ESITELE

1 Koʼeni te aluʼaga ʼae neʼe hoko ʼi te temi ʼo Asuelusi,* te Asuelusi ʼae neʼe pule kia potu fenua ʼe 127+ mai Initia ki Etiopea,* 2 ʼi te temi ʼae neʼe pule ai te Hau ko Asuelusi ʼi Suse,+ te kolo tau.* 3 ʼI te tolu taʼu ʼo tona temi hau, neʼe ina fai he kaitahi ki tana kau ʼaliki fuli pea mo natou ʼae ʼe gaue ki tona puleʼaga. Neʼe fakatahitahi ʼi ʼona muʼa ia te kautau ʼo Pelesia+ mo Metia,+ mo te kau lalahi pea mo te ʼu kovana ʼo ʼona potu fenua. 4 Pea lolotoga ʼaho ʼe 180, neʼe ina fakaha age kia natou te ʼu koloa ʼo tona puleʼaga taulekaleka mo te lahi pea mo te matalelei ʼo tona ʼalikisia. 5 Pea ʼi te fakaʼosi ʼo te ʼu ʼaho ʼaia, neʼe fai e te hau he kaitahi maʼa te hahaʼi fuli ʼae neʼe ʼi Suse te kolo tau,* ʼi te malaʼe ʼo te fale hau lolotoga ʼaho ʼe fitu. Neʼe kau ki ai te hahaʼi maʼuhiga mo natou ʼae ʼe malalo. 6 Neʼe teuteuʼi ke matalelei ia te malaʼe ʼaki te ʼu lito neʼe fai ʼaki te lino* pea mo he ʼu kie ʼuʼui pea mo te tahi ʼu kie, ʼae neʼe haʼi ʼaki he ʼu moʼi kie. Neʼe ʼi ai mo he ʼu kie huʼa lotuma fakapoʼuli neʼe fai ʼaki te fuluʼi akeno pea neʼe fakamaʼu ʼaki he ʼu mama siliva. Pea neʼe ʼi ai mo he ʼu pou maka maʼugataʼa, mo he ʼu palepale aulo mo siliva ʼi he tale neʼe fola ʼaki te polefile,* mo te maka maʼugataʼa hina mo ʼuli, mo te nakele.*

7 Neʼe inu te vino ʼi he ʼu ipu aulo, pea neʼe kehekehe fuli te ʼu ipu aulo ʼaia. Neʼe lahi te vino ʼa te hau, ʼo mulimuli ki te ʼu koloa ʼae neʼe ina maʼu. 8 Neʼe inu te vino ʼo mulimuli ki te lao ʼae ke mole fakakinauʼi* he tahi ke inu, koteʼuhi neʼe kua ʼosi fakatuʼutuʼu e te hau pea mo natou ʼae ʼe gaue ki tona puleʼaga ke tahi inu te hahaʼi ʼo mulimuli ki tona loto faʼitaliha.

9 Neʼe toe fai e te Fineʼaliki ko Vaseti+ he kaitahi maʼa te hahaʼi fafine ʼi te fale ʼo te Hau ko Asuelusi.

10 ʼI te fitu ʼaho, neʼe fiafia ai te hau ʼuhi ko te vino, ʼo ina ui kia Meumani, mo Pisita, mo Alepone,+ mo Pikita, mo Apakita, mo Setale pea mo Kalekasi, ia te ʼu tagata ʼe toko fitu ʼae neʼe gaue ʼi te fale hau pea mo tokakaga ki te ʼu meʼa ʼae neʼe ʼaoga ki te Hau ko Asuelusi, 11 ke ʼaumai te Fineʼaliki ko Vaseti, ʼae ʼe ina ʼai te pale fakahau ʼi tona ʼulu, ke fakaha ki te hahaʼi pea mo te kau ʼaliki tona finemui, he neʼe finemui ʼaupito. 12 Kae ʼi te fakaha age e te ʼu tagata ʼae neʼe gaue ʼi te fale hau te fakatotonu ʼa te hau, neʼe mole fia alu te Fineʼaliki ko Vaseti. Neʼe ita lahi ai te hau.

13 Neʼe palalau leva ia te hau ki te kau popoto ʼae neʼe natou iloʼi lelei te ʼu fakamau ʼae neʼe fai ki muʼa atu (koteʼuhi ko te ʼu aluʼaga ʼae neʼe hoko ki te hau neʼe tonu ke vakaʼi e natou fuli ʼae neʼe popoto ʼi te lao pea mo te ʼu faifakamau, 14 pea ko natou ʼae neʼe nonofo ovi kia ia neʼe ko Kalesena, mo Sitale, mo Atemata, mo Talesisi, mo Melese, mo Malesena pea mo Memukani, te kau ʼaliki ʼe toko fitu+ ʼo Pelesia mo Metia, pea ko natou ʼaia neʼe olo tuʼumaʼu ki te hau pea neʼe natou maʼu he ʼu tuʼulaga maʼuhiga ʼi te puleʼaga). 15 Neʼe fehuʼi age e te hau kia natou: “Kotea ʼae ʼe tonu ke fai ki te Fineʼaliki ko Vaseti ʼo mulimuli ki te lao? He neʼe mole fakalogo ki te fakatotonu ʼa te Hau ko Asuelusi, ʼae neʼe fakaha age e natou ʼae ʼe gaue ʼi te fale hau.”

16 Neʼe tali leva e Memukani ia muʼa ʼo te hau pea mo te kau ʼaliki: “Neʼe kovi ʼosi te aga ʼae neʼe fai e te Fineʼaliki ko Vaseti,+ he neʼe mole ina fai pe ki te hau kae ki te kau ʼaliki fuli pea mo te hahaʼi fuli ʼi te ʼu potu fenua fuli ʼo te Hau ko Asuelusi. 17 He ʼe ko te meʼa ʼae neʼe fai e te fineʼaliki ʼe iloʼi anai e te ʼu fafine ʼohoana fuli, pea ʼe natou fehihiʼa anai ki ʼonatou ʼohoana ʼo natou ui: ‘Neʼe ui e te Hau ko Asuelusi ke ʼaumai te Fineʼaliki ko Vaseti, kae neʼe mole fia alu ia.’ 18 Pea ʼi te temi ʼaia, moka iloʼi anai e te ʼu ʼohoana ʼo te kau ʼaliki ʼo Pelesia mo Metia te meʼa ʼae neʼe fai e te fineʼaliki, ʼe natou fakamatala anai ki te kau ʼaliki fuli ʼo te hau, pea ʼe tupu ai anai he fehiʼa mo he ita lahi. 19 Koia, kapau ʼe lelei kia mata ʼo te hau, ke ina tohi he lao, pea ke kau te lao ʼaia ki te ʼu lao ʼa te kau Pelesia mo Metia, ʼae ʼe mole feala ke molehi:+ Ke ʼaua naʼa toe tuʼu ia Vaseti ia muʼa ʼo te Hau ko Asuelusi pea ke foaki e te hau tona tuʼulaga fineʼaliki ki he fafine ʼe lelei age ia ia. 20 Pea ka iloʼi anai te lao ʼaia ʼa te hau ʼi tona puleʼaga katoa, ʼe fakaʼapaʼapa anai te ʼu fafine ʼohoana fuli ki ʼonatou ʼohoana, mai ia ia ʼae ʼe maʼuhiga kia ia ʼae ʼe malalo.”

