AMOSI
1 Ko te ʼu folafola ʼaeni ʼa Amosi,* ʼae neʼe kau ki te ʼu tagata tauhi ovi ʼo Tekoa.+ Neʼe sio ia Amosi ki he meʼa neʼe ha. Pea neʼe fakaha age ki ai te ʼu folafola ʼaia ʼo ʼuhiga mo Iselaele, ʼi te ʼu temi pule ʼo te Hau ʼo Suta ko Osiasi,+ pea mo te hau ʼo Iselaele ko Selopoamo,+ te foha ʼo Soasi.+ Pea neʼe hoko te aluʼaga ʼaia ia taʼu ʼe lua ʼi muʼa ʼo te hoko ʼo te mafuike.+ 2 Neʼe ina ui:
“ ʼE gugulu anai ia Sehova mai Sione,
Pea ʼe kalaga anai mai Selusalemi.
ʼE mole kei maʼuli he meʼa ʼi te ʼu koga meʼa lunaʼia ʼa te kau tagata tauhi ovi.
Pea ʼe moamoa anai te tumutumu ʼo te moʼuga ʼo Kalemelo.”+
3 “Koʼeni te meʼa ʼae ʼe ui e Sehova:
‘ “ ʼE mole fetogi anai taku tonu, ʼuhi ko te ʼu agatuʼu* ʼae neʼe fai tuʼa tolu peʼe tuʼa fa* e Tamaso.
ʼEi, neʼe natou gaohi koviʼi ʼaupito ia Kileate ohage ko te molomoloki ʼo te fulumeto e ni saliote ukamea.+
4 Koia ʼe au fakato anai he afi ki te fale hau ʼo Hasaele,+
Pea ʼe vela ai anai te ʼu tule malohi ʼo Pene-atate.+
5 ʼE au maumauʼi anai te ʼu ukamea fakamaʼu ʼo te ʼu matapa ʼo Tamaso.+
ʼE au matehi anai te hahaʼi ʼo Pikate-aveni,
Pea mo ia ʼae ʼe hau* ʼi Pete-eteni.
Pea ʼe ʼave popula anai te hahaʼi ʼo Silia ki Kile,”+ ko te ui ʼaia ʼa Sehova.’
6 Koʼeni te meʼa ʼae ʼe ui e Sehova:
‘ “ ʼE mole fetogi anai taku tonu, ʼuhi ko te ʼu agatuʼu ʼae neʼe fai tuʼa tolu peʼe tuʼa fa e Kasa.+
ʼEi, neʼe natou ʼave popula he hahaʼi kaugamalie+ pea mo tuku kia nima ʼo Etome.
7 Koia ʼe au fakato anai he afi ki te kaupa ʼo Kasa,+
Pea ʼe vela ai anai ʼona tule malohi.
8 ʼE au matehi anai te hahaʼi ʼo Asoti,+
Pea mo ia ʼae ʼe hau* ʼi Asekaloni.+
ʼE au tauteaʼi anai ia Ekelone,+
Pea ko te toega ʼo te kau Filisitini ʼe mamate anai,”+ ko te ui ʼaia ʼa te Tuʼi ʼAliki ko Sehova.’
9 Koʼeni te meʼa ʼae ʼe ui e Sehova:
‘ ʼE mole fetogi anai taku tonu, ʼuhi ko te ʼu agatuʼu ʼae neʼe fai tuʼa tolu peʼe tuʼa fa e Tile.+
ʼEi, neʼe natou tuku kia nima ʼo Etome he hahaʼi kaugamalie neʼe ʼave popula,
Pea neʼe mole natou manatuʼi pe la te fuakava ʼae neʼe fai e te tau tehina.+
10 Koia ʼe au fakato anai he afi ki te kaupa ʼo Tile,
Pea ʼe vela ai anai ʼona tule malohi.’+
11 Koʼeni te meʼa ʼae ʼe ui e Sehova:
‘ ʼE mole fetogi anai taku tonu, ʼuhi ko te ʼu agatuʼu ʼae neʼe fai tuʼa tolu peʼe tuʼa fa e Etome.+
ʼEi, neʼe ina tuli tona tehina ʼaki te heleta,+
Pea neʼe mole lotomanavaʼofa.
Ohage ko he manu moka ita ʼe ina hae tuʼumaʼu ia natou,
Pea ʼe kei kovi ʼosi pe tona ita kia natou.+
13 Koʼeni te meʼa ʼae ʼe ui e Sehova:
‘ “ ʼE mole fetogi anai taku tonu, ʼuhi ko te ʼu agatuʼu ʼae neʼe fai tuʼa tolu peʼe tuʼa fa e te kau Amone.+
ʼEi, neʼe natou fahiʼi te ʼu fatu ʼo te ʼu fafine faitama ʼo Kileate moʼo fakalahi tonatou fenua.+
14 Koia ʼe au tutu anai te kaupa ʼo Lapa,+
Pea ʼe vela ai anai ʼona tule malohi,
Kae lolotoga fai he kalaga tau ʼi te ʼaho ʼo te tau
Pea ʼe fakamataku anai te afā ʼi te ʼaho ʼaia.
