TE ʼULUAKI TOHI ʼA SAMUELE

1 Neʼe ʼi ai he tagata mai Lamataimi-tesofimi*+ ʼi te potu moʼugaʼia ʼo Efalaimi+ neʼe higoa ko Elekana,+ te foha ʼo Seloame, te foha ʼo Eliu, te foha ʼo Tou, te foha ʼo Tesufe, te tagata Efalaimi. 2 Pea neʼe ko ʼona ʼohoana ʼe lua, neʼe higoa te tahi ko Ana, pea ko te tahi ko Penina. Neʼe maʼu fanau ia Penina, kae neʼe mole ʼi ai he fanau ʼa Ana. 3 ʼI te taʼu fuli, neʼe mavae te tagata ʼaia ʼi tona kolo ʼo alu ki Silo, ʼo atolasio* pea mo momoli he sakilifisio kia Sehova ʼo te ʼatu kautau.+ Neʼe gaue ʼi ai te ʼu foha ʼe lua ʼo Eli, ia Ofeni mo Fineasi,+ ʼi tonā ʼuhiga pelepitelo ʼa Sehova.+

4 ʼI te tahi ʼaho, ʼi te momoli ʼae e Elekana ia he sakilifisio, neʼe ina foaki ni vahe kia Penina mo ʼana tama pea mo ʼana taʼahine fuli,+ 5 kae neʼe ina foaki kia Ana he vahe ʼe makehe, he neʼe lahi age tona ʼofa ʼae kia Ana. Kae neʼe mole foaki age e Sehova hana fanau. 6 Tahi ʼae meʼa, neʼe manukiʼi tuʼumaʼu pe ia ia e Penina,* ke tupu ai hana lotomamahi ʼi te mole foaki age e Sehova hana fanau. 7 Neʼe ina fai te faʼahi ʼaia ʼi te taʼu fuli. ʼI te temi fuli pe ʼae neʼe alu ai ia Ana ki te fale ʼo Sehova,+ neʼe lahi tona manukiʼi e tona fili, ʼo tagi mamahi ai pea neʼe mole kei kai. 8 Kae neʼe ui age e Elekana tona ʼohoana: “Ana, he koʼe ʼe ke tagi, he koʼe ʼe mole kei ke kai, pea he koʼe ʼe ke lotomamahi feia? ʼE mole au maʼuhiga age koa la kia koe ʼi he ʼu tama ʼe toko hogofulu?”

9 Neʼe tuʼu ake leva ia Ana ʼi tanatou ʼosi kakai mo iinu ʼi Silo. ʼI te lakaga ʼaia, neʼe heka ia te pelepitelo ko Eli ʼi te hekaʼaga, ʼi te huʼaga ʼo te fale lotu*+ ʼo Sehova. 10 Neʼe lotomamahi ʼaupito ia Ana, ʼo kamata faikole ai kia Sehova+ pea neʼe mole feala ke tuku tana tagi. 11 Pea neʼe ina fai te fakapapau ʼaeni: “Sehova ʼo te ʼatu kautau, sio ifo ki te mamahi ʼo tau kaugana. Kapau ʼe ke manatuʼi au ʼo mole ke galoʼi au mo foaki mai haku tamasiʼi tagata,+ ʼe au foaki atu anai ia ia kia te koe, Sehova, ke tauhi kia te koe ʼi tona maʼuli katoa, pea ʼe mole kosi anai tona ʼulu ʼi he temi.”+

12 ʼI tana faikole loaloaga ʼaia ia muʼa ʼo Sehova, neʼe sioʼi e Eli tona gutu. 13 Neʼe palalau ia Ana ʼi tona loto, pea ko ʼona laugutu pe ʼae neʼe gaugaue kae neʼe mole logo tona leʼo. Koia neʼe manatu ai ia Eli ʼe konahia. 14 Neʼe ui age e Eli: “ ʼE ke konahia anai koa ʼo kaku ki ʼafea? Tuku tau inu te vino.” 15 Pea neʼe tali age e Ana: “Kailoa, siʼoku ʼaliki! Ko au ʼe ko he fafine ʼe lotomamahi ʼaupito. Neʼe mole au inu he moʼi vino peʼe ko he moʼi kava, kae ʼe au avahi toku loto* kia Sehova.+ 16 ʼAua naʼa ke manatu ʼe mole hoku ʼuhiga, koteʼuhi ʼe au palalau ʼi te lahi ʼo toku mamahi mo taku hoha, ʼo kaku mai ki te temi nei.” 17 Neʼe tali leva e Eli: “Alu la ʼi te fimalie, pea ke tali e te ʼAtua ʼo Iselaele tau kole ʼae neʼe ke fai kia te ia.”+ 18 Neʼe ina tali age: “Ke ke ʼofa ki tau kaugana.” Pea neʼe alu ai te fafine ʼo kai pea neʼe mole kei matamamahi.

19 Neʼe natou tutuʼu ake ʼi te kei hegihegi, ʼo tulolo ia muʼa ʼo Sehova, pea hili ʼaia, neʼe natou toe liliu leva ki tonatou ʼapi ʼi Lama.+ Neʼe momoe leva ia Elekana mo tona ʼohoana ko Ana, pea neʼe tokagaʼi* ia ia e Sehova.+ 20 Neʼe faitama leva ia Ana, pea ʼosi te taʼu katoa, neʼe kua ina* fanauʼi he tamasiʼi tagata ʼo ina fakahigoaʼi+ ko Samuele,* koteʼuhi, ohage pe ko tana ui, “neʼe au kole ia ia kia Sehova.”

21 Ki muli age, neʼe alu ia Elekana mo tona loto fale katoa ʼo momoli kia Sehova te sakilifisio ʼae neʼe ina fai ʼi te taʼu fuli,+ pea mo te molaga ʼo ʼuhiga mo tana fakapapau. 22 Kae neʼe mole alu ia Ana,+ he neʼe ina ui ki tona ʼohoana: “ ʼI te temi pe ʼae ka au vaheʼi ai te tamasiʼi, ʼe au ʼave anai ki te fale ʼo Sehova.* Pea ʼe nofo anai ʼi ai ʼo talu ai.”+ 23 Pea neʼe ui e Elekana tona ʼohoana kia ia: “Fai te meʼa ʼae ʼe ke manatu ʼe lelei.* Nofo ʼi fale ʼo aʼu ki te temi ʼae ʼe ke vaheʼi ai ia ia. ʼOfa pe ke fakahoko e Sehova te meʼa ʼae neʼe ke ui.” Koia, neʼe nofo ai te fafine ʼi fale ʼo fafaga tana tamasiʼi ʼo kaku ki tona vaheʼi.

24 ʼI te temi pe ʼae neʼe ina vaheʼi ai, neʼe alu mo ia ki Silo, pea neʼe ina ʼave mo he vitulo ʼe taʼu tolu, mo he efa* falena ʼe tahi, mo he ʼaiʼaga vino lahi.+ Neʼe alu ai ki te fale ʼo Sehova ʼi Silo+ mo tana kiʼi tama. 25 Neʼe matehi leva te vitulo pea neʼe ʼave te kiʼi tama kia Eli. 26 Neʼe ina ui leva: “Fakalelei mai, siʼoku ʼaliki. Kae ʼe au tala moʼoni atu, ʼe ko au te fafine ʼae neʼe tutuʼu mo koe ʼi te faʼahi ʼaeni ʼo faikole kia Sehova.+ 27 Neʼe au faikole ʼo ʼuhiga mo te kiʼi tama ʼaeni, pea neʼe tali e Sehova taku kole ʼae neʼe au fai kia te ia.+ 28 ʼI te temi leva ʼaeni, ʼe au foaki ia ia kia Sehova. ʼE foaki ia ia kia Sehova ke tauhi kia te ia ʼi tona maʼuli katoa.”

Pea neʼe tulolo* ia muʼa ʼo Sehova.

2 Neʼe faikole leva ia Ana:

11 Neʼe alu leva ia Elekana ki tona ʼapi, ʼi Lama, kae neʼe liliu te kiʼi tama ko he kaugana ʼa* Sehova+ ia muʼa ʼo te pelepitelo ko Eli.

12 Kae ko te ʼu foha ʼo Eli neʼe ko he ʼu tagata agakovi,+ neʼe mole nā fakaʼapaʼapa kia Sehova. 13 Koʼeni te meʼa ʼae neʼe nā fai ʼaki te vahe ʼae neʼe tonu ke foaki e te hahaʼi ki te kau pelepitelo:+ ʼI te temi ʼae neʼe momoli ai e he tagata he sakilifisio, neʼe haʼu he tagata gaue ʼa te pelepitelo mo he huki maga tolu ʼi tona nima, ʼi te temi ʼae neʼe fakamoho ai te kanoʼi manu, 14 ʼo ina hukiʼi ki te kulo ʼae neʼe kave lua, peʼe ki te kulo ʼae neʼe kave tahi, peʼe ki he tahi age ʼu faʼahiga kulo kehekehe. Ko te meʼa pe ʼae neʼe ina hukiʼi, neʼe toʼo e te pelepitelo maʼa ia. Ko te meʼa ʼaia neʼe fai ʼi Silo moka ʼomai te kau Iselaele fuli ki ai. 15 Pea ʼi muʼa pe ʼo te haga ʼa te tagata ʼae neʼe ina fai te sakilifisio ʼo tutu ke kohu te gako,+ neʼe haʼu he tagata gaue ʼa te pelepitelo ʼo ui age: “Foaki ki te pelepitelo he kanoʼi manu ke taʼo. ʼE mole ina tali anai ke ke foaki age he kanoʼi manu neʼe haka, kae ko he kanoʼi manu kei mata.” 16 Pea moka ui age e te tagata: “Tuku muʼa ke tutu ke kohu te gako+ pea hoki ke toʼo leva te meʼa ʼae ʼe ke* loto ki ai,” neʼe ina tali age: “Kailoa, foimo foaki mai koe kia au. Kapau ʼe mole ke foaki mai, pea ʼe au toʼo fakakinau anai!” 17 Koia, neʼe lahi ʼaupito ai ia muʼa ʼo Sehova te agahala ʼa te ʼu tagata gaue ʼaia,+ he neʼe mole fakaʼapaʼapa te ʼu tagata ki te molaga ʼae neʼe momoli kia Sehova.

18 Neʼe gaue ia Samuele+ ia muʼa ʼo Sehova, pea neʼe ina tui* he efote* lino,*+ logo la neʼe kei tamasiʼi. 19 Pea neʼe tui e tana faʼe hona kiʼi kofu tuʼa ʼae neʼe mole hona ʼu nimaʼi kofu, pea ʼi te taʼu fuli, neʼe ina ʼave kia ia moka alu mo tona ʼohoana ʼo momoli te sakilifisio ʼae neʼe fai ʼi te taʼu fuli.+ 20 Pea neʼe tapuakiʼi e Eli ia Elekana mo tona ʼohoana pea neʼe ina ui: “ ʼOfa pe ke foaki atu e Sehova hau tamasiʼi ʼi te fafine ʼaena, moʼo fetogi ia ia ʼae kua foaki kia Sehova.”+ Pea neʼe nā liliu ki tonā ʼapi. 21 Neʼe tokagaʼi leva e Sehova ia Ana, pea neʼe faitama.+ Neʼe ina fanauʼi ai he tahi age ʼu tama ʼe tolu pea mo he ʼu taʼahine ʼe lua. Pea neʼe lahilahi ake te kiʼi tama ko Samuele ia muʼa ʼo Sehova.+

22 Neʼe kua matuʼa ʼosi ia Eli, neʼe logo ki te ʼu meʼa fuli ʼae neʼe fai e ʼona foha+ ki Iselaele katoa, mo tanā momoe mo te ʼu fafine ʼae neʼe gaue ʼi te huʼaga ʼo te fale la ʼo te fono.+ 23 Pea neʼe ina ui kia naua: “He koʼe koa ʼe kolua fai te ʼu aga ʼaia? Koteʼuhi ʼe kovi te ʼu meʼa ʼae ʼe au logo ʼe fakamatala e te hahaʼi fuli ʼo ʼuhiga mo koulua. 24 Kolua tuku takolua fai te ʼu meʼa ʼaia, siʼoku ʼu foha, he ʼe mole lelei te ʼu fakamatala ʼae ʼe au logo ʼe feʼaveʼaki e te hahaʼi ʼa Sehova. 25 Kapau ʼe agahala he tagata ki he tahi tagata, ʼe feala pe ki he tahi ke faikole kia Sehova maʼa ia.* Kae kapau ʼe agahala he tagata kia Sehova,+ ko ai ʼae ʼe feala ke faikole maʼa ia?” Kae neʼe mole nā fia fakalogo ki tanā tamai, he neʼe kua fakatotonu e Sehova ke ina matehi naua.+ 26 Lolotoga te temi ʼaia, neʼe lahilahi ake pe te kiʼi tama ko Samuele pea neʼe lahi age tona ʼofainaʼi e Sehova pea mo te hahaʼi.+

27 Pea neʼe haʼu he tagata ʼa te ʼAtua kia Eli ʼo ina ui: “Koʼeni te meʼa ʼae ʼe ui e Sehova: ‘Neʼe mole koa la au fakaha ia au totonu ki te famili ʼo tau tamai ʼi tanatou kaugana ʼi Esipito kia Falaone?*+ 28 Pea neʼe filifili ia ia ʼi te ʼu telepi fuli ʼo Iselaele+ ke gaue ohage ko haku pelepitelo pea ke hake ki toku ʼaletale+ ʼo fai ai te ʼu sakilifisio, mo momoli te iseso,* pea ke ina tui he efote ʼi ʼoku muʼa. Pea neʼe au foaki ki te famili ʼo tau kui te ʼu molaga fuli ʼae neʼe tutu ʼi te afi e te kau Iselaele.*+ 29 Koia ʼu tagata, he koʼe ʼe kotou meʼa noaʼi taku sakilifisio pea mo taku molaga ʼae neʼe au fakatotonu ke fai ʼi toku nofoʼaga?+ Pea he koʼe ʼe ke haga fakamaʼuhigaʼi ʼou foha ʼo lahi age ia au, ʼo kotou sisino ai ʼi te ʼu vahe ʼae ʼe lelei ʼo te ʼu molaga fuli ʼae ʼe foaki e Iselaele taku hahaʼi?+

30 “ ‘Koia, koʼeni te folafola ʼa Sehova, te ʼAtua ʼo Iselaele: “ ʼE moʼoni, neʼe au ui ʼe haʼele tuʼumaʼu pe anai ʼi ʼoku muʼa tou famili pea mo te famili ʼo tau kui.”+ Kae koʼeni leva te meʼa ʼae ʼe ui e Sehova: “ ʼE mole toe hoko anai te faʼahi ʼaia! Koteʼuhi ʼe au fakaʼapaʼapa anai kia natou ʼae ʼe fakaʼapaʼapa mai kia te au,+ kae ʼe fehiʼaʼinaʼi anai ia natou ʼae ʼe fehihiʼa kia te au.” 31 Koʼeni, ʼe hoko mai te ʼu ʼaho ʼae ʼe au toʼo anai tou malohi* pea mo te malohi ʼo te famili ʼo tau tamai, ʼo mole maʼuli anai he tagata ʼi tou famili ʼo kaku ki tona temi matuʼa.+ 32 Pea ʼe ke sio anai ki he fili ʼi toku nofoʼaga ʼi te lotolotoiga ʼo te ʼu meʼa lelei fuli ʼae ʼe fai ki Iselaele,+ pea ʼe mole toe maʼu anai ʼi tou famili he tagata kua matuʼa. 33 ʼE kovi anai tau sio pea ʼe ke lotomamahi anai ʼuhi ko te tagata ʼo tou hakoga ʼae ʼe au tuku ke gaue ʼi toku ʼaletale, kae ʼe kaugamalie natou ʼo tou famili ʼae ka mamate ʼi te heleta.+ 34 Pea ko te meʼa ʼae ka hoko ki ʼou foha ʼe lua, ia Ofeni mo Fineasi, ʼe ko he fakailoga anai kia koe: ʼE nā mamate anai ʼi he ʼaho ʼe tahi.+ 35 Pea ʼe au fakanofo anai maʼaku he pelepitelo ʼe agatonu.+ ʼE ina fai anai te meʼa ʼae ʼe au loto ki ai. ʼE au fakatuʼu malohi anai maʼa ia he hologa fakapelepitelo, pea ʼe haʼele tuʼumaʼu anai ia ia, ia muʼa ʼo taku tagata fakanofo. 36 Pea ko he tahi pe ʼe kei toe ʼi tou fale, ʼe haʼu anai ʼo tulolo ʼi ʼona muʼa ke foaki age hona totogi pea mo he foʼi pane, pea ʼe ina ui anai: “Fakalelei siʼou loto, kae ke ke hinoʼi au ki he gaue fakapelepitelo ke au kai ai he moʼi pane.” ’ ”+

3 Lolotoga te temi ʼaia, neʼe gaue ia te kiʼi tama ko Samuele+ maʼa Sehova ia muʼa ʼo Eli, kae neʼe tahitahiga te palalau ʼa Sehova ʼi te ʼu ʼaho ʼaia, pea neʼe mole lahi te ʼu meʼa ʼae neʼe ha.+

2 ʼI te tahi ʼaho, neʼe takoto ia Eli ʼi te faʼahi ʼae ʼe takoto mahani ai, pea neʼe kua nenefu tana sio. Neʼe mole kei lava sio ki he meʼa.+ 3 Neʼe heʼeki matehi te malama ʼo te ʼAtua,+ pea neʼe takoto ia Samuele ʼi te fale lotu*+ ʼo Sehova, ʼae neʼe tuku ai te Aleka ʼo te ʼAtua. 4 Neʼe pauʼi leva e Sehova ia Samuele. Neʼe ina tali age: “Koʼeni au.” 5 Neʼe lele kia Eli ʼo ui: “Koʼeni au, he neʼe ke pauʼi au.” Kae neʼe ina ui age: “Neʼe mole au pauʼi atu. Toe alu ʼo takoto.” Koia, neʼe alu ai ʼo takoto. 6 Neʼe toe pauʼi e Sehova: “Samuele!” Neʼe tuʼu ake ai ia Samuele ʼo alu kia Eli pea neʼe ina ui: “Koʼeni au, he neʼe ke pauʼi au.” Kae neʼe ina ui age: “Siʼoku foha, neʼe mole au pauʼi atu. Toe alu ʼo takoto.” 7 (Neʼe heʼeki iloʼi e Samuele ia Sehova, pea neʼe heʼeki fakaha age kia ia he folafola mai ia Sehova.)+ 8 Koia neʼe toe pauʼi e Sehova, ko tona tuʼa tolu ʼaia: “Samuele!” Neʼe tuʼu ake ai ʼo alu kia Eli pea neʼe ina ui: “Koʼeni au, he neʼe ke pauʼi au.”

Neʼe mahino ai leva ia Eli neʼe ko Sehova ʼae neʼe ina pauʼi te kiʼi tama. 9 Koia neʼe ui e Eli kia Samuele: “Alu ʼo takoto, pea kapau ʼe pauʼi atu, ʼe tonu ke ke ui: ‘Sehova, palalau mai he ʼe fakalogo atu tau kaugana.’ ” Pea neʼe alu ai ia Samuele ʼo takoto.

10 Pea neʼe haʼu ia Sehova ʼo tuʼu ai, ohage ko tana fai ʼi muʼa atu, neʼe ina pauʼi: “Samuele, Samuele!” Neʼe tali e Samuele: “Palalau mai he ʼe fakalogo atu tau kaugana.” 11 Pea neʼe ui e Sehova kia Samuele: “Koʼeni, ʼe au fai anai he meʼa ʼi Iselaele pea ka logo he tahi ki ai ʼe kiʼia anai ʼona taliga.+ 12 ʼI te ʼaho ʼaia, ʼe au fai anai kia Eli te ʼu meʼa fuli ʼae neʼe au ui ʼo ʼuhiga mo tona famili, mai te kamata ki tona fakaʼosi.+ 13 ʼE tonu ke ke fakaha age kia ia ʼe au fakamauʼi anai tona famili ʼo talu ai ʼuhi ko te agahala ʼae ʼe ina iloʼi lelei,+ he ʼe laukovi ʼona foha ki te ʼAtua,+ pea neʼe mole ina fakatonutonuʼi naua.+ 14 Ko te tupuʼaga la ʼaia ʼo taku fakapapau ki te famili ʼo Eli, ʼe mole ʼuʼufi anai ʼi he temi tanatou agahala ʼaki he ʼu sakilifisio peʼe ko he ʼu molaga.”+

15 Neʼe takoto leva ia Samuele ʼo kaku ki te uhu pea neʼe ina avahi te ʼu matapa ʼo te fale ʼo Sehova. Neʼe mataku ia Samuele ʼi te fakamatala kia Eli te meʼa ʼae neʼe ha age ki ai. 16 Kae neʼe pauʼi e Eli ia Samuele ʼo ina ui: “Samuele, siʼoku foha!” Pea neʼe ina tali age: “Koʼeni au.” 17 Neʼe ina fehuʼi age: “Kotea te logo ʼae neʼe ina fakaha atu? Fakalelei, kae ʼaua naʼa ke fufu mai kia au. ʼE tauteaʼi lahi anai koe e te ʼAtua, mo kapau ʼe ke fufu mai kia au he folafola pe ʼe tahi ʼi te ʼu meʼa fuli ʼae neʼe ina ui atu.” 18 Pea neʼe fakaha age leva e Samuele ia meʼa fuli, ʼo mole ina fufu he meʼa. Neʼe ui e Eli: “ ʼE ko Sehova. Ke ina fai te meʼa ʼae ʼe lelei ki ʼona mata.”

19 Neʼe lahilahi ake ia Samuele. Pea neʼe nofo ia Sehova mo ia,+ pea neʼe mole ina tuku ke to noa* he folafola ʼe tahi ʼo ʼana folafola fuli. 20 Neʼe iloʼi leva e Iselaele katoa, mai Tane ki Pele-sepa, neʼe fakanofo ia Samuele ko te polofeta ʼa Sehova. 21 Pea neʼe hoko atu pe te ha ʼa Sehova ʼi Silo, he neʼe fakaha e Sehova ia ia totonu kia Samuele ʼi Silo ʼaki te folafola ʼa Sehova.+

4 Pea neʼe kaku te folafola ʼa Samuele ki Iselaele katoa.

Neʼe alu leva ia Iselaele ʼo tauʼi te kau Filisitini. Neʼe natou nonofo ʼi Epenesele, kae neʼe nonofo te kau Filisitini ʼi Afeke. 2 Neʼe fakaʼatu e te kau Filisitini tanatou kau solia ke natou tauʼi ia Iselaele, kae neʼe fakaalu ʼo kovi ia te tau ʼaia ʼo malo ai te kau Filisitini ʼi Iselaele. Neʼe natou tamateʼi ia tagata ʼe teitei toko 4 000 ʼi te faʼahi ʼae neʼe fai ai te tau. 3 ʼI te toe liliu ʼa te hahaʼi ki tonatou nofoʼaga, neʼe ui e te kau takitaki ʼo Iselaele: “He koʼe neʼe tuku e Sehova ke malo te kau Filisitini ia tatou ʼi te ʼaho nei?*+ Tou olo ʼo kumi mai te aleka ʼo te fuakava ʼa Sehova ʼae ʼi Silo,+ ke nofo mo tatou pea ke haofaki ai tatou mai te ʼu nima ʼo ʼotatou fili.” 4 Pea neʼe fekauʼi e te hahaʼi he kau tagata ki Silo, pea neʼe natou ʼaumai te aleka ʼo te fuakava ʼa Sehova ʼo te ʼatu kautau, ʼae ʼe ʼafio ʼi te ʼu fuga* kelupimi.+ Neʼe toe kau ai foki mo te ʼu foha ʼe lua ʼo Eli, ia Ofeni mo Fineasi,+ ʼi te ʼaumai ʼo te aleka ʼo te fuakava ʼa te ʼAtua moʼoni.

5 ʼI te temi pe ʼae neʼe fakahu ai te aleka ʼo te fuakava ʼa Sehova ki te nofoʼaga, neʼe kalaga leʼo lahi leva te kau Iselaele fuli, ʼo galulu ai te kele. 6 ʼI te logo ʼa te kau Filisitini ki te ʼu kalaga ʼaia, neʼe natou ui: “He koʼe kua logo mai te ʼu kalaga ʼaia ʼi te nofoʼaga ʼo te kau Hepeleo?” Ki muli age, neʼe natou iloʼi neʼe fakahu ia te Aleka ʼo Sehova ki te nofoʼaga. 7 Neʼe matataku ai te kau Filisitini, he neʼe natou ui: “Kua hu te ʼAtua ki te nofoʼaga.”+ Pea neʼe natou ui: “Malaʼia kia tatou, he neʼe heʼeki hoko he meʼa feia ʼi muʼa atu! 8 Malaʼia kia tatou! Ko ai ʼae ka ina haofaki tatou mai te ʼu nima ʼo te ʼAtua maʼoluga ʼaia? ʼE ko te ʼAtua ʼaia ʼae neʼe ina tauteaʼi ia Esipito ʼaki te ʼu faʼahiga malaʼia kehekehe ʼi te toafa.+ 9 Kau Filisitini, kotou lototoʼa ohage ko ni tagata, ke ʼaua naʼa kotou kaugana ki te kau Hepeleo ohage pe ko tanatou kaugana kia koutou.+ Kotou tau ohage ko ni tagata!” 10 Koia neʼe tau ai te kau Filisitini pea neʼe natou malo ʼi Iselaele.+ Neʼe tahi feholaki ai te kau Iselaele ki tona fale la. Neʼe lahi ʼaupito te mātea. Neʼe mamate te toko 30 000 kau solia Iselaele ʼae neʼe haʼele lalo. 11 Pea tahi ʼae meʼa, neʼe toʼo te Aleka ʼo te ʼAtua, pea neʼe mamate te ʼu foha ʼe lua ʼo Eli, ia Ofeni mo Fineasi.+

12 Neʼe hola he tagata ʼo Pesamino mai te faʼahi ʼae neʼe fai ai te tau, ʼo alu ki Silo ʼi te ʼaho ʼaia mo ʼona mutuʼi meʼa kua makahaehae pea kua kelekeleʼia tona ʼulu.+ 13 ʼI te tau atu ʼa te tagata, neʼe heka ia Eli ʼi te hekaʼaga ʼi te vaʼe ala ʼo atali, he neʼe hoha tona loto ʼo ʼuhiga mo te Aleka ʼo te ʼAtua moʼoni.+ Neʼe hu te tagata ki te kolo ʼo fakaha te logo, pea neʼe kalaga leva te kolo katoa. 14 ʼI te logo ʼa Eli ki te ʼu kalaga ʼaia, neʼe ina fehuʼi: “Kotea te fakaʼuhiga ʼo te ʼu kalaga ʼaia?” Neʼe alu fakavilivili atu aipe te tagata ʼo fakaha te logo kia Eli. 15 (Neʼe kua taʼu 98 ia Eli, pea neʼe mole kei lava sio ki he meʼa.)+ 16 Pea neʼe ui e te tagata kia Eli: “Ko au ʼaeni neʼe haʼu mai te faʼahi ʼae ʼe fai ai te tau! Neʼe au hola mai ai ʼi te ʼaho pe ʼaeni.” Neʼe ina fehuʼi age: “Siʼoku foha, kotea ʼae neʼe hoko?” 17 Pea neʼe ui age e te tagata ʼae neʼe haʼu mo te logo: “Neʼe hola ia Iselaele ia muʼa ʼo te kau Filisitini pea neʼe lahi te mātea ʼi te lotolotoiga ʼo te hahaʼi.+ Ko ʼou foha ʼe lua, ia Ofeni mo Fineasi, kua mamate,+ pea kua toʼo te Aleka ʼo te ʼAtua moʼoni.”+

18 ʼI te temi ʼae neʼe talanoa ai ʼo ʼuhiga mo te Aleka ʼo te ʼAtua moʼoni, neʼe to ia Eli ki muli mai tona hekaʼaga ʼae neʼe ovi ki te matapa, ʼo fasi tona kia mo mate ai, he neʼe kua matuʼa pea neʼe mamafa. Neʼe ina fakamauʼi ia Iselaele lolotoga taʼu ʼe 40. 19 Neʼe faitama te ʼohoana ʼo tona foha ko Fineasi pea neʼe kua vave fanau. ʼI tana logo ʼae kua toʼo ia te Aleka ʼo te ʼAtua moʼoni pea kua mate tona ʼohoana mo te tamai ʼo tona ʼohoana, neʼe mapelu ifo aipe he neʼe laga fakapunamaʼuli tona mamahi pea fanau ai. 20 ʼI tana ʼamanaki mate, neʼe ui e te ʼu fafine ʼae neʼe tutuʼu ʼi ʼona tafa: “ ʼAua naʼa ke mataku, he neʼe ke fanauʼi he tamasiʼi tagata.” Kae neʼe mole ina tali age pea neʼe mole ina tokagaʼi te faʼahi ʼaia. 21 Kae neʼe ina fakahigoaʼi te kiʼi tamasiʼi ko Ikapote,*+ he neʼe ina ui: “Kua mavae te kololia ʼi Iselaele,”+ ʼuhi kua toʼo te Aleka ʼo te ʼAtua moʼoni pea mo te aluʼaga ʼae neʼe hoko ki tona ʼohoana mo te tamai ʼo tona ʼohoana.+ 22 Neʼe ina ui: “Kua mavae te kololia ʼi Iselaele, he neʼe toʼo te Aleka ʼo te ʼAtua moʼoni.”+

5 ʼI te toʼo e te kau Filisitini ia te Aleka+ ʼo te ʼAtua moʼoni ʼi Epenesele, neʼe natou ʼave leva ki Asoti. 2 Pea neʼe toʼo e te kau Filisitini ia te Aleka ʼo te ʼAtua moʼoni ʼo ʼave ki te fale* ʼo Takone, ʼo fakatuʼu ia tafa ʼo Takone.+ 3 ʼI te ʼaho ake, ʼi te ʼaʼala ʼa te kau Asoti ʼi te kei uhuuhu, neʼe kua to foʼohifo ia Takone ki te kele ia muʼa ʼo te Aleka ʼo Sehova.+ Pea neʼe natou toʼo ai ia Takone ʼo toe fakatuʼu ki tona tuʼuʼaga.+ 4 ʼI te ʼaho ʼae neʼe hoa mai ki ai, ʼi tanatou ʼaʼala ake ʼi te kei uhuuhu, neʼe kua to foʼohifo ia Takone ki te kele ia muʼa ʼo te Aleka ʼo Sehova. Neʼe kua tuʼusi te ʼulu ʼo Takone mo ʼona nima, pea neʼe leta ʼi te huʼaga. Neʼe gata pe ki te faʼahi ʼae neʼe hage ko he ika* neʼe kei katoa. 5 Ko te tupuʼaga la ʼaia ʼo te mole haʼeleʼi e te kau pelepitelo ʼo Takone pea mo natou fuli ʼae ʼe hu ki te fale ʼo Takone ia te huʼaga ʼo te fale ʼo Takone ʼi Asoti, ʼo kaku mai ki te ʼaho ʼaeni.

