SOELE
1 Neʼe palalau ia Sehova kia Soele,* te foha ʼo Petueli. Pea neʼe ina ui age:
Neʼe kua hoko koa he meʼa feia ʼi tokotou temi,
Peʼe ʼi te temi ʼo ʼakotou kui?+
3 Kotou fakamatala te faʼahi ʼaia ki ʼokotou foha,
Pea ke fakamatala e ʼokotou foha ki ʼonatou foha,
Pea ke toe hoko atu e ʼonatou foha ki te taʼiake ʼae ka hoa mai.
4 Neʼe kai e te heʼe ʼae ʼe lele te meʼa ʼae neʼe tuku e te heʼe ʼae ʼe ina kai ia meʼa fuli.+
Pea neʼe kai e te heʼe ʼae ʼe kei veliveli te meʼa ʼae neʼe tuku e te heʼe ʼae ʼe lele.
Pea neʼe kai e te heʼe maumau fenua te meʼa ʼae neʼe tuku e te heʼe ʼae ʼe kei veliveli.+
5 Kotou ʼaʼala ake pea mo fetagihi, kau konahihia!+
Kotou tagilaulau, ia koutou fuli ʼae ʼe inu vino,
Koteʼuhi ʼe mole kotou toe maʼu anai hakotou vino foʼou.+
6 Neʼe ʼohofi toku fenua e he puleʼaga malohi pea ʼe mole malau.+
ʼE hage ʼona nifo ko te ʼu nifo ʼo he laione,+ pea ʼe hage ʼona kaugao ko te ʼu kaugao ʼo he laione.
7 Neʼe ina kai fuli toku fuʼu vite, pea neʼe ina tuku pe te tafito ʼo toku fuʼu fiku.
Neʼe ina kai fuli ʼonā kiliʼi ʼakau, pea neʼe ina tuku keheʼi leva te fuʼu vite mo te fuʼu fiku.
ʼEi, neʼe kua hihina ʼonā vaʼa.
8 Ke ke tagilaulau ohage ko he taʼahine taupoʼou ʼe ina kofuʼi he taga*
Pea ʼe tagilaulau ki te tama ʼae neʼe fakapapau ʼohoana mo ia ʼi tana kei finemui.*
9 ʼE mole kei maʼu ni molaga meʼa kai+ pea mo ni molaga vino+ ʼi te fale lotu ʼo Sehova.
ʼE lotomamahi te kau pelepitelo, ia te ʼu tagata ʼae ʼe gaue kia Sehova.
10 Kua maumau te ʼu fua ʼo te ʼu gaueʼaga, pea ʼe mole kei maʼuli he meʼa.+
ʼE mole kei maʼu ai he fulumeto, mo he vino foʼou, pea mo he lolo.+
11 ʼE kua maumauʼi te ʼu fua ʼo te ʼu gaueʼaga.
Koia kua lotomamahi ai te kau gaue kele mo tagilaulau te kau gaue vite,
He ʼe mole kei maʼu te fulumeto pea mo te olose.
12 Kua moamoa te fuʼu vite,
ʼE mole kei maʼuli lelei te fuʼu fiku.
Kua moamoa te fuʼu kelenate, mo te fuʼu palema, mo te fuʼu pome,
Pea mo te ʼu fuʼu ʼakau fuli ʼo te fenua.+
ʼEi, ʼe mole kei fiafia te hahaʼi, kae kua natou ufiufi.
13 Kau pelepitelo, kotou kofuʼi he ʼu taga,* pea kotou tuki fatafata.
ʼU tagata ʼae ʼe gaue ʼi te muʼa ʼaletale, kotou tagilaulau.+
ʼU tagata ʼae ʼe gaue ki toku ʼAtua, kotou feulufi ki te fale lotu pea kotou momoe mo ʼokotou taga.
ʼE mole kei ʼaumai e he tahi ni molaga meʼa kai,+ pea mo ni molaga meʼa inu+ ki te fale lotu ʼo tokotou ʼAtua.
14 Kotou tala he sesunio, kotou fakaha ʼe fai he fakatahi taputapu.+
Kotou fakatahiʼi te kau takitaki pea mo te hahaʼi fuli ʼo te fenua,
Ki te fale lotu ʼo Sehova tokotou ʼAtua.+ Pea kotou kole tokoni kia Sehova.
