ESETALASI

1 ʼI te ʼuluaki taʼu ʼo te pule ʼa Siliusi te Hau+ ʼo Pelesia, neʼe hoko ai leva te folafola ʼa Sehova ʼae neʼe fakaha e Selemia.+ Neʼe uga e Sehova te ʼatamai ʼo Siliusi te Hau ʼo Pelesia ke ina tala ʼi tona puleʼaga katoa, pea ke ina toe tohi foki+ te faʼahi ʼaeni:

2 “Koʼeni te folafola ʼa Siliusi te Hau ʼo Pelesia: ‘Neʼe foaki mai kia au e Sehova te ʼAtua ʼo te ʼatu lagi ia te ʼu puleʼaga fuli ʼo te kele,+ pea neʼe ina fakatotonu mai ke au laga he fale maʼa ia ʼi Selusalemi,+ ʼi Suta. 3 Ko he tahi pe ia koutou ʼe kau ki tana hahaʼi, ke nofo tona ʼAtua mo ia. Pea ke hake ki Selusalemi, ʼi Suta, ʼo toe laga te fale ʼo Sehova te ʼAtua ʼo Iselaele, ʼae neʼe tuʼu ʼi Selusalemi.* ʼE ko ia te ʼAtua moʼoni. 4 Pea ko he tahi pe ʼe nofo ohage ko he matapule,+ ʼi he potu pe, ke tokoni ʼona vahaʼa fale* ki ai ʼo foaki age he siliva mo he aulo, he ʼu koloa mo he faga manu, ʼo toe feia pe mo ni meʼa ʼofa neʼe natou fai ʼaki he lotolelei maʼa te fale ʼo te ʼAtua moʼoni,+ ʼae neʼe tuʼu ʼi Selusalemi.’ ”

5 Pea ko te ʼu pule famili ʼo Suta mo Pesamino, ʼo feia pe mo te kau pelepitelo mo te kau Levite, ia natou fuli ʼae neʼe uga e te ʼAtua moʼoni ʼonatou ʼatamai, neʼe natou teuteu leva ke natou olo ʼo toe laga te fale ʼo Sehova, ʼae neʼe tuʼu ʼi Selusalemi. 6 Ko natou fuli ʼae ʼi ʼonatou tafaʼaki, neʼe tokoni kia natou ʼo natou foaki age* he ʼu meʼa neʼe fai ʼaki te siliva mo te aulo, mo he ʼu koloa, mo he faga manu mo he ʼu meʼa maʼuhiga, ʼo feia pe mo he ʼu meʼa ʼofa neʼe foaki ʼaki he lotolelei.

7 Neʼe toe fakaliliu foki e te Hau ko Siliusi te ʼu meʼa ʼo te fale ʼo Sehova, ʼae neʼe toʼo e Nepukanesa ʼi Selusalemi ʼo ina tuku ki te fale ʼo tona ʼatua.+ 8 Neʼe fakaliliu te ʼu meʼa ʼaia e Siliusi te Hau ʼo Pelesia ʼi te takitaki ʼa Miteletate, te tagata pule koloa, ʼae neʼe ina tohi te ʼu meʼa ʼaia maʼa Sesepatesale,*+ te pule ʼo Suta.

9 Koʼeni te ʼu meʼa ʼaia: ko te ʼu pesini aulo ʼe 30, mo te ʼu pesini siliva ʼe 1 000, mo te tahi age ʼu pesini ʼe 29, 10 mo te ʼu kiʼi ipu aulo ʼe 30, mo te ʼu kiʼi ipu siliva ʼe 410, pea mo te tahi age ʼu meʼa ʼe 1 000. 11 Ko te lahi ʼo te ʼu meʼa fuli ʼae neʼe fai ʼaki te aulo mo te siliva, neʼe 5 400. Neʼe ʼave e Sesepatesale te ʼu meʼa fuli ʼaia, ʼi te temi ʼae neʼe mavae ai ia natou ʼae neʼe maʼuʼuli popula ʼi Papiloni,+ ʼo olo ki Selusalemi.

2 Koʼeni te hahaʼi ʼo te potu fenua ʼae neʼe mavae mai tonatou maʼuli popula,+ ia natou ʼae neʼe ʼave popula ki Papiloni e Nepukanesa te Hau ʼo Papiloni+ pea ki muli age neʼe natou toe liliu ki Selusalemi mo Suta, ʼo tahi alu ki tona kolo.+ 2 Neʼe natou ʼomai mo Solopapele,+ mo Sesua,+ mo Neemia, mo Selasa, mo Leelasa, mo Maletokeo, mo Pilekane, mo Misepale, mo Pikevai, mo Leume pea mo Paana.

Koʼeni te kaugamalie ʼo te hahaʼi tagata Iselaele:+ 3 ko te ʼu foha ʼo Paleoke, ko te toko 2 172, 4 ko te ʼu foha ʼo Sefatia, ko te toko 372, 5 ko te ʼu foha ʼo Alase,+ ko te toko 775, 6 ko te ʼu foha ʼo Pakate-moape,+ ʼae ʼe hifo mai te ʼu foha ʼo Sesua mo Soape, ko te toko 2 812, 7 ko te ʼu foha ʼo Elame,+ ko te toko 1 254, 8 ko te ʼu foha ʼo Satu,+ ko te toko 945, 9 ko te ʼu foha ʼo Sakai, ko te toko 760, 10 ko te ʼu foha ʼo Pani, ko te toko 642, 11 ko te ʼu foha ʼo Pepai, ko te toko 623, 12 ko te ʼu foha ʼo Asekate, ko te toko 1 222, 13 ko te ʼu foha ʼo Atonikame, ko te toko 666, 14 ko te ʼu foha ʼo Pikevai, ko te toko 2 056, 15 ko te ʼu foha ʼo Atine, ko te toko 454, 16 ko te ʼu foha ʼo Atele, ʼae ʼe hifo mai ia Esekiasi, ko te toko 98, 17 ko te ʼu foha ʼo Petesai, ko te toko 323, 18 ko te ʼu foha ʼo Sola, ko te toko 112, 19 ko te ʼu foha ʼo Asume,+ ko te toko 223, 20 ko te ʼu foha ʼo Kipale, ko te toko 95, 21 ko te ʼu foha mai Petelehemi, ko te toko 123, 22 ko te ʼu tagata mai Netofa, ko te toko 56, 23 ko te ʼu tagata mai Anatote,+ ko te toko 128, 24 ko te ʼu foha mai Asimaveti, ko te toko 42, 25 ko te ʼu foha mai Kiliate-sealimi, mo Kefila mo Peeloti, ko te toko 743, 26 ko te ʼu foha mai Lama+ mo Kepa,+ ko te toko 621, 27 ko te ʼu tagata mai Mikemasi, ko te toko 122, 28 ko te ʼu tagata mai Petele mo Ai,+ ko te toko 223, 29 ko te ʼu foha mai Nepo,+ ko te toko 52, 30 ko te ʼu foha mai Makepise, ko te toko 156, 31 ko te ʼu foha ʼo te tahi age Elame, ko te toko 1 254, 32 ko te ʼu foha ʼo Alime, ko te toko 320, 33 ko te ʼu foha ʼo Loti, mo Atite mo Ono, ko te toko 725, 34 ko te ʼu foha mai Seliko, ko te toko 345, 35 ko te ʼu foha ʼo Senaa, ko te toko 3630.

36 Ko te kau pelepitelo:+ ko te ʼu foha ʼo Setasa+ mai te famili ʼo Sesua,+ ko te toko 973, 37 ko te ʼu foha ʼo Imele,+ ko te toko 1 052, 38 ko te ʼu foha ʼo Pasule,+ ko te toko 1 247, 39 ko te ʼu foha ʼo Alime,+ ko te toko 1 017.

40 Ko te kau Levite:+ ko te ʼu foha ʼo Sesua mo Katemiele,+ ʼae ʼe hifo mai te ʼu foha ʼo Hotavia, ko te toko 74. 41 Ko te kau hiva:+ ko te ʼu foha ʼo Asafe,+ ko te toko 128. 42 Ko te ʼu foha ʼo te kau tagata leʼo matapa:+ ko te ʼu foha ʼo Salume, mo te ʼu foha ʼo Atele, mo te ʼu foha ʼo Talemone,+ mo te ʼu foha ʼo Akupe,+ mo te ʼu foha ʼo Atita, mo te ʼu foha ʼo Sopai, neʼe fakatahiʼi ia natou fuli ʼaia, ko te toko 139.

43 Ko te kau tagata faifekau ʼo te fale lotu:*+ ko te ʼu foha ʼo Tesika, mo te ʼu foha ʼo Asufa, mo te ʼu foha ʼo Tapaote, 44 mo te ʼu foha ʼo Kelose, mo te ʼu foha ʼo Siasa, mo te ʼu foha ʼo Patone, 45 mo te ʼu foha ʼo Lepana, mo te ʼu foha ʼo Akapa, mo te ʼu foha ʼo Akupe, 46 mo te ʼu foha ʼo Akape, mo te ʼu foha ʼo Salemai, mo te ʼu foha ʼo Hanane, 47 mo te ʼu foha ʼo Kitele, mo te ʼu foha ʼo Kaale, mo te ʼu foha ʼo Leasa, 48 mo te ʼu foha ʼo Letisini, mo te ʼu foha ʼo Nekota, mo te ʼu foha ʼo Kasame, 49 mo te ʼu foha ʼo Usa, mo te ʼu foha ʼo Paseake, mo te ʼu foha ʼo Pesai, 50 mo te ʼu foha ʼo Asena, mo te ʼu foha ʼo Meunime, mo te ʼu foha ʼo Nefusime, 51 mo te ʼu foha ʼo Pakepuke, mo te ʼu foha ʼo Akufa, mo te ʼu foha ʼo Alule, 52 mo te ʼu foha ʼo Patelute, mo te ʼu foha ʼo Meita, mo te ʼu foha ʼo Aleseta, 53 mo te ʼu foha ʼo Palekose, mo te ʼu foha ʼo Sisela, mo te ʼu foha ʼo Tamake, 54 mo te ʼu foha ʼo Netesia, mo te ʼu foha ʼo Atifa.

