi maka ʼae ʼe lua, ia te ʼu lauʼi maka ʼo te fuakava, 12 pea neʼe ui mai e Sehova: ‘Tuʼu ake pea ke hifo fakavilivili, koteʼuhi ko tau hahaʼi ʼae neʼe ke fakamavae mai Esipito, kua natou fai he ʼu aga ʼe kovi.+ Kua natou maliu fakavilivili mai te ala ʼae neʼe au fakatotonu age ke natou muliʼi. Kua natou faʼu he fakatata.’*+ 13 Pea neʼe toe ui mai e Sehova: ‘ ʼE au sio ko te hahaʼi ʼaeni ʼe ko he hahaʼi uigataʼa.*+ 14 Koia, tuku ke au fakaʼauha natou, mo molehi ʼonatou higoa ʼi te fuga ʼo te kele, pea ʼe au fakaliliu anai koe ko he puleʼaga ʼe malohi mo kaugamalie age ia natou.’+

15 “Neʼe au hifo leva mai te moʼuga ʼae neʼe lolotoga ulo,+ pea neʼe au toʼo te ʼu lauʼi maka ʼae ʼe lua ʼo te fuakava ʼi ʼoku nima.+ 16 Neʼe au sio ai leva ki takotou agahala kia Sehova tokotou ʼAtua! Neʼe kotou faʼu maʼa koutou he ʼuhiʼi pipi ukamea. Neʼe kua kotou maliu fakavilivili mai te ala ʼae neʼe fakatotonu atu e Sehova ke kotou muliʼi.+ 17 Pea neʼe au toʼo ai te ʼu lauʼi maka ʼe lua ʼae neʼe ʼi ʼoku nima ʼo li ki lalo, pea neʼe foa ai ʼi ʼokotou muʼa.+ 18 Neʼe au tulolo leva ia muʼa ʼo Sehova ia ʼaho ʼe 40 mo po ʼe 40, ohage pe ko taku fai ʼi muʼa atu. Neʼe mole au kai mo inu,+ ʼuhi ko te ʼu agahala fuli ʼae neʼe kotou fai, ʼi takotou fai te meʼa ʼae ʼe kovi kia mata ʼo Sehova pea mo takotou fakalotomamahiʼi ia ia. 19 Koteʼuhi neʼe au mataku he neʼe kua kovi ʼosi te ita ʼo Sehova kia koutou,+ ʼo ina fia fakaʼauha ai koutou. Kae ʼi te lakaga ʼaia, neʼe toe fakalogo mai pe ia Sehova kia au.+

20 “Neʼe kovi ʼosi te ita ʼo Sehova kia Alone, ʼo ina fia fakaʼauha ai ia ia,+ kae neʼe au toe kole mamahi ki te ʼAtua ke mole hoko he meʼa kia Alone ʼi te lakaga ʼaia. 21 Neʼe au toʼo leva te ʼuhiʼi pipi+ ʼae neʼe kotou fai, ʼae neʼe tupu ai takotou agahala, ʼo tutu. Neʼe au laliki ke liliu ko he lefulefu, pea neʼe au laku te lefulefu ʼaia ki te vai tafe ʼae ʼe haʼu mai te moʼuga.+

22 “Tahi ʼae meʼa, neʼe kotou toe fakatupu te ita ʼo Sehova ʼi Tapela,+ mo Masea+ pea mo Kipiloti-ataava.+ 23 Neʼe ui atu e Sehova, ʼi takotou nonofo ʼi Katesi-palenea:+ ‘Kotou hake pea ke kotou maʼu ia te fenua ʼae ʼe au foaki moʼoni atu anai kia koutou!’ Kae neʼe kotou toe talagataʼa ki te fakatotonu ʼa Sehova tokotou ʼAtua,+ pea neʼe mole kotou tui+ mo fakalogo kia te ia. 24 Talu taku feiloʼiʼaki mo koutou mo takotou agatuʼu pe kia Sehova.

25 “Neʼe au tulolo ai ia muʼa ʼo Sehova ia ʼaho ʼe 40 mo po ʼe 40.+ Neʼe au fai te faʼahi ʼaia he neʼe fakaha e Sehova tana fia fakaʼauha ia koutou. 26 Neʼe au kole mamahi kia Sehova: ‘Siʼoku Tuʼi ʼAliki ko Sehova, ʼaua naʼa ke fakaʼauha tau hahaʼi. Ko natou ʼaia ʼe ko tou tofiʼa,+ ʼae neʼe ke haofaki ʼaki tou mafimafi pea mo fakamavae ia natou mai Esipito ʼaki tou nima malohi.+ 27 Ke ke manatuʼi ʼau tagata faifekau ko Apalahamo, mo Isaake pea mo Sakopo.+ ʼAua naʼa ke tokagaʼi te uigataʼa, mo te agakovi, pea mo te agahala ʼa te hahaʼi ʼaia.+ 28 Kapau ʼe ke fakaʼauha ia natou, ʼe feala pe ke ui e te hahaʼi ʼo te fenua ʼae neʼe ke fakamavae ia natou mai ai: “Neʼe mole lava fakahu natou e Sehova ki te fenua ʼae neʼe ina fakapapauʼi age, pea neʼe ina taki natou ki te toafa ke natou mamate ai he neʼe fehiʼa kia natou.”+ 29 Kae ʼe ko tau hahaʼi pea mo tou tofiʼa,+ ʼae neʼe ke fakamavae mai Esipito ʼaki tou mafimafi pea mo tou nima malohi.’+

10 “ ʼI te temi ʼaia, neʼe ui mai e Sehova kia au: ‘Ke ke fai he ʼu lauʼi maka ʼe lua ohage ko te ʼu ʼuluaki lauʼi maka,+ pea ke hake mai kia te au ʼi te moʼuga. Ke ke toe faʼu foki mo he aleka* ʼaki te ʼakau. 2 ʼE au tohi anai ʼi te ʼu lauʼi maka ʼaia te ʼu folafola ʼae neʼe tuʼu ʼi te ʼu ʼuluaki lauʼi maka ʼae neʼe ke foaʼi, pea ʼe ke tuku anai ki te aleka.’ 3 Koia, neʼe au faʼu ai leva he aleka ʼaki te ʼakau ʼae ko te akasia, pea mo au fai he ʼu lauʼi maka ʼe lua ohage ko te ʼu ʼuluaki lauʼi maka. Neʼe au hake leva ki te moʼuga mo te ʼu lauʼi maka ʼaia ʼe lua ʼae neʼe au toʼo ʼi toku nima.+ 4 Pea neʼe tohi e Sehova ʼi te ʼu lauʼi maka ʼaia te ʼu folafola ʼae neʼe ina ʼuluaki tohi,+ ia te ʼu Folafola ʼe Hogofulu,+ ʼae neʼe fakaha atu e Sehova kia koutou mai te afi,+ ʼi te moʼuga, ʼi te ʼaho ʼae neʼe kotou fakatahitahi ai.+ Hili ʼaia, neʼe ina foaki mai te ʼu lauʼi maka ʼaia. 5 Pea neʼe au hifo mai te moʼuga+ ʼo tuku te ʼu lauʼi maka ʼaia ki te aleka, ohage ko tona fakatotonu mai e Sehova, pea ʼe kei tuku aipe nei.

6 “Neʼe mavae leva te kau Iselaele mai Peeloti Pene-saakani ʼo olo ki Mosela. Neʼe mate ai ia Alone pea neʼe ʼavaifo ai,+ pea neʼe fetogi leva ia ia e tona foha ko Eleasale ʼi te gaue fakapelepitelo.+ 7 Neʼe natou mavae mai ai ʼo olo ki Kutikota, pea mai Kutikota neʼe natou olo ki Sotipata,+ ko he fenua ʼe maʼu ai ni vai tafe.

8 “ ʼI te temi ʼaia, neʼe tuku keheʼi e Sehova ia te telepi ʼo Levi+ ke natou fata te aleka ʼo te fuakava ʼa Sehova,+ mo tutuʼu ia muʼa ʼo Sehova ke natou tauhi kia te ia, pea mo tapuakiʼi te hahaʼi ʼi tona huafa,+ ohage ko tanatou fai ʼo kaku mai ki te ʼaho nei. 9 Koia ʼae ʼe mole maʼu ai e te telepi ʼo Levi honatou kele peʼe ko honatou tofiʼa fakatahi mo ʼonatou tehina. Ko Sehova ʼe ko tonatou tofiʼa, ohage pe ko tona ui age e Sehova, tokotou ʼAtua kia natou.+ 10 Neʼe au nofo ʼi te moʼuga ia ʼaho ʼe 40 mo po ʼe 40,+ ohage pe ko taku fai ʼi muʼa atu, pea neʼe toe fakalogo mai pe ia Sehova ʼi te lakaga ʼaia.+ Neʼe fakatotonu ai e Sehova ke mole ina fakaʼauha koutou. 11 Neʼe ui mai leva e Sehova: ‘Alu pea ke taki te hahaʼi, ke natou hu pea mo maʼu te fenua ʼae neʼe au fakapapau ki ʼanatou kui ke au foaki age ki te hahaʼi ʼaia.’+

12 “ ʼI te temi leva ʼaeni, hahaʼi ʼo Iselaele, kotea ʼae ʼe kole atu e Sehova tokotou ʼAtua?+ ʼE ko te meʼa pe ʼaeni: ke kotou manavasiʼi kia Sehova tokotou ʼAtua,+ mo haʼele ʼi ʼona ala fuli,+ mo ʼofa kia te ia, mo tauhi kia Sehova tokotou ʼAtua ʼaki tokotou loto katoa mo tokotou maʼuli* katoa,+ 13 pea mo taupau te ʼu fakatotonu mo te ʼu lekula ʼa Sehova ʼae ʼe au foaki atu kia koutou ʼi te ʼaho nei, ke fua lelei ai kia koutou.+ 14 Koʼeni, ʼe ʼa Sehova tokotou ʼAtua, te lagi, ʼei, te lagi ʼo te ʼatu lagi, ʼo feia mo te kele pea mo te ʼu meʼa fuli ʼae ʼe maʼu ai.+ 15 Kae neʼe fakaovi pe ia Sehova ki ʼakotou kui pea neʼe ina fakaha age pe kia natou tona ʼofa. Pea neʼe ina filifili tonatou hologa, ʼei ia koutou,+ mai te hahaʼi fuli pe, ohage ko tana fai ʼi te ʼaho nei. 16 ʼI te lakaga leva ʼaeni, ʼe tonu ke kotou fakamaʼa ʼokotou loto+ pea mo tuku takotou uigataʼa.*+ 17 Koteʼuhi ko Sehova tokotou ʼAtua, ʼe ko te ʼAtua ʼo te ʼu ʼatua+ pea mo te ʼAliki ʼo te ʼu ʼaliki, te ʼAtua lahi, mo malohi pea mo fakamanavahe, ʼae ʼe mole fakapalatahi+ pea ʼe mole ina tali he meʼa ʼofa neʼe foaki fakakaka age. 18 ʼE ina fakahoko te faitotonu ki te fanau ʼae ʼe hala mo tamai pea mo te fafine vitua,+ pea ʼe ʼofa ki te matapule,+ ʼo ina foaki age hana meʼa kai mo hona meʼa laofi. 19 ʼE tonu ke kotou ʼoʼofa mo koutou ki te matapule, he neʼe kotou nonofo ohage ko ni matapule ʼi te fenua ʼo Esipito.+

20 “ ʼE kotou manavasiʼi anai kia Sehova tokotou ʼAtua, mo tauhi kia te ia,+ mo pipiki kia te ia, pea ʼe kotou fai anai ʼakotou fakapapau ʼi tona huafa. 21 ʼE ko Ia ʼae ʼe tonu ke kotou fakavikiviki ki ai.+ ʼE ko ia tokotou ʼAtua, ʼae neʼe ina fai maʼa koutou te ʼu meʼa lalahi mo fakamataku fuli ʼaia neʼe kotou sisio mata ki ai.+ 22 ʼI te temi ʼae neʼe hifo ai ʼakotou kui ki Esipito, neʼe natou toko 70,+ pea ʼi te temi leva ʼaeni, kua fakaliliu koutou e Sehova tokotou ʼAtua, ke kotou kaugamalie ohage ko te ʼu fetuʼu ʼo te lagi.+

11 “ ʼE tonu ke kotou ʼoʼofa kia Sehova tokotou ʼAtua,+ mo fakahoko tuʼumaʼu tokotou maʼua kia te ia, pea mo taupau ʼana lekula, mo ʼana lao pea mo ʼana fakatotonu. 2 ʼE kotou iloʼi ʼe ko koutou ʼae ʼe au palalau atu ki ai ʼi te ʼaho nei, kae mole ki ʼokotou foha ʼae neʼe mole natou iloʼi peʼe sisio ki tokotou fakatonutonuʼi e Sehova tokotou ʼAtua,+ ʼo feia mo tona maʼoluga,+ mo tona nima malohi+ pea mo tona mafimafi. 3 Neʼe mole natou sisio ki te ʼu fakailoga mo te ʼu gaue ʼae neʼe ina fai ʼi Esipito, ki te hau ko Falaone pea mo tona fenua katoa,+ 4 peʼe ko te ʼu meʼa ʼae neʼe ina fai ki te ʼu foʼi kautau ʼo Esipito, mo te ʼu hosi ʼa Falaone pea mo ʼana saliote tau, ʼae neʼe mou ʼi te Tai Kula ʼi tanatou tuli koutou. Neʼe fakaʼauha natou e Sehova ʼo talu ai.+ 5 Neʼe mole sisio ʼokotou foha ki te meʼa ʼae neʼe ina fai maʼa* koutou ʼi te toafa, ʼo kaku ki takotou tau mai ki te koga meʼa ʼaeni, 6 peʼe ko te meʼa ʼae neʼe ina fai kia Tatane mo Apilame, te ʼu foha ʼo Eliape ʼae ʼe hifo mai ia Lupeni, ʼi te temi ʼae neʼe ava ai te kele ʼo folo ia naua, mo ʼonā famili, mo te hahaʼi fuli ʼae neʼe mulimuli ia naua, ʼo feia mo ʼonatou fale la pea mo ʼanatou manu, ia muʼa ʼo Iselaele katoa.+ 7 Neʼe kotou sisio mata ki te ʼu gaue fakaofoofo fuli ʼae neʼe fai e Sehova.

8 “ ʼE tonu ke kotou taupau te ʼu fakatotonu fuli ʼae ʼe au foaki atu kia koutou ʼi te ʼaho nei, ke kotou liliu ai ko he hahaʼi ʼe malolohi pea ke kotou maʼu te fenua ʼae ʼe tuʼu ʼi te tahi kauvai ʼo te Solotane. 9 Pea ʼe kotou maʼuʼuli fualoa anai+ ʼi te fenua ʼae neʼe fakapapau e Sehova ke ina foaki ki ʼakotou kui mo tonatou hologa,+ ko he fenua ʼe tafe ai te huʼa pipi mo te meli.+

10 “Ko te fenua ʼae ʼe kotou maʼu anai ʼe mole tatau ia mo Esipito ʼae neʼe kotou mavae mai ai. Neʼe kotou nunusi mahani ʼi ai takotou pulapula pea mo fakavai te ʼu gaueʼaga ʼaki ʼokotou vaʼe,* ohage pe ko hakotou fakavai he ʼoloto lauʼakau. 11 Kae ko te fenua ʼae ʼe kotou maʼu anai, ʼe ko he fenua moʼugaʼia pea ʼe maʼu ai ni potu fenua laulelei,+ pea ʼe to ai ni ʼua.+ 12 ʼEi, ko he fenua ʼe tokaga lelei ki ai ia Sehova tokotou ʼAtua. Pea ʼe tuku tuʼumaʼu pe te ʼu mata ʼo Sehova tokotou ʼAtua ki ai, mai te kamata ʼo te taʼu ki tona fakaʼosi.

13 “Pea kapau ʼe kotou fakalogo lelei ki ʼaku fakatotonu ʼae ʼe au foaki atu kia koutou ʼi te ʼaho nei, pea mo kotou ʼoʼofa kia Sehova tokotou ʼAtua mo tauhi kia te ia ʼaki tokotou loto katoa mo tokotou maʼuli* katoa,+ 14 ʼe au toe fakato anai mo he ʼu ʼua ʼi tokotou fenua ʼi tona temi totonu, he ʼu ʼua ʼo te temi fakato lau pea mo te temi mātala ʼo te ʼu fisiʼi ʼakau. Pea ʼe kotou tanaki anai takotou meʼa kai, mo takotou vino foʼou pea mo takotou lolo.+ 15 Pea ʼe au fakahomo anai he luna maʼa takotou faga manu. ʼE toe mahu anai mo takotou meʼa kai.+ 16 Koia, kotou tokakaga naʼa kakaʼi ʼokotou loto ʼo kotou tauhi ki he tahi age ʼu ʼatua mo tulolo ʼi ʼonatou muʼa.+ 17 Kapau ʼe kotou fai te faʼahi ʼaia, ʼe to anai te hauhau ʼo Sehova kia koutou, pea ʼe ina pupunu anai te lagi ke mole to te ʼua.+ ʼE mole kotou utu anai te ʼu fua ʼo ʼakotou gaueʼaga pea ʼe kotou mamate vave anai ʼi te fenua lelei ʼae ʼe foaki atu e Sehova.+

18 “ ʼE tonu ke kotou taupau ʼi ʼokotou loto mo ʼokotou ʼatamai* ʼaku folafola ʼaia. Pea ʼe kotou haʼi anai ki ʼokotou nima ke kotou manatuʼi ai, pea ʼe tonu anai ke hage ko he fakailoga ʼi ʼokotou laʼe.*+ 19 Kotou akoʼi te ʼu folafola ʼaia ki ʼakotou fanau, mo kotou palalau ki ai moka kotou nonofo ʼi tokotou ʼapi, moka kotou haʼele ʼi te ala, moka kotou takokoto pea moka kotou tutuʼu ake.+ 20 Pea kotou tohi ʼi ʼokotou kaumatapa pea mo te ʼu matapa ʼo te kolo, 21 ke kotou maʼuʼuli fualoa ai mo ʼokotou foha+ ʼi te fenua ʼae neʼe fakapapau e Sehova ke ina foaki ki ʼakotou kui,+ ohage pe ko te tuʼu ʼo te lagi ʼi ʼoluga ʼo te kele ʼo talu ai.

22 “Kapau ʼe kotou mulimuli lelei ki taku fakatotonu ʼaeni ʼe au foaki atu kia koutou pea mo kotou maʼuliʼi, ʼo kotou ʼoʼofa kia Sehova tokotou ʼAtua,+ mo haʼele ʼi ʼona ala fuli pea mo pipiki kia te ia,+ 23 ʼe kapu anai e Sehova te ʼu puleʼaga fuli ʼaia ʼi ʼokotou muʼa,+ pea ʼe kotou maʼu anai he fenua ʼe nonofo ai he ʼu puleʼaga lalahi mo kaugamalie age ia koutou.+ 24 ʼE ʼa koutou anai te ʼu koga meʼa fuli ʼae ʼe tuʼu ai ʼokotou vaʼe.+ ʼE kamata anai tokotou tuʼakoi mai te toafa ʼo kaku ki Lipane, pea mai te vai tafe ʼo Efalate ʼo kaku ki te tai ʼo te potu uesite.*+ 25 ʼE mole fakafeagai anai he tahi kia koutou.+ ʼE mataku anai te fenua katoa ʼae ka kotou haʼele ai ia koutou. ʼE fakahoko anai e Sehova, tokotou ʼAtua te faʼahi ʼaia,+ ohage pe ko tana fakapapauʼi atu.

26 “Kotou sisio, ʼe au tuku atu kia koutou ʼi te ʼaho nei he tapuakina pea mo he malaʼia:+ 27 ʼe tapuakiʼi anai ia koutou mo kapau ʼe kotou fakalogo ki te ʼu fakatotonu ʼa Sehova, tokotou ʼAtua ʼae ʼe au foaki atu kia koutou ʼi te ʼaho nei,+ 28 pea ʼe kotou malaʼia anai mo kapau ʼe mole kotou fakalogo ki te ʼu fakatotonu ʼa Sehova, tokotou ʼAtua,+ pea kapau ʼe kotou maliu kehe mai te ala ʼae ʼe au fakatotonu atu ʼi te ʼaho nei ke kotou mulimuli ki ai, pea mo kapau ʼe kotou muliʼi he ʼu ʼatua neʼe mole kotou iloʼi.

29 “Ka fakahu koutou e Sehova, tokotou ʼAtua ki te fenua ʼae ʼe kotou maʼu anai, ʼe tonu anai ke kotou tala te tapuakina ʼi te Moʼuga ʼo Kalisimi pea mo te malaʼia ʼi te Moʼuga ʼo Epale.+ 30 ʼE mole tuʼu koa la te ʼu moʼuga ʼaia ʼi te tahi kauvai ʼo te Solotane, ʼi te potu uesite,* ʼi te fenua ʼo te kau Kanaane ʼae ʼe nonofo ʼi te Alapa, ʼo haga ki Kilekale, ʼo ovi ki te ʼu fuʼu ʼakau lalahi ʼo Mole?+ 31 Koteʼuhi ʼe kotou fakalaka anai ʼi te Solotane ʼo kotou hu mo maʼu te fenua ʼae ʼe foaki atu e Sehova tokotou ʼAtua.+ Ka kotou hu ki te fenua pea mo maʼuli ai, 32 kotou tokakaga ʼo maʼuliʼi te ʼu lekula pea mo te ʼu lao fuli ʼae ʼe au tuku atu kia koutou ʼi te ʼaho nei.+

12 “Koʼeni te ʼu lekula mo te ʼu lao ʼae ʼe kotou tokakaga anai ʼo mulimuli ki ai ʼi te ʼaho fuli pe moka kotou maʼuʼuli anai ʼi te fenua ʼae ka foaki atu e Sehova, te ʼAtua ʼo ʼakotou kui. 2 ʼE kotou maumauʼi katoa anai ʼi te ʼu puleʼaga ʼae ka kotou maʼu, te ʼu koga meʼa fuli ʼae neʼe natou tauhi ai ki ʼonatou ʼatua,+ pe ʼe ʼi te ʼu moʼuga maʼoluga, peʼe ʼi te ʼu kiʼi moʼuga, peʼe ʼi te ʼu lalo ʼakau ʼae ʼe maʼuli lelei. 3 ʼE tonu anai ke kotou maumauʼi ʼonatou ʼaletale, mo laliki ʼonatou pou maka taputapu,+ mo tutu ʼonatou pou ʼakau taputapu,* pea mo maumauʼi te ʼu fakatata ʼo ʼonatou ʼatua.+ ʼE kotou molehi anai te ʼu higoa ʼo ʼonatou ʼatua ʼi te koga meʼa ʼaia.+

4 “ ʼE mole tonu ke kotou tauhi kia Sehova tokotou ʼAtua ohage ko te tauhi ʼa te ʼu puleʼaga ʼaia ki ʼonatou ʼatua.+ 5 Kae ke kotou olo ʼo tauhi kia Sehova tokotou ʼAtua, ʼi te koga meʼa ʼae ʼe ina filifili ʼi ʼokotou telepi fuli ke fakakololiaʼi ai tona huafa pea ke fakatuʼu ai tona nofoʼaga.+ 6 ʼE kotou ʼaumai anai ki te koga meʼa ʼaia ʼakotou holokoseta,*+ mo ʼakotou sakilifisio, mo ʼokotou vahe tahi ki te hogofulu,+ mo ʼakotou molaga ʼae neʼe kotou fai ʼo ʼuhiga mo ni fakapapau, mo ʼakotou molaga ʼae neʼe kotou fai ʼaki he lotolelei,+ mo te ʼu ʼuluaki ʼuhi ʼo takotou faga pipi mo takotou faga ovi,+ pea mo he tahi ʼu meʼa ʼofa ʼe kotou fia foaki.+ 7 Pea ʼe tonu anai ke kotou kakai mo ʼokotou famili ʼi te koga meʼa ʼaia, ia muʼa ʼo Sehova tokotou ʼAtua,+ pea mo kotou fakafiafia ʼi te ʼu meʼa fuli ʼae ka kotou fai,+ koteʼuhi ʼe tapuakiʼi koutou e Sehova tokotou ʼAtua.

