NEEMIA

1 Ko te ʼu folafola ʼaeni ʼa Neemia,*+ te foha ʼo Akalia: ʼI te mahina ʼo Kiseleve,* ʼi te 20 taʼu, neʼe au nofo ʼi Suse,+ te kolo tau.* 2 Pea ʼi te temi ʼaia, neʼe ʼomai mai Suta ia Hanani,+ ko he tahi ʼo ʼoku tehina mo te tahi ʼu tagata. Pea neʼe au fakalavelave age ʼo ʼuhiga mo Selusalemi pea mo te toe ʼo te kau Sutea ʼae neʼe hao mai tonatou maʼuli popula.+ 3 Neʼe natou tali mai: “Ko natou ʼaia ʼae neʼe hao mai tonatou maʼuli popula pea ʼe nonofo ʼi te potu fenua, ʼe natou tau nei mo he aluʼaga faigataʼa pea mo fakaufiufi.+ Kua holo te ʼu kaupa ʼo Selusalemi,+ pea kua vela ʼona matapa.”+

4 ʼI taku logo ki te ʼu palalau ʼaia, neʼe au heka leva pea mo kamata tagi mo lauga lolotoga ni ʼaho, pea neʼe au sesunio+ mo faikole ia muʼa ʼo te ʼAtua ʼo te ʼatu lagi. 5 Neʼe au ui: “Sehova e, ko koe te ʼAtua ʼo te ʼatu lagi, te ʼAtua lahi mo fakamanavahe. ʼE ke fakaʼapaʼapa ki tau fuakava pea mo fakaha tou ʼofa agatonu kia natou ʼae ʼe ʼoʼofa kia te koe pea mo fakalogo ki ʼau fakatotonu.+ 6 Fakalelei siʼou loto, kae ke ke fakalogo lelei mai, mo ke sio ifo pea mo ke fagono mai ki te faikole ʼo tau tagata faifekau, ʼae ʼe faikole atu ʼi te ʼaho nei.+ ʼE au faikole atu ʼi te ʼaho mo te po, ʼo ʼuhiga mo te kau Iselaele, ʼau hahaʼi faifekau, mo vetevete atu te ʼu agahala ʼae neʼe fai e te hahaʼi ʼo Iselaele kia te koe. Neʼe matou agahala, ia au pea mo te fale ʼo taku tamai.+ 7 ʼE mahino papau ia, neʼe matou fai kia te koe te ʼu aga ʼae ʼe kovi,+ he neʼe mole matou taupau te ʼu fakatotonu, mo te ʼu lao, pea mo te ʼu fakamau ʼae neʼe ke foaki ki tau tagata faifekau ko Moisese.+

8 “Fakalelei siʼou loto, kae ke ke manatuʼi te folafola ʼaeni neʼe ke fakatotonu* ki tau tagata faifekau ko Moisese: ‘Kapau ʼe kotou heʼe agatonu, pea ʼe au fakamavetevete anai koutou ʼi te lotolotoiga ʼo te hahaʼi.+ 9 Kae kapau ʼe kotou toe liliu mai kia te au pea mo mulimuli mo fakalogo ki ʼaku fakatotonu, logo aipe pe ʼe kotou mavetevete ʼo aʼu ki te ʼu potu taupotu ʼo te kele, kae ʼe au toe fakatahiʼi anai koutou+ pea mo ʼaumai koutou ki te koga meʼa ʼae neʼe au filifili ke fakakololiaʼi ai toku huafa.’+ 10 Ko natou ko ʼau hahaʼi faifekau pea mo tau hahaʼi, ʼae neʼe ke totogi ʼaki tou mafimafi pea mo tou nima malohi.+ 11 Sehova e, fakalelei siʼou loto, kae ke ke fagono lelei mai ki te faikole ʼo tau tagata faifekau pea mo te faikole ʼo ʼau hahaʼi faifekau ʼae ʼe natou fiafia ʼi te manavasiʼi ki tou huafa. Pea fakalelei siʼou loto, kae ke ke fakafealagia ke maui mālie te aluʼaga ʼe fakahoko e tau tagata faifekau ʼi te ʼaho nei, pea ʼofa pe ke fakaha mai e te tagata ʼaeni tona manavaʼofa kia au.”+

Neʼe ko au ʼae neʼe tokaga ki te vino ʼa te hau.+

2 ʼI te mahina ʼo Nisani,* ʼi te 20 taʼu+ ʼo te pule ʼa te Hau ko Aletasese,+ neʼe tuku te vino ʼi ʼona muʼa, pea ohage ko te agamahani, neʼe au toʼo te vino ʼo foaki age ki te hau.+ Kae neʼe heʼeki ʼi ai he temi neʼe au matamamahi ai ʼi ʼona muʼa. 2 Koia neʼe ui mai ai e te hau: “He koʼe ʼe ke matamamahi kae ʼe mole ke mahaki? ʼE mahino ia ʼe mamahi tou loto.” Neʼe au mataku ʼaupito ai.

3 Neʼe au ui leva ki te hau: “Siʼoku hau, ke fua manuʼia tau ʼafio! ʼE au lotomamahi he ʼe maumau te kolo, ia te potu ʼae ʼe tanu ai ʼaku kui, pea kua vela ʼona matapa.”+ 4 Pea neʼe ui mai e te hau: “Kotea ʼae ʼe ke loto ki ai?” ʼI te moʼi temi pe ʼaia, neʼe au faikole ai ki te ʼAtua ʼo te ʼatu lagi.+ 5 Pea neʼe au tali age ki te hau: “Kapau ʼe lelei ki te hau pea kapau ʼe ke ʼofa ki tau tagata faifekau, fekauʼi au ki Suta, ki te kolo ʼae ʼe tanu ai ʼaku kui, ke au toe laga te kolo.”+ 6 Pea neʼe ui mai leva e te hau, kae nofo ʼi ʼona tafa tona fineʼaliki: “Pe ʼe fualoa anai tau faifagona, pea ʼe ke toe liliu mai anai ʼafea?” Neʼe lotolelei ai te hau ke ina fekauʼi au,+ pea neʼe au fakaha age te loaloaga ʼo taku faifagona.+

7 Pea neʼe au ui age ki te hau: “Kapau ʼe lelei ki te hau, ke foaki mai he ʼu tohi ki te ʼu kovana ʼo te ʼu fenua ʼae ʼI Te Tahi Faʼahi ʼo Te Vai Tafe,*+ ke natou tuku au ke au alu ki Suta, 8 pea mo he tohi kia Asafe, te tagata leʼo ʼo te vao matuʼa ʼo te hau, ke ina foaki mai he ʼu ʼakau ki te faʼu ʼo te ʼu matapa ʼo te Kolo Tau+ ʼo Te Fale Lotu, pea mo te ʼu kaupa ʼo te kolo,+ pea mo te fale ʼae ʼe au alu anai ki ai.” Neʼe foaki mai leva e te hau te ʼu tohi ʼaia,+ he neʼe nofo te nima ʼo toku ʼAtua mo au.+

9 Ki muli age, neʼe au alu ki te ʼu kovana ʼo te ʼu fenua ʼae ʼI Te Tahi Faʼahi ʼo Te Vai Tafe pea mo foaki kia natou te ʼu tohi ʼa te hau. Neʼe toe fekauʼi foki e te hau ke kaugā olo mo au he kau pule solia pea mo he ʼu tagata heka hosi. 10 ʼI te logo ki ai ʼa Sanepala,+ te tagata Oloni pea mo Topie,+ te tagata faifekau Amone,+ neʼe mole nā leleiʼia ke haʼu he tahi ʼo fai he meʼa ʼe lelei maʼa te hahaʼi ʼo Iselaele.

11 Neʼe au tau leva ki Selusalemi, pea neʼe au nofo ai ia ʼaho ʼe tolu. 12 Neʼe au tuʼu ake leva ʼi te poʼuli mo he ʼu tagata, kae neʼe mole au fakaha age ki he tahi te meʼa ʼae neʼe tuku e te ʼAtua ki toku loto ke au fai ʼi Selusalemi, pea neʼe mole he tahi age manu mo au, gata pe ki ʼae neʼe au heka ai. 13 Pea neʼe au alu ki tuʼa ʼi te poʼuli ʼi te Matapa ʼo Te Potu Fenua Lauveliveli,+ ʼo fakalaka ia muʼa ʼo te Matapuna Vai ʼo Te Gata Lahi ʼo alu ki te Matapa ʼo Te ʼu Tuʼuga Lefulefu.+ Pea neʼe au vakavakaʼi te ʼu kaupa ʼo Selusalemi ʼae kua maumau pea mo ʼona matapa ʼae kua vela.+ 14 Pea neʼe au fakalaka ʼi te Matapa ʼo Te Matapuna Vai+ pea mo te Maʼanuʼaga ʼo Te Hau, kae neʼe faveliveli ʼo mole feala ki te manu ʼae neʼe au heka ai ke fakalaka. 15 Kae neʼe hoko atu aipe taku hake ʼaia ʼi te poʼuli ʼi te potu fenua lauveliveli+ pea mo au haga vakavakaʼi ia te kaupa. ʼOsi ʼaia, neʼe au toe liliu mai ʼo hu ʼi te Matapa ʼo Te Potu Fenua Lauveliveli, ʼo toe liliu ai ki toku nofoʼaga.

16 Neʼe mole iloʼi e te ʼu tagata ʼae ʼe hoa ki te kau pule+ pe neʼe au alu kifea pea mo te meʼa ʼae neʼe au fai, he neʼe heʼeki au fakaha he meʼa ki te kau Sutea, mo te kau pelepitelo, mo te kau ʼaliki, mo te ʼu tagata ʼae ʼe hoa ki te kau pule pea mo te tahi kau gaue. 17 Neʼe au ui leva kia natou: “ ʼE kotou sisio ki te aluʼaga faigataʼa ʼae ʼe tau mo tatou, te kua maumau ʼo Selusalemi pea mo te vela ʼo ʼona matapa. Koia, kotou ʼomai pea ke tou toe laga te ʼu kaupa ʼo Selusalemi, ke gata te aluʼaga fakaufiufi ʼaia.” 18 Pea neʼe au fakamatala age kia natou pe neʼe nofo feafeaʼi toku ʼAtua mo au,+ pea mo au toe fakaha age te ʼu folafola ʼae neʼe fai mai e te hau.+ Neʼe natou ui ai leva: “Tou kamata gaue la!” Koia, neʼe natou fefakalotomalohiʼaki ai ia natou totonu* ke natou fai te gaue lelei ʼaia.+

19 ʼI te logo ki ai ʼa Sanepala, te tagata Oloni, mo Topie,+ te tagata faifekau Amone,+ pea mo Kesemi te tagata Alape,+ neʼe natou manukiʼi ai matou+ pea mo fakaha tanatou fehihiʼa ʼae ia matou, ʼo natou ui: “Kotea ʼae ʼe kotou fai? ʼE kotou agatuʼu koa ki te hau?”+ 20 Kae neʼe au tali age: “Ko te ʼAtua ʼo te ʼatu lagi ʼe ko Ia ʼae ka ina fakafealagia ke maui mālie te gaue,+ pea ko matou, ko ʼana hahaʼi faifekau, ʼe matou tutuʼu ake anai ʼo laga. Kae ko koutou, ʼe mole hokotou tofiʼa ʼi Selusalemi, ʼe mole feala ke kotou kole hokotou vahe pea ʼe mole kotou kau ki tona hisitolia.”+

3 Neʼe kamata laga e Eliasipe,+ te pelepitelo lahi pea mo ʼona tehina, te kau pelepitelo ia te Matapa ʼo Te ʼu Ovi.+ Neʼe natou fakamaʼoniʼoniʼi*+ pea mo fakatuʼu ʼona kaumatapa. Neʼe natou fakamaʼoniʼoniʼi te faʼahi ʼaia, ʼo kaku ki te Tule ʼo Maa,+ pea mo te Tule ʼo Ananeele.+ 2 Pea ʼi ʼonatou tafa, neʼe laga e te ʼu tagata mai Seliko,+ pea ʼi ʼonatou tafa neʼe laga e Sakule, te foha ʼo Imeli.

3 Neʼe laga e te ʼu foha ʼo Hasena ia te Matapa ʼo Te ʼu Ika.+ Neʼe natou fakatuʼu ʼona papa,+ pea mo ʼai leva ʼona kaumatapa, mo ʼona ʼakau fakamaʼu pea mo ʼona ʼakau fakalavalava. 4 Pea neʼe gaue ʼi ʼonatou tafa ia Melemote,+ te foha ʼo Ulisa, te foha ʼo Akose ki te toe faʼu ʼo te kaupa, pea neʼe gaue ʼi ʼonatou tafa ia Mesulame,+ te foha ʼo Pelekia, te foha ʼo Mesesapeele ki te toe faʼu ʼo te kaupa, pea neʼe gaue ʼi ʼonatou tafa ia Satoke, te foha ʼo Paana ki te toe faʼu ʼo te kaupa. 5 Pea neʼe gaue ʼi ʼonatou tafa te kau Tekoa+ ki te toe faʼu ʼo te kaupa, kae neʼe mole fiamalalo ifo ʼanatou tagata maʼu tuʼulaga ke natou kau ki te gaue ʼae neʼe takitaki e ʼonatou pule.

6 Neʼe toe faʼu e Sosata, te foha ʼo Paseake pea mo Mesulame, te foha ʼo Pesotia ia te Matapa ʼo Te Kolo ʼAfeā.+ Neʼe nā fakatuʼu ʼona papa, pea mo ʼai leva ʼona kaumatapa, mo ʼona ʼakau fakamaʼu pea mo ʼona ʼakau fakalavalava. 7 Neʼe gaue ʼi ʼonā tafa ia Melatia, te tagata Kipeone+ pea mo Satone, te tagata Melonote ki te toe faʼu ʼo te kaupa, ko te ʼu tagata ʼaia mai Kipeone mo Misipa+ pea neʼe puleʼi naua e te kovana ʼo te ʼu fenua ʼae ʼI Te Tahi Faʼahi ʼo Te Vai Tafe.*+ 8 Neʼe gaue ʼi ʼonā tafa ia Usiele, te foha ʼo Alasa, te tagata tufuga aulo, ki te toe faʼu ʼo te kaupa. Pea neʼe gaue ʼi ʼona tafa ia Hanania, te tagata fai lolo magoni,* ki te toe faʼu ʼo te kaupa. Pea neʼe fola te maka ʼi Selusalemi ʼo kaku ki te Kaupa Laulahi.+ 9 Pea neʼe gaue ʼi ʼonā tafa ia Lefasa, ia te foha ʼo Ulu, te ʼaliki ʼo te vaelua ʼo te koga fenua ʼo Selusalemi ki te toe faʼu ʼo te kaupa. 10 Pea neʼe gaue ʼi ʼona tafa ia Setasa, te foha ʼo Alumafe ki te toe faʼu ʼo te kaupa ʼae ʼe haga ki tona ʼapi, pea neʼe gaue ʼi ʼona tafa ia Atuse, te foha ʼo Asapenia ki te toe faʼu ʼo te kaupa.