21 Neʼe leleiʼia e te hau pea mo te kau ʼaliki te manatu ʼaia, pea neʼe fai e te hau te meʼa ʼae neʼe ui age e Memukani. 22 Koia, neʼe ina momoli ai he ʼu tohi ki te ʼu potu fenua fuli ʼo tona puleʼaga.+ Neʼe fai te ʼu tohi ʼaia ʼo mulimuli pe ki te faʼahiga faitohi ʼa te ʼu potu fenua takitahi pea mo te lea ʼa te hahaʼi, ke feala ai ki te ʼu tagata ʼohoana fuli ke natou pule ʼi ʼonatou loto fale pea mo palalau ʼi te lea ʼo tanatou hahaʼi.

2 Hili te ʼu meʼa ʼaia, ʼi te kua malū ifo ʼo te ita ʼo te Hau ko Asuelusi,+ neʼe ina manatuʼi leva te meʼa ʼae neʼe fai e Vaseti+ pea mo te tonu ʼae neʼe fai ʼo ʼuhiga mo ia.+ 2 Neʼe ui leva e te ʼu tagata ʼae neʼe natou tokakaga ki te ʼu meʼa ʼae ʼe ʼaoga ki te hau: “ ʼE tonu ke kumi ni taʼahine finemui maʼa te hau. 3 Pea ʼe tonu ke fakanofo e te hau, ʼi te ʼu potu fenua fuli ʼo tona puleʼaga,+ he ʼu tagata ke natou ʼaumai te ʼu taʼahine finemui fuli ki Suse, te kolo tau,* ki te fale ʼo te hahaʼi fafine. Ke tokaga kia natou ia Ekai,+ te tagata enuke* ʼa te hau ʼae ʼe ko te tagata leʼo ʼo te hahaʼi fafine, pea ke fakaholoholo natou ʼaki ni lolo magoni ke natou toe finemui age. 4 Pea ko te taʼahine ʼae ʼe leleiʼia ʼaupito anai e te hau, ʼe liliu anai ko te fineʼaliki moʼo fetogi ia Vaseti.”+ Neʼe leleiʼia e te hau te manatu ʼaia, pea neʼe mulimuli ki ai.

5 Neʼe ʼi ai te tagata Sutea ʼi Suse,+ te kolo tau,* neʼe higoa ko Maletokeo.+ Neʼe ko te foha ʼo Saile, foha ʼo Simei, foha ʼo Kisi, te tagata ʼo te telepi ʼo Pesamino.+ 6 Neʼe kau ʼi te hahaʼi ʼo Selusalemi ʼae neʼe ʼave popula fakatahi mo te Hau ʼo Suta ko Sekoniasi,*+ e te Hau ʼo Papiloni ko Nepukanesa. 7 Neʼe ina taupau ia Hatasa,* ʼae ko Esitele, te ʼofafine ʼo te tehina ʼo tana tamai,+ koteʼuhi neʼe kua hala tamai mo faʼe. Neʼe hoihoifua pea mo finemui ia te taʼahine, pea ʼi te mate ʼo tana tamai mo tana faʼe, neʼe taupau ia ia e Maletokeo ohage pe ko hona ʼofafine. 8 ʼI te temi ʼae neʼe tala ai te folafola mo te lao ʼa te hau, neʼe ʼaumai ai te ʼu taʼahine ʼe tokolahi ki Suse, te kolo tau* pea neʼe tokaga ia Ekai kia natou.+ Pea neʼe toe ʼaumai foki mo Esitele ki te fale hau pea neʼe tokaga ki ai ia Ekai, te tagata leʼo ʼo te hahaʼi fafine.

9 Neʼe leleiʼia leva e te tagata leʼo ʼaia ia te taʼahine pea mo ʼofa ai.* Neʼe ina foimo fai atu aipe he ʼu fakatuʼutuʼu ke fai ki ai he ʼu fakaholoholo ʼaki ni lolo magoni,+ pea ke foaki hana meʼa kai makehe. Pea neʼe ina hinoʼi he ʼu taʼahine ʼe toko fitu neʼe ina filifili mai te fale hau ke tokakaga kia ia. Neʼe ina toe ʼave foki ia ia mo te ʼu taʼahine ʼaia ki te faʼahi ʼae ʼe lelei ʼaupito ʼo te fale ʼo te hahaʼi fafine. 10 Neʼe mole fakaha e Esitele he meʼa ʼo ʼuhiga mo tana hahaʼi+ pea mo ʼona kaiga, he neʼe fakatotonu age e Maletokeo+ ke ʼaua naʼa ina fakaha ki he tahi.+ 11 ʼI te ʼaho fuli pe, neʼe fealuʼaki ia Maletokeo ia muʼa ʼo te malaʼe ʼo te fale ʼo te hahaʼi fafine, ke ina iloʼi pe ʼe feafeaʼi te maʼuli ʼo Esitele pea mo te aluʼaga ʼae neʼe hoko kia ia.

12 Neʼe fakahoahoa takitahi te ʼu taʼahine ki te Hau ko Asuelusi. Neʼe hoko te aluʼaga ʼaia hili te ʼu mahina ʼe 12 ʼae neʼe tonu ke teuteuʼi ai ʼonatou sino, he neʼe tonu ke fenei tonatou fakaholoholo ʼaki te ʼu lolo magoni: ko mahina ʼe ono ʼaki te lolo mila*+ pea mo mahina ʼe ono ʼaki te lolo neʼe fai ʼaki te ʼu ʼakau fakamagoni+ pea mo ʼihi atu faʼahiga lolo. 13 Pea neʼe feala ai leva ke alu te taʼahine ki te hau, pea ko he meʼa pe neʼe ina kole neʼe foaki age kia ia moka mavae mai te fale ʼo te hahaʼi fafine ʼo alu ki te fale hau. 14 ʼI te afiafi, neʼe alu ki ai, pea ʼi te uhu ake neʼe alu ki te tahi age fale ʼo te hahaʼi fafine, ʼae neʼe tokaga kia natou ia Saasake, te tagata enuke ʼa te hau+ pea mo te tagata leʼo ʼo te ʼu fafine ʼa te hau. Neʼe mole toe alu ki te hau, gata pe mo kapau neʼe leleiʼia tafito ia ia e te hau pea mo toe pauʼi mai.+

15 Pea neʼe hoko mai leva te temi ʼae neʼe tonu ke alu ai ki te hau ia Esitele, te ʼofafine ʼo Apihaile, tehina ʼo te tamai ʼa Maletokeo, ʼae neʼe ina taupau ia ia ohage pe ko hona ʼofafine.+ Neʼe mole ina kole he meʼa, gata pe ki te ʼu meʼa ʼae neʼe kua ʼosi fakatuʼutuʼu ki ai ia Ekai, te tagata enuke ʼa te hau pea mo te tagata leʼo ʼo te hahaʼi fafine. (Lolotoga te temi ʼaia, neʼe ʼofainaʼi ia Esitele e te hahaʼi fuli ʼae neʼe sisio kia ia.) 16 Neʼe ʼave leva ia Esitele ki te Hau ko Asuelusi ki tona fale hau ʼi te hogofulu mahina, ʼae neʼe ko te mahina ʼo Tepete,* ʼi te fitu taʼu+ ʼo tona temi hau. 17 Pea neʼe ʼofa leva te hau ia Esitele ʼo lahi age ʼi ʼihi age fafine, neʼe ina leleiʼia ʼaupito age ia ia* ʼi te tahi age ʼu taʼahine. Koia neʼe ina hili te pale fakahau ki tona ʼulu pea neʼe ina fakanofo ai ia ia ko te fineʼaliki,+ moʼo fetogi ia Vaseti.+ 18 Pea neʼe fakaafe leva e te hau tana kau ʼaliki pea mo tana hahaʼi gaue fuli ki he kaitahi lahi neʼe ina fai maʼa Esitele. Pea neʼe ina fakatotonu ke fakaʼateainaʼi te hahaʼi pilisoni* ʼi te ʼu potu fenua, pea neʼe ina haga foaki he ʼu meʼa ʼofa ʼo mulimuli ki ʼona koloa.