15 Pea ʼe ʼave popula anai tonatou hau pea mo tana kau tama ʼaliki,”+ ko te ui ʼaia ʼa Sehova.’
2 “Koʼeni te meʼa ʼae ʼe ui e Sehova:
‘ “ ʼE mole fetogi anai taku tonu, ʼuhi ko te ʼu agatuʼu* ʼae neʼe fai tuʼa tolu peʼe tuʼa fa e Moape.+
ʼEi, neʼe ina tutu te ʼu hui ʼo te hau ʼo Etome moʼo fai ʼaki he lahe.
2 Koia ʼe au fakato anai he afi ki Moape,
Pea ʼe vela ai anai te ʼu tule malohi ʼo Keliosi.+
ʼE mate anai ia Moape ʼi te logoaʼa ʼa te foʼi kautau,
Mo te kalaga tau pea mo te pupuhi fakatagi.+
3 ʼE au pulihi anai te tagata pule* ʼi Moape,
Pea ʼe au matehi anai ʼona tama ʼaliki fuli,”+ ko te ui ʼaia ʼa Sehova.’
4 Koʼeni te meʼa ʼae ʼe ui e Sehova:
‘ ʼE mole fetogi anai taku tonu, ʼuhi ko te ʼu agatuʼu ʼae neʼe fai tuʼa tolu peʼe tuʼa fa e Suta.+
ʼEi, neʼe natou liʼaki te lao* ʼae neʼe au foaki age, ia au ʼaeni ko Sehova.
Pea neʼe mole natou fakalogo ki ʼaku fakatotonu.+
Kae neʼe natou tui pe ki te ʼu loi ʼae neʼe tui ki ai ʼanatou kui. Neʼe natou fai ai te meʼa ʼae ʼe kovi.+
6 Koʼeni te meʼa ʼae ʼe ui e Sehova:
‘ ʼE mole fetogi anai taku tonu, ʼuhi ko te ʼu agatuʼu ʼae neʼe fai tuʼa tolu peʼe tuʼa fa e Iselaele.+
ʼEi, ʼe natou fakatau te tagata faitotonu ke natou maʼu ai he siliva,
Pea mo te tagata masiva ki he hoaʼi sulie.+
ʼE momoe te tamai pea mo te foha mo he taʼahine pe ʼe tahi.
Pea ʼe ʼulihi ai toku huafa maʼoniʼoni.
8 Neʼe natou toʼo te ʼu pulupulu ʼo natou ʼae ʼe toʼo maʼua ko he fakamoʼoni ʼe natou huʼi anai ʼonatou maʼua.+ Pea ʼe natou takokoto ʼi te ʼu pulupulu ʼaia ia tafa ʼo te ʼu ʼaletale fuli.+
Neʼe natou totogi te vino ʼaki te falā ʼa te hahaʼi ʼae neʼe natou fakatuʼā, ʼo natou inu ʼi te fale lotu* ʼo ʼonatou ʼatua.’
9 ‘Kae neʼe ko au ʼae neʼe au matehi te kau Amole ʼi ʼonatou muʼa.+
Neʼe natou lalahi ohage ko he ʼu fuʼu sete pea mo malolohi ohage ko he ʼu fuʼu sene.
Neʼe natou hage ko he fuʼu ʼakau, pea neʼe au maumauʼi ʼonatou fua pea mo ʼonatou aka.+
10 Neʼe au fakamavae koutou mai Esipito,+
Pea neʼe au taki koutou ʼi te toafa ia taʼu ʼe 40,+
Ke kotou maʼu ai te fenua ʼo te kau Amole.
11 Neʼe au fakanofo ʼihi ʼi ʼokotou foha ko he ʼu polofeta,+
Pea mo ʼihi ʼi ʼakotou kau tupulaga ko he ʼu Nasilea.+
Hahaʼi ʼo Iselaele, ʼe mole moʼoni koa la te faʼahi ʼaia?’ ko te ui ʼaia ʼa Sehova.
12 ‘Kae neʼe kotou fakainu vino te kau Nasilea.+
Pea neʼe kotou fakatotonu ki te ʼu polofeta: “ ʼAua naʼa kotou faifakakikite!”+
13 Koia ʼe au tataʼo anai koutou ʼi ai.
ʼE hage anai ko te tataʼo e he saliote ia te ʼu meʼa fuli ʼae ʼi tona ala. Pea ʼe fonu te saliote ʼaia ko ni fuhiga fulumeto.
14 ʼE mole anai he holaʼaga ʼo te tagata lele vave.+
ʼE mole toe maʼu anai e te tagata malohi ia tona malohi.
Pea ʼe mole haofaki anai e te tagata tau tona maʼuli.*
15 ʼE holomuli anai te tagata fainahau ʼi te tau.