8 “ ʼE mole tonu anai ke kotou fai ohage ko tatatou fai ʼi te temi nei, he ʼe tahi fai pe e te tagata te meʼa ʼae ʼe lelei ki ʼona mata, 9 koteʼuhi ʼe heʼeki kotou hu ki te koga meʼa ʼae ʼe kotou nonofo ai anai+ pea mo te fenua ʼae ʼe foaki atu e Sehova tokotou ʼAtua. 10 Ka kotou ʼosi fakalaka ʼi te Solotane+ pea mo nonofo ʼi te fenua ʼae ʼe foaki atu e Sehova tokotou ʼAtua ke kotou maʼu, ʼe ina puipui moʼoni anai koutou mai ʼokotou fili fuli ʼae ʼi ʼokotou tafaʼaki, pea ʼe kotou maʼuʼuli fimalie anai.+ 11 ʼE kotou ʼaumai anai ki te koga meʼa ʼae ʼe filifili e Sehova tokotou ʼAtua ke fakakololiaʼi ai tona huafa,+ ia te ʼu meʼa fuli ʼaeni ʼe au fakatotonu atu: ʼakotou holokoseta, mo ʼakotou sakilifisio, mo ʼokotou vahe tahi ki te hogofulu,+ mo ʼakotou molaga ʼae neʼe kotou fai ai ni fakapapau kia Sehova, pea mo he tahi ʼu meʼa ʼofa ʼe kotou fia foaki. 12 ʼE kotou fakafiafia anai ia muʼa ʼo Sehova tokotou ʼAtua,+ mo ʼokotou foha, mo ʼokotou ʼofafine, mo ʼakotou tagata kaugana, mo ʼakotou fafine kaugana, ʼo feia mo te kau Levite ʼae ʼe nonofo ʼi ʼokotou kolo,* he ʼe mole natou maʼu honatou kele peʼe ko honatou tofiʼa fakatahi mo koutou.+ 13 Kotou tokakaga naʼa kotou momoli ʼakotou holokoseta ʼi he tahi age koga meʼa ʼe kotou leleiʼia.+ 14 ʼE tonu anai ke kotou momoli ʼakotou holokoseta ʼi te koga meʼa pe ʼae ʼe filifili e Sehova ʼi ʼokotou telepi. Pea ʼe kotou fai ai anai te ʼu meʼa fuli ʼae ʼe au fakatotonu atu.+

15 “Kae ka kotou fia matehi he manu ʼo kai,+ ʼe feala anai takotou fai te faʼahi ʼaia ʼi ʼokotou kolo* fuli, ʼo mulimuli ki tokotou tapuakiʼi e Sehova tokotou ʼAtua. ʼE feala anai ke kai ki ai he tahi ʼe heʼe maʼa mo he tahi ʼe maʼa, ohage pe ko takotou kai he tia. 16 Kae ʼe mole tonu anai ke kotou kai ki te toto.+ ʼE tonu anai ke kotou liligi ki te kele ohage ko he vai.+ 17 ʼE mole gafua anai ke kotou kai peʼe inu ʼi ʼokotou kolo te vahe tahi ki te hogofulu ʼo takotou fulumeto,* mo takotou vino foʼou, mo takotou lolo, peʼe ko te ʼu ʼuluaki ʼuhi ʼo ʼakotou pipi mo ʼakotou ovi,+ peʼe ko ʼakotou molaga ʼae neʼe kotou fai ʼo ʼuhiga mo ni fakapapau, peʼe ko ʼakotou meʼa ʼofa, peʼe ko he tahi age meʼa ʼe kotou fia foaki. 18 Kae ʼe kotou kai anai te ʼu meʼa ʼaia ia muʼa ʼo Sehova tokotou ʼAtua, ʼi te koga meʼa ʼae ʼe filifili anai e Sehova tokotou ʼAtua.+ ʼE kotou kai anai mo ʼokotou foha, mo ʼokotou ʼofafine, mo ʼakotou tagata kaugana, mo ʼakotou fafine kaugana pea mo te kau Levite ʼae ʼe nonofo ʼi ʼokotou kolo.* ʼE kotou fakafiafia anai ia muʼa ʼo Sehova tokotou ʼAtua ʼi te ʼu meʼa fuli ʼae ka kotou fai. 19 Kotou tokakaga naʼa kotou galoʼi te kau Levite+ ʼi te temi katoa ʼae ʼe kotou nonofo ai ʼi tokotou fenua.

20 “Ka fakalahi anai e Sehova tokotou ʼAtua ia tokotou fenua,+ ohage pe ko tana fakapapau atu,+ pea ka kotou fia kai ki he kanoʼi manu, ʼe feala anai hakotou kai ki ai ʼi te temi pe ʼae ʼe kotou loto ki ai.+ 21 Pea kapau ʼe mamaʼo fau te koga meʼa ʼae ʼe filifili e Sehova tokotou ʼAtua ke fakakololiaʼi ai tona huafa,+ ʼe feala pe anai takotou matehi hakotou ʼu pipi peʼe ko hakotou ʼu ovi neʼe foaki atu e Sehova, ohage pe ko taku fakatotonu atu. Pea ʼe kotou kai anai ʼi ʼokotou kolo* ʼi te temi pe ʼae ʼe kotou loto ki ai. 22 ʼE feala anai ke kotou kai te ʼu manu ʼaia ohage ko takotou kai he tia.+ ʼE feala anai ke kai ki ai he tahi ʼe heʼe maʼa mo he tahi ʼe maʼa. 23 Kae ke kotou fakatotonu malohi ke ʼaua naʼa kotou kai te toto,+ he ʼe ko te toto ʼe ko te maʼuli.*+ Koia, ʼe mole tonu ke kotou kai fakatahi te toto* mo te kanoʼi manu. 24 ʼE mole tonu ke kotou kai ki te toto. Kae ʼe tonu ke kotou liligi ki te kele ohage ko he vai.+ 25 ʼEi, ʼe mole tonu ke kotou kai ki ai, ke fua lelei ai kia koutou mo ʼakotou fanau, he ʼe kotou fai te meʼa ʼae ʼe lelei kia mata ʼo Sehova. 26 Ka kotou ʼomai ki te koga meʼa ʼae ʼe filifili e Sehova, ʼe kotou ʼaumai pe anai ʼakotou meʼa taputapu pea mo ʼakotou molaga ʼae neʼe kotou fai ʼo ʼuhiga mo ni fakapapau. 27 ʼE kotou momoli ai anai ʼakotou holokoseta, ia te kanoʼi manu mo te toto,+ ʼi te ʼaletale ʼo Sehova tokotou ʼAtua. Pea ʼe kotou liligi anai te toto ʼo te ʼu manu ʼo te tahi age ʼu sakilifisio ki te ʼaletale+ ʼo Sehova tokotou ʼAtua, kae ʼe feala anai ke kotou kai te kanoʼi manu.

28 “Kotou tokakaga ʼo fakalogo ki te ʼu folafola fuli ʼaia ʼe au foaki atu, ke fua lelei tuʼumaʼu ai kia koutou mo ʼokotou foha, he ʼe kotou fai te meʼa ʼae ʼe lelei mo totonu kia mata ʼo Sehova, tokotou ʼAtua.

29 “Ka fakaʼauha anai e Sehova tokotou ʼAtua te ʼu puleʼaga ʼo te fenua ʼae ka kotou maʼu,+ pea ka kotou nonofo leva ʼi ai, 30 kotou tokakaga naʼa kotou to ki te hele ʼae neʼe to ki ai te ʼu puleʼaga ʼaia ka fakaʼauha ʼi ʼokotou muʼa. ʼAua naʼa kotou iloʼi ʼonatou ʼatua, ʼo kotou ui: ‘Neʼe tauhi feafeaʼi te ʼu puleʼaga ʼaia ki ʼonatou ʼatua? ʼE au toe fai feia pe anai.’+ 31 ʼE mole tonu ke kotou tauhi feia kia Sehova tokotou ʼAtua, koteʼuhi ʼe natou fai te ʼu meʼa fakalialia ʼae ʼe fehiʼa ki ai ia Sehova ʼi tanatou tauhi ki ʼonatou ʼatua. ʼE natou toe tutu foki mo ʼonatou foha mo ʼonatou ʼofafine, ko he sakilifisio ki ʼonatou ʼatua.+ 32 ʼE kotou tokakaga anai ʼo mulimuli ki te ʼu folafola fuli ʼae ʼe au foaki atu kia koutou.+ ʼE mole tonu ke kotou hilifaki he meʼa ki ai peʼe ke kotou toʼo he meʼa mai ai.+

13 “Kapau ʼe tuʼu ake ia koutou he polofeta peʼe ko he tahi ʼe faifakakikite ʼaki ni moemisi, ʼo ina fakaha atu he fakailoga peʼe ko he meʼa fakaofoofo ka hoko, 2 pea ʼe hoko moʼoni te fakailoga peʼe ko te meʼa fakaofoofo ʼaia neʼe ina fakaha atu, pea mo ina ui atu: ‘Tou muliʼi he tahi age ʼu ʼatua,’ he ʼu ʼatua neʼe mole kotou iloʼi, ‘pea tou tauhi kia natou,’ 3 ʼe mole tonu ke kotou fakalogo ki te ʼu palalau ʼa te polofeta ʼaia peʼe ko te tagata faimoemisi ʼaia,+ he ʼe ʼahiʼahiʼi koutou e Sehova tokotou ʼAtua,+ ke ina iloʼi ai pe ʼe kotou ʼoʼofa kia Sehova tokotou ʼAtua, ʼaki tokotou loto katoa mo tokotou maʼuli* katoa.+ 4 ʼE tonu ke kotou mulimuli ia Sehova tokotou ʼAtua, mo manavasiʼi kia te ia, mo taupau ʼana fakatotonu, pea mo fakalogo ki tona leʼo. ʼE ko ia ʼae ʼe tonu ke kotou tauhi pea mo pipiki ki ai.+ 5 Kae ʼe tonu anai ke matehi te polofeta ʼaia peʼe ko te tagata faimoemisi ʼaia,+ he neʼe ina fakaneke koutou ke kotou agatuʼu kia Sehova tokotou ʼAtua, ʼae neʼe ina fakamavae koutou mai te fenua ʼo Esipito, pea neʼe ina totogi koutou mai te fenua ʼae neʼe fakapopulaʼi ai koutou.* Neʼe faigaʼi e te tagata ʼaia ke ina fakamaliu kehe koutou mai te ala ʼae neʼe fakatotonu atu e Sehova tokotou ʼAtua ke kotou muliʼi. Pea ʼe tonu ke kotou pulihi ʼi te lotolotoiga ʼo koutou te tagata ʼae ʼe agakovi.+

6 “Kapau ʼe faiga tou tehina, ia te tama ʼo tau faʼe, peʼe ko tou foha peʼe ko tou ʼofafine, peʼe ko tou ʼohoana ʼofaina, peʼe ko tou kaumeʼa lelei ke ina fakahalaʼi fakafufu ia koe, ʼo ina ui atu: ‘Ta olo ʼo tauhi ki he tahi age ʼu ʼatua,’+ kae ʼe ko he ʼu ʼatua neʼe mole ke iloʼi pea neʼe mole iloʼi e ʼau kui, 7 ko he ʼu ʼatua ʼo te hahaʼi ʼae ʼi ʼou tafaʼaki, pe ʼe natou ovi atu kia koe peʼe mamaʼo ia koe, mai ʼae potu taupotu ʼo te fenua ki ʼae potu taupotu, 8 ʼe tonu anai ke ke fakafisi ki ai pea mole ke fakalogo ki ai,+ pea ʼe mole tonu anai ke ke manavaʼofa kia ia peʼe ke puipui ia ia. 9 Kae ʼe tonu ke ke matehi.+ Ko koe ʼae ka ke ʼuluaki tuki makaʼi, pea hoki tuki makaʼi leva e te hahaʼi fuli.+ 10 Pea ʼe tonu ke ke tuki makaʼi ke mate,+ he neʼe ina faigaʼi ke ina fakamaliu kehe ia koe mai ia Sehova tou ʼAtua, ʼae neʼe ina fakamavae ia koe mai te fenua ʼo Esipito, ʼae neʼe fakapopulaʼi ai ia koe.* 11 Pea ka logo ia Iselaele katoa ki ai ʼe natou matataku anai, pea ʼe mole toe fai leva e he tahi ia koutou he meʼa ʼe kovi feia.+

12 “Kapau ʼe kotou logo ʼi he kolo ʼi te ʼu kolo ʼae ʼe foaki atu e Sehova tokotou ʼAtua ke kotou nofoʼi, ʼe ui ai: 13 ‘Kua mavae he ʼu tagata ʼe mole honatou ʼuhiga mai ia koutou, ʼo olo ʼo fakamaliu kehe te hahaʼi ʼo tonatou kolo mai te ʼAtua, ʼo natou ui: “Tou olo ʼo tauhi ki he tahi age ʼu ʼatua,” kae ʼe ko he ʼu ʼatua neʼe mole kotou iloʼi,’ 14 ʼe tonu anai ke kotou vakaʼi ia te faʼahi ʼaia, mo kumi fakalelei pea mo fehufehuʼi.+ Pea kapau neʼe fai moʼoni te meʼa fakalialia ʼaia ʼi te lotolotoiga ʼo koutou, 15 ʼe tonu anai ke kotou matehi te hahaʼi ʼo te kolo ʼaia ʼaki te heleta.+ Kotou maumauʼi te kolo mo te ʼu meʼa fuli ʼae ʼe maʼu ai, pea kotou matehi tanatou faga manu+ ʼaki te heleta. 16 ʼE kotou tanaki anai te ʼu koloa ʼo te kolo ʼaia ki te loto malaʼe lahi, pea kotou tutu te kolo. ʼE hage anai te ʼu koloa ʼaia ko he molaga ʼe momoli katoa kia Sehova tokotou ʼAtua. ʼE liliu anai te kolo ʼaia ko he tuʼuga maka ʼo talu ai. ʼE mole toe laga anai ʼi he ʼaho. 17 ʼE mole tonu anai ke kotou toʼo he meʼa neʼe tuku keheʼi ke maumauʼi,*+ ke puli ai te hauhau ʼo Sehova, pea ke manavaʼofa kia koutou pea mo fakahahaʼi koutou, ohage pe ko tana fakapapau ki ʼakotou kui.+ 18 Koteʼuhi ʼe tonu ke kotou fakalogo kia* Sehova, tokotou ʼAtua, ʼo kotou taupau ʼana fakatotonu fuli ʼae ʼe au foaki atu kia koutou ʼi te ʼaho nei, pea ke kotou fai te meʼa ʼae ʼe lelei kia mata ʼo Sehova, tokotou ʼAtua.+

14 “Ko koutou ʼe ko te ʼu foha ʼo Sehova tokotou ʼAtua. ʼE mole tonu anai ke kotou hifi ʼokotou sino+ peʼe tele ʼokotou tuʼa mata* ʼuhi ko he tahi kua mate.+ 2 Koteʼuhi ko koutou ko he hahaʼi ʼe maʼoniʼoni+ kia Sehova tokotou ʼAtua, pea neʼe filifili koutou e Sehova ʼi te hahaʼi fuli ʼae ʼi te fuga kele, ke kotou liliu ko tana hahaʼi, ko tona koloa makehe.+

3 “ ʼE mole tonu anai ke kotou kai ki he meʼa fakalialia.+ 4 Koʼeni te ʼu manu ʼae ʼe feala anai ke kotou kai ki ai:+ ko te vitulo, mo te ovi, mo te tao, 5 mo te ʼu faʼahiga tia kehekehe, mo te tao ʼo te vao, mo te ovi ʼo te vao, pea mo te ovi ʼae ʼe maʼuli ʼi te ʼu moʼuga. 6 ʼE feala anai ke kotou kai te ʼu manu fuli ʼae ʼe mafahi lua ʼonatou paninia pea mo natou hakeʼi tanatou meʼa kai ʼo toe kai. 7 Kae ʼe mole tonu anai ke kotou kai ki te ʼu manu ʼaeni ʼe natou hakeʼi tanatou meʼa kai ʼo toe kai peʼe mafahi lua ʼonatou paninia: ko te kamelo, mo te lapino vao, pea mo te tamani,* he ʼe natou hakeʼi tanatou meʼa kai ʼo toe kai kae ʼe mole mafahi lua ʼonatou paninia. ʼE natou heʼe maʼa anai kia koutou.+ 8 ʼE toe feia mo te puaka, he ʼe mafahi lua ʼona kenukenu kae ʼe mole ina hakeʼi tana meʼa kai ʼo toe kai. ʼE heʼe maʼa anai kia koutou. ʼE mole tonu ke kotou kai te kanoʼi manu peʼe fāfā ki te ʼu manu ʼaia moka mamate.

9 “Koʼeni te ʼu manu ʼo te ʼu vai ʼae ʼe feala anai ke kotou kai ki ai: ko te ʼu manu fuli ʼae ʼe ʼi ai ʼonatou kapoga mo ni ʼuno.+ 10 Kae ʼe mole tonu anai ke kotou kai ki te ʼu manu ʼae ʼe mole ʼi ai ʼonatou kapoga mo ni ʼuno. ʼE natou heʼe maʼa anai kia koutou.

11 “ ʼE feala anai ke kotou kai ki te ʼu manulele fuli ʼae ʼe maʼa. 12 Kae koʼeni te ʼu manulele ʼae ʼe mole tonu anai ke kotou kai ki ai: ko te akuila, mo te fokone* ʼo te tai, mo te fokone* lahi ʼae ʼe mole fulufulu tona ʼulu,+ 13 mo te milani* kula, mo te milani* ʼuli, mo te tahi ʼu faʼahiga milani kehekehe, 14 mo te ʼu faʼahiga kolopo* kehekehe, 15 mo te otulusi, mo te lulu, mo te tala, mo te ʼu faʼahiga fokone* kehekehe fuli, 16 mo te lulu veliveli, mo te lulu taliga loloa, mo te sine,* 17 mo te pelikano,* mo te fokone* ʼae ʼe mole fulufulu tona ʼulu, mo te kolomolani,* 18 mo te motuku, mo te ʼu faʼahiga elone* kehekehe fuli, mo te upe* pea mo te peka. 19 ʼE toe heʼe maʼa foki kia koutou te ʼu kiʼi manu fuli ʼae ʼe lele.* ʼE mole tonu ke kotou kai ki ai. 20 ʼE feala anai ke kotou kai ki te ʼu manulele fuli ʼae ʼe maʼa.

21 “ ʼE mole tonu anai ke kotou kai he manu neʼe maʼu atu kua mate.+ ʼE feala anai ke kotou foaki ki te matapule ʼae ʼe nofo ʼi ʼokotou kolo* ke ina kai, peʼe ke kotou fakatau ki he matapule. Koteʼuhi ko koutou ko he hahaʼi ʼe maʼoniʼoni kia Sehova tokotou ʼAtua.

“ ʼE mole tonu ke kotou fakamoho te ʼuhiʼi tao ʼi te huʼa pipi ʼo tana faʼe.+

22 “ ʼE tonu anai ke kotou foaki ʼi te taʼu fuli te vahe tahi ki te hogofulu ʼo te ʼu fua ʼo takotou pulapula ʼae neʼe kotou to ʼi ʼakotou gaueʼaga.+ 23 ʼE kotou kai peʼe inu anai te vahe tahi ki te hogofulu ʼo takotou fulumeto,* mo takotou vino foʼou, mo takotou lolo, peʼe ko te ʼu ʼuluaki ʼuhi ʼo ʼakotou pipi mo ʼakotou ovi ia muʼa ʼo Sehova, tokotou ʼAtua. ʼE kotou fai anai te faʼahi ʼaia ʼi te koga meʼa ʼae ka ina filifili ke fakakololiaʼi ai tona huafa,+ ke kotou ako ai te manavasiʼi tuʼumaʼu kia Sehova tokotou ʼAtua.+

24 “Kae kapau ʼe loaloaga fau takotou faifagona pea ʼe mole feala ke kotou ʼave te ʼu meʼa fuli ʼaia ki te koga meʼa ʼae ʼe filifili e Sehova tokotou ʼAtua ke fakakololiaʼi ai tona huafa,+ he ʼe mamaʼo fau (koteʼuhi ʼe tapuakiʼi anai koutou e Sehova tokotou ʼAtua), 25 ʼe feala leva ke kotou fakatau te ʼu meʼa ʼaia, pea ke kotou olo mo te falā ʼaia ki te koga meʼa ʼae ka filifili e Sehova tokotou ʼAtua. 26 Pea ʼe feala anai ke kotou totogi ʼaki te falā ʼaia te ʼu meʼa fuli pe ʼae ʼe kotou loto ki ai: he ʼu pipi, mo he ʼu ovi, mo he ʼu tao, mo he vino, mo he tahi age faʼahiga kava, pea mo te ʼu meʼa fuli pe ʼae ʼe kotou loto ki ai. ʼE kotou kakai anai pea mo fakafiafia mo tokotou famili ia muʼa ʼo Sehova tokotou ʼAtua.+ 27 Pea ʼaua naʼa kotou galoʼi te kau Levite ʼae ʼe nonofo ʼi ʼokotou kolo,+ he ʼe mole natou maʼu honatou kele peʼe ko honatou tofiʼa fakatahi mo koutou.+

28 “ ʼI te taʼu tolu fuli, ʼe kotou toʼo anai te vahe tahi ki te hogofulu ʼo ʼakotou taʼukai ʼi te taʼu ʼaia, ʼo ʼave ki ʼokotou kolo.+ 29 Pea ʼe ʼomai anai te kau Levite, ʼae ʼe mole maʼu honatou kele peʼe ko honatou tofiʼa fakatahi mo koutou, ʼo feia mo te kau matapule, mo te fanau ʼae ʼe hala mo tamai, mo te ʼu fafine vitua ʼae ʼe nonofo ʼi ʼokotou kolo, ʼo kakai ʼo kaku ki tanatou makokona,+ ke tapuakiʼi ai koutou e Sehova tokotou ʼAtua ʼi te ʼu meʼa fuli ʼae ʼe kotou fai.+

15 “ ʼI te taʼu fitu fuli, ʼe kotou molehi anai te ʼu maʼua ʼo ʼokotou tatau.+ 2 ʼE fenei anai tona faʼahiga fai: ʼE molehi anai e te tagata fuli te maʼua ʼo tona tatau. ʼE mole tonu anai ke ina fakamaʼua ki tona tatau peʼe ko tona tehina ke ina huʼi age tona maʼua, koteʼuhi ʼe tala anai ki te hahaʼi ʼe molehi te ʼu maʼua fuli ia muʼa ʼo Sehova.+ 3 ʼE feala anai ke kotou fakamaʼua ki te matapule ke ina huʼi atu tona maʼua,+ kae ʼe mole kotou tali anai ke huʼi atu e tokotou tehina tona maʼua. 4 Pea ʼe mole tonu anai ke liliu he tahi ʼo masiva ʼi Iselaele, koteʼuhi ʼe tapuakiʼi anai koutou e Sehova+ ʼi te fenua ʼae ʼe foaki atu e Sehova tokotou ʼAtua ke liliu ko hokotou tofiʼa. 5 ʼE fai pe anai e Sehova tokotou ʼAtua te faʼahi ʼaia mo kapau ʼe kotou fakalogo lelei ki tona leʼo, pea mo mulimuli fakalelei ki te ʼu fakatotonu fuli ʼaeni ʼe au foaki atu kia koutou ʼi te ʼaho nei.+ 6 Koteʼuhi ʼe tapuakiʼi anai koutou e Sehova tokotou ʼAtua, ohage pe ko tana fakapapau atu, pea ʼe tuʼu maʼua anai ni puleʼaga kaugamalie kia koutou, kae ʼe mole kotou kole maʼua anai kia natou.+ Pea ʼe kotou puleʼi anai ni puleʼaga ʼe kaugamalie, kae ʼe mole natou puleʼi anai koutou.+

7 “Kapau ʼe liliu hokotou tehina ʼo masiva ʼi he kolo ʼo te fenua ʼae ʼe foaki atu e Sehova tokotou ʼAtua kia koutou, ʼaua naʼa kotou fakafefeka ʼokotou loto peʼe kotou fulu pipiki.+ 8 Kae ʼe tonu anai ke kotou lotofoaki,+ pea mo foaki te ʼu meʼa fuli ʼae ʼe ʼaoga ki tokotou tehina ʼaia.* 9 Kotou tokakaga naʼa kotou maʼu ʼi ʼokotou loto te manatu kovi ʼaeni: ‘Kua ovi mai te fitu taʼu, te taʼu ʼae ʼe molehi ai te ʼu maʼua fuli,’+ pea ʼe mole kotou foaki ai he meʼa ki tokotou tehina ʼae ʼe masiva. Kapau ʼe meo kia Sehova ʼo ʼuhiga mo koutou, pea kua kotou agahala.+ 10 ʼE tonu anai ke kotou lotofoaki,+ kae ʼe mole tonu ke kotou foaki kia ia ʼaki he lotofakahemala, koteʼuhi ʼe tapuakiʼi anai e Sehova, tokotou ʼAtua ʼakotou gaue fuli mo kapau ʼe kotou lotofoaki moʼoni.+ 11 Koteʼuhi ʼe ʼi ai tuʼumaʼu pe anai he kau masisiva ʼi te fenua.+ Koia ʼe au fakatotonu atu ai kia koutou: ‘ ʼE tonu anai ke kotou lotofoaki ki tokotou tehina ʼae ʼe mamahi mo masiva ʼi tokotou fenua.’+

12 “Kapau ʼe fakatau atu kia koutou hokotou tehina, ko he tagata peʼe ko he fafine Hepeleo pea ʼe gaue maʼa koutou lolotoga taʼu ʼe ono, ʼe tonu anai ke kotou fakaʼateainaʼi ia ia ʼi te fitu taʼu.+ 13 Pea kapau ʼe kotou fakaʼateainaʼi ia ia, ʼe mole kotou tuku anai ke alu ʼatea. 14 ʼE kotou foaki anai ki ai he ʼu meʼa neʼe kotou toʼo mai takotou faga ovi, mo takotou hahaʼaga fulumeto, mo takotou lomiʼaga lolo pea mo takotou lomiʼaga vite. ʼE kotou foaki anai ki tokotou tehina ʼo mulimuli ki tokotou tapuakiʼi e Sehova, tokotou ʼAtua. 15 Kotou manatuʼi neʼe kotou liliu ko he ʼu kaugana ʼi Esipito pea neʼe totogi koutou e Sehova tokotou ʼAtua. Ko te tupuʼaga la ʼaia ʼo taku fakatotonu atu ke kotou fai te faʼahi ʼaia ʼi te ʼaho nei.