55 Ko te ʼu foha ʼo te kau tagata faifekau ʼa Salomone: ko te ʼu foha ʼo Sotai, mo te ʼu foha ʼo Sofelete, mo te ʼu foha ʼo Peluta,+ 56 mo te ʼu foha ʼo Saala, mo te ʼu foha ʼo Talekone, mo te ʼu foha ʼo Kitele, 57 mo te ʼu foha ʼo Sefatia, mo te ʼu foha ʼo Atile, mo te ʼu foha ʼo Pokeleti-atesepaimi, mo te ʼu foha ʼo Ami.

58 Ko te kau tagata faifekau ʼo te fale lotu* pea mo te ʼu foha ʼo te kau tagata faifekau ʼa Salomone, neʼe fakatahiʼi ia natou fuli ʼaia, ko te toko 392.

59 Pea koʼeni ia natou ʼae neʼe mavae mai Tele-melake, mo Tele-alesa, mo Kelupi, mo Atane mo Imele, kae neʼe mole feala ke natou iloʼi pe neʼe ko he kau Iselaele ia te famili ʼo ʼanatou tamai ʼo feia mo tonatou haʼuʼaga:+ 60 ko te ’u foha ʼo Telaia, mo te ʼu foha ʼo Topie, mo te ʼu foha ʼo Nekota, ko te toko 652. 61 Pea ʼi te ʼu foha ʼo te kau pelepitelo: ko te ʼu foha ʼo Apaia, mo te ʼu foha ʼo Akose,+ mo te ʼu foha ʼo Palesilai, ʼae neʼe ʼohoana mo he ʼofafine ʼo Palesilai,+ te tagata Kileate pea neʼe ina toʼo leva ia te higoa ʼaia. 62 Neʼe fai e natou ʼaia he ʼu fekumi ʼi te ʼu tohi hako moʼo fakamoʼoni tonatou haʼuʼaga kae neʼe mole natou maʼu, koia neʼe fakahifo ai natou mai ʼonatou tuʼulaga fakapelepitelo.*+ 63 Neʼe ui e te kovana* kia natou ʼe mole feala ke natou kai ki te ʼu meʼa ʼae ʼe taputapu ʼaupito,+ ʼo kaku ki te hoki maʼu ʼo he pelepitelo ʼe ina vakavakaʼi anai te Ulime mo te Tumime.+

64 Ko natou fuli ʼae neʼe toe liliu neʼe ko te toko 42 360,+ 65 kae neʼe mole lau ai te ʼu tagata mo te ʼu fafine kaugana, ʼae neʼe toko 7 337, pea neʼe toe ʼi ai foki mo he ʼu tagata mo he ʼu fafine hiva neʼe toko 200. 66 Neʼe ko ʼanatou hosi ʼe 736, mo ʼanatou asino lalahi ʼe 245, 67 mo ʼanatou kamelo ʼe 435 pea mo ʼanatou asino liliki ʼe 6720.

68 ʼI tanatou tau atu ki te fale lotu ʼo Sehova ʼi Selusalemi, ko ʼihi pule famili neʼe natou foaki he ʼu meʼa ʼofa ʼaki he lotolelei+ ki te fale ʼo te ʼAtua moʼoni, ke feala he toe laga* ʼi tona tuʼuʼaga ʼafeā.+ 69 Neʼe natou foaki ʼo mulimuli ki te ʼu koloa ʼae neʼe natou maʼu. Neʼe natou li ki te falā ʼae neʼe fakatuʼutuʼu ki te gaue ʼaia, he ʼu talame* aulo ʼe 61 000, mo he ʼu mina* siliva ʼe 5 000,+ mo he ʼu kofu ʼe 100 maʼa te kau pelepitelo. 70 Ko te kau pelepitelo, mo te kau Levite, mo te kau hiva, mo te kau tagata leʼo matapa, mo te kau faifekau ʼo te fale lotu* pea mo te toe ʼo te hahaʼi neʼe natou nonofo leva ʼi ʼonatou kolo. Neʼe nonofo leva te kau Iselaele fuli ʼi ʼonatou kolo.+

3 ʼI te hoko mai ʼo te fitu mahina+ pea mo te kua nonofo ʼa te kau Iselaele* ʼi ʼonatou kolo, neʼe natou fakatahitahi fuli leva ʼi Selusalemi mo hanatou fakatuʼutuʼu ʼe tahi. 2 Neʼe tutuʼu ake leva ia Sesua,+ te foha ʼo Seosatake mo natou ʼae neʼe gaue fakapelepitelo mo ia pea mo Solopapele,+ te foha ʼo Salatiele+ mo ʼona tehina ʼo laga te ʼaletale ʼo te ʼAtua ʼo Iselaele, ke natou momoli ai te ʼu holokoseta,* ohage ko tona tohi ʼi te Lao ʼa Moisese,+ te tagata ʼa te ʼAtua moʼoni.

3 Neʼe natou fakatuʼu leva te ʼaletale ʼi tona tuʼuʼaga ʼafeā, logo la tanatou matataku ʼi te hahaʼi ʼo te ʼu fenua ʼae ʼi ʼonatou tafaʼaki.+ Neʼe natou momoli ai te ʼu holokoseta maʼa Sehova, te ʼu holokoseta ʼo te uhu mo te afiafi.+ 4 Neʼe natou fai leva te ʼAho Lahi ʼo Te ʼu Pola* ohage pe ko te meʼa ʼae neʼe kua tohi,+ pea ʼi te ʼaho fuli neʼe natou momoli ia te ʼu holokoseta ʼo mulimuli pe ki te lahi ʼo te ʼu holokoseta ʼae neʼe fakamaʼua ke fai ʼi te ʼaho fuli.+ 5 Hili ʼaia, neʼe natou momoli te holokoseta ʼae neʼe tonu ke fai tuʼumaʼu,+ mo te ʼu molaga ki te tuʼu afiafi ʼo te mahina,+ mo te ʼu molaga ki te ʼu ʼaho lalahi fuli+ ʼo Sehova ʼae ʼe taputapu, ʼo toe feia mo te ʼu molaga ʼo natou fuli ʼae neʼe natou foaki ʼaki he lotolelei he meʼa ʼofa+ maʼa Sehova. 6 Neʼe natou kamata momoli te ʼu holokoseta kia Sehova ʼi te ʼuluaki ʼaho ʼo te fitu mahina,+ logo la neʼe heʼeki fakatuʼu te fakatafito ʼo te fale lotu ʼo Sehova.

7 Neʼe natou foaki he falā ki te kau ta maka+ mo te kau tufuga,+ mo he meʼa kai, mo he meʼa inu mo he lolo ki te kau Sitoni pea mo te kau Tile, he neʼe natou ʼaumai ʼi te tai te ʼu ʼakau ko te sete mai Lipane ki Sope,+ ʼo mulimuli ki te fakagafua ʼae neʼe tuku age e Siliusi, te Hau ʼo Pelesia.+

8 ʼI te lua taʼu hili tanatou tau mai ki te fale ʼo te ʼAtua moʼoni ʼae ʼi Selusalemi, ʼi te lua mahina, neʼe kamata ai leva te gaue e Solopapele te foha ʼo Salatiele, mo Sesua te foha ʼo Seosatake pea mo ʼonā tahi ʼu tehina, mo te kau pelepitelo, mo te kau Levite, pea mo natou fuli ʼae neʼe mavae mai tonatou maʼuli popula ʼo olo ki Selusalemi.+ Neʼe natou fakanofo te kau Levite, natou ʼae neʼe taʼu 20 ʼo fai ki ʼoluga, ke natou takitaki te gaue ʼo te fale ʼo Sehova. 9 Koia neʼe takitaki fakatahi leva te gaue ʼae neʼe fai ʼi te fale ʼo te ʼAtua moʼoni e Sesua, mo ʼona foha mo ʼona tehina, pea mo Katemiele mo ʼona foha, ia te ʼu foha ʼo Suta, mo te ʼu foha ʼo Enatate,+ mo ʼonatou foha pea mo ʼonatou tehina, ia te kau Levite.

10 ʼI te temi ʼae neʼe fakatuʼu ai e te kau gaue ia te fakatafito ʼo te fale lotu ʼo Sehova,+ neʼe tutuʼu ake ai te kau pelepitelo mo ʼonatou teu fakapelepitelo mo he ʼu fakatagi pupuhi+ ʼo feia mo te kau Levite, te ʼu foha ʼo Asafe mo he ʼu simepale, ʼo natou fakavikiviki kia Sehova ʼo mulimuli ki te fakatuʼutuʼu ʼae neʼe fai e Tavite, te Hau ʼo Iselaele.+ 11 Pea neʼe natou hiva fakavikiviki mo fakafetaʼi kia Sehova. Neʼe natou fefakahoahoaʼaki ai ʼo hiva:+ “He ʼe agalelei pea ʼe ina fakaha tona ʼofa agatonu ki Iselaele ʼo talu ai.”+ Neʼe kalaga leʼo lahi leva te hahaʼi fuli ʼo fakavikiviki kia Sehova he neʼe kua fakatuʼu te fakatafito ʼo te fale lotu ʼo Sehova. 12 Tokolahi te kau pelepitelo, mo te kau Levite mo te kau pule famili, ia te kau matuʼa ʼae neʼe sisio ki te fale ʼafeā,+ neʼe natou fetagihi leʼo lahi ʼi tanatou sisio leva ki te fakatuʼu ʼo te fakatafito ʼo te fale ʼaia. Kae neʼe toe hahaʼi foki mo natou ʼae neʼe kalaga fakafiafia.+ 13 Neʼe mole feala ai ki te hahaʼi ke natou fakakehekeheʼi te logoaʼa ʼo te ʼu kalaga fakafiafia pea mo te logoaʼa ʼo te ʼu tagi, koteʼuhi neʼe kalaga leʼo lahi te hahaʼi ʼo logo ki mamaʼo.