15 Malaʼia ʼuhi ko te ʼaho ʼaia!
Kua ovi mai te ʼaho ʼo Sehova,+
Pea ʼe hoko mai anai ohage ko he fakaʼauha mai te Mafimafi.
16 Neʼe mole pulihi koa la te meʼa kai ʼi ʼotatou muʼa,
Pea mo te fiafia ʼi te fale lotu ʼo totatou ʼAtua?
17 Neʼe kua moamoa te pulapula* ʼi tanatou keli te kele ʼaki ʼanatou huo takele.
ʼE mole kei ʼi ai he meʼa ʼi te ʼu fale tanakiʼaga koloa.
Neʼe kua maumauʼi te ʼu fale tanakiʼaga meʼa kai, koteʼuhi ʼe mole kei fua te fulumeto.
18 ʼE toe tagi mamahi foki mo te faga manu!
ʼE mavetevete te faga pipi, koteʼuhi ʼe mole ʼi ai honatou ʼu koga meʼa lunaʼia.
Pea ʼe fakaʼofaʼofa te faga ovi.
19 Sehova e, ʼe au pauʼi atu anai kia te koe,+
Koteʼuhi neʼe tutu te ʼu koga meʼa lunaʼia ʼae ʼi te vao,
Pea neʼe vela te ʼu fuʼu ʼakau fuli ʼo te fenua.
20 ʼE toe fetagihi mo te ʼu manu ʼo te vao kia te koe,
Koteʼuhi ʼe mole kei ʼi ai he vai ʼi te ʼu liuʼa,
Pea kua tutu te ʼu koga meʼa lunaʼia ʼae ʼi te vao.”
2 “Kotou pupuhi te fakatagi pupuhi ʼi Sione!+
Kotou fai he kalaga tau ʼi toku moʼuga taputapu!
2 ʼE ko he ʼaho fakapoʼuli gaogao,+
ʼE ko he ʼaho kauʼaoa pea ʼe matolu te ʼu ʼao,+
ʼE hage ko te kamata mafoa ʼo te ʼaho ʼi te ʼu moʼuga.
ʼE ʼi ai te hahaʼi ʼe kaugamalie mo malohi.+
Neʼe heʼeki ʼi ai he hahaʼi feia ʼi te temi muʼa,
Pea ʼe mole toe maʼu anai ʼi he temi,
ʼI te ʼu taʼiake fuli ka hoa mai.
3 ʼE vela ia meʼa fuli ʼi ʼonatou muʼa
Pea ʼe tutu ia meʼa fuli ʼi ʼonatou tuʼa.+
ʼE hage te fenua ʼae ʼi ʼonatou muʼa ko te ʼoloto ʼo Eteni.+
Kae ʼe hage te koga meʼa ʼae ʼi ʼonatou tuʼa ko he toafa, pea kua maumauʼi,
Pea neʼe mole hao he meʼa.
4 ʼE hage tonatou agaaga ko ni hosi.
Pea ʼe natou feleleʼi ohage ko ni hosi neʼe teuteu ki te tau.+
5 ʼE natou fehopoʼaki ʼi te ʼu tumutumu ʼo te ʼu moʼuga. Pea ʼe hage tanatou logoaʼa ko ni saliote tau,+
Mo te makapapa ʼo he afi kakaha moka tutu he luna moamoa.
ʼE natou hage ko he hahaʼi malohi ʼe fakaʼatu ki te tau.+
6 ʼE lototuʼania anai te hahaʼi ʼuhi ko natou.
Pea ʼe lau tetea anai ʼonatou fofoga fuli.
7 ʼE natou feʼohofi ohage ko ni tagata tau,
ʼE natou fekakeʼi ʼi he kaupa ohage ko he kau solia.
ʼE natou tahi alu pe ʼi tona ala,
Pea ʼe mole natou toe maliu kehe mai tonatou ala.
8 ʼE mole natou fehumuhumukiʼaki,
ʼE tahi alu pe te tagata ʼi tona ala.