11 Neʼe toe faʼu e Malekisa, te foha ʼo Alime+ pea mo Asupe, te foha ʼo Pakate-moape+ he tahi faʼahi ʼo te kaupa, ʼo toe feia mo te Tule ʼo Te ʼu Gutuʼumu.+ 12 Pea ʼi ʼonā tafa, ko Salume, te foha ʼo Alosese, te ʼaliki ʼo te vaelua ʼo te koga fenua ʼo Selusalemi, neʼe gaue fakatahi mo ʼona ʼofafine ki te toe faʼu ʼo te kaupa.

13 Neʼe toe faʼu e Hanune pea mo te hahaʼi mai Sanoaki+ ia te Matapa ʼo Te Potu Fenua Lauveliveli.+ Neʼe natou laga pea mo ʼai leva ʼona kaumatapa, mo ʼona ʼakau fakamaʼu pea mo ʼona ʼakau fakalavalava. Neʼe natou toe faʼu te kaupa ʼo kaku ki te Matapa ʼo Te ʼu Tuʼuga Lefulefu, neʼe fasiga nima 1 000.*+ 14 Neʼe toe faʼu ia te Matapa ʼo Te ʼu Tuʼuga Lefulefu e Malekisa, te foha ʼo Lekape, te ʼaliki ʼo te koga fenua ʼo Pete-akelemi.+ Neʼe ina laga pea mo ʼai leva ʼona kaumatapa, mo ʼona ʼakau fakamaʼu pea mo ʼona ʼakau fakalavalava.

15 Neʼe toe faʼu e Salune, te foha ʼo Koleose, te ʼaliki ʼo te koga fenua ʼo Misipa,+ ia te Matapa ʼo Te Matapuna Vai.+ Neʼe ina laga mo ʼato, pea mo ʼai leva ʼona kaumatapa, mo ʼona ʼakau fakamaʼu pea mo ʼona ʼakau fakalavalava. Neʼe ina toe faʼu te kaupa ʼo te Maʼanuʼaga+ ʼo Te Tafega Vai, ia tafa ʼo te ʼOloto ʼo Te Hau,+ ʼo kaku ki te Mata Tuʼuga+ ʼae ʼe hifo mai te Kolo ʼo Tavite.+

16 Neʼe gaue ʼi ʼona tafa ia Neemia, te foha ʼo Asepuke, te ʼaliki ʼo te vaelua ʼo te koga fenua ʼo Pete-tesuli,+ ki te toe faʼu ʼo te kaupa ʼae ʼe haga ki te ʼu Tanuma ʼo Tavite,+ ʼo kaku ki te maʼanuʼaga+ ʼae neʼe laga pea ki te Fale ʼo Te Kau Malolohi.

17 Pea neʼe gaue ʼi ʼona tafa ki te toe faʼu ʼo te kaupa ia te kau Levite: ko Leume, te foha ʼo Pani, pea neʼe gaue ʼi ʼona tafa ia Asapea, te ʼaliki ʼo te vaelua ʼo te koga fenua ʼo Keila+ ki te toe faʼu ʼo te kaupa ki tona koga fenua. 18 Pea neʼe gaue ʼi ʼona tafa ʼonatou tehina ki te toe faʼu ʼo te kaupa: ko Pavai, te foha ʼo Enatate, te ʼaliki ʼo te vaelua ʼo te koga fenua ʼo Keila.

19 Pea neʼe gaue ʼi ʼona tafa ia Esele, te foha ʼo Sesua,+ te ʼaliki ʼo Misipa ki te toe faʼu ʼo te tahi faʼahi ʼo te kaupa ʼae neʼe haga ki te hake ʼae ki te Fale ʼo Te ʼu Mahafu Tau, ʼi te Pou Lalago.+

20 Neʼe gaue malohi ʼi ʼona tafa ia Paluke, te foha ʼo Sapai+ ki te toe faʼu ʼo te tahi faʼahi ʼo te kaupa, mai te Pou Lalago ʼo kaku ki te huʼaga ʼo te fale ʼo Eliasipe,+ te pelepitelo lahi.

21 Neʼe gaue ʼi ʼona tafa ia Melemote,+ te foha ʼo Ulisa, te foha ʼo Akose ki te toe faʼu ʼo te tahi faʼahi ʼo te kaupa, mai te huʼaga ʼo te fale ʼo Eliasipe ʼo kaku ki te gataʼaga ʼo tona fale.

22 Pea neʼe gaue ʼi ʼona tafa te kau pelepitelo, te ʼu tagata ʼo te koga fenua ʼo te Solotane,*+ ki te toe faʼu ʼo te kaupa. 23 Neʼe gaue ʼi ʼonatou tafa ia Pesamino mo Asupe ki te toe faʼu ʼo te kaupa ʼae neʼe haga ki tonā ʼapi. Pea neʼe gaue ʼi ʼonā tafa ia Asalia, te foha ʼo Maasesa, te foha ʼo Anania ki te toe faʼu ʼo te kaupa, ʼae ʼe ovi ki tona ʼapi. 24 Pea neʼe gaue ʼi ʼona tafa ia Pinui, te foha ʼo Enatate ki te toe faʼu ʼo te tahi faʼahi ʼo te kaupa, mai te fale ʼo Asalia ʼo kaku ki te Pou Lalago,+ pea ki te tuliki.

25 Neʼe gaue ʼi ʼona tafa ia Palale, te foha ʼo Usae ki te toe faʼu ʼo te kaupa ʼae neʼe haga ki te Pou Lalago pea mo te tule ʼae neʼe pipiki ki te Fale Hau,+ te tule ʼae ʼi ʼoluga pea ʼe tuʼu ʼi te Malaʼe ʼo Te Kau Leʼo.+ Pea neʼe gaue ʼi ʼona tafa ia Petasa, te foha ʼo Paleoke.+

26 Pea neʼe gaue te kau tagata faifekau ʼo te fale lotu,*+ ʼae neʼe nonofo ʼi Ofeli+ ki te toe faʼu ʼo te kaupa ʼo kaku ki te muʼa Matapa ʼo Te ʼu Vai+ ʼae ʼi te potu esite pea mo te tule ʼae neʼe fakalaka ʼi te tuʼa kaupa.

27 Neʼe gaue te kau Tekoa+ ki te toe faʼu ʼo te tahi faʼahi ʼo te kaupa, ʼae neʼe haga ki te tule lahi ʼae neʼe fakalaka ʼi te tuʼa kaupa ʼo kaku ki te kaupa ʼo Ofeli.

28 Neʼe gaue te kau pelepitelo ki te toe faʼu ʼo te kaupa ʼae ʼi ʼoluga ʼo te Matapa ʼo Te ʼu Hosi,+ ʼo tahi haga ki tona ʼapi.

29 Neʼe gaue ʼi ʼonatou tafa ia Satoke,+ te foha ʼo Imele ki te toe faʼu ʼo te kaupa ʼae neʼe haga ki tona ʼapi.

Pea neʼe gaue ʼi ʼona tafa ki te toe faʼu ʼo te kaupa ia Semaea, te foha ʼo Sekania, te tagata leʼo ʼo te Matapa Esite.+

30 Neʼe gaue ʼi ʼona tafa ki te toe faʼu ʼo te tahi faʼahi ʼo te kaupa ia Hanania, te foha ʼo Selemi, pea mo Hanune, te tuʼulaga ono ʼo te ʼu foha ʼo Tesalafe.

Pea neʼe gaue ʼi ʼona tafa ia Mesulame,+ te foha ʼo Pelekia ki te toe faʼu ʼo te kaupa ʼae ʼi tona muʼa fale.*

31 Neʼe gaue ʼi ʼona tafa ia Malekisa, ʼae neʼe kau ʼi te kau tagata tufuga aulo, ki te toe faʼu ʼo te kaupa ʼo kaku ki te fale ʼo te kau tagata faifekau ʼo te fale lotu*+ pea mo te kau faikoloa, ia muʼa ʼo te Matapa ʼo Te ʼu Sivi pea ʼo kaku ki te koga fale fata ʼo te tuliki.

32 Pea ʼi te vaha ʼo te koga fale fata ʼo te tuliki pea mo te Matapa ʼo Te ʼu Ovi,+ neʼe gaue ai ki te toe faʼu ʼo te kaupa te kau tagata tufuga aulo pea mo te kau faikoloa.

4 Pea ʼi te logo ʼa Sanepala+ ki tamatou toe laga ia te kaupa, neʼe kovi ʼosi tona ita, pea neʼe ina haga manukiʼi te kau Sutea. 2 Pea neʼe ina ui ia muʼa ʼo ʼona tehina pea mo te kautau ʼo Samalia: “Kotea koa ʼae ʼe fai e te kau Sutea vaivavai ʼaia? ʼE lava fakahoko anai koa e natou totonu te gaue ʼaia? ʼE natou momoli anai koa he ʼu sakilifisio? ʼE natou fakaʼosi anai koa te gaue ʼi he ʼaho pe ʼe tahi? Pea ʼe natou fakamaʼuli ake anai koa mai te ʼu tuʼuga efu ia te ʼu maka ʼae kua tutu e te afi?”+

3 Neʼe ui e Topie,+ te tagata Amone+ ʼae neʼe tuʼu ʼi ʼona tafa: “Maʼiape la mo he lenato kapau ʼe kake ki te kaupa maka ʼae ʼe natou laga, ʼe holo anai ia.”

4 “Siʼomatou ʼAtua, ke ke fagono ki te ʼu manukinuki ʼae ʼe natou fai mai kia matou,+ pea ke natou kai pe tanatou agakovi ʼaia.+ Pea ke ke tuku natou ki ʼonatou fili ke fakaʼaunofo natou ʼi he tahi age fenua. 5 Pea ʼaua naʼa ke ʼuʼufi ʼanatou hala peʼe ke pulihi ʼanatou agahala ʼi ʼou muʼa,+ koteʼuhi neʼe natou laukoviʼi ia natou ʼae ʼe natou laga te kaupa.”

6 Neʼe hoko atu pe tamatou laga te kaupa, pea neʼe ʼosi leva te kaupa ʼae neʼe ina ʼa takai te kolo ʼo kaku ki te vaelua ʼo tona maʼoluga, pea neʼe haga gaue fakamalotoloto aipe ia te hahaʼi.

7 ʼI te logo ʼa Sanepala, mo Topie,+ mo te kau Alape,+ mo te kau Amone pea mo te kau Asoti+ ki te lakalaka ki muʼa ʼo te toe faʼu ʼo te ʼu kaupa ʼo Selusalemi pea mo te kua mono ʼo te ʼu pu, neʼe natou iita lahi ai. 8 Neʼe natou fonofono fakatahi ai ke natou ʼomai ʼo tauʼi ia Selusalemi pea mo fakatupu he maveuveu ʼi ai. 9 Kae neʼe matou faikole ki tomatou ʼAtua, pea neʼe matou fakatuʼu he tagata leʼo ʼi te ʼaho mo te poʼuli ʼuhi ko natou.

10 Kae neʼe ui e te hahaʼi ʼo Suta: “Kua vaivavai te kau gaue,* pea ʼe toe lahi foki mo te ʼu maumau. Pea ʼe mole feala anai ke matou laga te kaupa.”

11 Pea neʼe hoko atu te ui e ʼomatou fili: “Ka tou olo fakahagatonu anai kia natou, ʼe mole natou iloʼi anai he meʼa peʼe sisio mai anai, pea ʼe tou matematehi anai natou pea mo taʼofi te gaue.”

12 ʼI te temi fuli pe ʼae neʼe ʼomai ai te kau Sutea ʼae neʼe nonofo ʼi ʼonatou tafa, neʼe natou haga ui* mai: “ ʼE natou ʼohofi anai tatou mai te ʼu potu fuli pe.”

13 Koia, neʼe au fakatuʼu he kau tagata ʼi te ʼu koga meʼa malalo ʼi te tuʼa kaupa, ʼae ʼe faigafua ai tona ʼohofi, pea neʼe au fakatuʼutuʼu fakafamili natou ʼaki ʼanatou heleta, mo ʼanatou tao pea mo ʼanatou nahau. 14 ʼI taku sio ki tanatou matataku, neʼe au tuʼu ake aipe ʼo ui ki te kau ʼaliki,+ mo te ʼu tagata ʼae ʼe hoa ki te kau pule pea mo te toe ʼo te hahaʼi: “ ʼAua naʼa kotou matataku.+ Kotou manatuʼi ia Sehova, ʼae ʼe lahi pea mo fakamanavahe,+ pea kotou tau maʼa ʼokotou tehina, mo ʼokotou foha, mo ʼokotou ʼofafine, mo ʼokotou ʼohoana pea mo ʼokotou loto fale.”

15 ʼI te ʼosi logo ʼo ʼomatou fili ki tamatou kua iloʼi te meʼa ʼae neʼe natou fia fakahoko pea mo te fakato noa e te ʼAtua moʼoni tanatou fakatuʼutuʼu ʼaia, neʼe matou toe liliu fuli ai ʼo laga te kaupa. 16 Talu mai te ʼaho ʼaia, neʼe gaue te vaelua ʼo ʼaku tagata+ pea ko te tahi ake vaelua neʼe natou toʼo ni tao, mo ni meʼa tali tau, mo te ʼu nahau pea mo tui te ʼu kofu tau. Pea neʼe tutuʼu te kau ʼaliki+ ʼo lagolago ki te hahaʼi katoa ʼo Suta 17 ʼae neʼe natou laga te kaupa. Ko natou ʼae neʼe natou ʼamo te ʼu kavega, neʼe natou gaue nima tahi kae puke ʼi te tahi age nima he mahafu.* 18 Pea neʼe tahi haʼi e te kau gaue ʼi tona faʼahi vakavaka he heleta kae natou lolotoga gaue, pea neʼe tuʼu ʼi ʼoku tafa ia ia ʼae neʼe ina pupuhi te fakatagi pupuhi.+

19 Neʼe au ui leva ki te kau ʼaliki, mo te ʼu tagata ʼae ʼe hoa ki te kau pule pea mo te toe ʼo te hahaʼi: “ ʼE lahi te gaue, pea ʼe tou mavetevete ʼi te kaupa mo fevahamamaʼoʼaki. 20 Koia, ka kotou logo ki te pupuhi ʼo te fakatagi pupuhi, kotou maʼopoʼopo fuli age ki te faʼahi ʼae ʼe matou nonofo ai. Pea ʼe tau anai totatou ʼAtua maʼa tatou.”+

21 Koia neʼe matou hoko atu pe te gaue kae neʼe toʼo e te tahi age vaelua ʼo matou ia te ʼu tao, mai te mafoa ʼo te ʼaho ʼo kaku ki te ha ʼo te ʼu fetuʼu. 22 ʼI te temi ʼaia, neʼe au ui ki te hahaʼi: “Ke tahi nofo te kau tagata ʼi Selusalemi ʼi te poʼuli mo tana tagata tokoni gaue, ke feala ai hanatou leʼo tatou ʼi te poʼuli pea mo gaue ʼi te ʼaho.” 23 Koia neʼe mole matou huʼi ʼomatou teu, ia au mo ʼoku tehina, mo ʼaku tagata gaue+ pea mo te kau tagata leʼo ʼae neʼe mulimuli mai ia au, pea neʼe matou tahi toʼo tana mahafu ʼi tona nima mataʼu.