4 ʼI te logo ʼa te ʼu fili ʼo Suta pea mo Pesamino+ ki te laga e natou ʼae neʼe toe liliu mai tonatou maʼuli popula,+ ia he fale lotu maʼa Sehova te ʼAtua ʼo Iselaele, 2 neʼe natou foimo olo atu aipe kia Solopapele mo te ʼu pule famili, ʼo ui kia natou: “Kotou tuku ke matou laga mo koutou, he ʼe matou hage pe ko koutou, ʼe matou tauhi ki* tokotou ʼAtua+ pea neʼe matou momoli he ʼu sakilifisio kia te ia talu mai te temi ʼo Esale-atone,+ te Hau ʼo Asilia, ʼae neʼe ina ʼaumai matou ki heni.”+ 3 Kae neʼe tali age e Solopapele, mo Sesua pea mo te ʼu pule famili ʼo Iselaele: “ ʼE mole kotou laga mo matou te fale ʼo tomatou ʼAtua.+ ʼE ko matou pe ʼae ka matou laga te fale maʼa Sehova te ʼAtua ʼo Iselaele, ohage ko tona fakatotonu mai e Siliusi, te Hau ʼo Pelesia.”+

4 Pea neʼe fakalotovaivaiʼi tuʼumaʼu* e te hahaʼi ʼo te fenua, te hahaʼi ʼo Suta mo fakamatakuʼi natou ke tuku tanatou gaue.+ 5 Neʼe natou totogi he ʼu tagata faitokoni ke natou faigaʼi ke to noa ʼanatou fakatuʼutuʼu,+ pea neʼe hoko te aluʼaga ʼaia ʼi te temi ʼae neʼe pule ai ia Siliusi, te Hau ʼo Pelesia ʼo kaku ki te temi ʼae neʼe pule ai ia Taliusi,+ te Hau ʼo Pelesia. 6 ʼI te kamata pule ʼa Asuelusi, neʼe natou fai he tohi neʼe tukugakoviʼi ai te hahaʼi ʼo Suta mo Selusalemi. 7 Pea ʼi te temi ʼo Aletasese, te Hau ʼo Pelesia, neʼe fai e Piselame, mo Miteletate, mo Tapeele mo ʼona kaugā gaue he tohi ki te hau ko Aletasese. Neʼe natou fakaliliu te tohi ki te Fakaalamea,+ ʼo fakaʼaogaʼi he ʼu mataʼi tohi Fakaalamea.*

8 * Neʼe fai leva e te kovana ko Leume, pea mo Simesai, te tagata sekelipa, he tohi ki te Hau ko Aletasese, ʼo nā tukugakoviʼi ai te hahaʼi ʼo Selusalemi. Neʼe ui ʼi te tohi ʼaia: 9 (Neʼe ko he tohi mai te kovana ko Leume, mo Simesai, te tagata sekelipa pea mo ʼonā kaugā gaue, ia te kau tuʼi fakamau mo te tahi ʼu kovana, pea mo te kau sikalaipe, ia te hahaʼi ʼo Eleke,+ mo te kau Papiloni, mo te hahaʼi ʼo Suse,+ ia te kau Elame,+ 10 mo te hahaʼi ʼo te ʼu puleʼaga ʼae neʼe ʼave popula pea mo fakanofo ʼi te ʼu kolo ʼo Samalia e Asenapale, te hau lahi pea mo fakaʼapaʼapaʼia,+ pea mo te hahaʼi ʼo te ʼu fenua ʼae ʼI Te Tahi Faʼahi ʼo Te Vai Tafe,* 11 pea ko te hiki ʼaeni ʼo te tohi ʼae neʼe momoli ki ai.)

“Kia Aletasese, te Hau, ko matou ko ʼau hahaʼi faifekau, te ʼu tagata ʼo te ʼu fenua ʼae ʼI Te Tahi Faʼahi ʼo Te Vai Tafe: 12 Ke iloʼi e te hau kua tau mai ki Selusalemi te kau Sutea ʼae neʼe mavae mai tou fenua ʼo ʼomai ki heni. ʼE natou toe laga te kolo agatuʼu mo agakovi, mo natou fakaʼosi te ʼu kaupa+ pea mo toe gaohi te ʼu fakatafito. 13 Koia, ke iloʼi e te hau kapau ʼe toe laga te kolo ʼaia pea mo fakaʼosi ʼona kaupa, ʼe mole natou totogi anai te ʼu tukuhau,*+ pea ʼe ʼi ai anai he puli ʼi te ʼu koloa ʼo te ʼu hau. 14 Mai tona aluʼaga ʼae ʼe matou maʼu ʼomatou totogi mai te fale hau* pea ʼe mole lelei ke matou sisio ki te ʼu fua kovi ka hoko ki te hau, koia ʼae ʼe matou fakaha te faʼahi ʼaia ki te hau, 15 ke feala ai he fai ʼo he ʼu fekumi ʼi te tohi ʼo te hisitolia ʼo ʼau kui.+ Pea ʼi te tohi ʼaia ʼo te hisitolia, ʼe ke iloʼi ai anai ko te kolo ʼaia ʼe ko he kolo agatuʼu mo fakatupu tuʼutamaki ki te ʼu hau mo te ʼu potu fenua, pea talu mai te ʼu temi ʼafeā, neʼe ʼi ai he ʼu hahaʼi agatuʼu ʼi te kolo ʼaia. Neʼe ko te tupuʼaga la ʼaia ʼo tona maumauʼi.+ 16 ʼE matou fakaha ki te hau, kapau ʼe toe laga te kolo ʼaia mo fakaʼosi ʼona kaupa, pea ʼe mole ke toe lava puleʼi anai* te ʼu fenua ʼae ʼI Te Tahi Faʼahi ʼo Te Vai Tafe.”+

17 Koʼeni te tali ʼa te hau ki te kovana ko Leume, mo Simesai, te tagata sekelipa pea mo ʼonā kaugā gaue ʼae neʼe nonofo ʼi Samalia pea mo te ʼu fenua ʼae ʼI Te Tahi Faʼahi ʼo Te Vai Tafe:

“Fakaʼalofa atu! 18 Ko te tohi ʼae neʼe kotou momoli mai neʼe kua lau fakalelei* mai ʼi ʼoku muʼa. 19 Neʼe au fakatotonu ai ke fai he ʼu fekumi, pea neʼe maʼu ai, neʼe fakafeagai te kolo ʼaia ki te ʼu hau talu mai fualoa, pea neʼe hoko ai ni agatuʼu.+ 20 Neʼe ʼi ai he ʼu hau malolohi ʼo Selusalemi neʼe natou puleʼi te ʼu fenua fuli ʼae ʼI Te Tahi Faʼahi ʼo Te Vai Tafe pea neʼe totogi age kia natou te ʼu tukuhau.* 21 Koia kotou fakatotonu ki te ʼu tagata ʼaia ke tuku tanatou gaue, ke mole toe laga te kolo ʼo kaku ki taku hoki tuku atu he fakagafua. 22 Kotou tokakaga ʼo fai ia meʼa fuli ʼo ʼuhiga mo te faʼahi ʼaia, ke mole fua kovi ai ki te hau.”+

23 Pea ʼi te ʼosi lau ʼo te tohi ʼa te Hau ko Aletasese kia Leume, mo Simesai, te tagata sekelipa pea mo ʼonā kaugā gaue, neʼe natou foimo olo atu aipe ki Selusalemi ki te kau Sutea, ʼo taʼofi fakamalohi tanatou gaue. 24 Neʼe tuʼu ai te toe laga ʼo te fale ʼo te ʼAtua, ʼae neʼe tuʼu ʼi Selusalemi. Pea neʼe tuʼu ai te gaue ʼo kaku ki te lua taʼu ʼo te pule ʼa Taliusi, te Hau ʼo Pelesia.+

5 Pea neʼe faifakakikite leva te ʼu polofeta ko Akeseo+ mo Sakalia+ te mokopuna ʼo Ito,+ ki te kau Sutea ʼae neʼe ʼi Suta pea mo Selusalemi, ʼi te huafa ʼo te ʼAtua ʼo Iselaele, ʼae neʼe nofo mo natou. 2 Neʼe kamata leva e Solopapele,+ te foha ʼo Salatiele pea mo Sesua,+ te foha ʼo Seosatake te toe laga ʼo te fale ʼo te ʼAtua,+ ʼae neʼe tuʼu ʼi Selusalemi. Pea neʼe fakatahi mo lagolago kia naua te kau polofeta ʼa te ʼAtua.+ 3 ʼI te temi ʼaia, ko Tatenai, te kovana ʼo te ʼu fenua ʼae ʼI Te Tahi Faʼahi ʼo Te Vai Tafe,* mo Setale-posenai pea mo ʼonā kaugā gaue, neʼe natou ʼomai ʼo fehuʼi kia natou: “Ko ai ʼae neʼe ina fakatotonu atu ke kotou laga te fale ʼaeni pea mo fakaʼosi te hili ʼo te ʼu lalago?” 4 Neʼe natou toe fehuʼi kia natou: “Ko ai te ʼu higoa ʼo te ʼu tagata ʼae ʼe gaue ki te laga ʼo te fale ʼaeni?” 5 Kae neʼe leʼoleʼo e te ʼAtua te kau takitaki Sutea,+ koia neʼe mole taʼofi ai tanatou gaue ʼo kaku ki te momoli ʼo he tohi kia Taliusi pea ke toe momoli mai foki e te hau he tohi ʼo ʼuhiga mo te gaue ʼaia.