ʼE lavevea peʼe mamate ʼihi ʼi te ʼu mahafu,
Kae ʼe hoko atu pe te haʼele ʼa natou ʼae.
9 ʼE natou feulufi ki te kolo, ʼe natou feleleʼi ʼi te kaupa.
Pea ʼe natou fekakeʼi ʼi te ʼu ʼapi, ʼo natou feulufi ʼi te ʼu matapa fakamalama ohage ko he tagata kaihaʼa.
10 ʼE galulu te fenua pea mo te lagi ʼi ʼonatou muʼa.
ʼE fakapoʼuli te laʼa pea mo te mahina,+
Pea ʼe mole kei gigila te ʼu fetuʼu.
11 ʼE palalau leʼo lahi anai ia Sehova ia muʼa ʼo tana kautau,+ koteʼuhi ʼe kaugamalie ʼaupito tana kau solia.+
Pea ʼe malohi ia ia ʼae ʼe ina fakahoko tana folafola.
ʼEi, ko te ʼaho ʼo Sehova ʼe ko he ʼaho lahi pea mo fakamanavahe.+
Ko ai ʼae ʼe ina lava katakiʼi?”+
12 Koia ʼe ui ai e Sehova: “ ʼE heʼeki tauhala, koia kotou toe liliu mai kia te au mo tokotou loto katoa.”+
“Kotou sesunio,+ mo fetagihi, pea mo tagilaulau.
13 ʼAua naʼa kotou hae ʼokotou mutuʼi meʼa+ kae ʼe tonu ke kotou lotofakahemala.*+
Kotou toe liliu mai kia Sehova tokotou ʼAtua,
Koteʼuhi ʼe manavaʼofa, mo tuai ʼi te ita+ pea mo fonu ʼi te ʼofa agatonu.+
Pea ʼe mole ina fakahoko anai* te malaʼia ʼae neʼe ina fakatuʼutuʼu ke ina fai.
14 Ko ai ʼae ʼe ina iloʼi? ʼE lagi fetogi anai tana manatu pea ʼe ina toe fakakaukauʼi anai tana tonu.*+
Pea ʼe lagi ina foaki atu anai he tapuakina.
ʼE feala ai anai ke kotou momoli he molaga meʼa kai pea mo he molaga vino kia Sehova tokotou ʼAtua.
15 Kotou pupuhi te fakatagi pupuhi ʼi Sione!
Kotou tala he sesunio, kotou fakaha ʼe fai he fakatahi taputapu.+
16 Kotou fakatahiʼi pea mo fakamaʼoniʼoniʼi te hahaʼi.+
Kotou fakatahiʼi te kau matuʼa, mo te ʼu fanau, pea mo te ʼu kiʼi toe meamea.+
Ke mavae te tagata pea mo te fafine ʼae neʼe hoki ʼohoana mai tonā koga fale.
17 Ke fetagihi te kau pelepitelo, ia te ʼu tagata ʼae ʼe gaue kia Sehova,
ʼI te vaha ʼo te fakamalumaluʼaga pea mo te ʼaletale.+ Pea ke natou ui:
‘Sehova e, ke ke lotomanavaʼofa ki tau hahaʼi!
ʼAua naʼa ke tuku ke meʼa noaʼi tou tofiʼa
ʼO ke tuku ke puleʼi e te ʼu puleʼaga.
He koʼe ʼe ui anai e te hahaʼi:
“ ʼE ʼifea koa tonatou ʼAtua?” ’+
18 Pea ʼe puipui fakamalotoloto anai e Sehova ia tona fenua
Pea ʼe lotomanavaʼofa anai ki tana hahaʼi.+
19 ʼE tali anai e Sehova ki tana hahaʼi:
‘ ʼE au foaki atu anai he fulumeto,* mo he vino foʼou, pea mo he lolo.
Pea ʼe kotou makokona moʼoni anai.+
ʼE mole au toe tuku anai ke meʼa noaʼi koutou ʼi te ʼu puleʼaga.+
20 ʼE au fakamamaʼo anai mai ia koutou ia ia ʼae ʼe haʼu mai te potu noleto.
ʼE au kapu anai ia ia ki he koga meʼa magemage mo lavaki.