5 Kae neʼe lahi te meo ʼa te hahaʼi pea mo ʼonatou ʼohoana ʼuhi ko ʼonatou tehina Sutea.+ 2 Neʼe ui e ʼihi: “ ʼE matou kaugamalie, ia matou mo ʼomatou foha pea mo ʼomatou ʼofafine. ʼE tonu ke matou maʼu hamatou meʼa kai ke matou kai pea mo maʼuʼuli ai.” 3 Neʼe ui e ʼihi: “Neʼe matou foaki ʼamatou gaueʼaga fulumeto, mo ʼamatou gaueʼaga vite pea mo ʼomatou ʼapi* ke feala ai hamatou maʼu he meʼa kai ʼi te temi hoge.” 4 Pea neʼe ui e ʼihi: “Neʼe matou toʼo maʼua ʼaki ʼamatou gaueʼaga fulumeto pea mo ʼamatou gaueʼaga vite, ke feala ai hamatou totogi te tukuhau ʼa te hau.+ 5 Kae koʼeni ʼe matou kakano mo toto tahi mo ʼomatou tehina,* pea ʼe hage pe ʼomatou foha ko ʼonatou foha. Kae ʼe tonu ke matou tuku ʼomatou foha mo ʼomatou ʼofafine ke natou liliu ko he ʼu kaugana, pea ko ʼihi ʼo ʼomatou ʼofafine kua natou kaugana.+ ʼE mole matou maʼu he puleʼaki moʼo fakagata te aluʼaga ʼaia, he ʼe ko ʼamatou gaueʼaga fulumeto pea mo ʼamatou gaueʼaga vite ʼe maʼu e niʼihi age.”

6 ʼI taku logo ki tanatou meo pea mo ʼanatou palalau ʼaia, neʼe kovi ʼosi toku ita. 7 Koia neʼe au fakakaukauʼi leva te ʼu faʼahi ʼaia ʼi toku loto, pea neʼe au valokiʼi leva te kau ʼaliki pea mo te ʼu tagata ʼae ʼe hoa ki te kau pule, ʼo au ui age kia natou: “ ʼE kotou tahi fakamaʼua ki tona tehina totonu he tupu mai tona maʼua.”+

Pea tahi ʼae meʼa, neʼe au fakatuʼutuʼu ke fai he fakatahi lahi ʼuhi ko natou. 8 Pea neʼe au ui kia natou: “Neʼe matou totogi ʼotatou tehina Sutea ʼae neʼe fakatau ki te ʼu puleʼaga, ʼo mulimuli pe ki te meʼa ʼae neʼe matou fealagia. Kae ʼi te lakaga nei, ʼe kotou fia fakatau koa ʼokotou tehina,+ pea ʼe tonu anai koa ke matou totogi natou?” Neʼe natou nonofo fakalologo ai, pea neʼe mole hanatou tali ki ai. 9 Neʼe au ui leva: “ ʼE mole lelei te meʼa ʼae ʼe kotou fai. ʼE mole tonu koa la ke kotou haʼele ʼi te manavasiʼi ki totatou ʼAtua,+ ke mole manukiʼi ai tatou e te ʼu puleʼaga, ʼae ko ʼotatou fili? 10 Pea tahi ʼae meʼa, ko au, mo ʼoku tehina pea mo taku kau gaue neʼe matou foaki kia natou he falā mo he meʼa kai ʼe tonu ke natou toe liufaki mai. Fakalelei siʼokotou loto, kae tuku tatatou fakamaʼua kia natou he tupu mai tonatou maʼua.+ 11 Fakalelei siʼokotou loto, kae ke kotou toe liufaki age kia natou ʼi te ʼaho ʼaeni, ʼanatou gaueʼaga fulumeto,*+ mo ʼanatou gaueʼaga vite, mo ʼanatou gaueʼaga oliveto pea mo ʼonatou ʼapi. Pea kotou toe liufaki foki mo te tupu ʼae ʼe kotou fakamaʼua kia natou, ʼae ko te vahe tahi ki te teau* ʼo te falā, mo te fulumeto, mo te vino foʼou pea mo te lolo.”

12 Neʼe natou tali leva: “ ʼE matou toe liufaki anai kia natou te ʼu meʼa ʼaia pea ʼe mole matou toe kole anai he meʼa kia natou. ʼE matou fai pe anai ohage ko te meʼa ʼae kua ke palalau ki ai.” Koia neʼe au pauʼi ai te kau pelepitelo pea mo au kole ki te ʼu tagata ʼaia ke natou fakapapau ʼe natou fakahoko anai. 13 Pea neʼe au tutuʼi toku kofu, ʼo ui: “Ke luluʼi feiaʼi e te ʼAtua moʼoni te tagata ʼae ʼe mole ina fakahoko te fakapapau ʼaia, pea ke ina fakamavae mai tona ʼapi pea mo ʼona koloa, ʼei, ke luluʼi feiaʼi ia ia pea ke nofo masiva.” Neʼe tali e te hahaʼi fuli: “Ameni!”* Pea neʼe natou fakavikiviki kia Sehova, pea neʼe fakahoko leva e te hahaʼi tanatou fakapapau.

14 Pea tahi ʼae meʼa, talu mai te ʼaho ʼae neʼe fakanofo ai au e te hau ko tonatou kovana+ ʼi te fenua ʼo Suta, mai te 20 taʼu+ ki te 32 taʼu+ ʼo te pule ʼa te Hau ko Aletasese,+ ko au mo ʼoku tehina, neʼe mole matou kai ʼi te ʼu taʼu ʼaia ʼe 12 ia te pane ʼae neʼe tonu ke foaki ki te kovana.+ 15 Kae ko te kau kovana ʼafeā, ʼae neʼe muʼa atu ia au, neʼe natou fakamafasiaʼi te hahaʼi pea mo fakamaʼua kia natou te ʼu sikele* siliva ʼe 40 moʼo totogi ʼaki te pane mo te vino ʼi te ʼaho fuli. Pea neʼe gaohi koviʼi e tanatou kau gaue ia te hahaʼi. Kae neʼe mole au fai te faʼahi ʼaia+ ʼuhi ko taku manavasiʼi ki te ʼAtua.+

16 Pea tahi ʼae meʼa, neʼe au tokoni ki te laga ʼo te kaupa ʼaia, pea neʼe mole matou totogi hamatou gaueʼaga.+ Neʼe fakatahi taku kau gaue fuli ki te fai ʼo te gaue. 17 Neʼe kakai ʼi toku laupapa ia te toko 150, neʼe ko te kau Sutea mo te ʼu tagata ʼae ʼe hoa ki te kau pule, kae neʼe mole lau ai ia natou ʼae neʼe ʼomai mai te ʼu puleʼaga. 18 ʼI te ʼaho fuli, neʼe teuteuʼi he vitulo ʼe tahi, mo he ʼu ovi lelei ʼe ono pea mo he ʼu manulele neʼe au totogi,* pea tuʼa tahi ʼi te ʼu ʼaho ʼe hogofulu, neʼe lahi te ʼu faʼahiga vino kehekehe ʼae neʼe teuteuʼi maʼa matou. Logo la te ʼu faʼahi fuli ʼaia, kae neʼe mole au kole te meʼa kai ʼae neʼe tonu ke foaki ki te kovana, he neʼe kua mafasia te hahaʼi ʼi tanatou gaue. 19 “Siʼoku ʼAtua, ke ke manatuʼi au pea mo ke tapuakiʼi au, ʼuhi ko te ʼu meʼa fuli ʼae neʼe au fai maʼa te hahaʼi ʼaeni.”+

6 ʼI te temi pe ʼae neʼe fakaha age ai kia Sanepala, mo Topie,+ mo Kesemi te tagata Alape,+ pea mo te toe ʼo ʼomatou fili ia taku toe laga ia te kaupa+ pea mo mono te ʼu pu fuli ʼo te kaupa (logo la ʼi te temi ʼaia neʼe heʼeki au fakamatapa),+ 2 neʼe fekauʼi mai e Sanepala pea mo Kesemi ia he ʼu tagata, ke natou ui mai kia au: “Haʼu muʼa, pea ke tou fakatuʼutuʼu he temi ke tou fakatahi ai ʼi te ʼu kolo liliki ʼo te Potu Fenua Laulelei ko Ono.”+ Kae neʼe natou fai he fakatuʼutuʼu kaka ʼo ʼuhiga mo au. 3 Pea neʼe au fekauʼi he ʼu tagata ke natou ui age kia natou: “ ʼE au fai he toe gaue lahi, pea ʼe mole feala haku hifo atu. He koʼe ʼe fakatuʼu anai te gaue kae au alu atu kia koutou?” 4 Neʼe tuʼa fa tanatou fai mai ia te poapoaki ʼaia, pea neʼe feia tuʼumaʼu pe taku tali kia natou.

5 Neʼe fekauʼi mai leva e Sanepala tana tagata tokoni gaue mo te logo pe ʼaia, ko tona tuʼa nima ʼaia, pea mo he tohi neʼe mole fakamaʼu. 6 Koʼeni te meʼa ʼae neʼe tohi ai: “Kua logo ʼi te ʼu puleʼaga, pea ʼe toe ui foki e Kesemi,+ ko koe mo te kau Sutea ʼe kotou fakatuʼutuʼu ke kotou agatuʼu.+ Ko te tupuʼaga la ʼaia ʼo tau laga ia te kaupa, pea ʼe toe ʼaumai logo, ʼe ke liliu anai ko tonatou hau. 7 Pea neʼe ke fakanofo he kau polofeta ke natou tala ʼo ʼuhiga mo koe ʼi Selusalemi katoa: ‘ ʼE ʼi ai te hau ʼi Suta!’ Pea ʼe fakaha anai te ʼu faʼahi ʼaia ki te hau. Koia, haʼu muʼa ke tou felogoi fakatahi ki ai.”

8 Kae neʼe au fekauʼi he tahi ke alu ʼo fakaha age ki ai: “Neʼe mole hoko te ʼu meʼa fuli ʼae ʼe ke talanoa ki ai, kae ʼe ko koe pe ʼae neʼe ke fakatupu te ʼu fakamatala ʼaia.” 9 He neʼe natou faiga fuli ke natou fakamatakuʼi matou, ʼo ui: “ ʼE natou lotovaivai anai ʼi te fai ʼo te gaue, pea ʼe mole fakaʼosi anai.”+ “ ʼI te lakaga nei, siʼoku ʼAtua, ke ke fakalotomalohiʼi au.”+

10 Neʼe au alu leva kia Semaea, te foha ʼo Telaia, te foha ʼo Mesesapele ʼae neʼe nofo pe ʼi tona ʼapi. Pea neʼe ina ui mai: “Ta fakatuʼutuʼu he temi ke ta felaveʼi ki te fale ʼo te ʼAtua moʼoni, ʼi te fale lotu, pea ta pupunu te ʼu matapa ʼo te fale lotu, he ʼe natou ʼomai anai ʼo matehi koe. ʼEi, ʼe natou ʼomai anai ʼo matehi koe ʼi te poʼuli.” 11 Kae neʼe au ui: “ ʼE tonu koa ki he tagata ohage ko au ke hola? ʼE feala koa ki he tagata ohage ko au ke ulu ki te fale lotu pea mo maʼuli?+ ʼE mole au ulu anai ki loto!” 12 Neʼe au mahino ai leva neʼe mole fekauʼi mai ia ia e te ʼAtua, kae neʼe totogi ia ia e Topie pea mo Sanepala+ ke ina fai te fakakikite ʼaia ʼo ʼuhiga mo au. 13 Neʼe totogi ia ia ke ina fakamatakuʼi au pea mo uga au ke au agahala, ke tupu ai hanā ʼulihi toku matagafua pea mo valokiʼi au.

14 “Siʼoku ʼAtua, ke ke manatuʼi ia Topie+ mo Sanepala pea mo ʼanā aga ʼaia, ʼo toe feia mo Noatia, te fafine polofeta pea mo te toe ʼo te kau polofeta ʼae ʼe natou faiga tuʼumaʼu ke natou fakamatakuʼi au.”

15 Neʼe ʼosi leva ia te kaupa ʼi te ʼaho 25 ʼo Elule,* ia ʼaho ʼe 52.

16 ʼI te temi pe ʼae neʼe logo ki ai ʼomatou fili fuli pea mo sio ki ai te ʼu puleʼaga fuli ʼi ʼomatou tafaʼaki, neʼe lahi ʼosi tonatou ufiufi,+ pea neʼe natou mahino ai neʼe fakahoko te gaue ʼaia ʼaki te tokoni ʼo tomatou ʼAtua. 17 ʼI te ʼu ʼaho ʼaia, neʼe lahi te ʼu tohi neʼe momoli e te kau ʼaliki+ ʼo Suta kia Topie pea neʼe toe tali e Topie ki ʼanatou tohi. 18 Tokolahi ʼi Suta neʼe natou fakapapau ʼe natou lagolago kia ia, he neʼe ʼohoana mo te ʼofafine ʼo Sekania, te foha ʼo Alase,+ pea neʼe ʼohoana ia Sokanane tona foha mo te ʼofafine ʼo Mesulame,+ te foha ʼo Pelekia. 19 Pea neʼe natou fakamatala tuʼumaʼu mai he ʼu meʼa ʼe lelei ʼo ʼuhiga mo ia, pea neʼe natou fakaha leva kia ia ʼaku palalau. Neʼe momoli mai leva e Topie he ʼu tohi moʼoku fakamatakuʼi.+

7 ʼI te temi pe ʼae neʼe kua ʼosi ai te toe laga ʼo te kaupa,+ neʼe au ʼai te ʼu matapa.+ Neʼe fakanofo leva te kau tagata leʼo matapa,+ mo te kau hiva+ pea mo te kau Levite.+ 2 Pea neʼe au tuku leva toku tehina ko Hanani+ ke tokaga ki Selusalemi, pea neʼe fakatahi mo ia ia Hanania te pule ʼo te Kolo Tau,+ he neʼe ko he tagata neʼe tuha mo te falala pea neʼe manavasiʼi ki te ʼAtua moʼoni,+ ʼo laka age ʼi te tokolahi. 3 Pea neʼe au ui leva kia naua: “ ʼE mole tonu ke avahi te ʼu matapa ʼo Selusalemi ʼo kaku ki te temi ʼae ʼe sisiga ai te laʼa, pea lolotoga tanatou tutuʼu ʼo leʼo, ʼe tonu anai ke natou mapunuʼi te ʼu matapa pea mo fakamaʼu. Pea kolua hinoʼi he kau leʼo ʼi te hahaʼi ʼo Selusalemi. Ko ʼihi ʼe natou leʼo anai te ʼu faʼahi ʼae neʼe hinoʼi natou ki ai, pea ko ʼihi ʼe natou leʼo ʼo haga ki ʼonatou ʼapi.” 4 Neʼe laulahi ia te kolo, pea neʼe tokosiʼi te hahaʼi ʼae neʼe maʼuʼuli ʼi ai,+ pea neʼe heʼeki toe laga te ʼu ʼapi.