6 Neʼe fakafeagai ia Sehova ki te kau Asoti, pea neʼe ina tauteaʼi ia Asoti mo te ʼu kolo ʼae ʼi ʼona tafaʼaki ʼaki te mahaki ʼae ko te mulito.+ 7 ʼI te sisio ʼa te ʼu tagata ʼo Asoti ki te meʼa ʼae neʼe hoko, neʼe natou ui: “ ʼE mole tonu ke nofo te Aleka ʼo te ʼAtua ʼo Iselaele mo tatou, he neʼe fakafeagai ʼaupito mai kia tatou pea mo totatou ʼatua ko Takone.” 8 Koia neʼe natou fekauʼi ai ke fakatahitahi mai te kau ʼaliki fuli ʼo te kau Filisitini, pea neʼe natou fehuʼi age: “Kotea ʼae ʼe tonu ke matou fai ki te Aleka ʼo te ʼAtua ʼo Iselaele?” Neʼe natou tali age: “Kotou ʼave te Aleka ʼo te ʼAtua ʼo Iselaele ki Kiete.”+ Neʼe natou ʼave ai te Aleka ʼo te ʼAtua ʼo Iselaele ki ai.

9 Hili tanatou ʼave ki ai, neʼe fakafeagai ia Sehova ki te kolo, ʼo ina fakatupu he toe maveuveu lahi. Neʼe ina tauteaʼi te hahaʼi ʼo te kolo ʼaki te mahaki ʼae ko te mulito, mai ia natou liliki ki te kau lalahi.+ 10 Koia neʼe natou ʼave ai te Aleka ʼo te ʼAtua moʼoni ki Ekelone,+ kae ʼi te tau atu pe ʼa te Aleka ʼo te ʼAtua moʼoni ki Ekelone, neʼe kamata kalaga te kau Ekelone: “Neʼe natou ʼaumai te Aleka ʼo te ʼAtua ʼo Iselaele ke tou mamate ai ʼo feia mo tatatou hahaʼi!”+ 11 Koia neʼe natou fekauʼi leva ke fakatahitahi mai te kau ʼaliki fuli ʼo te kau Filisitini, pea neʼe natou ui: “Ke ʼave ia te Aleka ʼo te ʼAtua ʼo Iselaele. Ke toe fakaliliu ki tona nofoʼaga naʼa matou mamate ʼo feia mo tamatou hahaʼi.” Koteʼuhi neʼe mafola ʼi te kolo katoa te mataku ʼae ki te mate. Neʼe fakafeagai ʼaupito ia te ʼAtua moʼoni kia natou,+ 12 pea ko te hahaʼi ʼae neʼe mole mamate neʼe tauteaʼi leva natou ʼaki te mahaki ʼae ko te mulito. Pea neʼe hake ki selo te kole tokoni ʼa te kolo.

6 Neʼe nofo te Aleka+ ʼo Sehova ʼi te fenua ʼo te kau Filisitini lolotoga mahina ʼe fitu. 2 Neʼe pauʼi leva e te kau Filisitini ia te kau pelepitelo mo te kau faifakakikite,+ pea neʼe natou fehuʼi age: “Kotea ʼae ʼe tonu ke matou fai ki te Aleka ʼo Sehova? Fakaha mai pe ʼe tonu ke fakaliliu feafeaʼi ki tona nofoʼaga.” 3 Neʼe natou tali age: “Kapau ʼe kotou fakaliliu te aleka ʼo te fuakava ʼa Sehova te ʼAtua ʼo Iselaele, ʼaua naʼa kotou fakaliliu ʼatea. ʼE tonu ke kotou fakaliliu kia te ia mo he sakilifisio fakatokatoka.+ Kapau ʼe kotou fai feia, ʼe kotou malolo anai pea ʼe kotou iloʼi anai pe koʼe neʼe ina tauteaʼi koutou.” 4 Pea neʼe natou fehuʼi age: “Kotea te sakilifisio fakatokatoka ʼae ʼe tonu ke matou ʼave kia te ia?” Neʼe natou tali: “Kotou ʼave ni fakatata aulo ʼe nima ʼo ʼokotou fufula* pea mo ni kuma aulo ʼe nima, ʼo mulimuli ki te lahi ʼo te kau ʼaliki ʼo te kau Filisitini+ he neʼe tatau te tautea ʼae neʼe hoko kia koutou takitahi pea mo takotou kau ʼaliki. 5 ʼE tonu ke kotou fai he ʼu fakatata ʼo ʼokotou fufula pea mo ʼakotou kuma+ ʼae ʼe natou maumauʼi ia te fenua, pea ʼe tonu ke kotou fakamaʼuhigaʼi te ʼAtua ʼo Iselaele. ʼE lagi ina pulihi anai te tautea ia koutou, mo tokotou ʼatua pea mo tokotou fenua.+ 6 He koʼe koa ʼe kotou fakafefeka ʼokotou loto ohage ko te fakafefeka e te kau Esipito pea mo Falaone ʼonatou loto?+ ʼI Tana tauteaʼi lahi natou,+ neʼe tonu ai ke natou fakamavae ia Iselaele, pea neʼe olo ai te kau Iselaele.+ 7 ʼI te lakaga leva ʼaeni, kotou teuteuʼi he saliote foʼou, mo he ʼu pipi fafine ʼe lua ʼe kei nā fafaga ʼonā ʼuhi, neʼe heʼeki hili kia naua he ʼakau ʼamo. Pea kotou haʼi leva te ʼu pipi ki te saliote, kae kotou fakaliliu ʼonā ʼuhi ke mamaʼo mai ia naua. 8 Pea kotou toʼo te Aleka ʼo Sehova ʼo hili ki te saliote, mo tuku ki ʼona tafa he kiʼi puha neʼe kotou ʼai ki ai te ʼu fakatata aulo ʼae ka kotou ʼave kia te ia ohage ko he sakilifisio fakatokatoka.+ Kotou tuku leva te saliote ke alu 9 pea kotou sioʼi: Kapau ʼe alu ʼi te ala ʼo Pete-semesi,+ ki tona fenua totonu, pea ʼe ko te ʼAtua ʼae neʼe ina fai te toe meʼa kovi ʼaia kia tatou. Kae kapau ʼe mole alu ai, ʼe tou iloʼi ai anai neʼe mole ko ia ʼae neʼe ina tauteaʼi tatou, kae neʼe hoko feia pe ia.”

10 Neʼe mulimuli ki ai te hahaʼi. Neʼe natou toʼo te ʼu pipi fafine ʼe lua ʼe kei nā fafaga ʼonā ʼuhi pea neʼe natou haʼi ki te saliote, kae neʼe natou ʼave te ʼu ʼuhi ki te lotoʼa manu. 11 Neʼe natou hili leva te Aleka ʼo Sehova ki te saliote, ʼo feia mo te kiʼi puha ʼae neʼe tuku ai te ʼu kuma aulo pea mo te ʼu fakatata ʼo ʼonatou fufula. 12 Pea neʼe olo fakahagatonu te ʼu pipi ʼi te ala ʼae ki Pete-semesi.+ Neʼe nā olo aipe ʼi te ala lahi mo tagi, pea neʼe mole nā olo ki te faʼahi mataʼu peʼe ki te faʼahi hema. Lolotoga te temi ʼaia, neʼe muliʼi naua e te kau ʼaliki ʼo te kau Filisitini ʼo kaku ki te tuʼakoi ʼo Pete-semesi. 13 Neʼe lolotoga utu e te hahaʼi ʼo Pete-semesi te fulumeto ʼi te potu fenua laulelei. ʼI tanatou hiki ake ʼonatou mata ʼo sisio ki te Aleka, neʼe natou fiafia ʼaupito ai. 14 Neʼe alu te saliote ki te gaueʼaga ʼa Sosue, te tagata Pete-semesi pea neʼe tuʼu ovi leva ki he foʼi maka lahi. Neʼe natou toʼo te ʼu ʼakau ʼo te saliote ʼo fahi, pea neʼe natou momoli te ʼu pipi+ ohage ko he ʼu holokoseta* kia Sehova.

15 Neʼe fakahifo leva e te kau Levite+ te Aleka ʼo Sehova mo te kiʼi puha ʼae neʼe tuku ai te ʼu fakatata aulo, ʼo natou hili ki te foʼi maka lahi. Neʼe momoli e te hahaʼi ʼo Pete-semesi+ te ʼu holokoseta pea mo he ʼu sakilifisio ʼi te ʼaho ʼaia kia Sehova.

16 ʼI te sisio ʼa te kau ʼaliki ʼe toko nima ʼo te kau Filisitini ki te faʼahi ʼaia, neʼe natou toe liliu leva ki Ekelone ʼi te ʼaho pe ʼaia. 17 Pea koʼeni te ʼu fakatata aulo ʼo ʼonatou fufula ʼae neʼe ʼave e te kau Filisitini kia Sehova ohage ko he sakilifisio fakatokatoka:+ ko te tahi maʼa Asoti,+ mo te tahi maʼa Kasa, mo te tahi maʼa Asekaloni, mo te tahi maʼa Kiete+ pea mo te tahi maʼa Ekelone.+ 18 Pea ko te lahi ʼo te ʼu kuma aulo neʼe mulimuli ki te lahi ʼo te ʼu kolo fuli ʼa te kau Filisitini ʼae neʼe puleʼi e te kau ʼaliki ʼe toko nima, ia te ʼu kolo tau mo te ʼu kolo liliki.

Pea ko te foʼi maka lahi ʼae neʼe hili ki ai te Aleka ʼo Sehova ʼe ko he fakamoʼoni ʼi te gaueʼaga ʼa Sosue, te tagata Pete-semesi ʼo kaku mai ki te ʼaho nei. 19 Kae neʼe matehi e te ʼAtua te hahaʼi ʼo Pete-semesi, he neʼe natou sioʼi te Aleka ʼo Sehova. Neʼe ina matehi te toko 50 070 hahaʼi,* pea neʼe lauga leva te hahaʼi he neʼe kaugamalie ia natou ʼae neʼe matehi e Sehova.+ 20 Koia neʼe fehuʼi e te hahaʼi ʼo Pete-semesi: “Ko ai ka lava tuʼu ia muʼa ʼo Sehova, te ʼAtua maʼoniʼoni ʼaia?+ Pea ka mavae ia tatou ʼe alu kia ai?”+ 21 Neʼe natou fekauʼi leva he ʼu tagata ʼave logo ki te hahaʼi ʼo Kiliate-sealimi,+ ke natou ui age: “Kua fakaliliu mai e te kau Filisitini ia te Aleka ʼo Sehova. Kotou ʼomai ʼo ʼave.”+

7 Neʼe ʼomai ai te ʼu tagata ʼo Kiliate-sealimi pea neʼe natou toʼo te Aleka ʼo Sehova ʼo tuku ki te ʼapi ʼo Apinatape+ ʼae neʼe tuʼu ʼi te kiʼi moʼuga. Pea neʼe natou fakanofo* ia Eleasale tona foha ke ina leʼo te Aleka ʼo Sehova.

2 Neʼe fakalaka he temi loaloaga, ia taʼu ʼe 20, talu mai te ʼaho ʼae neʼe ʼaumai ai te Aleka ki Kiliate-sealimi, pea ko te hahaʼi katoa ʼo Iselaele neʼe natou kamata kumi ia* Sehova.+ 3 Neʼe ui leva e Samuele ki te hahaʼi katoa ʼo Iselaele: “Kapau ʼe kotou toe liliu mai kia Sehova mo tokotou loto katoa,+ kotou pulihi te ʼu ʼatua matapule+ mo te ʼu fakatata ʼo Asetolete,+ pea kotou foaki tokotou loto katoa kia Sehova pea mo tauhi kia te ia tokotahi pe.+ Pea ʼe ina haofaki anai koutou mai te ʼu nima ʼo te kau Filisitini.”+ 4 Neʼe liʼaki leva e te kau Iselaele te ʼu Paale pea mo te ʼu fakatata ʼo Asetolete, pea neʼe natou tauhi kia Sehova tokotahi pe.+

5 Pea neʼe ui e Samuele: “Kotou fakamaʼopoʼopo ia Iselaele katoa ki Misipa,+ pea ʼe au faikole anai kia Sehova maʼa koutou.”+ 6 Koia neʼe natou maʼopoʼopo mai ai ki Misipa, pea neʼe natou ohu he moʼi vai ʼo liligi ia muʼa ʼo Sehova pea neʼe natou sesunio leva ʼi te ʼaho ʼaia.+ Neʼe natou ui: “Neʼe tou agahala kia Sehova.”+ Pea neʼe kamata gaue ia Samuele ʼi tona ʼuhiga tuʼi fakamau+ ki te kau Iselaele ʼi Misipa.

7 ʼI te logo ʼa te kau Filisitini neʼe maʼopoʼopo te kau Iselaele ki Misipa, neʼe ʼomai ai te kau ʼaliki ʼo te kau Filisitini+ ʼo fakafeagai ki Iselaele. ʼI te logo ʼa te kau Iselaele ki ai, neʼe natou matataku ʼi te kau Filisitini. 8 Koia neʼe ui e te kau Iselaele kia Samuele: “ ʼAua naʼa tuku tau kole ʼae kia Sehova totatou ʼAtua ke tokoni mai+ pea ke ina haofaki tatou mai te ʼu nima ʼo te kau Filisitini.” 9 Neʼe toʼo leva e Samuele he ʼuhiʼi akeno ʼo ina momoli ko he holokoseta+ kia Sehova. Neʼe kole ai e Samuele kia Sehova ke tokoni ki Iselaele, pea neʼe tali e Sehova ki tana kole.+ 10 ʼI te lolotoga momoli e Samuele ia te holokoseta, neʼe fakaovi mai te kau Filisitini ke natou tauʼi ia Iselaele. Neʼe fakaʼuʼulu e Sehova te mana+ ki te kau Filisitini ʼi te ʼaho ʼaia, pea neʼe Ina fakatupu he maveuveu ia natou,+ ʼo malo ai te kau Iselaele ia natou.+ 11 Neʼe mavae ai te kau tagata ʼo Iselaele ʼi Misipa ʼo natou tuli te kau Filisitini, mo matehi natou ʼo kaku ki te potu saute ʼo Pete-kali. 12 Neʼe toʼo leva e Samuele he foʼi maka+ ʼo fakatuʼu ʼi te vaha ʼo Misipa mo Sekana, pea neʼe ina fakahigoaʼi ko Epenesele,* he neʼe ina ui: “Neʼe tokoni mai ia Sehova ʼo kaku mai ki te ʼaho nei.”+ 13 ʼI te mole malo ʼaia ʼa te kau Filisitini, neʼe tuku ai tanatou ʼohofi ia te fenua ʼo Iselaele.+ Pea neʼe fakafeagai tuʼumaʼu pe ia Sehova ki te kau Filisitini ʼi te maʼuli katoa ʼo Samuele.+ 14 Ko te ʼu kolo ʼae neʼe toʼo e te kau Filisitini mai Iselaele neʼe toe liufaki age ki Iselaele, mai Ekelone ki Kiete, pea neʼe toe toʼo e Iselaele tona fenua mai te kau Filisitini.

Pea neʼe toe tokalelei foki ia Iselaele mo te kau Amole.+

15 Neʼe fakamauʼi e Samuele ia Iselaele ʼi tona maʼuli katoa.+ 16 ʼI te taʼu fuli neʼe fealuʼaki ʼi Petele,+ mo Kilekale+ pea mo Misipa+ pea neʼe ina fakamauʼi ia Iselaele ʼi te ʼu koga meʼa fuli ʼaia. 17 Kae neʼe toe liliu ki Lama+ he neʼe tuʼu ai tona ʼapi, pea neʼe ina toe fakamauʼi ai foki ia Iselaele. Neʼe ina laga ʼi ai he ʼaletale maʼa Sehova.+

8 ʼI te kua ʼosi matuʼa leva ʼo Samuele, neʼe ina fakanofo ʼona foha ko ni tuʼi fakamau ʼo Iselaele. 2 Neʼe higoa tona ʼuluaki foha ko Soele, pea ko te lua ko Apisa.+ Neʼe nā faifakamau ʼi Pele-sepa. 3 Kae neʼe mole haʼele ʼona foha ʼi ʼona ala. Neʼe nā faiga ke nā maʼu falā pea neʼe nā agakaka.+ Neʼe nā toe tali te ʼu meʼa ʼofa ʼae neʼe foaki fakakaka age,+ pea neʼe mole faitotonu ʼanā fakamau.+

4 Ki muli age, neʼe fakatahitahi te kau takitaki fuli ʼo Iselaele pea natou olo kia Samuele ʼi Lama. 5 Neʼe natou ui age ki ai: “Koʼeni kua ke matuʼa pea ʼe mole haʼele ʼou foha ʼi ʼou ala. Koia ke ke fakanofo ʼi te lakaga nei homatou hau ke ina fakamauʼi matou ohage ko te ʼu puleʼaga fuli ʼae.”+ 6 Kae neʼe mole leleiʼia e* Samuele tanatou ui: “Ke ke fakanofo homatou hau ke ina fakamauʼi matou.” Neʼe faikole ai ia Samuele kia Sehova, 7 pea neʼe ui e Sehova kia ia: “Fakalogo kia meʼa fuli ʼe ui atu e te hahaʼi, koteʼuhi ʼe mole ko koe ʼae neʼe natou liʼaki, kae ko au ʼae neʼe natou liʼaki ke mole au toe pule kia natou.+ 8 ʼE natou fai te meʼa ʼae neʼe natou fai talu mai te ʼaho ʼae neʼe au fakamavae ai natou mai Esipito, ʼo kaku mai ki te ʼaho nei. ʼE natou haga liʼaki au+ mo tauhi ki te tahi age ʼu ʼatua,+ pea koia pe ʼaeni ʼe natou fai kia koe. 9 Koia fakalogo kia natou. Kae ʼe tonu ke ke fakatokaga ia natou, ʼo ke fakaha age te ʼu faʼahi ʼae ʼe feala ke fakamaʼua age e te hau ʼae ka pule kia natou.”

10 Koia, neʼe fakaha e Samuele te ʼu folafola fuli ʼa Sehova ki te hahaʼi ʼae neʼe natou kole age honatou hau. 11 Neʼe ina ui: “Koʼeni te ʼu meʼa ʼae ʼe feala ke fakamaʼua atu e te hau ʼae ka pule kia koutou:+ ʼE ina toʼo anai ʼokotou foha+ ke natou taki ʼana saliote+ pea ʼe natou liliu anai ko ʼana tagata heka hosi.+ ʼE tonu anai ke lele ʼihi ʼi muʼa ʼo ʼana saliote. 12 Pea ʼe ina fakanofo anai maʼa ia he kau takitaki ki te toko afe+ pea mo he kau takitaki ki te toko nimagofulu.+ Pea ʼe fuli anai e ʼihi tona kele,+ mo tanaki tana taʼukai,+ mo natou faʼu hana ʼu mahafu tau pea mo he ʼu meʼa ʼe ʼaoga ki ʼana saliote.+ 13 ʼE ina toʼo anai ʼokotou ʼofafine ke natou fai he ʼu lolo magoni,* mo kuka, pea mo taʼo te pane.+ 14 ʼE ina toʼo anai te meʼa ʼae ʼe lelei ʼi ʼakotou gaueʼaga, mo ʼakotou gaueʼaga vite, mo ʼakotou gaueʼaga oliveto+ pea ʼe ina foaki anai ki ʼana hahaʼi faifekau. 15 ʼE ina toʼo anai te vahe tahi ki te hogofulu ʼo te ʼu fua ʼo ʼakotou gaueʼaga mo ʼakotou gaueʼaga vite, pea ʼe ina foaki anai ki tana hahaʼi ʼae ʼe gaue ʼi te fale hau mo ʼana hahaʼi faifekau. 16 ʼE ina toʼo anai ʼakotou tagata mo fafine faifekau, mo ʼakotou faga pipi ʼae ʼe lelei, mo ʼakotou asino pea ʼe ina fakaʼaogaʼi anai ki tana gaue.+ 17 ʼE ina toʼo anai te vahe tahi ki te hogofulu ʼo ʼakotou faga ovi,+ pea ʼe kotou liliu anai ko ʼana kaugana. 18 ʼE hoko mai anai te ʼaho ʼae ka kotou kalaga ai ʼuhi ko te hau ʼae neʼe kotou filifili,+ kae ʼe mole tali atu anai ia Sehova ʼi te ʼaho ʼaia.”

19 Kae neʼe mole fia fakalogo te hahaʼi ki te ʼu meʼa ʼae neʼe fakaha age e Samuele, pea neʼe natou ui: “ ʼE mole meʼa ia, ʼe loto pe matou ki homatou hau. 20 ʼE matou hage leva ko te ʼu puleʼaga fuli ʼae, pea ʼe fakamauʼi anai matou e tomatou hau, mo ina takitaki matou pea ʼe ina tauʼi anai ʼomatou fili.” 21 ʼI te ʼosi logo ʼa Samuele ki te ʼu palalau fuli ʼaia ʼa te hahaʼi, neʼe ina fakaha age leva kia Sehova. 22 Neʼe ui e Sehova kia Samuele: “Fakalogo kia natou, pea ke fakanofo he hau ke pule kia natou.”+ Pea neʼe ui leva e Samuele ki te kau tagata ʼo Iselaele: “Kotou tahi liliu ki tona kolo.”

9 Neʼe ʼi ai te tagata mai Pesamino neʼe higoa ko Kisi,+ te foha ʼo Apiele, te foha ʼo Teselole, foha ʼo Pekolate, foha ʼo Afiake, te tagata Pesamino+ pea neʼe koloaʼia ʼaupito. 2 Neʼe ʼi ai tona foha neʼe higoa ko Saulo,+ neʼe tupulaga mo talavou, neʼe mole he tagata ʼi te kau Iselaele neʼe talavou age ia ia, pea neʼe lahi age* ʼi te hahaʼi fuli.

3 ʼI te temi ʼae neʼe pupuli ai te ʼu asino* ʼa Kisi, te tamai ʼa Saulo, neʼe ui e Kisi ki tona foha ko Saulo: “Fakalelei siʼou loto, kae ke ke toʼo he tahi ʼi te kau gaue ke alu mo koe ʼo kumi te ʼu asino.” 4 Neʼe nā fakalaka ʼi te potu moʼugaʼia ʼo Efalaimi pea mo te fenua ʼo Salisa, kae neʼe mole nā maʼu. Neʼe nā fakalaka ʼi te fenua ʼo Sekalaimi, kae neʼe mole nā maʼu te ʼu asino. Neʼe nā fakalaka leva ʼi te fenua katoa ʼo te kau Pesamino, kae neʼe mole nā maʼu.

5 ʼI tanā tau atu ki te fenua ko Tesufe, neʼe ui e Saulo ki tana tagata gaue ʼae neʼe alu mo ia: “Haʼu kae ta toe liliu, naʼa mole kei tuʼania taku tamai ʼo ʼuhiga mo te ʼu asino, kae kua tuʼania ia ʼo ʼuhiga mo taua.”+ 6 Kae neʼe tali age e te tagata gaue: “ ʼE nofo ʼi te kolo ʼaeni he tagata ʼa te ʼAtua, ko he tagata ʼe fakaʼapaʼapaʼi. Pea ko te ʼu meʼa fuli ʼae ʼe ina ui ʼe hoko moʼoni ia.+ Ta olo ki ai. ʼE lagi feala anai ke ina fakaha mai te ala ʼae ʼe tonu ke ta olo ai.” 7 Neʼe ui e Saulo ki tana tagata gaue: “Kapau ʼe ta olo, pea kotea ʼae ka ta ʼave ki te tagata? ʼE mole kei ʼi ai he moʼi pane ʼi ʼatā kato, pea ʼe mole he meʼa ʼofa ke ta ʼave ki te tagata ʼa te ʼAtua moʼoni. Kotea ʼae ʼe ta maʼu?” 8 Pea neʼe ui e te tagata gaue kia Saulo: “Koʼeni ʼe au maʼu te vahe tahi ki te fa ʼo he sikele* siliva. ʼE au foaki anai ki te tagata ʼa te ʼAtua moʼoni, pea ʼe ina fakaha mai anai te ala ʼae ʼe tonu ke ta olo ai.” 9 (ʼI te temi muʼa, ʼi Iselaele neʼe ui e he tagata neʼe alu ʼo kumi te ʼAtua: “Kotou ʼomai, pea ke tou olo ki te tagata ʼae ʼe ina iloʼi te ʼu meʼa ʼae neʼe ha.”+ Koteʼuhi ko he polofeta ʼi te temi ʼaeni, neʼe ui ʼi te temi muʼa ko he tagata ʼe ina iloʼi te ʼu meʼa ʼae neʼe ha.) 10 Pea neʼe ui e Saulo ki tana tagata gaue: “ ʼE lelei te meʼa ʼae neʼe ke ui. Ta olo.” Neʼe nā olo leva ki te kolo ʼae neʼe nofo ai te tagata ʼa te ʼAtua moʼoni.

11 ʼI tanā olo ʼaia ʼi te mahake ki te kolo, neʼe nā felaveʼi mo te ʼu taʼahine neʼe ʼomai ʼo ohu vai. Neʼe nā fehuʼi age kia natou: “ ʼE nofo la ʼi heni te tagata ʼae ʼe ina iloʼi te ʼu meʼa ʼae neʼe ha?”+ 12 Neʼe natou tali: “ ʼEi, koʼe atu. Kolua foimo olo, he neʼe haʼu ʼi te ʼaho nei ki te kolo, koteʼuhi ʼe fai anai e te hahaʼi he sakilifisio+ ʼi te ʼaho nei ʼi te faʼahi maʼoluga.+ 13 Ka kolua tau atu pe ki te kolo, ʼe kolua maʼu anai ia ia ʼi muʼa ʼo tana hake ki te faʼahi maʼoluga ʼo kai. ʼE mole kakai anai te hahaʼi kae heʼeki tau age, he ʼe ko ia ʼae ʼe tonu ke ina tapuakiʼi te sakilifisio. Pea hili tana tapuakiʼi, ʼe feala leva ke kakai te kau fakaafe. Koia kolua foimo hake, pea ʼe kolua maʼu anai ia ia.” 14 Neʼe nā hake ai ki te kolo. ʼI tanā kaku atu ki te loto kolo, neʼe haʼu ia Samuele ʼo fakafelaveʼi kia naua pea neʼe natou hake ki te faʼahi maʼoluga.

15 Ia muʼa ʼo te haʼu ʼa Saulo, neʼe ui age e Sehova kia Samuele: 16 “Apogipogi ʼi te hola pe ʼaeni, ʼe au fekauʼi atu anai he tagata mai te fenua ʼo Pesamino.+ ʼE tonu ke ke fakanofo* ia ia ko te tagata takitaki ʼo Iselaele taku hahaʼi,+ pea ʼe ina haofaki anai taku hahaʼi mai te ʼu nima ʼo te kau Filisitini. Koteʼuhi neʼe au sio ki te mamahi ʼo taku hahaʼi pea neʼe kaku mai kia te au ʼanatou tagi.”+ 17 ʼI te sio ʼa Samuele kia Saulo, neʼe ui age e Sehova kia ia: “Koʼeni te tagata ʼae neʼe au ui atu ʼe ina puleʼi anai taku hahaʼi.”+

18 Neʼe fakaovi age ia Saulo kia Samuele ʼi te matapa pea neʼe ina ui: “Fakalelei siʼou loto, kae ke ke fakaha mai pe ʼe ʼifea te ʼapi ʼo te tagata ʼae ʼe ina iloʼi te ʼu meʼa ʼae neʼe ha.” 19 Neʼe tali e Samuele kia Saulo: “ ʼE ko au te tagata ʼae ʼe ina iloʼi te ʼu meʼa ʼae neʼe ha. Muʼamuʼa atu ki te faʼahi ʼae ʼe maʼoluga. ʼE kolua kakai anai mo au ʼi te ʼaho nei.+ ʼE au tuku anai ke ke alu apogipogi uhu, pea ʼe au fakaha atu anai te ʼu meʼa fuli ʼae ʼe ke fia iloʼi.* 20 ʼAua naʼa ke hoha ki te ʼu asino ʼae neʼe pupuli kua hili ki ai ʼaho ʼe tolu,+ he ʼe kua ʼosi maʼu ia. Pea ʼe ʼa ai te ʼu meʼa lelei fuli ʼae ʼi Iselaele? ʼE mole koa la ʼa koe pea mo te fale katoa ʼo tau tamai?”+ 21 Kae neʼe tali age e Saulo: “Ko au ko he tagata mai Pesamino, te telepi ʼae ʼe veliveli ʼaupito ʼi te ʼu telepi ʼo Iselaele,+ pea ʼe mole iloa toku famili ʼi te ʼu famili fuli ʼo te telepi ʼo Pesamino. Koia, he koʼe ʼe ke palalau feia mai?”

22 Neʼe toʼo leva e Samuele ia Saulo mo tana tagata gaue, ʼo ʼave naua ki te fale kai pea mo ina foaki age he nofoʼaga maʼuhiga ʼi te kau fakaafe. Neʼe ko tagata ʼe teitei toko 30. 23 Neʼe ui e Samuele ki te tagata faikuka: “ ʼAumai te vahe ʼae neʼe au foaki atu pea neʼe au ui atu ke ke tuku keheʼi.” 24 Neʼe ʼaumai e te tagata faikuka te alaga pea mo te ʼu meʼa ʼae neʼe ʼi ai, ʼo ina tuku ia muʼa ʼo Saulo. Pea neʼe ui e Samuele: “Kua tuku atu ki ʼou muʼa te meʼa ʼae neʼe tuku keheʼi. Ke ke kai, he neʼe tuku keheʼi maʼa koe ki te lakaga ʼaeni. He neʼe au ui: ‘ ʼE ʼi ai taku kau fakaafe.’ ” Neʼe kakai ai ia Saulo pea mo Samuele ʼi te ʼaho ʼaia. 25 Pea neʼe natou hihifo mai te faʼahi maʼoluga+ ʼo olo ki te kolo, pea neʼe hoko atu tana faipalalau mo Saulo ʼi te fuga fale. 26 Neʼe nā tutuʼu ake leva kei uhuuhu, pea ʼi te mafoa ʼo te ʼaho neʼe pauʼi e Samuele ia Saulo ʼi te fuga fale, ʼo ina ui: “Ke ke teuteu, ke feala haku tuku koe ke ke alu.” Koia neʼe teuteu ai ia Saulo pea neʼe hu ki tuʼa mo Samuele. 27 ʼI tanatou lolotoga olo ki te ʼu tafaʼaki ʼo te kolo, neʼe ui e Samuele kia Saulo: “Ui age ki tau tagata gaue+ ke muʼamuʼa,” pea neʼe alu ai. “Kae tuʼu muʼa koe ʼi heni, ke au fakaha atu te folafola ʼa te ʼAtua.”