16 “Kae kapau ʼe ui atu e tau tagata kaugana: ‘ ʼE mole au fia mavae io koe!’ he ʼe ʼofa ia koe mo tou famili, pea neʼe fiafia ʼi te gaue maʼa koe,+ 17 ʼe ke ʼave anai ia ia ki te matapa ʼo pūhi ai tona taliga ʼaki he hui, pea ʼe kaugana anai kia koe ʼi tona maʼuli katoa. ʼE ke toe fai feia anai ki tau fafine kaugana. 18 Kae kapau ʼe tonu ke ke fakaʼateaina hau tagata kaugana pea mo tuku ke alu, ʼaua naʼa ke manatu ʼe mole ko he meʼa fakapotopoto, koteʼuhi neʼe lahi age te ʼu fua ʼo tana gaue kia koe lolotoga te ʼu taʼu ʼe ono ʼi te gaue ʼa he tagata neʼe totogi, pea neʼe tapuakiʼi koe e Sehova tou ʼAtua, ʼi te ʼu meʼa fuli ʼae neʼe ke fai.

19 “ ʼE ke foaki anai te ʼu ʼuluaki ʼuhi tagata fuli ʼo tau faga pipi mo tau faga ovi kia Sehova tou ʼAtua ohage ko he meʼa taputapu.+ ʼE mole tonu ke ke fakagaueʼi te ʼu ʼuluaki ʼuhi ʼo tau faga pipi* pea ʼe mole tonu ke ke tele te ʼu ʼuluaki ʼuhi ʼo tau faga ovi. 20 ʼE ke kai anai mo tou famili te ʼu manu ʼaia ʼi te taʼu fuli ia muʼa ʼo Sehova tou ʼAtua, ʼi te koga meʼa ʼae ʼe filifili anai e Sehova.+ 21 Kae ʼe mole tonu ke ke sakilifisioʼi kia Sehova tou ʼAtua he manu ʼe ʼi ai hona mele: ko he manu ʼe ketu, peʼe kivi, peʼe ʼi ai hona tahi age mele.+ 22 ʼE ke kai anai te manu ʼaia ʼi ʼou kolo.* ʼE feala anai ke kai ki ai he tahi ʼe maʼa pea mo he tahi ʼe heʼe maʼa, ohage pe ko te kai ʼo he tia.+ 23 Kae ʼe mole tonu anai ke ke kai te toto ʼo te manu ʼaia.+ ʼE tonu anai ke ke liligi ki te kele ohage ko he vai.+

16 “Ke ke manatuʼi ʼe maʼuhiga te mahina ʼo Apipi.* ʼE tonu anai ke ke fai te Pasikate maʼa Sehova tou ʼAtua,+ he neʼe fakamavae koe e Sehova tou ʼAtua mai Esipito ʼi te poʼuli, ʼi te mahina ʼaia.+ 2 Pea ʼe tonu anai ke ke momoli kia Sehova tou ʼAtua te manu ʼo te Pasikate,+ ʼae neʼe ke toʼo mai ʼi tau faga ovi pea mo tau faga pipi,+ ʼi te koga meʼa ʼae ʼe filifili e Sehova ke fakakololiaʼi ai tona huafa.+ 3 ʼE mole ke kai anai te sakilifisio ʼaia mo he meʼa neʼe fai ʼaki te meʼa fakatupu.+ ʼE tonu anai ke ke kai he ʼu pane hala fakatupu lolotoga ʼaho ʼe fitu, ia te pane ʼo te mamahi, he neʼe ke mavae fakavilivili mai te fenua ʼo Esipito.+ Ke ke fai te faʼahi ʼaia ke ke manatuʼi ai ʼi tou maʼuli katoa te ʼaho ʼae neʼe ke mavae ai mai te fenua ʼo Esipito.+ 4 ʼE mole maʼu anai he meʼa fakatupu io koe pea mo tou fenua katoa lolotoga ʼaho ʼe fitu.+ Pea ʼe mole tonu anai ke tuku he koga ʼo te kanoʼi manu ʼae ʼe ke sakilifisioʼi anai ʼi te afiafi ʼo te ʼuluaki ʼaho, ke toe ki apogipogi uhu.+ 5 ʼE mole gafua anai ke ke momoli te manu ʼo te Pasikate ʼi he kolo pe ʼi te ʼu kolo ʼae ʼe foaki atu e Sehova tou ʼAtua. 6 Kae ʼe ke momoli anai ʼi te koga meʼa ʼae ʼe filifili e Sehova ke fakakololiaʼi ai tona huafa. ʼE ke momoli anai te manu ʼo te Pasikate ʼi te afiafi, ʼi te ʼosi to pe ʼo te laʼa,+ ʼi te ʼaho ʼae neʼe ke mavae ai mai Esipito. 7 ʼE tonu anai ke ke fakamoho pea mo ke kai te sakilifisio ʼaia+ ʼi te koga meʼa ʼae ʼe filifili anai e Sehova tou ʼAtua,+ pea ʼe feala anai hau toe liliu ki ʼou fale la ʼi te ʼaho ake. 8 ʼE ke kai anai he ʼu pane hala fakatupu lolotoga ʼaho ʼe ono, pea ʼe ke fai anai he fakatahi taputapu maʼa Sehova tou ʼAtua, ʼi te fitu ʼaho. ʼE mole tonu anai ke ke fai he faʼahiga gaue kinakina pe.+

9 “ ʼE ke lau anai te ʼu vahaʼa ʼe fitu mai te temi ʼae ʼe kamata tuʼusi ai te ʼu olose ʼaki te hele piko. ʼE ke kamata lau ai anai te ʼu vahaʼa ʼae ʼe fitu.+ 10 Pea ʼe ke fai leva te ʼAho Lahi ʼo Te ʼu Vahaʼa maʼa Sehova tou ʼAtua,+ ʼo ke foaki ai tau meʼa ʼofa, ʼo fakafuafua ki te lahi ʼo te ʼu tapuakina ʼae neʼe tuku atu e Sehova tou ʼAtua.+ 11 Pea ʼe ke fakafiafia anai ia muʼa ʼo Sehova tou ʼAtua, ʼi te koga meʼa ʼae ʼe filifili e Sehova tou ʼAtua ke fakakololiaʼi ai tona huafa. ʼE ke fakafiafia anai mo tou foha, mo tou ʼofafine, mo tau tagata kaugana, mo tau fafine kaugana, mo te Levite ʼae ʼe nofo ʼi ʼou kolo,* ʼo feia mo te matapule, mo te fanau ʼae ʼe hala mo tamai, pea mo te fafine vitua.+ 12 Ke ke manatuʼi neʼe ke liliu ko he kaugana ʼi Esipito,+ pea ke ke mulimuli mo maʼuliʼi te ʼu lekula ʼaeni.

13 “ ʼE ke fai anai te ʼAho Lahi ʼo Te ʼu Pola*+ lolotoga ʼaho ʼe fitu, moka ke ʼosi tanaki te ʼu fua ʼo te taʼukai ʼae neʼe ke haha, pea mo te lolo ʼae ʼi tau lomiʼaga oliveto mo te vino ʼae ʼi tau lomiʼaga vite. 14 Ke ke fakafiafia lolotoga te ʼaho lahi ʼaia+ mo tou foha, mo tou ʼofafine, mo tau tagata kaugana, mo tau fafine kaugana, ʼo feia mo te Levite, mo te matapule, mo te fanau ʼae ʼe hala mo tamai, pea mo te fafine vitua ʼae ʼe nonofo ʼi ʼou kolo. 15 ʼE ke fai anai te ʼaho lahi ʼaia maʼa Sehova tou ʼAtua lolotoga ʼaho ʼe fitu+ ʼi te koga meʼa ʼae ʼe filifili e Sehova, he ʼe tapuakiʼi anai e Sehova tou ʼAtua te ʼu fua fuli ʼo te ʼu taʼukai, mo te ʼu meʼa fuli ʼae ʼe ke fai anai,+ pea ʼe ke fiafia pe anai.+

16 “ ʼE tutuʼu anai te ʼu tagata fuli ia muʼa ʼo Sehova tou ʼAtua ʼo tuʼa tolu ʼi te taʼu, ʼi te koga meʼa ʼae ʼe ina filifili: ʼi te ʼAho Lahi ʼo Te ʼu Pane Hala Fakatupu,+ mo te ʼAho Lahi ʼo Te ʼu Vahaʼa+ pea mo te ʼAho Lahi ʼo Te ʼu Pola.*+ Pea ʼe mole tuʼu anai he tahi ia muʼa ʼo Sehova mo ʼona nima ʼatea. 17 ʼE lahi anai te ʼu tapuakina ʼae ʼe foaki atu e Sehova tou ʼAtua, koia ʼe toe lahi anai mo te ʼu meʼa ʼofa ʼae ʼe natou tahi foaki kia te ia.+

18 “ ʼE ke fakanofo anai he kau tuʼi fakamau+ pea mo he kau takitaki ʼi te ʼu telepi takitahi ʼo te ʼu kolo* fuli ʼae ʼe foaki atu e Sehova tou ʼAtua. Pea ʼe natou fakamauʼi anai te hahaʼi ʼi te faitotonu. 19 ʼE mole tonu ke ke faikaka ʼi tau faifakamau,+ peʼe ke fakapalatahi,+ peʼe ke tali he meʼa ʼofa neʼe foaki fakakaka atu, koteʼuhi ʼe meʼa noaʼi anai e natou ʼae ʼe faifakamau ia te faitotonu ʼaki te meʼa ʼofa ʼaia,+ pea ʼe feala ai ke natou fetogi ʼanatou tonu. 20 ʼE ke faiga pe anai ke ke fakahoko te faitotonu,+ ke feala ai hau maʼuli pea mo maʼu te fenua ʼae ʼe foaki atu e Sehova tou ʼAtua.

21 “ ʼE mole ke to anai he faʼahiga ʼakau pe ke hage ko he pou ʼakau taputapu*+ ʼo ovi ki te ʼaletale ʼae ʼe ke fakatuʼu anai maʼa Sehova tou ʼAtua.

22 “ ʼE mole ke toe fakatuʼu anai mo he pou maka taputapu,+ he ʼe ko te meʼa ʼaia ʼe fehiʼa ki ai ia Sehova tou ʼAtua.

17 “ ʼE mole tonu ke kotou sakilifisioʼi kia Sehova tokotou ʼAtua he vitulo peʼe ko he ovi ʼe ʼi ai hona mele, he ʼe ko he meʼa fakalialia kia Sehova tokotou ʼAtua.+

2 “ ʼE feala anai ke maʼu ʼi he kolo ʼi te ʼu kolo ʼae ʼe foaki atu e Sehova tokotou ʼAtua, he tagata peʼe ko he fafine ʼe ina fai te meʼa ʼae ʼe kovi kia mata ʼo Sehova tokotou ʼAtua, pea mo ina maumauʼi tana fuakava,+ 3 pea ʼe alu ʼo tauhi ki he tahi age ʼu ʼatua mo tulolo ʼi ʼonatou muʼa, peʼe ia muʼa ʼo te laʼa, peʼe ko te mahina, peʼe ko te foʼi kautau katoa ʼo te ʼatu lagi,+ ʼae ko he meʼa neʼe mole au fakatotonu atu ke kotou fai.+ 4 Ka fakamatala atu he aluʼaga feia peʼe kotou logo ki ai, ʼe tonu anai ke kotou kumikumi fakalelei ia te faʼahi ʼaia. Pea kapau neʼe hoko moʼoni+ te meʼa fakalialia ʼaia ʼi Iselaele, 5 ʼe tonu anai ke kotou ʼave te tagata peʼe ko te fafine ʼae neʼe ina fai te meʼa ʼaia ʼe kovi ki tuʼa atu ʼo te ʼu matapa ʼo te kolo, ʼo tuki makaʼi ai ke mate.+ 6 ʼE hoki matehi pe anai ia ia mo kapau ʼe fakamoʼoni he foʼi toko lua peʼe toko tolu+ ki te meʼa fakalialia ʼae neʼe ina fai. ʼE mole tonu anai ke matehi mo kapau ʼe ko he foʼi tokotahi pe ʼe fakamoʼoni ki ai.+ 7 ʼE ko te ʼu fakamoʼoni ʼe toko lua peʼe toko tolu ʼae ka natou ʼuluaki tuki makaʼi ia ia, pea hoki tuki makaʼi leva ia ia e te hahaʼi fuli ke mate. ʼE tonu ke kotou pulihi ʼi te lotolotoiga ʼo koutou te tagata ʼae ʼe agakovi.+

8 “Kapau ʼe hoko ʼi hokotou kolo he aluʼaga ʼe faigataʼa fau hona fakamauʼi ʼo ʼuhiga mo he ligi toto,+ peʼe ko te tagi ʼa he tahi ke fakahoko te faitotonu, peʼe ko he agamalohi, peʼe ko he tahi age aluʼaga ʼe hoko ai ni fihi, ʼe kotou olo leva ki te koga meʼa ʼae ʼe filifili e Sehova tokotou ʼAtua.+ 9 Kotou olo ki te kau pelepitelo Levite pea mo te tuʼi fakamau+ ʼae ʼe gaue ʼi te ʼu ʼaho ʼaia, ʼo fakamatala age te aluʼaga ʼae neʼe hoko, pea ʼe natou fakaha atu anai te tonu.+ 10 ʼE kotou mulimuli lelei anai ki te tonu ʼae ka natou fakaha atu ʼi te koga meʼa ʼae ʼe filifili e Sehova. Koia, kotou tokakaga ʼo mulimuli lelei ki ʼanatou fakatotonu fuli. 11 ʼE kotou mulimuli anai ki te lao ʼae ʼe natou fakaha atu pea mo te tonu ʼae ʼe natou tuku atu.+ ʼE mole tonu ke kotou lituʼa ki te tonu ʼae ʼe natou fakaha atu, ʼo kotou olo ki te faʼahi mataʼu peʼe ki te faʼahi hema.+ 12 ʼE tonu anai ke matehi te tagata ʼae ʼe fiameʼalahi, ʼi tana mole fia fakalogo ki te pelepitelo ʼae ʼe tauhi kia Sehova tokotou ʼAtua peʼe ki te tuʼi fakamau.+ ʼE tonu ke kotou pulihi ʼi te lotolotoiga ʼo Iselaele te tagata ʼae ʼe agakovi.+ 13 Pea ka logo te hahaʼi fuli ki ai ʼe natou matataku anai, pea ʼe mole toe fiameʼalahi anai he tahi.+

14 “Ka kotou hu ki te fenua ʼae ʼe foaki atu e Sehova tokotou ʼAtua pea kua kotou maʼu mo nonofo ʼi ai, pea ka kotou ui ʼe kotou fia fakanofo hokotou hau ohage pe ko te ʼu puleʼaga fuli ʼae ʼi ʼokotou tafaʼaki,+ 15 ʼe tonu anai ke kotou fakanofo te hau ʼae ʼe filifili e Sehova tokotou ʼAtua.+ ʼE kotou fakanofo anai he tagata neʼe filifili ʼi takotou hahaʼi ke liliu ko hokotou hau. ʼE mole gafua anai ke kotou fakanofo he matapule, he tahi ʼe mole kau ki takotou hahaʼi. 16 Pea ʼe mole tonu anai ke lahi ʼana hosi+ peʼe ke ina toe fakaliliu te hahaʼi ki Esipito ke maʼu ai he tahi age ʼu hosi,+ koteʼuhi neʼe ui e Sehova kia koutou: ‘ ʼE mole tonu ke kotou toe toʼo te ala ʼaia ʼi he temi.’ 17 Pea ʼe mole tonu anai ke lahi ʼona ʼohoana, naʼa maliu kehe tona loto mai ia te au.+ ʼE mole tonu foki ke ina tanaki he tuʼuga siliva pea mo he tuʼuga aulo.+ 18 Ka hau anai, ʼe tonu ke ina hiki ki he tohi* te Lao ʼaia neʼe taupau e te kau pelepitelo Levite.+

19 “ ʼE ina taupau anai maʼa ia te tohi ʼaia, pea ʼe tonu anai ke ina lau ʼi te ʼaho fuli.+ ʼE feala ai hana ako te manavasiʼi kia Sehova tona ʼAtua, pea ke mulimuli ki te ʼu folafola mo te ʼu lekula fuli ʼo te Lao ʼaia.+ 20 Kapau ʼe ina fai te faʼahi ʼaia, ʼe mole fia maʼoluga age anai ʼi ʼona tehina pea ʼe mole lituʼa anai ki te fakatotonu, ʼo alu ki te faʼahi mataʼu peʼe ki te faʼahi hema, pea ʼe fualoa anai tana pule ʼo feia mo te pule ʼo ʼona foha ki Iselaele.

18 “ ʼE mole maʼu anai e te kau pelepitelo Levite, ʼo feia mo te telepi katoa ʼo Levi honatou kele peʼe ko honatou tofiʼa fakatahi mo Iselaele. ʼE natou kai anai te ʼu molaga ʼae ʼe tutu maʼa Sehova, pea ʼe ko tonatou tofiʼa ʼaia.+ 2 Koia, ʼe mole natou maʼu anai honatou tofiʼa ʼi te lotolotoiga ʼo ʼonatou tehina. Ko Sehova ʼe ko tonatou tofiʼa, ohage pe ko tana ui age kia natou.

3 “Pea koʼeni te vahe ʼo te kau pelepitelo ʼae ʼe toʼo anai mai te ʼu meʼa ʼae ʼe foaki e te hahaʼi: Ko ia ʼae ʼe ina fai hana sakilifisio, pe ʼe ko he vitulo peʼe ko he ovi, ʼe ina foaki anai ki te pelepitelo te alaga muʼa ʼo te manu, mo ʼona kaugao pea mo tona gākau. 4 ʼE kotou foaki anai kia ia te ʼu ʼuluaki fua ʼo takotou pulapula, mo takotou vino foʼou, mo takotou lolo, pea mo te ʼu ʼuluaki fuluʼi ovi ʼo ʼakotou ovi ʼae ka kotou tele.+ 5 Koteʼuhi neʼe filifili e Sehova tokotou ʼAtua ia te kau Levite mai ʼokotou telepi fuli, ke natou gaue tuʼumaʼu pe ʼi te huafa ʼo Sehova.+

6 “Kae kapau ʼe mavae he Levite ʼi he kolo ʼo ʼokotou kolo ʼae ʼi Iselaele ʼae neʼe maʼuli ai,+ pea ʼe fia alu ki te koga meʼa ʼae ʼe filifili e Sehova,*+ 7 ʼe feala pe anai ke gaue ai ʼo fakafofoga ia Sehova tona ʼAtua ohage pe ko ʼona tehina Levite fuli, ʼae ʼe gaue ia muʼa ʼo Sehova.+ 8 ʼE foaki age anai he vaega meʼa kai ʼe tatau mo tanatou vaega meʼa kai,+ ʼo hilifaki ki ai te meʼa ʼae ʼe ina maʼu mai tana fakatau ʼona koloa fakafamili.