19 ʼI te temi leva ʼae neʼe toe ʼaumai tuʼa lua ai te ʼu taʼahine,+ neʼe heka ia Maletokeo ʼi te matapa ʼo te fale hau. 20 Neʼe mole fakaha e Esitele he meʼa ʼo ʼuhiga mo ʼona kaiga pea mo tana hahaʼi,+ ohage pe ko tona fakatotonu age e Maletokeo. Neʼe haga fai pe e Esitele te ʼu meʼa ʼae neʼe ui age e Maletokeo, ohage pe ko te temi ʼae neʼe ina taupau ai ia ia.+

21 ʼI te ʼu ʼaho ʼae neʼe heka ai ia Maletokeo ʼi te matapa ʼo te fale hau, ko Piketane pea mo Telese, te ʼu tagata ʼe lua neʼe gaue ki te puleʼaga ʼo te hau, ʼo leʼo te ʼu matapa ʼo te fale hau, neʼe nā iita pea mo fonofono ke nā matehi te Hau ko Asuelusi. 22 Kae neʼe iloʼi leva e Maletokeo te faʼahi ʼaia, pea ina foimo fakaha age ki te Fineʼaliki ko Esitele. Pea neʼe palalau age ia Esitele ki te hau ʼi te higoa ʼo Maletokeo. 23 Koia neʼe fai ai he ʼu fekumi ʼo ʼuhiga mo te faʼahi ʼaia pea neʼe iloʼi ai tona moʼoni, pea neʼe tautau leva te ʼu tagata ʼaia ʼe lua ki he pou. Pea neʼe tohi fuli te ʼu faʼahi ʼaia, ʼi te tohi ʼo te hisitolia ʼo te temi ʼaia ia muʼa ʼo te hau.+

3 Hili te faʼahi ʼaia, neʼe hiki e te Hau ko Asuelusi ia te tuʼulaga ʼo Amane+ te foha ʼo Ametata, te tagata Akake,+ ʼo ina fakanofo ia ia ki he tuʼulaga neʼe maʼoluga age ʼi te kau ʼaliki fuli ʼae neʼe fakatahi mo ia.+ 2 Pea ko te kau gaue fuli ʼa te hau ʼae neʼe ʼi te matapa ʼo te fale hau, neʼe natou tuʼutuli ifo mo tulolo ia muʼa ʼo Amane, he neʼe ko te meʼa ʼaia neʼe fakatotonu e te hau. Kae ko Maletokeo neʼe mole fia tuʼutuli ifo mo tulolo ʼi ʼona muʼa. 3 Koia ko te kau gaue ʼa te hau ʼae neʼe ʼi te matapa ʼo te fale hau, neʼe natou ui kia Maletokeo: “He koʼe koa ʼe ke meʼa noaʼi te fakatotonu ʼa te hau?” 4 ʼI te ʼaho fuli pe neʼe natou fai age kia ia te fehuʼi ʼaia, kae neʼe mole fia fakalogo ia kia natou. Neʼe natou ui age leva kia Amane ke ina vakaʼi pe ʼe tonu koa ke hoko atu te aga ʼaia ʼa Maletokeo,+ koteʼuhi neʼe ina fakaha age kia natou ko ia ko te Sutea.+

5 Neʼe sio ia Amane ki te mole fia tuʼutuli ifo ʼa Maletokeo ʼo hu kia ia, pea neʼe ita lahi ai ia Amane.+ 6 Kae neʼe mole ina leleiʼia te manatu ʼae ke ina matehi pe ia Maletokeo, he neʼe fakaha age kia ia pe neʼe ko ai te hahaʼi ʼa Maletokeo. Koia neʼe kamata kumi ai e Amane he puleʼaki ke ina pulihi ia te hahaʼi fuli ʼa Maletokeo, te kau Sutea fuli ʼae neʼe maʼuʼuli ʼi te puleʼaga katoa ʼo Asuelusi.

7 ʼI te ʼuluaki mahina, ʼae ko te mahina ʼo Nisani,* ʼi te 12 taʼu+ ʼo te temi hau ʼo Asuelusi, neʼe li e he tahi te Puli,*+ (ko tona fakaʼuhiga, neʼe fai te toho*) ia muʼa ʼo Amane ke iloʼi ai te ʼaho mo te mahina, pea neʼe to ai ki te 12 mahina, ʼae ko Atale.*+ 8 Neʼe ui leva e Amane ki te Hau ko Asuelusi: “ ʼE ʼi ai he hahaʼi ʼe mavetevete ʼi te lotolotoiga ʼo te hahaʼi+ ʼi te ʼu potu fenua fuli ʼo tou puleʼaga.+ ʼE kehe age ʼanatou lao ʼi te ʼu lao ʼa te hahaʼi fuli, pea ʼe mole natou fakalogo ki te ʼu lao ʼa te hau. Pea ʼe mole fua lelei anai ki te hau mo kapau ʼe ina tuku ke natou maʼuʼuli. 9 Kapau ʼe ko he meʼa ʼe lelei ki te hau, ke tohi te fakatotonu ʼae ke pulihi natou. ʼE au foaki anai he ʼu taleta* siliva ʼe 10 000 kia natou ʼae ʼe gaue ki te puleʼaga, ke natou ʼai ki te tanakiʼaga koloa ʼo te hau.”*

10 Neʼe toʼo ai e te hau ʼi tona nima tona mama fakahau+ ʼo foaki age kia Amane,+ te foha ʼo Ametata, te tagata Akake,+ ʼae neʼe ko te fili ʼo te kau Sutea. 11 Neʼe ui e te hau kia Amane: “ ʼE tuku atu kia koe te siliva pea mo te hahaʼi ʼaia, ke ke fai kia natou te meʼa ʼae ʼe ke loto ki ai.” 12 Neʼe pauʼi leva te kau sikalaipe ʼa te hau+ ʼi te ʼaho 13 ʼo te ʼuluaki mahina. Pea neʼe natou tohi+ te ʼu fakatotonu fuli ʼa Amane ki te kau pule taki ʼa te hau, mo te ʼu kovana ʼae neʼe natou puleʼi te ʼu potu fenua, pea mo te kau ʼaliki ʼo te hahaʼi kehekehe. Neʼe fai te ʼu tohi ʼaia ʼo mulimuli pe ki te faʼahiga faitohi ʼo te ʼu potu fenua takitahi pea mo te lea ʼa te hahaʼi. Neʼe tohi ʼi te higoa ʼo te Hau ko Asuelusi pea neʼe fakailoga ʼaki tona mama fakahau.+

13 Neʼe ʼave ai e te kau tagata ʼave logo te ʼu tohi ʼaia ki te ʼu potu fenua fuli ʼo te hau. Neʼe fakatotonu ai ke matehi mo pulihi te kau Sutea fuli, mai te kau tupulaga ki te hahaʼi matuʼa, mo te ʼu fanau pea mo te hahaʼi fafine, ʼi te ʼaho pe ʼe tahi, ʼi te ʼaho 13 ʼo te 12 mahina, ʼae ko te mahina ʼo Atale,+ pea neʼe tonu ke toʼo mo ʼonatou koloa.+ 14 Ko te ʼu meʼa ʼae neʼe tohi ai neʼe tonu ke liliu ko he lao ʼi te ʼu potu fenua fuli pe pea neʼe tonu ke tala ki te hahaʼi fuli pe, ke natou nonofo teuteu ki te ʼaho ʼaia. 15 ʼI te fakatotonu ʼa te hau, neʼe olo fakavilivili ai te kau tagata ʼave logo.+ Neʼe fai te lao ʼaia ʼi Suse,+ te kolo tau.* Neʼe heheka leva te hau pea mo Amane ʼo iinu, kae maveuveu ia te kolo ko Suse.