10 Neʼe toʼo leva e Samuele te hina lolo ʼo liligi ki te ʼulu ʼo Saulo.+ Neʼe ʼuma ki ai pea neʼe ina ui: “Neʼe mole fakanofo koa la koe e Sehova ke ke takitaki+ tana hahaʼi?*+ 2 Ka ke alu ʼi te ʼaho nei, ʼe ke felaveʼi anai mo he ʼu tagata ʼe lua ʼe tutuʼu ovi ʼi te fale maka ʼo Lasele,+ ʼi Teselesake, ʼi te fenua ʼo Pesamino, pea ʼe nā ui atu anai: ‘Kua maʼu te ʼu asino ʼae neʼe ke alu ʼo kumi, pea kua galoʼi e tau tamai te ʼu asino ʼaia+ kae kua tuʼania ia ʼo ʼuhiga mo koulua. ʼE ina ui: “Kotea ʼae ʼe tonu ke au fai ʼo ʼuhiga mo toku foha?” ’ 3 ʼE tonu ke hoko atu tau faifagona ʼo aʼu ki te fuʼu ʼakau lahi ʼo Tapole, pea ʼe ke felaveʼi ai anai mo he ʼu tagata ʼe toko tolu ʼe hake ki te ʼAtua moʼoni ʼi Petele.+ ʼE toʼo e te tahi te ʼu tao kei mui ʼe tolu, pea ʼe toʼo e te tahi te ʼu foʼi pane ʼe tolu pea ʼe ʼamo leva e te tahi he toe ʼaiʼaga vino lahi. 4 ʼE natou fehuʼi atu anai pe ʼe ke feafeaʼi pea mo foaki atu he ʼu foʼi pane ʼe lua, pea ʼe tonu ke ke toʼo. 5 Hili ʼaia, ʼe ke alu anai ki te kiʼi moʼuga ʼo te ʼAtua moʼoni, ʼae ʼe tuʼu ai te nofoʼaga solia ʼo te kau Filisitini. ʼI tau tau atu ki te kolo, ʼe ke felaveʼi anai mo he kau polofeta ʼe natou hihifo mai te faʼahi maʼoluga, ʼe muʼamuʼa mai ia natou he hahaʼi ʼe natou ta te nafa, mo te alepa pea mo pupuhi te fagufagu mo fakatagi he tahi age meʼa faimaholo kae ʼe lolotoga faifakakikite te kau polofeta. 6 ʼE fakamalohiʼi anai koe e te laumalie ʼo Sehova,+ pea ʼe ke faifakakikite anai mo natou pea ʼe ke liliu anai ko he tahi age tagata.+ 7 Ka ʼosi hoko te ʼu fakailoga ʼaia, fai te meʼa ʼae ʼe ke lavaʼi, he ʼe nofo te ʼAtua moʼoni mo koe. 8 Pea ke ke muʼamuʼa ki Kilekale,+ ʼe au hifo atu anai kia koe ʼo momoli te ʼu holokoseta mo te ʼu sakilifisio ʼo te tokalelei.* ʼE tonu ke ke fakatalitali ia ʼaho ʼe fitu ʼo kaku ki taku alu atu. Pea ʼe au fakaha atu anai te ʼu meʼa ʼae ʼe tonu ke ke fai.”

9 ʼI te temi pe ʼae neʼe mavae ai ia Saulo ia Samuele, neʼe kamata fetogi atu aipe e te ʼAtua tona loto ke liliu ko he tahi age tagata, pea neʼe hoko te ʼu fakailoga fuli ʼaia ʼi te ʼaho pe ʼaia. 10 Koia, neʼe nā mavae ai ʼo olo ki te kiʼi moʼuga, pea neʼe felaveʼi mo ia he kau polofeta. ʼI te temi ʼaia, neʼe fakamalohiʼi ia ia e te laumalie ʼo te ʼAtua,+ pea neʼe kamata faifakakikite+ mo natou. 11 Ko natou fuli ʼae neʼe natou iloʼi ia ia ʼi muʼa atu, ʼi tanatou sisio ki tana faifakakikite mo te kau polofeta, neʼe natou feuiʼaki: “Kotea koa ʼae kua hoko ki te foha ʼo Kisi? ʼE toe kau koa mo Saulo ʼi te kau polofeta?” 12 Pea neʼe ui e he tagata mai te koga meʼa ʼaia: “Kae ko ai koa tanatou tamai?” Koia ko te palalau ʼaeni: “ ʼE toe kau koa mo Saulo ʼi te kau polofeta?”+ neʼe liliu ai ko he takuga.*

13 ʼI tana ʼosi faifakakikite, neʼe alu ki te faʼahi maʼoluga. 14 Ki muli age, neʼe fehuʼi age e te tehina ʼo te tamai ʼa Saulo ki ai mo tana tagata gaue: “Neʼe kolua olo kifea?” Neʼe ina tali: “Neʼe ma olo ʼo kumi te ʼu asino,+ kae neʼe mole ma maʼu, koia neʼe ma olo ai kia Samuele.” 15 Pea neʼe ui age e te tehina ʼo te tamai ʼa Saulo: “Fakalelei siʼou loto, kae ke ke fakaha mai pe kotea ʼae neʼe ui atu e Samuele.” 16 Neʼe tali e Saulo ki ai: “Neʼe ina fakaha mai neʼe kua ʼosi maʼu te ʼu asino.” Kae neʼe mole fakaha age e Saulo te ʼu meʼa ʼae neʼe ui age e Samuele ʼo ʼuhiga mo te tuʼulaga fakahau.

17 Neʼe pauʼi leva e Samuele te hahaʼi ke natou maʼopoʼopo mai ki Misipa, ia muʼa ʼo Sehova+ 18 pea neʼe ina ui ki te kau Iselaele: “Koʼeni te meʼa ʼae ʼe ui e Sehova te ʼAtua ʼo Iselaele: ‘Neʼe ko au ʼae neʼe au fakamavae Iselaele mai Esipito pea neʼe au haofaki koutou mai te ʼu nima ʼo Esipito+ pea mai te ʼu nima ʼo te ʼatu puleʼaga fuli ʼae neʼe natou fakamamahiʼi koutou. 19 Kae ʼi te ʼaho nei, ʼe kotou liʼaki tokotou ʼAtua+ ʼae neʼe ina haofaki koutou mai ʼokotou malaʼia mo ʼokotou mamahi fuli, pea neʼe kotou ui: “Kailoa, kae ʼe tonu ke ke fakanofo homatou hau.” ʼI te lakaga leva ʼaeni, kotou tahi tutuʼu ia muʼa ʼo Sehova ʼo mulimuli ki ʼokotou telepi pea mo ʼokotou famili.’ ”*

20 Koia neʼe fakatotonu ai e Samuele ke fakaovi mai te ʼu telepi fuli ʼo Iselaele,+ pea neʼe filifili te telepi ʼo Pesamino.+ 21 Neʼe ina fakatotonu leva ke fakaovi mai te telepi ʼo Pesamino ʼo mulimuli ki ʼonatou famili, pea neʼe filifili te famili ʼo te kau Matili. Ki muli age, neʼe filifili ia Saulo, te foha ʼo Kisi.+ Kae ʼi tanatou olo ʼo kumi mai ia ia, neʼe mole natou maʼu. 22 Koia neʼe natou fehuʼi ai kia Sehova:+ “Neʼe haʼu koa te tagata ki heni?” Neʼe tali e Sehova: “Koʼena ʼe nono ʼi te ʼu uta.” 23 Neʼe natou feleleʼi ai ʼo kumi ia ia mai te faʼahi ʼaia. ʼI tana tuʼu ʼi te lotolotoiga ʼo te hahaʼi, neʼe lahi age* ia ʼi te hahaʼi fuli.+ 24 Pea neʼe ui e Samuele ki te hahaʼi fuli: “ ʼE kotou sisio koa kia ia ʼae neʼe filifili e Sehova?+ ʼE mole he tahi ʼe hage ko ia ʼi te lotolotoiga ʼo te hahaʼi fuli.” Pea neʼe kalaga te hahaʼi fuli: “Ke fua manuʼia te ʼafio ʼo totatou hau!”

25 Neʼe palalau leva ia Samuele ki te hahaʼi ʼo ʼuhiga mo te ʼu meʼa ʼae ʼe feala ke fakamaʼua e te ʼu hau,+ pea neʼe ina tohi ʼi he tohi ʼo tuku ia muʼa ʼo Sehova. Pea neʼe fakamavae e Samuele te hahaʼi fuli ʼo natou tahi alu ai ki tona ʼapi. 26 Neʼe toe alu foki mo Saulo ki tona ʼapi ʼae ʼi Kipease, pea neʼe kaugā olo mo ia te kau tagata toʼa he neʼe uga e Sehova ʼonatou loto. 27 Kae neʼe ui e ʼihi tagata agakovi: “Pe ʼe haofaki feafeaʼi anai tatou e ia ʼaeni?”+ Koia neʼe natou fehihiʼa ia ia pea neʼe mole natou foaki age hana meʼa ʼofa.+ Kae neʼe mole gu ia ki te faʼahi ʼaia.*

11 Neʼe haʼu leva ia Nakase, te tagata Amone+ mo tana kau solia ʼo fakatuʼu tonatou nofoʼaga ʼo ovi ki Sapesi,+ ʼi Kileate ke natou tauʼi te kolo. Neʼe ui e te ʼu tagata fuli ʼo Sapesi kia Nakase: “Tou fai he fuakava, pea ʼe matou tauhi anai kia koe.” 2 Kae neʼe ui age e Nakase, te tagata Amone: “ ʼE au fai pe anai he fuakava mo koutou mo kapau ʼe kapeʼi fuli ʼokotou foʼi mata mataʼu. ʼE au fai anai te faʼahi ʼaia moʼo fakalainoaʼi ia Iselaele katoa.” 3 Neʼe tali age e te kau takitaki ʼo Sapesi: “Tuku mai ʼaho ʼe fitu ke feala hamatou fekauʼi he kau tagata ʼave logo ki te fenua katoa ʼo Iselaele. Pea kapau ʼe mole he tahi moʼo haofaki ʼo matou, ʼe matou fakalogo anai kia koe.” 4 Neʼe tau leva te kau tagata ʼave logo ki Kipease+ te kolo ʼo Saulo,* pea neʼe natou fakaha te ʼu palalau ʼaia ki te hahaʼi, ʼo fetagihi leʼo lahi ai te hahaʼi fuli.

5 Kae neʼe haʼu ia Saulo mai te gaueʼaga ʼo ina muliʼi mai te faga manu, pea neʼe ui e Saulo: “Kotea ʼae neʼe hoko ki te hahaʼi? He koʼe ʼe natou fetagihi?” Pea neʼe fakamatala age te ʼu palalau ʼae neʼe fai e te kau tagata mai Sapesi. 6 ʼI tana logo ki te ʼu palalau ʼaia, neʼe fakamalohiʼi e te laumalie ʼo te ʼAtua ia Saulo,+ pea neʼe kovi ʼosi tona ita. 7 Koia neʼe ina toʼo ai he hoaʼi pipi, ʼo ina taʼataʼaga pea neʼe ina fekauʼi te kau tagata ʼave logo ke natou ʼave ki te fenua katoa ʼo Iselaele, pea mo ui: “Ko ʼae ʼe mole mulimuli ia Saulo mo Samuele, ʼe fai anai te faʼahi ʼaeni ki tana faga pipi!” Neʼe manavasiʼi ai te hahaʼi kia Sehova, ʼo natou olo leva mo hanatou fakatuʼutuʼu ʼe tahi.* 8 Pea neʼe ina lau leva ia natou ʼi Peseki, neʼe ko te toko 300 000 kau Iselaele mo te toko 30 000 kau tagata ʼo Suta. 9 Neʼe natou ui ki te kau tagata ʼave logo ʼae neʼe ʼomai: “Koʼeni te meʼa ʼae ʼe tonu ke kotou ui ki te kau tagata ʼo Sapesi ʼi Kileate: ‘Apogipogi, ʼi te temi ʼae ʼe sisiga ai te laʼa, ʼe haofaki anai koutou.’ ” Neʼe olo ai te kau tagata ʼave logo ʼo fakaha ki te kau tagata ʼo Sapesi, pea neʼe natou fiafia ʼaupito. 10 Koia neʼe ui e te kau tagata ʼo Sapesi: “Apogipogi, ʼe matou fakalogo anai kia koutou, pea ʼe feala anai ke kotou fai kia matou te meʼa ʼae ʼe kotou sio ʼe lelei.”+

11 ʼI te ʼaho ake, neʼe vae tolu e Saulo ia te hahaʼi, pea neʼe natou ulufi te nofoʼaga ʼi muʼa ʼo te mafoa ʼo te ʼaho,* pea neʼe natou matematehi te kau Amone+ ʼo kaku ki te temi ʼae ʼe sisiga ai te laʼa. Neʼe mavetevete ia natou ʼae neʼe hao, ʼo natou tahi feholaki ai. 12 Neʼe ui leva e te hahaʼi kia Samuele: “Ko ai ʼae neʼe natou feuiʼaki pe ʼe tonu ke hau ia Saulo kia tatou?+ Ke ʼaumai te ʼu tagata ʼaia ki heni pea ʼe matou matehi anai.” 13 Kae neʼe ui e Saulo: “ ʼE mole tonu ke matehi he tahi ʼi te ʼaho nei,+ he neʼe haofaki e Sehova ia Iselaele ʼi te ʼaho nei.”

14 Ki muli age, neʼe ui e Samuele ki te hahaʼi: “Kotou ʼomai pea ke tou olo ki Kilekale+ ʼo toe fakamoʼoni ko Saulo ʼae ʼe hau.”+ 15 Koia neʼe olo fuli ai te hahaʼi ki Kilekale pea neʼe natou fakanofo hau ia Saulo ia muʼa ʼo Sehova ʼi Kilekale. Neʼe natou momoli ai leva te ʼu sakilifisio ʼo te tokalelei ia muʼa ʼo Sehova,+ pea neʼe fakafiafia ʼaupito ia Saulo mo te kau tagata fuli ʼo Iselaele.+

12 Neʼe ui leva e Samuele ki Iselaele katoa: “Koʼeni neʼe au fai* te ʼu meʼa fuli ʼae neʼe kotou kole mai, pea neʼe au fakanofo he hau ke pule kia koutou.+ 2 Pea koʼeni te hau ʼae ka ina takitaki koutou!*+ Ko au, kua au matuʼa mo ʼulu hina, pea ʼe nofo ʼoku foha mo koutou,+ pea neʼe au takitaki koutou talu mai taku kei veliveli ʼo kaku mai ki te ʼaho nei.+ 3 Koʼeni au. Ke kotou fakaha ia muʼa ʼo Sehova pea mo tana tagata fakanofo pe neʼe au lakahala.+ Ko te vitulo peʼe ko te asino koa ʼa ai ʼae neʼe au toʼo?+ Pe ko ai koa ʼae neʼe au kakaʼi peʼe gaohi koviʼi? Neʼe au tali koa mai te nima ʼo ai he meʼa ʼofa fakakaka ke tupu ai haku sio kehe?+ Kapau neʼe au fai te ʼu faʼahi ʼaia, ʼe au toe liufaki atu anai.”+ 4 Pea neʼe natou tali: “Neʼe mole ke kakaʼi matou peʼe gaohi koviʼi matou, pea neʼe mole ke tali he meʼa mai te nima ʼo he tahi.” 5 Koia neʼe ina ui ai kia natou: “Ia ʼaho nei, ko Sehova mo tana tagata fakanofo ʼe nā fakamoʼoni neʼe mole kotou maʼu he meʼa moʼoku tukugakoviʼi.”* Pea neʼe natou ui: “ ʼE ko ia ʼae ʼe fakamoʼoni ki ai.”

6 Koia, neʼe ui e Samuele ki te hahaʼi: “Ko Sehova, ʼae neʼe ina fakaʼaogaʼi ia Moisese mo Alone pea neʼe ina fakamavae ʼakotou kui mai te fenua ʼo Esipito,+ ʼe ko ia ʼae ʼe fakamoʼoni ki ai. 7 Pea ʼi te lakaga leva ʼaeni, kotou tutuʼu ʼi hena, pea ʼe au fakamauʼi anai koutou ia muʼa ʼo Sehova, ʼo mulimuli pe ki te ʼu gaue faitotonu fuli ʼae neʼe fai e Sehova maʼa koutou pea mo ʼakotou kui.

8 “ ʼI te temi pe ʼae neʼe hu ai ia Sakopo ki Esipito+ pea mo kamata tagi ai ʼakotou kui kia Sehova ke tokoni age,+ neʼe fekauʼi e Sehova ia Moisese+ mo Alone ke nā taki ʼakotou kui ʼi tanatou mavae mai Esipito pea mo fakanofo natou ʼi te koga meʼa ʼaeni.+ 9 Kae neʼe natou galoʼi ia Sehova tonatou ʼAtua, pea neʼe ina tuku* natou+ ki te ʼu nima ʼo Sisela,+ te tagata takitaki ʼo te kautau ʼo Atesoli, pea mo te ʼu nima ʼo te kau Filisitini+ pea mo te ʼu nima ʼo te hau ʼo Moape,+ pea neʼe natou tauʼi ai ia natou. 10 Pea neʼe natou tagi kia Sehova ke tokoni age+ ʼo natou ui: ‘Neʼe matou agahala,+ he neʼe matou liʼaki ia Sehova kae matou tauhi ki te ʼu Paale+ pea mo te ʼu fakatata ʼo Asetolete.+ ʼI te temi nei, ke ke haofaki matou mai te ʼu nima ʼo ʼomatou fili ke matou tauhi ai kia te koe.’ 11 Pea neʼe fekauʼi leva e Sehova ia Selupaale,+ mo Petane, mo Sefeteo+ pea mo Samuele+ pea neʼe ina haofaki koutou mai te ʼu nima ʼo te ʼu fili ʼae ʼi ʼokotou tafaʼaki, pea neʼe feala ai ke kotou maʼuli fimalie.+ 12 ʼI takotou sisio ki te haʼu ʼa Nakase,+ te hau ʼo te kau Amone ʼo tauʼi koutou, neʼe hoko atu pe takotou ui mai: ‘ ʼE loto pe matou ki homatou hau!’+ logo la ko Sehova tokotou ʼAtua, ʼe ko tokotou Hau.+ 13 Pea koʼeni te hau ʼae neʼe kotou filifili, ia ia ʼae neʼe kotou kole. Koʼeni neʼe fakanofo e Sehova hokotou hau.+ 14 Kapau ʼe kotou manavasiʼi kia Sehova,+ mo tauhi kia te ia,+ mo fakalogo ki tona leʼo,+ ʼo mole kotou agatuʼu ki te fakatotonu ʼa Sehova pea kapau ʼe kotou mulimuli mo tokotou hau kia Sehova tokotou ʼAtua, ʼe ko he meʼa lelei ia. 15 Kae kapau ʼe mole kotou fakalogo ki te leʼo ʼo Sehova pea mo kotou agatuʼu ki te fakatotonu ʼa Sehova, ʼe fakafeagai atu anai te nima ʼo Sehova kia koutou mo ʼakotou tamai.+ 16 ʼI te temi ʼaeni, kotou tutuʼu ʼi hena pea kotou sisio ki te meʼa lahi ʼaeni ʼe fai e Sehova ʼi ʼokotou muʼa. 17 ʼE mole koa la ko te temi utu ʼaeni ʼo te fulumeto? ʼE au kole anai kia Sehova ke ina fakaʼuʼulu te mana mo fakato te ʼua. Pea ʼe kotou iloʼi mo mahino ai anai ki te meʼa kovi ʼae neʼe kotou fai kia mata ʼo Sehova ʼi takotou kole hokotou hau.”+

18 Neʼe pauʼi leva ia Samuele kia Sehova, pea neʼe fakaʼuʼulu e Sehova te mana mo fakato te ʼua ʼi te ʼaho ʼaia. Neʼe manavasiʼi lahi ai te hahaʼi fuli kia Sehova mo Samuele. 19 Pea neʼe ui e te hahaʼi fuli kia Samuele: “Faikole kia Sehova tou ʼAtua ʼo ʼuhiga mo ʼau hahaʼi faifekau,+ he ʼe mole matou fia mamate. Koteʼuhi neʼe matou hilifaki ki ʼamatou agahala fuli he tahi age agakovi ʼi tamatou kole ʼae homatou hau.”

20 Koia neʼe ui e Samuele ki te hahaʼi: “ ʼAua naʼa kotou matataku. ʼE moʼoni neʼe kotou fai te ʼu agakovi fuli ʼaia. Kae ʼaua naʼa kotou maliu kehe mai ia Sehova,+ kae kotou tauhi kia Sehova mo tokotou loto katoa.+ 21 ʼAua naʼa kotou maliu kehe ʼo kotou mulimuli ki he ʼu meʼa vaʼiganoa,*+ ʼae ʼe mole honatou ʼaoga+ pea ʼe mole feala hanatou haofaki koutou, he ʼe natou vaʼiganoa.* 22 ʼE mole liʼaki anai e Sehova tana hahaʼi+ ʼuhi ko tona huafa lahi,+ he neʼe loto e Sehova ke kotou liliu ko tana hahaʼi.+ 23 Ki toku ia faʼahi, ʼe mole feala anai ke au agahala kia Sehova ʼo tuku taku hufakiʼi koutou, pea ʼe hoko atu anai taku akoʼi koutou ʼi te ala ʼae ʼe lelei pea mo totonu. 24 Kae kotou manavasiʼi kia Sehova,+ pea mo tauhi agatonu kia te ia* mo tokotou loto katoa, koteʼuhi kua kotou sisio ki te ʼu meʼa lalahi ʼae neʼe ina fai maʼa koutou.+ 25 Kae kapau ʼe kotou filifili ʼaki tokotou loto katoa ke kotou fai te meʼa ʼae ʼe kovi,+ ʼe pulihi anai koutou mo tokotou hau.”+

13 Neʼe hau ia Saulo ʼi tona taʼu . . . ,* pea neʼe pule ki Iselaele+ lolotoga taʼu ʼe lua. 2 Neʼe filifili e Saulo he ʼu tagata ʼe toko 3 000 ʼi Iselaele. Neʼe nonofo ia te toko 2 000 ʼo te ʼu tagata ʼaia mo Saulo ʼi Mikemase pea mo te potu moʼugaʼia ʼo Petele, kae neʼe nonofo te toko 1 000 mo Sonatane+ ʼi Kipease+ ʼo Pesamino. Neʼe ina fakaliliu leva te toe ʼo te hahaʼi, ke natou tahi olo ki tona fale la. 3 Pea neʼe maumauʼi e Sonatane te nofoʼaga solia ʼo te kau Filisitini+ ʼae neʼe tuʼu ʼi Kepa,+ pea neʼe logo te kau Filisitini ki ai. Neʼe fakatotonu e Saulo ke pupuhi te fakatagi pupuhi+ ʼi te fenua katoa, ʼo ui: “Ke fakalogo mai te kau Hepeleo!” 4 Neʼe logo leva ia Iselaele katoa ki te logo ʼaeni: “Neʼe maumauʼi e Saulo he nofoʼaga solia ʼo te kau Filisitini, pea ʼi te temi leva ʼaeni kua fehiʼaʼinaʼi ia Iselaele e te kau Filisitini.” Koia neʼe pauʼi ai te hahaʼi ke natou olo kia Saulo ʼi Kilekale.+

5 Neʼe toe fakatahitahi foki mo te kau Filisitini ke natou tauʼi ia Iselaele, mo te ʼu saliote tau ʼe 30 000, mo te ʼu tagata heka hosi ʼe toko 6 000 pea mo he kau solia neʼe kaugamalie ohage ko te ʼu fisiʼi ʼone ʼo te tai.+ Pea neʼe natou olo ʼo nonofo ʼi Mikemase, ʼi te potu esite ʼo Pete-aveni.+ 6 Pea neʼe tokagaʼi e te kau tagata ʼo Iselaele ʼe natou tau mo te aluʼaga fakatupu tuʼutamaki. Koia neʼe fenonoʼi ai te hahaʼi ʼi te ʼu ʼana,+ mo te ʼu luo, mo te ʼu fuʼu maka, mo te ʼu koga fale ʼi te lalo kele, pea mo te ʼu tane. 7 Pea ko ʼihi kau Hepeleo neʼe natou fakalaka ʼi te Solotane ʼo olo ki te fenua ʼo Kate pea mo Kileate.+ Kae neʼe nofo pe ia Saulo ʼi Kilekale, pea neʼe matataku te hahaʼi fuli ʼae neʼe mulimuli ia ia. 8 Neʼe haga talitali ia ʼaho ʼe fitu ʼo kaku ki te temi ʼae kua fakatuʼutuʼu ki ai e Samuele, kae neʼe mole haʼu ia Samuele ki Kilekale, pea neʼe kamata mavae te hahaʼi mai ia ia. 9 Neʼe ui leva e Saulo: “Kotou ʼaumai te holokoseta mo te ʼu sakilifisio ʼo te tokalelei.” Pea neʼe ina momoli leva te holokoseta.+

10 Kae ʼi tana ʼosi momoli pe ia te holokoseta, neʼe tau mai ia Samuele. Koia, neʼe haʼu ai ia Saulo ʼo fakafelaveʼi kia ia pea mo fakamalo age ki ai. 11 Pea neʼe ui e Samuele: “Kotea ʼae neʼe ke fai?” Neʼe tali e Saulo: “Neʼe au sio foki ki te mavae ʼa te hahaʼi mai ia au,+ mo tau heʼeki tau mai ʼi te temi ʼae neʼe ke fakatuʼutuʼu ki ai, pea mo te fakatahitahi ʼa te kau Filisitini ʼi Mikemase.+ 12 Koia neʼe au manatu ai: ‘ ʼE hifo mai anai te kau Filisitini ʼo tauʼi au ʼi Kilekale kae neʼe heʼeki au kumi te tokoni ʼa Sehova.’ Koia neʼe au manatu ai ʼe tonu ke au momoli te holokoseta.”

13 Neʼe ui leva e Samuele kia Saulo: “Neʼe mole ko he meʼa fakapotopoto ʼaena neʼe ke fai. Neʼe mole ke fakalogo ki te fakatotonu ʼae neʼe foaki atu e Sehova tou ʼAtua.+ Ka na pau la neʼe ke fakalogo, ʼe fakatuʼu anai e Sehova tou puleʼaga ʼi Iselaele ke malohi ʼo heʼe gata. 14 Kae ʼi te temi nei, ʼe mole ke pule fualoa anai.+ ʼE maʼu anai e Sehova he tagata ʼe mulimuli ki tona finegalo,*+ pea ʼe fakanofo anai e Sehova ke ina takitaki tana hahaʼi,+ he neʼe mole ke fakalogo ki te meʼa ʼae neʼe fakatotonu atu e Sehova.”+

15 Neʼe tuʼu ake leva ia Samuele pea neʼe mavae ʼi Kilekale ʼo alu ki Kipease ʼo Pesamino. Pea neʼe lau leva e Saulo te hahaʼi ʼae neʼe kei nonofo mo ia, neʼe ko te ʼu tagata ʼe teitei toko 600.+ 16 Neʼe nofo ia Saulo, mo Sonatane tona foha pea mo te hahaʼi ʼae neʼe kei fakatahi mo naua ʼi Kepa+ ʼo Pesamino, kae neʼe nonofo te kau Filisitini ʼi Mikemase.+ 17 Pea neʼe mavae mai te nofoʼaga ʼo te kau Filisitini te ʼu kutuga solia ʼe tolu. Neʼe toʼo e te tahi kutuga te ala ʼo Ofala, ki te fenua ʼo Suale. 18 Neʼe toʼo e te tahi kutuga te ala ʼo Pete-oloni,+ pea neʼe toʼo leva e te tolu kutuga te ala ʼe alu ki te tuʼakoi ʼae ʼe haga ki te potu fenua ko Tesepoimi, ʼi te faʼahi ʼo te toafa.

19 Pea neʼe mole he tagata tufuga ukamea ʼi te fenua katoa ʼo Iselaele, he neʼe ui e te kau Filisitini: “Ke ʼaua naʼa faʼu e te kau Hepeleo hanatou ʼu heleta peʼe ko hanatou ʼu tao.” 20 Pea neʼe tonu ke hifo te kau Iselaele fuli ki te kau Filisitini ke fakamasila ʼanatou huo fuli kele, mo ʼanatou piosi, mo ʼanatou toki pea mo ʼanatou hele piko. 21 Neʼe tonu ke natou totogi he foʼi pime* ʼe tahi moʼo fakamasila te ʼu huo fuli kele, mo te ʼu piosi, mo te ʼu meʼa gaue maga tolu, mo te ʼu toki peʼe ko te toe gaohi ʼo te ʼu ʼakau masila* moʼo taki te ʼu manu. 22 Pea ʼi te ʼaho ʼo te tau, neʼe mole ʼi ai he ʼu heleta peʼe ko he ʼu tao ʼa te hahaʼi ʼae neʼe fakatahi mo Saulo pea mo Sonatane.+ Neʼe gata pe kia Saulo mo Sonatane neʼe nā maʼu ʼanā mahafu.