9 “Ka kotou hu ki te fenua ʼae ʼe foaki atu e Sehova tokotou ʼAtua, ʼe mole kotou faiga anai ke kotou faʼifaʼitakiʼi te ʼu aga fakalialia ʼae ʼe fai e te ʼu puleʼaga ʼaia.+ 10 ʼE mole tonu anai ke maʼu ʼi tokotou fenua he tahi ʼe ina tutu tona foha peʼe ko tona ʼofafine ohage ko he sakilifisio,+ he tahi ʼe faifakakikite fakatemonio,+ he tahi ʼe gaohi meʼa fakamanamana,+ he tahi ʼe ina kumi he ʼu fakailoga,+ he tahi ʼe gaohi meʼa fakatemonio,+ 11 he tahi ʼe faitutuku, he tahi ʼe alu ki he tahi ʼe felogoi mo te kau mate+ peʼe ina fakakikite he ʼu meʼa ka hoko,+ peʼe ko he tahi ʼe ina fakafehuʼi te kau mate.+ 12 Koteʼuhi ʼe fakalialia ia Sehova ki ʼae ʼe ina fai te ʼu aga ʼaia, pea ʼe kapu e Sehova tokotou ʼAtua te ʼu puleʼaga ʼaia ʼi ʼokotou muʼa he ʼe natou fai te ʼu aga fakalialia ʼaia. 13 ʼE mole tonu anai ke kotou fai he meʼa ʼe kovi ia muʼa ʼo Sehova, tokotou ʼAtua.+

14 “Koteʼuhi neʼe ko te agamahani ʼa te ʼu puleʼaga ʼaia tanatou fakalogo ki te hahaʼi ʼae ʼe gaohi meʼa fakamanamana+ mo faifakakikite fakatemonio,+ kae ʼe mole fakagafua atu e Sehova tokotou ʼAtua ke kotou fai te faʼahi ʼaia. 15 ʼE fakanofo anai e Sehova tokotou ʼAtua ʼi ʼokotou tehina he polofeta ohage ko au maʼa koutou. ʼE tonu anai ke kotou fakalogo kia ia.+ 16 Koteʼuhi ʼe ko te tali ʼaia ki te meʼa ʼae neʼe kotou kole kia Sehova tokotou ʼAtua, ʼi te ʼaho ʼae neʼe kotou fakatahitahi ai ʼi Olepe,+ ʼi takotou ui: ‘ ʼE mole matou toe fia logo ki te leʼo ʼo Sehova tomatou ʼAtua peʼe toe sisio ki te afi lahi ʼaia, naʼa matou mamate.’+ 17 Pea neʼe ui mai e Sehova kia au: ‘Ko te ʼu meʼa ʼae neʼe natou ui, ʼe lelei. 18 ʼE au fakanofo anai he polofeta ohage ko koe+ ʼi te lotolotoiga ʼo ʼonatou tehina. ʼE au fakaha anai kia ia te ʼu meʼa ʼae ʼe tonu ke ina tala,+ pea ʼe ina fakaha age anai kia natou te ʼu meʼa fuli ʼae ʼe au fakatotonu age.+ 19 Kapau ʼe mole fakalogo he tagata ki te ʼu folafola ʼae ʼe ina fakaha ʼi toku huafa, ʼe au tauteaʼi moʼoni anai ia ia.+

20 “ ‘Kapau ʼe fiameʼalahi he polofeta ʼo ina fakaha he folafola ʼi toku huafa kae neʼe mole au fakatotonu age ke ina tala, peʼe kapau ʼe palalau ʼi te higoa ʼo he tahi age ʼu ʼatua, ʼe tonu anai ke matehi te polofeta ʼaia.+ 21 Kae ʼe lagi kotou ui anai ʼi ʼokotou loto: “ ʼE matou iloʼi feafeaʼi anai neʼe mole fakaha e Sehova te folafola ʼaia?” 22 Kapau ʼe palalau te polofeta ʼi te huafa ʼo Sehova kae ʼe mole hoko te folafola ʼaia, neʼe mole fakaha e Sehova ia te folafola ʼaia. Neʼe fiameʼalahi te polofeta ʼaia ʼi tana palalau. ʼE mole tonu ke kotou matataku ki ai.’

19 “Ka fakaʼauha te ʼu puleʼaga e Sehova tokotou ʼAtua pea mo tuku atu e Sehova tokotou ʼAtua ia tonatou fenua, pea ka kotou maʼu mo nonofo ʼi ʼonatou kolo mo ʼonatou ʼapi,+ 2 ʼe kotou tuku keheʼi anai he ʼu kolo ʼe tolu ʼi te fenua ʼae ʼe foaki atu e Sehova tokotou ʼAtua ke kotou maʼu.+ 3 ʼE kotou vae tolu anai te fenua ʼae ʼe foaki atu e Sehova tokotou ʼAtua, pea kotou tofa he ʼu ala ke feala ki te tagata ʼae neʼe ina matehi he tahi ke hola ki he kolo ʼi te ʼu kolo ʼaia.

4 “Pea koʼeni te meʼa ʼae ʼe tonu ke fai e te tagata faifakapo, ke haofaki ai tona maʼuli mo kapau neʼe ina taʼi tona tatau kae neʼe mole loto ia ki ai pea neʼe mole fehiʼa ki ai ʼi muʼa atu.+ 5 Ohage la, kapau ʼe alu mo tona tatau ʼo faifafie ʼi te vao matuʼa, pea ina hiki tona nima ke ina taʼaga he fuʼu ʼakau ʼaki tana toki kae alu te kanoʼi toki ʼo tau ki tona tatau ʼo mate ai, ʼe tonu anai ki te tagata ʼaia neʼe ina matehi tona tatau, ke hola ki he kolo ʼi te ʼu kolo ʼaia, ke haofaki ai tona maʼuli.+ 6 Kae ʼuhi ko tona ita pea mo te tuʼu mamaʼo ʼo te kolo, ʼe feala ki ʼae ʼe lagavaka*+ ke ina tuli ia te tagata ʼaia ʼo matehi. Kae neʼe mole tonu ia ke matehi he neʼe mole fehiʼa ki tona tatau ʼi muʼa atu.+ 7 Ko te tupuʼaga la ʼaia ʼo taku fakatotonu atu: ‘Kotou tuku keheʼi he ʼu kolo ʼe tolu.’

8 “Kapau ʼe fakalahi e Sehova, tokotou ʼAtua tokotou fenua ʼae neʼe ina fakapapau ke ina foaki ki ʼakotou kui,+ pea mo ina foaki atu te fenua katoa ʼaia,+ 9 mo kapau foki ʼe kotou mulimuli lelei ki te ʼu fakatotonu fuli ʼae ʼe au foaki atu kia koutou ʼi te ʼaho nei, ʼae ke kotou ʼoʼofa kia Sehova tokotou ʼAtua pea mo haʼele tuʼumaʼu ʼi ʼona ala,+ ʼe kotou hilifaki anai he tahi age ʼu kolo ʼe tolu ki te ʼu ʼuluaki kolo ʼae ʼe tolu.+ 10 ʼI takotou fai te faʼahi ʼaia, ʼe mole matehi anai he tahi neʼe mole ina fai he meʼa ʼe kovi+ ʼi te fenua ʼae ʼe foaki atu e Sehova tokotou ʼAtua, ohage ko hokotou tofiʼa. Pea ʼe mole ui anai neʼe kotou faifakapo.*+

11 “Kae kapau neʼe fehiʼa he tagata ki tona tatau+ pea ina lama ke ina ʼohofi ʼo ina taʼi leva ʼo mate ai, pea kapau ʼe hola te tagata ʼaia ki he kolo ʼi te ʼu kolo ʼaia, 12 ʼe tonu anai ke fekauʼi e te kau takitaki ʼo te kolo ʼae neʼe maʼuli ai, he tahi ke alu ʼo kumi mai ia ia. Pea ʼe natou tuku anai kia nima ʼo te tagata lagavaka, pea ʼe tonu ai ke matehi.+ 13 ʼE mole tonu anai ke kotou lotomanavaʼofa kia ia. ʼE tonu anai ke kotou pulihi ʼi Iselaele te fakapo ʼae neʼe fai ki he tahi neʼe mole ina fai he meʼa ʼe kovi,+ pea ʼe fua lelei anai kia koutou.

14 “Ka kotou maʼu tokotou tofiʼa ʼi te fenua ʼae ʼe foaki atu e Sehova tokotou ʼAtua, ʼe mole tonu anai ke kotou hiki te ʼu tuʼakoi ʼo te kele ʼo tokotou vahaʼa fale+ ʼi te koga meʼa ʼae neʼe kua ʼosi fakatuʼu ai e ʼakotou kui te ʼu tuʼakoi.

15 “ ʼE mole feala anai ke ui neʼe fai e he tahi hana hala peʼe ko hana agahala mo kapau ʼe fakamoʼoni pe ki ai he foʼi tokotahi.+ ʼE hoki iloʼi anai pe ʼe moʼoni tona tukugakoviʼi mo kapau ʼe fakamoʼoni ki ai he foʼi toko lua peʼe toko tolu.+ 16 Kapau ʼe fai e he tahi he fakamoʼoni loi ʼo ʼuhiga mo he tagata pea ʼe ina tukugakoviʼi ʼo ʼuhiga mo he agahala neʼe ina fai,+ 17 ʼe tutuʼu anai te ʼu tagata ʼaia ʼe lua ʼe fihi ia muʼa ʼo Sehova, ia muʼa ʼo te kau pelepitelo pea mo te kau tuʼi fakamau ʼae ʼe gaue ʼi te ʼu ʼaho ʼaia.+ 18 ʼE tonu anai ke kumikumi fakalelei e te kau tuʼi fakamau te aluʼaga ʼaia.+ Pea kapau neʼe fai e te tagata ʼaia he fakamoʼoni loi, pea neʼe ina tukugakoviʼi hala tona tehina, 19 ʼe kotou fai pe anai ki te tagata ʼaia te meʼa ʼae neʼe ina fakatuʼutuʼu ke fai ki tona tehina.+ ʼE tonu ke pulihi te tagata agakovi ʼaia ia koutou.+ 20 Ka logo ia natou ʼae ki ai ʼe natou matataku anai, pea ʼe mole toe fai leva e he tahi ia koutou he meʼa ʼe kovi feia.+ 21 ʼE mole kotou lotomanavaʼofa anai:+ ʼE fetogi anai he maʼuli* ʼaki he maʼuli,* he mata ʼaki he mata, he nifo ʼaki he nifo, he nima ʼaki he nima, he vaʼe ʼaki he vaʼe.+

20 “Kapau ʼe kotou olo ʼo tauʼi ʼokotou fili pea ʼe kotou sisio ʼe lahi age ʼanatou hosi, mo ʼanatou saliote pea mo tanatou kau solia ia koutou, ʼaua naʼa kotou matataku ia natou, koteʼuhi ko Sehova tokotou ʼAtua, ʼae neʼe ina fakamavae koutou mai te fenua ʼo Esipito, ʼe nofo ia mo koutou.+ 2 ʼI te temi ʼae ʼe kotou ʼamanaki olo ai ki te tau, ʼe tonu anai ke fakaovi te pelepitelo ki te hahaʼi ʼo palalau kia natou.+ 3 ʼE ina ui age anai kia natou: ‘Hahaʼi ʼo Iselaele, kotou fakalogo mai. ʼE kotou ʼamanaki tauʼi nei ʼokotou fili. ʼAua naʼa kotou lotovaivai. ʼAua naʼa kotou matataku ʼuhi ko natou, 4 koteʼuhi ʼe haʼele ia Sehova tokotou ʼAtua mo koutou, ke ina tauʼi ʼokotou fili pea mo ina haofaki ia koutou.’+

5 “Pea ʼe toe ui anai e te kau pule solia ki te hahaʼi: ‘Ko ai ʼae neʼe ina laga hona ʼapi kae heʼeki ina nofoʼi? Ke toe liliu ki tona ʼapi. He ʼe feala pe anai ke mate ʼi te tau kae nofoʼi e he tahi age tagata tona ʼapi. 6 Pea ko ai ʼae neʼe ina to hana gaueʼaga vite kae heʼeki ina toli ʼona fua? Ke mavae ʼo toe liliu ki tona ʼapi. He ʼe feala pe anai ke mate ʼi te tau kae toli ia e he tahi age tagata. 7 Pea ko ai ʼae kua fakapapau ʼohoana mo he taʼahine kae heʼeki ʼohoana mo ia? Ke mavae ʼo toe liliu ki tona ʼapi.+ He ʼe feala pe anai ke mate ʼi te tau kae ʼohoana he tahi age tagata mo te taʼahine ʼaia.’ 8 Pea ʼe toe fehuʼi anai e te kau pule solia ki te hahaʼi: ‘Ko ai ʼae ʼe mataku mo lotovaivai?+ Ke toe liliu ki tona ʼapi ke ʼaua naʼa ina toe fakalotovaivaiʼi ʼona tehina ohage pe ko tana kua lotovaivai.’+ 9 Ka ʼosi palalau te kau pule solia ki te hahaʼi, ʼe natou fakanofo anai he kau pule ʼo te ʼu foʼi kautau ke natou taki te hahaʼi.

10 “Kapau ʼe kotou fakaovi ki he kolo ʼo tauʼi, ʼe tonu muʼa ke kotou fakaha age te ʼu fakatuʼutuʼu ʼae ke maʼu ai te tokalelei.+ 11 Kapau ʼe natou tali lelei pea mo natou avahi atu te ʼu matapa ʼo tonatou kolo, ʼe kaugana anai te hahaʼi fuli ʼae ʼe maʼuʼuli ai kia koutou, pea ʼe natou gaue anai maʼa koutou.+ 12 Kae kapau ʼe mole natou fia tokalelei mo koutou kae natou fia tauʼi koutou, ʼe kotou ʼa takai anai te kolo, 13 pea ʼe tuku moʼoni atu anai e Sehova tokotou ʼAtua te kolo ki ʼokotou nima, pea ʼe tonu anai ke kotou matehi te hahaʼi tagata fuli ʼaki te heleta. 14 Kae ʼe feala anai ke kotou toʼo maʼa koutou te hahaʼi fafine, mo te fanau, mo te faga manu, pea mo te ʼu meʼa fuli ʼo te kolo, ʼei, ʼona koloa fuli.+ Pea ʼe kotou fakaʼaogaʼi anai te ʼu koloa ʼo ʼokotou fili, ʼae ʼe foaki atu e Sehova tokotou ʼAtua.+

15 “ ʼE kotou fai anai te ʼu meʼa ʼaia ki te ʼu kolo fuli ʼae ʼe mamaʼo mai ia koutou, pea ʼe mole kau ʼi te ʼu kolo ʼo te ʼu puleʼaga ʼae ʼe ovi mai kia koutou. 16 Kae ʼi te ʼu kolo ʼo te ʼu puleʼaga ʼaia ʼe foaki atu e Sehova tokotou ʼAtua ohage ko hokotou tofiʼa, ʼe mole tonu anai ke kotou tuku ke maʼuli he tahi.+ 17 Kae ʼe tonu anai ke kotou maumauʼi katoa te ʼu puleʼaga ʼaeni: te kau Heti, mo te kau Amole, mo te kau Kanaane, mo te kau Pelesite, mo te kau Hevi pea mo te kau Sepusi,+ ohage pe ko tona fakatotonu atu e Sehova tokotou ʼAtua. 18 Koia, ʼe mole feala ai ke natou akoʼi atu ke kotou faʼifaʼitakiʼi ʼanatou aga fakalialia fuli ʼae neʼe natou fai ki ʼonatou ʼatua, he ʼe kotou agahala ai kia Sehova tokotou ʼAtua ʼuhi ko natou.+

19 “Pea kapau ʼe kotou ʼa takai fualoa he kolo, ʼo kotou tauʼi ke kotou maʼu, ʼe mole tonu anai ke kotou taʼaga te ʼu fuʼu ʼakau ʼo te kolo ʼaia. ʼE feala anai ke kotou kai ki ʼonatou fua, kae ʼe mole tonu ke kotou taʼaga.+ He ʼe ʼohofi koa he fuʼu ʼakau ʼo he gaueʼaga ohage ko te ʼohofi ʼo he tagata? 20 ʼE feala pe anai ke kotou taʼaga he fuʼu ʼakau ʼe kotou iloʼi ʼe mole feala ke kai ʼona fua. ʼE feala anai hakotou taʼaga ʼo fai ʼaki he ʼa ʼi te takafoli ʼo te kolo ʼae ʼe kotou tauʼi, ʼo kaku ki takotou maʼu.

21 “Kapau ʼe kotou maʼu atu he tahi kua mate ʼi he gaueʼaga ʼi te fenua ʼae ʼe foaki atu e Sehova tokotou ʼAtua ke kotou maʼu, kae ʼe mole iloʼi pe ko ai ʼae neʼe ina matehi, 2 ʼe tonu anai ke olo ʼakotou takitaki mo ʼakotou tuʼi fakamau+ ʼo fakafuafua te vaha mamaʼo ʼo te faʼahi ʼae neʼe tuku ai te sino mo te ʼu kolo ʼae ʼi ʼona tafaʼaki. 3 Pea ʼe tonu anai ki te kau takitaki ʼo te kolo ʼae ʼe ovi age, ke natou toʼo he ʼuhiʼi pipi fafine mai te faga pipi, neʼe heʼeki fakagaueʼi pe neʼe heʼeki hili ki ai he ʼakau ʼamo. 4 Pea ʼe ʼave anai e te kau takitaki ʼo te kolo ʼaia te ʼuhiʼi pipi fafine ki he vai tafe* ʼe hali ai te vai pea neʼe heʼeki fuli ai te kele peʼe nunusi ai te pulapula, pea ʼe tonu anai ke natou fasiʼi te kia ʼo te ʼuhiʼi pipi fafine ʼi te vai tafe ʼaia.+

5 “ ʼE fakaovi mai anai te kau pelepitelo, ia te kau Levite, he neʼe filifili ia natou e Sehova tokotou ʼAtua, ke natou tauhi kia te ia+ pea mo tala he ʼu tapuakina ʼi te huafa ʼo Sehova.+ ʼE natou fakaha anai pe ʼe tonu ke fakatokatoka feafeaʼi te ʼu fihi ʼae neʼe hoko ʼuhi ko he agamalohi.+ 6 Pea ʼe tonu anai ki te kau takitaki fuli ʼo te kolo ʼae ʼe ovi age ki te faʼahi ʼae neʼe tuku ai te sino, ke natou fanofano+ ʼi ʼoluga ʼo te ʼuhiʼi pipi fafine ʼae neʼe fasiʼi tona kia ʼi te vai tafe, 7 pea mo natou ui: ‘Neʼe mole fai e ʼomatou nima te ligi toto ʼaia pea neʼe mole matou sisio mata ki ai. 8 Sehova e, ʼaua naʼa ke tuku te hala ʼaeni ki tau hahaʼi ko Iselaele, ʼae neʼe ke totogi,+ kae ke ke pulihi ʼi Iselaele te fakapo ʼae neʼe fai ki he tahi neʼe mole ina fai he meʼa ʼe kovi.’+ Pea ʼe mole lau anai neʼe natou fai te fakapo ʼaia.* 9 ʼI takotou fai te faʼahi ʼaia, ʼe kotou pulihi ai anai ʼi te lotolotoiga ʼo koutou te fakapo ʼae neʼe fai ki he tahi neʼe mole ina fai he meʼa ʼe kovi, he ʼe kotou fai ai te meʼa ʼae ʼe lelei kia mata ʼo Sehova.

10 “Kapau ʼe ke alu ʼo tauʼi ʼou fili pea ʼe tuku e Sehova tou ʼAtua ia natou ki ʼou nima, pea mo ke ʼave popula natou,+ 11 pea kapau ʼe ke sio ki he fafine finemui ʼi te hahaʼi popula ʼaia, pea ʼe ke manako ai ʼo ke fia ʼohoanaʼi, 12 ʼe feala anai hau ʼave ia ia ki tou ʼapi. ʼE tonu anai ke ina tele tona ʼulu, mo tuʼusi ʼona paninia, 13 mo huʼi tona teu popula, pea mo nofo ʼi tou ʼapi. ʼE ina tagiʼi anai tana tamai mo tana faʼe lolotoga he mahina katoa,+ pea hili ʼaia, ʼe feala anai ke ke momoe mo ia, he ʼe kolua ʼohoana anai. 14 Kae kapau ʼe mole ke leleiʼia ia ia, ʼe tonu anai ke ke tuku ke alu+ ki te koga meʼa ʼae ʼe loto ia ki ai. Kae ʼe mole feala anai ke ke fakatau peʼe ke gaohi koviʼi ia ia, he neʼe ke fakalainoaʼi.

15 “Fakakaukauʼi age muʼa ʼe ʼohoana he tagata mo ni fafine ʼe lua, pea ʼe ʼofa ia ki te tahi fafine ʼo lahi age ʼi te tahi fafine.* Neʼe ina maʼu leva hona ʼu foha mo te ʼu fafine ʼaia, pea neʼe tupu tona ʼuluaki foha ʼi te fafine ʼae ʼe mole ʼofainaʼi.+ 16 ʼI te ʼaho ʼae ka ina vahe ai tona tofiʼa ki ʼona foha, ʼe mole tonu anai ke ina meʼa noaʼi te tama ʼa te fafine ʼaia, he ko tona ʼuluaki foha, ʼo ina foaki te ʼuhiga ʼuluaki tupu ki te tama ʼa te fafine ʼae ʼe ʼofa ai. 17 ʼE tonu anai ke ina fakamoʼoni ko te tama ʼa te fafine ʼae ʼe fehiʼaʼinaʼi ʼe ko tona ʼuluaki foha ʼaia, ʼo ina foaki ki ai ni vahe ʼe lua ʼo te ʼu meʼa fuli ʼae ʼe ina maʼu, he ʼe ko tona foha ʼaia ʼe ko tana ʼuluaki tamasiʼi.* Pea ʼe ko ia ʼae ʼe tonu ke ina maʼu te ʼuhiga ʼuluaki tupu.+

18 “Kapau ʼe maʼu e he tagata hona foha ʼe uigataʼa mo agatuʼu, pea ʼe mole fakalogo ki ai peʼe ki tana faʼe,+ pea kapau ʼe nā faiga ke nā akonakiʼi kae ʼe mole fia fakalogo kia naua,+ 19 ʼe nā toʼo anai ia ia ʼo ʼave ki te kau takitaki ʼi te matapa ʼo tona kolo, 20 pea ʼe nā ui anai ki te kau takitaki ʼo tona kolo: ‘Ko tamā tama ʼaeni ʼe uigataʼa mo agatuʼu, pea ʼe mole fia fakalogo mai kia maua. ʼE kai fakavale+ mo inu fakavale.’+ 21 Pea ʼe tuki makaʼi anai ia ia e te ʼu tagata fuli ʼo tona kolo ke mate. Koia, ʼe tonu ke kotou pulihi ʼi te lotolotoiga ʼo koutou te tagata ʼae ʼe agakovi, pea ʼe logo anai ia Iselaele katoa ki ai pea ʼe natou matataku anai.+

22 “Kapau ʼe fai e he tagata he agahala ʼe tuha ke fakatuʼā ki te mate, pea neʼe matehi+ pea neʼe ke tautau ia ia ki he pou,+ 23 ʼe mole tonu anai ke tuku tona sino ke tautau ʼi te pou ʼi te po katoa.+ Kailoa, kae ʼe tonu anai ke ke ʼavaifo ia ia ʼi te ʼaho pe ʼaia, koteʼuhi ko te tagata ʼae ʼe tautau ʼi he pou ʼe fakalialia ki ai te ʼAtua.*+ Pea ʼe mole tonu anai ke ke moamoagaʼi te kele ʼae ʼe foaki atu e Sehova tou ʼAtua ko hou tofiʼa.+

22 “Kapau ʼe ke sio ʼe hehe te vitulo peʼe ko te ovi ʼo tou tehina, ʼe mole tonu anai ke ke tuku ke alu.+ ʼE tonu anai ke ke ʼave ki tou tehina. 2 Kae kapau ʼe nofo mamaʼo tou tehina peʼe mole ke iloʼi pe ʼa ai te manu, ke ke ʼave ki tou ʼapi, pea ke nofo mo koe ʼo kaku ki te haʼu ʼo tou tehina ʼo kumi tana manu. Pea ke ke liufaki age ki ai.+ 3 ʼE ke toe fai feia pe anai mo kapau ko hana asino, peʼe ko hona mutuʼi meʼa, peʼe ko hana meʼa pe neʼe puli pea neʼe ke maʼu. ʼE mole tonu anai ke ke fakalaka ohage ʼe mole ke tokagaʼi.

4 “Kapau ʼe ke sio ki te asino peʼe ko te vitulo ʼo tou tehina ʼe takoto ʼi te ala, ʼe mole tonu anai ke ke fakalaka ohage ʼe mole ke tokagaʼi. ʼE tonu anai ke ke tokoni ki tou tehina ʼo fakatuʼu ki ʼoluga tana manu.+

5 “ ʼE mole tonu anai ke tui e he fafine te ʼu mutuʼi meʼa ʼo he tagata, pea ʼe mole tonu anai ke tui e he tagata te ʼu mutuʼi meʼa ʼo he fafine. Ko ia ʼae ʼe ina fai te meʼa ʼaia ʼe fakalialia ki ai ia Sehova, tou ʼAtua.

6 “Kapau ʼe ke maʼu ʼi te ala he moeʼaga ʼo he manulele mo ʼona ʼuhi peʼe ko ʼona fua ʼi he fuʼu ʼakau peʼe ʼi te kele, pea ʼe fakamafana ia natou e tanatou faʼe, ʼe mole tonu anai ke ke ʼave te faʼe mo ʼona ʼuhi.+ 7 ʼE ke tuku anai ke alu te faʼe, kae ʼe feala anai ke ke ʼave te ʼu ʼuhi. Fai te faʼahi ʼaia ke fua lelei ai kia koe pea ke ke maʼuli fualoa.