ʼE mole hao anai te tagata haʼele vave.
Pea ʼe mole haofaki anai e te tagata heka hosi tona maʼuli.*
16 Maʼia mo te tagata tau ʼae ʼe lototoʼa ʼaupito,
ʼE hola telefua anai ʼi te ʼaho ʼaia,’+ ko te ui ʼaia ʼa Sehova.”
3 “Hahaʼi ʼo Iselaele, kotou fakalogo ki te folafola ʼaeni neʼe fai e Sehova ʼo ʼuhiga mo koutou, ʼei, te hahaʼi katoa ʼae neʼe ina fakamavae mai Esipito:
2 ‘Neʼe ko koutou pe ʼae neʼe au iloʼi ʼi te hahaʼi fuli ʼo te kele.+
Koia ʼae ʼe au tauteaʼi anai koutou ʼuhi ko ʼakotou hala fuli.+
3 ʼE feala anai koa ke haʼele fakatahi he toko lua, kae heʼeki nā fakatuʼutuʼu ke nā felaveʼi?
4 ʼE gugulu anai koa he laione ʼi he vao matuʼa, kae ʼe mole ʼi ai he manu ke ina kai?
ʼE gugulu anai koa he laione kei mui mai tona nonoʼaga, kae heʼeki ina puke he manu?
5 ʼE puke anai koa he manulele, kae ʼe mole ʼi ai he hele?*
ʼE mapunu anai koa he hele kae heʼeki ina puke he meʼa?
6 Ka pupuhi te fakatagi pupuhi ʼi he kolo, ʼe mole koa la tekelili ai te hahaʼi ʼi tonatou matataku?
Ka hoko he malaʼia ʼi he kolo, ʼe mole koa la ko Sehova ʼae neʼe ina fai te faʼahi ʼaia?
7 ʼE mole fai anai e te Tuʼi ʼAliki ko Sehova he meʼa
Kae ʼe heʼeki ina fakaha tana fakatuʼutuʼu* ki ʼana tagata faifekau, ia te kau polofeta.+
8 Neʼe gugulu te laione!+ Ko ai ʼae ʼe mole mataku anai?
Neʼe palalau te Tuʼi ʼAliki ko Sehova! Ko ai ʼae ʼe mole faifakakikite anai?’+
9 ‘Kotou tala te faʼahi ʼaeni ʼi te ʼu tule malohi ʼo Asoti,
Mo te ʼu tule malohi ʼo Esipito:
“Kotou fakatahitahi ki te ʼu moʼuga ʼo Samalia.+
Kotou sisio ki te maveuveu
Pea mo te agakaka ʼae ʼe hoko ai.+
10 ʼE mole natou iloʼi te fai ʼo te meʼa ʼae ʼe totonu,” ko te ui ʼaia ʼa Sehova.
“ ʼE natou tanaki ʼi ʼonatou tule malohi te ʼu meʼa ʼae ʼe natou maʼu mai tanatou agamalohi pea mo tanatou kaihaʼa.” ’
11 Koia koʼeni te meʼa ʼae ʼe ui e te Tuʼi ʼAliki ko Sehova:
‘ ʼE ʼa takai anai e te fili te fenua.+
ʼE ina pulihi anai tou malohi,
Pea ʼe kaihaʼa anai ʼou tule malohi.’+
12 Koʼeni te meʼa ʼae ʼe ui e Sehova:
‘ ʼE heheka ia te hahaʼi ʼo Iselaele ʼi he ʼu moeʼaga matalelei ʼi Samalia, pea mo he tahi age ʼu moeʼaga taulekaleka.*+
ʼE ko he tokosiʼi pe anai ia natou ʼae ka haofaki,
Ohage pe ko te lava tohoʼi e he tagata tauhi ovi mai te gutu ʼo te laione te ʼu vaʼe ʼe lua ʼo he ovi peʼe ko he koga ʼo tona taliga.’
13 ‘Kotou fagono mai, pea kotou fakatokaga* te hologa ʼo Sakopo,’ ko te ui ʼaia ʼa te Tuʼi ʼAliki ko Sehova, te ʼAtua ʼo te ʼatu kautau.
14 ‘ ʼI te ʼaho ʼae ʼe au tauteaʼi anai ia Iselaele ʼuhi ko ʼana agatuʼu* fuli,+
ʼE au toe tauteaʼi anai ia ia ʼuhi ko te ʼu ʼaletale ʼo Petele.+
ʼE fasifasi anai te ʼu tala ʼo te ʼaletale pea ʼe fetoki anai.+
15 ʼE au maumauʼi anai te ʼapi ʼo te temi momoko ʼo feia mo te ʼapi ʼo te temi vela.’
‘Pea ʼe maumauʼi anai te ʼu ʼapi ivuale,*+
Pea ʼe pulihi anai te ʼu ʼapi lalahi,’*+ ko te ui ʼaia ʼa Sehova.”