23 Pea neʼe olo he kau solia ʼo te kau Filisitini ʼi te ala ʼo Mikemase ʼi te moʼuga.+

14 ʼI te tahi ʼaho, neʼe ui e Sonatane,+ te foha ʼo Saulo ki te tagata ʼae neʼe ina toʼo ʼana mahafu: “Haʼu pea ke ta olo ʼo kaku ki te faʼahi ʼae ʼe tutuʼu ai te kau solia Filisitini.” Kae neʼe mole ina fakaha age ki tana tamai. 2 Neʼe nofo ia Saulo ʼi te ʼu tafaʼaki ʼo Kipease+ ʼi te lalo fuʼu kelenate ʼi Mikoloni, pea neʼe fakatahi mo ia te teitei toko 600 tagata.+ 3 (Pea neʼe tui te efote+ e Akisa, te foha ʼo Ahitupe,+ te tehina ʼo Ikapote,+ te foha ʼo Fineasi,+ te foha ʼo Eli,+ te pelepitelo ʼa Sehova ʼi Silo.+) Pea neʼe mole iloʼi e te hahaʼi ia te kua alu ʼa Sonatane. 4 Pea ʼi te vaha ʼo te ʼu ala ʼae neʼe faiga ke fakalaka ai ia Sonatane ke kaku ki te kau solia Filisitini, neʼe ʼi ai he fuʼu maka neʼe hage ko he foʼi nifo ʼi te tahi faʼahi, pea mo he tahi fuʼu maka neʼe hage ko he foʼi nifo ʼi te tahi age faʼahi. Neʼe higoa te tahi ko Poteseti pea neʼe higoa te tahi ko Sene. 5 ʼI te ʼu fuʼu maka ʼaia, neʼe tuʼu te tahi ohage ko he foʼi pou ʼi te potu noleto, ʼo haga ki Mikemase, pea neʼe tuʼu te tahi ʼi te potu saute, ʼo haga ki Kepa.+

6 Koia neʼe ui e Sonatane ki tana tagata toʼo mahafu: “Haʼu pea ke ta olo ʼo kaku ki te kau solia heʼe silikosisio ʼaia.*+ ʼE lagi fai anai e Sehova he meʼa maʼa taua, he ʼe mole he meʼa ʼe feala ke ina taʼofi ia Sehova moʼo haofaki te hahaʼi ʼaki he tokolahi peʼe ko he tokosiʼi.”+ 7 Pea neʼe ui age e tana tagata toʼo mahafu: “Fai te meʼa ʼae ʼe ke loto ki ai. Alu ki te faʼahi ʼae ʼe ke loto ki ai, pea ʼe au muliʼi pe anai koe.” 8 Pea neʼe ui e Sonatane: “ ʼE ta olo anai ʼo kaku ki te ʼu tagata ʼaia pea ʼe ta ha anai kia natou. 9 Kapau ʼe natou ui mai: ‘Kolua nonofo ʼi hena ʼo kaku ki tamatou olo atu!’ pea ʼe ta nonofo maʼu anai pea ʼe mole ta hake anai kia natou. 10 Kae kapau ʼe natou ui: ‘Kolua ʼomai ʼo tauʼi matou!’ ʼe ta olo anai, he ʼe tuku mai anai e Sehova ia natou ki ʼotā nima. ʼE ko te fakailoga ʼaia maʼa taua.”+

11 Neʼe nā ha leva ki te kau solia Filisitini. Neʼe ui e te kau Filisitini: “Koʼeni kua ʼomai ki tuʼa te kau Hepeleo mai te ʼu luo ʼae neʼe natou fenonoʼi ai.”+ 12 Pea neʼe ui e te kau solia kia Sonatane mo tana tagata toʼo mahafu: “Kolua hahake mai, ʼe heʼeki kolua iloʼi koa la koulua ia matou!”+ ʼI te moʼi temi pe ʼaia, neʼe ui e Sonatane ki tana tagata toʼo mahafu: “Mulimuli mai ia au, he ʼe tuku anai e Sehova ia natou ki te ʼu nima ʼo Iselaele.”+ 13 Neʼe kake leva ia Sonatane ʼi te mata mato pea neʼe mulimuli mai pe ia ia tana tagata toʼo mahafu. Neʼe tauʼi e Sonatane te kau Filisitini, pea neʼe haga tana tagata toʼo mahafu ʼo matehi natou. 14 ʼI te ʼuluaki ʼohofi ʼaia neʼe fai e Sonatane mo tana tagata toʼo mahafu, neʼe nā matehi ai te ʼu tagata ʼe teitei toko 20 ʼi he vaha kele veliveli pe.*

15 Pea neʼe matataku te nofoʼaga solia mo te kau solia ʼae neʼe tutuʼu ʼi te mata mato, maʼia mo te ʼu kutuga solia ʼae neʼe olo ʼo tauʼi ia Iselaele.+ Neʼe kamata galulu te kele pea neʼe natou matataku ʼuhi ko te ʼAtua. 16 Neʼe sisio te ʼu tagata leʼo ʼa Saulo ʼae ʼi Kipease+ ʼo Pesamino ki te mafola ʼo te maveuveu ʼi te ʼu potu kehekehe.+

17 Neʼe ui leva e Saulo ki te hahaʼi ʼae neʼe nonofo mo ia: “Fakalelei, kae kotou lau mo vakaʼi pe ko ai ʼae ʼe puli.” Koia, neʼe natou lau pea neʼe natou tokagaʼi neʼe pupuli ia Sonatane pea mo tana tagata toʼo mahafu. 18 Neʼe ui e Saulo kia Akisa:+ “Fakaovi mai te Aleka ʼo te ʼAtua moʼoni!” (Koteʼuhi ʼi te temi ʼaia,* neʼe nofo te Aleka ʼo te ʼAtua moʼoni mo te kau Iselaele.) 19 Pea lolotoga te palalau ʼa Saulo ki te pelepitelo, neʼe toe lahi age te maveuveu ʼi te nofoʼaga ʼo te kau Filisitini. Neʼe ui leva e Saulo ki te pelepitelo: “Tuku muʼa te meʼa ʼaena ʼe ke fai.”* 20 Koia, neʼe fakatahitahi ai ia Saulo mo te hahaʼi fuli ʼae neʼe nonofo mo ia, ʼo natou olo ki te tau, kae neʼe natou maʼu atu te kau Filisitini ʼe natou fematematehiʼaki ʼaki pe ʼanatou heleta, pea neʼe lahi ʼaupito te maveuveu. 21 Pea ko te kau Hepeleo, ʼae ʼi muʼa atu neʼe fakatahi mo te kau Filisitini pea neʼe ʼomai ki te nofoʼaga, neʼe natou kau leva mo Iselaele ʼae neʼe takitaki e Saulo mo Sonatane. 22 Pea ko te kau tagata fuli ʼo Iselaele ʼae neʼe fenonoʼi+ ʼi te ʼu potu moʼugaʼia ʼo Efalaimi, neʼe natou logo ki te feholaki ʼa te kau Filisitini, pea neʼe natou toe kau mo natou ki te tuli ʼo te kau Filisitini ʼi te tau. 23 Koia neʼe haofaki e Sehova ia Iselaele ʼi te ʼaho ʼaia,+ pea neʼe kaku te tau ki Pete-aveni.+

24 Kae neʼe kua gaʼegagaʼe leva te kau tagata ʼo Iselaele ʼi te ʼaho ʼaia, he neʼe fakamaʼua e Saulo ki te hahaʼi ke natou fakalogo ki te fakapapau ʼaeni: “Malaʼia te tagata ʼae ʼe kai anai ki he meʼa kai* ʼi muʼa ʼo te afiafi pea ʼi muʼa ʼo taku fakahoko taku lagavaka ki ʼoku fili!” Koia neʼe mole kai ai he tahi.+

25 Neʼe hu leva te hahaʼi* katoa ki te vao matuʼa, pea neʼe ʼi ai he meli ʼi te kele. 26 ʼI te hu ʼa te hahaʼi ki te vao matuʼa, neʼe natou sisio ki te hali ʼo te meli, kae neʼe mole kai ki ai he tahi, he neʼe natou matataku ʼuhi ko te fakapapau. 27 Kae neʼe mole logo ia Sonatane ki te fakapapau ʼae neʼe fakamaʼua e tana tamai ke fakalogo ki ai te hahaʼi.+ Koia neʼe ina toʼo ai te ʼakau ʼae neʼe ʼi tona nima ʼo ʼai te muʼamuʼaʼi ʼakau ki te meli. Pea ʼi te temi ʼae neʼe ina ʼahiʼahi ai te moʼi meli, neʼe toe malohi ai.* 28 Neʼe ui age e he tahi ʼi te hahaʼi: “Neʼe fakamaʼua e tau tamai ki te hahaʼi ke natou fakalogo ki te fakapapau ʼaeni: ‘Malaʼia te tagata ʼae ʼe kai anai ki he meʼa kai ʼi te ʼaho nei!’+ Ko te tupuʼaga la ʼaia ʼo te kua gaʼegagaʼe ʼaupito ʼa te hahaʼi.” 29 Kae neʼe ui e Sonatane: “Neʼe lahi ʼaupito te mamahi ʼae neʼe fakatupu e taku tamai ʼi te fenua. Kotou tokagaʼi taku kua toe malohi ʼi taku ʼahiʼahi te moʼi meli ʼaeni. 30 ʼE mahino ia, ka na neʼe kakai faʼitaliha la te hahaʼi+ ʼi te ʼaho nei ki te ʼu koloa ʼae neʼe natou maʼu mai ʼonatou fili, ʼe fua lelei age anai kia natou! Ka na ʼaua la neʼe toe kaugamalie age te kau Filisitini ʼae neʼe natou tamateʼi.”

31 ʼI te ʼaho ʼaia, neʼe hoko atu pe tanatou matehi te kau Filisitini mai Mikemase ki Asaloni,+ pea neʼe kua gaʼegagaʼe ʼaupito te hahaʼi. 32 Koia neʼe ʼoho ai te hahaʼi mo he lotomanumanū ki te ʼu koloa ʼae neʼe natou maʼu, pea neʼe natou toʼo te ʼu ovi, mo te ʼu pipi mo te ʼu ʼuhiʼi pipi ʼo natou tamateʼi ʼi te kele, pea neʼe natou kai leva te kanoʼi manu mo te toto.+ 33 Pea neʼe fakaha age leva kia Saulo te faʼahi ʼaeni: “Koʼeni ʼe agahala te hahaʼi kia Sehova ʼi tanatou kai te kanoʼi manu mo te toto.”+ Neʼe ina ui: “Neʼe kotou heʼe agatonu ʼi te meʼa ʼae neʼe kotou fai. Kotou foimo fuli mai he foʼi maka lahi.” 34 Pea neʼe ui e Saulo: “Kotou mavete atu ʼo logologo ki te hahaʼi: ‘Kotou tahi ʼaumai tana vitulo mo tana ovi ke kotou matehi ʼi heni, pea mo kotou kai leva. ʼAua naʼa kotou agahala kia Sehova ʼo kotou kai te kanoʼi manu mo te toto.’ ”+ ʼI te po ʼaia, neʼe natou tahi ʼaumai ai tana vitulo ʼo matehi ʼi ai. 35 Pea neʼe laga e Saulo he ʼaletale maʼa Sehova.+ Neʼe ko te ʼuluaki ʼaletale ʼaia neʼe ina laga maʼa Sehova.

36 Ki muli age, neʼe ui e Saulo: “Tou hifo pea tou tuli te kau Filisitini ʼi te poʼuli mo toʼo ʼonatou koloa ʼo kaku ki te mafoa ʼo te ʼaho. ʼE mole tou tuku anai ke maʼuli he tahi.” Neʼe natou tali age: “Fai te meʼa ʼae ʼe lelei ki ʼou mata.” Pea neʼe ui e te pelepitelo: “Tou fakaovi ʼi heni ki te ʼAtua moʼoni.”+ 37 Pea neʼe fehuʼi e Saulo ki te ʼAtua: “ ʼE tonu koa ke au tuli te kau Filisitini?+ ʼE ke tuku anai koa natou ki te ʼu nima ʼo Iselaele?” Kae neʼe mole tali age e te ʼAtua ʼi te ʼaho ʼaia. 38 Koia neʼe ui ai e Saulo: “Kau takitaki ʼo te hahaʼi, kotou ʼomai fuli ki heni pea kotou vakaʼi pe kotea te agahala ʼae neʼe fai ʼi te ʼaho nei. 39 Koteʼuhi, ʼe au fakapapau atu ia muʼa ʼo Sehova, te ʼAtua maʼuli ʼae neʼe ina haofaki ia Iselaele, tatau aipe mo kapau ʼe maʼu atu ko Sonatane toku foha, ʼe tonu anai ke matehi.” Kae neʼe mole he tahi ʼi te hahaʼi neʼe tali age ki ai. 40 Neʼe ina ui leva ki Iselaele katoa: “ ʼE kotou tutuʼu anai ʼi te tahi faʼahi, kae ʼe ma tutuʼu anai mo Sonatane toku foha ʼi te tahi faʼahi.” Pea neʼe tali e te hahaʼi kia Saulo: “Fai te meʼa ʼae ʼe lelei ki ʼou mata.”

41 Neʼe ui leva e Saulo kia Sehova: “ ʼAtua ʼo Iselaele, tali mai ʼaki te Tumime!”+ Pea neʼe filifili leva ia Sonatane mo Saulo, kae neʼe tuku te hahaʼi ke olo. 42 Neʼe ui e Saulo: “Fai he toho+ ke iloʼi ai pe ʼe ko au peʼe ko Sonatane, toku foha.” Pea neʼe filifili leva ia Sonatane. 43 Neʼe ui e Saulo kia Sonatane: “Fakaha mai, kotea ʼae neʼe ke fai?” Pea neʼe tali age leva e Sonatane: “Neʼe au ʼahiʼahi pe he moʼi meli ʼaki te muʼamuʼaʼi ʼakau ʼae ʼi toku nima.+ Koʼeni au! Kotou matehi au!”

44 Pea neʼe ui e Saulo: “Ke tauteaʼi lahi au e te ʼAtua mo kapau ʼe mole matehi koe, Sonatane.”+ 45 Kae neʼe ui e te hahaʼi kia Saulo: “ ʼE tonu koa ke matehi ia Sonatane, ʼae neʼe ina foaki te toe malo lahi ʼaeni+ ki Iselaele? ʼE mole feala anai ke hoko! ʼE matou fakapapau ia muʼa ʼo Sehova, te ʼAtua maʼuli, ʼe mole to anai ki te kele he fuluʼi ʼulu ʼe tahi ʼo tona ʼulu, koteʼuhi neʼe tokoni te ʼAtua kia ia ʼi te ʼaho nei.”+ Neʼe haofaki* ai e te hahaʼi ia Sonatane, ʼo mole mate ai.

46 Neʼe tuku leva e Saulo tana tuli te kau Filisitini pea neʼe olo ai te kau Filisitini ki tonatou fenua.

47 Neʼe fakatuʼu e Saulo tana pule ki Iselaele ke malohi pea neʼe ina tauʼi ʼona fili fuli mai te ʼu potu kehekehe, te kau Moape,+ mo te kau Amone,+ mo te kau Etome,+ mo te ʼu hau ʼo Tesopa,+ mo te kau Filisitini.+ Pea ko he faʼahi pe neʼe alu ki ai, neʼe malo ia natou. 48 Neʼe tau mo he lototoʼa pea neʼe malo ʼi te kau Amaleke,+ ʼo ina haofaki ai Iselaele mai te ʼu nima ʼo ʼonatou fili.

49 Ko te ʼu foha ʼo Saulo neʼe ko Sonatane, mo Sisevi pea mo Malekisua.+ Neʼe ko ʼona ʼofafine ʼe lua, neʼe higoa ia ia ʼae ʼe lahi ko Melape,+ pea ko te muli ko Mikale.+ 50 Neʼe higoa te ʼohoana ʼo Saulo ko Asinoame, te ʼofafine ʼo Asimaate. Neʼe higoa te pule ʼo tana kautau ko Apenele,+ te foha ʼo Nele, te tehina ʼo te tamai ʼa Saulo. 51 Ko Kisi+ neʼe ko te tamai ʼa Saulo, pea ko Nele,+ te tamai ʼa Apenele, neʼe ko te foha ʼo Apiele.

52 ʼI te temi ʼae neʼe pule ai Saulo, neʼe malohi tana tauʼi te kau Filisitini.+ Ka sio ia Saulo ki he tagata malohi mo lototoʼa, neʼe ina toʼo ia ia ke kau ki tana kau solia.+

15 Neʼe ui leva e Samuele kia Saulo: “Neʼe fekauʼi au e Sehova ke au fakanofo* koe ko te hau ʼo Iselaele tana hahaʼi.+ Koia, ʼi te temi nei, ke ke fakalogo ki te meʼa ʼae ʼe folafola ki ai ia Sehova.+ 2 Koʼeni te meʼa ʼae ʼe ui e Sehova ʼo te ʼatu kautau: ‘ ʼE au liufaki anai ki te kau Amaleke te meʼa ʼae neʼe natou fai ki Iselaele, he neʼe natou fakafeagai kia natou ʼi tanatou mavae ʼae mai Esipito.+ 3 ʼI te temi leva ʼaeni, ke ke alu ʼo matehi te kau Amaleke,+ pea mo ke pulihi ia natou fuli+ ʼo feia mo te ʼu meʼa fuli ʼae ʼe natou maʼu. ʼE mole tonu ke ke tuku ke maʼuli* he tahi. ʼE tonu ke ke matehi ia natou,+ te hahaʼi tagata, mo te hahaʼi fafine, mo te tamaliki, mo te ʼu kiʼi toe kei meamea, mo te ʼu vitulo, mo te ʼu ovi, mo te ʼu kamelo pea mo te ʼu asino.’ ”+ 4 Neʼe pauʼi e Saulo te hahaʼi ʼo ina lau natou ʼi Telaimi. Neʼe ko te toko 200 000 kau solia neʼe haʼele lalo pea mo te toko 10 000 kau tagata mai Suta.+

5 Neʼe alu leva ia Saulo ʼo kaku ki te kolo ʼo Amaleke, pea neʼe fenonoʼi ia ia mo he kau solia ʼi te vaʼe vai tafe ke natou ʼohofi te kau Amaleke. 6 Neʼe ui leva e Saulo ki te kau Kenite:+ “Kotou olo, pea kotou mavae kehe mai te kau Amaleke, naʼa au pulihi fakatahi koutou mo natou.+ He neʼe kotou fakaha tokotou ʼofa agatonu ki te hahaʼi katoa ʼo Iselaele+ ʼi tanatou mavae ʼae mai Esipito.” Koia, neʼe mavae kehe ai te kau Kenite mai te kau Amaleke. 7 Hili ʼaia, neʼe matehi leva e Saulo te kau Amaleke+ mai Avila+ ki Sule,+ ʼae ʼe ovi ki Esipito. 8 Neʼe ina puke ia Akake,+ te hau ʼo Amaleke ʼo mole ina matehi, kae neʼe ina matehi te hahaʼi fuli ʼaki te heleta.+ 9 Kae neʼe tuku e Saulo mo te hahaʼi ke maʼuli ia* Akake, mo te ʼu manu lelei ʼo te faga ovi, mo te faga pipi, mo te ʼu manu ʼae ʼe sisino, mo te ʼu ovi tagata, pea mo te ʼu meʼa lelei fuli.+ Neʼe mole natou fia maumauʼi te ʼu meʼa ʼaia. Kae neʼe natou maumauʼi te ʼu meʼa fuli ʼae neʼe mole maʼuhiga pea neʼe mole natou loto ki ai.

10 Neʼe ui leva e Sehova kia Samuele: 11 “ ʼE au fakahemala* ʼi taku fakanofo ia Saulo ko he hau, he ʼe kua lituʼa ia kia te au pea neʼe mole ina fakahoko ʼaku folafola.”+ Neʼe lotomamahi ʼosi ia Samuele pea neʼe tagi kia Sehova ʼi te po katoa.+ 12 ʼI te tuʼu ake ʼa Samuele kei uhuuhu ʼo alu kia Saulo, neʼe fakaha age kia Samuele te meʼa ʼaeni: “Neʼe alu ia Saulo ki Kalemelo,+ pea neʼe ina fakatuʼu ʼi ai he mataga maʼa ia totonu.+ Neʼe toe liliu leva ʼo hifo ki Kilekale.” 13 ʼI te felaveʼi leva ʼa Samuele mo ia, neʼe ui e Saulo ki ai: “Ke tapuakiʼi koe e Sehova. Kua au fakahoko te folafola ʼa Sehova.” 14 Neʼe ui e Samuele: “Kae he koʼe koa ʼe au logo ki te tagi ʼa te faga ovi pea mo te faga pipi?”+ 15 Neʼe tali e Saulo: “Neʼe ʼaumai e te hahaʼi te ʼu manu ʼaia mai te kau Amaleke, he neʼe natou tuku ke maʼuli* te ʼu manu ʼae ʼe lelei ʼo te faga ovi mo te faga pipi, ke sakilifisioʼi kia Sehova tou ʼAtua. Kae ko te ʼu meʼa ʼae neʼe toe, neʼe matou maumauʼi katoa.” 16 Pea neʼe ui e Samuele kia Saulo: “Tuku ʼosi! ʼE au fakaha atu te meʼa ʼae neʼe ui mai e Sehova ʼanapo.”+ Neʼe ina ui age ki ai: “Fakaha mai!”

17 Neʼe hoko atu e Samuele: “ ʼI te temi ʼae neʼe ke liliu ai ko te pule ʼo te ʼu telepi ʼo Iselaele pea neʼe fakanofo koe e Sehova ke ke hau ki Iselaele,+ neʼe mole koa la ke manatu ʼe mole hou ʼuhiga?+ 18 Ki muli age, neʼe fekauʼi koe e Sehova ke ke fakahoko he gaue ʼo ina ui atu: ‘Alu, pea ke ke matehi te kau Amaleke, ko he hahaʼi agahala.+ Tauʼi natou ʼo kaku ki tonatou pulihi katoa.’+ 19 Koia, he koʼe neʼe mole ke fakalogo ki te leʼo ʼo Sehova? Kae neʼe ke ʼoho mo he lotomanumanū ki te ʼu koloa ʼae neʼe kotou maʼu,+ pea neʼe ke fai te meʼa ʼae ʼe kovi kia mata ʼo Sehova!”

20 Kae neʼe ui e Saulo kia Samuele: “Neʼe au fakalogo ki te leʼo ʼo Sehova! Neʼe au alu ʼo fai te gaue ʼae neʼe fekauʼi au e Sehova ki ai, pea neʼe au ʼaumai ia Akake, te hau ʼo Amaleke kae neʼe au matehi te kau Amaleke.+ 21 Kae neʼe toʼo leva e te hahaʼi te ʼu ovi mo te ʼu pipi mai te ʼu koloa ʼae neʼe natou maʼu, ia te ʼu meʼa ʼae ʼe lelei ʼi te ʼu meʼa ʼae neʼe tonu ke maumauʼi, ke sakilifisioʼi kia Sehova tou ʼAtua ʼi Kilekale.”+

22 Neʼe ui leva e Samuele: “ ʼE fiafia lahi age koa ia Sehova ʼi te ʼu holokoseta mo te ʼu sakilifisio+ ʼi te fakalogo ʼae ki te leʼo ʼo Sehova? ʼE mahino ia, ʼe lelei age te talagafua ʼi he sakilifisio,+ pea mo te fakalogo ʼi te gako+ ʼo te ʼu ovi tagata. 23 Koteʼuhi ʼe tatau te agatuʼu+ mo te agahala ʼae ko te faifakakikite fakatemonio,+ pea ʼe toe tatau pe te fiameʼalahi mo te fakaʼaogaʼi ʼo te malohi fakamanamana pea mo te tauhi taula ʼatua.* Pea ʼuhi ʼae neʼe ke liʼaki te folafola ʼa Sehova,+ kua ina liʼaki koe ke mole ke toe hau.”+

24 Neʼe ui e Saulo kia Samuele: “Kua au agahala, he neʼe au talagataʼa ki te fakatotonu ʼa Sehova pea mo ʼau folafola, koteʼuhi neʼe au mataku ʼi te hahaʼi mo fakalogo ki te meʼa ʼae neʼe natou ui mai. 25 Fakalelei siʼou loto, fakamolemole mai ki taku agahala, pea ke toe liliu mo au ke feala ai haku tulolo ia muʼa ʼo Sehova.”+ 26 Kae neʼe ui e Samuele kia Saulo: “ ʼE mole au toe liliu anai mo koe, he neʼe ke liʼaki te folafola ʼa Sehova, pea kua liʼaki koe e Sehova ke mole ke toe hau ki Iselaele.”+ 27 ʼI te maliu ʼa Samuele ʼo alu, neʼe puke e Saulo te tapatapa ʼo tona kofu tuʼa, pea neʼe mahae ai. 28 Neʼe ui e Samuele ki ai: “Koʼena te meʼa ʼae kua hoko kia koe. Kua toʼo e Sehova te tuʼulaga hau ʼo Iselaele mai ia koe ʼi te ʼaho nei, pea ʼe ina foaki anai ki he tagata ʼe lelei age ia koe.+ 29 Pea tahi ʼae meʼa, ko te ʼAtua Lelei Tukupau ʼo Iselaele+ ʼe mole loi anai+ pea ʼe mole ina fetogi anai tana manatu,* he ʼe mole hage ko he tagata ke ina fetogi tana manatu.”*+

30 Neʼe ina tali: “Kua au agahala. Kae fakalelei siʼou loto, ke ke fakaʼapaʼapaʼi au ia muʼa ʼo te kau takitaki ʼo taku hahaʼi pea ia muʼa ʼo Iselaele. Toe liliu mo au, pea ʼe au tulolo anai ia muʼa ʼo Sehova tou ʼAtua.”+ 31 Neʼe toe liliu leva ia Samuele mo Saulo, pea neʼe tulolo ia Saulo ia muʼa ʼo Sehova. 32 Pea neʼe ui e Samuele: “ ʼAumai ia Akake te hau ʼo Amaleke.” Pea neʼe alu leva ia Akake kia ia kae neʼe mole loto ki ai,* he ʼe ki muʼa atu neʼe manatu ia Akake: ‘ ʼE mahino ia, ʼe mole matehi anai au.’ 33 Neʼe ui e Samuele: “Ohage ko te kua liliu ʼa te ʼu fafine ʼo hala fanau ʼuhi ko tau heleta, ʼe toe hala fanau anai mo tau faʼe.” Pea neʼe tuʼutuʼusi e Samuele ia Akake ia muʼa ʼo Sehova ʼi Kilekale.+

34 Neʼe alu ia Samuele ki Lama, kae neʼe liliu leva ia Saulo ki tona ʼapi ʼi Kipease, te kolo ʼo Saulo.* 35 Neʼe mole toe felaveʼi ia Samuele mo Saulo ʼo kaku ki te ʼaho ʼo tona mate, he neʼe lotomamahi ʼaupito ia Samuele ʼo ʼuhiga mo Saulo.+ Pea neʼe fakahemala ia Sehova ʼi tana fakanofo ia Saulo ke hau ki Iselaele.+

16 Ki muli age, neʼe ui e Sehova kia Samuele: “ ʼE kaku anai koa ki ʼafea tau lotomamahi ʼo ʼuhiga mo Saulo+ kae kua au liʼaki ia ia ke mole toe hau ki Iselaele?+ ʼUʼutu tau talaʼi manu ʼaki te lolo+ pea ke alu. ʼE au fekauʼi koe ke ke alu kia Sese,+ te tagata Petelehemi, he neʼe au filifili ʼi ʼona foha he hau.”+ 2 Kae neʼe ui e Samuele: “ ʼE lava feafeaʼi haku alu? Ka logo anai ia Saulo ki ai, ʼe ina matehi anai au.”+ Neʼe tali age e Sehova: “Toʼo mo koe he ʼuhiʼi pipi fafine pea ke ui: ‘Neʼe au haʼu ke au momoli he sakilifisio kia Sehova.’ 3 Pea ke ke fakaafe ia Sese ki te sakilifisio. ʼE au fakaha atu leva anai te meʼa ʼae ʼe tonu ke ke fai. ʼE tonu ke ke fakanofo maʼaku ia ia ʼae ʼe au hinoʼi atu anai kia koe.”+

4 Neʼe fai leva e Samuele te meʼa ʼae neʼe fakaha age e Sehova. ʼI tana tau atu ki Petelehemi,+ neʼe matataku te kau takitaki ʼo te kolo ʼi tanatou felaveʼi mo ia. Pea neʼe natou ui age: “ ʼE ke haʼu koa mo te tokalelei?” 5 Neʼe ina tali age: “ ʼE au haʼu mo te tokalelei. Neʼe au haʼu ke au momoli he sakilifisio kia Sehova. Kotou fakamaʼa ia koutou pea kotou ʼomai mo au ki te momoli ʼo te sakilifisio.” Neʼe ina fakamaʼa leva ia Sese mo ʼona foha, pea hili ʼaia, neʼe ina pauʼi natou ki te sakilifisio. 6 ʼI tanatou ʼomai ʼaia, neʼe sio kia Eliape,+ pea neʼe ina ui: “ ʼE mahino ia ko ia ʼaeni ʼae ʼe tuʼu ia muʼa ʼo Sehova, ʼe ko tana tagata fakanofo.” 7 Kae neʼe ui e Sehova kia Samuele: “ ʼAua naʼa ke tokagaʼi tona agaaga pea mo tona lahi,+ he ʼe kua au liʼaki ia ia. Koteʼuhi ko te sio ʼa te tagata ʼe mole hage ko te sio ʼa te ʼAtua, he ʼe sio pe te tagata ki te ʼu meʼa ʼae ʼe ha ki ʼona mata, kae ʼe sio ia Sehova ki te loto.”+ 8 Neʼe pauʼi e Sese ia Apinatape+ pea neʼe fakalaka ia muʼa ʼo Samuele, kae neʼe ui e Samuele: “Neʼe mole filifili e Sehova ia ia ʼaeni.” 9 Pea neʼe toe fakaha age e Sese ia Samema,+ kae neʼe ui e Samuele: “Neʼe mole filifili e Sehova ia ia ʼaeni.” 10 Neʼe fekauʼi e Sese ke fakalaka ʼona foha ʼae ʼe toko fitu ia muʼa ʼo Samuele, kae neʼe ui e Samuele kia Sese: “Neʼe mole filifili e Sehova he tahi ia natou ʼaeni.”

11 Ki muli age, neʼe ui age e Samuele kia Sese: “ ʼE ko ʼou foha fuli koa ʼaeni?” Neʼe ina ui: “ ʼE kei toe te muli,+ kae ʼe tokaga nei ki te ʼu ovi.”+ Pea neʼe ui e Samuele kia Sese: “Fekauʼi ia ia ke haʼu, he ʼe mole tou kakai anai kae heʼeki haʼu.” 12 Koia neʼe ina fekauʼi ai he tahi ke alu ʼo kumi mai ia ia. Neʼe kena, mo matalelei ʼona kanoʼi mata, pea mo talavou.+ Neʼe ui leva e Sehova: “Tuʼu ake ʼo fakanofo* ia ia, he ʼe ko ia ʼaeni neʼe au filifili!”+ 13 Neʼe toʼo ai e Samuele te talaʼi manu ʼae neʼe ʼai ai te lolo+ ʼo ina fakanofo ia ia, ia muʼa ʼo ʼona tehina. Pea talu mai te ʼaho ʼaia, neʼe fakamalohiʼi e te laumalie ʼo Sehova ia Tavite.+ Ki muli age, neʼe tuʼu ake Samuele ʼo alu ki Lama.+

14 Neʼe mavae leva te laumalie ʼo Sehova mai ia Saulo,+ pea neʼe tuku e Sehova ke hoha te loto ʼo Saulo.*+ 15 Neʼe ui e te hahaʼi faifekau ʼa Saulo kia ia: “Sio, ʼe tuku e te ʼAtua ke hoha tou loto. 16 Koia, siʼomatou ʼaliki, fakalelei siʼou loto, kae ke ke fakatotonu ki ʼau hahaʼi faifekau ʼae ʼi ʼou muʼa, ke natou kumi he tagata ʼe poto ʼi te ta alepa.+ ʼI te temi fuli pe ʼae ʼe tuku ai e te ʼAtua ke hoha tou loto, ʼe ina ta anai tana alepa, pea ʼe ke logo fimalie ai anai.” 17 Koia neʼe ui e Saulo ki ʼana hahaʼi faifekau: “Fakalelei, kae kotou kumi he tagata ʼe poto ʼi te ta alepa, pea kotou ʼaumai kia au.”

18 Neʼe ui e he tahi ʼi te hahaʼi gaue: “Neʼe au sio ki te poto ta alepa ʼo he foha ʼo Sese, te tagata Petelehemi, pea ʼe ko he tagata tau lototoʼa mo malohi.+ ʼE poto palalau, mo talavou+ pea ʼe nofo ia Sehova mo ia.”+ 19 Neʼe fekauʼi leva e Saulo te ʼu tagata ʼave logo kia Sese ke natou ui age: “Fekauʼi mai tou foha ko Tavite, ʼae ʼe tauhi ovi.”+ 20 Neʼe toʼo e Sese he asino ʼo ina hili ki ai te pane, mo te ʼaiʼaga vino pea mo he tao kei mui. Neʼe ina ʼavage ki tona foha ko Tavite ke alu ʼo ʼave kia Saulo. 21 Koia, neʼe haʼu ai ia Tavite kia Saulo pea neʼe kamata gaue maʼa ia.+ Neʼe ʼofa lahi ia Saulo ia ia, pea neʼe liliu ko tana tagata toʼo mahafu. 22 Neʼe fekauʼi e Saulo ke fakaha kia Sese: “Fakalelei siʼou loto, tuku ke nofo ia Tavite ke gaue kia au, he ʼe kua au ʼofa ai.” 23 ʼI te temi fuli pe ʼae neʼe tuku ai e te ʼAtua ke hoha te loto ʼo Saulo, neʼe ta e Tavite tana alepa, neʼe maʼu ai e Saulo hona fimalie mo logo lelei, pea neʼe mole kei hoha tona loto.+

17 Pea neʼe fakatahitahiʼi e te kau Filisitini+ ʼanatou kautau ki te tau. Neʼe natou fakatahitahi ʼi Sueko,+ ʼi Suta, pea neʼe natou fakatuʼu leva tonatou nofoʼaga ʼi Efese-tamine,+ ʼi te vaha ʼo Sueko mo Aseka.+ 2 Neʼe fakatahitahi ia Saulo mo te kau tagata ʼo Iselaele, ʼo natou fakatuʼu tonatou nofoʼaga ʼi te Potu Fenua Laulelei ʼo Ela,+ pea neʼe natou fakaʼatu ʼanatou solia ke natou tauʼi te kau Filisitini. 3 Neʼe nonofo te kau Filisitini ʼi te tahi moʼuga, kae nonofo te kau Iselaele ʼi te tahi age moʼuga, pea neʼe tuʼu te potu fenua laulelei ʼi lotomalie.