8 “Kapau ʼe ke laga hou ʼapi, ʼe tonu anai ke ke fai he ʼa kaupa ʼi tou fuga fale,+ ke mole to ai he tahi pea mo tukugakoviʼi tou famili he neʼe hoko ai he ligi toto.

9 “ ʼE mole tonu anai ke ke nunusi he tahi age faʼahiga pulapula ʼi tau gaueʼaga vite.+ Kapau ʼe ke fai te faʼahi ʼaia, ʼe toʼo fakatahi anai te ʼu fua ʼo te pulapula ʼae neʼe ke nunusi pea mo te ʼu fua ʼo tau gaueʼaga vite ʼo foaki ki te sagatualio.

10 “ ʼE mole tonu anai ke ke haʼi fakatahi he vitulo mo he asino ki he ʼakau toho moka ke fuli te kele.+

11 “ ʼE mole tonu anai ke ke tui he ʼu mutuʼi meʼa neʼe fai ʼaki te fuluʼi ovi pea mo te lino.*+

12 “ ʼE tonu anai ke ke fai he ʼu kiʼi meʼa matalelei ke tautau ʼi te ʼu muliʼi meʼa ʼae ʼe fa ʼo te kie ʼae ʼe ke pulupulu ki ai.+

13 “Kapau ʼe ʼohoana he tagata mo he fafine, pea momoe mo ia, pea ki muli age, kua fehiʼa leva ki ai,* 14 pea ʼe ina tukugakoviʼi ia ia ʼi he aga ʼe kovi neʼe ina fai pea ʼe ina ʼulihi tona matagafua, ʼo ui: ‘Neʼe au ʼohoana mo te fafine ʼaeni, kae ʼi taku momoe mo ia, neʼe mole au sio ki te fakamoʼoni ʼae neʼe kei nofo taupoʼou,’ 15 ʼe tonu anai ke alu te tamai mo te faʼe ʼa te taʼahine ʼaia ki te matapa ʼo te kolo, ʼo fakaha ki te kau takitaki ia te fakamoʼoni ʼae neʼe kei nofo taupoʼou tanā taʼahine. 16 ʼE tonu anai ke ui age e te tamai ʼa te taʼahine ki te kau takitaki: ‘Neʼe au foaki toku ʼofafine ke ʼohoana mo te tagata ʼaia, kae ʼe fehiʼa te tagata ʼaia ki ai, 17 pea ʼe ina tukugakoviʼi ia ia ʼi he aga ʼe kovi neʼe ina fai, ʼo ina ui mai: “Neʼe mole au sio ki te fakamoʼoni ʼae neʼe kei nofo taupoʼou tou ʼofafine.” Kae koʼeni te fakamoʼoni ʼae neʼe kei nofo taupoʼou toku ʼofafine.’ Pea ʼe nā folahi anai te kie ia muʼa ʼo te kau takitaki ʼo te kolo. 18 ʼE ʼave anai e te kau takitaki ʼo te kolo+ te tagata ʼaia ʼo ta.+ 19 ʼE natou fakatuʼā anai ia ia ke ina li he ʼu sikele siliva ʼe 100* pea ʼe natou foaki age anai ki te tamai ʼa te taʼahine, koteʼuhi neʼe ʼulihi e te tagata te matagafua ʼo he taʼahine ʼo Iselaele neʼe kei nofo taupoʼou.+ Pea ʼe nofo pe anai mo tona ʼohoana. ʼE mole feala anai ke mavete mo ia ʼi te temi ʼae ʼe kei maʼuli ai.

20 “Kae kapau ʼe moʼoni tona tukugakoviʼi ʼaia, pea ʼe mole he fakamoʼoni neʼe kei nofo taupoʼou te taʼahine, 21 ʼe ʼave anai te taʼahine ki te huʼaga ʼo te ʼapi ʼo tana tamai. Pea ʼe tuki makaʼi anai ia ia e te kau tagata ʼo tona kolo ke mate, he neʼe ina fai he aga fakaufiufi+ ʼi Iselaele ʼi tana fai he ʼu felaveʼi fakasino heʼe ʼaoga* ʼi te ʼapi ʼo tana tamai.+ ʼE tonu ke kotou pulihi ʼi te lotolotoiga ʼo koutou ia ia ʼae ʼe agakovi.+

22 “Kapau ʼe maʼu atu he tagata ʼe momoe mo te ʼohoana ʼo he tahi age tagata, ʼe tonu anai ke matehi ia naua toko lua, te tagata ʼae neʼe momoe mo te fafine, ʼo feia mo te fafine ʼaia.+ ʼE tonu ke kotou pulihi ʼi Iselaele te tagata ʼae ʼe agakovi.

23 “Kapau kua fakapapau ʼohoana he taʼahine kei nofo taupoʼou mo he tagata, pea ʼe felaveʼi mo he tahi age tagata ʼi te kolo pea nā momoe, 24 ʼe kotou ʼave anai ia naua toko lua ki te matapa ʼo te kolo ʼaia ʼo tuki makaʼi ke nā mamate, ʼei, te taʼahine he neʼe mole kalaga ʼi te kolo, ʼo feia mo te tagata he neʼe ina fakalainoaʼi te ʼohoana ʼo tona tatau.+ ʼE tonu ke kotou pulihi ʼi te lotolotoiga ʼo koutou te tagata ʼae ʼe agakovi.

25 “Kae kapau neʼe felaveʼi te tagata mo te taʼahine ʼae kua fakapapau ʼohoana ʼi tuʼa atu ʼo te kolo pea neʼe fakakinauʼi e te tagata ia te taʼahine ke nā momoe, ʼe tonu pe anai ke matehi te tagata ʼae neʼe momoe mo ia, 26 kae ʼe mole tonu ke kotou fai he meʼa ki te taʼahine. Neʼe mole fai e te taʼahine he agahala ʼe tuha mo te mate. ʼE hage pe te aluʼaga ʼaia ko te aluʼaga ʼae ʼe hoko moka ʼohofi e he tagata tona tatau ʼo matehi.+ 27 Koteʼuhi neʼe felaveʼi te tagata mo te taʼahine ʼaia ʼi tuʼa atu ʼo te kolo, pea neʼe kalaga te taʼahine ʼaia kua fakapapau ʼohoana, kae neʼe mole he tahi moʼona haofaki.

28 “Kapau ʼe felaveʼi he tagata mo he taʼahine kei nofo taupoʼou heʼeki fakapapau ʼohoana, pea ʼe ina fakakinauʼi ia ia ke nā momoe,* pea kapau ʼe maʼu atu ia naua,+ 29 ʼe tonu anai ke foaki e te tagata ʼae neʼe momoe mo te taʼahine he ʼu sikele siliva ʼe 50 ki te tamai ʼa te taʼahine, pea ʼe ʼohoana anai mo ia.+ ʼE mole feala anai ke mavete mo ia ʼi te temi ʼae ʼe kei maʼuli ai, he neʼe ina fakalainoaʼi ia ia.

30 “ ʼE mole tonu anai ke ʼohoana he tagata mo te ʼohoana ʼo tana tamai, ke mole ina fakalainoaʼi ai tana tamai.+

23 “ ʼE mole feala anai ke kau he tagata kua maumauʼi peʼe kua toʼo tona koga tapu ki te hahaʼi ʼa Sehova.+

2 “ ʼE mole feala anai ke kau he fanau taka ki te hahaʼi ʼa Sehova.+ Pea ʼe mole feala anai ke kau he tahi ʼo tona hologa ki te hahaʼi ʼa Sehova, ʼo kaku ki te hogofulu taʼiake.

3 “ ʼE mole feala anai ke kau te kau Amone peʼe ko te kau Moape ki te hahaʼi ʼa Sehova.+ Pea ʼe mole feala anai ke kau he tahi ʼo ʼonatou hologa ki te hahaʼi ʼa Sehova, ʼo kaku ki te hogofulu taʼiake, 4 koteʼuhi neʼe mole natou tokoni atu ʼo foaki kia koutou he ʼu foʼi pane mo he vai ʼi takotou mavae mai Esipito,+ pea neʼe natou totogi ia Palaame, te foha ʼo Peoli mai Petoli, ʼi Mesopotamia ke faitutuku kia koutou.+ 5 Kae neʼe mole fia fagono ia Sehova, tokotou ʼAtua kia Palaame.+ Kae neʼe fakaliliu e Sehova tokotou ʼAtua ia te faitutuku ko hokotou tapuakina,+ he neʼe ʼofa ia Sehova tokotou ʼAtua kia koutou.+ 6 ʼE mole tonu anai ke kotou faiga ke natou maʼuʼuli fimalie pea mo maʼu koloa, ʼi tokotou maʼuli katoa.+

7 “ ʼE mole tonu ke kotou fehihiʼa ki he Etome, he ʼe ko tokotou tehina.+

“ ʼE mole tonu ke kotou fehihiʼa ki he Esipito, he neʼe kotou maʼuʼuli ohage ko ni matapule ʼi tona fenua.+ 8 ʼE feala anai ke kau ʼonatou mokoliha, ia te tolu taʼiake ki te hahaʼi ʼa Sehova.

9 “Ka kotou fakatuʼu tokotou nofoʼaga ke kotou tauʼi ʼokotou fili, ʼe tonu anai ke kotou tekeʼi te meʼa ʼae ʼe kovi.*+ 10 Kapau ʼe heʼe maʼa he tagata he neʼe alu tona huʼa vai ʼi te poʼuli,+ ʼe tonu anai ke alu ki tuʼa atu ʼo te nofoʼaga pea ke mole toe liliu mai. 11 ʼI te afiafi, ʼe tonu anai ke maʼanu, pea ʼe feala anai hana toe liliu ki te nofoʼaga ʼi te ʼosi to ʼo te laʼa.+ 12 ʼE kotou tuku keheʼi anai he koga meʼa* ʼi tuʼa atu ʼo te nofoʼaga, ke kotou olo ʼo faifekau ai. 13 ʼE maʼu anai ʼi ʼakotou meʼa gaue he huo takele. ʼE kotou fakaʼaogaʼi anai moʼo keli ʼo he luo, ʼi muʼa ʼo takotou sike. Pea hili ʼaia, ʼe kotou tanu anai ʼakotou faifekau. 14 Koteʼuhi ʼe fealuʼaki ia Sehova tokotou ʼAtua ʼi tokotou nofoʼaga,+ ke ina haofaki koutou pea mo tuku ki ʼokotou nima ʼokotou fili. Pea ʼe tonu anai ke maʼoniʼoni tokotou nofoʼaga,+ ke mole sio ai ki he meʼa ʼe kovi ʼo mole kei haʼele ai mo koutou.

15 “Kapau ʼe hola he tagata kaugana mai tona pule ʼo alu atu kia koutou, ʼe mole tonu anai ke kotou toe ʼave ia ia ki tona pule. 16 ʼE feala anai ke nofo mo koutou ʼi he koga meʼa pe ʼe ina filifili ʼi ʼokotou kolo, ʼei, ʼi he faʼahi pe ʼe ina leleiʼia. ʼE mole tonu ke kotou gaohi koviʼi ia ia.+

17 “ ʼE mole feala anai ke liliu te ʼu taʼahine ʼo Iselaele ko ni paomutu ʼo te fale lotu,*+ pea ʼe mole feala anai ke liliu te ʼu foha ʼo Iselaele ko ni paomutu ʼo te fale lotu.+ 18 ʼE mole tonu ke kotou ʼaumai te totogi ʼae ʼe foaki ki he paomutu, pe ʼe ko he fafine peʼe ko he tagata,* ki te fale ʼo Sehova tokotou ʼAtua, moʼo fakahoko ʼaki hakotou fakapapau, he ʼe ko he ʼu meʼa fakalialia ʼaia kia Sehova tokotou ʼAtua.

19 “Ka kotou foaki ki tokotou tehina he falā, peʼe ko he meʼa kai, peʼe ko he meʼa pe, ʼe mole tonu ke kotou kole age ke ina huʼi atu mo hona tupu.+ 20 ʼE feala anai ke kotou fakatotogi he tupu ki he matapule,+ kae ʼe mole tonu ke kotou fai feia ki tokotou tehina,+ ke tapuakiʼi ai koutou e Sehova tokotou ʼAtua ʼi te ʼu meʼa fuli ʼae ʼe kotou fai anai, ʼi te fenua ʼae ka kotou maʼu.+

21 “Kapau ʼe kotou fai he fakapapau kia Sehova tokotou ʼAtua,+ ʼaua naʼa kotou fakatuatuai ʼi tona fakahoko.+ He ʼe mahino papau ia, ʼe fakamaʼua atu anai e Sehova tokotou ʼAtua ke kotou fakahoko. Pea ʼe kotou agahala anai mo kapau ʼe mole kotou fakahoko.+ 22 Kae kapau ʼe mole kotou fai he fakapapau, ʼe mole kotou agahala anai.+ 23 ʼE kotou fai anai te meʼa ʼae neʼe kotou ui,+ pea ʼe tonu anai ke kotou fakahoko he fakapapau neʼe kotou fai, ohage ko he meʼa ʼofa ʼe foaki kia Sehova tokotou ʼAtua ʼaki he lotolelei.+

24 “Kapau ʼe kotou olo ki te gaueʼaga vite ʼo tokotou tatau, ʼe feala anai hakotou kai ki te ʼu fuaʼi vite ʼo kaku ki takotou makokona, kae ʼe mole tonu anai ke kotou fafaʼo ni foʼi vite ki takotou kato.+

25 “Kapau ʼe kotou olo ki te gaueʼaga fulumeto ʼo tokotou tatau, ʼe feala anai ke kotou fusi te fulumeto ʼae kua matutuʼa, kae ʼe mole tonu anai ke kotou tuʼusi te fulumeto ʼo tokotou tatau ʼaki he hele piko.+

24 “Kapau ʼe ʼohoana he tagata mo he fafine kae ʼe mole kei ina leleiʼia ia ia he neʼe ina iloʼi neʼe ina fai he aga fakaufiufi, ʼe tonu anai ke ina fai he tohi mavete,+ ʼo fakatoʼo age ki te fafine, pea ke ina fakamavae ia ia ʼi tona ʼapi.+ 2 ʼI tana ʼosi mavae ʼaia, ʼe feala pe anai ke toe ʼohoana mo he tahi age tagata.+ 3 Kapau ʼe toe fehiʼa te tagata ʼaia kia ia,* pea ʼe ina fai he tohi mavete ʼo fakatoʼo age ki te fafine, pea ʼe ina fakamavae ia ia ʼi tona ʼapi, peʼe kapau ʼe mate te tagata ʼaia, 4 ʼe mole feala anai ki tona ʼuluaki ʼohoana, ʼae neʼe ina fakamavae ia ia, ke toe ʼohoana mo ia, koteʼuhi kua heʼe maʼa te fafine ʼaia. ʼE ko he aga fakalialia ʼaia kia Sehova. Koia, ʼe mole tonu ke kotou ʼulihi ʼaki he agahala te fenua ʼae ʼe foaki atu e Sehova tokotou ʼAtua ko hokotou tofiʼa.

5 “Kapau neʼe hoki ʼohoana age pe he tagata, ʼe mole kau anai ki he foʼi kautau peʼe foaki age ki ai he tahi ʼu gaue. ʼE ʼateaina anai mai te ʼu faʼahi fuli ʼaia lolotoga he taʼu katoa, pea ʼe nofo anai ʼi tona ʼapi ʼo fakafiafiaʼi tona ʼohoana.+

6 “ ʼE mole toʼo anai e he tahi te meʼa momosi fulumeto peʼe ko te maka momosi fulumeto ʼa he tahi age, ʼo nofo mo ia ʼo kaku ki tana huʼi age tona maʼua,+ he ʼe ina toʼo ai te meʼa ʼae ʼe ʼaoga ke taupau ʼaki tona maʼuli.*

7 “Kapau ʼe iloʼi neʼe ʼave fakamalohi e he tagata hona tehina Iselaele pea neʼe ina gaohi koviʼi pea mo ina fakatau,+ ʼe tonu anai ke matehi te tagata ʼaia.+ ʼE tonu ke kotou pulihi ʼi te lotolotoiga ʼo koutou te tagata ʼae ʼe agakovi.+

8 “Kapau ʼe kilia* he tahi, kotou tokakaga fakalelei ʼo mulimuli ki te ʼu meʼa fuli ʼae ʼe fakatotonu atu anai e te kau pelepitelo Levite.+ Kotou tokakaga ʼo fai te ʼu meʼa fuli pe ʼae neʼe au fakatotonu age kia natou. 9 Kotou manatuʼi te meʼa ʼae neʼe fai e Sehova tokotou ʼAtua kia Miliamu ʼi takotou faifagona, ʼi takotou ʼosi mavae mai Esipito.+

10 “Kapau ʼe tuʼu maʼua tou tatau kia koe+ he neʼe ke foaki age ki ai he faʼahiga meʼa pe, ʼe mole tonu anai ke ke ulu ki tona ʼapi ʼo toʼo mai ai te meʼa ʼae neʼe ina ui atu ʼe ko he fakamoʼoni ʼo tana huʼi atu tona maʼua. 11 Kae ʼe ke tuʼu anai ʼi tuʼa, pea ʼe alu atu anai te tagata ʼae ʼe tuʼu maʼua atu kia koe mo te meʼa ʼaia. 12 Kae kapau ʼe masiva te tagata, ʼe mole tonu anai ke ke alu ʼo moe kae kei ke nofo pe mo te pulupulu ʼae neʼe ina foaki atu, ʼae ko he fakamoʼoni ʼe ina huʼi atu anai tona maʼua.+ 13 ʼE tonu anai ke ke liufaki age ki ai tona pulupulu ʼi te ʼosi to ʼo te laʼa, ʼe alu anai ʼo moe mo tona pulupulu,+ pea ʼe ina tapuakiʼi anai koe. Pea ʼe lau anai ʼe ke faitotonu ia muʼa ʼo Sehova tou ʼAtua.

14 “ ʼE mole tonu ke ke kakaʼi te totogi ʼo hau tagata gaue ʼe nofo ʼi te faigataʼaʼia pea mo masiva, tatau aipe pe ʼe ko hou tehina peʼe ko he matapule ʼe maʼuli ʼi tou fenua, ʼi ʼou kolo.*+ 15 ʼE ke foaki age anai kia ia te totogi ʼo tana gaue,+ ʼi muʼa ʼo te to ʼo te laʼa, koteʼuhi ʼe nofo ʼi te faigataʼaʼia pea ʼe fakalogo tona maʼuli* ki tona totogi ʼaia. Kapau ʼe mole ke fai te faʼahi ʼaia, ʼe tagi anai kia Sehova, pea ʼe ke lakahala anai.+

16 “ ʼE mole tonu anai ke matehi ia te ʼu tamai ʼuhi ko te meʼa ʼae ʼe fai e ʼanatou fanau, pea ʼe mole tonu anai ke matehi ia te ʼu fanau ʼuhi ko te meʼa ʼae ʼe fai e ʼanatou tamai.+ ʼE matehi pe anai he tahi ʼuhi ko tana agahala.+

17 “ ʼE tonu ke ke faitotonu moka ke fakamauʼi te aluʼaga ʼo ʼuhiga mo te matapule peʼe ko te fanau ʼae ʼe hala mo tamai,+ pea ʼe mole tonu ke ke toʼo te pulupulu ʼo he fafine vitua ohage ko he fakamoʼoni ʼe ina huʼi atu anai tona maʼua.+ 18 Ke ke manatuʼi neʼe ke liliu ko he kaugana ʼi Esipito, pea neʼe totogi koe e Sehova tou ʼAtua.+ Ko te tupuʼaga la ʼaia ʼo taku fakatotonu atu ke ke fai te faʼahi ʼaia.

19 “Ka ke utu te fulumeto ʼo tau gaueʼaga, pea kapau ʼe ke galoʼi he fuhiga fulumeto, ʼe mole tonu anai ke ke toe liliu mai ʼo toʼo. ʼE ke tuku anai maʼa te matapule, mo te fanau ʼae ʼe hala mo tamai, pea mo te fafine vitua,+ ke feala ai hou tapuakiʼi e Sehova tou ʼAtua ʼi te ʼu meʼa fuli ʼae ʼe ke fai.+

20 “Ka ke toli te ʼu fuʼu oliveto, ʼe mole tonu anai ke ke toe liliu mai ʼo toli. ʼE ke tuku anai te ʼu oliveto ʼae kei toe maʼa te matapule, mo te fanau ʼae ʼe hala mo tamai, pea mo te fafine vitua.+

21 “Ka ke tanaki te ʼu fuaʼi vite ʼo tau gaueʼaga vite, ʼe mole tonu anai ke ke toe liliu mai ʼo toli te ʼu foʼi vite ʼae kei toe. ʼE ke tuku anai maʼa te matapule, mo te fanau ʼae ʼe hala mo tamai, pea mo te fafine vitua. 22 Ke ke manatuʼi neʼe ke liliu ko he kaugana ʼi Esipito. Ko te tupuʼaga la ʼaia ʼo taku fakatotonu atu ke ke fai te faʼahi ʼaia.

25 “Ka fihi ni tagata, ʼe feala anai ke nā olo kia muʼa ʼo te kau tuʼi fakamau,+ pea ʼe natou fakamauʼi anai naua ʼo natou tala te faitotonu ʼa te tagata ʼae neʼe mole ina fai he meʼa ʼe kovi pea mo te hala ʼa te tagata agakovi.+ 2 Ka tonu ke ta te tagata agakovi,+ ʼe fakatakoto anai ia ia e te tuʼi fakamau ʼo fakafoʼohifo, pea ʼe ta anai ia ia ʼi ʼona muʼa. ʼE mulimuli pe anai te lahi ʼo te ʼu foʼi ta ki te agakovi ʼae neʼe ina fai. 3 ʼE feala ke ta ia ia ʼo kaku kia foʼi ta ʼe 40,+ kae ʼe mole laka atu anai. He ʼe kapau ʼe hoko atu tona ta, ʼe fakalainoaʼi anai tou tehina ʼi ʼou muʼa.

4 “ ʼE mole tonu ke ke fakamaʼu te gutu ʼo te vitulo moka ina malamalaki te fulumeto.*+

5 “Kapau ʼe maʼuʼuli fakatahi he fale tau tehina pea mate he tahi ia natou kae mole hona foha, ʼe mole tonu anai ke ʼohoana te fafine ʼo ia ʼae kua mate mo he tagata ʼe mole kau ʼi te famili. ʼE tonu anai ke alu hona holotua ʼo ʼohoana mo ia, pea ke ina fakahoko ai tona maʼua ʼi tona ʼuhiga holotua.+ 6 ʼE foaki anai ki te ʼuluaki tamasiʼi ʼae ka fanauʼi e te fafine te higoa ʼo te tagata ʼae kua mate,+ ke mole puli ai tona higoa ʼi Iselaele.+

7 “Kae kapau ʼe mole fia ʼohoana te tagata ʼaia mo tona holotua, ʼe alu anai te ʼohoana ʼo tona tehina ʼae kua mate ki te matapa ʼo te kolo, ʼo ui age ki te kau takitaki: ‘ ʼE mole loto e toku holotua ke tuku holo te higoa ʼo tona tehina ʼi Iselaele. ʼE mole ina fia fakahoko tona maʼua ʼi tona ʼuhiga holotua pea mo ʼohoana mo au.’ 8 ʼE tonu anai ke pauʼi e te kau takitaki ʼo tona kolo ia te tagata ʼaia, ʼo palalau age ki ai. Kae kapau ʼe hoko atu pe tana fakafisi ʼo ui: ‘ ʼE mole au fia ʼohoana mo ia,’ 9 ʼe haʼu anai tona holotua ki ai ia muʼa ʼo te kau takitaki, ʼo huʼi te foʼi sulie ʼo te tagata ʼaia,+ mo ʼanuhi tona fofoga pea mo ui: ‘ ʼE ko te meʼa ʼaia ʼe tonu ke fai ki te tagata ʼae ʼe mole ina fia taupau te hologa ʼo tona tehina.’ 10 Hili ʼaia, ʼe iloʼi anai ʼi Iselaele ko te higoa ʼo tona famili* ʼe ko ‘Te fale ʼo ia ʼae neʼe huʼi tona foʼi sulie.’