6 Pea koʼeni te tohi ʼae neʼe momoli ki te Hau ko Taliusi e Tatenai, te kovana ʼo te ʼu fenua ʼae ʼI Te Tahi Faʼahi ʼo Te Vai Tafe, mo Setale-posenai mo ʼona kaugā gaue, ia te tahi ʼu kovana ʼo te ʼu fenua ʼae ʼI Te Tahi Faʼahi ʼo Te Vai Tafe. 7 Neʼe natou momoli te tohi kia ia, pea koʼeni te meʼa ʼae neʼe natou tohi:

“Kia Taliusi te Hau:

“Ke nofo mo koe te tokalelei! 8 Ke iloʼi e te hau neʼe matou olo ki te potu fenua ʼo Suta ki te fale ʼo te ʼAtua lahi, pea ʼe lolotoga laga nei ʼaki te ʼu foʼi maka lalahi neʼe fakateka ki te koga meʼa ʼaia, pea ʼe natou hili te ʼu lalago ki te ʼu kaupa. ʼE faʼafai te hahaʼi ʼi tanatou gaue pea ʼe lakalaka ki muʼa ʼuhi ko ʼanatou faiga. 9 Neʼe matou fehuʼi leva ki ʼonatou takitaki: ‘Ko ai ʼae neʼe ina fakatotonu atu ke kotou laga te fale ʼaeni pea mo fakaʼosi te hili ʼo te ʼu lalago?’+ 10 Neʼe matou toe fehuʼi age foki mo ʼonatou higoa ke fakaha atu, pea ke ke iloʼi ai foki pe ko ai te kau takitaki gaue.

11 “Pea koʼeni tanatou tali: ‘Ko matou ko te ʼu kaugana ʼa te ʼAtua ʼo te ʼatu lagi mo te kele, pea ʼe matou toe laga te fale ʼae neʼe laga kua hili ki ai ni lauʼi taʼu e te hau lahi ʼo Iselaele pea neʼe ina fakaʼosi.+ 12 Kae neʼe fakatupu e ʼamatou tamai te hauhau ʼo te ʼAtua ʼo te ʼatu lagi.+ Neʼe ina tuku ai natou kia nima ʼo Nepukanesa+ te tagata Kaletea, te Hau ʼo Papiloni, ʼae neʼe ina maumauʼi te fale ʼaia+ pea mo ʼave popula te hahaʼi ki Papiloni.+ 13 Kae ʼi te ʼuluaki taʼu ʼo te pule ʼa Siliusi te Hau ʼo Papiloni, neʼe fakatotonu ai e te Hau ko Siliusi ke toe laga te fale ʼaia ʼo te ʼAtua.+ 14 Ki muʼa atu, neʼe toʼo e Nepukanesa te ʼu meʼa ʼae neʼe fai ʼaki te aulo mo te siliva mai te fale lotu ʼo Selusalemi, ʼo ʼave ki te fale lotu ʼo Papiloni.+ Neʼe toe liufaki e te hau ko Siliusi te ʼu meʼa ʼaia ki te tagata ʼe higoa ko Sesepatesale,*+ ʼae neʼe fakanofo e Siliusi ke kovana.+ 15 Neʼe ui e Siliusi ki ai: “Toʼo te ʼu meʼa ʼaia. Alu ʼo tuku ki te fale lotu ʼae ʼe tuʼu ʼi Selusalemi, pea ke toe laga te fale ʼo te ʼAtua ʼi tona tuʼuʼaga ʼafeā.”+ 16 Pea ʼi te haʼu ʼa Sesepatesale, neʼe ina fakatuʼu te ʼu fakatafito ʼo te fale ʼo te ʼAtua,+ ʼae ʼe tuʼu ʼi Selusalemi. Pea talu mai ai ʼe kei hoko atu pe te laga ʼo te fale ʼaia ʼo kaku mai ki te temi nei pea ʼe heʼeki ʼosi.’+

17 “Koia kapau ʼe lelei ki te hau, ke fai he ʼu fekumi ʼi te tanakiʼaga koloa ʼo te hau ʼae ʼe tuʼu ʼi Papiloni, ke iloʼi ai pe neʼe fakatotonu moʼoni e te Hau ko Siliusi ke toe laga te fale ʼo te ʼAtua ʼae ʼi Selusalemi.+ Pea ke fakaha mai e te hau he tonu ʼo ʼuhiga mo te aluʼaga ʼaia.”

6 Neʼe fakatotonu ai leva e te Hau ko Taliusi ke fai he ʼu fekumi ʼi te fale tanakiʼaga tohi ʼae neʼe tuku ai te ʼu koloa ʼi Papiloni. 2 Pea ʼi te kolo tau ʼi Ekepatana ʼi te potu fenua ʼo Metia, neʼe maʼu ai he takaiga tohi, pea neʼe tohi ai te logo ʼaeni:

3 “ ʼI te ʼuluaki taʼu ʼo te pule ʼa te Hau ko Siliusi, neʼe fai ai e te Hau ko Siliusi te fakatotonu ʼaeni ʼo ʼuhiga mo te fale ʼo te ʼAtua ʼi Selusalemi:+ ‘Ke toe laga te fale, te koga meʼa ʼae ʼe tonu ke natou momoli ai te ʼu sakilifisio, pea ke fakatuʼu ʼona fakatafito. Ko tona maʼoluga ʼe fasiga nima 60,* pea ko tona laulahi ʼe fasiga nima 60.+ 4 Pea ko ʼona kaupa ʼe ko ʼatu ʼe tolu ko he ʼu foʼi maka lalahi neʼe fakateka ki te koga meʼa ʼaia pea mo he ʼatu ʼe tahi ko he ʼu lalago.+ Pea ke toʼo ʼi te ʼu koloa ʼo te hau ia te falā ʼae ʼe ʼaoga anai ki ai.+ 5 Pea tahi ʼae meʼa, ko te ʼu meʼa ʼae neʼe fai ʼaki te aulo mo te siliva ʼo te fale ʼo te ʼAtua, ʼae neʼe toʼo e Nepukanesa mai te fale lotu ʼae neʼe tuʼu ʼi Selusalemi ʼo ʼave ki Papiloni+ ʼe tonu anai ke toe liufaki. Ke feala ai ke toe tuku te ʼu meʼa ʼaia ki tona tukuʼaga ʼi te fale lotu ʼi Selusalemi te fale ʼo te ʼAtua.’+

6 “Koia, ko koe Tatenai te kovana ʼo te ʼu fenua ʼae ʼI Te Tahi Faʼahi ʼo Te Vai Tafe,* mo Setale-posenai mo ʼokolua kaugā gaue, ia te tahi ʼu kovana ʼo te ʼu fenua ʼae ʼI Te Tahi Faʼahi ʼo Te Vai Tafe,+ ke kotou fakamamaʼo mai ai. 7 ʼAua naʼa kotou taʼofi te laga ʼo te fale ʼaia ʼo te ʼAtua. He ʼe toe laga pe anai te fale ʼaia ʼo te ʼAtua e te kovana ʼo te kau Sutea pea mo te kau takitaki Sutea ʼi tona tuʼuʼaga ʼafeā. 8 Tahi ʼae meʼa, koʼeni taku fakatotonu ʼo ʼuhiga mo te meʼa ʼae ʼe tonu ke kotou fai moʼo tokoni ki te kau takitaki Sutea ʼaia ki te toe laga ʼo te fale ʼo te ʼAtua: ʼE toʼo anai te falā ʼae ʼe ʼaoga ki ai ʼi te ʼu koloa ʼo te hau,+ mo te ʼu tukuhau ʼae neʼe tanaki ʼi te ʼu fenua ʼae ʼI Te Tahi Faʼahi ʼo Te Vai Tafe, ʼo foimo ʼave ki te ʼu tagata ʼaia ke hoko atu te gaue.+ 9 Pea kotea pe he meʼa ʼe ʼaoga kia natou, ʼe tonu anai ke foaki tuʼumaʼu age ʼi te ʼaho fuli: he ʼu vitulo kei mui,+ mo he ʼu ovi tagata+ mo he ʼu akeno+ ke momoli ki te ʼAtua ʼo te lagi ohage ko he ʼu holokoseta, pea mo he fulumeto,+ mo he masima,+ mo he vino+ mo he lolo,+ ʼo mulimuli pe ki te ʼu meʼa ʼae ka kole e te kau pelepitelo ʼae ʼi Selusalemi. 10 ʼE feala ai anai ke hoko atu tanatou momoli he ʼu molaga ʼe leleiʼia e te ʼAtua ʼo te ʼatu lagi pea mo hufakiʼi te maʼuli ʼo te hau mo ʼona foha.+ 11 Neʼe au toe fakatotonu foki kapau ʼe talagataʼa he tahi ki te fakatotonu ʼaia ʼe toʼo anai he ʼakau mai tona ʼapi, ʼo haʼi* ki ai, pea ʼe liliu anai tona ʼapi ko he fale mamaʼo maʼa te hahaʼi,* ʼuhi ko tana talagataʼa. 12 Pea ke fakaʼauha e te ʼAtua ʼae ʼe tuʼu tona huafa ʼi tona fale,+ ia he hau peʼe ko he hahaʼi ʼe faiga anai ke talagataʼa ki te fakatotonu ʼaia pea mo maumauʼi te fale ʼo te ʼAtua ʼae ʼe tuʼu ʼi Selusalemi. Ko au ia Taliusi neʼe au fai te fakatotonu ʼaia, pea ke foimo fakahoko.”