4 Neʼe haʼu leva mai te ʼu nofoʼaga ʼo te kau Filisitini he tagata toʼa, neʼe higoa ko Koliate,+ mai Kiete+ pea neʼe teitei meta tolu* tona lahi. 5 Neʼe ina ʼai he puloga tau kapa ʼi tona ʼulu pea neʼe ina tui he kofu tau.* Ko te mamafa ʼo tona kofu tau kapa+ neʼe ko sikele ʼe 5 000.* 6 Neʼe puipui ʼona vaʼe ʼaki te kapa pea neʼe haʼi ʼi tona tuʼa he savelo+ kapa. 7 Ko te ʼakau ʼo tana tao neʼe hage ko te ʼakau ʼae ʼe lalaga ai te filo,+ pea ko te mamafa ʼo tana mataʼi tao neʼe ko sikele ʼe 600.* Pea neʼe haʼele ʼi ʼona muʼa te tagata ʼae neʼe ina toʼo tana meʼa tali tau. 8 Neʼe tuʼu leva ʼo kalaga ki te kau solia ʼo Iselaele ʼae kua fakaʼatu ki te tau+ pea mo ina ui: “He koʼe kua kotou ʼomai ʼo fakaʼatu ki te tau? ʼE mole koa la ko au ko te tagata Filisitini kae ko koutou ko te kau faifekau ʼa Saulo? Kotou filifili hakotou tagata pea ke hifo mai kia au. 9 Kapau ʼe feala hana tau mo matehi au, ʼe matou liliu anai ko ʼakotou hahaʼi faifekau. Kae kapau ʼe au malo mo au matehi ia ia, ʼe kotou liliu anai ko ʼamatou hahaʼi faifekau.” 10 Pea neʼe ui leva e te tagata Filisitini: “ ʼE au laga tau ki te kau solia ʼo Iselaele+ ʼi te ʼaho nei. Kotou tuku mai he tagata pea ʼe ma fehokosi anai!”

11 ʼI te logo ʼa Saulo pea mo Iselaele katoa ki te ʼu palalau ʼaia ʼa te tagata Filisitini, neʼe natou matataku ʼosi.

12 Pea ko Tavite neʼe ko te foha ʼo te tagata Efalata+ mai Petelehemi+ ʼo Suta, neʼe higoa ko Sese,+ neʼe ko ʼona foha ʼe valu+ pea neʼe kua matuʼa ia ʼi te temi ʼo Saulo. 13 Ko te ʼu foha lalahi ʼe tolu ʼo Sese neʼe natou muliʼi ia Saulo ki te tau.+ Ko te ʼu higoa ʼo ʼona foha ʼaia ʼe tolu ko Eliape+ te ʼuluaki, ko te lua neʼe ko Apinatape+ pea ko te tolu neʼe ko Samema.+ 14 Neʼe ko Tavite te muli,+ pea ko te foʼi toko tolu lalahi neʼe natou muliʼi ia Saulo.

15 Neʼe gaue ia Tavite maʼa Saulo kae neʼe tau alu ki Petelehemi ʼo taupau te ʼu ovi+ ʼo tana tamai. 16 Lolotoga te temi ʼaia, neʼe haʼu te tagata Filisitini ʼo tuʼu ia muʼa ʼo te kau Iselaele ʼi te uhu fuli mo te afiafi fuli, lolotoga ʼaho ʼe 40.

17 Neʼe ui leva e Sese kia Tavite, tona foha: “Fakalelei siʼou loto, kae ke ke toʼo te efa* fulumeto* ʼaeni neʼe taʼo mo te ʼu foʼi pane ʼaeni ʼe hogofulu, pea ke foimo alu ʼo ʼave ki ʼou taʼokete ʼae ʼi te nofoʼaga solia. 18 Toʼo mo te ʼu koga folomasi* ʼaeni ʼe hogofulu ʼo ʼave ki te pule ʼo te toko afe. ʼE tonu foki ke ke vakaʼi pe ʼe feafeaʼi ʼou taʼokete pea ke toe liliu mai mo he ʼu logo.” 19 Neʼe natou fakatahi mo Saulo pea mo te kau tagata fuli ʼo Iselaele ʼi te Potu Fenua Laulelei ʼo Ela,+ moʼo tauʼi te kau Filisitini.+

20 Pea neʼe ʼala ake ia Tavite kei uhuuhu ʼo ina tuku te ʼu ovi ki he tahi ke ina taupau. Neʼe ina teuteuʼi leva ʼana meʼa pea neʼe alu, ohage pe ko tona fakatotonu age e Sese. ʼI tana tau atu ki te nofoʼaga solia, neʼe lolotoga olo te foʼi kautau ki te faʼahi ʼae neʼe fakahoko ai te tau, pea mo natou fai he kalaga tau. 21 Neʼe fakaʼatu e te kau Iselaele mo te kau Filisitini tanatou kau solia, ʼo natou fehagaʼaki. 22 Neʼe tuku atu aipe e Tavite te ʼu meʼa ʼae neʼe alu mo ia ki te tagata ʼae ʼe ina leʼo te ʼu kavega, kae lele ki te faʼahi ʼae neʼe fakahoko ai te tau. ʼI tana tau atu ki ai, neʼe ina fia iloʼi pe ʼe feafeaʼi ʼona taʼokete.+

23 Lolotoga tana faipalalau mo natou, neʼe haʼu te tagata toʼa ʼae neʼe higoa ko Koliate,+ te tagata Filisitini mai Kiete. Neʼe haʼu mai te foʼi ʼatu ʼo te kau solia Filisitini, ʼo ina toe fai pe ʼana palalau ʼae neʼe ina fai ki muʼa atu,+ pea neʼe logo ki ai ia Tavite. 24 ʼI te sisio ʼa te kau tagata fuli ʼo Iselaele ki ai, neʼe natou feholaki ʼi tanatou matataku.+ 25 Neʼe ui e te kau tagata ʼo Iselaele: “Neʼe kotou sisio koa ki te tagata ʼaeni ʼe haʼu? ʼE haʼu ʼo laga tau ki Iselaele.+ ʼE foaki anai e te hau he ʼu tuʼuga koloa ki te tagata ʼae ka ina matehi ia ia. ʼE ina foaki anai tona ʼofafine,+ pea ʼe mole ina fakamaʼua anai ki te famili ʼo tana tamai he ʼu tukuhau mo he ʼu gaue ʼi Iselaele.”

26 Neʼe ui leva e Tavite ki te ʼu tagata ʼae neʼe tutuʼu ovi kia ia: “Kotea ka foaki ki te tagata ʼae ʼe ina matehi anai te tagata Filisitini ʼae atu mo ina pulihi te fakalainoa ʼo Iselaele? He ʼe ko ai koa te tagata Filisitini heʼe silikosisio ʼaena* ke laga tau ki te kautau ʼa te ʼAtua maʼuli?”+ 27 Pea neʼe toe fakaha age pe e te hahaʼi te ʼu palalau ʼae neʼe natou fai ki muʼa atu, ʼo natou ui: “Koʼeni te meʼa ʼae ka foaki ki te tagata ʼae ka ina matehi ia ia.” 28 Neʼe logo ia Eliape, tona taʼokete+ ki tana faipalalau mo te ʼu tagata, pea neʼe ita leva kia Tavite ʼo ina ui age: “He koʼe neʼe ke hifo mai? Pea neʼe ke tuku kia ai te kiʼi faga ovi ʼae ʼi te toafa?+ ʼE au iloʼi lelei tau fiameʼalahi pea mo te ʼu fakatuʼutuʼu kovi ʼo tou loto. Neʼe ke hifo mai ʼuhi pe ko tau fia sio ki te tau.” 29 Neʼe ui age e Tavite: “Kotea koa ʼae neʼe au fai? Neʼe ko taku fehuʼi pe!” 30 Koia, neʼe lituʼa ai kia ia ʼo ina toe fai ki te tahi age tagata te fehuʼi ʼae neʼe ina fai ki muʼa atu,+ pea neʼe toe tatau pe te tali ʼae neʼe fai age e te hahaʼi.+

31 Neʼe logo ʼihi ki te ʼu palalau ʼae neʼe fai e Tavite pea neʼe fakaha kia Saulo. Koia neʼe ina fekauʼi ai ke alu age. 32 Neʼe ui e Tavite kia Saulo: “ ʼAua naʼa lotovaivai he tahi ʼuhi ko ia. ʼE alu anai tau tagata faifekau ʼo tauʼi te tagata Filisitini ʼaena.”+ 33 Kae neʼe ui e Saulo kia Tavite: “ ʼE mole ke lava tauʼi anai te tagata Filisitini ʼaia, he ʼe kei ke tamasiʼi,+ kae ko ia, ʼe ko he tagata tau ia talu mai tana kei tupulaga.” 34 Neʼe ui leva e Tavite kia Saulo: “Neʼe liliu tau tagata faifekau ko te tagata tauhi ovi ʼo te faga ovi ʼo tana tamai. Pea neʼe haʼu he laione,+ ʼo feia mo he uluso, ʼo nā tahi ʼave tana ovi ʼi te faga ovi. 35 Pea neʼe au tuli ʼo taʼi, neʼe au haofaki te ovi mai tona gutu. ʼI tana malaga ake ʼo ʼoho mai, neʼe au puke tona gutu ʼo au matehi ai ia ia. 36 Neʼe matehi e tau tagata faifekau te laione mo te uluso, pea ʼe liliu anai te tagata Filisitini heʼe silikosisio ʼaia ohage ko he tahi ʼi te ʼu manu ʼaia, he neʼe laga tau ki te kautau ʼa te ʼAtua maʼuli.”+ 37 Neʼe hoko atu leva e Tavite: “Ko Sehova, ʼae neʼe ina haofaki au mai te ʼu pasikuku ʼo te laione pea mo te uluso, ʼe ko ia pe ʼae ka ina haofaki au mai te ʼu nima ʼo te tagata Filisitini ʼaia.”+ Neʼe ui e Saulo kia Tavite: “Alu, pea ke nofo ia Sehova mo koe.”

38 Neʼe fakatui leva e Saulo tona teu tau kia Tavite. Neʼe ina ʼai ki tona ʼulu te puloga tau kapa, pea neʼe ina fakatui kia ia te kofu tau. 39 Neʼe haʼi leva e Tavite te heleta ki tona teu tau ʼaia, pea neʼe faiga ke haʼele, kae neʼe mole feala ia he neʼe mole mahani mo te teu ʼaia. Neʼe ui e Tavite kia Saulo: “ ʼE mole feala ke au alu mo te teu ʼaeni, he ʼe mole au mahani mo ia.” Neʼe huʼi ai e Tavite te teu ʼaia. 40 Neʼe ina toʼo leva ʼi tona nima tana ʼakau. Neʼe ina filifili he ʼu foʼi maka momole ʼe nima ʼi te vai tafe, ʼo ʼai ki te taga ʼo tana kato tauhi ovi, kae neʼe ina puke ʼi tona tahi nima tana makamaka.+ Pea neʼe fakaovi ki te tagata Filisitini.

41 Neʼe haga fakaovi mai pe te tagata Filisitini kia Tavite, pea neʼe haʼele ʼi ʼona muʼa te tagata ʼae neʼe ina toʼo tana meʼa tali tau. 42 ʼI te sio ʼa te tagata Filisitini kia Tavite, neʼe ina manukiʼi pea mo fehiʼa ki ai, he neʼe kei tamasiʼi, pea neʼe kena mo talavou.+ 43 Koia neʼe ui e te tagata Filisitini kia Tavite: “Ko au koa ko he kuli,+ ke ke haʼu ʼo tauʼi au ʼaki he ʼakau?” Pea neʼe faitutuku te tagata Filisitini kia Tavite ʼi te higoa ʼo ʼona ʼatua. 44 Neʼe ui e te tagata Filisitini kia Tavite: “Haʼu, pea ʼe au foaki anai tou sino ki te ʼu manulele pea mo te ʼu manu ʼo te vao.”

45 Neʼe tali e Tavite ki te tagata Filisitini: “ ʼE ke haʼu kia au mo tau heleta, mo tau tao pea mo tau savelo,+ kae ʼe au alu atu au kia koe ʼi te huafa ʼo Sehova ʼo te ʼatu kautau,+ te ʼAtua ʼo te kautau ʼa Iselaele, ʼae neʼe ke laga tau kia te ia.+ 46 ʼI te ʼaho ʼaeni, ʼe tuku mai anai koe e Sehova ki ʼoku nima,+ pea ʼe au matehi anai koe mo tuʼusi tou ʼulu. Pea ʼi te ʼaho ʼaeni, ʼe au foaki anai te ʼu sino mate ʼo te nofoʼaga ʼo te kau Filisitini ki te ʼu manulele mo te ʼu manu fekai ʼo te kele. Pea ʼe iloʼi anai e te hahaʼi fuli ʼo te kele ʼe ʼi ai te ʼAtua ʼi Iselaele.+ 47 Pea ʼe iloʼi anai e natou fuli ʼae ʼe fakatahitahi ʼi heni, ʼe mole haofaki e Sehova ʼaki te heleta peʼe ko te tao,+ he ʼe ʼa Sehova te tau+ pea ʼe ina tuku anai ia koutou fuli ki ʼomatou nima.”+

48 Pea neʼe hoko atu pe te fakaovi ʼa te tagata Filisitini kia Tavite, kae neʼe lele fakavilivili mai ia Tavite ki te kautau ʼo te kau Filisitini ke ina tauʼi ia te tagata Filisitini. 49 Neʼe ʼai leva e Tavite tona nima ki tana kato ʼo toʼo ake mai ai he foʼi maka pea neʼe ina tukiʼi ʼaki tana makamaka. Neʼe ina tukiʼi te tagata Filisitini ʼi tona laʼe, pea neʼe ulu loloto te foʼi maka ʼi tona laʼe ʼo to foʼohifo ai ki te kele.+ 50 Koia neʼe malo ia Tavite ʼi te tagata Filisitini ʼaki he makamaka mo he foʼi maka. Neʼe ina matehi te tagata Filisitini logo la neʼe mole ina toʼo he heleta ʼi tona nima.+ 51 Neʼe hoko atu e Tavite tana lele ʼo tuʼu leva ʼi ʼona tafa. Pea neʼe ina toʼo te heleta ʼa te tagata Filisitini+ ʼae neʼe ina tohoʼi mai tona ʼaiʼaga, ʼo tuʼusi ʼaki tona ʼulu ke ina iloʼi ai kua mate moʼoni. ʼI te sisio ʼa te kau Filisitini kua mate tanatou tagata toʼa, neʼe natou feholaki ai.+

52 Neʼe tutuʼu ake leva te kau tagata ʼo Iselaele mo Suta, ʼo natou kalaga pea mo tuli te kau Filisitini mai te potu fenua laulelei+ ki te ʼu matapa ʼo Ekelone.+ Neʼe leta te ʼu sino ʼo te kau Filisitini ʼi te ala, mai Saalaimi+ ʼo kaku ki Kiete mo Ekelone. 53 ʼI te ʼosi tuli fakakinau e te kau Iselaele ia te kau Filisitini, neʼe natou toe liliu leva ʼo maumauʼi ʼonatou nofoʼaga solia.

54 Neʼe toʼo leva e Tavite te ʼulu ʼo te tagata Filisitini ʼo ʼave ki Selusalemi, kae neʼe ina tuku leva te ʼu mahafu ʼa te tagata Filisitini ki tona fale la.+

55 ʼI te temi ʼae neʼe sio ai Saulo ki te alu ʼa Tavite ʼo tauʼi te tagata Filisitini, neʼe ina fehuʼi kia Apenele,+ te pule ʼo te kautau: “Apenele, ko te tama ʼaeni ʼe ko te foha ʼo ai?”+ Neʼe tali age e Apenele: “Siʼoku hau, ʼe au tala moʼoni atu, ʼe mole au iloʼi au!” 56 Neʼe ui e te hau: “Alu ʼo kumi pe ko te tama ʼaeni ʼe ko te foha ʼo ai.” 57 Koia, ʼi te toe liliu mai pe ʼa Tavite ʼi tana ʼosi matehi te tagata Filisitini, neʼe toʼo ia ia e Apenele ʼo ʼave kia muʼa ʼo Saulo, mo te ʼulu ʼo te tagata Filisitini+ ʼae neʼe ina toʼo ʼi tona nima. 58 Pea neʼe fehuʼi e Saulo ki ai: “Tama, ko koe ko te foha ʼo ai?” Neʼe tali age e Tavite: “Ko au ko te foha ʼo tau tagata faifekau ko Sese,+ te tagata Petelehemi.”+

18 ʼI te ʼosi palalau pe ʼa Tavite kia Saulo, neʼe feʼofaʼofani pea mo kaumeʼa lelei leva ia Sonatane+ mo Tavite, pea neʼe ʼofa ia Sonatane kia ia ohage pe ko tana ʼofa kia ia totonu.*+ 2 Talu mai te ʼaho ʼaia, neʼe taʼofi e Saulo ia Tavite ke nofo mo ia, pea neʼe mole ina tuku ke toe liliu ki te ʼapi ʼo tana tamai.+ 3 Neʼe fai leva e Sonatane mo Tavite he fuakava,+ he neʼe ʼofa kia ia ohage pe ko tana ʼofa kia ia totonu.*+ 4 Neʼe huʼi e Sonatane tona kofu tuʼa ʼo ina foaki age kia Tavite, ʼo feia mo tona teu solia, mo tana heleta, mo tana nahau pea mo tona kiliʼi pipi. 5 Neʼe alu leva ia Tavite ki te tau. Pea ko te faʼahi pe ʼae neʼe fekauʼi ai ia ia e Saulo ke alu ki ai, neʼe malo ai.*+ Koia, neʼe fakanofo ia ia e Saulo ke pule ki te kau tagata tau,+ pea neʼe fiafia ai te hahaʼi fuli mo te kau tagata faifekau ʼa Saulo.

6 ʼI te toe liliu mai ʼa Tavite mo te tahi kau tagata ʼi tanatou ʼosi matehi te kau Filisitini, neʼe ʼomai te ʼu fafine mai te ʼu kolo fuli ʼo Iselaele ʼo fakafelaveʼi ki te Hau ko Saulo, ʼo natou hiva,+ mo memeʼe pea mo fakafiafia ʼaki ni nafa+ mo ni lute.* 7 Neʼe hiva te ʼu fafine ʼae neʼe fakafiafia:

8 Neʼe kovi ʼosi te ita ʼo Saulo,+ pea neʼe mole ina leleiʼia te hiva ʼaia, he neʼe ina ui: “ ʼE natou tuku kia Tavite te toko lauʼi hogofulu afe, kae natou tuku mai kia au te toko lauʼi afe. ʼE kei toe pe ke tuku age mo te tuʼulaga hau!”+ 9 Talu mai te ʼaho ʼaia, neʼe lotomahalohalo tuʼumaʼu pe ia Saulo ʼo ʼuhiga mo Tavite.

10 ʼI te ʼaho ake, neʼe tuku e te ʼAtua ke hoha te loto ʼo Saulo,*+ pea neʼe kamata faikehe tana aga* ʼi tona loto fale, kae lolotoga ta alepa ia Tavite+ ohage ko tana fai mahani. Neʼe toʼo e Saulo he tao ʼi tona nima,+ 11 pea neʼe ina li te tao,+ ʼo ina ui ʼi tona loto: ‘ ʼE au hokaʼi anai ia Tavite ki te kaupa!’ Neʼe tuʼa lua tana fai te faʼahi ʼaia, kae neʼe hao aipe ia Tavite. 12 Neʼe mataku leva Saulo ia Tavite, koteʼuhi neʼe nofo ia Sehova mo ia+ kae neʼe mavae ia mai ia Saulo.+ 13 Koia, neʼe fakamamaʼo e Saulo ia Tavite mai ia ia, ʼo ina fakanofo ke pule ki he toko afe, pea neʼe takitaki e Tavite te kautau ʼi tanatou olo ki te tau.+ 14 Neʼe fua lelei tuʼumaʼu pe+ te ʼu meʼa fuli ʼae neʼe fai e Tavite,* pea neʼe nofo ia Sehova mo ia.+ 15 Pea ʼi te sio ʼa Saulo ki te fua lelei ʼo te ʼu meʼa ʼae neʼe fai e Tavite, neʼe mataku ai ia ia. 16 Kae neʼe ʼofa ia Iselaele katoa pea mo Suta kia Tavite, he neʼe ko ia tonatou takitaki ʼi te ʼu tau.

17 Ki muli age, neʼe ui e Saulo kia Tavite: “Koʼeni ia Melape toku ʼofafine lahi.+ ʼE au foaki atu anai ia ia ke liliu ko hou ʼohoana.+ Kae ʼe tonu ke hoko atu tau gaue kia au mo he lototoʼa pea ke fakahoko te ʼu tau ʼa Sehova.”+ Koteʼuhi neʼe ui e Saulo ʼi tona loto: ‘ ʼE mole au matehi anai ia ia, kae ʼe matehi anai e te kau Filisitini.’+ 18 Neʼe tali age e Tavite kia Saulo: “Ko ai koa ia au pea ko ai koa ʼoku kaiga, ia te famili ʼo taku tamai ʼae ʼi Iselaele ke au liliu ai ko te ʼohoana ʼo te ʼofafine ʼo te hau?”+ 19 Kae ʼi te hoko mai ʼo te temi ʼae neʼe tonu ai ke foaki e Saulo kia Tavite tona ʼofafine ko Melape, neʼe kua ʼosi foaki ia ke ʼohoana mo Ateliano,+ te tagata Meola.

20 Neʼe manako ia Mikale te ʼofafine ʼo Saulo+ ia Tavite, pea neʼe fakaha age kia Saulo, ʼo fiafia ai. 21 Koia, neʼe ui e Saulo ʼi tona loto: “ ʼE au foaki age anai toku ʼofafine kia ia ke liliu ko he hele kia ia, pea ʼe lagi matehi anai ia ia e te kau Filisitini.”+ Pea neʼe ui leva e Saulo kia Tavite: “ ʼI te ʼaho nei, ʼe ke liliu anai ko te ʼohoana ʼo toku ʼofafine.” 22 Pea tahi ʼae meʼa, neʼe fakatotonu e Saulo ki ʼana hahaʼi faifekau: “Kotou palalau fakafufu kia Tavite, ʼo ui age: ‘Sio, ʼe leleiʼia koe e te hau pea ʼe ʼoʼofa ʼana hahaʼi faifekau fuli ia koe. Koia, ʼi te lakaga leva ʼaeni, ke ke ʼohoana mo te ʼofafine ʼo te hau.’ ” 23 ʼI te fai e te hahaʼi faifekau ʼa Saulo te ʼu palalau ʼaia kia Tavite, neʼe ui e Tavite: “ ʼE ko he meʼa noa koa kia koutou haku ʼohoana mo te ʼofafine ʼo te hau kae ko au ko he tagata masiva pea ʼe mole maʼuhiga?”+ 24 Pea neʼe natou fakaha leva kia Saulo: “Koʼena te ʼu palalau ʼae neʼe fai e Tavite.”

25 Pea neʼe ui e Saulo: “Koʼeni te meʼa ʼae ʼe tonu ke kotou ui age kia Tavite: ‘ ʼE mole loto e te hau ki he totogi+ ke feala hau ʼohoana mo tona ʼofafine. Kae ke ke matehi he kau Filisitini ʼe toko 100,+ pea ke ʼaumai he fakamoʼoni* ke iloʼi ai kua natou mamate, ko te lagavaka ʼaia ʼa te hau ki ʼona fili.’ ” Koteʼuhi neʼe fakatuʼutuʼu e Saulo ke matehi ia Tavite e te kau Filisitini. 26 Koia neʼe fakaha age e ʼana tagata faifekau kia Tavite te ʼu palalau ʼaia, pea neʼe lotolelei ia Tavite ke ʼohoana mo te ʼofafine ʼo te hau.+ ʼI muʼa ʼo te hoko mai ʼo te temi ʼae neʼe fakatuʼutuʼu ki ai, 27 neʼe alu ia Tavite mo tana kau tagata pea neʼe natou matehi te kau tagata Filisitini ʼe toko 200, pea neʼe ʼaumai e Tavite ki te hau te fakamoʼoni ʼae kua natou mamate, ke feala hana ʼohoana mo te ʼofafine ʼo te hau. Neʼe foaki age leva e Saulo tona ʼofafine ko Mikale ke ina ʼohoanaʼi.+ 28 Neʼe iloʼi ai e Saulo neʼe nofo ia Sehova mo Tavite+ pea neʼe manako tona ʼofafine ko Mikale ia ia.+ 29 Neʼe lahi age leva te mataku ʼa Saulo ia Tavite, pea neʼe liliu ia Saulo ko te fili ʼo Tavite ʼi tona maʼuli katoa.+

30 Neʼe olo te kau ʼaliki ʼo te kau Filisitini ʼo tauʼi te kau Iselaele, kae ʼi te faiʼaga pe ʼo he tau, neʼe lahi age te malo ʼa* Tavite ʼi te kau tagata faifekau fuli ʼa Saulo.+ Pea neʼe iloa ai tona higoa.+

19 Ki muli age, neʼe fakaha leva e Saulo ki tona foha ko Sonatane pea mo ʼana hahaʼi faifekau fuli tana fia matehi ia Tavite.+ 2 Neʼe ʼofa mamahi ia Sonatane te foha ʼo Saulo ia Tavite,+ koia neʼe ina ui age ai kia Tavite: “ ʼE fia matehi koe e Saulo taku tamai. Koia, fakalelei siʼou loto, kae ke nofo tokaga apogipogi uhu pea ke alu ʼo nono ʼi he koga meʼa mo nofo ai. 3 ʼE au alu anai ki tuʼa ʼo tuʼu ia tafa ʼo taku tamai ʼi te koga meʼa ʼae ʼe ke nofo ai anai. ʼE au palalau anai ki taku tamai ʼo ʼuhiga mo koe, pea kapau ʼe ʼi ai he logo, ʼe au fakaha moʼoni atu anai.”+

4 Koia, neʼe palalau lelei ia Sonatane kia Saulo tana tamai ʼo ʼuhiga mo Tavite.+ Neʼe ina ui age: “ ʼAua naʼa agahala te hau ki tana tagata faifekau ko Tavite, koteʼuhi neʼe mole agahala ia kia koe kae neʼe fua lelei kia koe te ʼu meʼa ʼae neʼe ina fai. 5 Neʼe feala pe ke mate ʼi tana haga ʼo matehi te tagata Filisitini+ pea neʼe foaki e Sehova he toe malo lahi ki Iselaele katoa. Neʼe ke sio ki te faʼahi ʼaia, pea neʼe ke fiafia ʼaupito ai. Koia he koʼe ʼe ke agahala anai ki he tahi neʼe mole ina fai he meʼa ʼe kovi, ʼo ke matehi ia Tavite kae mole hona tupuʼaga?”+ 6 Pea neʼe fakalogo leva ia Saulo kia Sonatane ʼo ina fakapapau age: “ ʼE au fakapapau atu ia muʼa ʼo Sehova, te ʼAtua maʼuli, ʼe mole au matehi anai ia ia.” 7 Hili ʼaia, neʼe pauʼi e Sonatane ia Tavite ʼo ina fakaha age te ʼu meʼa fuli ʼaia. Neʼe ʼave leva e Sonatane ia Tavite kia Saulo, pea neʼe hoko atu pe tana gaue kia ia ohage pe ko te temi muʼa.+

8 Ki muli age, neʼe toe fai te tau. Neʼe alu ai ia Tavite ʼo tauʼi te kau Filisitini pea neʼe lahi ai te mātea ʼi te kau Filisitini, kae feholaki ia natou ʼae neʼe hao ʼi te tau.

9 Pea neʼe tuku e Sehova ke hoha te loto ʼo Saulo,*+ ʼi te temi ʼae neʼe heka ai ʼi tona loto fale pea neʼe ina toʼo tana tao ʼi tona nima, kae lolotoga ta alepa ia Tavite.+ 10 Pea neʼe faiga e Saulo ke ina hokaʼi ia Tavite ki te kaupa ʼaki te tao, kae neʼe kalo ia, pea neʼe tau te tao ʼi te kaupa. Neʼe hola leva ia Tavite ʼi te po ʼaia. 11 Ki muli age, neʼe fekauʼi e Saulo he kau tagata ʼave logo ke natou leʼo te ʼapi ʼo Tavite pea ke natou matehi ia ia ʼi te ʼala uhu ake.+ Kae neʼe ui age e Mikale te ʼohoana ʼo Tavite ki ai: “Kapau ʼe mole ke hola ʼi te po ʼaeni, ʼe ke mate anai apogipogi.” 12 Neʼe foimo fakahifo e Mikale ia Tavite ʼi te matapa fakamalama, ke feala ai hana hola pea mo hao ai. 13 Neʼe toʼo leva e Mikale he fakatata* ʼo ina fakatakoto ki te palepale, mo ina ʼai he ʼu fuluʼi tao ʼi te faʼahi ʼae neʼe ʼuluga ki ai ia Tavite, pea neʼe ina ʼuʼufi ʼaki he kofu.

14 Pea neʼe fekauʼi leva e Saulo he kau tagata ʼave logo ke natou puke ia Tavite, kae neʼe ui age e Mikale: “ ʼE mahaki.” 15 Koia neʼe toe fekauʼi e Saulo te kau tagata ʼave logo ke natou olo ʼo vakaʼi ia Tavite, pea neʼe ina ui kia natou: “Kotou fata mai ia ia ʼi tona palepale ke au matehi ia ia.”+ 16 ʼI tanatou ʼulu ki loto, neʼe ʼi ai te fakatata* ʼi te palepale pea mo he ʼu fuluʼi tao ʼi te faʼahi ʼae neʼe ʼuluga ki ai Tavite. 17 Neʼe ui e Saulo kia Mikale: “He koʼe neʼe ke kakaʼi feiaʼi au pea mo ke tuku toku fili+ ke hola?” Neʼe tali age e Mikale kia Saulo: “Neʼe ina ui mai: ‘Tuku ke au alu, naʼa au matehi koe!’ ”

18 Neʼe hola leva ia Tavite ke tupu ai hana hao, pea neʼe alu kia Samuele ʼi Lama.+ Neʼe ina fakamatala age te ʼu meʼa fuli ʼae neʼe fai e Saulo kia ia. Pea neʼe alu ai mo Samuele ʼo nā nonofo ʼi Nasote.+ 19 Ki muli age, neʼe fakaha kia Saulo: “Koʼeni ʼe nofo ia Tavite ʼi Nasote, ʼi Lama.” 20 Neʼe fekauʼi atu aipe e Saulo he kau tagata ʼave logo ke natou olo ʼo puke ia Tavite. Neʼe natou sisio ai ki te faifakakikite ʼa te kau polofeta ʼae kua vaivavai pea mo te takitaki ʼo natou e Samuele. ʼI te temi ʼaia, neʼe hifo ai te laumalie ʼo te ʼAtua ki te kau tagata ʼave logo ʼa Saulo, pea neʼe toe hage foki tanatou aga ko he kau polofeta.