4 “ ʼU fafine ʼae ʼe maʼuʼuli ʼi te moʼuga ʼo Samalia,+ kotou fagono ki ʼaku folafola.
ʼE kotou hage ko ni pipi fafine ʼo Pasani.
ʼE kotou kaihaʼa te kau vaivavai+ mo fakamamahiʼi te kau masisiva.
Pea ʼe kotou ui ki ʼokotou ʼohoana:* ‘ ʼAumai hamatou meʼa inu!’
2 Neʼe fakapapau e te Tuʼi ʼAliki ko Sehova ʼi tona ʼuhiga maʼoniʼoni:
‘ “Koʼeni, ʼe hoko mai anai te ʼaho ʼae ka hiki ake ai koutou ʼaki ni mātaʼu lalahi ʼe tautau ai te kanoʼi manu.
Pea ʼe toe hiki ake anai te toega ʼo koutou ʼaki ni mātaʼu.
3 ʼE kotou mavae anai ʼi he ava ʼo te kaupa, ʼo kotou tahi alu fakahagatonu.
Pea ʼe li anai koutou ki te Halemone,” ko te ui ʼaia ʼa Sehova.’
4 ‘Kotou ʼomai ki Petele pea kotou talagataʼa,*+
Kotou ʼomai ki Kilekale pea ke toe ʼasili age takotou talagataʼa!+
Kotou ʼaumai ʼakotou sakilifisio+ ʼi te uhu,
Pea mo ʼakotou vahe tahi ki te hogofulu+ ʼi te tolu ʼaho.
5 Kotou momoli he pane neʼe fai ʼaki te meʼa fakatupu ko he sakilifisio ʼo te fakafetaʼi.+
Kotou tala leʼo lahi ʼakotou molaga ʼae ʼe kotou foaki ʼaki he lotolelei!
Hahaʼi ʼo Iselaele, ʼe kotou leleiʼia te fai ʼo te meʼa ʼaia,’ ko te ui ʼaia ʼa te Tuʼi ʼAliki ko Sehova.
6 ‘Neʼe au tuku ke hoko he hoge* ʼi ʼokotou kolo fuli,
Pea neʼe mole maʼu he pane ʼi ʼokotou ʼapi fuli ʼuhi ko au.+
Kae neʼe mole kotou toe liliu mai kia te au,’+ ko te ui ʼaia ʼa Sehova.
7 ‘Neʼe mole au toe fia fakato foki te ʼua logo la neʼe kei toe mahina ʼe tolu ki te temi taʼukai.+
Neʼe au fakato te ʼua ki he kolo kae neʼe mole au fakato ki he tahi age kolo.
Neʼe to te ʼua ki he gaueʼaga,
Kae neʼe mole to ia ki he tahi age gaueʼaga, ʼo moamoa ai.
8 Neʼe mavae ni hahaʼi gaʼegaʼe mai ni kolo ʼe lua, peʼe tolu ʼo olo ki he kolo pe ʼe tahi ʼo iinu ai,+
Kae neʼe mole puli ai tonatou fia iinu.
Logo la te ʼu faʼahi ʼaia, kae neʼe mole kotou toe liliu mai kia te au,’+ ko te ui ʼaia ʼa Sehova.
9 ‘Neʼe au maumauʼi ʼakotou taʼukai ʼaki he mahaki pea mo he ʼu matagi vevela.+
Neʼe lahi ʼakotou ʼoloto mo ʼakotou gaueʼaga vite,
Kae neʼe kai e te ʼu heʼe ʼokotou fuʼu fiku mo ʼokotou fuʼu oliveto.+
Logo la te ʼu faʼahi ʼaia, kae neʼe mole pe la kotou toe liliu mai kia te au,’+ ko te ui ʼaia ʼa Sehova.
10 ‘Neʼe au fakato te taʼi mahaki kia koutou ohage ko te taʼi mahaki ʼae neʼe to ʼi Esipito.+
Neʼe au matehi ʼakotou tupulaga ʼaki te heleta,+ pea neʼe au tuku ke ʼave ʼakotou hosi.+
Pea neʼe au tuku ke kotou mamanu ki te ʼaele kovi ʼo te ʼu sino mate ʼae ʼi ʼokotou nofoʼaga.+
Kae neʼe mole kotou toe liliu mai kia te au,’ ko te ui ʼaia ʼa Sehova.
11 ‘Neʼe au fakaʼauha koutou,
Ohage ko te fakaʼauha e te ʼAtua ia Sotoma mo Komola.+
Pea neʼe kotou hage ko he ʼu motumotu neʼe toʼo mai te afi.
Kae neʼe mole kotou toe liliu mai kia te au,’+ ko te ui ʼaia ʼa Sehova.
12 Koia Iselaele, ʼe ko te meʼa ʼaia ka au fai kia koe!
ʼEi, ko te meʼa ʼaia ka au fai kia koe!