13 Pea ko Tatenai te kovana ʼo te ʼu fenua ʼae ʼI Te Tahi Faʼahi ʼo Te Vai Tafe, mo Setale-posenai+ mo ʼonā kaugā gaue, neʼe natou foimo fakahoko atu aipe te ʼu meʼa fuli ʼae neʼe fakatotonu e te Hau ko Taliusi. 14 Pea neʼe hoko atu pe te laga ʼo te fale e te kau takitaki Sutea pea neʼe haʼele ki muʼa ia te gaue.+ Neʼe fakalotomalohiʼi natou ʼaki te faifakakikite ʼa Akeseo+ te polofeta pea mo Sakalia+ te mokopuna ʼo Ito. Neʼe natou fakaʼosi te laga ʼo te fale ʼae neʼe fakatotonu e te ʼAtua ʼo Iselaele+ ʼo feia mo Siliusi,+ mo Taliusi+ pea mo Aletasese+ te Hau ʼo Pelesia. 15 Neʼe ʼosi leva te laga ʼo te fale lotu ʼi te tolu ʼaho ʼo te mahina ʼo Atale,* ʼi te ono taʼu ʼo te pule ʼa te Hau ko Taliusi.

16 Pea neʼe fiafia te kau Iselaele, mo te kau pelepitelo, mo te kau Levite+ pea mo natou ʼae neʼe toe liliu mai tonatou ʼave popula ʼi te fakatapuʼi ʼo te fale lotu ʼo te ʼAtua. 17 Pea neʼe natou foaki ki te fakatapuʼi ʼo te fale lotu ʼo te ʼAtua, te ʼu vitulo ʼe 100, mo te ʼu ovi tagata ʼe 200, mo te ʼu akeno ʼe 400, pea neʼe natou foaki ki te molaga ʼo te agahala ʼo Iselaele katoa te ʼu tao tagata ʼe 12 ʼo mulimuli ki te ʼu telepi ʼo Iselaele.+ 18 Pea neʼe natou fakanofo te kau pelepitelo ʼi ʼonatou kutuga mo te kau Levite ʼi ʼanatou kalasi ke natou fakahoko te gaue ʼa te ʼAtua ʼi Selusalemi,+ ʼo mulimuli ki te meʼa ʼae ʼe tuʼu ʼi te tohi ʼa Moisese.+

19 Pea ko natou ʼae neʼe toe liliu mai tonatou ʼave popula, neʼe natou fai te Pasikate ʼi te 14 ʼaho ʼo te ʼuluaki mahina.+ 20 Neʼe fakamaʼa e te kau pelepitelo mo te kau Levite fuli ia natou totonu,+ ʼo natou maʼa fuli ai. Pea neʼe natou matehi leva ia te manu ki te Pasikate maʼa natou fuli ʼae neʼe toe liliu mai tonatou maʼuli popula, mo te kau pelepitelo ʼae neʼe gaue mo natou pea maʼa natou totonu. 21 Neʼe kai leva ki ai te kau Iselaele ʼae neʼe toe liliu mai tonatou ʼave popula, ʼo feia mo natou ʼae neʼe fakatahi age kia natou mo natou liʼaki te ʼu aga heʼe maʼa ʼo te ʼu puleʼaga ʼo te fenua kae natou tauhi leva kia* Sehova te ʼAtua ʼo Iselaele.+ 22 Neʼe natou toe fiafia ʼi te fai ʼo te ʼAho Lahi ʼo Te ʼu Pane Hala Fakatupu+ lolotoga ʼaho ʼe fitu. ʼEi, neʼe fakafiafiaʼi natou e Sehova, pea neʼe ina uga te loto ʼo te hau ʼo Asilia ke agalelei+ mo tokoni kia natou* ʼi te fakahoko ʼo te gaue ʼo te fale lotu ʼo te ʼAtua moʼoni, te ʼAtua ʼo Iselaele.

7 Hili ʼaia, lolotoga te pule ʼa Aletasese+ te Hau ʼo Pelesia, neʼe toe liliu leva ia Esetalasi.*+ Neʼe ko te foha ʼo Selasa,+ foha ʼo Asalia, foha ʼo Ilekisa,+ 2 foha ʼo Salume, foha ʼo Satoke, foha ʼo Ahitupe, 3 foha ʼo Amalia, foha ʼo Asalia,+ foha ʼo Melasote, 4 foha ʼo Selakesa, foha ʼo Usi, foha ʼo Puki, 5 foha ʼo Apisua, foha ʼo Fineasi,+ foha ʼo Eleasale,+ foha ʼo Alone+ te pelepitelo pule. 6 Neʼe mavae ia te Esetalasi ʼaia mai Papiloni. Neʼe ko he tagata hiki tohi* pea neʼe ina iloʼi lelei* te Lao ʼa Moisese,+ ʼae neʼe foaki e Sehova te ʼAtua ʼo Iselaele. Neʼe foaki e te hau te ʼu meʼa fuli pe ʼae neʼe ina kole age koteʼuhi neʼe nofo te nima ʼo Sehova tona ʼAtua mo ia.

7 Ko ʼihi ʼi te kau Iselaele, mo te kau pelepitelo, mo te kau Levite,+ mo te kau hiva,+ mo te kau tagata leʼo matapa,+ pea mo te kau tagata faifekau ʼo te fale lotu,*+ neʼe natou hake leva ki Selusalemi ʼi te fitu taʼu ʼo te pule ʼa te Hau ko Aletasese. 8 Pea neʼe haʼu ia Esetalasi ki Selusalemi ʼi te nima mahina, ʼi te fitu taʼu ʼo te pule ʼa te hau. 9 ʼI te ʼuluaki ʼaho ʼo te ʼuluaki mahina, neʼe faifagona mai Papiloni, pea neʼe tau ki Selusalemi ʼi te ʼuluaki ʼaho ʼo te nima mahina, koteʼuhi neʼe nofo te nima ʼo tona ʼAtua mo ia.+ 10 Neʼe teuteuʼi e Esetalasi tona loto* ke ina vakavakaʼi te Lao ʼa Sehova mo maʼuliʼi,+ pea ke ina akoʼi ʼi Iselaele te ʼu fakatotonu mo te ʼu fakamau ʼo te lao ʼaia.+

11 Koʼeni he hiki ʼo te tohi ʼae neʼe fakatoʼo e te Hau ko Aletasese kia Esetalasi te pelepitelo mo tagata hiki tohi,* ʼae neʼe poto ʼi te ako* ʼo te ʼu fakatotonu ʼae neʼe foaki e Sehova ki Iselaele:

12 * “Ko au, Aletasese,+ hau ʼo te ʼatu hau, kia Esetalasi te pelepitelo mo tagata hiki* ʼo te Lao ʼa te ʼAtua ʼo te ʼatu lagi: Ke nofo mo koe te tokalelei. 13 Neʼe au fai te fakatotonu ʼaeni: Ko natou fuli ʼo te hahaʼi ʼo Iselaele ʼae ʼi toku puleʼaga, mo ʼanatou pelepitelo pea mo ʼanatou Levite ʼae ʼe natou fia olo mo koe ki Selusalemi, ke natou olo mo koe.+ 14 Koteʼuhi ʼe fekauʼi koe e te hau mo ʼana tagata faitokoni ʼe toko fitu ke ke vakaʼi pe ʼe maʼuliʼi ʼi Suta pea mo Selusalemi te Lao ʼo tou ʼAtua, ʼae ʼe ke nofo mo ia,* 15 pea ke toʼo mo koe te siliva mo te aulo ʼae neʼe foaki e te hau mo ʼana tagata faitokoni ʼaki he lotolelei ki te ʼAtua ʼo Iselaele, ʼae ʼe tuʼu tona nofoʼaga ʼi Selusalemi, 16 ʼo feia mo te siliva mo te aulo fuli ʼae ʼe foaki atu* anai ʼi te potu fenua katoa ʼo Papiloni, pea mo te ʼu meʼa ʼofa ʼae ka foaki atu e te hahaʼi mo te kau pelepitelo ʼaki he lotolelei ki te fale ʼo tonatou ʼAtua, ʼae ʼe tuʼu ʼi Selusalemi.+ 17 Pea ke foimo totogi ʼaki te falā ʼaia he ʼu vitulo,+ mo he ʼu ovi tagata,+ mo he ʼu akeno,+ mo he ʼu molaga meʼa kai+ mo meʼa inu,+ pea ke momoli ʼi te ʼaletale ʼo te fale ʼo tou ʼAtua ʼi Selusalemi.

18 “Pea ko koe mo ʼou tehina, ʼe kotou fai anai ʼaki te toe ʼo te siliva mo te aulo te meʼa ʼae ʼe kotou sisio anai ʼe ʼaoga ke fai ʼo mulimuli pe ki te finegalo ʼo tokotou ʼAtua. 19 Pea ko te ʼu meʼa fuli ʼae ʼe foaki atu ki te gaue ʼo te fale lotu ʼo tou ʼAtua, ke ke ʼave kia muʼa ʼo te ʼAtua ʼi Selusalemi.+ 20 ʼE ke toʼo anai ʼi te ʼu koloa ʼo te hau he tahi ʼu meʼa ʼe ʼaoga ki te fale ʼo tou ʼAtua, ia te ʼu meʼa ʼae ʼe tonu ke ke foaki.+

21 “Ko au, Aletasese te Hau, neʼe au fai te fakatotonu ʼaeni ki te kau tagata pule koloa fuli ʼo te ʼu fenua ʼae ʼI Te Tahi Faʼahi ʼo Te Vai Tafe:* Ko he meʼa pe ʼe kole atu e te pelepitelo ko Esetalasi,+ te tagata hiki* ʼo te Lao ʼa te ʼAtua ʼo te ʼatu lagi, ke kotou foimo fakahoko, 22 ʼo kaku kia taleta* siliva ʼe 100, mo fua kole* fulumeto ʼe 100, mo fua pate* vino ʼe 100,+ mo fua pate lolo ʼe 100+ pea mo ni tuʼuga masima.+ 23 Pea ko he fakatotonu pe ʼe fai e te ʼAtua ʼo te ʼatu lagi, ʼe tonu ke fakahoko ʼaki he faʼafai ki te fale ʼo te ʼAtua ʼo te ʼatu lagi,+ ke mole to ai tona hauhau ki te puleʼaga ʼo te hau mo ʼona foha.+ 24 Pea ʼe toe fakaha atu foki ʼe mole tonu ke fakamaʼua ki te kau pelepitelo, mo te kau Levite, mo te kau faimaholo,+ mo te kau tagata leʼo matapa, mo te kau tagata faifekau ʼo te fale lotu,*+ pea mo te kau gaue ʼo te fale ʼaia ʼo te ʼAtua, ke natou totogi te ʼu tukuhau.*+

25 “Pea ko koe, Esetalasi, ke ke fakanofo he kau tagata ʼo te lao mo he kau tuʼi fakamau ʼo mulimuli ki te poto ʼae ʼe ke maʼu mai tou ʼAtua,* ke natou fakamauʼi te hahaʼi fuli ʼo te ʼu fenua ʼae ʼI Te Tahi Faʼahi ʼo Te Vai Tafe, ia natou fuli ʼae ʼe natou iloʼi te ʼu lao ʼo tou ʼAtua. Pea ʼe tonu ke kotou akoʼi te ʼu lao ʼaia kia natou ʼae ʼe mole natou iloʼi.+ 26 Pea ko he tahi pe ʼe mole mulimuli ki te Lao ʼo tou ʼAtua mo te lao ʼa te hau ʼe tonu ke foimo tauteaʼi ia ia, peʼe matehi, peʼe kapu, peʼe ke ina totogi he tukuhau, peʼe ke pilisoniʼi.”