21 ʼI tanatou fakaha age kia Saulo te faʼahi ʼaia, neʼe ina foimo fekauʼi atu aipe te tahi kau tagata ʼave logo, kae neʼe toe hage foki tanatou aga ko he kau polofeta. Koia, neʼe toe fekauʼi e Saulo te tahi age kau tagata ʼave logo, ko te tolu kutuga ʼaia, kae neʼe toe hage foki tanatou aga ko he kau polofeta. 22 Ki muli age, neʼe toe alu mo ia ki Lama. ʼI tana tau atu ki te foʼi tane lahi ʼae ʼi Seku, neʼe ina fehuʼi: “Kofea ia Samuele mo Tavite?” Neʼe natou tali age: “Koʼena naua ʼi Nasote,+ ʼi Lama.” 23 ʼI te alu ʼaia ʼa Saulo ki Nasote, ʼi Lama, neʼe toe hifo foki te laumalie ʼo te ʼAtua kia ia. Pea ʼi tana haʼele ʼaia, neʼe hage tana aga ko he polofeta ʼo kaku ki tana tau atu ki Nasote, ʼi Lama. 24 Neʼe ina toe huʼi foki ʼona mutuʼi meʼa, pea neʼe toe hage foki tana aga ko he polofeta ia muʼa ʼo Samuele, pea neʼe takoto telefua ai* ʼi te ʼaho katoa ʼaia mo te po katoa. Ko te tupuʼaga la ʼaia ʼo te ui: “ ʼE toe kau koa mo Saulo ʼi te kau polofeta?”+

20 Pea neʼe hola leva ia Tavite mai Nasote, ʼi Lama. Kae neʼe alu kia Sonatane ʼo ina ui age: “Kotea koa ʼae neʼe au fai?+ Kotea koa te meʼa ʼe kovi mo te agahala ʼae neʼe au fai ki tau tamai ke ina fia matehi ai au?”* 2 Neʼe ui age e Sonatane ki ai: “ ʼE mole feala anai ke hoko!+ ʼE mole ke mate anai. ʼE mole fai anai e taku tamai he meʼa, pe ʼe lahi peʼe veliveli, kae heʼeki ina fakaha mai. He koʼe koa ʼe fufu mai anai e taku tamai te faʼahi ʼaia kia au? ʼE mole hoko anai te faʼahi ʼaia.” 3 Kae neʼe hoko atu e Tavite: “ ʼE iloʼi lelei e tau tamai ʼe ke ʼofa ia au,+ pea ʼe ina ui anai: ‘ ʼAua naʼa fakaha age te faʼahi ʼaeni kia Sonatane he ʼe lotomamahi anai.’ ʼE au tala moʼoni atu kia koe pea ia muʼa ʼo Sehova, ʼe kua vave matehi au.”+

4 Pea neʼe ui age leva e Sonatane kia Tavite: “ ʼE au fai anai ia meʼa fuli ʼe ke* ui mai ke au fai.” 5 Neʼe ui e Tavite kia Sonatane: “Apogipogi ʼe tuʼu afiafi ai te mahina,+ pea ʼe mahino ia ʼe tonu ke au kai fakatahi mo te hau. Koia, ʼe tonu ke ke tuku au ke au alu, pea ʼe au nono anai ʼi te tuʼa kolo, ʼo kaku ki te afiafi ʼo te tolu ʼaho. 6 Kapau ʼe tokagaʼi e tau tamai taku puli, pea ʼe tonu ke ke ui age: ‘Neʼe kole mai e Tavite pe ʼe feala ke alu fakavilivili ki Petelehemi tona kolo,+ he ʼe tonu ke momoli ai te sakilifisio maʼa tona famili katoa, pea ʼe fai ʼi te taʼu fuli.’+ 7 Kapau ʼe ina tali atu, ‘ ʼIo, ʼe lelei,’ pea ʼe mole tonu anai ke mataku tau tagata faifekau. Kae kapau ʼe ita, ke ke iloʼi papau kua ina fakatotonu ke ina fai mai kia au he meʼa ʼe kovi. 8 Pea ke ke fakaha tou ʼofa agatonu ki tau tagata faifekau,+ koteʼuhi neʼe ke fai he fuakava mo tau tagata faifekau ia muʼa ʼo Sehova.+ Kae kapau neʼe au fai he meʼa ʼe kovi,+ ke ke matehi au. He koʼe ʼe ke tuku anai au ki tau tamai?”

9 Kae neʼe ui e Sonatane: “ ʼE mole feala ia ke hoko te meʼa ʼaia! Kapau ʼe au iloʼi kua fakatotonu e taku tamai ke ina fai he meʼa ʼe kovi kia koe, pe ʼe mole au fakaha atu anai koa?”+ 10 Pea neʼe ui e Tavite kia Sonatane: “Ko ai ʼae ka ina fakaha mai anai pe neʼe tali atu e tau tamai ʼaki he ʼu palalau fefeka?” 11 Neʼe ui e Sonatane kia Tavite: “Haʼu ke ta olo ki te tuʼa kolo.” Neʼe nā olo ai ki te tuʼa kolo. 12 Pea neʼe ui e Sonatane kia Tavite: “Ke fakamoʼoni e Sehova, te ʼAtua ʼo Iselaele te faʼahi ʼaeni: Apogipogi peʼe ʼi te tolu ʼaho, ʼe au faiga anai ke au iloʼi te manatu ʼo taku tamai. Kapau ʼe mole ita kia koe, pea ʼe mole au fakaha atu anai koa ke ke iloʼi? 13 Kae kapau ʼe fia fai e taku tamai he meʼa ʼe kovi kia koe, ke tauteaʼi lahi au e Sehova mo kapau ʼe mole au fakaha atu te faʼahi ʼaia pea mo au tuku ia koe ke ke alu ʼi te tokalelei. Ke nofo ia Sehova mo koe,+ ohage pe ko tana nofo mo taku tamai.+ 14 Pea ʼe mole ke fakaha mai anai koa la te ʼofa agatonu ʼo Sehova ʼi te temi ʼae ʼe kei au maʼuli ai pea maʼia moka au mate?+ 15 Ke ke fakaha tuʼumaʼu pe tou ʼofa agatonu ki toku loto fale,+ maʼia moka fakaʼauha anai e Sehova te ʼu fili fuli ʼo Tavite ʼi te fuga kele.” 16 Koia neʼe fai e Sonatane he fuakava mo te loto fale ʼo Tavite, ʼo ina ui: “ ʼE fakamaʼua anai e Sehova ke tauteaʼi te ʼu fili ʼo Tavite.” 17 Koia neʼe kole ai e Sonatane ke toe fai e Tavite te fakapapau ʼuhi ko tona ʼofa ia ia, he neʼe ʼofa ia ia ohage pe ko tana ʼofa ʼae kia ia totonu.*+

18 Neʼe hoko atu e Sonatane: “Apogipogi ʼe tuʼu afiafi ai te mahina+ pea ʼe tokagaʼi anai tau puli, he ʼe mole he tahi ʼe nofo anai ʼi tou hekaʼaga. 19 ʼI te tolu ʼaho, ʼe tokagaʼi moʼoni anai tau puli, pea ʼe tonu ke ke alu ki te koga meʼa ʼae neʼe ke nono ai ʼi te tahi ʼaho,* ʼo ke nofo ai ʼo ovi ki te foʼi maka. 20 Pea ʼe au fanahi anai he ʼu kauʼi nahau ʼe tolu ki te tahi faʼahi ʼo te foʼi maka, ke hage ʼe tau ki he meʼa. 21 ʼI taku fekauʼi taku tagata gaue, ʼe au ui anai: ‘Alu ʼo kumi mai te ʼu kauʼi nahau.’ Kapau ʼe au ui ki ai: ‘Koʼena te ʼu kauʼi nahau ʼe tuku ovi atu, pea ke haga ʼo toʼo,’ ko tona fakaʼuhiga ʼe feala hau toe liliu mai. ʼE au fakapapau atu ia muʼa ʼo Sehova, te ʼAtua maʼuli, ʼe mole tonu ke ke mataku pea ʼe mole hoko anai he meʼa ʼe kovi kia koe. 22 Kae kapau ʼe au ui ki te tama: ‘Koʼena te ʼu kauʼi nahau ʼe mamaʼo mo koe,’ pea ʼe tonu ke ke hola, koteʼuhi ʼe loto e Sehova ke ke alu. 23 Ke fakamoʼoni e Sehova ia te fakapapau ʼae neʼe ta fai, ʼo talu ai.”+

24 Koia neʼe nono ai ia Tavite ʼi te tuʼa kolo. ʼI te hoko mai ʼo te tuʼu afiafi ʼo te mahina, neʼe heka leva te hau ke kai.+ 25 Neʼe heka te hau ʼi tona hekaʼaga mahani ʼae ʼe ovi ki te kaupa. Neʼe heka ia Sonatane ʼo haga kia ia, pea neʼe heka ia Apenele+ ʼi te ʼu tafa ʼo Saulo, kae neʼe mole he tahi ʼi te hekaʼaga ʼo Tavite. 26 Neʼe mole gu ia Saulo ʼi te ʼaho ʼaia, he neʼe manatu: ‘Neʼe lagi hoko he meʼa kia ia ʼo heʼe maʼa ai.+ ʼEi, ʼe lagi heʼe maʼa ia.’ 27 ʼI te ʼaho ake, hili te tuʼu afiafi ʼo te mahina, ʼi te lua ʼaho, neʼe mole he tahi ʼi te hekaʼaga ʼo Tavite. Neʼe ui leva e Saulo kia Sonatane, tona foha: “He koʼe neʼe mole haʼu te foha ʼo Sese+ ki te kai ʼanafi pea mo te ʼaho nei?” 28 Neʼe tali e Sonatane kia Saulo: “Neʼe kole mai e Tavite pe ʼe feala la hana alu muʼa ki Petelehemi.+ 29 Neʼe ina ui mai: ‘Fakalelei siʼou loto, kae ʼe feala la ke au alu? Koteʼuhi ʼe momoli e toku famili he sakilifisio ʼi te kolo, pea neʼe kole mai e toku taʼokete ke au alu age. Koia, fakalelei siʼou loto, kapau ʼe ke ʼofa ia au, tuku ke au alu fakavilivili ki ʼoku taʼokete.’ Ko te tupuʼaga la ʼaia ʼo tana mole haʼu ki te laupapa ʼo te hau.” 30 Neʼe kovi ʼosi ai te ita ʼo Saulo kia Sonatane, ʼo ina ui age ki ai: “Ko koe ko te tama ʼa he fafine agatuʼu! ʼE au iloʼi lelei pe kua ke filifili ke ke kau mo te foha ʼo Sese, pea ʼe ko he meʼa fakaufiufi kia koe pea mo tau faʼe.* 31 ʼI te temi ʼae ʼe kei maʼuli ai te foha ʼo Sese, ʼe mole tuʼu malohi anai tau pule fakahau.+ Koia, ʼi te lakaga nei, fekauʼi he tahi ke alu ʼo kumi mai, he ʼe tonu ke matehi.”*+

32 Kae neʼe ui e Sonatane kia Saulo tana tamai: “He koʼe koa ʼe tonu ke matehi ia ia?+ Kotea ʼae neʼe ina fai?” 33 Neʼe li e Saulo te tao kia ia ke ina hokaʼi ia ia,+ pea neʼe iloʼi ai e Sonatane kua fakatotonu e tana tamai ke ina matehi ia Tavite.+ 34 Neʼe tuʼu ake aipe ia Sonatane mai te laupapa mo he toe ita lahi, pea neʼe mole kai ʼi te lua ʼaho ʼaia hili te tuʼu afiafi ʼo te mahina, he neʼe lotomamahi ʼo ʼuhiga mo Tavite+ pea neʼe fakalainoaʼi ia ia e tana tamai.

35 ʼI te ʼala uhu ake, neʼe alu ia Sonatane ki te tuʼa kolo ʼuhi ko te fakatuʼutuʼu ʼae neʼe ina fai mo Tavite, pea neʼe alu mo he tagata faifekau tupulaga.+ 36 Pea neʼe ina ui age ki tana tagata faifekau: “Fakalelei siʼou loto, lele ʼo kumi mai te ʼu kauʼi nahau ʼae ʼe au fanahi.” Neʼe lele ai te tagata faifekau, pea neʼe fanahi e Sonatane he kauʼi nahau ke mamaʼo ia ia. 37 ʼI te aʼu ʼa te tagata faifekau ki te faʼahi ʼae neʼe fanahi ai e Sonatane te kauʼi nahau, neʼe kalaga ia Sonatane kia ia: “ ʼE mole koa la mamaʼo ia koe te kauʼi nahau?” 38 Neʼe ui e Sonatane ki tana tagata faifekau: “Fakavilivili! Kae ke foimo alu! ʼAua naʼa ke fakatuatuai!” Pea neʼe tae e te tagata faifekau ʼa Sonatane te ʼu kauʼi nahau pea neʼe toe liliu mai ki tona pule. 39 Neʼe mole iloʼi e te tagata faifekau he meʼa. Neʼe gata pe kia Sonatane mo Tavite neʼe mahino ki tona fakaʼuhiga. 40 Pea neʼe foaki leva e Sonatane ʼana mahafu ki tana tagata faifekau, ʼo ina ui age: “Alu ʼo ʼave ki te kolo.”

41 ʼI te ʼosi mavae ʼa te tagata faifekau, neʼe haʼu ia Tavite mai he faʼahi neʼe ovi age, ʼi te potu saute. Pea neʼe tuʼutuli ifo ʼo tulolo tuʼa tolu, ʼo nā faʼufua mo fetagihi, kae neʼe lahi age te tagi ʼa Tavite. 42 Neʼe ui e Sonatane kia Tavite: “Alu ʼi te fimalie, he neʼe ta fakapapau+ ʼi te huafa ʼo Sehova, ʼo ui: ‘Ke liliu ia Sehova ko te fakamoʼoni ʼo te fuakava ʼae neʼe ta fai, ʼo ʼuhiga mo koe pea mo au, mo toku hakoga pea mo tou hakoga ʼo talu ai.’ ”+

Pea neʼe tuʼu ake ia Tavite ʼo alu, kae neʼe toe liliu leva ia Sonatane ki te kolo.

21 Ki muli age, neʼe alu leva ia Tavite ki Nope,+ kia Asimeleke te pelepitelo. Pea neʼe mataku ia Asimeleke ʼi tana felaveʼi mo Tavite, pea neʼe ina ui age: “He koʼe neʼe ke haʼu tokotahi, kae neʼe mole haʼu he tahi mo koe?”+ 2 Neʼe tali e Tavite kia Asimeleke, te pelepitelo: “Neʼe fakatotonu mai e te hau he gaue ke au fai, pea neʼe ina ui mai: ‘Ke mole iloʼi e he tahi te gaue ʼae ʼe au fekauʼi koe ke ke fai ʼo feia mo te ʼu fakatotonu ʼae ʼe au tuku atu.’ Pea neʼe au fai he fakatuʼutuʼu mo taku kau tagata tupulaga ke matou felaveʼi ʼi he koga meʼa. 3 Kapau ʼe ke maʼu he ʼu foʼi pane ʼe nima, peʼe ko he meʼa pe ʼe ke maʼu, ʼe feala la ke ke foaki mai?” 4 Kae neʼe tali e te pelepitelo kia Tavite: “ ʼE mole ko te ʼu foʼi pane mahani ʼae ʼe au maʼu, kae ʼe ko te ʼu foʼi pane taputapu.+ Pea ʼe feala anai ke kai ki ai te kau tagata tupulaga mo kapau neʼe mole natou momoe mo ni fafine.”+ 5 Neʼe tali e Tavite ki te pelepitelo: “Neʼe mole matou momoe mo ni fafine, ohage pe ko te ʼu temi ki muʼa atu, ʼi taku alu ʼae ki te tau.+ Kapau ʼe nonofo maʼa te kau tagata tupulaga ʼi te ʼu temi ʼae ʼe natou fai ai he ʼu gaue mahani, ʼe feafeaʼi age la ki te ʼaho ʼaeni!” 6 Pea neʼe foaki age e te pelepitelo te ʼu foʼi pane taputapu,+ he neʼe mole he tahi age ʼu foʼi pane, gata pe ki te ʼu foʼi pane ʼae neʼe molagaʼi, pea neʼe toʼo ʼi te tapenakulo ʼo Sehova ʼo fetogi ʼaki he ʼu foʼi pane foʼou, ʼi te ʼaho ʼae neʼe toʼo ai.

7 ʼI te ʼaho ʼaia, neʼe nofo ʼi ai he tahi ʼo te ʼu tagata faifekau ʼa Saulo, pea neʼe tonu ke nofo ia muʼa ʼo Sehova, ʼi te tapenakulo. Neʼe higoa ko Toeke,+ te tagata Etome,+ pea neʼe ko te pule ʼo te kau tagata tauhi ovi ʼa Saulo.

8 Neʼe ui leva e Tavite kia Asimeleke: “ ʼE mole ke maʼu mai la he tao peʼe ko he heleta? Neʼe mole au haʼu mo taku heleta mo ʼaku mahafu, he neʼe tonu ke fai fakavilivili te gaue ʼa te hau.” 9 Pea neʼe ui e te pelepitelo: “ ʼE ʼi heni te heleta ʼa Koliate,+ te tagata Filisitini ʼae neʼe ke matehi ʼi te Potu Fenua Laulelei ʼo Ela.+ ʼE kofukofu ʼaki he kie pea ʼe tuku ʼi te tuʼa efote.+ Ke ke toʼo maʼa koe, mo kapau ʼe ke loto ki ai, he ʼe mole he tahi age heleta ʼi heni.” Neʼe ui e Tavite: “ ʼE mole he tahi age heleta ʼe tatau mo ia. Foaki mai kia au.”

12 Neʼe toʼo fakamalotoloto e Tavite te ʼu palalau ʼaia, pea neʼe lahi leva tana mataku+ kia Akise, te Hau ʼo Kiete. 13 Koia, ʼi tana tuʼu ʼi ʼonatou muʼa, neʼe ina fai ni meʼa ohage ko he tahi kua puli tona ʼatamai,+ pea neʼe hage ko he tagata vale ʼi tana nofo mo natou.* Neʼe ina fai he ʼu fakailoga ʼi te ʼu matapa, pea neʼe ina tuku ke hali tona savai ʼi tona kava. 14 Pea neʼe ui leva e Akise ki ʼana tagata faifekau: “ ʼE kotou sisio lelei pe, ko te tagata ʼaeni ʼe vale! He koʼe neʼe kotou ʼaumai ia ia kia au? 15 Pe ʼe mole feʼauga koa la te kau tagata vale ʼae ʼi heni, ke kotou ʼaumai ai kia au te tagata vale ʼaeni? ʼE tonu koa ke hu te tagata ʼaeni ki toku loto fale?”

22 Koia neʼe hola ia Tavite mai ai,+ ʼo alu ki te ʼana ʼo Atulami.+ ʼI te logo ʼo ʼona taʼokete mo te loto fale katoa ʼo tana tamai ki ai, neʼe natou hifo ai ki ai. 2 Pea neʼe fakatahi age kia ia ia natou fuli ʼae neʼe nonofo ʼi te faigataʼaʼia, mo natou ʼae neʼe tuʼu maʼua pea mo natou ʼae neʼe lotomamahi. Neʼe liliu ai ko tonatou pule. Neʼe ko te ʼu tagata ʼe teitei toko 400 ʼae neʼe fakatahi mo ia.

3 Ki muli age, neʼe mavae ia Tavite mai ai ʼo alu ki Misipe, ʼi Moape pea neʼe ina ui ki te hau ʼo Moape:+ “Fakalelei siʼou loto, kae ke nofo mo koe taku tamai mo taku faʼe, ʼo aʼu ki taku iloʼi pe kotea ʼae ka fai e te ʼAtua maʼaku.” 4 Neʼe ina tuku ai naua ke nā nonofo mo te hau ʼo Moape, pea neʼe nā nonofo ai ʼi te temi katoa ʼae neʼe nono ai ia Tavite ʼi te ʼu moʼuga.+

5 Ki muli age, neʼe ui e te polofeta ko Kate+ kia Tavite: “ ʼAua naʼa ke nono ʼi te ʼu moʼuga. Kae ke ke mavae mai hena ʼo alu ki te fenua ʼo Suta.”+ Koia neʼe mavae ai ia Tavite ʼo alu ki te vao matuʼa ʼo Eleti.

6 Neʼe logo leva ia Saulo kua iloʼi te faʼahi ʼae neʼe nonofo ai ia Tavite mo te ʼu tagata ʼae neʼe fakatahi mo ia. ʼI te temi ʼaia, neʼe nofo ia Saulo ʼi Kipease,+ pea neʼe heka ʼi te lalo fuʼu tamalisi ʼi te faʼahi maʼoluga mo tana tao ʼi tona nima, pea neʼe tutuʼu ʼana hahaʼi faifekau fuli ʼi ʼona tafa. 7 Neʼe ui leva e Saulo ki ʼana hahaʼi faifekau ʼae neʼe ʼi ʼona tafa: “Fakalelei siʼokotou loto, kau tagata ʼo Pesamino, kae kotou fakalogo mai. ʼE toe foaki atu anai koa e te foha ʼo Sese+ hakotou ʼu gaueʼaga mo gaueʼaga vite kia koutou fuli? ʼE ina fakanofo anai koa ia koutou fuli ko he kau pule ʼo he toko afe pea mo he toko teau?+ 8 Neʼe kotou fonofono ia koutou fuli ke kotou fakafeagai mai kia au! ʼI te temi ʼae neʼe fai ai e toku foha totonu he fuakava mo te foha ʼo Sese, neʼe mole he tahi neʼe ina fakaha mai!+ Neʼe mole he tahi ia koutou neʼe manavaʼofa kia au, ʼo ina fakaha mai ia te uga e toku foha totonu taku tagata faifekau ke fakafeagai mai kia au, ohage pe ko te meʼa ʼaeni ʼe hoko ʼi te ʼaho nei.”

9 Neʼe ui leva e Toeke,+ te tagata Etome, ʼae neʼe pule ki te hahaʼi faifekau ʼa Saulo:+ “Neʼe au sio ki te foha ʼo Sese neʼe alu ki Nope, kia Asimeleke, te foha ʼo Ahitupe.+ 10 Pea neʼe fakafehuʼi e Asimeleke ia Sehova maʼa ia, pea neʼe ina foaki age hana meʼa kai. Neʼe ina toe foaki age mo te heleta ʼa Koliate, te tagata Filisitini.”+ 11 Neʼe fekauʼi atu aipe e te hau ke ʼomai ia Asimeleke, te foha ʼo Ahitupe te pelepitelo pea mo te kau pelepitelo fuli ʼo te famili ʼo tana tamai, ʼae neʼe nonofo ʼi Nope. Neʼe natou ʼomai fuli ai ki te hau.

12 Neʼe ui leva e Saulo: “Fakalelei siʼou loto, foha ʼo Ahitupe, kae ke ke fakalogo mai!” Neʼe ina tali age: “ ʼE au fakalogo atu, siʼoku ʼaliki.” 13 Neʼe ui e Saulo ki ai: “He koʼe neʼe kolua fonofono, ia koe mo te foha ʼo Sese, ke kolua fakafeagai mai kia au, ʼo ke foaki age hana foʼi pane, mo he heleta pea mo ke fakafehuʼi te ʼAtua maʼa ia? ʼE fakafeagai mai kia au pea ʼe ina fai he ʼu fakatuʼutuʼu kaka kia au, ohage pe ko te meʼa ʼaeni ʼe hoko ʼi te ʼaho nei.” 14 Neʼe tali e Asimeleke ki te hau: “ ʼE ʼi ai koa he tahi ʼi ʼau tagata faifekau fuli ʼe tuha mo te falala* ohage ko Tavite?+ ʼE ʼohoana mo tou ʼofafine,+ ʼe pule ki ʼau tagata leʼo pea ʼe fakaʼapaʼapaʼi ʼi tou fale.+ 15 Pe ʼe ko taku hoki fakafehuʼi koa ʼaeni ia te ʼAtua maʼa ia?+ Ko te ʼu meʼa ʼae ʼe ke talanoa mai ki ai, neʼe mole feala ia ke au fai! ʼAua naʼa ke tukugakoviʼi au pea mo te loto fale katoa ʼo taku tamai, koteʼuhi neʼe mole au iloʼi he meʼa ʼe tahi ʼo ʼuhiga mo te faʼahi ʼaia.”+

16 Kae neʼe ui e te hau: “Asimeleke, ʼe ke mate moʼoni anai,+ ʼo feia mo te famili katoa ʼo tau tamai.”+ 17 Neʼe ui e te hau ki te kau tagata leʼo* ʼae neʼe tutuʼu ʼi ʼona tafa: “Kotou olo ʼo matehi te kau pelepitelo ʼa Sehova, koteʼuhi ʼe natou kau mo Tavite! Neʼe natou iloʼi lelei pe neʼe au tuli ia ia, kae neʼe mole natou fakaha mai he meʼa!” Kae neʼe mole fia fāfā te kau tagata faifekau ʼa te hau ki te kau pelepitelo ʼa Sehova pea mo matehi natou. 18 Neʼe ui leva e te hau kia Toeke:+ “Alu ʼo matehi te kau pelepitelo!” Neʼe alu atu aipe ia Toeke, te tagata Etome+ ʼo matehi te kau pelepitelo. ʼI te ʼaho ʼaia, neʼe ina matehi ai te ʼu tagata ʼe toko 85 neʼe natou tui te efote lino.+ 19 Neʼe ina toe ʼohofi foki ia Nope,+ te kolo ʼo te kau pelepitelo. Neʼe ina tamateʼi ʼaki te heleta te hahaʼi tagata, mo te hahaʼi fafine, mo te tamaliki, ʼo feia mo natou ʼae neʼe kei meamea, mo te ʼu vitulo, mo te ʼu asino, pea mo te ʼu ovi.

20 Kae ko he tahi ʼo te ʼu foha ʼo Asimeleke, te foha ʼo Ahitupe, neʼe hao pea neʼe hola ʼo mulimuli ia Tavite. Neʼe higoa ko Apiata.+ 21 Neʼe ui e Apiata kia Tavite: “Neʼe matehi e Saulo te kau pelepitelo ʼa Sehova.” 22 Pea neʼe ui e Tavite kia Apiata: “Neʼe au iloʼi ʼi te ʼaho pe ʼaia,+ ʼi te nofo ʼa Toeke ʼi ai, te tagata Etome, ʼe ina fakaha anai kia Saulo. ʼE ko au ʼae neʼe tupu ai te mamate ʼa te hahaʼi* fuli ʼo te famili ʼo tau tamai. 23 Nofo mo au. ʼAua naʼa ke mataku, he ʼe ko ia ʼae ʼe ina kumi ke ina matehi koe,* ʼe ina toe kumi foki ke ina matehi au.* ʼE au puipui anai koe.”+

23 Ki muli age, neʼe fakaha age kia Tavite: “ ʼE tauʼi e te kau Filisitini te kolo ko Keila,+ pea ʼe natou kaihaʼa te fulumeto ʼae ʼi te ʼu hahaʼaga fulumeto.” 2 Koia, neʼe fehuʼi e Tavite kia Sehova:+ “ ʼE tonu koa ke au alu ʼo tauʼi te kau Filisitini ʼaia?” Neʼe ui e Sehova kia Tavite: “Alu ʼo tauʼi te kau Filisitini pea mo ke haofaki ia Keila.” 3 Kae neʼe ui age e te kau tagata ʼa Tavite ki ai: “ ʼE matou matataku ʼi tamatou nonofo ʼi heni ʼi Suta.+ Kae ʼe feafeaʼi age la mo kapau ʼe matou olo ki Keila ʼo tauʼi te kau solia Filisitini?”+ 4 Koia, neʼe toe fai ai e Tavite te fehuʼi kia Sehova.+ Pea neʼe tali age e Sehova: “Tuʼu ake pea ke alu ki Keila, he ʼe au tuku anai te kau Filisitini ki ʼou nima.”+ 5 Koia neʼe olo ai ia Tavite mo tana kau tagata ki Keila, ʼo tauʼi te kau Filisitini. Neʼe ina toʼo ʼanatou faga manu pea mo ina matehi natou ʼo lahi ai te mātea, pea neʼe haofaki ai e Tavite te hahaʼi ʼo Keila.+

6 ʼI te temi ʼae neʼe hola ai ia Apiata,+ te foha ʼo Asimeleke ʼo alu kia Tavite ʼi Keila, neʼe ina ʼave mo ia he efote. 7 Pea neʼe fakaha age kia Saulo: “Kua haʼu ia Tavite ki Keila.” Neʼe ui leva e Saulo: “Kua tuku* e te ʼAtua ia ia ki ʼoku nima,+ he ʼe kua to ia ia totonu ki he hele, ʼi tana hu ki he kolo ʼe ʼi ai ʼona matapa mo ʼona ʼakau fakamaʼu.” 8 Koia, neʼe pauʼi ai e Saulo te hahaʼi fuli ki te tau, ke natou hifo ki Keila ʼo ʼa takai ia Tavite mo tana kau tagata. 9 Neʼe iloʼi leva e Tavite te fakatuʼutuʼu ʼa Saulo ʼae ke ina tauʼi ia ia. Neʼe ina ui ai kia Apiata te pelepitelo: “ ʼAumai te efote.”+ 10 Pea neʼe ui e Tavite: “Sehova e, te ʼAtua ʼo Iselaele, kua au logo ki te fakatuʼutuʼu ʼa Saulo ʼae ke haʼu ki Keila ʼo maumauʼi te kolo ʼuhi pe ko au.+ 11 ʼE tuku anai koa au e te kau takitaki ʼo* Keila ki ʼona nima? Pea ʼe hifo mai anai koa ia Saulo, ohage ko taku kua logo ki ai? Fakalelei siʼou loto, Sehova e, te ʼAtua ʼo Iselaele, kae ke ke tali mai kia au.” Neʼe tali e Sehova: “ ʼE hifo atu anai.” 12 Pea neʼe fehuʼi age e Tavite: “ ʼE tuku anai koa ia au mo taku kau tagata e te kau takitaki ʼo Keila ki te ʼu nima ʼo Saulo?” Neʼe tali age e Sehova: “ ʼE natou tuku anai koutou kia ia.”