11 “Kapau ʼe fuhu ni tagata ʼe lua, pea ʼe haʼu te ʼohoana ʼo he tahi ia naua ʼo puipui tona ʼohoana pea mo puke te koga tapu ʼo te tagata ʼae ʼe ina ta tona ʼohoana, 12 ʼe tonu anai ke ke tuʼusi tona nima. ʼE mole tonu anai ke ke lotomanavaʼofa ki ai.

13 “ ʼE mole tonu anai ke maʼu ʼi tau kato ni foʼi maka fua meʼa kehekehe ʼe lua,+ ko he foʼi maka ʼe lahi mo he foʼi maka ʼe veliveli. 14 ʼE mole tonu anai ke maʼu ʼi tou ʼapi ni ʼaiʼaga meʼa kehekehe ʼe lua moʼo fua ʼaki te fulumeto,*+ ko he ʼaiʼaga meʼa ʼe lahi mo he ʼaiʼaga meʼa ʼe veliveli. 15 ʼE tonu anai ke totonu tuʼumaʼu pe tau foʼi maka ʼae ko he meʼa fua pea mo tau ʼaiʼaga meʼa moʼo fua ʼaki te fulumeto, ke feala hau maʼuli fualoa ʼi te fenua ʼae ʼe foaki atu e Sehova tou ʼAtua.+ 16 Koteʼuhi ko he tahi ʼe agakaka ʼo ina fai te ʼu meʼa ʼaia, ʼe ko he meʼa fakalialia ia kia Sehova tou ʼAtua.+

17 “Kotou manatuʼi te meʼa ʼae neʼe fai e te kau Amaleke kia koutou ʼi takotou faifagona, ʼi takotou ʼosi mavae mai Esipito:+ 18 neʼe natou ʼomai ʼo fakafetaulaki kia koutou ʼi te ala pea mo ʼohofi mai muli ia natou fuli ʼae neʼe haʼele tuai, ʼi te temi ʼae neʼe kotou gaʼegagaʼe mo vaivavai ai. Neʼe mole natou manavasiʼi ki te ʼAtua. 19 Koia, ka foaki atu e Sehova tokotou ʼAtua te tokalelei, ʼo ina fakaʼateainaʼi koutou mai ʼokotou fili fuli ʼae ʼi ʼokotou tafaʼaki, ʼi te fenua ʼae ʼe foaki atu e Sehova tokotou ʼAtua ko hokotou tofiʼa,+ ʼe kotou pulihi anai te kau Amaleke ke mole toe manatuʼi natou ʼi te fuga ʼo te kele.*+ ʼE mole tonu ke kotou galoʼi te meʼa ʼaia.

26 “Ka ke hu leva ki te fenua ʼae ʼe foaki atu e Sehova tou ʼAtua ko hou tofiʼa, pea ke maʼu mo nofo ai, 2 ʼe ke toʼo anai he koga ʼo te ʼu ʼuluaki fua ʼo te taʼukai* fuli ʼo te fenua ʼae ʼe foaki atu e Sehova tou ʼAtua, ʼo fafaʼo ki he kato pea ʼe ke alu anai ki te koga meʼa ʼae ʼe filifili e Sehova tou ʼAtua ke fakakololiaʼi ai tona huafa.+ 3 Pea ʼe tonu anai ke ke alu ki te pelepitelo ʼae ʼe gaue ʼi te ʼu ʼaho ʼaia, ʼo ui age ki ai: ‘ ʼI te ʼaho nei, ʼe au fakaha kia Sehova totatou ʼAtua, kua au hu ki te fenua ʼae neʼe fakapapauʼi e Sehova ki ʼatatou kui ke ina foaki mai kia tatou.’+

4 “ ʼE toʼo anai e te pelepitelo ia te kato ʼae ʼi ʼou nima ʼo tuku ki te muʼa ʼaletale ʼo Sehova tou ʼAtua. 5 Pea ʼe ke ui anai ia muʼa ʼo Sehova tou ʼAtua: ‘Ko taku tamai neʼe ko he tagata Alamea+ pea neʼe maʼuli fealuʼaki.* Neʼe hifo leva ki Esipito+ ʼo maʼuli ai ohage ko he matapule, pea neʼe mole hahaʼi tona famili.+ Kae neʼe liliu ai ko he puleʼaga lahi, mo malohi pea mo kaugamalie.+ 6 Pea neʼe gaohi koviʼi mo fakamamahiʼi matou e te kau Esipito pea neʼe kovi ʼosi tomatou fakapopulaʼi e natou.+ 7 Koia neʼe matou kalaga ai kia te koe, Sehova te ʼAtua ʼo ʼamatou kui, pea neʼe ke logo Sehova ki ʼomatou leʼo, pea neʼe ke tokagaʼi tomatou mamahi, mo tomatou kinakina pea mo tomatou gaohi koviʼi.+ 8 Sehova e, neʼe ke fakamavae leva matou mai Esipito ʼaki tou nima malohi mo tou mafimafi,+ pea ʼaki he ʼu gaue fakamataku, mo he ʼu fakailoga pea mo he ʼu milakulo.+ 9 Pea neʼe ke taki mai matou ki te koga meʼa ʼaeni pea ke foaki mai te fenua ʼaeni, ko he fenua ʼe tafe ai te huʼa pipi mo te meli.+ 10 ʼI te lakaga nei, Sehova e, neʼe au ʼaumai te ʼu ʼuluaki fua ʼo te kele ʼae neʼe ke foaki mai.’+

“ ʼE tonu anai ke ke tuku te kato ʼaia ia muʼa ʼo Sehova tou ʼAtua, pea mo ke tulolo ia muʼa ʼo Sehova tou ʼAtua. 11 ʼE ke fakafiafia anai mo te Levite pea mo te matapule ʼae ʼe nofo ʼi te lotolotoiga ʼo koutou, ʼi te ʼu lelei fuli ʼae neʼe foaki atu e Sehova tou ʼAtua, kia koe mo tou loto fale.+

12 “Ka ke ʼosi tanaki te vahe tahi ki te hogofulu+ ʼo tau taʼukai ʼi te tolu taʼu, ia te taʼu ʼo te vahe tahi ki te hogofulu, ʼe ke foaki anai te vahe ʼaia ki te Levite, mo te matapule, mo te fanau ʼae ʼe hala mo tamai, pea mo te fafine vitua. ʼE natou kakai anai ʼi ʼou kolo* ʼo kaku ki tanatou makokona.+ 13 Pea ʼe ke ui anai ia muʼa ʼo Sehova tou ʼAtua: ‘Kua au toʼo te vahe taputapu mai toku ʼapi ʼo foaki ki te Levite, mo te matapule, mo te fanau ʼae ʼe hala mo tamai, pea mo te fafine vitua,+ ohage pe ko tau fakatotonu mai. Neʼe mole au maumauʼi peʼe au meʼa noaʼi ʼau fakatotonu. 14 Neʼe mole au kai he meʼa taputapu lolotoga toku temi putu, pea neʼe mole au toʼo ʼi ʼoku nima he meʼa taputapu kae au heʼe maʼa, pea neʼe mole au foaki he meʼa maʼa te kau mate. Neʼe au fakalogo ki te leʼo ʼo Sehova toku ʼAtua, pea neʼe au fai te ʼu meʼa fuli ʼae neʼe ke fakatotonu mai. 15 ʼI te lakaga nei, ke ke sio ifo mai selo, mai tou nofoʼaga maʼoniʼoni, pea ke ke tapuakiʼi ia Iselaele tau hahaʼi pea mo te fenua ʼae neʼe ke foaki mai kia matou,+ ohage pe ko tau fakapapauʼi ki ʼamatou kui,+ ʼei te fenua ʼae ʼe tafe ai te huʼa pipi mo te meli.’+

16 “ ʼI te ʼaho nei, ʼe fakatotonu atu e Sehova tou ʼAtua ke ke maʼuliʼi te ʼu lekula mo te ʼu lao ʼaia. ʼE tonu anai ke ke taupau pea mo mulimuli ki ai ʼaki tou loto katoa+ mo tou maʼuli* katoa. 17 ʼI te ʼaho nei, kua ke maʼu mai ia Sehova te fakapapau ʼaeni: ʼE liliu anai ko tou ʼAtua pea ʼe tonu anai ke ke haʼele ʼi ʼona ala mo mulimuli ki ʼana lekula,+ mo ʼana fakatotonu+ pea mo ʼana lao,+ pea mo fakalogo ki tona leʼo. 18 Pea ʼi te ʼaho nei, neʼe ke fai te fakapapau ʼaeni kia Sehova: ʼE ke liliu anai ko tana hahaʼi, ko tona koloa makehe,+ ohage pe ko tana fakapapauʼi atu, pea ʼe ke mulimuli anai ki ʼana fakatotonu fuli. 19 Pea ʼe ina hikihiki anai ia koe ʼi te ʼu puleʼaga fuli ʼae neʼe ina faʼu,+ ʼo ke maʼu ai te fakavikiviki, mo te logologona pea mo te kololia mo kapau ʼe ke liliu ko he hahaʼi maʼoniʼoni maʼa Sehova tou ʼAtua,+ ohage pe ko tana fakapapau.”

27 Pea neʼe tuʼu ia Moisese mo te kau takitaki ʼo Iselaele ia muʼa ʼo te hahaʼi. Neʼe ui e Moisese: “Kotou mulimuli ki te ʼu fakatotonu fuli ʼae ʼe au foaki atu kia koutou ʼi te ʼaho nei. 2 Pea ʼi te ʼaho ʼae ka kotou fakalaka ai ʼi te Solotane ʼo hu ki te fenua ʼae ʼe foaki atu e Sehova tokotou ʼAtua, ʼe kotou filifili anai he ʼu foʼi maka lalahi pea mo vali ki ai te lahe.+ 3 Pea ʼe kotou tohi anai ʼi ai te ʼu folafola fuli ʼo te Lao ʼaeni moka kotou ʼosi fakalaka ʼi te Solotane, ke feala ai hakotou hu ki te fenua ʼae ʼe foaki atu e Sehova tokotou ʼAtua, ko he fenua ʼe tafe ai te huʼa pipi mo te meli, ohage pe ko tona fakapapauʼi atu e Sehova, te ʼAtua ʼo ʼakotou kui.+ 4 ʼI takotou ʼosi fakalaka ʼi te Solotane, ʼe kotou fakatuʼu anai te ʼu foʼi maka ʼaia ʼi te Moʼuga ʼo Epale+ pea ʼe kotou vali anai ʼaki te lahe, ohage pe ko taku fakatotonu atu kia koutou ʼi te ʼaho nei. 5 ʼE kotou toe laga anai ʼi ai he ʼaletale maʼa Sehova tokotou ʼAtua, ia he ʼaletale maka. ʼE mole kotou fakaʼaogaʼi anai he ʼu meʼa gaue ukamea moʼo taʼataʼaga te ʼu foʼi maka ʼo te ʼaletale.+ 6 ʼE kotou laga anai te ʼaletale ʼo Sehova tokotou ʼAtua, ʼaki he ʼu maka neʼe mole taʼataʼaga. ʼE kotou momoli anai ʼi ai ni holokoseta kia Sehova tokotou ʼAtua. 7 ʼE tonu anai ke kotou momoli he ʼu sakilifisio ʼo te tokalelei*+ pea mo kai ʼi te koga meʼa ʼaia,+ pea ʼe kotou fakafiafia anai ia muʼa ʼo Sehova tokotou ʼAtua.+ 8 Pea ʼe kotou tohi fakalelei anai ʼi te ʼu foʼi maka te ʼu folafola fuli ʼo te Lao ʼaeni.”+

9 Neʼe ui leva e Moisese mo te kau pelepitelo Levite ki Iselaele katoa: “Hahaʼi ʼo Iselaele, kotou fakalogologo pea mo fagono mai. Kua kotou liliu ʼi te ʼaho nei ko te hahaʼi ʼa Sehova tokotou ʼAtua.+ 10 ʼE tonu anai ke kotou fakalogo ki te leʼo ʼo Sehova tokotou ʼAtua, pea mo maʼuliʼi ʼana fakatotonu+ mo ʼana lekula ʼae ʼe au foaki atu kia koutou ʼi te ʼaho nei.”

11 ʼI te ʼaho ʼaia, neʼe fakatotonu e Moisese ki te hahaʼi: 12 “ ʼI takotou ʼosi fakalaka ʼi te Solotane, ʼe tutuʼu anai te ʼu telepi ʼaeni ʼi te Moʼuga ʼo Kalisimi,+ ʼo tapuakiʼi te hahaʼi: ko te ʼu telepi ʼo Simeone, mo Levi, mo Suta, mo Isakale, mo Sosefo pea mo Pesamino. 13 Pea ʼe tutuʼu anai te ʼu telepi ʼaeni ʼi te Moʼuga ʼo Epale,+ ʼo tala te malaʼia: ko te ʼu telepi ʼo Lupeni, mo Kate, mo Asele, mo Sepulone, mo Tane pea mo Nefetali. 14 Pea ʼe ui anai e te kau Levite ki te hahaʼi fuli ʼo Iselaele ʼaki he leʼo lahi:+

15 “ ‘Malaʼia te tagata ʼae ʼe ina fai he fakatata neʼe togi+ peʼe ko he fakatata ukamea,*+ pea mo ina fufu. Ko te meʼa ʼaia ʼe fai e he tagata tufuga* ʼe ko he meʼa fakalialia ia kia Sehova.’+ (Pea ʼe tali anai e te hahaʼi fuli: ‘Ameni!’*)

16 “ ‘Malaʼia ia ia ʼae ʼe mole fakaʼapaʼapa ki tana tamai peʼe ko tana faʼe.’+ (Pea ʼe tali anai e te hahaʼi fuli: ‘Ameni!’)

17 “ ‘Malaʼia ia ia ʼae ʼe ina hiki te tuʼakoi ʼo te kele ʼo tona vahaʼa fale.’+ (Pea ʼe tali anai e te hahaʼi fuli: ‘Ameni!’)

18 “ ‘Malaʼia ia ia ʼae ʼe ina fakahehe he tahi ʼe kivi.’+ (Pea ʼe tali anai e te hahaʼi fuli: ‘Ameni!’)

19 “ ‘Malaʼia ia ia ʼae ʼe mole faitotonu moka ina fakamauʼi+ te matapule, peʼe ko te fanau ʼae ʼe hala mo tamai, peʼe ko te fafine vitua.’+ (Pea ʼe tali anai e te hahaʼi fuli: ‘Ameni!’)

20 “ ‘Malaʼia ia ia ʼae ʼe momoe mo te ʼohoana ʼo tana tamai, he ʼe ina fakalainoaʼi ai tana tamai.’+ (Pea ʼe tali anai e te hahaʼi fuli: ‘Ameni!’)

21 “ ‘Malaʼia ia ia ʼae ʼe momoe mo he manu.’+ (Pea ʼe tali anai e te hahaʼi fuli: ‘Ameni!’)

22 “ ‘Malaʼia ia ia ʼae ʼe momoe mo tona tokolua, ia te ʼofafine ʼo tana tamai peʼe ko te taʼahine ʼo tana faʼe.’+ (Pea ʼe tali anai e te hahaʼi fuli: ‘Ameni!’)

23 “ ‘Malaʼia ia ia ʼae ʼe momoe mo te faʼe ʼo tona ʼohoana.’+ (Pea ʼe tali anai e te hahaʼi fuli: ‘Ameni!’)

24 “ ‘Malaʼia ia ia ʼae ʼe ina lama ke ina matehi tona tatau.’+ (Pea ʼe tali anai e te hahaʼi fuli: ‘Ameni!’)

25 “ ‘Malaʼia ia ia ʼae ʼe ina tali he meʼa ʼofa neʼe foaki fakakaka age ke ina matehi* ai he tahi neʼe mole ina fai he meʼa ʼe kovi.’+ (Pea ʼe tali anai e te hahaʼi fuli: ‘Ameni!’)

26 “ ‘Malaʼia ia ia ʼae ʼe mole fakaʼapaʼapa pea ʼe mole ina maʼuliʼi te ʼu folafola ʼo te Lao ʼaeni.’+ (Pea ʼe tali anai e te hahaʼi fuli: ‘Ameni!’)

28 “Pea kapau ʼe kotou fakalogo ki te leʼo ʼo Sehova tokotou ʼAtua, ʼo kotou tokakaga fakalelei ʼo mulimuli ki ʼana fakatotonu fuli ʼae ʼe au foaki atu kia koutou ʼi te ʼaho nei, ʼe mahino ia, ʼe hikihiki anai koutou e Sehova tokotou ʼAtua, ʼi te ʼu puleʼaga fuli ʼo te kele.+ 2 ʼE kotou maʼu anai te ʼu tapuakina fuli ʼaeni pea ʼe tapuakiʼi lahi anai koutou,+ koteʼuhi ʼe kotou fakalogo tuʼumaʼu pe ki te leʼo ʼo Sehova tokotou ʼAtua:

3 “ ʼE tapuakina anai koutou ʼi te kolo, pea ʼe tapuakina anai koutou ʼi te gaueʼaga.+

4 “ ʼE tapuakina anai ʼakotou fanau+ pea mo te fua ʼo ʼakotou gaueʼaga pea mo te ʼu ʼuhi ʼo takotou faga manu, te ʼu ʼuhi ʼo ʼakotou pipi mo te ʼu ʼuhi ʼo ʼakotou ovi.+

5 “ ʼE tapuakina anai koutou he ʼe fonu pe anai takotou kato+ pea mo te ipu ʼae ʼe kotou natu ai te falena.+

6 “ ʼE tapuakina anai koutou ʼi te ʼu gaue fuli ʼae ʼe kotou fai.

7 “ ʼE tuku atu anai e Sehova te malo ʼi ʼokotou fili, ʼae ʼe ʼomai ʼo tauʼi koutou.+ ʼE natou ʼomai anai ʼi he ala ʼe tahi ʼo ʼohofi koutou, kae ʼe natou feholaki anai ʼi ʼokotou muʼa ia ala kehekehe ʼe fitu.+ 8 ʼE fakatotonu anai e Sehova ke fakafonu ʼokotou fale tanakiʼaga meʼa+ pea ʼe tapuakina anai koutou ʼi te ʼu meʼa fuli ʼae ka kotou fai. ʼE ina tapuakiʼi moʼoni anai koutou ʼi te fenua ʼae ʼe foaki atu e Sehova tokotou ʼAtua. 9 ʼE fakaliliu anai koutou e Sehova ko tana hahaʼi maʼoniʼoni,+ ohage pe ko tana fakapapauʼi atu kia koutou,+ he ʼe kotou taupau tuʼumaʼu pe anai te ʼu fakatotonu ʼa Sehova tokotou ʼAtua, pea mo haʼele ʼi ʼona ala. 10 ʼE tonu anai ke tokagaʼi e te hahaʼi fuli ʼo te kele neʼe fakahigoaʼi koutou ki te huafa ʼo Sehova,+ pea ʼe natou matataku anai ia koutou.+

11 “ ʼE lahi anai te ʼu fanau ʼae ka foaki atu e Sehova, ʼo feia mo te faga manu pea ʼe toe lahi anai te ʼu fua ʼo takotou gaueʼaga,+ ʼi te fenua ʼae neʼe fakapapau e Sehova ki ʼakotou kui ke ina foaki atu.+ 12 ʼE avahi anai e Sehova te lagi, ohage ko te avahi e he tagata he fale ʼe tanaki ai he ʼu meʼa lelei, ke to ai te ʼua ʼi tokotou fenua ʼi tona temi totonu,+ pea ke tapuakiʼi ai koutou ʼi te ʼu meʼa fuli ʼae ʼe kotou fai. ʼE kotou foaki anai he ʼu meʼa ki ni puleʼaga ʼe kaugamalie, kae ʼe mole kotou kole anai he ʼu meʼa kia natou.+ 13 ʼE hikihiki anai koutou e Sehova ʼi ʼihi age hahaʼi pea ʼe mole ina tuku anai ke natou puleʼi koutou. ʼE kotou maʼoluga age anai+ ʼi ʼihi hahaʼi kae ʼe mole kotou malalo anai, mo kapau ʼe kotou fakalogo tuʼumaʼu pe ki te ʼu fakatotonu ʼa Sehova tokotou ʼAtua, ʼae ʼe au foaki atu kia koutou ʼi te ʼaho nei ke kotou mulimuli ki ai pea mo maʼuliʼi. 14 ʼE mole tonu anai ke kotou lituʼa ki te ʼu folafola fuli ʼae ʼe au foaki atu kia koutou ʼi te ʼaho nei, ʼo kotou olo ki te faʼahi mataʼu peʼe ki te faʼahi hema,+ ʼo muliʼi he tahi age ʼu ʼatua pea mo tauhi kia natou.+

15 “Kae kapau ʼe mole kotou fakalogo ki te leʼo ʼo Sehova tokotou ʼAtua, ʼo kotou tokakaga fakalelei ʼo maʼuliʼi ʼana fakatotonu fuli pea mo ʼana lekula ʼae ʼe au foaki atu kia koutou ʼi te ʼaho nei, ʼe hoko anai kia koutou te ʼu malaʼia fuli ʼaeni pea ʼe lahi anai ʼokotou malaʼia:+

16 “ ʼE kotou malaʼia anai ʼi te kolo, pea ʼe kotou malaʼia anai ʼi te gaueʼaga.+

17 “ ʼE kotou malaʼia anai ʼi te mole ʼi ai he meʼa ʼi takotou kato+ pea mo te natuʼaga falena.+

18 “ ʼE malaʼia anai ʼakotou fanau+ pea mo te ʼu fua ʼo takotou gaueʼaga, ʼo feia mo te ʼu ʼuhi ʼo takotou faga pipi pea mo takotou faga ovi.+

19 “ ʼE kotou malaʼia anai ʼi te ʼu meʼa fuli ʼae ka kotou fai.