Koia Iselaele, ke ke teuteu ki tau felaveʼi mo tou ʼAtua!
13 ʼEi, neʼe ina fakatupu te ʼu moʼuga+ pea mo te matagi.+
ʼE ina fakaha ʼana manatu ki te tagata.
ʼE ina fakaliliu te mafoa ʼo te ʼaho ʼo fakapoʼuli.+
Pea ʼe haʼele ʼi te ʼu koga meʼa maʼoluga ʼo te kele.+
Ko tona huafa ʼe ko Sehova, te ʼAtua ʼo te ʼatu kautau.”
5 “Hahaʼi ʼo Iselaele, kotou fakalogo ki te folafola ʼaeni ʼe au fakaha atu kia koutou ohage ko he hiva mate:
2 ‘Kua toka ia Iselaele, te taʼahine taupoʼou,
Pea ʼe mole kei feala hana tuʼu ake.
Kua mavae te hahaʼi fuli mai ai.
ʼE mole ʼi ai he tahi ke ina fakatuʼu ake ia ia.’
3 “Koʼeni te meʼa ʼae ʼe ui e te Tuʼi ʼAliki ko Sehova:
‘Ko te kolo ʼae ʼe alu ki te tau mo ni tagata ʼe toko 1 000, ʼe ko te toko 100 pe ʼae ka toe,
Pea ko te kolo ʼae ʼe alu mo he toko 100, ʼe ko te toko 10 pe ʼae ka toe.
Koʼena te meʼa ʼae ka hoko ki te hahaʼi ʼo Iselaele.’+
4 “Koʼeni te meʼa ʼae ʼe ui e Sehova ki te hahaʼi ʼo Iselaele:
‘Kotou toe liliu mai kia te au pea ʼe kotou maʼuʼuli anai.+
5 ʼAua naʼa kotou olo ki Petele,+
Mo Kilekale.+ Pea ʼaua naʼa kotou fakalaka ʼi te tuʼakoi ke kotou olo ai ki Pele-sepa,+
He ʼe mahino ia, ʼe ʼave popula anai ia Kilekale,+
Pea ʼe pulihi anai ia Petele.*
6 Kotou toe liliu mai kia Sehova pea ʼe kotou maʼuʼuli anai,+
Naʼa ina fakaʼauha te hologa ʼo Sosefo ʼaki te afi,
ʼO vela ai ia Petele. Pea ʼe mole tamateʼi anai e he tahi te afi ʼaia.
8 Ko ia ʼae neʼe ina fakatupu ia te pupuga fetuʼu ʼo Kima,* pea mo te pupuga fetuʼu ʼo Kesile,*+
Ko ia ʼae ʼe ina fetogi te fakapoʼuli gaogao ʼo mafoata,
Ko ia ʼae ʼe ina fetogi te ʼaho ʼo poʼuli,+
Ko ia ʼae ʼe ina tanaki te ʼu vai,
ʼO fakato ifo ki te fuga kele,+
ʼE ko Sehova. ʼE ko tona huafa ʼaia.
9 ʼE ina fakaʼauha anai te tagata malohi,
ʼE ina maumauʼi anai te ʼu kolo tau.
10 ʼE fehihiʼa te hahaʼi ʼaia ia natou ʼae ʼe natou fakatonutonuʼi natou ʼi te matapa ʼo te kolo.
Pea ʼe natou fehihiʼa ia natou ʼae ʼe natou fakaha te moʼoni.+
11 ʼE kotou fakamaʼua ki ʼae ʼe masiva ke ina totogi atu te kele ʼae ʼe ina gaueʼi,
Pea ʼe kotou toʼo ʼana pulapula ohage ko he tukuhau.+
Koia ʼe mole kotou haga nonofo anai ʼi te ʼu ʼapi ʼae neʼe kotou laga ʼaki ni maka neʼe taʼataʼaga.+
Pea ʼe mole kotou inu anai te vino ʼo te ʼu gaueʼaga vite lelei ʼae neʼe kotou to.+
12 ʼE au iloʼi ʼe lahi ʼakotou agatuʼu*
ʼO feia mo ʼakotou agahala:
ʼE kotou gaohi koviʼi te tagata faitotonu,
ʼE kotou tali te ʼu meʼa ʼofa ʼae ʼe foaki fakakaka atu,
Pea ʼe mole kotou fakamauʼi te kau masisiva ʼaki te faitotonu.+
13 Koia, ʼi te temi ʼaia, ʼe nonofo fakalogologo anai te kau fakasiosio poto,
He ʼe ko he temi malaʼia anai.+
14 Kotou fai te meʼa ʼae ʼe lelei kae ʼaua naʼa kotou fai te meʼa ʼae ʼe kovi,+
Ke feala ai hakotou maʼuʼuli.+
Pea ʼe nofo anai ia Sehova te ʼAtua ʼo te ʼatu kautau mo koutou,
Ohage pe ko takotou ui.+
15 Kotou fehihiʼa ki te meʼa ʼae ʼe kovi pea kotou ʼoʼofa ki te meʼa ʼae ʼe lelei,+
Ke malo te faitotonu ʼae ʼe fakahoko ʼi te matapa ʼo te kolo.+
ʼE lagi ʼofa anai ia Sehova te ʼAtua ʼo te ʼatu kautau
Kia natou ʼae ʼe toe mai te fale ʼo Sosefo.’+
16 “Koʼeni te meʼa ʼae ʼe ui e Sehova te ʼAtua ʼo te ʼatu kautau, ʼei, ia Sehova:
‘ ʼE fai anai ni tagilaulau ʼi te ʼu malaʼe lalahi fuli ʼo te ʼu kolo.