13 Neʼe tuʼu ake aipe ia Tavite mo tana kau tagata, ʼae neʼe natou teitei toko 600,+ pea neʼe natou mavae ʼi Keila ʼo olo ki he ʼu faʼahi neʼe feala ke natou feholaki ki ai. ʼI te fakaha age kia Saulo kua mavae ia Tavite ʼi Keila, neʼe mole hoko atu tana tuli ia ia. 14 Neʼe nofo ia Tavite ʼi te toafa ʼi te ʼu koga meʼa ʼae ʼe faigataʼa te kaku ki ai, ʼi te potu moʼugaʼia ʼo te toafa ʼo Sife.+ Neʼe kumi tuʼumaʼu pe ia ia e Saulo,+ kae neʼe mole tuku e Sehova ia ia ki ʼona nima. 15 Neʼe iloʼi e Tavite* neʼe kumi ia ia e Saulo ke ina matehi, kae neʼe nofo ia Tavite ʼi te toafa ʼo Sife, ʼi Olese.

16 Neʼe alu leva ia Sonatane, te foha ʼo Saulo kia Tavite ʼi Olese, pea neʼe tokoni kia ia ke ina fakamalohiʼi tana falala ʼae kia* Sehova.+ 17 Neʼe ina ui age ki ai: “ ʼAua naʼa ke mataku, he ʼe mole maʼu anai koe e Saulo, taku tamai. ʼE ke hau anai ki Iselaele+ pea ko au anai ʼae ka tuʼulaga lua. Pea ʼe toe iloʼi lelei pe e Saulo, taku tamai ia te faʼahi ʼaia.”+ 18 Neʼe nā fai leva he fuakava+ ia muʼa ʼo Sehova, pea neʼe nofo ia Tavite ʼi Olese, kae alu ia Sonatane ki tona ʼapi.

19 Ki muli age, neʼe olo te kau tagata ʼo Sife kia Saulo ʼi Kipease+ pea neʼe natou ui ki ai: “ ʼE mole koa la nono ovi mai ia Tavite,+ ʼi te ʼu koga meʼa ʼae ʼe faigataʼa te kaku ki ai ʼi Olese,+ ʼi te kiʼi moʼuga ʼo Hakila,+ ʼae ʼe ʼi te potu saute* ʼo Sesimone?*+ 20 Koia, siʼomatou hau, ko he temi pe ʼe fia haʼele mai ai tau ʼafio, pea ke haʼele mai. ʼE matou tuku anai ia ia ki te ʼu nima ʼo te hau.”+ 21 Pea neʼe ui e Saulo: “Ke tapuakiʼi koutou e Sehova, he neʼe kotou fakaha mai kia au tokotou manavaʼofa. 22 Fakalelei siʼokotou loto, kae kotou olo ʼo faigaʼi ke kotou iloʼi totonu pe ʼe nofo ʼifea pea ko ai ʼae neʼe sio ki ai, he neʼe ui mai ʼe ko he tahi ʼe kaka ʼaupito. 23 Kotou kumi lelei te ʼu koga meʼa fuli ʼae neʼe nono ai pea kotou toe liliu mai mo ni logo ʼe tuha mo te falala. Pea ʼe au alu anai mo koutou, pea kapau ʼe nofo ʼi te fenua, ʼe au kumi anai ia ia ʼi te lotolotoiga ʼo te toko lauʼi afe* fuli ʼo Suta.”

24 Koia, neʼe natou toe liliu ai ki Sife,+ ʼi muʼa ʼo te tau age ʼa Saulo, kae neʼe nofo ia Tavite mo tana kau tagata ʼi te toafa ʼo Maoni,+ ʼi te Alapa,+ ʼi te potu saute ʼo Sesimone. 25 Neʼe ʼomai leva ia Saulo mo tana kau tagata ʼo kumi ia ia.+ ʼI te fakaha age kia Tavite, neʼe hifo atu aipe ki te fuʼu maka+ ʼae neʼe tuʼu ʼi te toafa ʼo Maoni, ʼo nofo ai. ʼI te logo ʼa Saulo ki ai, neʼe ina tuli ia Tavite ʼi te toafa ʼo Maoni. 26 Neʼe haʼu ia Saulo ʼi te tahi faʼahi ʼo te moʼuga kae nofo ia Tavite mo tana kau tagata ʼi te tahi age faʼahi ʼo te moʼuga. Neʼe hola fakavilivili ia Tavite+ mai ia Saulo, kae neʼe fakaovi age ia Saulo mo tana kau tagata kia Tavite pea mo tana kau tagata, ke natou puke ia natou.+ 27 Kae neʼe haʼu leva he tagata ʼave logo kia Saulo, ʼo ina ui: “Haʼu fakavilivili, koteʼuhi kua ʼohofi e te kau Filisitini te fenua!” 28 Neʼe tuku ai e Saulo tana tuli ia Tavite+ kae alu ʼo tauʼi te kau Filisitini. Ko te tupuʼaga la ʼaia ʼo te fakahigoaʼi ʼo te koga meʼa ʼaia ko te Maka ʼo Te Mavete.

29 Neʼe mavae leva ia Tavite mai ai, ʼo alu ʼo nofo ʼi te ʼu koga meʼa ʼae ʼe faigataʼa te kaku ki ai, ʼi Ene-keti.+

24 ʼI te toe liliu mai pe ʼa Saulo ʼi tana ʼosi tuli te kau Filisitini, neʼe fakaha age ki ai: “Koʼeni ia Tavite ʼe ʼi te toafa ʼo Ene-keti.”+

2 Neʼe toʼo ai leva e Saulo te ʼu tagata ʼe toko 3 000 neʼe filifili ʼi Iselaele katoa, pea neʼe natou olo ʼo kumi ia Tavite mo tana kau tagata, ʼi te ʼu faʼahi makamakaʼia ʼo te ʼu moʼuga ʼae ʼe maʼuʼuli ai te ʼu tao. 3 Neʼe haʼu leva ia Saulo ki he ʼu lotoʼa maka ʼo te ʼu ovi ʼi te vaʼe ala pea neʼe ʼi ai te ʼana. Pea neʼe ulu ki loto, he neʼe fia alu ki te tuʼa meʼa* kae neʼe nonofo ia Tavite mo tana kau tagata ʼi loto atu ʼo te ʼana.+ 4 Pea neʼe ui e te ʼu tagata ʼa Tavite ki ai: “Ko te ʼaho ʼaeni ʼae ʼe ui atu e Sehova: ‘Koʼeni, ʼe au tuku atu tou fili ki ʼou nima,+ pea ke fai kia ia te meʼa ʼae ʼe ke sio ʼe lelei.’ ” Koia neʼe tuʼu ake ia Tavite ʼo ina tuʼusi mamalie ia te tapaʼi kofu tuʼa ʼo Saulo. 5 Kae hili ʼaia, neʼe vevele te loto* ʼo Tavite,+ he neʼe ina tuʼusi te tapaʼi kofu tuʼa ʼo Saulo. 6 Neʼe ina ui ki tana kau tagata: “ ʼO mulimuli pe ki te manatu ʼa Sehova, ʼe mole feala ke au fai te faʼahi ʼaia ki toku ʼaliki, te tagata fakanofo ʼa Sehova, ʼo au hiki toku nima kia ia koteʼuhi neʼe fakanofo e Sehova.”+ 7 Koia, ʼaki te ʼu palalau ʼaia ʼa Tavite, neʼe ina taʼofi* ai tana kau tagata ke mole natou ʼohofi ia Saulo. Neʼe mavae leva ia Saulo ʼi te ʼana ʼo alu.

8 Neʼe tuʼu ake leva ia Tavite ʼo hu ki tuʼa mai te ʼana, pea neʼe ina pauʼi ia Saulo: “Siʼoku ʼaliki te hau!”+ ʼI te maliu mai ʼa Saulo ʼo sio ki muli, neʼe punou ia Tavite mo tulolo ki te kele. 9 Pea neʼe ui e Tavite kia Saulo: “He koʼe ʼe ke fakalogo ki te ʼu palalau ʼaeni ʼe fai e te kau tagata: ‘Koʼeni ʼe kumi e Tavite ke ina fai he meʼa ʼe kovi kia koe’?+ 10 ʼI te ʼaho ʼaeni, kua ke sio ia koe totonu neʼe tuku mai e Sehova ia koe ki ʼoku nima ʼi tau nofo ʼi te ʼana. Neʼe ui mai e he tahi ke au matehi koe,+ kae neʼe au lotomanavaʼofa kia koe pea neʼe au ui: ‘ ʼE mole au hiki anai toku nima ki toku ʼaliki, koteʼuhi neʼe fakanofo ia ia e Sehova.’+ 11 Siʼaku tamai, sio ki tou tapaʼi kofu tuʼa ʼae ʼi toku nima. Koteʼuhi ʼi taku tuʼusi tou tapaʼi kofu tuʼa, neʼe mole au matehi koe. ʼE feala leva ke ke sio mo mahino ʼe mole au loto ke au fai he meʼa ʼe kovi kia koe peʼe ke au agatuʼu. Neʼe mole au agahala kia koe,+ logo la ʼe ke tuli au ke ke matehi.+ 12 Ke fakamauʼi e Sehova ia koe pea mo au,+ pea ke lagavaka ia Sehova maʼaku ʼo ʼuhiga mo koe,+ kae ʼe mole fāfā anai toku nima kia koe.+ 13 Ohage ko tona ui ʼi te taʼaga lea ʼafeā: ‘ ʼE haʼu te agakovi mai te hahaʼi agakovi,’ kae ʼe mole fāfā anai toku nima kia koe. 14 Ko ai koa ʼae neʼe alu te hau ʼo Iselaele ʼo kumi? Ko ai koa ʼae ʼe ke tuli? Ko he kuli mate? Peʼe ko he foʼi kutu?+ 15 Ke liliu ia Sehova ko te tuʼi fakamau, ʼei, ke ina fakamauʼi koe pea mo au. ʼE ina vakavakaʼi anai te aluʼaga mo fakalakatonuʼi au,+ pea ʼe ina fakamauʼi anai mo haofaki au mai ʼou nima.”

16 ʼI te ʼosi palalau ʼaia ʼa Tavite, neʼe ui e Saulo: “ ʼE ko tou leʼo koa, siʼoku foha ko Tavite?”+ Pea neʼe kamata tagi leʼo lahi ia Saulo. 17 Neʼe ina ui kia Tavite: “ ʼE ke faitotonu age koe ia au, koteʼuhi neʼe ke agalelei kia au kae neʼe au agakovi au kia koe.+ 18 ʼEi, neʼe ke fakaha mai ʼi te ʼaho nei tau agalelei ʼi tau mole matehi au, ʼi te temi ʼae neʼe tuku atu au e Sehova ki ʼou nima.+ 19 Koteʼuhi, ko ai te tagata ʼae, ʼi tana maʼu tona fili, ʼe mole ina fai age anai he meʼa ʼe kovi kae ina tuku ke alu? ʼE fakapale anai koe e Sehova ʼaki he meʼa ʼe lelei+ ʼuhi ko te meʼa ʼae neʼe ke fai kia au ʼi te ʼaho nei. 20 Pea ʼe au iloʼi ʼe ke liliu moʼoni anai ko he hau,+ pea ʼe nofo anai te puleʼaga ʼo Iselaele ʼi ʼou nima. 21 Koia, ke ke fakapapau mai kia au ʼi te huafa ʼo Sehova,+ ʼe mole ke pulihi anai toku hakoga moka au mate, pea ʼe mole ke pulihi anai toku higoa ʼi te famili ʼo taku tamai.”+ 22 Neʼe fai ai e Tavite he fakapapau kia Saulo, pea hili ʼaia, neʼe toe liliu leva ia Saulo ki tona ʼapi.+ Kae neʼe alu ia Tavite mo tana kau tagata ki tonatou nonoʼaga ʼi te moʼuga.+

25 Ki muli age, neʼe mate leva ia Samuele.+ Neʼe maʼopoʼopo ia Iselaele katoa ʼo natou faifetagihi pea mo ʼavaifo ia ia ʼo ovi ki tona ʼapi ʼi Lama.+ Pea neʼe alu leva ia Tavite ki te toafa ʼo Palani.

2 Neʼe ʼi ai he tagata ʼi Maoni+ pea neʼe ʼi ai tana faga manu ʼi Kalemelo.*+ Neʼe koloaʼia ʼaupito te tagata. Neʼe ko ʼana ovi ʼe 3 000 pea mo ʼana tao ʼe 1 000, pea ʼi te temi ʼaia neʼe ina tele tana faga ovi ʼi Kalemelo. 3 Neʼe higoa te tagata ko Napale+ pea neʼe higoa tona ʼohoana ko Apikaile.+ Neʼe poto mo finemui ia te fafine, kae neʼe agafefeka mo agakovi tona ʼohoana.+ Neʼe ko te tagata neʼe hifo mai ia Kalepo.+ 4 Pea neʼe logo ia Tavite ʼi te toafa neʼe lolotoga tele e Napale tana faga ovi. 5 Koia neʼe fekauʼi ai e Tavite tana kau tagata tupulaga ʼe toko hogofulu, pea neʼe ina ui age kia natou: “Kotou olo ki Kalemelo pea ka kotou felaveʼi mo Napale, kotou ui age ki ai ʼe au fia iloʼi pe ʼe feafeaʼi. 6 Pea kotou ui: ‘Ke ke maʼuli fualoa pea ke to lelei ia meʼa fuli kia koe* mo tou famili. Pea ke fua lelei ia meʼa fuli ʼae ʼe ke maʼu. 7 ʼE au logo ʼe ke lolotoga tele tau faga ovi. ʼI te temi ʼae neʼe fakatahi ai ʼau tagata tauhi ovi mo matou, neʼe mole matou fai he meʼa ʼe kovi kia natou,+ pea neʼe mole puli hanatou meʼa ʼi te temi katoa ʼae neʼe natou nonofo ai ʼi Kalemelo. 8 Fehuʼi age ki ʼau tagata tupulaga pea ʼe natou fakaha atu anai. Koia, ke ke ʼofa ki ʼaku tagata tupulaga, koteʼuhi ʼe matou olo atu ʼi he temi fakafiafia.* Fakalelei siʼou loto, kae ke ke foaki he meʼa pe ʼe ke maʼu ki ʼau tagata faifekau pea mo au, ia tou foha ko Tavite.’ ”+

9 Neʼe olo ai te kau tagata tupulaga ʼa Tavite, ʼo fakaha te ʼu meʼa fuli ʼaia kia Napale, ʼi te higoa ʼo Tavite. ʼI tanatou ʼosi palalau, 10 neʼe tali age e Napale ki te ʼu tagata faifekau ʼa Tavite: “Ko ai koa ia Tavite, pea ko ai koa te foha ʼo Sese? ʼE kaugamalie ia ʼaho nei te hahaʼi faifekau ʼae ʼe feholaki mai ʼonatou pule.+ 11 ʼE tonu koa ke au toʼo taku moʼi pane, mo taku moʼi vai pea mo te kanoʼi manu ʼae neʼe au taʼataʼaga maʼa ʼaku tagata ʼae ʼe natou tele te faga ovi, ʼo foaki ki he ʼu tagata ʼe mole au iloʼi pe la pe ʼe ʼomai maifea?”

12 Neʼe toe liliu ai te kau tagata tupulaga ʼa Tavite ʼo fakamatala age kia ia te ʼu palalau fuli ʼaia. 13 Neʼe ui atu aipe e Tavite ki tana kau tagata: “Kotou toʼo fuli ʼakotou heleta!”+ Neʼe natou haʼi fuli ai ʼanatou heleta ʼi ʼonatou koga loto, pea neʼe toe haʼi e Tavite tana heleta ʼi tona koga loto. Neʼe ko tagata ʼe teitei toko 400 neʼe olo mo Tavite kae nonofo te toko 200 ʼo leʼo ʼanatou meʼa.

14 Lolotoga te temi ʼaia, neʼe alu he tahi ʼi te hahaʼi faifekau ʼa Napale, ʼo fakamatala kia Apikaile, te ʼohoana ʼo Napale: “Neʼe fekauʼi e Tavite he kau tagata ʼave logo mai te toafa ke natou ʼomai ʼo fakafelaveʼi ki tomatou pule, kae neʼe ina leakoviʼi leʼo lahi natou.+ 15 Neʼe agalelei ʼosi te ʼu tagata ʼaia mo matou. Neʼe mole he temi neʼe natou gaohi koviʼi ai matou, pea neʼe mole puli hamatou meʼa lolotoga te temi katoa ʼae neʼe matou fakatahi ai mo natou.+ 16 Neʼe natou ʼa takai matou mo puipui matou ohage ko he kaupa, ʼi te ʼaho mo te po, ʼi te temi katoa ʼae neʼe matou nonofo ai mo natou ʼo taupau te faga manu. 17 ʼI te lakaga leva ʼaeni, ke ke fai he tonu ʼo ʼuhiga mo te meʼa ʼae ka ke fai, he ʼe hoko moʼoni anai he malaʼia ki tomatou pule mo tona loto fale katoa,+ pea ʼe mole feala ke palalau age he tahi ki ai koteʼuhi ʼe ko he tagata ʼe mole hona ʼuhiga.”+

18 Neʼe toʼo fakavilivili ai e Apikaile+ te ʼu foʼi pane ʼe 200, mo te ʼu ʼaiʼaga vino lalahi ʼe lua, mo te ʼu ovi ʼe nima neʼe teuteuʼi ke fakamoho, mo te ʼu fua sea* fulumeto* ʼe nima neʼe taʼo, mo te ʼu foʼi keke vite ʼe 100 pea mo te ʼu foʼi keke fiku ʼe 200. Neʼe ina hili leva te ʼu meʼa fuli ʼaia ki te ʼu asino.+ 19 Neʼe ina ui ki tana hahaʼi faifekau: “Kotou muʼamuʼa, hoki au muli atu anai.” Kae neʼe mole ina fakaha age he meʼa kia Napale tona ʼohoana.

20 Neʼe heka leva ki tana asino. Pea ʼi tana hifo ʼaia, neʼe mole iloʼi mai ia ia e Tavite mo tana kau tagata, ʼae neʼe ʼomai kia ia he neʼe ʼū ʼi te moʼuga. Pea neʼe natou felaveʼi ai. 21 Neʼe kua ʼosi ui e Tavite: “Neʼe mole pe la he ʼaoga ʼo taku leʼo te ʼu meʼa ʼa te tagata ʼaia ʼi te toafa. Neʼe mole puli hana meʼa,+ kae ʼe ina tauʼi te lelei ʼaki te kovi.+ 22 Ke tauteaʼi lahi e te ʼAtua te ʼu fili ʼo Tavite* mo kapau ʼe au tuku ke maʼuli hana tagata ʼe tahi* ʼo kaku ki te uhu.”

23 ʼI te temi ʼae neʼe sio ai ia Apikaile kia Tavite, neʼe foimo hifo fakavilivili ʼi tana asino ʼo punou mo tulolo ki te kele ia muʼa ʼo Tavite. 24 Pea neʼe tuʼutuli ifo leva ki ʼona vaʼe, ʼo ina ui: “Siʼoku ʼaliki, ko taku hala. Fakagafua mai ke au palalau atu, ia au ʼaeni ko tau fafine faifekau, pea ke fagono ki ʼaku palalau. 25 Siʼoku ʼaliki, fakalelei siʼou loto, kae ʼaua naʼa ke tokagaʼi ia Napale, te tagata ʼae ʼe mole hona ʼuhiga,+ koteʼuhi ʼe tuha pe mo tona higoa. Ko tona higoa ko Napale,* ʼe ko he tagata vale ia. Kae neʼe mole au sio, ia au ʼaeni ko tau fafine faifekau ki te kau tagata tupulaga ʼae neʼe ke fekauʼi mai. 26 Koia siʼoku ʼaliki, ʼe au tala moʼoni atu kia koe pea ia muʼa ʼo Sehova: ʼE ko Sehova ʼae neʼe ina taʼofi koe+ ke ʼaua naʼa ke fai he ligi toto+ pea ke fai e koe totonu he lagavaka. Ke liliu ʼou fili ohage ko Napale, ʼo feia mo natou ʼae ʼe natou fia fai he meʼa ʼe kovi kia koe. 27 ʼI te temi leva ʼaeni, siʼoku ʼaliki, ke foaki ki te kau tagata tupulaga ʼae ʼe natou muliʼi koe+ te meʼa ʼofa* ʼaeni+ neʼe au ʼaumai maʼa koe. 28 Fakalelei siʼou loto, siʼoku ʼaliki, kae ke ke fakamolemole taku hala, he ʼe mahino papau ia ʼe tokaga anai ia Sehova ke pule fualoa tou hologa.+ Koteʼuhi ʼe ke fakahoko te ʼu tau ʼa Sehova+ pea neʼe mole maʼu he meʼa ʼe kovi ia koe ʼi tou maʼuli katoa.+ 29 Ka tuʼu ake he tahi ʼo tuli koe pea mo ina fia matehi koe,* ʼe puipui anai tou maʼuli* e Sehova tou ʼAtua ohage ko te puipui ʼo he ʼu meʼa maʼuhiga ʼi he kato. Kae ʼe ina li mamaʼo anai te maʼuli* ʼo ʼou fili, ohage ko te li ʼo he ʼu foʼi maka ʼaki he makamaka. 30 Pea ʼi te temi ʼae ka fakahoko anai e Sehova te ʼu meʼa lelei fuli ʼae neʼe ina fakapapau atu pea mo ina fakanofo koe ko te tagata takitaki ʼo Iselaele,+ 31 ʼe mole ke tukugakoviʼi anai ia koe totonu peʼe ke fakahemala anai ʼo ʼuhiga mo hau fai he ligi toto kae neʼe mole hona tupuʼaga, pea mo hau fai e koe totonu he lagavaka.+ Pea ka tapuakiʼi anai koe e Sehova, ke ke manatuʼi ia au ʼaeni ko tau fafine faifekau.”

32 Pea neʼe ui age leva e Tavite kia Apikaile: “Ke vikiʼi ia Sehova te ʼAtua ʼo Iselaele, ʼae neʼe ina fekauʼi mai koe ke ke haʼu kia au ʼi te ʼaho nei! 33 Ke tapuakiʼi tau fakapotopoto! Ke tapuakiʼi koe ʼi te ʼaho nei he neʼe ke taʼofi au ke ʼaua naʼa au fai he ligi toto+ pea mo au fai e au totonu he lagavaka. 34 ʼE au tala moʼoni atu ia muʼa ʼo Sehova, te ʼAtua maʼuli ʼo Iselaele ʼae neʼe ina taʼofi au ke ʼaua naʼa au fai he meʼa ʼe kovi kia koe,+ ka na pau la neʼe mole ke haʼu fakavilivili kia au,+ ʼe mole toe maʼuli anai he tagata ʼa Napale* apogipogi uhu.”+ 35 Pea neʼe tali leva e Tavite te ʼu meʼa ʼae neʼe ina ʼaumai maʼa ia pea neʼe ina ui age ki ai: “Alu ʼi te fimalie ki tou ʼapi. Koʼeni, neʼe au fakalogo kia koe, pea ʼe au tali anai tau kole.”

36 Ki muli age, neʼe toe liliu ia Apikaile kia Napale, ʼae neʼe ina fai he kaitahi ohage ko he hau ʼi tona ʼapi. Neʼe fiafia ia Napale* pea neʼe kua konahia ʼosi. Neʼe mole fakaha age e Apikaile he meʼa ʼo kaku ki te ʼala uhu ake. 37 ʼI te ʼaho ake, ʼi te mole kei konahia ʼa Napale, neʼe fakaha age e tona ʼohoana te ʼu meʼa ʼaia. Neʼe meihiʼi pe ke tuʼu tona mafu, pea neʼe tagutu leva ohage ko he fuʼu maka. 38 Hili ki ai teitei ʼaho ʼe hogofulu, neʼe matehi e Sehova ia Napale.

39 ʼI te logo ʼa Tavite kua mate ia Napale, neʼe ina ui: “Ke vikiʼi ia Sehova ʼae neʼe ina haofaki au+ mai toku tukugakoviʼi e Napale+ pea neʼe ina taʼofi au ke ʼaua naʼa au fai he meʼa ʼe kovi.+ Neʼe tauteaʼi e Sehova ia Napale, ʼo ina kai pe tana agakovi!” Pea neʼe fekauʼi leva e Tavite he ʼu tagata faifekau ke olo ʼo kole kia Apikaile ke liliu ko hona ʼohoana. 40 Koia, neʼe ʼomai ai te ʼu tagata faifekau ʼa Tavite kia Apikaile ʼi Kalemelo pea neʼe natou ui ki ai: “Neʼe fekauʼi mai matou e Tavite koteʼuhi ʼe ina loto ke ke liliu ko hona ʼohoana.” 41 Neʼe tuʼu ake aipe ʼo tulolo ki te kele, pea mo ui: “ ʼE au lotolelei ke au liliu ko he fafine kaugana ʼe ina fufulu te ʼu vaʼe+ ʼo te hahaʼi faifekau ʼo toku ʼaliki.” 42 Neʼe tuʼu fakavilivili ake leva ia Apikaile+ ʼo heka ki tana asino pea neʼe muliʼi ia ia e ʼana fafine faifekau ʼe toko nima. Neʼe alu mo te kau tagata ʼave logo ʼa Tavite pea neʼe liliu leva ko tona ʼohoana.

43 Neʼe kua ʼosi ʼohoana foki ia Tavite mo Asinoame,+ mai Siseleele.+ Neʼe liliu te ʼu fafine ʼaia ʼe lua ko ʼona ʼohoana.+

44 Kae neʼe foaki e Saulo tona ʼofafine ko Mikale,+ te ʼohoana ʼo Tavite, kia Paleti,+ te foha ʼo Laisi mai Kalimi.

26 Neʼe ʼomai leva te ʼu tagata ʼo Sife+ kia Saulo ʼi Kipease,+ ʼo natou ui: “ ʼE mole nono koa la ia Tavite ʼi te kiʼi moʼuga ʼo Hakila, ʼae ʼe haga ki Sesimone?”*+ 2 Neʼe tuʼu ake ai ia Saulo ʼo hifo ki te toafa ʼo Sife mo te toko 3 000 tagata neʼe filifili mai Iselaele, ʼo kumi ia Tavite ʼi te toafa ʼo Sife.+ 3 Neʼe fakatuʼu e Saulo tona nofoʼaga ʼi te kiʼi moʼuga ʼo Hakila, ʼae ʼe haga ki Sesimone, ʼo ovi ki te ala. Kae neʼe nofo ia Tavite ʼi te toafa, pea neʼe fakaha age neʼe haʼu ia Saulo ki te toafa ʼo kumi ia ia. 4 Koia neʼe fekauʼi ai e Tavite he kau tagata ke natou olo fakafufu ʼo vakaʼi pe neʼe haʼu moʼoni ia Saulo. 5 Ki muli age, neʼe alu ia Tavite ki te koga meʼa ʼae neʼe fakatuʼu ai e Saulo tona nofoʼaga, pea neʼe sio ki te faʼahi ʼae neʼe momoe ai ia Saulo pea mo Apenele,+ te foha ʼo Nele, te pule ʼo tana kautau. Neʼe moe ia Saulo ʼi te nofoʼaga pea neʼe ʼa takai ia ia e te kau solia. 6 Neʼe ui leva e Tavite kia Asimeleke, te tagata Heti+ pea mo Apisai,+ te tama ʼa Teselusa+ mo te tehina ʼo Soape: “Ko ai ʼae ka hifo mo au ki te nofoʼaga ʼo Saulo?” Neʼe ui e Apisai: “ ʼE au alu anai mo koe.” 7 Neʼe olo ai ia Tavite mo Apisai ʼi te poʼuli ʼo kaku ki te nofoʼaga solia. Neʼe nā maʼu atu ia Saulo neʼe lolotoga moe ʼi te nofoʼaga, pea neʼe hunuki tana tao ki te kele ʼo ovi ki tona ʼulu. Neʼe takokoto ia Apenele mo te kau solia ʼo ʼa takai ia ia.

8 Neʼe ui leva e Apisai kia Tavite: “ ʼI te ʼaho nei, kua tuku atu e te ʼAtua tou fili ki ʼou nima.+ Koia, fakalelei siʼou loto, fakagafua mai ke au hokaʼi ia ia ki te kele ʼaki te tao, ʼi he foʼi hoka pe ʼe tahi, pea ʼe mole tuʼa lua anai ia.” 9 Kae neʼe ui e Tavite kia Apisai: “ ʼAua naʼa ke fai he meʼa ʼe kovi kia ia. ʼE mole lakahala anai koa+ la ia ia ʼae ʼe ina hiki tona nima ki te tagata fakanofo ʼa Sehova?”+ 10 Neʼe hoko atu e Tavite: “ ʼE au tala moʼoni atu ia muʼa ʼo Sehova, te ʼAtua maʼuli, ʼe tauteaʼi anai ia ia e Sehova totonu,+ peʼe mate anai moka hoko mai tona ʼaho,+ peʼe matehi anai ia ia moka hifo ki te tau.+ 11 Kae ʼe mole feala ke au hiki toku nima ki te tagata fakanofo ʼa Sehova ʼo mulimuli pe ki te manatu ʼa Sehova!+ Koia, fakalelei siʼou loto, toʼo pe te tao ʼae ʼe tuku ovi ʼi tona ʼulu, mo te ʼaiʼaga vai kae ta olo.” 12 Neʼe toʼo ai e Tavite te tao mo te ʼaiʼaga vai ʼae neʼe tuku ovi ʼi te ʼulu ʼo Saulo pea neʼe nā olo ai leva. Neʼe mole he tahi neʼe sio+ peʼe ina tokagaʼi naua, pe neʼe ʼala ake, he neʼe natou mate momoe fuli. Neʼe natou mate momoe koteʼuhi neʼe ko Sehova ʼae neʼe ina fakatupu te faʼahi ʼaia. 13 Neʼe fakalaka ia Tavite ki te tahi faʼahi pea neʼe tuʼu ʼi te tumutumu ʼo te moʼuga, ʼo mamaʼo mai te faʼahi ʼae neʼe nofo ai ia Saulo.

14 Neʼe kalaga leva ia Tavite ki te kau solia pea mo Apenele,+ te foha ʼo Nele, ʼo ina ui: “Apenele, ʼe mole ke tali mai anai koa?” Neʼe tali e Apenele: “Ko ai ia koe, ke ke kalaga feia mai ki te hau?” 15 Neʼe ui e Tavite kia Apenele: “ ʼE mole ko koe koa la ko he tagata toʼa? Pea ko ai ʼae ʼe tatau mo koe ʼi Iselaele? Kae he koʼe neʼe mole ke nofo ʼalaʼala ʼo leʼo tou ʼaliki te hau? Koteʼuhi neʼe alu atu he tagata solia ke ina matehi tou ʼaliki te hau.+ 16 ʼE mole lelei te meʼa ʼae neʼe ke fai. ʼE au tala moʼoni atu ia muʼa ʼo Sehova: ʼE tonu ke matehi koutou koteʼuhi neʼe mole kotou nonofo ʼalaʼala ʼo leʼo tokotou ʼaliki, te tagata fakanofo ʼa Sehova.+ Sio ki ʼou tafaʼaki! ʼE ʼifea te tao ʼa te hau pea mo te ʼaiʼaga vai+ ʼae neʼe tuku ovi ʼi tona ʼulu?”