5 Kae neʼe uga au e toku ʼAtua ke au fakatahiʼi te kau ʼaliki, mo te ʼu tagata ʼae ʼe hoa ki te kau pule, pea mo te hahaʼi, ke tohi ʼonatou higoa ʼi te ʼu tohi hako.+ Neʼe au maʼu leva te tohi hako ʼo natou ʼae neʼe ʼuluaki mavae mai tonatou maʼuli popula, pea neʼe tohi ai:

6 Koʼeni te hahaʼi ʼo te potu fenua ʼae neʼe mavae mai tonatou maʼuli popula, ia natou ʼae neʼe ʼave popula+ e Nepukanesa+ te Hau ʼo Papiloni pea ki muli age neʼe natou toe liliu ki Selusalemi mo Suta, ʼo tahi alu ki tona kolo.+ 7 Neʼe natou ʼomai mo Solopapele,+ mo Sesua,+ mo Neemia, mo Asalia, mo Laamia, mo Nahamia, mo Maletokeo, mo Pilekane, mo Misepelete, mo Pikevai, mo Neume, pea mo Paana.

Koʼeni te kaugamalie ʼo te hahaʼi tagata Iselaele:+ 8 ko te ʼu foha ʼo Paleoke, ko te toko 2 172, 9 ko te ʼu foha ʼo Sefatia, ko te toko 372, 10 ko te ʼu foha ʼo Alase,+ ko te toko 652, 11 ko te ʼu foha ʼo Pakate-moape,+ ʼae ʼe hifo mai te ʼu foha ʼo Sesua mo Soape,+ ko te toko 2 818, 12 ko te ʼu foha ʼo Elame,+ ko te toko 1 254, 13 ko te ʼu foha ʼo Satu, ko te toko 845, 14 ko te ʼu foha ʼo Sakai, ko te toko 760, 15 ko te ʼu foha ʼo Pinui, ko te toko 648, 16 ko te ʼu foha ʼo Pepai, ko te toko 628, 17 ko te ʼu foha ʼo Asekate, ko te toko 2 322, 18 ko te ʼu foha ʼo Atonikame, ko te toko 667, 19 ko te ʼu foha ʼo Pikevai, ko te toko 2 067, 20 ko te ʼu foha ʼo Atine, ko te toko 655, 21 ko te ʼu foha ʼo Atele, ʼae ʼe hifo mai ia Esekiasi, ko te toko 98, 22 ko te ʼu foha ʼo Asume, ko te toko 328, 23 ko te ʼu foha ʼo Petesai, ko te toko 324, 24 ko te ʼu foha ʼo Alife, ko te toko 112, 25 ko te ʼu foha ʼo Kipeone,+ ko te toko 95, 26 ko te ʼu tagata mai Petelehemi mo Netofa, ko te toko 188, 27 ko te ʼu tagata mai Anatote,+ ko te toko 128, 28 ko te ʼu tagata mai Pete-asimaveti, ko te toko 42, 29 ko te ʼu tagata mai Kiliate-sealimi,+ mo Kefila mo Peeloti,+ ko te toko 743, 30 ko te ʼu tagata mai Lama mo Kepa,+ ko te toko 621, 31 ko te ʼu tagata mai Mikemasi,+ ko te toko 122, 32 ko te ʼu tagata mai Petele+ mo Ai,+ ko te toko 123, 33 ko te ʼu tagata mai te tahi age Nepo, ko te toko 52, 34 ko te ʼu foha ʼo te tahi age Elame, ko te toko 1 254, 35 ko te ʼu foha ʼo Alime, ko te toko 320, 36 ko te ʼu foha mai Seliko, ko te toko 345, 37 ko te ʼu foha ʼo Loti, mo Atite mo Ono,+ ko te toko 721, 38 ko te ʼu foha ʼo Senaa, ko te toko 3 930.

39 Ko te kau pelepitelo:+ ko te ʼu foha ʼo Setasa mai te famili ʼo Sesua, ko te toko 973, 40 ko te ʼu foha ʼo Imele, ko te toko 1 052, 41 ko te ʼu foha ʼo Pasule,+ ko te toko 1 247, 42 ko te ʼu foha ʼo Alime,+ ko te toko 1 017.

43 Ko te kau Levite:+ ko te ʼu foha ʼo Sesua mo Katemiele,+ ʼae ʼe hifo mai te ʼu foha ʼo Hoteva, ko te toko 74. 44 Ko te kau hiva:+ ko te ʼu foha ʼo Asafe,+ ko te toko 148. 45 Ko te kau tagata leʼo matapa:+ ko te ʼu foha ʼo Salume, mo te ʼu foha ʼo Atele, mo te ʼu foha ʼo Talemone, mo te ʼu foha ʼo Akupe,+ mo te ʼu foha ʼo Atita, mo te ʼu foha ʼo Sopai, ko te toko 138.

46 Ko te kau tagata faifekau ʼo te fale lotu:*+ ko te ʼu foha ʼo Tesika, mo te ʼu foha ʼo Asufa, mo te ʼu foha ʼo Tapaote, 47 mo te ʼu foha ʼo Kelose, mo te ʼu foha ʼo Sia, mo te ʼu foha ʼo Patone, 48 mo te ʼu foha ʼo Lepana, mo te ʼu foha ʼo Akapa, mo te ʼu foha ʼo Salemai, 49 mo te ʼu foha ʼo Hanane, mo te ʼu foha ʼo Kitele, mo te ʼu foha ʼo Kaale, 50 mo te ʼu foha ʼo Leasa, mo te ʼu foha ʼo Letisini, mo te ʼu foha ʼo Nekota, 51 mo te ʼu foha ʼo Kasame, mo te ʼu foha ʼo Usa, mo te ʼu foha ʼo Paseake, 52 mo te ʼu foha ʼo Pesai, mo te ʼu foha ʼo Meunime, mo te ʼu foha ʼo Nefusesime, 53 mo te ʼu foha ʼo Pakepuke, mo te ʼu foha ʼo Akufa, mo te ʼu foha ʼo Alule, 54 mo te ʼu foha ʼo Patilute, mo te ʼu foha ʼo Meita, mo te ʼu foha ʼo Aleseta, 55 mo te ʼu foha ʼo Palekose, mo te ʼu foha ʼo Sisela, mo te ʼu foha ʼo Tamake, 56 mo te ʼu foha ʼo Netesia, mo te ʼu foha ʼo Atifa.

57 Ko te ʼu foha ʼo te kau tagata faifekau ʼa Salomone:+ ko te ʼu foha ʼo Sotai, mo te ʼu foha ʼo Sofelete, mo te ʼu foha ʼo Pelita, 58 mo te ʼu foha ʼo Saala, mo te ʼu foha ʼo Talekone, mo te ʼu foha ʼo Kitele, 59 mo te ʼu foha ʼo Sefatia, mo te ʼu foha ʼo Atile, mo te ʼu foha ʼo Pokeleti-atesepaimi, mo te ʼu foha ʼo Amone. 60 Ko te kau tagata faifekau ʼo te fale lotu*+ pea mo te ʼu foha ʼo te kau tagata faifekau ʼa Salomone, neʼe fakatahiʼi ia natou fuli ʼaia, ko te toko 392.

61 Pea koʼeni ia natou ʼae neʼe mavae mai Tele-melake, mo Tele-alesa, mo Kelupi, mo Atane mo Imele, kae neʼe mole feala ke natou iloʼi pe neʼe ko he kau Iselaele ia te famili ʼo ʼanatou tamai ʼo feia mo tonatou haʼuʼaga:+ 62 ko te ’u foha ʼo Telaia, mo te ʼu foha ʼo Topie, mo te ʼu foha ʼo Nekota, ko te toko 642. 63 Pea ʼi te kau pelepitelo: ko te ʼu foha ʼo Apaia, mo te ʼu foha ʼo Akose,+ mo te ʼu foha ʼo Palesilai, ʼae neʼe ʼohoana mo he ʼofafine ʼo Palesilai,+ te tagata Kileate pea neʼe ina toʼo leva ia te higoa ʼaia. 64 Neʼe fai e natou ʼaia he ʼu fekumi ʼi te ʼu tohi hako moʼo fakamoʼoni tonatou haʼuʼaga kae neʼe mole feala hanatou maʼu, koia neʼe fakahifo ai natou mai tonatou tuʼulaga fakapelepitelo.*+ 65 Neʼe ui e te kovana*+ kia natou ʼe mole tonu ke natou kakai ki te ʼu meʼa ʼae ʼe taputapu ʼaupito,+ ʼo kaku ki te hoki maʼu ʼo he pelepitelo ʼe ina vakavakaʼi anai te Ulime mo te Tumime.+

66 Ko natou fuli ʼae neʼe toe liliu neʼe ko te toko 42 360,+ 67 kae neʼe mole lau ai te ʼu tagata mo te ʼu fafine kaugana,+ ʼae neʼe toko 7 337, pea neʼe toe ʼi ai foki mo he ʼu tagata mo he ʼu fafine hiva neʼe toko 245.+ 68 Neʼe ko ʼanatou hosi ʼe 736, mo ʼanatou asino lalahi ʼe 245, 69 mo ʼanatou kamelo ʼe 435 pea mo ʼanatou asino liliki ʼe 6720.

70 Neʼe tokoni ʼihi pule famili ki te gaue.+ Neʼe foaki e te kovana* ki te tanakiʼaga koloa te ʼu talame* aulo ʼe 1 000, mo te ʼu pa loloto ʼe 50 pea mo te ʼu teu fakapelepitelo ʼe 530.+ 71 Pea ko ʼihi pule famili neʼe natou foaki ki te falā ʼae neʼe fakatuʼutuʼu ki te gaue ʼaia, he ʼu talame aulo ʼe 20 000, mo he ʼu mina* siliva ʼe 2 200. 72 Pea neʼe foaki leva e te toe ʼo te hahaʼi he ʼu talame aulo ʼe 20 000, mo he ʼu mina siliva ʼe 2 000, pea mo he ʼu teu fakapelepitelo ʼe 67.

73 Ko te kau pelepitelo, mo te kau Levite, mo te kau tagata leʼo matapa, mo te kau hiva,+ mo te kau tagata faifekau ʼo te fale lotu,* pea mo te toe ʼo te hahaʼi neʼe natou nonofo ʼi ʼonatou kolo. Koia neʼe nonofo leva te kau Iselaele fuli ʼi ʼonatou kolo.+ Pea ʼi te hoko mai ʼo te fitu mahina,+ neʼe kua natou nonofo ʼi ʼonatou kolo.+

8 Pea neʼe tonu tahi te hahaʼi katoa ke fakatahitahi ʼi te malaʼe lahi ʼae ʼe haga ki te Matapa ʼo Te ʼu Vai.+ Pea neʼe natou kole kia Esetalasi,+ te tagata hiki tohi,* ke ina ʼaumai te tohi ʼo te Lao ʼa Moisese,+ ʼae neʼe fakatotonu e Sehova ke mulimuli ki ai ia Iselaele.+ 2 Koia, ʼi te ʼuluaki ʼaho ʼo te fitu mahina, neʼe ʼaumai ai e Esetalasi te pelepitelo, ia te Lao kia muʼa ʼo te hahaʼi+ ʼae neʼe fakatahitahi ai: te hahaʼi tagata, mo te hahaʼi fafine, pea mo natou fuli ʼae neʼe feala ke mahino ki te ʼu meʼa ʼae neʼe natou logo ki ai.+ 3 Neʼe tuʼu ʼi te muʼa malaʼe lahi ʼae ʼe haga ki te Matapa ʼo Te ʼu Vai, mai te kei hegihegi ʼo kaku ki te fetapa. Pea neʼe ina lau leʼo lahi te tohi+ ki te hahaʼi tagata, mo te hahaʼi fafine pea mo natou fuli ʼae neʼe feala ke mahino. Pea neʼe fakalogo fakalelei ia te hahaʼi+ ki te lau mai ʼo te tohi ʼo te Lao. 4 ʼUhi ko te aluʼaga ʼaia, neʼe faʼu ai he meʼa maʼoluga ʼaki he ʼu papa ke tuʼu ai ia Esetalasi, te tagata hiki tohi.* Neʼe tuʼu ʼi tona faʼahi mataʼu ia Matitia, mo Sema, mo Anasa, mo Ulia, mo Ilekisa pea mo Maasesa pea ʼi tona faʼahi hema, neʼe tuʼu ai ia Petasa, mo Misaele, mo Malekisa,+ mo Asume, mo Asepatama, mo Sakalia pea mo Mesulame.