4 ʼI te iloʼi ʼae e Maletokeo+ te ʼu meʼa fuli ʼae neʼe kua fai,+ neʼe ina hae ʼona kofu, mo tui he taga,* pea neʼe ina tu te lefulefu kia ia. Pea neʼe alu ki te lotomalie ʼo te kolo, ʼo tagi mamahi ai mo kalaga. 2 Neʼe alu pe ʼo tuʼu ʼi te muʼa matapa ʼo te fale hau, he neʼe mole feala ki he tahi ʼe ina tui he taga* ke ulu ki loto. 3 Pea ʼi te ʼu potu fenua fuli+ ʼae neʼe aʼu ki ai te folafola ʼa te hau pea mo tana lao, neʼe fai ai e te kau Sutea he toe putu lahi, mo natou sesunio,+ mo faifetagihi pea mo lauga. Tokolahi neʼe natou takokoto ʼi he ʼu taga* pea mo te lefulefu.+ 4 Neʼe ʼomai te kau taʼahine ʼae neʼe tokakaga kia Esitele pea mo ʼana tagata enuke ʼo fakaha age te ʼu meʼa ʼae neʼe hoko, pea neʼe lotomamahi lahi ai te fineʼaliki. Neʼe ina fekauʼi leva ke ʼave he ʼu mutuʼi meʼa ke tui e Maletokeo moʼo fetogi ʼaki te taga* ʼae neʼe ina tui, kae neʼe fakafisi ia. 5 Neʼe pauʼi ai e Esitele ia Atake, ʼae neʼe kau ʼi te ʼu tagata enuke ʼa te hau pea neʼe hinoʼi ke tauhi ki te fineʼaliki. Pea neʼe ina fakatotonu ki ai ke alu kia Maletokeo ke ina fakaha age te meʼa ʼae neʼe hoko pea kotea tona fakaʼuhiga.

6 Koia, neʼe alu ai ia Atake kia Maletokeo ʼi te malaʼe lahi ʼo te kolo ʼae neʼe haga ki te matapa ʼo te fale hau. 7 Neʼe fakamatala age e Maletokeo te ʼu meʼa ʼae neʼe hoko kia ia, pea mo te falā+ ʼae neʼe fakapapauʼi e Amane ke ina tuku ki te tanakiʼaga koloa ʼo te hau moʼo pulihi te kau Sutea.+ 8 Neʼe ina toe fakatoʼo age mo he tohi neʼe tuʼu ai te lao neʼe fai ʼi Suse+ ʼae ke pulihi ai ia natou. Neʼe tonu ke fakaha e Atake kia Esitele, ʼo fakamahino mo ui+ ke alu ki te hau ʼo kole fakahagatonu age ke ʼofa ki tana hahaʼi.

9 Neʼe toe liliu mai leva ia Atake ʼo fakaha kia Esitele te ʼu palalau ʼae neʼe fai e Maletokeo. 10 Pea neʼe fakaha e Esitele kia Atake te ʼu meʼa ʼaeni neʼe tonu ke ina ui kia Maletokeo:+ 11 “ ʼE iloʼi fuli e te kau gaue ʼa te hau pea mo te hahaʼi ʼo te ʼu potu fenua ʼo te hau, kapau ʼe hu he tagata peʼe ko he fafine ki te malaʼe ʼae ʼi loto ʼo te fale hau+ kae neʼe mole pauʼi ia ia, ʼe ko te lao pe ʼaeni ʼe tahi ʼe tonu ke fakahoko kia ia: ʼE tonu ke matehi. Kae ʼe feala pe anai ke maʼuli mo kapau ʼe faoʼi e te hau tona tokotoko aulo kia ia.+ Pea kua ʼaho 30 nei ia te mole heʼeki pauʼi au e te hau.”

12 ʼI te fakaha age kia Maletokeo te ʼu palalau ʼa Esitele, 13 neʼe ina tali kia Esitele: “ ʼAua naʼa ke manatu ʼe ke hao anai ʼi te kau Sutea fuli he ʼe ke kau ʼi te famili hau. 14 Kapau ʼe ke nofo fakalogologo ʼi te temi ʼaeni, ʼe tokoni pea mo haofaki pe anai te kau Sutea e he tahi age,+ kae ko koe mo te loto fale ʼo tau tamai, ʼe kotou mamate anai. Pea ko ai foki ʼe ina iloʼi, naʼa meʼa age la kua ke fineʼaliki ʼo tupu ko te aluʼaga ʼaeni ʼe hoko?”+

15 Neʼe tali leva e Esitele kia Maletokeo: 16 “Alu, pea ke ke fakamaʼopoʼopo te kau Sutea fuli ʼae ʼi Suse pea kotou sesunio+ ʼuhi ko au. ʼAua naʼa kotou kakai mo iinu lolotoga ʼaho ʼe tolu,+ ʼi te ʼaho mo te po. ʼE au toe sesunio anai mo au pea mo te ʼu taʼahine ʼae ʼe tokakaga kia au. Pea ʼe au alu anai ki te hau, logo la ʼe ko he meʼa ʼe tapuʼi ʼi te lao, pea kapau ʼe tonu ke au mate ai, ʼe au mate anai.” 17 Neʼe alu ai ia Maletokeo ʼo fai ia meʼa fuli ʼae neʼe fakatotonu age e Esitele.

5 ʼI te tolu ʼaho,+ neʼe tui leva e Esitele ʼona teu fakahau pea neʼe alu ʼo tuʼu ʼi te malaʼe ʼae ʼi loto ʼo te fale hau. Neʼe heka ia te hau ʼi tona hekaʼaga fakahau, ʼi tona fale hau ʼae neʼe haga ki te malaʼe. Pea neʼe haga ia te hekaʼaga fakahau ki te huʼaga. 2 ʼI te sio atu ʼa te hau ki te tuʼu mai ʼa te Fineʼaliki ko Esitele ʼi te malaʼe, neʼe fiafia ai pea neʼe ina faoʼi tona tokotoko aulo kia Esitele.+ Neʼe fakaovi age leva ia Esitele pea neʼe fāfā ki te tumutumu ʼo te tokotoko.

3 Neʼe fehuʼi age e te hau: “Fineʼaliki ko Esitele, kotea ʼae kua hoko? Kotea ʼae ʼe ke loto ki ai? Kapau ko te vaelua ʼo toku puleʼaga, ʼe au foaki atu anai!” 4 Neʼe tali e Esitele: “Kapau ʼe lelei ki te hau, ke haʼu ʼi te ʼaho nei mo Amane+ ki te kaitahi neʼe au teuteuʼi maʼa te hau.” 5 Koia neʼe ui ai e te hau ki tana kau tagata: “Kotou fakaha kia Amane ke haʼu fakavilivili, ʼo mulimuli ki te kole ʼa Esitele.” Pea neʼe olo ai ia te hau pea mo Amane ki te kaitahi ʼae neʼe teuteuʼi e Esitele.