Pea ʼe ui anai ʼi te ʼu ala fuli: “Oiaue! Oiaue!”
ʼE pauʼi anai te ʼu tagata gaue kele ke natou ʼomai ʼo fetagihi,
ʼO feia mo natou ʼae ʼe totogi ke fetagihi ke natou ʼomai ʼo tagilaulau.’
17 ‘ ʼE fai anai ni tagilaulau ʼi te ʼu gaueʼaga vite fuli,+
He ʼe au fakalaka anai ʼi te lotolotoiga ʼo koe,’ ko te ui ʼaia ʼa Sehova.
18 ‘Malaʼia kia natou ʼae ʼe natou fakaʼamu ke hoko mai la te ʼaho ʼo Sehova!+
Pea ʼe feafeaʼi anai kia koutou te ʼaho ʼo Sehova?+
ʼE fakapoʼuli anai, kae ʼe mole malama.+
19 ʼE hage anai ko he tagata ʼe hola mai ʼi he laione pea ʼe felaveʼi mo he uluso.
Pea ka ulu kio ia, ʼe ina hili tona nima ki te kaupa pea ʼe ʼuʼusi ai e he gata.
20 ʼE fakapoʼuli anai te ʼaho ʼo Sehova kae ʼe mole malama.
ʼE fakapoʼuli gaogao anai, kae ʼe mole malama.
21 ʼE au fehiʼa mo fakalialia ki ʼokotou ʼaho lalahi.+
Pea ʼe mole au leleiʼia te ʼaele ʼo ʼakotou sakilifisio ʼae ʼe momoli ʼi ʼakotou fakatahi taputapu.
22 Kapau ʼe kotou momoli mai ni holokoseta* mo ni molaga,
ʼE mole au leleiʼia anai.+
Pea ʼe mole au tali anai te ʼu manu sisino ʼae ʼe kotou momoli mai ohage ko he ʼu sakilifisio ʼo te tokalelei.*+
24 Ke hage te faitotonu ko te tafe ʼo te vai,+
Pea mo te liuʼa ʼae ʼe tafe tuʼumaʼu.
25 Hahaʼi ʼo Iselaele, neʼe kotou momoli mai koa ni sakilifisio mo ni molaga
ʼI te ʼu taʼu ʼe 40 ʼae neʼe kotou nonofo ai ʼi te toafa?+
26 ʼI te temi nei, ʼe kotou ʼave anai ia Sakuti tokotou hau, pea mo Kevani.*
Ko te ʼu fakatata ʼaia neʼe kotou faʼu, te fetuʼu ʼo tokotou ʼatua.
27 Pea ʼe au ʼave popula anai koutou ʼo mamaʼo atu ʼi Tamaso,’+ ko te ui ʼaia ʼa te ʼAtua ʼae ko tona huafa ko Sehova, te ʼAtua ʼo te ʼatu kautau.”+
6 “Malaʼia ki te hahaʼi ʼo Sione ʼae ʼe falala pe kia natou,
Kia natou ʼae ʼe maʼuli fimalie ʼi te moʼuga ʼo Samalia,+
Te kau takitaki ʼo te puleʼaga maʼuhiga
ʼAe ʼe kole tokoni ki ai te hahaʼi ʼo Iselaele.
2 Kotou olo ki Kalene pea kotou sisio.
Kotou mavae mai ai, ʼo olo ki Hamate Lahi,+
Pea kotou olo ki Kiete, te kolo ʼo te kau Filisitini.
ʼE lelei age koa te ʼu kolo ʼaia ʼi ʼokotou puleʼaga?*
ʼE lahi age koa tonatou fenua ʼi tokotou fenua?
4 ʼE natou takokoto ʼi ni moeʼaga ivuale*+ pea mo takokoto fakafifimalie ʼi ni sofa.+
ʼE natou kai ni ovi tagata neʼe toʼo mai te faga manu pea mo ni ʼuhiʼi pipi* ʼe sisino.+
5 ʼE natou fatu ni hiva pea mo ta alepa,*+
Pea ʼe natou faʼu ni meʼa faimaholo, ohage ko Tavite.+
6 ʼE natou inu te vino ʼi ni ipu lalahi+
Pea ʼe natou vali ʼonatou sino ʼaki ni lolo lelei.