5 Neʼe avahi leva e Esetalasi ia te tohi ʼo lava sisio ki ai te hahaʼi katoa, he neʼe maʼoluga age ia natou. ʼI tana avahi ia te tohi, neʼe tutuʼu ake leva te hahaʼi katoa ki ʼoluga. 6 Neʼe fakavikiviki leva ia Esetalasi kia Sehova te ʼAtua moʼoni, ia Ia ʼae ʼe lahi, pea neʼe tali e te hahaʼi katoa: “Ameni!* Ameni!”+ pea mo hiki ake ʼonatou nima. Pea neʼe natou punonou mo tulolo ki te kele ia muʼa ʼo Sehova. 7 Pea ko Sesua, mo Pani, mo Selepea,+ mo Samine, mo Akupe, mo Sapetai, mo Otisa, mo Maasesa, mo Kelita, mo Asalia, mo Sosapate,+ mo Hanane pea mo Pelasa, ʼae neʼe ko he kau Levite, neʼe natou fakamahino ia te Lao ki te hahaʼi,+ kae tutuʼu te hahaʼi. 8 Neʼe hoko atu tanatou lau leʼo lahi ia te tohi, te Lao ʼa te ʼAtua moʼoni, ʼo natou fakamahino fakalelei pea mo fakaha tona fakaʼuhiga, ke tokoni ai ki te hahaʼi ke natou mahino ki te meʼa ʼae neʼe lau.+

9 Pea ko Neemia, te kovana* ʼo te temi ʼaia, mo Esetalasi,+ te pelepitelo mo tagata hiki tohi,* pea mo te kau Levite ʼae neʼe natou akoʼi ia te hahaʼi, neʼe natou ui ki te hahaʼi katoa: “ ʼE ko te ʼaho maʼoniʼoni ʼaeni maʼa Sehova, tokotou ʼAtua.+ ʼAua naʼa kotou lotomamahi peʼe fetagihi.” He neʼe fetagihi te hahaʼi katoa ʼi tanatou logo ki te ʼu folafola ʼa te Lao. 10 Neʼe ina ui age kia natou: “Kotou olo, pea mo kotou kai he ʼu meʼa kai kano lelei* pea mo inu he ʼu meʼa malie, pea mo kotou ʼave ni vaega meʼa kai+ kia natou ʼae ʼe mole ʼi ai hanatou meʼa. Koteʼuhi ʼe ko te ʼaho maʼoniʼoni ʼaeni maʼa totatou ʼAliki, pea ʼaua naʼa kotou lotomamahi, he ʼe ko te fiafia ʼo Sehova ʼe ko tokotou kolo tau.”* 11 Pea neʼe fakafimalieʼi e te kau Levite ia te hahaʼi katoa, ʼo natou ui: “Tuku takotou fetagihi! koteʼuhi ʼe ko te ʼaho maʼoniʼoni ʼaeni, pea ʼaua naʼa kotou lotomamahi.” 12 Neʼe olo ai te hahaʼi katoa ʼo kakai mo iinu pea mo ʼave ni vaega meʼa kai pea mo natou fakafiafia lahi,+ he neʼe kua natou mahino ki te ʼu folafola ʼae neʼe fakaha age kia natou.+

13 Pea ʼi te lua ʼaho, ko te ʼu pule famili ʼo te hahaʼi katoa, mo te kau pelepitelo pea mo te kau Levite neʼe natou fakatahitahi age leva kia Esetalasi te tagata hiki tohi,* ke natou mahino lahi age ki te ʼu folafola ʼo te Lao. 14 Pea neʼe natou lau leva ʼi te Lao ʼae neʼe fakatotonu ai e Sehova kia Moisese, ʼe tonu ke nonofo te kau Iselaele ʼi he ʼu pola* lolotoga te ʼaho lahi ʼo te fitu mahina,+ 15 pea ʼe tonu ke natou tala+ ʼi ʼonatou kolo fuli pea mo Selusalemi katoa: “Kotou olo ki te ʼu koga meʼa moʼugaʼia ʼo kumi mai ai he ʼu vaʼa ʼakau ʼe failau ʼo he ʼu fuʼu oliveto, mo he ʼu fuʼu sapa, mo he ʼu fuʼu milete, mo he ʼu fuʼu palema pea mo he ʼu vaʼa ʼakau ʼe failau ʼo he tahi age ʼu fuʼu ʼakau moʼo faʼu ʼaki he ʼu pola, ohage ko te meʼa ʼae kua tohi.”

16 Neʼe olo ai te hahaʼi ʼo kumi mai te ʼu meʼa ʼaia moʼo faʼu ʼaki ʼonatou pola, ʼo natou tahi faʼu ʼi tona fuga fale, ʼo toe feia mo ʼonatou malaʼe, mo te ʼu malaʼe ʼo te fale ʼo te ʼAtua moʼoni,+ mo te malaʼe lahi ʼo te Matapa ʼo Te ʼu Vai+ pea mo te malaʼe lahi ʼo te Matapa ʼo Efalaimi.+ 17 Koia, neʼe faʼu e natou fuli ʼae neʼe toe liliu mai tonatou maʼuli popula ia he ʼu pola pea neʼe natou nonofo ʼi ai. Talu mai te temi ʼo Sosue,+ te foha ʼo Nune ʼo kaku mai ki te ʼaho ʼaia neʼe mole fai e te kau Iselaele ia te faʼahi ʼaia, koia neʼe natou fiafia ʼaupito ai.+ 18 Pea neʼe lau ia te tohi ʼo te Lao ʼa te ʼAtua moʼoni ʼi te ʼaho fuli,+ mai te ʼuluaki ʼaho ʼo kaku ki te ʼaho fakaʼosi. Pea neʼe natou fai te ʼaho lahi lolotoga ʼaho ʼe fitu, pea neʼe ʼi ai leva he fakatahi taputapu ʼi te valu ʼaho, ohage ko tona fakatotonu ʼi te Lao.+

9 ʼI te 24 ʼaho ʼo te mahina ʼaia, neʼe fakatahitahi leva te kau Iselaele. Pea neʼe natou sesunio, mo tui he ʼu taga,* pea mo natou tu kia natou te lefulefu.+ 2 Ko natou ʼae neʼe hifo mai te kau Iselaele, neʼe natou mavae kehe leva mai te kau matapule fuli,+ pea neʼe natou tutuʼu mo vetevete ʼanatou agahala pea mo te ʼu agahala ʼo ʼanatou kui.+ 3 Pea neʼe natou tutuʼu ake ʼi te faʼahi ʼae neʼe natou nonofo ai, ʼo lau leʼo lahi te tohi ʼo te Lao+ ʼa Sehova tonatou ʼAtua lolotoga hola ʼe tolu. Pea ʼi te tahi age ʼu hola ʼe tolu, neʼe natou vetevete ʼanatou agahala pea mo tulolo ia muʼa ʼo Sehova tonatou ʼAtua.

4 Neʼe tutuʼu ia Sesua, mo Pani, mo Katemiele, mo Sipania, mo Puni, mo Selepea,+ mo Pani pea mo Kenani ʼi te meʼa maʼoluga ʼae neʼe tutuʼu ai+ te kau Levite, ʼo natou kalaga leʼo lahi kia Sehova tonatou ʼAtua. 5 Pea neʼe ui e te kau Levite ko Sesua, mo Katemiele, mo Pani, mo Asapenia, mo Selepea, mo Otisa, mo Sipania pea mo Petasia: “Kotou tutuʼu ake pea mo kotou fakavikiviki kia Sehova tokotou ʼAtua ʼo heʼe gata.*+ Pea ke natou vikiʼi tou huafa fakakololia, ʼae ʼe maʼoluga age ʼi te ʼu tapuakina mo te ʼu fakavikiviki fuli.

6 “Ko koe pe Sehova ʼe ke tokotahi.+ Neʼe ke fakatupu te ʼatu lagi, ʼei, te lagi ʼae ʼe maʼoluga ʼaupito* mo te ʼu meʼa fuli ʼae ʼi ai,* mo te kele pea mo te ʼu meʼa fuli ʼae ʼi ai, mo te ʼu tai pea mo te ʼu meʼa fuli ʼae ʼi ai. ʼE ke taupau ke maʼuli te ʼu meʼa fuli ʼaia pea ʼe tulolo ʼi ʼou muʼa te kautau ʼo te ʼatu lagi. 7 ʼE ko koe Sehova te ʼAtua moʼoni, ʼae neʼe ke filifili ia Apalamo+ mo ke fakamavae mai Ule,+ te kolo ʼo te kau Kaletea pea neʼe ke foaki kia ia te higoa ko Apalahamo.+ 8 Neʼe ke iloʼi ʼe agatonu tona loto kia te koe,+ koia neʼe ke fai mo ia he fuakava ke ke foaki age kia ia te fenua ʼo te kau Kanaane, mo te kau Heti, mo te kau Amole, mo te kau Pelesite, mo te kau Sepusi pea mo te kau Kilikasi, ke ina foaki ki tona hakoga.+ Pea neʼe ke fakahoko ʼau fakapapau, he ʼe ke faitotonu.

9 “Pea neʼe ke sio ki te mamahi ʼo ʼamatou kui ʼi Esipito,+ pea neʼe ke logo ki tanatou kalaga ʼi te Tai Kula. 10 Neʼe ke fakahoko leva he ʼu fakailoga pea mo he ʼu milakulo moʼo tauteaʼi ia Falaone, mo tana hahaʼi faifekau fuli pea mo te hahaʼi fuli ʼo tona fenua,+ he neʼe ke iloʼi neʼe natou fiameʼalahi+ ki ʼamatou kui. Neʼe iloa ai tou huafa ʼo kaku mai ki te ʼaho ʼaeni.+ 11 Pea neʼe ke vaheʼi lua te tai ʼi ʼonatou muʼa, ʼo natou fakalaka ai ʼi te tai ʼi he kele moamoa,+ pea neʼe ke li ki te loloto natou ʼae neʼe natou tuli ia natou, ohage ko he foʼi maka neʼe li ki he tai ʼe tokakovi.+ 12 Neʼe ke taki natou ʼi te ʼaho ʼaki he ʼao pea ʼi te poʼuli ʼaki he pou afi, ʼo ke fakamalamaʼi ai te ala ʼae neʼe tonu ke natou olo ai.+ 13 Pea neʼe ke hifo mai ki te Moʼuga ʼo Sinai+ pea neʼe ke palalau mo natou mai selo+ pea neʼe ke foaki kia natou he ʼu fakamau faitotonu, mo he ʼu lao ʼe moʼoni,* pea mo he ʼu lekula mo he ʼu fakatotonu ʼe lelei.+ 14 Neʼe ke fakaha age kia natou tou Sapato taputapu,+ pea mo ke foaki kia natou he ʼu fakatotonu, mo he ʼu lekula pea mo he lao ʼaki tau tagata faifekau ko Moisese. 15 ʼI te temi ʼae neʼe natou fia kakai ai, neʼe ke foaki age he pane mai te lagi,+ pea ʼi te temi ʼae neʼe natou fia iinu ai, neʼe ke fakahali mai te foʼi maka he vai.+ Pea neʼe ke ui age ke natou ulu pea mo toʼo maʼa natou te fenua ʼae neʼe ke fakapapau ʼe ke foaki anai kia natou.

16 “Kae neʼe fiameʼalahi leva ʼamatou kui+ pea neʼe natou uigataʼa.*+ Neʼe mole natou fia fakalogo ki ʼau fakatotonu. 17 ʼEi, neʼe mole natou fia fakalogo,+ pea neʼe mole natou manatuʼi ʼau gaue fakaofoofo ʼae neʼe ke fakahoko ʼi te lotolotoiga ʼo natou. Neʼe natou uigataʼa,* ʼo natou fakanofo he pule ke natou toe liliu ki tonatou maʼuli popula ʼi Esipito.+ Kae ko koe ko he ʼAtua ʼe lotofakamolemole, mo manavaʼofa, mo tuai ʼi te ita pea mo fonu ʼi te ʼofa agatonu,+ pea neʼe mole ke liʼaki natou.+ 18 Maʼia mo te temi ʼae neʼe natou faʼu ai he fakatata ʼo he ʼuhiʼi pipi* pea mo natou ui: ‘Koʼeni tou ʼAtua ʼae neʼe ina fakamavae koe mai Esipito,’+ pea neʼe lahi ʼaupito tanatou aga heʼe fakaʼapaʼapa, 19 ʼei, maʼia mo te temi ʼaia, neʼe mole ke liʼaki natou ʼi te toafa, ʼuhi ko te lahi ʼo tou manavaʼofa.+ ʼI te ʼaho, neʼe mole mavae ia natou te ʼao ʼae neʼe ina taki natou ʼi te ala, ʼo feia mo te pou afi ʼae neʼe ina fakamalamaʼi natou ʼi te poʼuli ʼi te ala ʼae neʼe tonu ke natou olo ai.+ 20 Pea neʼe ke foaki age tou laumalie* ke natou mahino,+ pea neʼe mole ke taʼofi tau mane mai ʼonatou gutu,+ pea neʼe ke foaki age kia natou he vai ʼi te temi ʼae neʼe natou fia iinu ai.+ 21 Neʼe ke fafaga natou ʼi te toafa lolotoga taʼu ʼe 40.+ Neʼe natou maʼu tuʼumaʼu pe te ʼu meʼa ʼae neʼe ʼaoga kia natou. Neʼe mole popo ʼonatou teu+ pea neʼe mole fufula ʼonatou vaʼe.

22 “Neʼe ke foaki kia natou te ʼu puleʼaga pea mo te hahaʼi, ʼo ke vaevae age kia natou,+ ke natou toʼo maʼa natou te fenua ʼo Sihone,+ ia te fenua ʼo te hau ʼo Heseponi,+ ʼo feia mo te fenua ʼo Oke,+ ia te hau ʼo Pasani. 23 Pea neʼe ke fakaliliu ʼo kaugamalie ʼonatou foha ohage ko te ʼu fetuʼu ʼo te ʼatu lagi.+ Neʼe ke fakahu natou ki te fenua ʼae neʼe ke fakapapauʼi ki ʼanatou kui ʼe natou hu anai ki ai pea ʼe natou maʼu anai.+ 24 Koia neʼe hu ai ʼonatou foha ʼo toʼo te fenua maʼa natou,+ pea neʼe ke tuku ke fakalogo kia natou te kau Kanaane,+ ia te hahaʼi ʼo te fenua. Pea neʼe ke tuku te hahaʼi ʼo te fenua ʼaia mo ʼonatou hau ki ʼonatou nima, ke natou fai kia natou te meʼa ʼae neʼe natou loto ki ai. 25 Pea neʼe natou ʼohofi leva he ʼu kolo tau+ pea mo he fenua lelei,+ pea neʼe natou toʼo maʼa natou he ʼu ʼapi neʼe fonu ai te ʼu meʼa lelei kehekehe, mo he ʼu tane vai neʼe kua ʼosi keli, mo he ʼu gaueʼaga vite, mo he ʼu gaueʼaga oliveto,+ pea mo he ʼu fuʼu ʼakau ʼe fua mo lahi ʼaupito. Neʼe natou kakai ai, mo makokona pea mo sisino, pea neʼe natou fiafia ʼuhi ko te lahi ʼo tou agalelei.