20 “ ʼI te ʼu meʼa fuli ʼae ka kotou fai, ʼe hoko ai anai te malaʼia, mo te maveuveu pea mo te tautea, ʼuhi ko Sehova. Pea ʼe vave pe anai tokotou fakaʼauha mo tokotou pulihi, ʼuhi ko ʼakotou aga ʼae ʼe kovi pea mo takotou liʼaki ia ia.+ 21 ʼE tuku anai e Sehova ke pipiki te mahaki ia koutou ʼo kaku ki tana fakaʼauha koutou ʼi te fenua ʼae ka kotou maʼu.+ 22 ʼE tauteaʼi anai koutou e Sehova ʼaki te mahaki ʼae ko te fatafata vaivai, mo te fiva,+ mo te fufula, mo te vela,* mo te heleta,+ mo te maumauʼi ʼo te ʼu gaueʼaga ʼuhi ko he ʼu matagi vevela peʼe ko te mahaki.+ ʼE hoko anai kia koutou te ʼu meʼa ʼaia ʼo kaku ki takotou mamate. 23 ʼE liliu anai te lagi ko he kapa pea ʼe liliu anai te kele ko he ukamea.+ 24 ʼE fakato anai e Sehova te ʼua ohage ko he ʼone mo he efu ʼi tokotou fenua ʼo kaku ki tokotou fakaʼauha. 25 ʼE mole tuku atu anai e Sehova kia koutou te malo ʼi ʼokotou fili.+ ʼE kotou olo anai ʼo ʼohofi ia natou ʼi he ala ʼe tahi, kae ʼe kotou feholaki anai ʼi ʼonatou muʼa ia ala kehekehe ʼe fitu. Pea ʼe kotou liliu anai ko he meʼa fakalialia ki te ʼu puleʼaga fuli ʼo te kele.+ 26 Pea ʼe kai anai ʼokotou sino e te ʼu manulele fuli mo te ʼu manu fuli ʼo te kele, pea ʼe mole haʼu anai he tahi ʼo fakamatakuʼi natou.+

27 “ ʼE tauteaʼi anai koe e Sehova ʼaki te ʼu foʼi polo ʼae ʼe maʼu e te kau Esipito, mo te mahaki ʼae ko te mulito, mo te kama, pea mo te tahi ʼu faʼahiga mahaki kili, pea ʼe mole ke maʼu anai hona faitoʼo. 28 ʼE fakaliliu anai koe e Sehova ʼo ʼulu vale, mo kivi+ pea mo lotohoha. 29 ʼE ke haʼele taufa anai kae kei fetapa, ohage pe ko te haʼele taufa ʼa he tagata kivi ʼi te fakapoʼuli,+ pea ʼe mole fua lelei anai he gaue ʼe ke fai. ʼE kakaʼi tuʼumaʼu pe anai koe pea mo kaihaʼa tuʼumaʼu anai te ʼu meʼa ʼae ʼe ke maʼu, pea ʼe mole he tahi ʼe ina haofaki anai koe.+ 30 ʼE ke fakapapau ʼohoana anai mo he taʼahine, kae ʼe fakaʼalikiʼi anai ia ia. ʼE ke laga anai hou ʼapi, kae ʼe mole ke nofoʼi anai.+ ʼE ke to anai he gaueʼaga vite, kae ʼe mole ke fakaʼaogaʼi pe la ʼona ʼuluaki fua.+ 31 ʼE matehi anai tau vitulo ʼi ʼou muʼa, kae ʼe mole ke kai anai ki ai. ʼE kaihaʼa anai tau asino ʼi ʼou muʼa, kae ʼe mole toe foaki atu anai. ʼE tuku anai ʼau ovi ki ʼou fili, pea ʼe mole he tahi ke ina haofaki koe. 32 ʼE ke sio mata anai ki te ʼave ʼo ʼou foha mo ʼou ʼofafine ki he tahi age hahaʼi,+ pea ʼe ke fakaʼamu tuʼumaʼu pe anai ke ke toe sio kia natou, kae ʼe mole ke lava fai anai he meʼa. 33 ʼE kai anai te ʼu fua ʼo tau gaueʼaga pea mo te ʼu fua fuli ʼo tau gaue e he hahaʼi ʼe mole ke iloʼi,+ pea ʼe kakaʼi mo fakamamahiʼi tuʼumaʼu anai koe. 34 ʼE ke ʼulu vale anai ʼuhi ko te ʼu meʼa ʼae ka ke sio ki ai.

35 “ ʼE tauteaʼi anai koutou e Sehova ʼo ina fakatupu ʼi ʼokotou tuli mo ʼokotou vaʼe he ʼu foʼi polo ʼe mamahi pea ʼe mole feala hona faitoʼo, ʼe mafola anai te mahaki ʼaia mai ʼokotou ʼalofi vaʼe ki ʼokotou ʼulu. 36 ʼE ʼave anai e Sehova ia te hau ʼae neʼe kotou fakanofo, ʼo feia mo koutou ki he puleʼaga neʼe mole kotou iloʼi mo ʼakotou kui,+ pea ʼe kotou tauhi ai anai ki he tahi ʼu ʼatua, ko he ʼu ʼatua neʼe fai ʼaki te ʼakau pea mo te maka.+ 37 Pea ʼe kotou liliu anai ko he meʼa fakalialia ki te hahaʼi fuli ʼae ʼe ʼave anai koutou ki ai e Sehova pea ʼe natou fehihiʼa mo manukiʼi anai koutou.+

38 “ ʼE lahi anai te pulapula ʼae ka kotou nunusi, kae ʼe mole lahi anai te taʼukai ʼae ka kotou tanaki,+ koteʼuhi ʼe kai anai e te ʼu heʼe. 39 ʼE kotou to anai he ʼu gaueʼaga vite pea mo taupau, kae ʼe mole kotou inu anai he vino pea mo tanaki he meʼa,+ koteʼuhi ʼe kai fuli anai e te ʼugaga. 40 ʼE maʼu anai ʼi tokotou fenua katoa he ʼu fuʼu oliveto, kae ʼe mole kotou vali anai hakotou moʼi lolo, koteʼuhi ʼe maluluku anai te ʼu fuaʼi oliveto. 41 ʼE kotou maʼu anai he ʼu foha mo he ʼu ʼofafine, kae ʼe mole nonofo anai mo koutou, koteʼuhi ʼe ʼave popula anai natou.+ 42 ʼE maumauʼi anai e he ʼu kiʼi manu* ʼakotou fuʼu ʼakau fuli pea mo te ʼu fua ʼo ʼakotou gaueʼaga. 43 Ko te kau matapule ʼae ʼe maʼuʼuli ʼi te lotolotoiga ʼo koutou ʼe ʼasili malolohi age anai ia koutou, kae ʼe kotou ʼasili vaivavai anai. 44 ʼE natou foaki atu anai he ʼu meʼa, kae ʼe mole kotou foaki anai he ʼu meʼa kia natou.+ ʼE natou maʼoluga age anai ia koutou pea ʼe kotou fakalogo anai kia natou.+

45 “ ʼE hoko moʼoni anai kia koutou te ʼu malaʼia fuli ʼaia+ pea ʼe lahi anai ʼokotou malaʼia ʼo kaku ki tokotou fakaʼauha,+ koteʼuhi neʼe mole kotou fakalogo ki te leʼo ʼo Sehova tokotou ʼAtua, ʼo kotou taupau ʼana fakatotonu mo ʼana lekula ʼae neʼe ina foaki atu.+ 46 Pea ʼe hoko atu pe anai tokotou tauteaʼi mo tokotou hologa ʼaki te ʼu malaʼia ʼaia ohage ko he fakailoga mo he fakatokaga ʼo talu ai,+ 47 koteʼuhi neʼe mole kotou tauhi kia Sehova tokotou ʼAtua ʼaki he lotofiafia ʼi te temi ʼae neʼe kotou maʼu lahi ai ia meʼa fuli.+ 48 ʼE fekauʼi anai e Sehova ʼokotou fili ke natou tauʼi koutou, pea ʼe kotou tauhi anai kia natou+ kae ʼe kotou fia kakai,+ mo fia iinu, pea ʼe fakaʼofaʼofa anai ʼokotou mutuʼi meʼa mo kotou masisiva. ʼE ina hili anai he ʼakau ʼamo ukamea ki ʼokotou kia ʼo kaku ki tana fakaʼauha koutou.

49 “ ʼE uga anai e Sehova he puleʼaga ke ina tauʼi koutou, ko he puleʼaga mai te potu taupotu ʼo te kele,+ ʼe ina ʼohofi anai koutou ohage ko he akuila.+ Ko he puleʼaga ʼe mole kotou mahino anai ki tana lea,+ 50 pea ko he puleʼaga ʼe agafekai, ʼe mole fakaʼapaʼapa anai ki te hahaʼi vaivavai peʼe lotomanavaʼofa ki te ʼu fanau.+ 51 ʼE natou kai anai te ʼu ʼuhi ʼo takotou faga manu pea mo te ʼu fua ʼo ʼakotou gaueʼaga, ʼo kaku ki tokotou pulihi. ʼE mole natou tuku anai maʼa koutou he fulumeto, peʼe ko he vino foʼou, peʼe ko he lolo, peʼe ko he ʼuhiʼi pipi peʼe ko he ʼuhiʼi ovi, ʼo kaku ki tanatou haga ʼo pulihi koutou.+ 52 ʼE natou ʼa takai anai koutou, ʼo mole feala ai hakotou mavae mai ʼokotou kolo* fuli ʼae ʼi tokotou fenua, ʼo kaku ki te holo ʼo ʼokotou kaupa maʼoluga mo malohi ʼae ʼe kotou falala ki ai. ʼEi, ʼe natou ʼa takai moʼoni anai koutou ʼi ʼokotou kolo fuli ʼae ʼi tokotou fenua ʼae neʼe foaki atu e Sehova tokotou ʼAtua.+ 53 Pea ʼe kotou kai anai ʼakotou fanau, te sino ʼo ʼokotou foha mo ʼokotou ʼofafine+ ʼae neʼe foaki atu e Sehova tokotou ʼAtua, ʼuhi ko te ʼu faigataʼaʼia ʼae ʼe hoko anai ʼi tokotou ʼa takai e ʼokotou fili pea mo tanatou fakamamahiʼi koutou.

54 “ ʼE toe feia mo te tagata ʼo koutou ʼae ʼe aga fakaʼeteʼete mo pelepelegesi, ʼe mole lotomanavaʼofa anai ki tona tehina, peʼe ki tona ʼohoana ʼofaina, peʼe ki ʼona foha ʼae ʼe kei maʼuʼuli. 55 Pea ʼe mole ina vaevae anai mo natou te sino ʼo ʼona foha ʼae ka ina kai, he ʼe mole ina maʼu anai hana tahi meʼa kai, ʼuhi ko te ʼu faigataʼaʼia ʼae ʼe hoko anai ʼi ʼokotou kolo, ʼi tokotou ʼa takai e ʼokotou fili pea mo tanatou fakamamahiʼi koutou.+ 56 Pea ko te fafine ʼo koutou ʼae ʼe aga fakaʼeteʼete mo pelepelegesi, ʼae neʼe mole pe la manatu ʼe lave anai ʼona vaʼe ki te kele,+ ʼe mole lotomanavaʼofa anai ki tona ʼohoana ʼofaina, peʼe ki tana tama, peʼe ki tana taʼahine, 57 koteʼuhi ʼe mole ina fia vaevae anai mo natou te sino ʼo hana tamasiʼi neʼe ina fanauʼi pea mo te ʼu meʼa fuli ʼae ʼe haʼu ki tuʼa ʼi tana ʼosi fanau. ʼE ina kai fakafufu anai te ʼu meʼa fuli ʼaia ʼuhi ko te ʼu faigataʼaʼia ʼae ka hoko ʼi ʼokotou kolo, ʼi tokotou ʼa takai e ʼokotou fili pea mo tanatou fakamamahiʼi koutou.

58 “Kapau ʼe mole kotou mulimuli fakalelei ki te ʼu folafola fuli ʼo te Lao ʼaeni ʼe tuʼu ʼi te tohi ʼaeni,+ pea kapau ʼe mole kotou manavasiʼi ki te huafa ʼo Sehova+ tokotou ʼAtua, te huafa taulekaleka mo fakamanavahe ʼaia,+ 59 ʼe tauteaʼi anai koutou mo tokotou hologa e Sehova ʼaki he ʼu malaʼia fakamataku, mo lalahi pea mo fualoa,+ pea ʼaki he ʼu mahaki kovi mo fualoa. 60 ʼE ina tauteaʼi anai koutou ʼaki te ʼu mahaki fuli ʼae neʼe maʼu ʼi Esipito pea neʼe kotou matataku ai, pea ʼe pipiki moʼoni anai te ʼu mahaki ʼaia ia koutou. 61 Pea tahi ʼae meʼa, ʼe tauteaʼi anai koutou e Sehova ʼaki he ʼu mahaki mo he ʼu malaʼia ʼe mole tuʼu ʼi te tohi ʼo te Lao ʼaeni, ʼo kaku ki tokotou fakaʼauha. 62 Pea tatau aipe pe ʼe kua kotou kaugamalie ohage ko te ʼu fetuʼu ʼo te lagi,+ kae ʼe toe pe anai he tokosiʼi ia koutou,+ koteʼuhi neʼe mole kotou fakalogo ki te leʼo ʼo Sehova tokotou ʼAtua.

63 “Pea ʼe fiafia anai ia Sehova ʼi tana fakaʼauha ia koutou, ohage pe ko te fiafia ʼa Sehova ʼi te temi muʼa ʼi tana foaki atu he ʼu meʼa ʼe lelei pea mo fakahahaʼi koutou. Pea ʼe taʼaki anai koutou mai te kele ʼae ka kotou maʼu.

64 “Pea ʼe fakamavetevete anai koutou e Sehova ʼi te lotolotoiga ʼo te ʼu puleʼaga fuli, mai ʼae potu taupotu ʼo te kele ki ʼae potu taupotu,+ pea ʼe kotou tauhi ai anai ki he ʼu ʼatua neʼe fai ʼaki te ʼakau mo te maka, ʼae neʼe mole kotou iloʼi ʼo feia mo ʼakotou kui.+ 65 ʼE mole kotou maʼuli tokalelei anai ʼi te ʼu puleʼaga ʼaia+ pea ʼe mole kotou maʼu anai he koga meʼa ke kotou malolo ai. ʼE tuku pe anai e Sehova ke kotou lotohoha,+ mo mata gaʼegaʼe pea mo lotovaivai.+ 66 ʼE tuʼutamakiʼia anai ʼokotou maʼuli, pea ʼe kotou matataku anai ʼi te ʼaho mo te po. ʼE mole kotou iloʼi papau anai pe ʼe kotou maʼuʼuli anai. 67 ʼI te uhu, ʼe kotou ui anai: ‘Ke feia age la ko te afiafi ʼaeni!’ pea ʼi te afiafi, ʼe kotou ui anai: ‘Ke feia age la ko te uhu ʼaeni!’ ʼuhi ko te lahi ʼo takotou matataku pea mo te ʼu meʼa ʼae ka kotou sisio ki ai. 68 ʼE mahino ia, ʼe toe fakaliliu anai koutou e Sehova ki Esipito ʼi ni vaka, ko he folau neʼe au tala atu ʼe mole kotou toe fai anai. Pea ʼe kotou fakatau ai anai ia koutou ki ʼokotou fili ke kotou kaugana kia natou, kae ʼe mole he tahi ʼe ina fia totogi anai koutou.”

29 Ko te ʼu folafola ʼaeni ʼo te fuakava ʼae neʼe fakatotonu e Sehova kia Moisese ke ina fai mo te hahaʼi ʼo Iselaele ʼi te fenua ʼo Moape, ʼo hilifaki ki te fuakava ʼae neʼe ina fai mo natou ʼi Olepe.+

2 Neʼe pauʼi leva e Moisese ia Iselaele katoa pea neʼe ina ui age kia natou: “Neʼe kotou sisio ki te ʼu meʼa fuli ʼae neʼe fai e Sehova ʼi ʼokotou muʼa ʼi te fenua ʼo Esipito, kia Falaone, mo ʼana hahaʼi faifekau fuli pea mo tona fenua katoa,+ 3 ia te ʼu tautea* fakamataku ʼae neʼe kotou sisio mata ki ai, te ʼu fakailoga mo te ʼu milakulo fakaofoofo ʼaia.+ 4 Kae neʼe mole foaki atu e Sehova ia te fealagia ʼae ke kotou mahino ki* te fakaʼuhiga moʼoni ʼo te ʼu meʼa ʼae neʼe kotou sisio mo logo ki ai, ʼo kaku mai ki te ʼaho nei.+ 5 ‘Neʼe au taki koutou lolotoga taʼu ʼe 40 ʼi te toafa,+ pea neʼe mole popo ʼokotou teu pea neʼe mole maumau ʼokotou sulie.+ 6 Neʼe mole kotou kai he pane pea neʼe mole kotou inu he vino peʼe ko he tahi age faʼahiga kava, ke kotou iloʼi ai ʼe ko au ia Sehova, tokotou ʼAtua.’ 7 Neʼe kotou tau mai leva ki te koga meʼa ʼaeni, pea neʼe haʼu ia Sihone, te hau ʼo Heseponi+ mo Oke, te hau ʼo Pasani+ ʼo tauʼi tatou, kae neʼe tou malo ia naua.+ 8 Hili ʼaia, neʼe tou toʼo ʼonā fenua ʼo foaki ki te kau Lupeni, mo te kau Kate pea mo te vaelua ʼo te telepi ʼo Manase, ko honatou tofiʼa.+ 9 Koia, kotou mulimuli ki te ʼu folafola ʼo te fuakava ʼaeni pea mo fakalogo ki ai, ke fua lelei ai te ʼu meʼa fuli ʼae ka kotou fai.+

10 “ ʼE kotou tutuʼu fuli ʼi te ʼaho nei ia muʼa ʼo Sehova tokotou ʼAtua: te ʼu pule ʼo ʼokotou telepi, mo ʼakotou tagata takitaki, mo ʼakotou tagata taupau, mo te hahaʼi tagata fuli ʼo Iselaele, 11 mo ʼakotou fanau, mo ʼokotou ʼohoana+ pea mo te kau matapule+ ʼae ʼe nonofo ʼi tokotou nofoʼaga, mai ia ia ʼae ʼe tae fafie ki ʼae ʼe ohu vai. 12 ʼE kotou ʼi heni ʼi te ʼaho nei he ʼe fai e Sehova tokotou ʼAtua he fuakava mo koutou, pea neʼe fakamoʼoni e Sehova tokotou ʼAtua te fuakava ʼaia ʼaki tana fai he fakapapau.+ 13 Pea ʼe kotou liliu anai ʼi te ʼaho nei ko tana hahaʼi+ pea ʼe liliu anai ia ko tokotou ʼAtua,+ ohage pe ko tana fakapapauʼi atu kia koutou pea mo ʼakotou kui, ʼae ko Apalahamo,+ mo Isaake,+ pea mo Sakopo.+

14 “Pea ʼe mole au fai pe te fuakava mo te fakapapau ʼaia mo koutou, 15 kae ʼe au toe fai foki mo natou ʼae ʼe tutuʼu fakatahi mo tatou ʼi heni ʼi te ʼaho nei, ia muʼa ʼo Sehova totatou ʼAtua, ʼo feia mo natou ʼae ʼe mole ʼi heni mo tatou ʼi te ʼaho nei. 16 (Koteʼuhi ʼe kotou iloʼi lelei pe te aluʼaga ʼo totatou maʼuli ʼi te fenua ʼo Esipito pea mo tatatou fakalaka ʼi te lotolotoiga ʼo te ʼu puleʼaga kehekehe ʼi tatatou faifagona.+ 17 Pea neʼe kotou sisio ki ʼanatou meʼa fakalialia mo ʼanatou fakatata fakalialia*+ ʼae neʼe fai ʼaki te ʼakau mo te maka, pea mo te siliva mo te aulo, ʼae neʼe maʼu io natou.) 18 Kotou tokakaga naʼa maliu kehe ʼi te ʼaho nei he tagata peʼe ko he fafine, peʼe ko he famili peʼe ko he telepi mai ia Sehova totatou ʼAtua, ʼo alu ʼo tauhi ki te ʼu ʼatua ʼo te ʼu puleʼaga ʼaia,+ pea naʼa liliu he tahi ia koutou ohage ko he aka ʼo he fuʼu ʼakau kona pea mo te apiseneto.*+

19 “Kae kapau ʼe logo he tahi ki te ʼu folafola ʼo te fakapapau ʼaeni kae ʼe ina ui ʼi tona loto, ʼaki he fiameʼameʼa: ‘ ʼE mole hoko anai he meʼa kovi kia au, logo la taku haga fai pe te meʼa ʼae ʼe au loto ki ai,’ ʼo iku ai ki te fakaʼauha ʼo meʼa fuli, 20 ʼe mole fia fakamolemole anai ia Sehova kia ia.+ Kae ʼe to anai te hauhau ʼo Sehova ki te tagata ʼaia, pea ʼe hoko moʼoni anai kia ia te ʼu malaʼia fuli ʼae ʼe tuʼu ʼi te tohi ʼaeni,+ pea ʼe molehi moʼoni anai e Sehova tona higoa ʼi te fuga ʼo te kele.* 21 ʼE tuku keheʼi anai e Sehova te tagata ʼaia mai te ʼu telepi fuli ʼo Iselaele ke hoko kia ia te ʼu malaʼia, ʼo mulimuli ki te ʼu malaʼia fuli ʼo te fuakava ʼae ʼe tuʼu ʼi te tohi ʼaeni ʼo te Lao.

22 “ ʼE sisio anai ʼokotou foha, ia te taʼiake ka haʼu pea mo te kau matapule ʼae ʼe ʼomai mai he fenua mamaʼo ki te tauteaʼi ʼo te fenua, ia te ʼu mamahi ʼae neʼe fakatupu e Sehova ʼi te fenua. 23 ʼEi, neʼe ina tauteaʼi te fenua ʼaki te sulifa, mo te masima pea mo te afi, ʼo mole feala ai ke nunusi he meʼa peʼe ke homo ake ai he meʼa ʼi te fenua katoa, peʼe ke maʼuli ai he fuʼu ʼakau, ohage pe ko te maumauʼi e Sehova ia Sotoma mo Komola,+ pea mo Atema mo Sepoimi,+ ʼuhi ko tona hauhau. 24 ʼE ui anai e ʼokotou foha, mo te kau matapule, pea mo te ʼu puleʼaga fuli: ‘He koʼe neʼe fai e Sehova te meʼa ʼaia ki te fenua ʼaeni?+ Kotea ʼae neʼe tupu ai tona hauhau?’ 25 Pea ʼe natou tali anai: ‘He neʼe natou liʼaki te fuakava ʼa Sehova,+ te ʼAtua ʼo ʼanatou kui, ia te fuakava ʼae neʼe ina fai mo natou ʼi tana fakamavae natou mai te fenua ʼo Esipito.+ 26 Kae neʼe natou olo ʼo tauhi ki he tahi age ʼu ʼatua mo tulolo ʼi ʼonatou muʼa, ko he ʼu ʼatua neʼe mole natou iloʼi pea neʼe mole fakagafua age e te ʼAtua ke natou atolasio ki ai.+ 27 Koia neʼe to ai te hauhau ʼo Sehova ki te fenua ʼaeni, ʼo hoko ai te ʼu malaʼia fuli ʼae ʼe tuʼu ʼi te tohi ʼaeni.+ 28 Neʼe taʼaki ai natou e Sehova mai tonatou kele ʼuhi ko tona hauhau,+ ʼo ina ʼave popula ai natou ki he tahi age fenua, ʼae ʼe natou maʼuʼuli ai nei.’+

29 “Ko te ʼu meʼa ʼae ʼe fufu ʼe ʼa Sehova totatou ʼAtua,+ kae ko te ʼu meʼa ʼae ʼe fakaha ʼe ʼa tatou mo ʼotatou hologa ʼo talu ai, ke feala ai hatatou fakahoko te ʼu folafola fuli ʼo te Lao ʼaeni.+

30 “Ka hoko te ʼu folafola fuli ʼaia kia koutou, te ʼu tapuakina mo te ʼu malaʼia ʼae neʼe au tuku atu kia koutou,+ pea ka kotou manatuʼi te ʼu folafola ʼaia+ ʼi te ʼu puleʼaga fuli ʼae ʼe fakamavetevete ai koutou e Sehova tokotou ʼAtua,+ 2 pea ka kotou toe liliu mai kia Sehova tokotou ʼAtua+ mo tokotou loto katoa pea mo tokotou maʼuli* katoa, ʼo kotou fakalogo ki tona leʼo, ʼo mulimuli ki te ʼu meʼa fuli ʼae ʼe au fakatotonu atu kia koutou mo ʼokotou foha ʼi te ʼaho nei,+ 3 ʼe toe ʼaumai anai koutou e Sehova tokotou ʼAtua mai tokotou ʼave popula,+ mo ina fakaha atu tona manavaʼofa+ pea ʼe ina toe fakatahiʼi anai koutou mai te ʼu puleʼaga fuli ʼae neʼe fakamavetevete ai koutou e Sehova tokotou ʼAtua.+ 4 Tatau aipe pe ʼe kotou mavetevete ʼo kaku ki te potu taupotu ʼo te kele, kae ʼe fakatahiʼi pe anai koutou e Sehova tokotou ʼAtua mai ai, pea ʼe ina toe ʼaumai anai koutou.+ 5 ʼE toe fakaliliu mai anai koutou e Sehova tokotou ʼAtua ki te fenua ʼae neʼe maʼu e ʼakotou kui, pea ʼe kotou toe maʼu anai. ʼE ina foaki atu anai he ʼu meʼa ʼe lelei pea mo fakahahaʼi koutou ke kotou kaugamalie age ʼi ʼakotou kui.+ 6 ʼE fakamaʼa anai e Sehova tokotou ʼAtua ʼokotou loto pea mo te ʼu loto ʼo tokotou hakoga,+ ke kotou ʼoʼofa ai kia Sehova tokotou ʼAtua ʼaki tokotou loto katoa mo tokotou maʼuli* katoa, pea ke kotou maʼuʼuli ai.+ 7 ʼE fakahoko anai e Sehova tokotou ʼAtua te ʼu malaʼia fuli ʼaia ki ʼokotou fili, ʼae neʼe natou fehihiʼa mo fakatagaʼi koutou.+