6 Pea ʼi te temi ʼae neʼe inu ai te vino, neʼe ui e te hau kia Esitele: “Kotea tau kole? Fakaha mai pea ʼe au foaki atu anai! Pea kotea ʼae ʼe ke loto ki ai? Kapau ko te vaelua ʼo toku puleʼaga, ʼe ke maʼu anai!”+ 7 Neʼe tali e Esitele: “Koʼeni taku kole pea mo te meʼa ʼae ʼe au loto ki ai: 8 Kapau ʼe fiafia ia te hau ʼo ʼuhiga mo au pea kapau ʼe lotolelei ʼo tali taku kole pea mo fai te meʼa ʼae ʼe au loto ki ai, ke haʼu apogipogi mo Amane ki te kaitahi ʼae ka au fai anai maʼa koulua. Pea ʼe au fakaha anai apogipogi taku kole ki te hau.”

9 Neʼe mavae fiafia leva ia Amane ʼi te ʼaho ʼaia. Kae ʼi tana sio kia Maletokeo ʼi te matapa ʼo te fale hau pea mo tana tokagaʼi ʼae ʼe mole tuʼu ake pea ʼe mole mataku ia ia, neʼe ita lahi ai ia Amane kia Maletokeo.+ 10 Kae neʼe lolomi e Amane tona ita pea alu ai ki tona ʼapi. Pea neʼe ina fekauʼi ke olo age ʼona kaumeʼa pea mo Selesa,+ tona ʼohoana. 11 Neʼe lau age e Amane kia natou te lahi ʼo ʼona koloa, mo te kaugamalie ʼo ʼona foha,+ pea mo te hiki e te hau tona tuʼulaga ʼo maʼoluga age ʼi te kau ʼaliki pea mo te kau gaue ʼa te hau.+

12 Neʼe hoko atu e Amane: “Pea tahi ʼae meʼa, neʼe ko au pe ʼae neʼe fakaafe e te Fineʼaliki ko Esitele ke au alu mo te hau ki te kaitahi ʼae neʼe ina teuteuʼi.+ Pea ʼe ina toe fakaafe foki au apogipogi ke au kai fakatahi mo ia pea mo te hau.+ 13 Kae ʼe mole au fiafia anai ʼi te ʼu meʼa fuli ʼaia mo kapau ʼe au sio tuʼumaʼu pe kia Maletokeo, te tagata Sutea, ʼe heka ʼi te matapa ʼo te fale hau.” 14 Koia neʼe ui e Selesa, tona ʼohoana pea mo ʼona kaumeʼa fuli: “Ke ke fakatotonu ke fakatuʼu he pou, ko tona maʼoluga ʼe fasiga nima 50.* Pea ʼi te uhu, ke ke ui age ki te hau ke tautau ai ia Maletokeo.+ Pea ke alu leva koe mo te hau ʼo fakafiafia ʼi te kaitahi ʼaia.” Neʼe leleiʼia e Amane te manatu ʼaia, koia neʼe ina fakatotonu ai ke fakatuʼu he pou.

6 ʼI te po ʼaia, neʼe mole mamoe te hau. Koia neʼe ina ui ai ke ʼaumai ia te tohi ʼo te hisitolia ʼo te temi ʼaia,+ pea neʼe lau ki te hau. 2 Neʼe tohi ʼi ai te meʼa ʼae neʼe tala e Maletokeo ʼo ʼuhiga mo Piketana pea mo Telese. Ko te ʼu tagata ʼaia ʼe lua neʼe gaue ki te puleʼaga ʼo te hau, ʼo leʼo te ʼu matapa ʼo te fale hau, pea neʼe nā fonofono ke nā matehi te Hau ko Asuelusi.+ 3 Neʼe fehuʼi e te hau: “Neʼe fakamaʼuhigaʼi feafeaʼi ia Maletokeo? Pea kotea te fakapale neʼe foaki age ki ai ʼuhi ko te faʼahi ʼaia?” Neʼe tali age e te ʼu tagata ʼae neʼe tokakaga ki te ʼu meʼa ʼae neʼe ʼaoga ki te hau: “Neʼe mole he meʼa ia neʼe fai kia ia.”

4 Ki muli age, neʼe ui e te hau: “Ko ai ʼae ʼi te malaʼe?” Neʼe hu ia Amane ki te malaʼe ʼae ʼi tuʼa+ ʼo te fale hau, ke ina kole ki te hau ke tautau ia Maletokeo ki te pou ʼae neʼe ina teuteuʼi.+ 5 Neʼe tali e te ʼu tagata ʼae neʼe tokakaga ki te ʼu meʼa ʼae neʼe ʼaoga ki te hau: “ ʼE ko Amane+ ʼae ʼe tuʼu ʼi te malaʼe.” Pea neʼe ui e te hau: “Kotou ui age ke haʼu.”

6 Neʼe haʼu ai ia Amane pea neʼe ui e te hau kia ia: “Kotea ʼae ʼe tonu ke fai ki te tagata ʼae ʼe loto e te hau ke fakamaʼuhigaʼi?” Neʼe ui e Amane ʼi tona loto: “ ʼE ʼi ai koa he tahi age ia au ʼe loto e te hau ke fakamaʼuhigaʼi?”+ 7 Koia neʼe tali e Amane ki te hau: “Ki te tagata ʼae ʼe loto e te hau ke fakamaʼuhigaʼi, 8 ʼe tonu ke ʼaumai he teu fakahau+ ʼo te hau pea mo he hosi neʼe heka ai te hau, pea ke hili ʼi te ʼulu ʼo te hosi te pale fakahau. 9 ʼE tonu ke tokaga he tahi ʼi te kau ʼaliki ʼa te hau ki te teu pea mo te hosi. Pea ʼe tonu ke natou fakatui ki te tagata ʼae ʼe loto e te hau ke fakamaʼuhigaʼi pea mo fakaheka ia ia ki te hosi ʼo fakahaʼele ʼi te malaʼe lahi ʼo te kolo. ʼE tonu ke natou kalaga ʼi ʼona muʼa: ‘Koʼeni te meʼa ʼae ʼe fai ki te tagata ʼae ʼe loto e te hau ke fakamaʼuhigaʼi!’ ”+ 10 Neʼe ui leva e te hau kia Amane: “Foimo toʼo te teu pea mo te hosi. Pea ko te ʼu meʼa ʼaeni neʼe ke fakaha mai, ke ke fai kia Maletokeo, te tagata Sutea ʼae ʼe heka ʼi te matapa ʼo te fale hau. ʼAua naʼa ke galoʼi he meʼa ʼi te ʼu meʼa ʼaeni neʼe ke fakaha mai.”

11 Neʼe toʼo ai e Amane te teu mo te hosi. Neʼe ina fakatui te teu kia Maletokeo+ pea mo fakaheka ia ia ki te hosi ʼo fakahaʼele ʼi te malaʼe lahi ʼo te kolo, pea neʼe kalaga ʼi ʼona muʼa: “Koʼeni te meʼa ʼae ʼe fai ki te tagata ʼae ʼe loto e te hau ke fakamaʼuhigaʼi!” 12 Hili ʼaia, pea neʼe toe liliu ia Maletokeo ki te matapa ʼo te fale hau, kae neʼe pulouʼi e Amane tona ʼulu ʼi te lahi ʼo tona lainoa, ʼo alu fakavilivili ai ki tona ʼapi. 13 ʼI te fakamatalatala e Amane ki tona ʼohoana ko Selesa+ pea mo ʼona kaumeʼa fuli te ʼu meʼa fuli ʼae neʼe hoko kia ia, neʼe ui e tana kau tagata popoto pea mo tona ʼohoana ko Selesa: “Kapau ʼe Sutea ia Maletokeo, ʼe mole ke malo anai ia ia, pea ʼe mahino ia ʼe ke mate moʼoni anai.”