27 Ke vikiʼi ia Sehova te ʼAtua ʼo ʼatatou kui, ʼae neʼe ina tuku ki te loto ʼo te hau te manatu ʼae ke fakamataleleiʼi te fale lotu ʼo Sehova ʼi Selusalemi!+ 28 Pea neʼe ina fakaha tona ʼofa agatonu kia au ia muʼa ʼo te hau,+ mo ʼana tagata faitokoni+ pea mo te kau ʼaliki malolohi fuli ʼa te hau. Neʼe au lototoʼa ai* koteʼuhi neʼe nofo te nima ʼo Sehova toku ʼAtua mo au, pea neʼe au fakatahiʼi leva he kau tagata takitaki Iselaele ke natou hake mo au.

8 Pea koʼeni te ʼu pule famili mo te ʼu higoa ʼo te ʼu famili ʼae neʼe mavae mo au mai Papiloni lolotoga te pule ʼa te Hau ko Aletasese:+ 2 ʼi te ʼu foha ʼo Fineasi+ ko Kelesomi, ʼi te ʼu foha ʼo Itamale+ ko Taniela, ʼi te ʼu foha ʼo Tavite ko Atuse, 3 ʼi te ʼu foha ʼo Sekania, ʼi te ʼu foha ʼo Paleoke, ko Sakalia, neʼe fakatahi mo ia te ʼu tagata ʼe toko 150 ʼae neʼe tohi ʼonatou higoa, 4 ʼi te ʼu foha ʼo Pakate-moape,+ ko Elieonai te foha ʼo Selakesa, neʼe fakatahi mo ia te ʼu tagata ʼe toko 200, 5 ʼi te ʼu foha ʼo Satu,+ ko Sekania te foha ʼo Sakasiele, neʼe fakatahi mo ia te ʼu tagata ʼe toko 300, 6 ʼi te ʼu foha ʼo Atine,+ ko Epeti te foha ʼo Sonatane, neʼe fakatahi mo ia te ʼu tagata ʼe toko 50, 7 ʼi te ʼu foha ʼo Elame,+ ko Iesaia te foha ʼo Atelia, neʼe fakatahi mo ia te ʼu tagata ʼe toko 70, 8 ʼi te ʼu foha ʼo Sefatia,+ ko Sepatesa te foha ʼo Mikaele, neʼe fakatahi mo ia te ʼu tagata ʼe toko 80, 9 ʼi te ʼu foha ʼo Soape, ko Apetiasi te foha ʼo Sehiele, neʼe fakatahi mo ia te ʼu tagata ʼe toko 218, 10 ʼi te ʼu foha ʼo Pani, ko Selomita te foha ʼo Sosifia, neʼe fakatahi mo ia te ʼu tagata ʼe toko 160, 11 ʼi te ʼu foha ʼo Pepai,+ ko Sakalia te foha ʼo Pepai, neʼe fakatahi mo ia te ʼu tagata ʼe toko 28, 12 ʼi te ʼu foha ʼo Asekate,+ ko Seonane te foha ʼo Akatane, neʼe fakatahi mo ia te ʼu tagata ʼe toko 110, 13 ʼi te ʼu foha ʼo Atonikame,+ natou ʼae neʼe olo fakamuli, koʼeni ʼonatou higoa: ko Elifeleti, mo Seiele pea mo Semaea, neʼe fakatahi mo natou te ʼu tagata ʼe toko 60, 14 pea ʼi te ʼu foha ʼo Pikevai,+ ko Utai mo Sapute, neʼe fakatahi mo naua te ʼu tagata ʼe toko 70.

15 Neʼe au fakatahiʼi leva natou ʼi te vaʼe vai tafe ʼae ʼe tafe ki Ahava,+ ʼo matou nonofo ai ʼaho ʼe tolu. Kae ʼi taku vakavakaʼi te hahaʼi mo te kau pelepitelo, neʼe mole au maʼu ai he Levite. 16 Koia, neʼe au fekauʼi ke ʼomai te ʼu tagata takitaki ko Eliesele, mo Aliele, mo Semaea, mo Elenatane, mo Salipe, mo Elenatane, mo Natane, mo Sakalia mo Mesulame pea mo te ʼu tagata faiako ko Sosalipe mo Elenatane. 17 Neʼe au foaki age leva kia natou he fakatotonu ʼo ʼuhiga mo Ito, te tagata takitaki, ʼae neʼe nofo ʼi te koga meʼa ko Kasifia. Neʼe au ui age kia natou ke natou kole kia Ito mo ʼona tehina, ia te kau tagata faifekau ʼo te fale lotu* ʼae neʼe nonofo ʼi Kasifia, ke natou tuku mai he kau gaue ki te fale lotu ʼo tomatou ʼAtua. 18 Mai tona aluʼaga ʼae neʼe nofo te nima ʼo tomatou ʼAtua mo matou, koia neʼe natou tuku mai ai he tagata poto mai te ʼu foha ʼo Makeli,+ te mokopuna ʼo Levi, te foha ʼo Iselaele, ko tona higoa ko Selepea,+ neʼe fakatahi mo ia ʼona foha mo ʼona tehina, te ʼu tagata ʼe toko 18, 19 pea mo Asapea, neʼe fakatahi mo ia ia Iesaia mai te kau Melali,+ mo ʼona tehina mo ʼonatou foha, ko te ʼu tagata ʼe toko 20. 20 Pea ʼi te kau tagata faifekau ʼo te fale lotu* ʼae neʼe tuku e Tavite mo te kau ʼaliki ke gaue maʼa te kau Levite, neʼe ko tagata ʼe toko 220, neʼe hinoʼi ia natou fuli ʼaia ʼi ʼonatou higoa.

21 Pea neʼe au tala leva ke fai he sesunio ʼi te vai tafe ko Ahava, ke matou fakamalalo ifo ia muʼa ʼo tomatou ʼAtua, mo kole ke ina takitaki matou ʼi tamatou faifagona mo puipui matou, mo ʼamatou fanau pea mo ʼomatou koloa fuli. 22 Neʼe au ufiufi ʼi te kole age ki te hau he kau solia pea mo he kau tagata heka hosi ke natou puipui matou mai te ʼu fili ʼi tamatou faifagona, he neʼe matou ui ki te hau: “ ʼE nofo te nima ʼo tomatou ʼAtua mo natou fuli ʼae ʼe natou kumi ia ia,+ kae ʼe to anai tona malohi mo tona hauhau kia natou fuli ʼae ʼe natou liʼaki ia ia.”+ 23 Neʼe matou sesunio ai mo faikole ki tomatou ʼAtua ʼo ʼuhiga mo te faʼahi ʼaia, pea neʼe fagono mai ki tamatou kole.+

24 Pea ʼi te kau takitaki ʼo te kau pelepitelo, neʼe au tuku keheʼi te toko 12, neʼe ko Selepea mo Asapea,+ mo ʼonā tehina ʼe toko hogofulu. 25 Neʼe au fua leva mo foaki age kia natou te siliva, mo te aulo mo te ʼu meʼa kehekehe. Ko te ʼu meʼa ʼofa ʼaia neʼe foaki ki te fale lotu ʼo tomatou ʼAtua e te hau, mo ʼana tagata faitokoni, mo tana kau ʼaliki pea mo te kau Iselaele fuli ʼae neʼe nonofo ʼi ai.+ 26 Neʼe au fua mo fakatoʼo age kia natou te ʼu taleta* siliva ʼe 650, mo te ʼu meʼa neʼe fai ʼaki te siliva ʼe 100 ko tona fakafuafua ko taleta ʼe 2, mo te ʼu taleta aulo ʼe 100, 27 mo he ʼu kiʼi ipu aulo ʼe 20 ko tona fakafuafua ko taleke* ʼe 1 000, mo te ʼu meʼa ʼe 2 neʼe fai ʼaki te kapa neʼe gigila pea neʼe maʼuhiga ohage ko te aulo.

28 Neʼe au ui leva kia natou: “ ʼE kotou maʼoniʼoni kia Sehova,+ pea ʼe taputapu mo te ʼu faʼahiga meʼa kehekehe ʼaeni, pea ko te siliva mo te aulo ʼe ko he ʼu meʼa ʼofa maʼa Sehova te ʼAtua ʼo ʼakotou kui. 29 Kotou tokakaga fakalelei ki ai ʼo kaku ki takotou fua te ʼu meʼa ʼaia ia muʼa ʼo te kau takitaki ʼo te kau pelepitelo mo te kau Levite, mo te kau ʼaliki ʼo te ʼu famili ʼo Iselaele ʼae ʼi Selusalemi,+ ʼi te ʼu koga fale* ʼo te fale ʼo Sehova.” 30 Pea neʼe toʼo ai leva e te kau pelepitelo mo te kau Levite te siliva, mo te aulo pea mo te ʼu meʼa kehekehe ʼae neʼe fua mo foaki age ke natou ʼave ki Selusalemi ki te fale lotu ʼo tomatou ʼAtua.