8 “Pea ʼe kotou toe fakalogo anai ki te leʼo ʼo Sehova pea mo mulimuli ki ʼana fakatotonu fuli ʼae ʼe au foaki atu kia koutou ʼi te ʼaho nei. 9 ʼE tapuakiʼi lahi anai e Sehova tokotou ʼAtua te ʼu gaue fuli ʼae ka kotou fai,+ ʼo lahi ai ʼakotou fanau, mo takotou faga manu pea mo te ʼu fua ʼo ʼakotou gaueʼaga, koteʼuhi ʼe toe fiafia anai ia Sehova ʼi tana haga ʼo tapuakiʼi lahi ia koutou, ohage pe ko tana fiafia ʼi tana tapuakiʼi ʼakotou kui.+ 10 Koteʼuhi ʼe kotou fakalogo anai ki te leʼo ʼo Sehova tokotou ʼAtua, pea mo taupau ʼana fakatotonu mo ʼana lekula ʼae ʼe tuʼu ʼi te tohi ʼaeni ʼo te Lao, pea ʼe kotou toe liliu mai anai kia Sehova tokotou ʼAtua, ʼaki tokotou loto katoa mo tokotou maʼuli* katoa.+

11 “Pea ko te fakatotonu ʼaeni ʼe au foaki atu kia koutou ʼi te ʼaho nei, ʼe mole faigataʼa fau ia, pea ʼe mole mamaʼo mai ia koutou.+ 12 ʼE mole tuku ia ʼi selo, ke kotou ui ai: ‘Ko ai la ʼae ka hake ki selo ʼo kumi mai ai, ke tou fakalogo mo mulimuli ki ai?’+ 13 Pea ʼe mole tuku ia ʼi he tahi faʼahi ʼo te tai, ke kotou ui ai: ‘Ko ai ʼae ka fakalaka ʼi te tai ʼo alu ki he tahi faʼahi ʼo kumi mai ai, ke tou fakalogo mo mulimuli ki ai?’ 14 Koteʼuhi ʼe ovi atu te folafola kia koutou, ʼi tokotou gutu pea mo tokotou loto,+ ke feala hakotou maʼuliʼi.+

15 “Kotou sisio, ʼe au tuku atu kia koutou ʼi te ʼaho nei te maʼuli mo te fiafia pea mo te mate mo te malaʼia.+ 16 Kapau ʼe kotou fakalogo ki te ʼu fakatotonu ʼa Sehova tokotou ʼAtua, ʼae ʼe au foaki atu kia koutou ʼi te ʼaho nei, ʼo kotou ʼoʼofa kia Sehova tokotou ʼAtua,+ mo haʼele ʼi ʼona ala pea mo taupau ʼana fakatotonu, mo ʼana lekula pea mo ʼana lao, ʼe kotou maʼuʼuli anai+ pea mo liliu ʼo kaugamalie, pea ʼe tapuakiʼi anai koutou e Sehova tokotou ʼAtua ʼi te fenua ʼae ka kotou maʼu.+

17 “Kae kapau ʼe kotou maliu kehe mai te ʼAtua+ ʼo mole kotou fakalogo kia te ia, pea kapau ʼe fakahalaʼi koutou ʼo kotou tulolo ia muʼa ʼo he tahi age ʼu ʼatua pea mo tauhi kia natou,+ 18 ʼe au tala atu ʼi te ʼaho nei kia koutou, ʼe kotou mamate moʼoni anai.+ ʼE mole kotou maʼuʼuli fualoa anai ʼi te fenua ʼae ka kotou maʼu, ʼi takotou ʼosi fakalaka ʼi te Solotane. 19 ʼE liliu ʼi te ʼaho nei ia natou fuli ʼae ʼi selo pea mo te kele ko ʼaku fakamoʼoni ʼi taku tuku atu kia koutou te maʼuli mo te mate pea mo te tapuakina mo te malaʼia.+ ʼE tonu anai ke kotou filifili te maʼuli, ke kotou maʼuʼuli ai,+ ia koutou mo tokotou hakoga,+ 20 ʼo kotou ʼoʼofa kia Sehova tokotou ʼAtua,+ mo fakalogo ki tona leʼo, pea mo pipiki kia te ia,+ koteʼuhi ʼe ina foaki te maʼuli pea ʼe feala ke ina fakatologa tokotou maʼuli, ʼi te fenua ʼae neʼe fakapapauʼi e Sehova ke ina foaki ki ʼakotou kui, ʼae ko Apalahamo, mo Isaake pea mo Sakopo.”+

31 Neʼe tuʼu leva ia Moisese ia muʼa ʼo Iselaele katoa pea neʼe ina ui kia natou: 2 “Kua au taʼu 120 ʼi te ʼaho nei.+ ʼE mole kei feala haku taki koutou, koteʼuhi neʼe ui mai e Sehova: ‘ ʼE mole ke fakalaka anai ʼi te Solotane.’+ 3 ʼE ko Sehova tokotou ʼAtua, ʼae ka alu anai ʼi ʼokotou muʼa, pea ʼe ina fakaʼauha anai te ʼu puleʼaga ʼaia ʼi ʼokotou muʼa, pea ʼe kotou maʼu anai tonatou fenua.+ ʼE ko Sosue ʼae ka ina taki koutou ʼi takotou fakalaka ʼi te Solotane,+ ohage pe ko tona ui e Sehova. 4 ʼE fakaʼauha anai natou e Sehova ohage ko tana fakaʼauha ia Sihone+ pea mo Oke,+ te ʼu hau ʼo te kau Amole, ʼo feia mo ʼonā fenua.+ 5 ʼE malo anai ia Sehova ia natou pea ʼe ina tuku atu anai kia koutou. Pea ʼe tonu anai ke kotou fai kia natou ʼo mulimuli ki te ʼu fakatotonu fuli ʼae ʼe au foaki atu kia koutou.+ 6 Kotou lotomalohi mo lototoʼa.+ ʼAua naʼa kotou matataku ia natou,+ koteʼuhi ʼe alu ia Sehova tokotou ʼAtua mo koutou. ʼE mole ina tuku anai ia koutou pea ʼe mole ina liʼaki anai ia koutou.”+

7 Neʼe pauʼi leva e Moisese ia Sosue ʼo ui age ki ai ia muʼa ʼo Iselaele katoa: “Ke ke lotomalohi mo lototoʼa,+ he ʼe ko koe ʼae ka ke fakahu te hahaʼi ʼaeni ki te fenua ʼae neʼe fakapapauʼi e Sehova ki ʼanatou kui ke foaki age kia natou, pea ʼe ke foaki anai te fenua kia natou ko honatou tofiʼa.+ 8 ʼE alu ia Sehova ʼi ʼou muʼa, pea ʼe nofo tuʼumaʼu pe anai mo koe.+ ʼE mole ina tuku anai ia koe pea ʼe mole ina liʼaki anai ia koe. ʼAua naʼa ke mataku.”+

9 Pea neʼe tohi leva e Moisese te Lao ʼaia,+ ʼo ina foaki ki te kau pelepitelo, mo te kau Levite, ʼae ʼe natou fata te aleka ʼo te fuakava ʼa Sehova, pea mo te kau tagata takitaki fuli ʼo Iselaele. 10 Neʼe fakatotonu e Moisese kia natou: “ ʼI te taʼu fitu fuli, ʼi te taʼu ʼae ʼe molehi ai te ʼu maʼua,+ ʼi te temi ʼae kua fakatuʼutuʼu ki ai lolotoga te ʼAho Lahi ʼo Te ʼu Pola,*+ 11 ʼe tonu anai ke kotou lau te Lao ʼaeni ke logo ki ai ia Iselaele katoa+ moka natou ʼomai kia muʼa ʼo Sehova+ tokotou ʼAtua, ʼi te koga meʼa ʼae ka ina filifili. 12 Kotou fakatahiʼi te hahaʼi fuli,+ ia te hahaʼi tagata, mo te hahaʼi fafine, mo te ʼu fanau,* pea mo te kau matapule ʼae ʼe nonofo ʼi ʼokotou kolo,* ke feala hanatou fakalogo, mo ako ʼo ʼuhiga mo Sehova tokotou ʼAtua, mo manavasiʼi kia te ia, pea ke natou tokakaga ʼo maʼuliʼi te ʼu folafola fuli ʼo te Lao ʼaia. 13 Pea ko ʼonatou foha ʼae neʼe mole natou iloʼi te Lao ʼaia, ʼe natou fakalogo anai+ mo ako ke natou manavasiʼi kia Sehova tokotou ʼAtua, ʼi te temi fuli pe ʼae ʼe kotou maʼuʼuli ai anai ʼi te fenua ka kotou maʼu, ʼi takotou ʼosi fakalaka ʼi te Solotane.”+

14 Hili ʼaia, neʼe ui e Sehova kia Moisese: “Koʼeni, kua ovi mai te temi ʼae ka ke mate ai.+ Ke ke pauʼi ia Sosue, pea kolua olo ki te fale la ʼo te fono ke feala haku fakanofo ia ia ko honatou pule.”+ Neʼe alu ai ia Moisese mo Sosue ki te fale la ʼo te fono. 15 Neʼe ha leva ia Sehova ʼi he ʼao, pea neʼe tuʼu te ʼao ʼaia ʼi te huʼaga ʼo te fale la.+

16 Pea neʼe ui e Sehova kia Moisese: “Koʼeni, kua ke vave mate,* pea ʼe kamata tauhi anai te hahaʼi ʼaeni ki* te ʼu ʼatua matapule ʼae ʼi ʼonatou tafaʼaki, ʼi te fenua ʼae ʼe natou olo ki ai.+ ʼE natou liʼaki anai au+ pea mo maumauʼi te fuakava ʼae neʼe au fai mo natou.+ 17 ʼI te temi ʼaia, ʼe to anai toku hauhau kia natou,+ pea ʼe au liʼaki anai ia natou+ mo maliu kehe mai ia natou,+ ʼo kaku ki tonatou fakaʼauha. Pea ʼi te lahi ʼo te ʼu malaʼia mo te ʼu mamahi ʼae ka hoko kia natou,+ ʼe natou ui anai: ‘ ʼE mole hoko koa la te ʼu malaʼia ʼaeni kia tatou ʼuhi ko te mole nofo ʼa te ʼAtua ʼi te lotolotoiga ʼo tatou?’+ 18 Kae ʼe au maliu kehe pe anai mai ia natou ʼi te ʼaho ʼaia, ʼuhi ko te ʼu agakovi fuli ʼae ʼe natou fai anai ʼi tanatou muliʼi he tahi age ʼu ʼatua.+

19 “ ʼI te lakaga nei, kolua tohi te hiva ʼaeni+ pea mo akoʼi age ki te kau Iselaele.+ Kolua akoʼi age te hiva ʼaia ke natou manatuʼi ai ʼaku fakatokaga.+ 20 ʼI taku ʼosi taki ia natou ki te fenua ʼae neʼe au fakapapau ke au foaki ki ʼanatou kui,+ ko he fenua ʼe tafe ai te huʼa pipi mo te meli,+ pea ʼi tanatou kua makokona mo koloaʼia,*+ ʼe natou muliʼi anai he tahi age ʼu ʼatua mo tauhi kia natou, ʼe mole natou fakaʼapaʼapa anai kia au pea ʼe natou maumauʼi anai taku fuakava.+ 21 Ka lahi te ʼu malaʼia mo te ʼu mamahi ʼae ka hoko kia natou,+ ʼe natou manatuʼi anai ʼaku fakatokaga ʼaki te hiva ʼaia (he ʼe mole tonu ia ke galoʼi e tonatou hologa te hiva ʼaia). Koteʼuhi kua au ʼosi iloʼi ʼanatou manatu+ logo la heʼeki au fakahu ia natou ki te fenua ʼae neʼe au fakapapauʼi age kia natou.”

22 ʼI te ʼaho ʼaia, neʼe tohi ai e Moisese te hiva ʼaia pea neʼe ina akoʼi age ki te kau Iselaele.

23 Neʼe ina* fakanofo ai leva ia Sosue,+ te foha ʼo Nune ke ina takitaki ia natou, pea neʼe ina ui: “Ke ke lotomalohi mo lototoʼa,+ he ʼe ko koe ʼae ka ke fakahu te kau Iselaele ki te fenua ʼae neʼe au fakapapauʼi age kia natou,+ pea ʼe au nofo tuʼumaʼu pe anai mo koe.”

24 ʼI te ʼosi tohi katoa e Moisese te ʼu folafola ʼo te Lao ʼaia ʼi he tohi,+ 25 neʼe fakatotonu e Moisese ki te kau Levite ʼae ʼe natou fata te aleka ʼo te fuakava ʼa Sehova: 26 “Kotou toʼo te tohi ʼaeni ʼo te Lao+ pea kotou tuku ia tafa ʼo te aleka+ ʼo te fuakava ʼa Sehova tokotou ʼAtua, pea ʼe liliu anai ko he fakamoʼoni ʼe ina fakatuʼā koutou. 27 Koteʼuhi ʼe au iloʼi lelei takotou agatuʼu+ mo takotou uigataʼa.*+ Kapau ʼe kotou agatuʼu kia Sehova kae ʼe kei au maʼuli, ʼe toe ʼasili age anai takotou agatuʼu hili toku mate! 28 Kotou fakatahiʼi mai te kau takitaki fuli ʼo ʼokotou telepi pea mo ʼakotou tagata taupau. ʼE au fakaha age anai kia natou te ʼu folafola ʼaeni ke natou logo ki ai, pea ʼe liliu anai ia natou fuli ʼae ʼi selo pea mo te kele ko ʼaku fakamoʼoni ʼi te ʼu palalau ʼae ka au fakaha atu.+ 29 Koteʼuhi ʼe au iloʼi lelei, ʼe kotou fai moʼoni anai he ʼu aga ʼe kovi hili toku mate,+ pea ʼe kotou maliu kehe anai mai te ala ʼae neʼe au fakatotonu atu ke kotou muliʼi. Pea ʼi te ʼu ʼaho fakaʼosi, ʼe hoko moʼoni anai kia koutou he ʼu malaʼia,+ he ʼe kotou fai anai te ʼu meʼa ʼae ʼe kovi kia mata ʼo Sehova, pea ʼe kotou fakalotomamahiʼi anai ia ia ʼuhi ko ʼakotou gaue.”

30 Neʼe fakaha leva e Moisese ki te hahaʼi katoa ʼo Iselaele te hiva ʼaia, mai tona kamata ki tona fakaʼosi, kae natou fakalogo:+

 3 Koteʼuhi ʼe au tala anai te huafa ʼo Sehova.+

Kotou palalau ʼo ʼuhiga mo te maʼoluga ʼo totatou ʼAtua!+

 5 Ko koutou ʼae neʼe agakovi.+

Ko koutou ʼe mole ko hana ʼu fanau, ʼe maʼu ia koutou te hala.+

Ko koutou ko he taʼiake aga fakapikopiko mo aga fakalialia!+

15 ʼI te liliu ʼa Sesulune* ʼo sino, neʼe agatuʼu ki tona pule.

Neʼe liliu ʼo sino pea mo matakitaki.+

29 Ka na pau la neʼe natou popoto,+ ʼe natou metitasio* anai ki te faʼahi ʼaia.+

ʼE natou fakakaukauʼi anai te meʼa ʼae ka hoko kia natou.+

Ke natou tutuʼu ake ʼo tokoni atu kia koutou.

Ke natou liliu ko tokotou nonoʼaga.

ʼE au matehi, pea ʼe au fakamaʼuli.+

44 Neʼe alu ai ia Moisese ʼo fakaha te ʼu folafola fuli ʼo te hiva ʼaia ke logo ki ai te hahaʼi.+ Neʼe ko ia mo Oseo,*+ te foha ʼo Nune. 45 ʼI te ʼosi fakaha age e Moisese te ʼu folafola fuli ʼaia ki Iselaele katoa, 46 neʼe ina ui kia natou: “Kotou toʼo fakamalotoloto te ʼu fakatokaga ʼae ʼe au fakaha atu ʼi te ʼaho nei,+ ke feala ai hakotou fakatotonu ki ʼokotou foha ke natou tokakaga ʼo mulimuli ki te ʼu folafola fuli ʼo te Lao ʼaeni.+ 47 Koteʼuhi ʼe mole ko he ʼu palalau fakafua noa ʼaeni, kae ʼe kotou maʼuʼuli anai+ mo kapau ʼe kotou fakalogo ki te ʼu folafola ʼaia. ʼEi, ʼe feala ai anai hakotou maʼuʼuli fualoa ʼi te fenua ʼae ka kotou maʼu, ʼi takotou fakalaka ʼi te Solotane.”

48 ʼI te ʼaho pe ʼaia, neʼe ui e Sehova kia Moisese: 49 “Hake ki te moʼuga ʼaeni ʼo Apalimi,+ te Moʼuga ko Nepo,+ ʼi te fenua ʼo Moape, ʼae ʼe haga ki Seliko pea ke sio ki te fenua ʼo Kanaane ʼae ʼe au foaki ki te kau Iselaele ko honatou tofiʼa.+ 50 Pea ʼe ke mate anai ʼi te moʼuga ʼae ka ke hake ki ai, pea ʼe tuku fakatahi anai ia koe mo ʼau kui,* ohage pe ko tou tehina ko Alone ʼae neʼe mate ʼi te Moʼuga ʼo Hole+ pea neʼe tuku fakatahi ia ia mo ʼana kui, 51 koteʼuhi neʼe mole kolua agatonu kia te au ʼi te lotolotoiga ʼo te kau Iselaele, ʼi te ʼu vai ʼo Melipa+ ʼi Katesi, ʼi te toafa ʼo Tesine, he neʼe mole kolua fakaha toku maʼoniʼoni ia muʼa ʼo te hahaʼi ʼo Iselaele.+ 52 ʼE ke sio anai ki te fenua mai mamaʼo, kae ʼe mole ke hu anai ki te fenua ʼae ʼe au foaki ki te hahaʼi ʼo Iselaele.”+

33 ʼI muʼa ʼo te mate ʼa Moisese, te tagata ʼa te ʼAtua moʼoni, neʼe ina fakaha te ʼu tapuakina ʼae ka maʼu anai e te kau Iselaele.+ 2 Neʼe ina ui:

 7 Pea neʼe ina fakaha te ʼu tapuakina ʼaeni ka maʼu anai e Suta:+

 8 Neʼe ina ui ʼo ʼuhiga mo Levi:+

12 Neʼe ina ui ʼo ʼuhiga mo Pesamino:+

13 Neʼe ina ui ʼo ʼuhiga mo Sosefo:+

18 Neʼe ina ui ʼo ʼuhiga mo Sepulone:+

19 ʼE nā pauʼi anai te hahaʼi ke natou fakatahitahi mai ki te moʼuga.

ʼE nā momoli ai anai te ʼu sakilifisio ʼo te faitotonu.

20 Neʼe ina ui ʼo ʼuhiga mo Kate:+

“Ke tapuakiʼi ia ia ʼae ʼe ina hiki te ʼu tuʼakoi ke fakalahi te fenua ʼo Kate.+

ʼE fakatahitahi anai te kau pule ʼo te hahaʼi.

22 Neʼe ina ui ʼo ʼuhiga mo Tane:+

“Ko Tane ʼe ko he laione kei mui.+

ʼE hopo anai mai Pasani.”+

23 Neʼe ina ui ʼo ʼuhiga mo Nefetali:+

Ke ke maʼu te potu uesite mo te potu saute.”

24 Neʼe ina ui ʼo ʼuhiga mo Asele:+

“Neʼe tapuakiʼi e te ʼAtua ia Asele ʼo ina foaki age ni ʼona foha ʼe kaugamalie.

29 Fiafia ia koutou, hahaʼi ʼo Iselaele!+

34 Neʼe mavae leva ia Moisese mai te toafa ʼo Moape ʼo hake ki te Moʼuga ʼo Nepo,+ ki te tumutumu ʼo Pisika,+ ʼae ʼe haga ki Seliko.+ Pea neʼe fakaha age e Sehova ki ai ia te fenua katoa, mai Kileate ki Tane,+ 2 mo Nefetali katoa pea mo te fenua ʼo Efalaimi mo Manase, mo te fenua katoa ʼo Suta ʼo kaku ki te tai ʼo te potu uesite,*+ 3 mo te Nekepe,+ pea mo te Koga Fenua ʼo Te Solotane,+ mo te potu fenua laulelei ʼo Seliko, ʼae ko te kolo ʼo te ʼu fuʼu palema, ʼo kaku ki Tesoa.+

4 Pea neʼe ui age e Sehova kia ia: “Koʼeni te fenua ʼae neʼe au fakapapauʼi age kia Apalahamo, mo Isaake, pea mo Sakopo: ‘ ʼE au foaki anai te fenua ʼaia ki tokotou hakoga.’+ ʼE au tuku ke ke sio ki te fenua, kae ʼe mole ke hu anai ki ai.”+

5 Hili ʼaia, neʼe mate ai leva ia Moisese, te tagata faifekau ʼa Sehova, ʼi te fenua ʼo Moape, ohage pe ko tona ui age e Sehova.+ 6 Neʼe ina* ʼavaifo leva ia ia ʼi te vaʼe moʼuga, ʼi te fenua ʼo Moape, ʼae ʼe haga ki Pete-peoli, pea ʼe mole iloʼi e he tahi pe ʼe tuʼu ʼifea tona fale maka ʼo kaku mai pe ki te ʼaho nei.+ 7 Neʼe mate ia Moisese ʼi tona taʼu 120.+ Neʼe kei sio lelei pe, pea neʼe kei malohi ʼosi. 8 Neʼe tagiʼi e te hahaʼi ʼo Iselaele ia Moisese ʼi te toafa ʼo Moape lolotoga ʼaho ʼe 30.+ Pea neʼe ʼosi leva te ʼu ʼaho ʼae neʼe natou tagiʼi ai ia Moisese pea mo putu ai.

9 Neʼe lahi te poto* ʼae neʼe maʼu e Sosue, te foha ʼo Nune, he neʼe hili e Moisese ʼona nima kia ia ʼo ina fakanofo ai.+ Neʼe fakalogo leva te kau Iselaele kia ia, pea neʼe natou fai te ʼu meʼa ʼae neʼe fakatotonu e Sehova kia Moisese.+ 10 Kae neʼe heʼeki ha he polofeta ʼi Iselaele ohage ko Moisese,+ ʼae neʼe iloʼi lelei e Sehova.+ 11 Neʼe ina fakahoko te ʼu fakailoga mo te ʼu milakulo fuli ʼae neʼe fekauʼi e Sehova ke alu ʼo fai ʼi te fenua ʼo Esipito, ia muʼa ʼo Falaone, mo ʼana hahaʼi faifekau fuli pea mo tona fenua katoa.+ 12 Neʼe fai e Moisese te ʼu gaue ʼaia ʼaki he nima malohi pea mo he malohi fakaofoofo, ia muʼa ʼo Iselaele katoa.+