Kae ʼe mole natou tokagaʼi* te ʼu aluʼaga fakamataku ʼae ʼe hoko kia Sosefo.+
7 Koia ʼe ko natou ʼaia ka ʼuluaki ʼave popula anai,+
Pea ʼe gata ai leva te fakafiafia mo te logoaʼa ʼa natou ʼae neʼe takokoto fakafifimalie.
8 ‘Neʼe fakapapau e te Tuʼi ʼAliki ko Sehova ʼi tona huafa totonu:+
“ ʼE au fehiʼa ki te fiameʼameʼa ʼa Sakopo,+
Mo ʼona tule malohi.+
Pea ʼe au tuku anai te kolo pea mo ʼana meʼa fuli ki te ʼu nima ʼo ʼona fili,” ’ ko te ui ʼaia ʼa Sehova, te ʼAtua ʼo te ʼatu kautau.+
9 “ ‘ “Pea kapau ʼe toe ni tagata ʼe toko hogofulu ʼi he ʼapi, ʼe toe mamate anai mo natou. 10 ʼE haʼu anai he tahi ʼo tonatou famili, ʼo ʼave ia natou ki tuʼa, pea ʼe ina tutu takitahi anai ia natou. ʼEi, ʼe haʼu anai ki te ʼapi ʼo ʼave ki tuʼa ʼonatou hui. Pea ʼe ina fakalavelave anai ki ʼae ʼe nofo ʼi te ʼu koga fale taupotu: ‘ ʼE kei ʼi ai koa he tahi mo koe?’ Pea ʼe ina tali age anai: ‘Kailoa ia!’ Pea ʼe ina ui anai: ‘Fakalogologo! ʼE mole ko te temi ʼaeni ke talanoa ai ki te huafa ʼo Sehova.’ ”
11 Ka fakatotonu e Sehova,+
ʼE maumauʼi anai te ʼapi lahi, pea ʼe ko ʼona toega pe ʼae ka maʼu.
ʼE maumauʼi anai te ʼapi veliveli, pea ʼe tuʼu maumau anai.+
12 ʼE feleleʼi koa te ʼu hosi ʼi te ʼu fuga maka?
Peʼe fuli kele koa ʼi ai ni pipi?
Koteʼuhi neʼe kotou fetogi te faitotonu ʼaki he ʼakau kona,
Pea mo te fua ʼo te faitotonu ʼaki te apiseneto.+
13 ʼE kotou fakafiafia ʼi he ʼu meʼa ʼe mole maʼuhiga,
Pea ʼe kotou ui: “Neʼe mole tou liliu koa la ʼo malolohi ʼuhi pe ko tatou?”+
14 Koia, hahaʼi ʼo Iselaele, ʼe au fekauʼi anai he puleʼaga ke haʼu ʼo tauʼi koutou,’+ ko te ui ʼaia ʼa Sehova te ʼAtua ʼo te ʼatu kautau.
‘Pea ʼe ina fakamamahiʼi anai koutou mai Lepo-hamate*+ ʼo aʼu ki te Vai Tafe* ʼo te Alapa.’ ”
7 Koʼeni te meʼa ʼae neʼe fakaha mai e te Tuʼi ʼAliki ko Sehova: Neʼe ina ʼaumai he faga heʼe ʼi te temi ʼae neʼe kamata maʼuli ai te ʼu gaueʼaga ʼae neʼe to ʼi te temi momoko.* Neʼe nunusi te pulapula ʼi te ʼu gaueʼaga ʼaia ʼi te ʼosi tanaki ʼo te vao ʼae ʼe tonu ke ʼave ki te hau. 2 ʼI te ʼosi kai e te faga heʼe te vao ʼakau fuli ʼo te fenua, neʼe au ui: “Tuʼi ʼAliki ko Sehova, fakalelei siʼou loto, kae ke ke fakamolemole ki tau hahaʼi!+ ʼE hao* feafeaʼi anai ia Sakopo? Koteʼuhi ʼe vaivai ʼaupito!”+
3 Pea neʼe fetogi leva e Sehova tana tonu.*+ “ ʼE mole hoko anai te meʼa ʼaia,” ko te ui ʼaia ʼa Sehova.
4 Koʼeni te meʼa ʼae neʼe fakaha mai e te Tuʼi ʼAliki ko Sehova: Neʼe fakatotonu e te Tuʼi ʼAliki ko Sehova ke tauteaʼi tana hahaʼi ʼaki te afi. Neʼe vela ai te tai lahi mo loloto, pea neʼe vela ai mo he koga ʼo te fenua. 5 Pea neʼe au ui: “Tuʼi ʼAliki ko Sehova, fakalelei siʼou loto, kae ke ke tuku la!+ ʼE hao* feafeaʼi anai ia Sakopo? Koteʼuhi ʼe vaivai ʼaupito!”+
6 Pea neʼe fetogi leva e Sehova tana tonu.*+ “ ʼE mole toe hoko anai mo te meʼa ʼaia,” ko te ui ʼaia ʼa te Tuʼi ʼAliki ko Sehova.