14 Neʼe kei natou faipalalau kae tau mai ia natou ʼae neʼe gaue ki te hau pea neʼe natou ʼave fakavilivili ia Amane ki te kaitahi ʼae neʼe fai e Esitele.+

7 Neʼe ʼomai ai te hau pea mo Amane+ ki te kaitahi ʼa te Fineʼaliki ko Esitele. 2 ʼI te lua ʼaho, ʼi te temi ʼae neʼe inu ai te vino, neʼe toe ui e te hau kia Esitele: “Fineʼaliki ko Esitele, kotea tau kole? Fakaha mai pea ʼe au foaki atu anai! Pea kotea ʼae ʼe ke loto ki ai? Kapau ko te vaelua ʼo toku puleʼaga, ʼe ke maʼu anai!”+ 3 Neʼe tali age e te Fineʼaliki ko Esitele: “Kapau ʼe fiafia ia te hau ʼo ʼuhiga mo au, pea kapau ʼe ko he meʼa ʼe lelei ki te hau, ʼe au kole atu ke ke haofaki toku maʼuli,* ʼo feia mo taku hahaʼi.+ 4 Koteʼuhi neʼe fakatau matou,+ ia au mo taku hahaʼi, ke matehi mo pulihi matou.+ Ka na neʼe fakatau pe la matou ko he ʼu tagata mo he ʼu fafine kaugana, ʼe au nofo fakalogologo pe anai. Kae ʼe mole lelei ke hoko te malaʼia ʼaia, he ʼe fua kovi anai ki te hau.”

5 Neʼe ui e te Hau ko Asuelusi ki te Fineʼaliki ko Esitele: “Ko ai te tagata ʼaia neʼe agapauʼu ʼo ina fai te faʼahi ʼaia? ʼE ʼifea?” 6 Neʼe ui e Esitele: “Ko te fili ʼe ko Amane, te tagata agakovi ʼaeni.”

Neʼe mataku ʼosi leva ia Amane ʼi te hau pea mo te fineʼaliki. 7 Neʼe kovi ʼosi te ita ʼo te hau pea neʼe tuʼu ake ʼi te temi ʼae neʼe inu ai te vino ʼo alu ki te ʼoloto ʼo te fale hau. Kae neʼe tuʼu ake ia Amane ʼo kole mamahi ki te Fineʼaliki ko Esitele ke ina haofaki tona maʼuli,* he neʼe mahino kia ia neʼe kua fakatotonu e te hau ke tauteaʼi ia ia. 8 Pea neʼe toe liliu mai leva te hau mai te ʼoloto ki te fale ʼae neʼe inu ai te vino, pea neʼe sio ki te nofo mai ʼa Amane ʼi te palepale ʼae neʼe nofo ai ia Esitele. Neʼe kalaga ia te hau: “ ʼE ina toe fakaʼalikiʼi anai koa mo te fineʼaliki ʼi toku loto fale totonu?” ʼI te ʼosi fai e te hau te ʼu palalau ʼaia, neʼe ʼuʼufi ai te fofoga ʼo Amane. 9 Pea neʼe ui e Alepone,+ ʼae neʼe kau ia natou ʼae neʼe gaue ki te hau: “Neʼe toe fakatuʼu foki e Amane he pou maʼa Maletokeo,+ ʼae neʼe ina haofaki te maʼuli ʼo te hau ʼuhi ko te ʼu meʼa ʼae neʼe ina tala.+ Pea ʼe tuʼu io Amane, ko tona maʼoluga ʼe fasiga nima 50.”* Neʼe ui e te hau: “Kotou tautau ia ia ki ai.” 10 Neʼe natou tautau ai ia Amane ki te pou ʼae neʼe ina teuteuʼi maʼa Maletokeo, pea hoki malū ifo ai te ita ʼo te hau.

8 ʼI te ʼaho ʼaia, neʼe foaki e te Hau ko Asuelusi ki te Fineʼaliki ko Esitele te ʼu koloa fuli ʼo Amane,+ te fili ʼo te kau Sutea.+ Pea neʼe haʼu ia Maletokeo kia muʼa ʼo te hau, he neʼe fakaha age e Esitele ʼe nā kaiga.+ 2 Neʼe toʼo ake leva e te hau tona mama fakahau+ ʼae neʼe ina toʼo ia Amane ʼo ina foaki age kia Maletokeo. Pea neʼe fakanofo e Esitele ia Maletokeo ke tokaga ki te ʼu koloa ʼo Amane.+

3 Pea neʼe toe palalau ia Esitele ki te hau. Neʼe tuʼutuli ifo ki ʼona vaʼe ʼo tagi mo kole age ke ina taʼofi te kovi ʼae neʼe fai e Amane, te tagata Akake pea mo tana fakatuʼutuʼu ʼo ʼuhiga mo te kau Sutea.+ 4 Neʼe faoʼi e te hau tona tokotoko aulo kia Esitele,+ pea neʼe tuʼu ake leva ia Esitele ʼo tuʼu ia muʼa ʼo te hau. 5 Pea neʼe ina ui age: “Kapau ʼe lelei ki te hau pea kapau ʼe fiafia ʼo ʼuhiga mo au, pea kapau ʼe matatonu ki te hau pea mo ʼofa te hau ia au, ke tohi he fakatotonu ʼe molehi ai te ʼu tohi ʼae neʼe fai e te tagata agakaka ko Amane,+ te foha ʼo Ametata, te tagata Akake.+ Neʼe tohi ai ke pulihi te kau Sutea ʼi te ʼu potu fenua fuli ʼo te hau. 6 Pe ʼe feafeaʼi anai haku katakiʼi taku sio ki te malaʼia ka hoko ki taku hahaʼi? Pea ʼe feafeaʼi anai haku katakiʼi taku sio ki te pulihi ʼo ʼoku kaiga?”

7 Neʼe ui leva e te Hau ko Asuelusi ki te Fineʼaliki ko Esitele pea mo Maletokeo, te tagata Sutea: “Koʼeni kua au foaki kia Esitele te ʼu koloa ʼo Amane+ pea kua au fakatotonu ke tautau ia ia ki te pou,+ ʼuhi ko tana fakatuʼutuʼu ʼae ke ʼohofi te kau Sutea. 8 Kae ko he lao kua ʼosi tohi ʼi te higoa ʼo te hau pea mo fakailoga ʼaki te mama fakahau, ʼe mole feala ia ke molehi. Koia, ʼe au fakagafua atu ke kolua tohi ʼi te higoa ʼo te hau te meʼa ʼae ʼe kolua sisio ʼe fua lelei anai ki te kau Sutea pea mo fakailoga ʼaki te mama fakahau.”+

9 Neʼe pauʼi ai te kau sikalaipe ʼa te hau ʼi te tolu mahina, ʼae ko te mahina ʼo Sivani,* ʼi te 23 ʼaho. Pea neʼe natou tohi te ʼu meʼa fuli ʼae neʼe fakatotonu e Maletokeo ki te kau Sutea, mo te kau pule taki,+ mo te ʼu kovana pea mo te kau ʼaliki ʼo te ʼu potu fenua+ mai Initia ki Etiopea, ia potu fenua ʼe 127. Neʼe fai te ʼu tohi ʼaia ʼo mulimuli ki te faʼahiga faitohi ʼo te ʼu potu fenua takitahi pea mo te lea ʼa te hahaʼi, pea mo te faʼahiga faitohi mo te lea ʼa te kau Sutea.