ʼE au kapu anai te ʼatu muʼa ʼo tana kau solia ke olo ki te tai ʼae ʼi te potu esite.*
Pea ʼe au kapu anai te ʼatu muli ʼo tana tahi kau solia ke olo ki te tai ʼae ʼi te potu uesite.*
ʼE alu ake anai tona mamanu faikehe,
ʼEi, ʼe haga alu ake pe anai tona mamanu.+
ʼE au fai anai he ʼu meʼa fakaofoofo.’
21 Siʼi fenua, ʼaua naʼa ke mataku!
Kae ke ke fiafia, koteʼuhi ʼe fai anai e Sehova he ʼu meʼa fakaofoofo.
22 ʼU manu ʼo te vao, ʼaua naʼa kotou matataku!
ʼE maʼuli lelei anai te ʼu koga meʼa lunaʼia ʼae ʼi te vao,+
Pea ʼe fua anai te ʼu fuʼu ʼakau.+
ʼEi, ʼe lahi anai te fua ʼo te fuʼu fiku pea mo te fuʼu vite.+
23 ʼU foha ʼo Sione, kotou fakafiafia ʼo ʼuhiga mo te meʼa ʼae ka fai e Sehova tokotou ʼAtua!+
ʼE ina fakafuafua lelei anai te ʼua ʼo te temi fakato lau,
ʼE ina fakato anai ni ʼua lalahi,
ʼEi, te ʼua ʼo te temi fakato lau pea mo te temi mātala ʼo te ʼu fisiʼi ʼakau, ohage pe ko te temi muʼa.+
24 ʼE fonu anai te ʼu hahaʼaga fulumeto ko te tegaʼi fulumeto ʼae kua haha.
Pea ʼe fonu anai te ʼu lomiʼaga vite ko te vino foʼou pea mo te ʼu lomiʼaga oliveto ko te lolo.+
25 ʼE au toe foaki atu anai te meʼa ʼae neʼe kai e te ʼu heʼe lolotoga ni taʼu.
Neʼe kai te meʼa ʼaia e te ʼu heʼe ʼae ʼe lele, mo te ʼu heʼe ʼae kei veliveli, mo te ʼu heʼe maumau fenua, pea mo te ʼu heʼe ʼae ʼe natou kai ia meʼa fuli.
ʼEi, neʼe ko te foʼi kautau lahi ʼae neʼe au fekauʼi atu ke ina tauteaʼi ia koutou.+
26 ʼE kotou kakai anai, pea ʼe kotou makokona moʼoni anai.+
ʼE kotou fakakololiaʼi anai te huafa ʼo Sehova tokotou ʼAtua,+
ʼAe ka ina fai he ʼu meʼa fakaofoofo maʼa koutou.
Pea ʼe mole toe ufiufi anai taku hahaʼi ʼi he temi.+
27 Pea ʼe mahino ia, ʼe kotou iloʼi anai ʼe au nofo ʼi te lotolotoiga ʼo Iselaele,+
ʼE ko au ia Sehova tokotou ʼAtua,+ pea ʼe mole ʼi ai he tahi age ʼAtua!
Pea ʼe mole toe ufiufi anai taku hahaʼi ʼi he temi.
28 Hili ʼaia, ʼe au foaki anai toku laumalie+ ki te faʼahiga hahaʼi* fuli.
Pea ʼe faifakakikite anai ʼokotou foha pea mo ʼokotou ʼofafine,
Pea ʼe fai anai e ʼakotou matuʼa ni moemisi,
Pea ʼe sisio anai ʼakotou kau tupulaga ki he ʼu meʼa ʼe ha kia natou.+
29 ʼI te temi ʼaia, ʼe au toe foaki anai toku laumalie,
Ki ʼaku tagata mo fafine kaugana.
30 ʼE au fai anai ni meʼa fakaofoofo* ʼi te lagi pea mo te kele.