31 Neʼe matou mavae leva ʼi te vai tafe ko Ahava+ ʼi te 12 ʼaho ʼo te ʼuluaki mahina,+ ʼo matou olo ai ki Selusalemi. Pea neʼe nofo te nima ʼo tomatou ʼAtua mo matou, neʼe ina haofaki matou mai te nima ʼo te ʼu fili pea mo te hahaʼi ʼae neʼe fenonoʼi ke natou ʼohofi matou ʼi te ala. 32 Neʼe matou tau leva ki Selusalemi+ ʼo matou nonofo ai ʼaho ʼe tolu. 33 Pea ʼi te fa ʼaho, neʼe matou fua leva te siliva mo te aulo pea mo te ʼu meʼa kehekehe ʼi te fale ʼo tomatou ʼAtua.+ Neʼe matou fakatoʼo age leva kia Melemote+ te foha ʼo Ulisa te pelepitelo, mo Eleasale te foha ʼo Fineasi, neʼe fakatahi mo naua te ʼu Levite, ia Sosapate+ te foha ʼo Sesua pea mo Noatia te foha ʼo Pinui.+ 34 Neʼe lau mo fua ia meʼa fuli, pea neʼe tohi leva te mamafa ʼo te ʼu meʼa fuli ʼaia. 35 Ko natou ʼae neʼe toe liliu mai tonatou maʼuli popula, ia natou ʼae neʼe fakaʼaunofo, neʼe natou momoli leva he ʼu holokoseta ki te ʼAtua ʼo Iselaele. Neʼe ko vitulo ʼe 12+ maʼa Iselaele katoa, mo te ʼu ovi tagata ʼe 96,+ mo te ʼu akeno tagata ʼe 77. Neʼe natou foaki ki te molaga ʼo te agahala te ʼu tao tagata ʼe 12.+ Ko te ʼu meʼa fuli ʼaia neʼe ko he holokoseta neʼe momoli kia Sehova.+

36 Neʼe matou foaki leva te ʼu lao ʼa te hau+ ki te kau pule taki* ʼa te hau mo te ʼu kovana ʼo te ʼu fenua ʼae ʼI Te Tahi Faʼahi ʼo Te Vai Tafe.*+ Pea neʼe natou tokoni leva ki te hahaʼi mo foaki te ʼu meʼa ʼae neʼe ʼaoga ki te fale lotu ʼo te ʼAtua moʼoni.+

9 Pea ʼi te ʼosi pe ʼo te fai ʼo te ʼu meʼa ʼaia, neʼe fakaovi mai te kau ʼaliki ʼo ui: “Ko te hahaʼi ʼo Iselaele, mo te kau pelepitelo mo te kau Levite neʼe mole natou mavae kehe mai te hahaʼi ʼo te ʼu fenua pea mo ʼanatou aga fakalialia,+ te ʼu aga ʼa te kau Kanaane, mo te kau Heti, mo te kau Pelesite, mo te kau Sepusi, mo te kau Amone, mo te kau Moape, mo te kau Esipito,+ pea mo te kau Amole.+ 2 Neʼe natou toʼo ʼihi ʼo ʼonatou ʼofafine maʼa natou pea mo ʼonatou foha, ke natou ʼohoanaʼi.+ Koia, ko natou, ia te hakoga maʼoniʼoni,+ kua natou fio mo te hahaʼi ʼo te ʼu fenua ʼaia.+ Pea neʼe ʼuluaki fai te aga heʼe agatonu ʼaia e te kau ʼaliki mo te kau pule.”

3 ʼI taku logo ki te faʼahi ʼaia, neʼe au haeʼi ʼoku kofu, neʼe au fusi ʼoku fuluʼi ʼulu mo toku kava pea neʼe au nofo leva ki lalo ʼuhi ko te lahi ʼo toku mamahi. 4 Neʼe fakatahi mai leva kia au ia natou fuli ʼae neʼe fakaʼapaʼapa ki* te ʼu folafola ʼa te ʼAtua ʼo Iselaele, ʼuhi ko te aga heʼe agatonu ʼa te hahaʼi ʼae neʼe ʼave popula. Kae neʼe au nofo ʼi lalo ʼuhi ko toku mamahi ʼo kaku ki te molaga meʼa kai ʼo te afiafi.+

5 Pea ʼi te temi ʼo te molaga meʼa kai ʼo te afiafi,+ ʼi taku ʼosi fakamalaloʼi ia au totonu, neʼe au tuʼu ake leva. Neʼe kua mahae ʼoku kofu, pea neʼe au tuʼutuli ifo ʼo hiki ʼoku nima kia Sehova toku ʼAtua. 6 Pea neʼe au ui: “Siʼoku ʼAtua, ʼe au ufiufi ʼi te haga atu kia te koe, siʼoku ʼAtua, he ʼe kua lahi ʼamatou hala ʼo fakalaka ʼi ʼomatou ʼulu pea kua kaku ʼamatou agahala ki te ʼatu lagi.+ 7 Talu mai te temi ʼo ʼamatou kui ʼo kaku mai ki te temi nei, kua lahi ʼosi ʼamatou agahala.+ Pea ʼuhi ko ʼamatou lakahala, neʼe tuku matou mo ʼomatou hau, mo ʼamatou pelepitelo ki te ʼu nima ʼo te ʼu hau ʼo te ʼu fenua. Neʼe matou mamate ʼi te heleta,+ neʼe matou maʼuli popula,+ neʼe kaihaʼa matou,+ mo fakalainoaʼi matou, ohage ko te meʼa ʼae ʼe hoko ia ʼaho nei.+ 8 Kae lolotoga he kiʼi temi nounou, neʼe fakaha mai e Sehova tomatou ʼAtua tona ʼofa ʼi tana tuku ke hao he toe ʼo tana hahaʼi pea mo foaki mai he nonoʼaga ʼi tona potu taputapu,+ ke matou fiafia ai, siʼomatou ʼAtua, pea ke toe fakamaʼuli matou mai tomatou maʼuli haʼisia. 9 Koteʼuhi logo la ʼe matou kaugana,+ kae neʼe mole liʼaki matou e tomatou ʼAtua ʼi tomatou maʼuli haʼisia ʼaia. Kae neʼe ina fakaha mai kia matou tona ʼofa agatonu ia muʼa ʼo te ʼu hau ʼo Pelesia,+ ʼo ina fakamaʼuli matou ke matou toe fakatuʼu te fale ʼo tomatou ʼAtua+ ʼae kua maumau, pea neʼe ina foaki mai he kaupa maka* ʼi Suta pea mo Selusalemi.

10 “Kae hili te faʼahi ʼaia, kotea ʼae ʼe feala ke matou ui, siʼomatou ʼAtua? Koteʼuhi neʼe matou liʼaki ʼau fakatotonu, 11 ʼae neʼe ke foaki mai ʼaki ʼau kaugana te kau polofeta, ʼo ui: ‘Ko te fenua ʼae ka kotou olo ʼo toʼo maʼa koutou, ʼe ko he fenua ʼe heʼe maʼa koteʼuhi ʼe heʼe maʼa te hahaʼi ʼo te ʼu fenua ʼuhi ko ʼanatou aga fakalialia. Pea kua fonu ai te fenua ʼi ʼanatou aga heʼe maʼa mai ʼae potu ki ʼae potu.+ 12 Koia, ʼaua naʼa kotou foaki ʼokotou ʼofafine maʼa ʼonatou foha, peʼe kotou tali ʼonatou ʼofafine maʼa ʼokotou foha.+ Pea ʼe mole tonu ke kotou faiga ke natou maʼuli fimalie mo maʼu koloa,+ ke feala foki hakotou liliu ʼo malolohi mo kai te lelei ʼo te fenua pea ke maʼu e ʼokotou foha te fenua ʼo talu ai.’ 13 Pea ʼi te kua ʼosi hoko ʼo te ʼu meʼa fuli ʼaia kia matou ʼuhi ko ʼamatou aga ʼae ʼe kovi pea mo te lahi ʼo ʼamatou agahala, (kae neʼe mole ke tauteaʼi matou, siʼomatou ʼAtua, ʼo mulimuli ki ʼamatou agahala,+ neʼe ke fakagafua ke hao ia matou ʼae ʼi heni+) 14 ʼe matou toe talagataʼa anai koa ki ʼau fakatotonu pea mo ʼohoanaʼi te hahaʼi ʼae ʼe natou fai te ʼu aga fakalialia ʼaia?+ ʼE mole ke ita lahi anai koa, ʼo fakaʼauha fuli ia matou, ʼo mole hao ai he tahi? 15 Sehova e, te ʼAtua ʼo Iselaele, ʼe ke faitotonu+ he ʼe kei maʼuʼuli ʼihi ia matou ʼi te ʼaho nei. Koʼeni matou ʼi ʼou muʼa, ko ni tagata agahala, koteʼuhi ʼe mole feala hamatou tutuʼu ʼi ʼou muʼa ʼuhi ko te faʼahi ʼaia.”+

10 Lolotoga te faikole ʼa Esetalasi+ mo tana vetevete te ʼu agahala ʼo tana hahaʼi, mo tagi pea mo tulolo ia muʼa ʼo te fale lotu ʼo te ʼAtua moʼoni, neʼe kaugamalie te hahaʼi tagata, mo fafine, mo te ʼu fanau ʼo Iselaele neʼe fakatahi age kia ia. Neʼe natou fetagihi fuli. 2 Neʼe ui leva e Sekania, te foha ʼo Sehiele,+ ʼi te ʼu foha ʼo Elame,+ kia Esetalasi: “Neʼe matou heʼe agatonu ki tomatou ʼAtua ʼuhi ko tamatou ʼohoanaʼi* he ʼu fafine matapule mai te hahaʼi ʼo te fenua.+ Kae logo la te faʼahi ʼaia, ʼe kei ʼi ai pe he ʼamanaki ki Iselaele. 3 Koia tou fai ʼi te lakaga nei he fuakava mo totatou ʼAtua,+ ke tou fakaliliu te ʼu fafine ʼohoana fuli ʼaia mo ʼanatou fanau, ʼo mulimuli ki te takitaki ʼa Sehova pea mo natou ʼae ʼe fakaʼapaʼapa ki* te fakatotonu ʼo totatou ʼAtua.+ Tou fai ʼo mulimuli ki te Lao. 4 Tuʼu ake, he ʼe ko tou maʼua, pea ʼe matou kau mo koe. Lotomalohi ʼo fai tou maʼua.”