10 Neʼe ina tohi te fakatotonu ʼaia ʼi te higoa ʼo te Hau ko Asuelusi ʼo ina fakailoga ʼaki te mama fakahau,+ pea neʼe ʼave leva te ʼu tohi ʼaia e te ʼu tagata ʼave logo ʼae neʼe heka hosi. Neʼe ko he ʼu hosi neʼe lele gaholo pea neʼe fafaga ke fakaʼaogaʼi maʼa te hau. 11 ʼI te ʼu tohi ʼaia, neʼe fakagafua e te hau ki te kau Sutea ʼo te ʼu kolo kehekehe fuli ke natou fakatahitahi pea mo haofaki ʼonatou maʼuli.* Neʼe ina toe fakagafua age ke natou matehi mo pulihi he hahaʼi peʼe ko he potu fenua pe ʼae ka ʼomai anai ʼo ʼohofi natou ʼaki ʼanatou mahafu, ʼo kau ai te hahaʼi fafine mo te ʼu fanau, pea ke natou toʼo ʼonatou koloa.+ 12 Neʼe tonu ke hoko te faʼahi ʼaia ʼi te ʼaho pe ʼe tahi ʼi te ʼu potu fenua fuli ʼo te Hau ko Asuelusi, ʼi te 13 ʼaho ʼo te 12 mahina, ʼae ko te mahina ʼo Atale.*+ 13 Ko te ʼu meʼa ʼae neʼe tohi ai neʼe tonu ke liliu ko he lao ʼi te ʼu potu fenua fuli pe. Pea neʼe tonu ke tala ki te hahaʼi fuli pe, ke feala ki te kau Sutea ke nonofo teuteu ʼi te ʼaho ʼaia pea ke natou tauʼi ʼonatou fili.+ 14 ʼI te fakatotonu ʼa te hau, neʼe olo fakavilivili atu aipe te ʼu tagata ʼave logo ʼae neʼe heheka ’i te ’u hosi ʼae neʼe fakaʼaogaʼi maʼa te hau. Neʼe toe fai te lao ʼaia ʼi Suse,+ te kolo tau.*

15 Neʼe mavae leva ia Maletokeo ia muʼa ʼo te hau mo tona teu fakahau ʼuʼui pea mo hina, mo tona kolona aulo lahi ʼi tona ʼulu, pea mo tona pulupulu huʼa lotuma fakapoʼuli neʼe fai ʼaki te fuluʼi akeno.+ Pea neʼe kalaga fakafiafia leva te hahaʼi ʼo te kolo ko Suse. 16 Neʼe haofaki ai* te kau Sutea, ʼo natou fiafia pea neʼe fakamaʼuhigaʼi ai natou. 17 Pea ʼi te ʼu potu fenua mo te ʼu kolo fuli ʼae neʼe aʼu ki ai te lao ʼa te hau, neʼe fiafia ai te kau Sutea pea neʼe natou fai he ʼu kaitahi pea mo he ʼu fakafiafia. Tokolahi ʼi te hahaʼi ʼo te fenua neʼe natou ui ʼe natou Sutea,+ he neʼe natou matataku ʼi te kau Sutea.

9 ʼI te 13 ʼaho ʼo te 12 mahina, ʼae ko te mahina ʼo Atale,*+ ʼi te temi ʼae neʼe tonu ke fakahoko ai te folafola ʼa te hau pea mo tana lao,+ ʼi te ʼaho ʼae neʼe ʼamanaki ai te ʼu fili ʼo te kau Sutea ke natou puleʼi natou, neʼe mole hoko te meʼa ʼaia, kae neʼe malo te kau Sutea ia natou ʼae neʼe fehihiʼa ia natou.+ 2 Neʼe fakatahitahi te kau Sutea ʼi ʼonatou kolo ʼi te ʼu potu fenua fuli ʼo te Hau ko Asuelusi,+ ke natou tauʼi ia natou ʼae neʼe natou fia gaohi koviʼi natou. Pea neʼe mole feala ke fakafeagai he tagata kia natou, he neʼe matataku te hahaʼi fuli ʼi te kau Sutea.+ 3 Pea ko te kau ʼaliki fuli ʼo te ʼu potu fenua, mo te kau pule taki,+ mo te ʼu kovana pea mo natou ʼae ʼe tokakaga ki te ʼu gaue ʼa te hau, neʼe natou lagolago ki te kau Sutea, he neʼe natou matataku ia Maletokeo. 4 Neʼe liliu ia Maletokeo ʼo maʼuhiga+ ʼi te fale hau, pea mo iloa ʼi te ʼu potu fenua fuli, koteʼuhi neʼe haga tuputupu aipe tona malohi.

5 Neʼe tamateʼi e te kau Sutea ʼonatou fili fuli ʼaki te heleta, ʼo natou matematehi pea mo pulihi natou. Neʼe fai e te kau Sutea te ʼu meʼa ʼae neʼe natou loto ki ai ʼo ʼuhiga mo natou ʼae neʼe fehihiʼa ia natou.+ 6 ʼI Suse,+ te kolo tau,* neʼe matematehi pea mo pulihi ai e te kau Sutea te toko 500 tagata. 7 Neʼe natou toe matehi foki mo Palesanata, mo Talefono, mo Asipate, 8 mo Polata, mo Atalia, mo Alitate, 9 mo Palemasita, mo Alisai, mo Alitai pea mo Vaisata, 10 te ʼu foha ʼe toko hogofulu ʼo Amane, te foha ʼo Ametata, te fili ʼo te kau Sutea.+ Kae hili tanatou matematehi ia natou ʼaia, neʼe mole natou toʼo ʼonatou koloa.+

11 ʼI te ʼaho ʼaia, neʼe fakaha ki te hau te kaugamalie ʼo natou ʼae neʼe matehi ʼi Suse, te kolo tau.*

12 Neʼe ui e te hau ki te Fineʼaliki ko Esitele: “ ʼI Suse, te kolo tau,* neʼe matehi pea mo pulihi e te kau Sutea te toko 500 tagata pea mo te ʼu foha ʼe toko hogofulu ʼo Amane. Kae ʼe feafeaʼi age la ki te tahi ʼu potu fenua ʼo te hau?+ ʼE ʼi ai koa hau tahi age kole? Fakaha mai pea ʼe au foaki atu anai. Pea kotea pe he tahi age meʼa ʼe ke loto ki ai, ʼe au fakahoko anai.” 13 Neʼe tali age e Esitele: “Kapau ʼe ko he meʼa ʼe lelei ki te hau,+ ke ina fakagafua ki te kau Sutea ʼae ʼi Suse ke natou toe mulimuli apogipogi ki te lao ʼo te ʼaho ʼaeni.+ Pea ke tautau te ʼu foha ʼe toko hogofulu ʼo Amane ki te pou.”+ 14 Neʼe fakatotonu ai e te hau ke fai te ʼu faʼahi ʼaia. Neʼe fai ai he lao ʼi Suse pea neʼe tautau ai te ʼu foha ʼe toko hogofulu ʼo Amane.

15 Neʼe toe fakatahitahi leva te kau Sutea ʼae ʼi Suse ʼi te 14 ʼaho ʼo te mahina ʼo Atale,+ pea neʼe natou matematehi te toko 300 tagata ʼi Suse, kae neʼe mole natou toʼo ʼonatou koloa.