ʼE ʼi ai anai he toto, mo he afi, pea mo he kohu.+
31 ʼE liliu anai te laʼa ʼo fakapoʼuli pea mo te mahina ʼo toto+
ʼI muʼa ʼo te hoko mai ʼo te ʼaho lahi mo fakamanavahe ʼo Sehova.+
32 ʼE haofaki anai ia natou fuli ʼae ʼe fetapa ki te huafa ʼo Sehova.+
ʼEi, ʼe nonofo anai te hahaʼi ʼae ka hao ʼi te Moʼuga ʼo Sione pea mo Selusalemi,+ ohage ko tona ui e Sehova.
ʼEi, ʼe pauʼi e Sehova ia natou ʼae ka haofaki.”
3 “Koʼeni, ʼe au toe ʼaumai anai ia natou ʼo Suta pea mo Selusalemi ʼae neʼe ʼave popula.+
Pea ʼi te ʼu ʼaho ʼaia, ʼei, ʼi te temi ʼaia,
2 ʼE au toe fakatahiʼi anai mo te ʼu puleʼaga fuli,
Pea ʼe au fekauʼi anai ia natou ke hihifo ki te Potu Fenua Laulelei ʼo Sosafate.*
ʼE au fakamauʼi anai ia natou ʼi ai,+
ʼUhi ko te meʼa ʼae neʼe natou fai ki taku hahaʼi ko Iselaele, ia toku tofiʼa.
ʼEi, neʼe natou fakamavetevete taku hahaʼi ʼi te ʼu puleʼaga,
Pea neʼe natou vahe toku fenua.+
3 Neʼe natou fai ni toho ke natou fevaevaeʼaki ai taku hahaʼi.+
Neʼe natou fakatau he tamasiʼi tagata ke totogi ʼaki he fafine paomutu.
Neʼe natou fakatau he tamasiʼi fafine ke natou maʼu ai he vino.
4 Tile, mo Sitoni, pea mo te ʼu potu fenua fuli ʼo Filisitini,
He koʼe ʼe kotou agakovi feia kia au?
Neʼe ʼi ai koa he meʼa neʼe au fai atu ʼae ʼe kotou lagavaka mai ai?
Kapau ʼe ko hakotou lagavaka ʼaia kia au,
ʼE au toe liufaki vave atu pe anai ʼo mulimuli ki ʼakotou aga.+
5 Neʼe kotou toʼo taku siliva pea mo taku aulo.+
Pea neʼe kotou ʼave ki ʼokotou fale lotu ʼoku koloa ʼae ʼe maʼuhiga ʼaupito.
6 Neʼe kotou fakatau te hahaʼi ʼo Suta pea mo Selusalemi ki te kau Keleka.+
Neʼe kotou fai te faʼahi ʼaia ke tupu ai hanatou mamaʼo mai tonatou fenua.
7 Koia ʼae ʼe au toe ʼaumai anai natou mai te koga meʼa ʼae neʼe koutou fakatau natou ki ai.+
Pea ʼe au toe liufaki atu pe anai te meʼa ʼae neʼe kotou fai ʼo mulimuli ki ʼakotou aga.
8 ʼE au tuku* anai ʼokotou foha pea mo ʼokotou ʼofafine ki te hahaʼi ʼo Suta.+
Pea ʼe natou fakatau anai natou ki te hahaʼi ʼo Sepa, ʼae ko he puleʼaga ʼe tuʼu mamaʼo.
ʼE ko au ia Sehova, ʼae neʼe ina fakaha tonu atu.
9 Kotou fakaha te meʼa ʼaeni ʼi te ʼu puleʼaga:+
‘Kotou nofo teuteu* ki te tau! Kotou uga te ʼu tagata malolohi!
Ke fakaovi mai te kau solia fuli! Pea ke natou haʼele!+
10 Kotou fai he ʼu heleta ʼaki ʼakotou huo fuli kele, pea mo he ʼu tao ʼaki ʼakotou hele tuʼusi ʼakau.
Ke ui e ia ʼae ʼe vaivai: “ ʼE au malohi!”
11 ʼU puleʼaga fuli ʼo te ʼu tafaʼaki, kotou ʼomai ʼo tokoni, pea mo kotou fakatahitahi!’ ”+
Sehova e, fekauʼi ifo ʼau tagata malolohi* ki te koga meʼa ʼaia.
12 “Ke tutuʼu ake te ʼu puleʼaga ʼo olo ki te Potu Fenua Laulelei ʼo Sosafate.