5 Neʼe tuʼu ake ai ia Esetalasi pea ina fakatotonu ki te kau takitaki ʼo te kau pelepitelo, mo te kau Levite mo Iselaele katoa ke natou fakapapau ʼe natou fakahoko anai te tonu ʼae neʼe fai.+ Neʼe natou fai ai he fakapapau. 6 Neʼe mavae leva ia Esetalasi ia muʼa ʼo te fale lotu ʼo te ʼAtua moʼoni ʼo alu ki te fale kai ʼo Sokanane te foha ʼo Eliasipe, ʼae ʼi te fale lotu. Pea logo la neʼe alu ki te fale kai, kae neʼe mole kai mo inu ki hana moʼi vai, he neʼe lotomamahi ʼuhi ko te heʼe agatonu ʼa te hahaʼi ʼae neʼe ʼave popula.+

7 Neʼe logologo leva ʼi Suta pea mo Selusalemi katoa ke fakatahitahi ki Selusalemi ia natou fuli ʼae neʼe toe liliu mai tonatou maʼuli popula. 8 Pea ʼo mulimuli ki te tonu ʼae neʼe fai e te kau ʼaliki mo te kau takitaki, ko he tahi pe neʼe mole alu hili ki ai ʼaho ʼe tolu, ʼe toʼo anai ʼona koloa fuli pea ʼe fakamavae anai ia ia mai te hahaʼi ʼae neʼe ʼave popula.+ 9 Koia hili te ʼu ʼaho ʼe tolu, neʼe fakatahitahi ki Selusalemi te hahaʼi tagata fuli ʼo Suta mo Pesamino, ʼi te hiva mahina, ʼi te 20 ʼaho ʼo te mahina. Neʼe nonofo te hahaʼi fuli ʼi te malaʼe ʼo te fale lotu ʼo te ʼAtua moʼoni, pea neʼe natou matataku ʼuhi ko te faʼahi ʼaia pea mo mokosisia ʼuhi ko te ʼua lalahi, ʼo tupu ai tanatou tekelili.

10 Neʼe tuʼu ake leva ia Esetalasi te pelepitelo ʼo ui kia natou: “Neʼe kotou heʼe agatonu ʼi takotou ʼohoanaʼi he ʼu fafine matapule,+ pea neʼe kotou fakaʼaʼasili ai te agahala ʼa Iselaele. 11 ʼI te temi leva ʼaeni, kotou vetevete ʼakotou agahala kia Sehova te ʼAtua ʼo ʼakotou kui pea mo kotou fai tona finegalo. Kotou mavae kehe mai te hahaʼi ʼo te fenua pea mo te ʼu fafine matapule ʼaia.”+ 12 Neʼe tali leʼo lahi e te hahaʼi fuli ʼae neʼe fakatahi: “ ʼE ko tomatou maʼua ke matou fakahoko lelei te meʼa ʼae neʼe ke palalau ki ai. 13 Kae ʼe kaugamalie te hahaʼi, ʼe ko te temi ʼua ʼaeni. ʼE mole feala hamatou tutuʼu ʼi tuʼa, pea ʼe mole fakatokatoka anai te faʼahi ʼaia ʼi he ʼaho pe ʼe tahi peʼe lua, he neʼe lahi ʼaupito tamatou agatuʼu ʼi te faʼahi ʼaia. 14 Koia, fakalelei siʼou loto, kae ke fakafofoga e tomatou kau ʼaliki ia te hahaʼi katoa.+ Pea ke ʼomai ia natou fuli ʼae ʼe ʼohoana mo he ʼu fafine matapule ʼi he ʼaho kua fakatuʼutuʼu ki ai. Ke natou ʼomai mo te kau takitaki mo te kau tuʼi fakamau ʼo te ʼu kolo takitahi, ʼo kaku ki tamatou fakamaliu kehe te hauhau ʼo tomatou ʼAtua ʼo ʼuhiga mo te faʼahi ʼaia.”

15 Kae neʼe fakafeagai ia Sonatane te foha ʼo Asaele mo Sakesia, te foha ʼo Tikeva ki te tonu ʼaia. Neʼe lagolago kia naua te ʼu tagata Levite ko Mesulame mo Sapetai.+ 16 Kae neʼe mulimuli pe ia natou ʼae neʼe toe liliu mai tonatou maʼuli popula ki te tonu ʼae neʼe fai. Pea ko te pelepitelo ko Esetalasi mo te ʼu pule famili ʼae neʼe hinoʼi fuli natou ʼi ʼonatou higoa, neʼe natou mavae kehe ʼo olo ʼo vakavakaʼi te faʼahi ʼaia ʼi te ʼuluaki ʼaho ʼo te hogofulu mahina. 17 Pea ʼi te ʼuluaki ʼaho ʼo te ʼuluaki mahina, neʼe fakaʼosi ai leva tanatou vakavakaʼi ia te aluʼaga ʼo ʼuhiga mo te hahaʼi tagata fuli, ʼae neʼe ʼohoana mo te ʼu fafine matapule. 18 Neʼe iloʼi ai neʼe ʼohoana ʼihi foha ʼo te kau pelepitelo mo he ʼu fafine matapule:+ ʼi te ʼu foha ʼo Sesua,+ te foha ʼo Seosatake mo ʼona tehina, neʼe ko Maasesa, mo Eliesele, mo Salipe, pea mo Ketalia. 19 Kae neʼe natou fakapapau ʼe natou fakaliliu anai ʼonatou ʼohoana, pea ʼe natou momoli anai he ovi tagata mai te faga ovi ko tanatou sakilifisio fakatokatoka.*+

20 ʼI te ʼu foha ʼo Imele,+ neʼe ko Hanani mo Sepatesa, 21 ’i te ’u foha ʼo Alime,+ neʼe ko Maasesa, mo Elia, mo Semaea, mo Sehiele pea mo Osiasi. 22 ʼI te ʼu foha ʼo Pasule,+ neʼe ko Elioenai, mo Maasesa, mo Isemaele, mo Netanele, mo Sosapate pea mo Eleasa. 23 ʼI te kau Levite, neʼe ko Sosapate, mo Simei, mo Kelasa (ʼae ko Kelita), mo Petasia, mo Suta pea mo Eliesele. 24 ʼI te kau hiva, neʼe ko Eliasipe, pea ʼi te kau tagata leʼo matapa, neʼe ko Salume, mo Teleme pea mo Uli.

25 Pea ʼi Iselaele, ʼi te ʼu foha ʼo Paleoke,+ neʼe ko Lamia, mo Isia, mo Malekisa, mo Misamine, mo Eleasale, mo Malekisa, pea mo Penaia, 26 ʼi te ʼu foha ʼo Elame,+ neʼe ko Matania, mo Sakalia, mo Sehiele,+ mo Apeti, mo Selemote, pea mo Elia, 27 ʼi te ʼu foha ʼo Satu,+ neʼe ko Elioenai, mo Eliasipe, mo Matania, mo Selemote, mo Sapati, pea mo Asisa, 28 ʼi te ʼu foha ʼo Pepai,+ neʼe ko Sokanane, mo Hanania, mo Sapai, pea mo Atilai, 29 ʼi te ʼu foha ʼo Pani, neʼe ko Mesulame, mo Maluke, mo Atasa, mo Sasupe, mo Seale, pea mo Selemote, 30 ʼi te ʼu foha ʼo Pakate-moape,+ neʼe ko Atana, mo Kelale, mo Penaia, mo Maasesa, mo Matania, mo Petesalele, mo Pinui, pea mo Manase, 31 ʼi te ʼu foha ʼo Alime,+ neʼe ko Eliesele, mo Sisia, mo Malekisa,+ mo Semaea, mo Simeoni, 32 mo Pesamino, mo Maluke, pea mo Semalia, 33 ʼi te ʼu foha ʼo Asume,+ neʼe ko Matenai, mo Matatea, mo Sapati, mo Elifeleti, mo Selemai, mo Manase, pea mo Simei, 34 ʼi te ʼu foha ʼo Pani, neʼe ko Maatai, mo Amilame, mo Uele, 35 mo Penaia, mo Petia, mo Kelui, 36 mo Vania, mo Melemote, mo Eliasipe, 37 mo Matania, mo Matenai, pea mo Saasai, 38 ʼi te ʼu foha ʼo Pinui, neʼe ko Simei, 39 mo Selemi, mo Natane, mo Atasa, 40 mo Makenatepai, mo Sasai, mo Saleai, 41 mo Asaleele, mo Selemi, mo Semalia, 42 mo Salume, mo Amalia, pea mo Sosefo, 43 ʼi te ʼu foha ʼo Nepo, neʼe ko Seiele, mo Matitia, mo Sapati, mo Sepina, mo Satai, mo Soele, pea mo Penaia. 44 Ko natou fuli ʼaia neʼe ʼohoana mo he ʼu fafine matapule,+ pea neʼe natou fakaliliu ʼonatou ʼohoana mo ʼonatou foha.+