16 Neʼe toe fakatahitahi foki mo te kau Sutea ʼae ʼi te tahi ʼu potu fenua ʼo te hau ke haofaki ai ʼonatou maʼuli.*+ Neʼe natou matematehi ʼonatou fili, ʼo mamate ai te toko 75 000 ʼo natou ʼae neʼe fehihiʼa ia natou, kae neʼe mole natou toʼo ʼonatou koloa.+ 17 Neʼe hoko te ʼu faʼahi ʼaia ʼi te 13 ʼaho ʼo te mahina ʼo Atale, pea neʼe natou malolo ʼi te 14 ʼaho pea mo natou fai he ʼu kaitahi mo he ʼu fakafiafia ʼi te ʼaho ʼaia.

18 Neʼe fakatahitahi te kau Sutea ʼae ʼi Suse ʼi te 13+ mo te 14 ʼaho,+ pea neʼe natou malolo ʼi te 15 ʼaho pea mo natou fai he ʼu kaitahi mo he ʼu fakafiafia ʼi te ʼaho ʼaia. 19 Ko te tupuʼaga la ʼaia ʼo te fai e te kau Sutea ʼae neʼe maʼuʼuli ʼi te ʼu kolo ʼae ʼi te ʼu tafaʼaki, he ʼu fakafiafia pea mo he ʼu kaitahi ʼi te 14 ʼaho ʼo te mahina ʼo Atale. Neʼe liliu te ʼaho ʼaia ko he ʼaho fakafiafia+ pea neʼe natou fefoakiʼaki he ʼu meʼa kai.+

20 Neʼe tohi e Maletokeo+ te ʼu meʼa ʼaia neʼe hoko pea mo ina momoli he ʼu tohi ki te kau Sutea fuli ʼi te ʼu potu fenua fuli ʼo te Hau ko Asuelusi, ʼae neʼe tuʼu ovi mai pea mo ʼae neʼe mamaʼo. 21 Neʼe ina fakatotonu ai ke natou fakamanatu ʼi te taʼu fuli ia te 14 ʼaho ʼo te mahina ʼo Atale, ʼo feia mo te 15 ʼaho, 22 koteʼuhi ʼi te ʼu ʼaho ʼaia neʼe ʼateaina ai te kau Sutea mai ʼonatou fili, pea ʼi te mahina ʼaia neʼe liliu tonatou lotomamahi ko he fakafiafia pea neʼe liliu tonatou putu+ ko he ʼaho fakafiafia. Neʼe tonu ke natou fai ʼi te ʼu ʼaho ʼaia he ʼu kaitahi mo he ʼu fakafiafia, mo fefoakiʼaki ai he ʼu meʼa kai pea mo foaki he ʼu meʼa ʼofa ki te kau masisiva.

23 Pea neʼe tali e te kau Sutea ke natou hoko atu te fakafiafia ʼae neʼe kua natou kamata fai mo mulimuli ki te meʼa ʼae neʼe tohi e Maletokeo kia natou. 24 Koteʼuhi ko Amane,+ te foha ʼo Ametata, te tagata Akake,+ te fili ʼo te kau Sutea fuli, neʼe ina fakatuʼutuʼu ke ina pulihi te kau Sutea+ pea neʼe ina li te Puli,*+ ko tona fakaʼuhiga, neʼe fai te toho,* ke fakamatakuʼi mo pulihi ai natou. 25 Kae ʼi te temi ʼae neʼe alu ai ia Esitele kia muʼa ʼo te hau, neʼe tohi ai e te hau te ʼu fakatotonu ʼaeni:+ “Ke ina kai pe te agakovi ʼae neʼe ina fia fai ki te kau Sutea,”+ pea neʼe natou tautau ia ia mo ʼona foha ki te pou.+ 26 Ko te tupuʼaga la ʼaia ʼo tanatou fakahigoaʼi te ʼu ʼaho ʼaia ko Pulimi,* ʼae ʼe haʼu mai te kupu Puli.+ Koia, ʼuhi ko te ʼu meʼa fuli ʼae neʼe tuʼu ʼi te tohi ʼaia, mo te ʼu meʼa ʼae neʼe natou sisio ki ai pea mo te ʼu meʼa leva ʼae neʼe hoko kia natou, 27 neʼe fakamaʼua ai e te kau Sutea kia natou totonu, mo tonatou hakoga pea mo natou fuli ʼae ʼe fakatahi age kia natou,+ ke natou fakamanatu tuʼumaʼu te ʼu ʼaho ʼaia ʼe lua pea mo fakahoko ʼi te taʼu fuli te ʼu meʼa ʼae neʼe tohi ʼo ʼuhiga mo te ʼu ʼaho ʼaia, ʼi te temi ʼae kua fakatuʼutuʼu ki ai. 28 Neʼe tonu ke fakamanatu te ʼu ʼaho ʼaia ʼi te ʼu taʼi tupu fuli, mo te ʼu famili takitahi, mo te ʼu potu fenua takitahi pea mo te ʼu kolo takitahi. Pea ko te ʼu ʼaho ʼaia ʼo Pulimi neʼe tonu ke hoko atu pe tona fai e te kau Sutea pea mo tona fakamanatu e tonatou hakoga.

29 Pea ko te Fineʼaliki ko Esitele, te ʼofafine ʼo Apihaile, pea mo Maletokeo, te tagata Sutea neʼe nā fai leva ʼi tonā ʼuhiga pule te lua tohi moʼo fakamoʼoni ki te ʼu fakatotonu ʼo ʼuhiga mo te ʼaho lahi ʼo Pulimi. 30 Neʼe momoli ai leva te ʼu tohi ki te kau Sutea fuli ʼi te ʼu potu fenua ʼe 127+ ʼae neʼe puleʼi e Asuelusi.+ Pea neʼe tohi ai he ʼu folafola ʼo te tokalelei pea mo te moʼoni, 31 moʼo fakamoʼoni te fakamanatu ʼo te ʼu ʼaho ʼo Pulimi ʼi te temi ʼae kua fakatuʼutuʼu ki ai, ohage pe ko tona fakatotonu age e Maletokeo, te tagata Sutea pea mo te Fineʼaliki ko Esitele,+ pea ohage pe ko tanatou fakamaʼua kia natou totonu mo tonatou hakoga ke natou fakahoko,+ ʼo kau ai mo te sesunio+ pea mo te ʼu kole mamahi.+ 32 Ko te fakatotonu ʼa Esitele neʼe ina fakamoʼoni ai te ʼu meʼa ʼaia ʼo ʼuhiga mo te ʼaho lahi ʼo Pulimi,+ pea neʼe hiki leva ki he tohi.

10 Neʼe fakatotonu e te Hau ko Asuelusi ke gaue popula te hahaʼi ʼo te fenua pea mo te ʼu motu.

2 Pea ko ʼana gaue lalahi fuli, ʼo feia mo te fakamatala katoa ʼo te maʼuhiga ʼo Maletokeo+ ʼae neʼe hiki e te hau tona tuʼulaga,+ ʼe mole tohi koa la te ʼu meʼa ʼaia ʼi te tohi ʼo te hisitolia+ ʼo te ʼu hau ʼo Metia mo Pelesia?+ 3 Koteʼuhi ko Maletokeo te tagata Sutea, neʼe tuʼulaga lua ʼo hoa atu ki te Hau ko Asuelusi. Neʼe maʼuhiga ʼi te kau Sutea pea tokolahi ʼona tehina neʼe natou fakaʼapaʼapaʼi ia ia. Pea neʼe gaue ki te maʼuli lelei ʼo tana hahaʼi pea mo te maʼuli fimalie* ʼo tonatou hakoga fuli.