26 “Kae neʼe natou talagataʼa leva pea mo agatuʼu kia te koe,+ pea mo natou lituʼa ki tau Lao.* Neʼe natou matehi ʼau polofeta ʼae neʼe natou fakatokaga ia natou ke natou toe liliu mai kia te koe, pea neʼe lahi ʼaupito tanatou aga heʼe fakaʼapaʼapa.+ 27 Pea ʼuhi ko te faʼahi ʼaia, neʼe ke tuku leva natou ki te ʼu nima ʼo ʼonatou fili,+ ʼae neʼe natou fakamamahiʼi tuʼumaʼu natou.+ Kae neʼe natou kalaga atu ʼi tonatou temi mamahi, pea neʼe ke logo mai te ʼatu lagi. Pea ʼuhi ko tou manavaʼofa lahi, neʼe ke fekauʼi he ʼu tagata ke natou haofaki natou mai te ʼu nima ʼo ʼonatou fili.+

28 “Kae ʼi tanatou maʼu leva he fimalie, neʼe natou toe fai pe te meʼa ʼae ʼe kovi ʼi ʼou muʼa,+ pea neʼe ke liʼaki natou ki te ʼu nima ʼo ʼonatou fili, ʼae neʼe natou puleʼi natou.*+ Neʼe natou toe liliu atu leva ʼo kole tau tokoni,+ pea neʼe ke logo mai te ʼatu lagi ʼo ke haofaki tuʼumaʼu pe natou ʼuhi ko tou manavaʼofa lahi.+ 29 Logo la tau fakatokaga natou ke toe liliu mai ki tau Lao, kae neʼe natou fiameʼalahi pea neʼe mole natou fia fakalogo ki ʼau fakatotonu.+ Neʼe natou agahala he neʼe mole natou fakalogo ki ʼau lekula, ʼae ʼe feala ki he tagata ke maʼuli mo kapau ʼe mulimuli ki ai.+ Kae neʼe natou lituʼa tuʼumaʼu kia te koe mo uigataʼa,* pea neʼe mole natou fia fakalogo. 30 Neʼe ke katakiʼi natou+ lolotoga ni taʼu pea neʼe ke haga fakatokaga natou ʼaki tou laumalie pea mo ʼau polofeta, kae neʼe mole natou fia fakalogo. Pea neʼe ke tuku leva natou ki te ʼu nima ʼo te hahaʼi ʼo te ʼu fenua.+ 31 Kae ʼuhi ko tou manavaʼofa lahi, neʼe mole ke pulihi natou+ peʼe ke liʼaki natou, he ʼe ko koe ko te ʼAtua manavaʼofa.+

32 “Pea ʼi te lakaga ʼaeni, siʼomatou ʼAtua, te ʼAtua lahi, mo mafimafi pea mo fakamanavahe, ʼae ʼe ina taupau tana fuakava pea mo fakaha tona ʼofa agatonu,+ ʼaua naʼa ke meʼa noaʼi te ʼu mamahi fuli ʼae neʼe tau mo matou, mo ʼomatou hau, mo ʼomatou ʼaliki,+ mo ʼamatou pelepitelo,+ mo ʼamatou polofeta,+ mo ʼamatou kui pea mo tau hahaʼi katoa, talu mai te temi ʼo te ʼu hau ʼo Asilia+ ʼo kaku mai ki te ʼaho ʼaeni. 33 Neʼe ke faitotonu ʼi te ʼu meʼa fuli ʼae neʼe hoko kia matou, he neʼe ke agatonu, kae ko matou ʼae neʼe agakovi.+ 34 Ko ʼomatou hau, mo ʼomatou ʼaliki, mo ʼamatou pelepitelo pea mo ʼamatou kui neʼe mole natou mulimuli ki tau Lao pea mo tokagaʼi ʼau fakatotonu peʼe ko ʼau fakamanatu* ʼae neʼe ke fai moʼo fakatokaga ʼo natou. 35 Maʼia mo tanatou kua nonofo ʼi tonatou puleʼaga pea mo te mahu ʼo te ʼu meʼa lelei ʼae neʼe ke foaki kia natou pea mo tanatou nonofo ʼi he fenua lahi mo lelei neʼe ke tuku age kia natou, neʼe mole natou tauhi kia te koe+ pea mo tafoki mai ʼanatou aga ʼae ʼe kovi. 36 Koia, kua matou liliu ʼi te ʼaho nei ko he ʼu kaugana,+ ʼei, ko he ʼu kaugana ʼi te fenua ʼae neʼe ke foaki ki ʼamatou kui ke natou kai ki ʼona fua pea mo ʼona lelei. 37 ʼE lahi ʼaupito te ʼu fua ʼae ʼe maʼu e te ʼu hau ʼae neʼe ke tuku ke natou puleʼi matou, ʼuhi ko ʼamatou agahala.+ ʼE natou puleʼi faʼitaliha matou* mo ʼamatou faga manu, pea ʼe lahi tomatou mamahi.

38 “Koia, ʼuhi ko te ʼu faʼahi fuli ʼaia, ʼe matou fai nei pea mo tohi he fakapapau taputapu+ pea ʼe fakamoʼoni ʼaki te fakailoga ʼo ʼomatou ʼaliki, mo ʼamatou Levite pea mo ʼamatou pelepitelo.”+

10 Koʼeni ia natou ʼae neʼe fakamoʼoni ki te fakapapau ʼaki tonatou fakailoga:+

9 Pea ko te kau Levite: ko Sesua te foha ʼo Asania, mo Pinui ʼi te ʼu foha ʼo Enatate, mo Katemiele,+ 10 pea mo ʼonatou tehina ko Sipania, mo Otisa, mo Kelita, mo Pelasa, mo Hanane, 11 mo Mika, mo Leopi, mo Asapea, 12 mo Sakule, mo Selepea,+ mo Sipania, 13 mo Otisa, mo Pani, pea mo Peninu.

14 Ko te kau pule ʼo te hahaʼi: ko Paleoke, mo Pakate-moape,+ mo Elame, mo Satu, mo Pani, 15 mo Puni, mo Asekate, mo Pepai, 16 mo Atonisa, mo Pikevai, mo Atine, 17 mo Atele, mo Esekiasi, mo Asuli, 18 mo Otisa, mo Asume, mo Petesai, 19 mo Alife, mo Anatote, mo Nepai, 20 mo Makepease, mo Mesulame, mo Esile, 21 mo Mesesapeele, mo Satoke, mo Satua, 22 mo Pelatia, mo Hanane, mo Anasa, 23 mo Oseo, mo Hanania, mo Asupe, 24 mo Alosese, mo Pilesa, mo Sopeke, 25 mo Leume, mo Asapena, mo Maasesa, 26 mo Akisa, mo Hanane, mo Anane, 27 mo Maluke, mo Alime, pea mo Paana.

28 Ko te toe ʼo te hahaʼi, ia te kau pelepitelo, mo te kau Levite, mo te kau tagata leʼo matapa, mo te kau hiva, mo te kau tagata faifekau ʼo te fale lotu,* pea mo natou fuli ʼae neʼe mavae kehe mai te hahaʼi ʼo te ʼu fenua ʼo natou mulimuli ki te Lao ʼa te ʼAtua moʼoni,+ fakatahi mo ʼonatou ʼohoana, mo ʼonatou foha pea mo ʼonatou ʼofafine, ia natou fuli ʼae neʼe natou maʼu te ʼatamai malama mo te mahino,* 29 neʼe natou fakatahi age ki ʼonatou tehina, ʼae ko ʼanatou tagata maʼuhiga. Pea neʼe natou fai leva he fakapapau ke natou haʼele ʼi te Lao ʼa te ʼAtua moʼoni, ʼae neʼe foaki age kia natou ʼaki ia Moisese te tagata faifekau ʼa te ʼAtua moʼoni, ʼo natou kole ki te ʼAtua ke ina tauteaʼi natou mo kapau ʼe mole natou fakalogo. Pea neʼe natou fakapapau ke natou mulimuli fakalelei ki te ʼu fakatotonu fuli ʼa Sehova tomatou ʼAliki, mo ʼana faifakamau pea mo ʼana lekula. 30 ʼE mole matou foaki anai ʼomatou ʼofafine ki te hahaʼi ʼo te fenua, pea ʼe mole matou toʼo anai ʼonatou ʼofafine maʼa ʼomatou foha.+

31 Kapau ʼe ʼomai te hahaʼi ʼo te fenua mo ʼonatou koloa pea mo ʼanatou meʼa kai kehekehe* ʼo fakatau ʼi te ʼaho ʼo te Sapato, ʼe mole matou totogi anai he meʼa ʼi te Sapato+ peʼe ʼi he ʼaho taputapu.+ ʼE matou toe fakafisi anai ki te fua ʼo te fitu taʼu,+ ʼo feia mo te ʼu huʼi maʼua fuli pe.+

32 Neʼe matou fakatotonu ke matou tahi foaki ʼi te taʼu fuli te vahe tahi ki te tolu ʼo he sikele* maʼa te tauhi ʼae ʼe fai ʼi te fale* ʼo tomatou ʼAtua,+ 33 ke feala ai hamatou tokakaga ki te ʼu meʼa ʼaeni: te ʼu pane ʼae neʼe hili fakatuʼuga,*+ mo te ʼu molaga meʼa kai ʼae neʼe fai tuʼumaʼu,+ mo te ʼu holokoseta* ʼae neʼe fai tuʼumaʼu ki te ʼu Sapato+ mo te tuʼu afiafi ʼo te mahina,+ mo te ʼu ʼaho lalahi ʼae kua fakatuʼutuʼu ki ai,+ mo te ʼu meʼa taputapu, mo te ʼu molaga ʼo te agahala+ moʼo fakamolemole te ʼu agahala ʼa Iselaele, pea mo te ʼu gaue fuli ʼae neʼe fai ʼi te fale ʼo tomatou ʼAtua.

34 Pea neʼe matou fai he toho ke iloʼi ai te temi ʼae ke ʼave ai te ʼu fafie ki te fale ʼo tomatou ʼAtua e te ʼu famili ʼo te kau pelepitelo, mo te kau Levite pea mo te hahaʼi, ʼi te temi ʼae kua fakatuʼutuʼu ki ai ʼi te taʼu fuli, pea ke tutu ʼi te ʼaletale ʼo Sehova tomatou ʼAtua, ʼo mulimuli pe ki te meʼa ʼae kua tohi ʼi te Lao.+ 35 ʼE matou toe ʼave anai ʼi te taʼu fuli ki te fale ʼo Sehova te ʼu ʼuluaki fua ʼo tomatou kele ʼae kua matutuʼa pea mo te ʼu ʼuluaki fua ʼo te ʼu faʼahiga fuʼu ʼakau kehekehe ʼae kua momoho,+ 36 ʼo feia mo ʼomatou ʼuluaki foha pea mo te ʼuluaki tupu ʼo ʼamatou faga manu,+ ohage ko te meʼa ʼae kua tohi ʼi te Lao, mo te ʼu ʼuluaki tupu ʼo ʼamatou faga pipi, mo ʼamatou faga ovi, pea mo ʼamatou faga tao. ʼE matou ʼave anai ki te fale ʼo tomatou ʼAtua, ki te kau pelepitelo ʼae ʼe gaue ʼi te fale ʼo tomatou ʼAtua.+ 37 Pea ʼe tonu ke matou toe ʼave foki ki te kau pelepitelo, ki te ʼu fale tanakiʼaga meʼa* ʼo te fale ʼo tomatou ʼAtua,+ ia tamatou ʼuluaki falena,+ mo ʼamatou meʼa ʼofa, mo te ʼu fua ʼo te ʼu fuʼu ʼakau kehekehe,+ mo te vino foʼou, mo te lolo.+ Pea ʼe tonu ke matou ʼave ki te kau Levite te vahe tahi ki te hogofulu ʼo te fua ʼo tomatou kele,+ he ʼe ko te kau Levite ʼae ʼe natou tanaki te vahe tahi ki te hogofulu ʼo ʼomatou kolo fuli ʼi te ʼu kele ʼae kua matou gaueʼi.

38 Pea ʼi te temi ʼae ʼe tanaki ai e te kau Levite te vahe tahi ki te hogofulu, ʼe tonu ke fakatahi mo natou ia te pelepitelo, te foha ʼo Alone. Pea ʼe tonu ke toʼo e te kau Levite ʼi te vahe tahi ki te hogofulu ʼaia he vahe tahi ki te hogofulu ʼo momoli ki te fale ʼo tomatou ʼAtua,+ ki te ʼu koga fale* ʼo te fale tanakiʼaga meʼa. 39 He ʼe tonu ke ʼave e te kau Iselaele pea mo te ʼu foha ʼo te kau Levite ki te ʼu fale tanakiʼaga meʼa* ia te ʼu meʼa ʼofa+ meʼa kai,* mo te vino foʼou, pea mo te lolo.+ Pea ʼe toe tuku ai mo te ʼu meʼa kehekehe ʼo te sagatualio, pea ʼe gaue ai te kau pelepitelo, mo te kau tagata leʼo matapa pea mo te kau hiva. ʼE mole matou meʼa noaʼi anai te fale ʼo tomatou ʼAtua.+

11 Neʼe nonofo te kau ʼaliki ʼa te hahaʼi ʼi Selusalemi.+ Kae ko te toe ʼo te hahaʼi neʼe natou fai leva he toho+ ke alu he tokotahi ʼi he toko hogofulu ʼo maʼuli ʼi Selusalemi, te kolo tapu, kae nonofo te toko hiva ʼae ʼi te tahi age ʼu kolo. 2 Tahi ʼae meʼa, neʼe tapuakiʼi e te hahaʼi te ʼu tagata fuli ʼae neʼe lotolelei ke olo ʼo maʼuʼuli ʼi Selusalemi.

3 Pea koʼeni te ʼu pule ʼo te potu fenua ʼae neʼe maʼuʼuli ʼi Selusalemi. (Ko te toe ʼo Iselaele, mo te kau pelepitelo, mo te kau Levite, mo te kau tagata faifekau ʼo te fale lotu,*+ pea mo te ʼu foha ʼo te ʼu tagata faifekau ʼa Salomone+ neʼe natou maʼuʼuli ʼi te tahi age ʼu kolo ʼo Suta, ʼo natou tahi nofo ʼi tona kolo, mo tona moʼi kele.+

4 Neʼe toe maʼuʼuli foki ʼi Selusalemi ʼihi hahaʼi ʼo Suta mo Pesamino.) ʼI te hahaʼi ʼo Suta, neʼe ko Ataia, foha ʼo Osiasi, foha ʼo Sakalia, foha ʼo Amalia, foha ʼo Sefatia, foha ʼo Malaleele ʼi te ʼu foha ʼo Pelesi,+ 5 pea mo Maasesa, foha ʼo Paluke, foha ʼo Koleose, foha ʼo Hasaia, foha ʼo Atasa, foha ʼo Sosalipe, foha ʼo Sakalia, foha ʼo te tagata Sila. 6 Ko te ʼu foha fuli ʼo Pelesi ʼae neʼe nonofo ʼi Selusalemi neʼe ko te ʼu tagata malolohi ʼe toko 468.