ʼE au heka ai anai ʼo fakamauʼi te ʼu puleʼaga fuli ʼo te ʼu tafaʼaki.+
13 Kotou fakaʼaogaʼi he hele piko, he ʼe kua matutuʼa te taʼukai.
Kotou hihifo ʼo malamalaki te vite, koteʼuhi kua fonu te lomiʼaga vite.+
Kua fonu te ʼu meʼa ʼae ʼe fakatali ki ai te huʼa vite, koteʼuhi kua lahi ʼaupito tanatou agakovi.
14 ʼE ʼi ai he hahaʼi kaugamalie, ʼei, he hahaʼi kaugamalie ʼi te potu fenua laulelei ʼo te fakamau,
Koteʼuhi kua ovi mai te ʼaho ʼo Sehova ʼi te potu fenua laulelei ʼo te fakamau.+
15 ʼE fakapoʼuli anai te laʼa pea mo te mahina,
Pea ʼe mole toe gigila anai te ʼu fetuʼu.
16 ʼE gugulu anai ia Sehova mai Sione,
ʼE kalaga anai mai Selusalemi.
Pea ʼe galulu anai te lagi pea mo te kele.
Kae ʼe liliu anai ia Sehova ko he nonoʼaga ʼo tana hahaʼi,+
Pea mo he kolo tau ʼa te hahaʼi ʼo Iselaele.
17 Pea ʼe mahino ia, ʼe kotou iloʼi anai ko au ia Sehova tokotou ʼAtua, ʼae ʼe nofo ʼi Sione, toku moʼuga taputapu.+
ʼE liliu anai ia Selusalemi ko he koga meʼa taputapu,+
Pea ʼe mole toe fakalaka anai ʼi ai te kau matapule.+
18 ʼI te ʼaho ʼaia, ʼe tafe anai mai te ʼu moʼuga he vino foʼou,+
Pea mo he huʼa pipi mai te ʼu kiʼi moʼuga.
Pea ʼe tafe anai te vai ki te ʼu liuʼa fuli ʼo Suta.
ʼEi, ʼe mapuna ake anai he matapuna vai mai te fale lotu ʼo Sehova.+
Pea ʼe ina fakavai anai te Vai Tafe* ʼo Te ʼu Fuʼu Akasia.
19 Kae ʼe tuʼu lavaki anai ia Esipito,+
Pea ʼe liliu anai ia Etome ko he toafa,+
Koteʼuhi neʼe natou agakovi ki te hahaʼi ʼo Suta.+
Pea neʼe natou matehi ʼi tona fenua ni hahaʼi neʼe mole natou fai he meʼa ʼe kovi.+
20 Kae ʼe nofoʼi tuʼumaʼu anai ia Suta,
ʼO feia mo Selusalemi mai he taʼiake ki he tahi taʼiake.+
21 ʼE hage anai kia au te ʼu fakapo ʼae neʼe natou fai ʼi te temi muʼa neʼe mole hoko.+
Pea ko au, ia Sehova, ʼe au nofo anai ʼi Sione.”+
Ko tona fakaʼuhiga “ ʼE ʼAtua Ia Sehova.”
Peʼe “kele.”
Vakaʼi Te ʼu Kupu.
Peʼe “ki te ʼohoana ʼo tona temi finemui.”
Hep. “haʼi ʼokotou koga loto.” Vakaʼi te kupu “Taga” ʼi Te ʼu Kupu.
Peʼe lagi “te ʼu fiku.”
Peʼe “kele.”
Hep. “hae ʼokotou loto.”
Peʼe “ ʼe fakahemala anai ʼo ʼuhiga mo.”
Peʼe “ ʼe fakahemala anai.”
Peʼe lagi ko te olose.
ʼE ko te Tai Mate.
ʼE ko te Metitelanea.
Hep. “kakano.”
Peʼe “fakaha anai ni fakamelomelo.”
Ko tona fakaʼuhiga “ ʼE Tuʼi Fakamau Ia Sehova.”
Hep. “fakatau.”
Hep. “fakamaʼoniʼoniʼi ia koutou.”
Peʼe “tagata tau.”
Vakaʼi Te ʼu Kupu.