17 Pea neʼe iloʼi leva e Saulo ia te leʼo ʼo Tavite, ʼo ina ui: “ ʼE ko tou leʼo koa, siʼoku foha ko Tavite?”+ Neʼe tali e Tavite: “ ʼEi, ʼe ko toku leʼo, siʼoku ʼaliki te hau.” 18 Pea neʼe ina hoko atu: “Siʼoku ʼaliki, he koʼe koa ʼe ke tuli au?+ Kotea koa ʼae neʼe au fai? Kotea koa taku hala?+ 19 Fakalelei siʼou loto, siʼoku ʼaliki te hau, fagono mai ki ʼaku palalau: Kapau ʼe ko Sehova ʼae neʼe ina uga koe ke ke tuli au, ke ina tali* taku molaga meʼa kai. Kae kapau neʼe uga koe e he ʼu tagata,+ ke natou malaʼia ia muʼa ʼo Sehova, he neʼe natou fakamamaʼo au ʼi te ʼaho nei ke ʼaua naʼa au fakatahi mo te hahaʼi ʼa* Sehova,+ ʼi tanatou ui mai: ‘Alu ʼo tauhi he tahi age ʼu ʼatua!’ 20 Ke ʼaua naʼa liligi toku toto ki te kele ʼo mamaʼo mai te ʼu mata ʼo Sehova. ʼE ko he foʼi kutu ʼae neʼe alu te hau ʼo Iselaele ʼo tuli,+ ohage pe ko hana kapu he manulele ʼi te ʼu moʼuga.”

21 Pea neʼe tali leva e Saulo: “Neʼe au agahala.+ Siʼoku foha ko Tavite, toe liliu mai, he ʼe mole au toe fai anai he meʼa ʼe kovi kia koe, koteʼuhi ʼi te ʼaho nei, neʼe maʼuhiga ki ʼou mata toku maʼuli.*+ ʼEi, neʼe ko he agavale ʼae neʼe au fai pea neʼe au faihala ʼosi.” 22 Neʼe tali e Tavite: “Koʼeni te tao ʼa te hau. Ke haʼu he tahi ʼi tau kau tagata tupulaga ʼo ʼavatu. 23 ʼE liufaki anai e Sehova ʼo mulimuli ki te faitotonu+ mo te agatonu ʼa te hahaʼi takitokotahi, koteʼuhi ʼi te ʼaho nei, neʼe tuku koe e Sehova ki ʼoku nima, kae neʼe mole au fia hiki toku nima ki te tagata fakanofo ʼa Sehova.+ 24 Koia, ohage pe ko te maʼuhiga ʼo tou maʼuli* ki ʼoku mata ʼi te ʼaho nei, ke toe maʼuhiga feia foki toku maʼuli* kia mata ʼo Sehova, pea ke ina haofaki au mai te ʼu mamahi fuli.”+ 25 Neʼe tali leva e Saulo kia Tavite: “Ke tapuakiʼi koe, siʼoku foha ko Tavite. ʼE mahino ia ʼe ke fai anai he ʼu toe gaue lalahi, pea ʼe fua lelei anai te ʼu meʼa ʼae ka ke fai.”+ Neʼe hoko atu leva e Tavite tona fagona, kae toe liliu ia Saulo ki tona ʼapi.+

27 Kae neʼe ui e Tavite ʼi tona loto: “ ʼE ʼi ai pe anai he ʼaho ʼe matehi moʼoni ai au e Saulo. Koia, ʼe lelei age ke au hola+ ki te fenua ʼo te kau Filisitini. ʼE tuku anai leva e Saulo tana tuli au ʼi te fenua katoa ʼo Iselaele+ pea ʼe au hao anai mai ʼona nima.” 2 Neʼe tuʼu ake ai leva ia Tavite mo te ʼu tagata ʼe toko 600+ ʼae neʼe fakatahi mo ia, ʼo natou olo kia Akise,+ te foha ʼo Maoke, te hau ʼo Kiete. 3 Pea neʼe nofo ia Tavite mo Akise ʼi Kiete, ia ia mo tana kau tagata, mo ʼonatou loto fale takitahi. Neʼe nofo ia Tavite mo ʼona ʼohoana ʼe lua, ia Asinoame+ mai Siseleele, pea mo Apikaile,+ te fafine mai Kalemelo ʼae neʼe ʼohoana ʼi muʼa atu mo Napale. 4 ʼI te temi ʼae neʼe fakaha age kia Saulo kua hola ia Tavite ki Kiete, neʼe tuku ai leva tana kumi ia ia.+

5 Neʼe ui leva e Tavite kia Akise: “Kapau ʼe ke ʼofa ia au, foaki mai he koga meʼa ʼi te ʼu kolo liliki, ke au maʼuli ai. He koʼe ʼe maʼuli anai tau tagata faifekau ʼi te kolo hau?” 6 Koia, ʼi te ʼaho ʼaia, neʼe foaki age ai e Akise kia ia te kolo ko Tesikelake.+ Ko te tupuʼaga la ʼaia ʼo te maʼu e te ʼu hau ʼo Suta te kolo ko Tesikelake ʼo kaku mai ki te ʼaho nei.

7 Neʼe maʼuli ia Tavite ʼi te fenua ʼo te kau Filisitini lolotoga te taʼu katoa mo mahina ʼe fa.+ 8 Neʼe tau alu ia Tavite mo tana kau tagata ʼo ʼohofi te kau Kesuli,+ mo te kau Kisili pea mo te kau Amaleke,+ he neʼe natou nonofo ʼi te fenua mai Telame ʼo kaku ki Sule+ pea mo te fenua ʼo Esipito. 9 ʼI te temi fuli pe ʼae neʼe ʼohofi ai e Tavite te fenua, neʼe mole ina tuku ke maʼuli he tagata peʼe ko he fafine,+ kae neʼe ina toʼo te faga ovi, mo te faga pipi, mo te ʼu asino, mo te ʼu kamelo, mo te ʼu mutuʼi meʼa, pea hili ʼaia neʼe toe liliu kia Akise. 10 Pea moka fehuʼi age e Akise: “Ko te potu fea ʼae neʼe kotou olo ʼo ʼohofi ʼi te ʼaho nei?” neʼe tali age e Tavite: “Ko te potu saute* ʼo Suta”+ peʼe “Ko te potu saute ʼo te kau Selasemeele,”+ peʼe “Ko te potu saute ʼo te kau Kenite.”+ 11 Neʼe mole tuku e Tavite ke maʼuli he tagata peʼe ko he fafine ke ʼaumai ki Kiete, he neʼe ina ui: “Ke ʼaua naʼa natou fakamatala he meʼa ʼo ʼuhiga mo matou pea mo natou ui: ‘Ko te meʼa ʼaeni neʼe fai e Tavite.’ ” (Neʼe ko tana faʼahiga fai ʼaia ʼi te temi katoa ʼae neʼe maʼuli ai ʼi te fenua ʼo te kau Filisitini.) 12 Neʼe tui ia Akise kia Tavite, pea neʼe manatu: ‘ ʼE mahino ia kua fehiʼaʼinaʼi ʼosi ia ia e Iselaele, tana hahaʼi. Koia ʼe gaue tuʼumaʼu pe anai maʼaku.’

28 ʼI te temi ʼaia, neʼe fakatahiʼi e te kau Filisitini ʼanatou kautau ke natou tauʼi ia Iselaele.+ Neʼe ui e Akise kia Tavite: “ ʼE mahino ia, ʼe ke iloʼi ʼe kotou ʼomai anai mo au, ia koe mo ʼau tagata ki te tau.”+ 2 Neʼe ui e Tavite kia Akise: “Ko au tau tagata faifekau. ʼE ke iloʼi lelei pe te meʼa ʼae ka au fai.” Neʼe ui e Akise kia Tavite: “Ko te tupuʼaga la ʼaia ʼo taku fakanofo anai koe ko taku tagata leʼo ʼi te temi fuli pe.”*+

3 Neʼe kua mate ia Samuele pea neʼe faifetagihi ia Iselaele katoa pea mo ʼavaifo ia ia ʼi Lama, tona kolo.+ Pea neʼe pulihi e Saulo ʼi te fenua te hahaʼi ʼae ʼe ko tanatou gaue ko te felogoi mo te kau mate pea mo te hahaʼi faifakakikite fakatemonio.+

4 Neʼe fakatahitahi te kau Filisitini pea neʼe natou olo ʼo fakatuʼu tonatou nofoʼaga ʼi Sunemi.+ Pea neʼe fakatahitahiʼi e Saulo ia Iselaele katoa, ʼo natou fakatuʼu tonatou nofoʼaga ʼi Kilipoa.+ 5 ʼI te sio ʼa Saulo ki te nofoʼaga ʼo te kau Filisitini, neʼe mataku ʼo ta vave ai tona mafu.+ 6 Neʼe fakafehuʼi e Saulo ia Sehova,+ kae neʼe mole tali age e Sehova ʼi he temi, ʼaki he ʼu moemisi, peʼe ʼaki te Ulime+ peʼe ʼaki te kau polofeta. 7 Neʼe ui leva e Saulo ki ʼana tagata faifekau: “Kotou kumi he fafine ʼe felogoi mo te kau mate,+ ke au alu ki ai.” Neʼe tali age e ʼana tagata faifekau: “Koʼeni ʼe ʼi ai te fafine ʼe felogoi mo te kau mate ʼi Ene-toli.”+

8 Koia, neʼe tui ai e Saulo he tahi age ʼu teu ke mole iloʼi ia ia pea neʼe alu ʼi te poʼuli mo ʼana tagata ʼe toko lua ki te fafine ʼaia. Neʼe ina ui age: “Fakalelei siʼou loto, fakaʼaogaʼi ʼou fealagia ʼae ke ke felogoi mo te kau mate moʼo fakaha mai ia te ka haʼu,+ pea ke pauʼi mai ia ia ʼae ka au ui atu.” 9 Kae neʼe tali age e te fafine ki ai: “ ʼE ke iloʼi lelei pe te meʼa ʼae neʼe fai e Saulo, tana pulihi ʼi te fenua te hahaʼi ʼae ʼe ko tanatou gaue ko te felogoi mo te kau mate pea mo te hahaʼi faifakakikite fakatemonio.+ Koia, he koʼe ʼe ke faiga ke au* to ki te hele ʼaia, ke matehi ai au?”+ 10 Neʼe fakapapau leva e Saulo kia ia ʼi te huafa ʼo Sehova: “ ʼE au fakapapau atu ia muʼa ʼo Sehova, te ʼAtua maʼuli, ʼe mole tukugakoviʼi anai koe ʼo ʼuhiga mo te faʼahi ʼaeni!” 11 Pea neʼe ui e te fafine: “Ko ai ʼae ʼe ke loto ke au pauʼi?” Neʼe ina tali age: “Pauʼi mai ia Samuele.” 12 ʼI te temi ʼae neʼe sio ai te fafine kia “Samuele,”*+ neʼe kalaga leʼo lahi ʼosi, ʼo ina ui kia Saulo: “He koʼe neʼe ke kakaʼi au? ʼE ko koe ko Saulo!” 13 Neʼe ui e te hau ki ai: “ ʼAua naʼa ke mataku. Kotea la ʼae ʼe ke sio ki ai?” Neʼe tali e te fafine kia Saulo: “ ʼE au sio ki he tahi ʼe hage ko he ʼatua ʼe hake ake mai te kele.” 14 ʼI te moʼi temi pe ʼaia, neʼe ina fehuʼi ki te fafine: “ ʼE feafeaʼi ia ia?” Pea neʼe ina tali age: “Ko te tagata ʼae ʼe hake mai kua matuʼa, pea ʼe ina tui hona kofu tuʼa.”+ Neʼe mahino ai leva ia Saulo neʼe ko “Samuele” pea neʼe punou mo tulolo ki te kele.

15 Pea neʼe ui leva e “Samuele” kia Saulo: “He koʼe neʼe ke fakaleluʼi au, ʼo ke pauʼi au?” Neʼe ui e Saulo: “ ʼE au tau nei mo he aluʼaga faigataʼa. ʼE tauʼi au e te kau Filisitini, pea kua mavae te ʼAtua ia au. ʼE mole kei palalau mai kia au ʼaki te kau polofeta peʼe ʼaki he ʼu moemisi.+ Ko te tupuʼaga la ʼaia ʼo taku pauʼi koe ke ke fakaha mai te meʼa ʼae ʼe tonu ke au fai.”+

16 Pea neʼe ui e “Samuele”: “He koʼe ʼe ke fakafehuʼi au kae kua mavae ia Sehova ia koe+ pea kua liliu ko tou fili? 17 ʼE fai anai e Sehova te meʼa ʼaeni neʼe ina tala atu ʼaki ia au: ʼE toʼo anai e Sehova te puleʼaga mai ʼou nima pea ʼe ina foaki anai ki he tahi age tagata, kia Tavite.+ 18 Neʼe mole ke fakalogo ki te leʼo ʼo Sehova pea neʼe mole ke pulihi te kau Amaleke ʼae neʼe natou fakatupu tona hauhau.+ Koia ʼae ʼe fai ai e Sehova te faʼahi ʼaia kia koe ʼi te ʼaho nei. 19 Pea ʼe toe tuku anai e Sehova ia Iselaele mo koe ki te ʼu nima ʼo te kau Filisitini,+ pea apogipogi ko koe+ mo ʼou foha+ ʼe kotou fakatahi anai mo au. ʼE toe tuku foki e Sehova te kautau ʼo Iselaele ki te ʼu nima ʼo te kau Filisitini.”+

20 ʼI te temi pe ʼaia, neʼe to ifo ia Saulo ki te kele pea neʼe mataku ʼaupito ʼuhi ko te ʼu palalau ʼae neʼe fai e “Samuele.” Pea neʼe mole kei ʼi ai hona malohi, he neʼe mole kai ʼi te ʼaho katoa mo te po katoa. 21 ʼI te haʼu ʼa te fafine kia Saulo pea mo sio ki te lahi ʼo tona hoha, neʼe ina ui age ki ai: “Neʼe au fakalogo ki te meʼa ʼae neʼe ke ui mai, pea neʼe feala pe ke au mate+ ʼi taku fai te meʼa ʼae neʼe ke kole mai. 22 Koia, fakalelei siʼou loto, fakalogo ki te meʼa ʼae ʼe au ui atu. Ke au tuku ʼi ʼou muʼa he moʼi pane ke ke kai, ke maʼu ai hou malohi pea hoki ke alu leva.” 23 Kae neʼe fakafisi ia ʼo ina ui: “ ʼE mole au kai anai.” Kae neʼe fakakinauʼi e ʼana tagata faifekau pea mo te fafine. Neʼe fakalogo ai kia natou, pea neʼe tuʼu ake ʼo heka ʼi te palepale. 24 Neʼe maʼu e te fafine ʼi tona ʼapi he ʼuhiʼi pipi neʼe sino lelei. Neʼe foimo alu atu aipe ʼo matehi* pea neʼe ina toʼo he falena ʼo natu, mo fakamoho ni pane hala fakatupu. 25 Neʼe ina ʼaumai te ʼu meʼa ʼaia kia Saulo mo ʼana tagata faifekau ʼo natou kakai ai. Hili ʼaia, neʼe natou tutuʼu ake ʼo olo ʼi te po pe ʼaia.+

29 Neʼe fakatahitahiʼi leva e te kau Filisitini+ ʼanatou kautau fuli ʼi Afeke kae neʼe nonofo te kau Iselaele ʼo ovi ki te matapuna vai ʼae ʼi Siseleele.+ 2 Neʼe fakalaka te kau ʼaliki ʼo te kau Filisitini mo ʼanatou toko teau mo toko afe, pea neʼe fakalaka fakamuli leva ia Akise mo Tavite mo tana kau tagata.+ 3 Kae neʼe ui e te kau ʼaliki ʼo te kau Filisitini: “Kotea ʼae ʼe fai e te kau Hepeleo ʼaena ʼi heni?” Neʼe tali e Akise ki te kau ʼaliki ʼo te kau Filisitini: “ ʼE ko Tavite, te tagata faifekau ʼa te Hau ʼo Iselaele ko Saulo, pea kua taʼu katoa peʼe laka atu tana nofo mo au.+ Pea talu mai te ʼaho ʼae neʼe hola mai ai kia au ʼo kaku mai ki te ʼaho nei, neʼe mole au maʼu he meʼa ʼe kovi ia ia.” 4 Kae neʼe iita te kau ʼaliki ʼo te kau Filisitini kia ia pea mo natou ui age: “Fakaliliu te tagata ʼaia.+ Ke toe liliu ki te koga meʼa ʼae neʼe ke foaki age kia ia. Ke mole hifo mo tatou ki te tau, he ʼe feala anai ke fakafeagai mai kia tatou.+ Kapau ʼe ina loto ke toe ʼofainaʼi ia ia e tona ʼaliki, ʼe mole alu anai koa ki ai mo te ʼu foʼi ʼulu ʼo tatatou kau tagata? 5 Neʼe mole koa la natou hiva ʼo ʼuhiga mo Tavite pea mo memeʼe, ʼo ui:

6 Koia neʼe pauʼi ai e Akise+ ia Tavite pea neʼe ina ui age ki ai: “ ʼE au tala moʼoni atu ia muʼa ʼo Sehova, te ʼAtua maʼuli, ʼe ke faitotonu. Pea neʼe au fiafia ʼi tau alu mo taku kautau ki te tau,+ he neʼe mole au maʼu he meʼa ʼe kovi ia koe talu mai te ʼaho ʼae neʼe ke haʼu ai kia au ʼo kaku mai ki te ʼaho nei.+ Kae ʼe mole falala te kau ʼaliki kia koe.+ 7 Koia, toe liliu ʼi te fimalie, pea ʼaua naʼa ke fai he meʼa ke iita ai te kau ʼaliki ʼo te kau Filisitini.” 8 Kae neʼe ui e Tavite kia Akise: “Kotea ʼae neʼe au fai? Pea kotea te meʼa ʼe kovi neʼe ke maʼu ia au talu mai te ʼaho ʼae neʼe au haʼu ai kia koe ʼo kaku mai ki te ʼaho nei? Siʼoku ʼaliki te hau, he koʼe ʼe mole tonu ke au alu mo koe ʼo tauʼi ʼou fili?” 9 Neʼe tali e Akise kia Tavite: “Kia au, neʼe ke agalelei ohage ko he ʼaselo ʼa te ʼAtua.+ Kae neʼe ui e te kau ʼaliki ʼo te kau Filisitini: ‘ ʼE mole alu mo tatou ki te tau.’ 10 Koia, ʼe ke ʼala uhuuhu anai apogipogi mo ʼau tagata faifekau, pea kotou mavae moka kua ʼaho.”

11 Koia neʼe ʼala uhuuhu ai ia Tavite mo tana kau tagata ʼo natou toe liliu ki te fenua ʼo te kau Filisitini, pea neʼe hake te kau Filisitini ki Siseleele.+

30 ʼI te temi ʼae neʼe tau atu ai ia Tavite mo tana kau tagata ki Tesikelake+ ʼi te tolu ʼaho, neʼe kua ʼohofi e te kau Amaleke+ te potu saute* pea mo Tesikelake. Neʼe natou tauʼi mo tutu ia Tesikelake. 2 Neʼe natou puke mo ʼave ia te hahaʼi fafine+ pea mo natou fuli ʼae neʼe ʼi te kolo, mai ia natou liliki ki te kau lalahi. Neʼe mole natou matehi he tahi, kae neʼe natou ʼave natou mo hoko atu tonatou fagona. 3 ʼI te tau atu ʼa Tavite mo tana kau tagata ki te kolo, neʼe kua tutu mo ʼave ʼonatou ʼohoana, mo ʼonatou foha pea mo ʼonatou ʼofafine. 4 Neʼe fetagihi leʼo lahi ia Tavite mo te kau tagata ʼae neʼe fakatahi mo ia, ʼo kaku ki te mole kei ʼi ai honatou malohi ke natou fetagihi ai. 5 Neʼe toe ʼave foki mo te ʼu ʼohoana ʼe lua ʼo Tavite, ia Asinoame mai Siseleele, pea mo Apikaile, te fafine ʼae neʼe ʼohoana ʼi muʼa atu mo Napale, te tagata Kalemelo.+ 6 Neʼe hoha lahi ia Tavite he neʼe ui e te kau tagata ke tuki makaʼi ia ia, koteʼuhi neʼe iita te kau tagata fuli ʼi te kua pupuli ʼo ʼonatou foha mo ʼonatou ʼofafine. Kae neʼe lotomalohi ia Tavite ʼuhi ko te tokoni ʼa Sehova tona ʼAtua.+

7 Neʼe ui leva e Tavite kia Apiata,+ te pelepitelo, te foha ʼo Asimeleke: “Fakalelei siʼou loto, kae ke ke ʼaumai te efote.”+ Neʼe ʼaumai ai e Apiata te efote kia Tavite. 8 Pea neʼe fehuʼi e Tavite kia Sehova:+ “ ʼE tonu koa ke au tuli te kau solia ʼaia? ʼE au maʼu anai koa ia natou?” Neʼe tali e te ʼAtua: “Alu ʼo tuli natou, he ʼe ke maʼu anai natou, mo toe toʼo ia meʼa fuli pea mo haofaki te hahaʼi fuli.”+

9 Neʼe alu atu aipe ia Tavite mo te kau tagata ʼe toko 600+ ʼae neʼe fakatahi mo ia, ʼo natou olo ai ʼo kaku ki te Vai Tafe* ʼo Pesole. Neʼe nonofo leva ʼi ai ʼihi tagata. 10 Neʼe hoko atu pe e Tavite mo te kau tagata ʼe toko 400 tanatou tuli, kae neʼe nonofo te toko 200 tagata ʼae neʼe mole natou fakalaka ʼi te Vai Tafe ʼo Pesole he neʼe kua natou gaʼegagaʼe ʼosi.+

11 Neʼe natou maʼu leva he tagata Esipito ʼi te fenua pea neʼe natou ʼave kia Tavite. Neʼe natou foaki age tana meʼa kai mo tana moʼi vai ke inu, 12 mo tana moʼi keke fiku pea mo ʼana foʼi keke vite ʼe lua. ʼI tana ʼosi kai, neʼe toe malohi ai,* koteʼuhi neʼe mole kai mo inu hana moʼi vai lolotoga ʼaho ʼe tolu mo po ʼe tolu. 13 Neʼe fehuʼi leva e Tavite kia ia: “Ko ai tou pule, pea ʼe ke haʼu maifea?” Neʼe ina tali age: “Ko au ko he tagata gaue mai Esipito, neʼe au kaugana ki he tagata Amaleke. Kae neʼe liʼaki au e toku pule he neʼe au mahaki kua hili ki ai ʼaho ʼe tolu. 14 Neʼe matou ʼohofi te potu saute* ʼo te kau Keleti,+ mo te fenua ʼo Suta mo te potu saute* ʼo Kalepo,+ pea neʼe matou tutu ia Tesikelake.” 15 Neʼe ui age e Tavite ki ai: “ ʼE ke taki anai au ki te kau solia ʼaia?” Neʼe ina tali age: “Kapau ʼe ke fakapapau mai ʼi te huafa ʼo te ʼAtua ʼe mole ke matehi anai au mo tuku ki te ʼu nima ʼo toku pule, ʼe au taki anai koe ki te kau solia ʼaia.”

16 Neʼe ina taki ai ia ia ki te kau solia ʼaia neʼe mavetevete ʼi te fenua. Neʼe natou kakai mo iinu pea mo fakafiafia ʼuhi ko te toe koloa lahi ʼae neʼe natou toʼo mai te fenua ʼo te kau Filisitini pea mo te fenua ʼo Suta. 17 Neʼe matematehi leva natou e Tavite mai te mafoata ʼo kaku ki te afiafi. Neʼe mole hao he tahi, gata pe ki te kau tagata ʼe toko 400 ʼae neʼe feholaki ʼi te ʼu kamelo.+ 18 Neʼe toe maʼu e Tavite te ʼu meʼa fuli ʼae neʼe toʼo e te kau Amaleke,+ pea neʼe haofaki e Tavite ʼona ʼohoana ʼe lua. 19 Neʼe mole puli he tahi, mai ia natou liliki ki te kau lalahi. Neʼe natou toe maʼu ʼonatou foha, mo ʼonatou ʼofafine pea mo ʼonatou koloa.+ Neʼe toe maʼu e Tavite te ʼu meʼa fuli ʼae neʼe natou toʼo. 20 Neʼe toʼo e Tavite te faga ovi mo te faga pipi fuli. Neʼe taki e tana hahaʼi te ʼu manu ʼaia ʼi muʼa kae muli mai tanatou faga manu, mo natou ui: “Koʼeni te koloa ʼo Tavite.”

21 Neʼe alu leva ia Tavite ki te kau tagata ʼe toko 200 ʼae neʼe mole olo mo ia he neʼe kua natou gaʼegagaʼe ʼosi, kae neʼe nonofo ʼi te Vai Tafe ʼo Pesole.+ Neʼe natou ʼomai ʼo fakafelaveʼi kia Tavite pea mo te hahaʼi ʼae neʼe fakatahi mo ia. ʼI te fakaovi age ʼa Tavite ki te kau tagata ʼaia, neʼe ina fehuʼi age pe kua natou feafeaʼi. 22 Kae ko ʼihi tagata ʼae neʼe olo mo Tavite neʼe natou agakovi pea neʼe mole honatou ʼuhiga. Neʼe natou ui ki ai: “ ʼE mole tou foaki age anai he meʼa kia natou ʼi te koloa ʼae neʼe tou maʼu, he neʼe mole olo mo tatou. Ke natou tahi toʼo tona ʼohoana mo ʼona foha, pea ke natou olo.” 23 Kae neʼe tali e Tavite: “Siʼoku ʼu tehina, ʼe mole tonu ke kotou fai te faʼahi ʼaia ʼaki te meʼa ʼae neʼe foaki mai e Sehova kia tatou. Neʼe ina puipui tatou pea mo tuku ki ʼotatou nima te kau solia ʼaia ʼae neʼe natou tauʼi tatou.+ 24 Pea ko ai ʼae ʼe manatu tahi anai mo koutou ʼo ʼuhiga mo te faʼahi ʼaia? Ko te vahe ʼo ia ʼae neʼe alu ki te tau ʼe tatau pe anai mo te vahe ʼo ia ʼae neʼe nofo mo te ʼu kavega.+ ʼE kotou tahi maʼu fuli anai tona vahe.”+ 25 Pea talu mai te ʼaho ʼaia, neʼe ko he lekula mo he fakatotonu ʼi Iselaele ʼo kaku mai ki te ʼaho nei.

26 ʼI te toe liliu ʼa Tavite ki Tesikelake, neʼe ina momoli he ʼu koloa ki te kau takitaki ʼo Suta ʼae neʼe ko ʼona kaumeʼa, ʼo ina ui: “ ʼE ko he meʼa ʼofa* ʼaeni maʼa koutou mai te ʼu koloa ʼo te ʼu fili ʼo Sehova.” 27 Neʼe ina momoli he ʼu meʼa ʼofa kia natou ʼae ʼi Petele,+ mo natou ʼae ʼi Lamoti ʼo te Nekepe,* mo natou ʼae ʼi Satili,+ 28 mo natou ʼae ʼi Aloele, mo natou ʼae ʼi Sifemote, mo natou ʼae ʼi Esetemoa,+ 29 mo natou ʼae ʼi Lakali, mo natou ʼae ʼi te ʼu kolo ʼo te kau Selasemeele,+ mo natou ʼae ʼi te ʼu kolo ʼo te kau Kenite,+ 30 mo natou ʼae ʼi Holema,+ mo natou ʼae ʼi Polasani, mo natou ʼae ʼi Ataki, 31 mo natou ʼae ʼi Hepelone+ pea mo te ʼu potu fuli pe ʼae neʼe olo ki ai ia Tavite mo tana kau tagata.

31 Neʼe tauʼi leva e te kau Filisitini ia Iselaele.+ Pea neʼe feholaki te kau solia ʼo Iselaele ia muʼa ʼo te kau Filisitini. Neʼe mamate ai te tokolahi ʼi te Moʼuga ʼo Kilipoa.+ 2 Neʼe tuli e te kau Filisitini ia Saulo mo ʼona foha. Neʼe natou matehi leva ia Sonatane,+ mo Apinatape pea mo Malekisua, te ʼu foha ʼo Saulo.+ 3 Neʼe kovi ʼosi tanatou tauʼi ia Saulo. Neʼe maʼu leva ia ia e te kau fainahau, pea neʼe lavea kovi ia natou.+ 4 Neʼe ui e Saulo ki tana tagata toʼo mahafu: “Tohoʼi ake tau heleta ʼo hukiʼi ʼaki au, ke mole ʼomai te kau tagata heʼe silikosisio ʼaia*+ ʼo hukiʼi mo gaohi koviʼi* au.” Kae neʼe mole loto ki ai tana tagata toʼo mahafu he neʼe mataku ʼaupito. Koia neʼe toʼo ai e Saulo tana heleta ʼo fakamate ia ia.+ 5 ʼI te sio ʼa tana tagata toʼo mahafu kua mate ia Saulo,+ neʼe ina toe toʼo mo tana heleta ʼo toe fakamate mo ia. 6 Koia ʼi te ʼaho ʼaia, neʼe mamate ai ia Saulo, mo ʼona foha ʼe tolu, mo tana tagata toʼo mahafu pea mo tana kau tagata fuli.+ 7 Neʼe sisio te hahaʼi ʼo Iselaele ʼae neʼe nonofo ʼi te potu fenua laulelei mo te potu fenua ʼo te Solotane ki te feholaki ʼa te kau solia ʼo Iselaele pea mo te kua mamate ʼa Saulo mo ʼona foha. Neʼe natou liʼaki ai te ʼu kolo kae natou feholaki.+ Neʼe ʼomai leva te kau Filisitini ʼo nofoʼi te ʼu kolo ʼaia.

8 ʼI te ʼaho ake, ʼi te ʼomai ʼa te kau Filisitini ʼo toʼo te ʼu koloa ʼo natou ʼae kua mamate, neʼe natou maʼu te ʼu sino ʼo Saulo mo ʼona foha ʼe tolu ʼi te Moʼuga ʼo Kilipoa.+ 9 Neʼe natou tuʼusi ai tona ʼulu mo huʼi tona teu tau pea neʼe natou fakaha te logo ʼi te fenua katoa ʼo te kau Filisitini,+ ʼo mafola ai ʼi te hahaʼi pea mo te ʼu fale* ʼo ʼonatou taula ʼatua.+ 10 Neʼe natou tuku leva tona teu tau ki te fale ʼo te ʼu fakatata ʼo Asetolete kae natou tautau tona sino ki te kaupa ʼo Pete-sani.+ 11 ʼI te logo ʼa te hahaʼi ʼo Sapesi-kileate+ ki te meʼa ʼae neʼe fai e te kau Filisitini kia Saulo, 12 neʼe tutuʼu ake te kau tagata toʼa fuli ʼo natou haʼele ʼi te po katoa, pea neʼe natou toʼo leva te ʼu sino ʼo Saulo pea mo ʼona foha ʼi te kaupa ʼo Pete-sani. Neʼe natou toe liliu ki Sapesi ʼo tutu ai ʼonatou sino. 13 Neʼe natou toʼo leva ʼonatou hui+ mo natou tanu ʼi te lalo fuʼu tamalisi ʼae ʼi Sapesi,+ pea neʼe natou sesunio lolotoga ʼaho ʼe fitu.