7 Pea koʼeni te hahaʼi ʼo Pesamino: ko Salu,+ foha ʼo Mesulame, foha ʼo Soete, foha ʼo Petasa, foha ʼo Kolasa, foha ʼo Maasesa, foha ʼo Itiele, foha ʼo Iesaia, 8 pea neʼe hoko mai kia ia ia Kapai mo Salai, neʼe natou toko 928. 9 Pea neʼe tokaga kia natou ia Soele te foha ʼo Sikili, pea neʼe hoa kia ia ia Suta te foha ʼo Asenua ki te tokaga ki te kolo.

10 ʼI te kau pelepitelo: ko Setasa, foha ʼo Sosalipe, mo Sakine,+ 11 mo Selasa, foha ʼo Ilekisa, foha ʼo Mesulame, foha ʼo Satoke, foha ʼo Melasote, foha ʼo Ahitupe,+ te tagata takitaki ʼo te fale lotu* ʼo te ʼAtua moʼoni, 12 pea mo ʼonatou tehina ʼae neʼe gaue ʼi te fale lotu, neʼe natou toko 822. Pea ko Atasa, foha ʼo Seloame, foha ʼo Pelalia, foha ʼo Amatisi, foha ʼo Sakalia, foha ʼo Pasule,+ foha ʼo Malekisa, 13 pea mo ʼona tehina, te ʼu pule famili, neʼe natou toko 242. Pea ko Amisai, foha ʼo Asaleele, foha ʼo Asai, foha ʼo Mesilemote, foha ʼo Imele, 14 pea mo ʼonatou tehina, ʼae neʼe ko he ʼu tagata malolohi mo lototoʼa, neʼe natou toko 128. Pea neʼe tokaga kia natou ia Sapetiele, ʼae neʼe kau ki he famili maʼuhiga.

15 Pea ʼi te kau Levite: ko Semaea,+ foha ʼo Asupe, foha ʼo Aselikame, foha ʼo Asapea, foha ʼo Puni, 16 pea mo Sapetai+ mo Sosapate,+ ʼae neʼe nā kau ʼi te kau pule ʼo te kau Levite pea mo tokakaga ki te gaue ʼae neʼe fai ʼi tuʼa atu ʼo te fale ʼo te ʼAtua moʼoni, 17 pea mo Matania,+ foha ʼo Mikea, foha ʼo Sapeti, foha ʼo Asafe,+ te pule kauhiva, ʼae neʼe ina takitaki te ʼu fakavikiviki ʼae neʼe fai lolotoga te faikole,+ pea mo Pakepukia, ʼae neʼe tokoni kia ia, pea mo Apeta, foha ʼo Samua, foha ʼo Kalale, foha ʼo Setutune.+ 18 Neʼe toko 284 ia te kau Levite fuli ʼae neʼe nonofo ʼi te kolo tapu.

19 Pea ko te kau tagata leʼo matapa neʼe ko Akupe, mo Talemone+ pea mo ʼonā tehina ʼae neʼe natou leʼo te ʼu matapa, neʼe natou toko 172.

20 Ko te toe ʼo Iselaele, mo te kau pelepitelo pea mo te kau Levite neʼe natou nonofo ʼi te tahi age ʼu kolo ʼo Suta, ʼo natou tahi nofo ʼi tona tofiʼa. 21 Neʼe nonofo te kau tagata faifekau ʼo te fale lotu*+ ʼi Ofeli,+ pea neʼe tokakaga kia natou ia Tesika mo Kisepa.

22 Neʼe tokaga ki te kau Levite ʼae ʼi Selusalemi ia Usi, foha ʼo Pani, foha ʼo Asapea, foha ʼo Matania,+ foha ʼo Mika, ʼi te ʼu foha ʼo Asafe, te kau hiva. Neʼe ko ia ʼae neʼe tokaga ki te gaue ʼo te fale ʼo te ʼAtua moʼoni. 23 Koteʼuhi neʼe fai e te hau he fakatotonu ʼo ʼuhiga mo natou,+ ke fakatuʼutuʼu ke foaki ʼi te ʼaho fuli ki te kau hiva ia te ʼu meʼa ʼae ʼe ʼaoga kia natou. 24 Ko Petasia, foha ʼo Mesesapeele, ʼi te ʼu foha ʼo Sela, foha ʼo Suta neʼe ko te tagata faitokoni ʼa te hau ʼo ʼuhiga mo te ʼu aluʼaga fuli ʼa te hahaʼi.

25 Koʼeni te ʼu higoa ʼo te ʼu kiʼi kolo mo ʼanatou gaueʼaga: Neʼe nonofo ʼihi ʼo Suta ʼi Kiliate-alepa,+ mo Tiponi pea mo Sekapeteseele.+ Neʼe natou toe nonofo foki ʼi te ʼu kolo mo te ʼu kolo liliki ʼae neʼe ʼi ʼonatou tafaʼaki. 26 Neʼe nonofo ʼihi ʼi Sesua, mo Molata,+ mo Pete-paleti,+ 27 mo Hatesale-suale,+ mo Pele-sepa pea mo te ʼu kolo ʼae ʼi ʼona tafaʼaki, 28 mo Tesikelake,+ mo Mekona pea mo te ʼu kolo ʼae ʼi ʼona tafaʼaki, 29 mo Ene-limoni,+ mo Solea,+ mo Salamuti, 30 mo Sanoaki,+ mo Atulami pea mo ʼonā kolo liliki, mo Lakisi+ pea mo ʼona kele, pea mo Aseka+ pea mo te ʼu kolo ʼae ʼi ʼona tafaʼaki. Neʼe natou nonofo ai mai Pele-sepa ʼo kaku ki te potu fenua lauveliveli ʼo Hinome.+

31 Pea neʼe nonofo te hahaʼi ʼo Pesamino ʼi Kepa,+ mo Mikemase, mo Aisa, mo Petele+ pea mo te ʼu kolo ʼae ʼi ʼona tafaʼaki, 32 mo Anatote,+ mo Nope,+ mo Anania, 33 mo Atesoli, mo Lama,+ mo Kitaimi, 34 mo Atite, mo Tesepoimi, mo Nepalate, 35 mo Loti, pea mo Ono,+ te potu fenua ʼo te kau tufuga. 36 Pea neʼe hinoʼi ʼihi kutuga* Levite ʼae mai Suta ke olo ʼo nonofo ʼi Pesamino.

12 Koʼeni te kau pelepitelo mo te kau Levite ʼae neʼe olo mo Solopapele,+ te foha ʼo Salatiele,+ pea mo Sesua:+ ko Selasa, mo Selemia, mo Esetalasi, 2 mo Amalia, mo Maluke, mo Atuse, 3 mo Sekania, mo Leume, mo Melemote, 4 mo Ito, mo Kinetoi, mo Apisa, 5 mo Misamine, mo Maatia, mo Pileka, 6 mo Semaea, mo Sosalipe, mo Setasa, 7 mo Salu, mo Amoke, mo Ilekisa, pea mo Setasa. Neʼe ko te kau pule ʼaia ʼo te kau pelepitelo mo ʼonatou tehina ʼi te temi ʼo Sesua.

8 Ko te kau Levite neʼe ko Sesua, mo Pinui, mo Katemiele,+ mo Selepea, mo Suta, pea mo Matania,+ ʼae neʼe ina takitaki mo ʼona tehina te ʼu hiva fakafetaʼi. 9 Pea ko Pakepukia mo Uni, ʼonatou tehina, neʼe nā tutuʼu ʼo haga kia natou ʼi te temi ʼae neʼe tonu ke nā leʼo ai.* 10 Ko Sesua ko te tamai ʼa Sosakimi, pea ko Sosakimi ko te tamai ʼa Eliasipe,+ pea ko Eliasipe ko te tamai ʼa Sosata.+ 11 Pea ko Sosata, ko te tamai ʼa Sonatane, pea ko Sonatane ko te tamai ʼa Satua.

12 Koʼeni te kau pelepitelo, ia te ʼu pule famili ʼi te temi ʼo Sosakimi: ko Melasa ʼae neʼe ina fakafofoga te famili ʼo Selasa,+ pea ki te famili ʼo Selemia, ko Hanania, 13 ki te famili ʼo Esetalasi,+ ko Mesulame, ki te famili ʼo Amalia, ko Sokanane, 14 ki te famili ʼo Meluki, ko Sonatane, ki te famili ʼo Sipania, ko Sosefo, 15 ki te famili ʼo Alime,+ ko Atana, ki te famili ʼo Melasote, ko Elekai, 16 ki te famili ʼo Ito, ko Sakalia, ki te famili ʼo Kinetone, ko Mesulame, 17 ki te famili ʼo Apisa,+ ko Sikili, ki te famili ʼo Minesamino, ko . . . ,* ki te famili ʼo Maotia, ko Piletai, 18 ki te famili ʼo Pileka,+ ko Samua, ki te famili ʼo Semaea, ko Seonatane, 19 ki te famili ʼo Sosalipe, ko Matenai, ki te famili ʼo Setasa,+ ko Usi, 20 ki te famili ʼo Salai, ko Kalai, ki te famili ʼo Amoke, ko Epele, 21 ki te famili ʼo Ilekisa, ko Asapea, pea ki te famili ʼo Setasa, ko Netanele.

22 ʼI te temi ʼo Eliasipe, mo Sosata, mo Seonane pea mo Satua+ neʼe tohi ia te ʼu higoa ʼo te ʼu pule famili ʼo te kau Levite, ʼo feia mo te kau pelepitelo ʼo kaku ki te temi pule ʼo Taliusi, te tagata Pelesia.

23 Neʼe tohi ia te ʼu higoa ʼo te ʼu pule famili ʼo te kau Levite ʼi te tohi ʼo te hisitolia ʼo te temi ʼaia, ʼo kaku ki te temi ʼo Seonane, te foha ʼo Eliasipe. 24 Pea ko te ʼu pule ʼo te kau Levite neʼe ko Asapea, mo Selepea pea mo Sesua+ te foha ʼo Katemiele.+ Pea neʼe tutuʼu fakakutuga ʼonatou tehina, te kau leʼo, ʼo haga kia natou, pea mo natou fakavikiviki pea mo fakafetaʼi ʼo mulimuli ki te ʼu fakatotonu ʼa Tavite,+ te tagata ʼa te ʼAtua moʼoni. 25 Ko te kau tagata leʼo matapa+ neʼe ko Matania,+ mo Pakepukia, mo Apetiasi, mo Mesulame, mo Talemone pea mo Akupe+ pea neʼe natou leʼo te ʼu fale tanakiʼaga meʼa ʼae neʼe ovi ki te ʼu matapa. 26 Ko natou ʼaia neʼe gaue ʼi te temi ʼo Sosakimi, te foha ʼo Sesua,+ te foha ʼo Sotesatake pea mo te temi ʼo Neemia te kovana pea mo Esetalasi,+ te pelepitelo mo tagata hiki tohi.*

27 ʼI te temi ʼae neʼe tonu ai ke fakatapuʼi te ʼu kaupa ʼo Selusalemi, neʼe kumi ia te kau Levite ʼi te ʼu koga meʼa fuli ʼae neʼe natou nonofo ai pea neʼe ʼaumai natou ki Selusalemi, ke fakahoko te toʼotoʼoga ʼaia ʼaki he fakafiafia, mo he ʼu hiva fakafetaʼi,+ pea mo he ʼu simepale, mo he ʼu alepa pea mo he tahi age ʼu meʼa faimaholo. 28 Pea neʼe fakatahitahi leva ia te ʼu foha ʼo te kau hiva* mai te koga fenua,* mo te ʼu kolo ʼae ʼi te ʼu tafaʼaki ʼo Selusalemi, mo te ʼu kolo liliki ʼo te kau Netofa,+ 29 mo Pete-kilekale+ pea mo te ʼu koga meʼa ʼae ʼi te ʼu tafaʼaki ʼo Kepa+ mo Asimaveti,+ he neʼe laga e te kau hiva he ʼu kolo liliki maʼa natou ʼi te ʼu tafaʼaki ʼo Selusalemi. 30 Pea neʼe fakamaʼa e te kau pelepitelo mo te kau Levite ia natou totonu, pea neʼe natou fakamaʼa te hahaʼi,+ mo te ʼu matapa+ pea mo te kaupa.+

31 Pea neʼe au fakatotonu ke fekakeʼi te kau ʼaliki ʼo Suta ʼi te kaupa. Pea neʼe au hinoʼi he ʼu kauhiva fakafetaʼi ʼe lua ʼe kaugamalie mo ni hahaʼi ke natou muliʼi ia natou, pea neʼe alu te tahi kauhiva ʼi te faʼahi mataʼu ʼo te kaupa ki te Matapa ʼo Te ’u Tuʼuga Lefulefu.+ 32 Neʼe muliʼi natou e Hosaia pea mo te vaelua ʼo te kau ʼaliki ʼo Suta, 33 mo Asalia, mo Esetalasi, mo Mesulame, 34 mo Suta, mo Pesamino, mo Semaea, pea mo Selemia. 35 Neʼe fakatahi mo natou ʼihi foha ʼo te kau pelepitelo mo ʼanatou fakatagi pupuhi:+ ko Sakalia, foha ʼo Sonatane, foha ʼo Semaea, foha ʼo Matania, foha ʼo Mikaia, foha ʼo Sakule, foha ʼo Asafe,+ 36 pea mo ʼona tehina ko Semaea, mo Asaleele, mo Milalai, mo Kilalai, mo Maai, mo Netanele, mo Suta, pea mo Hanani mo te ʼu meʼa faimaholo ʼa Tavite,+ te tagata ʼa te ʼAtua moʼoni. Neʼe haʼele ʼi ʼonatou muʼa ia Esetalasi,+ te tagata hiki tohi.* 37 ʼI te Matapa ʼo Te Matapuna Vai,+ neʼe hoko atu tanatou haʼele mo hake ʼi te kaupa, ʼo fakalaka ʼi te Tuʼuga+ ʼo te Kolo ʼo Tavite.+ Neʼe natou fakalaka ʼi te Fale ʼo Tavite ʼo hoko atu ʼo kaku ki te Matapa ʼo Te ʼu Vai,+ ʼae ʼi te potu esite.

38 Pea neʼe alu te tahi kauhiva fakafetaʼi ʼi te tahi age faʼahi,* pea neʼe au muliʼi natou mo te vaelua ʼo te hahaʼi ʼi te kaupa. Neʼe natou fakalaka ʼi te Tule ʼo Te ʼu Gutuʼumu+ ʼo kaku ki te Kaupa Laulahi,+ 39 pea neʼe hoko atu tanatou haʼele ʼo fakalaka ʼi te Matapa ʼo Efalaimi,+ pea neʼe natou olo ki te Matapa ʼo Te Kolo ʼAfeā,+ pea mo te Matapa ʼo Te ʼu Ika,+ pea mo te Tule ʼo Ananeele,+ pea mo te Tule ʼo Maa, pea mo te Matapa ʼo Te ʼu Ovi.+ Neʼe natou tutuʼu leva ʼi te Matapa ʼo Te Kau Leʼo.

40 Ki muli age, neʼe tutuʼu leva te ʼu kauhiva fakafetaʼi ʼaia ʼe lua ia muʼa ʼo te fale ʼo te ʼAtua moʼoni, ʼo feia mo au pea mo te vaelua ʼo te ʼu tagata ʼae ʼe hoa ki te kau pule, ʼae neʼe fakatahi mo au, 41 pea mo te kau pelepitelo ko Eliakimi, mo Maasesa, mo Minesamino, mo Mikaia, mo Elioenai, mo Sakalia, pea mo Hanania mo ʼanatou fakatagi pupuhi, 42 pea mo Maasesa, mo Semaea, mo Eleasale, mo Usi, mo Sokanane, mo Malekisa, mo Elame pea mo Esele. Pea neʼe hiva leʼo lahi te kau hiva ʼi te takitaki ʼa Siselakia.

43 ʼI te ʼaho ʼaia, neʼe natou momoli he ʼu toe sakilifisio lalahi pea mo natou fakafiafia,+ koteʼuhi neʼe fakafiafiaʼi natou e te ʼAtua moʼoni ʼaki he toe fiafia lahi. Neʼe toe fakafiafia foki mo te hahaʼi fafine pea mo te ʼu fanau,+ ʼo logo ai ki mamaʼo te fiafia ʼo Selusalemi.+

44 ʼI te ʼaho ʼaia, neʼe fakanofo te ʼu tagata ke tokakaga ki te ʼu fale ʼae neʼe tanaki ai+ te ʼu meʼa ʼofa,+ mo te ʼu ʼuluaki fua,+ pea mo te vahe tahi ki te hogofulu.+ Neʼe tonu ke natou tanaki ki ai te ʼu vahe ʼae neʼe toʼo mai te ʼu gaueʼaga ʼo te ʼu kolo, ʼae neʼe fakamaʼua ʼi te Lao+ ke foaki maʼa te kau pelepitelo pea mo te kau Levite,+ he neʼe hoko he fakafiafia ʼi Suta ʼuhi ko te gaue ʼa te kau pelepitelo pea mo te kau Levite. 45 Pea neʼe natou kamata fakahoko te ʼu gaue ʼo tonatou ʼAtua pea mo te maʼua ʼae ʼo te fakamaʼa, ohage pe ko te kau hiva pea mo te kau tagata leʼo matapa, ʼo mulimuli ki te ʼu fakatotonu ʼa Tavite pea mo tona foha ko Salomone. 46 Koteʼuhi talu mai fualoa, ʼi te temi ʼo Tavite pea mo Asafe, neʼe ʼi ai he ʼu pule kau hiva pea neʼe natou takitaki te ʼu hiva fakavikiviki pea mo fakafetaʼi ʼae neʼe fai ki te ʼAtua.+ 47 Pea ʼi te temi ʼo Solopapele+ pea mo te temi ʼo Neemia, neʼe foaki e Iselaele katoa te ʼu vahe ʼo te kau hiva+ pea mo te kau tagata leʼo matapa,+ ʼo mulimuli pe ki te ʼu meʼa ʼae neʼe ʼaoga kia natou ʼi te ʼaho fuli. Neʼe natou toe tuku keheʼi foki te vahe ʼo te kau Levite,+ pea neʼe tuku keheʼi e te kau Levite te vahe ʼo te hologa ʼo Alone.

13 ʼI te ʼaho ʼaia, neʼe lau ai te tohi ʼa Moisese ke logo ki ai te hahaʼi,+ pea neʼe tohi ai ʼe mole tonu ʼi he temi ke kau ki te hahaʼi ʼae ʼe tauhi ki te ʼAtua moʼoni+ he Amone peʼe ko he Moape,+ 2 koteʼuhi neʼe mole natou ʼomai ki te kau Iselaele mo he pane pea mo he vai, kae neʼe natou totogi ia Palaame ke faitutuku kia natou.+ Kae neʼe fakaliliu e tomatou ʼAtua te faitutuku ʼaia ko he tapuakina.+ 3 ʼI te temi pe ʼae neʼe natou logo ai ki te Lao, neʼe natou kamata fakamavae leva mai Iselaele ia natou fuli ʼae neʼe hifo mai he kau matapule.*+

4 Kae ʼi muʼa ʼo te hoko ʼo te faʼahi ʼaia, ko te pelepitelo ʼae neʼe tokaga ki te ʼu fale tanakiʼaga meʼa* ʼo te fale* ʼo tomatou ʼAtua+ neʼe ko Eliasipe,+ te kaiga ʼo Topie.+ 5 Pea neʼe ina foaki age ki ai he fale tanakiʼaga meʼa* ʼe lahi, ʼae ki muʼa atu neʼe tuku ai te molaga meʼa kai, mo te iseso hina,* mo te ʼu meʼa kehekehe, ʼo feia mo te vahe tahi ki te hogofulu ʼo te fulumeto,* mo te vino foʼou pea mo te lolo,+ ʼae neʼe tonu ke foaki ki te kau Levite,+ mo te kau hiva pea mo te kau tagata leʼo matapa. Neʼe toe tuku ai foki mo te ʼu meʼa ʼofa maʼa te kau pelepitelo.+

6 Pea neʼe mole au nofo ʼi Selusalemi ʼi te temi ʼaia, he neʼe au alu ki te hau ʼi te 32 taʼu+ ʼo te pule ʼa Aletasese,+ te Hau ʼo Papiloni. Pea ki muli age, neʼe au kole leva ki te hau ke au toe liliu. 7 Neʼe au tau atu leva ki Selusalemi pea neʼe au tokagaʼi te meʼa kovi ʼae neʼe fai e Eliasipe,+ ʼi tana foaki age kia Topie+ he fale tanakiʼaga meʼa ʼi te malaʼe ʼo te fale ʼo te ʼAtua moʼoni. 8 Neʼe mole au leleiʼia ʼosi te meʼa ʼaia neʼe ina fai, koia neʼe au laku ai ki tuʼa te ʼu meʼa fuli ʼa Topie ʼae neʼe tuku ʼi te fale tanakiʼaga meʼa.* 9 Hili ʼaia, neʼe au fakatotonu ke fakamaʼa te ʼu fale tanakiʼaga meʼa.* Pea neʼe au toe tanaki ki ai te ʼu meʼa ʼae ʼe ʼaoga ki te gaue ʼi te fale ʼo te ʼAtua moʼoni,+ mo te ʼu molaga meʼa kai pea mo te iseso hina.+

10 Neʼe au toe iloʼi foki neʼe mole foaki age ki te kau Levite tonatou vahe,+ koia neʼe mavae ai te kau Levite mo te kau hiva ʼae neʼe natou fai te gaue, ʼo tahi alu ki tana gaueʼaga.+ 11 Koia neʼe au valokiʼi ai te ʼu tagata ʼae ʼe hoa ki te kau pule,+ ʼo au ui age: “He koʼe koa neʼe kotou meʼa noaʼi ia te fale ʼo te ʼAtua moʼoni?”+ Neʼe au fakatahitahiʼi leva natou pea mo au toe hinoʼi natou ki ʼanatou gaue. 12 Pea neʼe ʼaumai e Suta katoa te vahe tahi ki te hogofulu+ ʼo te fulumeto, mo te vino foʼou pea mo te lolo ki te ʼu fale tanakiʼaga meʼa.+ 13 Neʼe au fakanofo leva ia Selemi, te pelepitelo, mo Satoke, te tagata hiki tohi* pea mo Petasa ʼi te kau Levite ke natou tokakaga ki te ʼu fale tanakiʼaga meʼa, pea neʼe tokoni kia natou ia Hanane, te foha ʼo Sakule, te foha ʼo Matania, he neʼe tuha ia te ʼu tagata ʼaia mo te falala. Ko tanatou gaue neʼe ko te foaki ki ʼonatou tehina ʼonatou vahe.

14 “Siʼoku ʼAtua, ke ke manatuʼi au+ ʼo ʼuhiga mo te faʼahi ʼaia, pea ʼaua naʼa ke galoʼi toku ʼofa agatonu ʼae neʼe au fakaha ki te fale ʼo toku ʼAtua pea mo te ʼu gaue ʼae ʼe fakahoko ai.”+

15 ʼI te ʼu ʼaho ʼaia, neʼe au sio ki te hahaʼi ʼi Suta neʼe natou molomoloki te ʼu vite ʼi te ʼu lomiʼaga vite ʼi te Sapato,+ mo natou ʼaumai ki Selusalemi ʼi te ʼaho ʼo te Sapato te fulumeto ʼae neʼe natou hili ki te ʼu asino, pea mo natou ʼaumai te vino, mo te ʼu fuaʼi vite, mo te ʼu fuaʼi fiku, pea mo te ʼu faʼahiga kavega kehekehe.+ Pea neʼe au fakatokaga age kia natou ke ʼaua naʼa natou fakatau ni meʼa ʼi te ʼaho ʼaia.* 16 Pea ko te kau Tile ʼae neʼe nonofo ʼi te kolo, neʼe natou ʼaumai ni ika pea mo te ʼu faʼahiga koloa kehekehe, ʼo fakatau ki te hahaʼi ʼo Suta pea ʼi Selusalemi, ʼi te Sapato.+ 17 Pea neʼe au valokiʼi te kau ʼaliki ʼo Suta ʼo au ui age kia natou: “Kotea koa te meʼa kovi ʼaeni ʼe kotou fai, ʼo koutou moamoagaʼi ai te ʼaho ʼo te Sapato? 18 Neʼe mole koa la ko te meʼa ʼaia neʼe fai e ʼakotou kui, ʼo tupu ai te fakato e totatou ʼAtua te ʼu malaʼia fuli ʼaeni kia tatou pea mo te kolo ʼaeni? Pea ʼe kotou fakaʼaʼasili te hauhau ʼo te ʼAtua ki Iselaele ʼi takotou moamoagaʼi ia te Sapato.”+

19 Koia, ʼi te temi pe ʼae neʼe kamata malu ai te afiafi ʼi Selusalemi, ʼi muʼa ʼo te Sapato, neʼe au fakatotonu ke pupunu te ʼu matapa. Neʼe au toe ui age foki kia natou ke hoki avahi te ʼu matapa moka kua ʼosi ia te Sapato, pea neʼe au fakatuʼu ʼihi ʼo taku kau gaue ʼi te ʼu matapa, ke ʼaua naʼa ʼaumai ni koloa ʼi te ʼaho ʼo te Sapato. 20 Koia ko te kau faikoloa ʼae neʼe natou fakatau te ʼu faʼahiga koloa kehekehe neʼe natou nonofo ʼi te poʼuli ʼi tuʼa ʼo Selusalemi, tuʼa tahi peʼe tuʼa lua. 21 Pea neʼe au fai kia natou te fakatokaga ʼo au ui age: “He koʼe ʼe kotou nonofo ʼi te poʼuli ʼi te muʼa kaupa? Kapau ʼe kotou toe fai te faʼahi ʼaia, ʼe au kapu anai koutou.” Talu mai te ʼaho ʼaia, neʼe mole natou toe ʼomai ʼi te Sapato.

22 Pea neʼe au ui age ki te kau Levite ke natou fakamaʼa tuʼumaʼu ia natou pea ke natou ʼomai ʼo leʼo te ʼu matapa, ke taupau ai te ʼuhiga taputapu ʼo te Sapato.+ “Siʼoku ʼAtua, ke ke toe manatuʼi neʼe au fai te faʼahi ʼaia, pea mo ke ʼofa mai kia au ʼo mulimuli ki te lahi ʼo tou ʼofa agatonu.”+

23 ʼI te ʼu ʼaho ʼaia, neʼe au toe sio foki ki he kau Sutea neʼe ʼohoana mo* he ʼu fafine+ mai Asoti,+ mo Amone pea mo Moape.+ 24 Ko te vaelua ʼo ʼonatou foha neʼe palalau ʼi te lea Fakaasoti pea ko te tahi vaelua neʼe palalau ʼi ni lea ʼa te ʼu faʼahiga hahaʼi kehekehe, kae neʼe mole poto pe la he tahi ia natou ʼi te palalau ʼi te lea ʼa te kau Sutea. 25 Koia, neʼe au fakatonutonuʼi ai natou pea mo fakatokaga natou ki te ʼu tautea ʼa te ʼAtua. Neʼe au ta ʼihi tagata+ pea mo fusi ʼonatou lauʼulu, pea neʼe au fakatotonu ke natou fakapapau ʼi te huafa ʼo te ʼAtua: “ ʼE mole tonu ke kotou foaki ʼokotou ʼofafine ki ʼonatou foha, pea ʼe mole tonu ke kotou tali ke ʼohoana ʼonatou ʼofafine mo ʼokotou foha peʼe ko koutou totonu.+ 26 Neʼe mole agahala koa la ia Salomone te Hau ʼo Iselaele ʼuhi ko te faʼahi ʼaia? Neʼe mole he tahi age hau neʼe hage ko ia ʼi te ʼatu puleʼaga.+ Pea neʼe ʼofainaʼi e tona ʼAtua,+ ʼo ina fakanofo ke hau ʼi Iselaele katoa. Kae neʼe fakaneke ia ia e ʼona ʼohoana matapule ke agahala.+ 27 Koia, ʼe ko he meʼa fakaufiufi ʼosi takotou fai te agahala lahi ʼaia ʼo tupu ai takotou heʼe agatonu ki totatou ʼAtua, ʼi takotou ʼohoanaʼi he ʼu fafine matapule.”+

28 Ko he tahi ʼo te ʼu foha ʼo Sosata,+ te foha ʼo Eliasipe,+ te pelepitelo lahi neʼe ʼohoana mo he ʼofafine ʼo Sanepala,+ te tagata Oloni. Koia neʼe au kapu ai ia ia.

29 “Siʼoku ʼAtua, ke ke manatuʼi pea mo ke tauteaʼi natou, he neʼe natou ʼulihi te gaue fakapelepitelo pea mo te fuakava ʼae neʼe fai e te kau pelepitelo+ pea mo te kau Levite.”+

30 Pea neʼe au fakamaʼa leva natou mai te ʼu faʼahiga meʼa heʼe maʼa kehekehe ʼae neʼe haʼu mai te kau matapule. Pea neʼe au hinoʼi he ʼu gaue ke fai e te kau pelepitelo pea mo te kau Levite, pea ke natou tahi tuʼu ʼi tana gaue.+ 31 Pea neʼe au fai he fakatuʼutuʼu ʼo ʼuhiga mo te ʼaumai ʼo te fafie+ ʼi te temi ʼae kua fakatuʼutuʼu ki ai pea mo te ʼu ʼuluaki fua ʼae kua momoho.

“Siʼoku ʼAtua, ke ke manatuʼi au pea mo ke tapuakiʼi au.”+