7 Koʼeni te meʼa ʼae neʼe ina fakaha mai: Neʼe tuʼu ia Sehova ʼi he kaupa. Neʼe laga te kaupa ʼaia ʼaki he filo ʼe tautau ai he foʼi pulu.* Pea neʼe ina puke ʼi tona nima he filo ʼe tautau ai he foʼi pulu. 8 Pea neʼe fehuʼi mai e Sehova: “Amosi, kotea ʼe ke sio ki ai?” Neʼe au tali age: “Ki te filo ʼe tautau ai te foʼi pulu.” Pea neʼe ui mai e Sehova: “ ʼE au tuku anai te filo ʼe tautau ai te foʼi pulu ʼi te lotolotoiga ʼo Iselaele, taku hahaʼi. Pea ʼe mole au toe fakamolemole anai kia natou.+ 9 ʼE au maumauʼi anai te ʼu faʼahi maʼoluga ʼo Isaake,+ pea ʼe au fakaʼauha anai te ʼu sagatualio ʼo Iselaele.+ Pea ʼe au tauʼi anai te hologa hau ʼo Selopoamo ʼaki he heleta.”+
10 Neʼe fakaha e Amatesia te pelepitelo ʼo Petele,+ te logo ʼaeni ki te hau ʼo Iselaele ko Selopoamo:+ “ ʼE fakatuʼutuʼu e Amosi ke ina fai he meʼa ʼe kovi kia koe ʼi te lotolotoiga ʼo Iselaele.+ ʼE kua fiu te hahaʼi ʼi te ʼu meʼa fuli ʼae ʼe ina fakamatala.+ 11 ʼEi, koʼeni te meʼa ʼae ʼe ui e Amosi: ‘ ʼE matehi anai ia Selopoamo ʼaki te heleta, pea ʼe ʼave popula moʼoni anai ia Iselaele ke mamaʼo mai tona fenua.’ ”+
12 Neʼe ui leva e Amatesia kia Amosi: “Tagata ʼae ʼe ina iloʼi te ʼu meʼa ʼae neʼe ha, ke ke mavae ʼi heni, ʼo hola ki te fenua ʼo Suta. Alu ki ai ke maʼu ai tou maʼuli,* pea ke ke faifakakikite ʼi ai.+ 13 Kae ʼe mole tonu ke ke toe faifakakikite ʼi Petele,+ koteʼuhi ʼe ko te sagatualio ʼo he hau+ pea mo te fale lotu* ʼo he puleʼaga.”
14 Pea neʼe tali e Amosi kia Amatesia: “Neʼe mole au polofeta, pea neʼe mole ko au ko he foha ʼo he polofeta. Ko au ko te tagata tauhi manu,+ pea neʼe au tokaga ki* te ʼu fuaʼi fiku ʼo te ʼu fuʼu sikomole. 15 Kae neʼe pauʼi au e Sehova ʼi taku lolotoga leʼo te faga ovi. Pea neʼe ui mai e Sehova: ‘Ke ke alu ʼo faifakakikite ki Iselaele, taku hahaʼi.’+ 16 Koia ʼi te temi nei, fakalogo ki te folafola ʼaeni ʼa Sehova: ‘ ʼE ke ui: “ ʼAua naʼa ke fakakikite ni malaʼia ke hoko ki Iselaele+ pea mo fakaha he fakamau+ ʼo ʼuhiga mo te hologa ʼo Isaake.” 17 Koia, koʼeni te meʼa ʼae ʼe ui e Sehova: “ ʼE liliu anai tou ʼohoana ko he fafine paomutu ʼi te kolo, pea ʼe matehi anai ʼou foha mo ʼou ʼofafine ʼaki te heleta. ʼE fuafua anai ʼou kele ʼaki he maea pea vahe, pea ko koe, ʼe ke mate anai ʼi he fenua heʼe maʼa. Pea ʼe ʼave popula moʼoni anai ia Iselaele ke mamaʼo mai tona fenua.” ’ ”+
8 Koʼeni te meʼa ʼae neʼe fakaha mai e te Tuʼi ʼAliki ko Sehova: Neʼe au sio ki he kato fuaʼi ʼakau ʼo te temi vela.* 2 Pea neʼe ina fehuʼi mai: “Amosi, kotea ʼe ke sio ki ai?” Neʼe au tali age: “Ki te kato fuaʼi ʼakau ʼo te temi vela.” Pea neʼe ui mai e Sehova: “Kua hoko mai te fakaʼosi ʼo Iselaele, taku hahaʼi. ʼE mole au toe fakamolemole anai kia natou.+ 3 ‘ ʼI te ʼaho ʼaia, ʼe liliu anai te ʼu hiva ʼo te fale lotu ko ni lauga,’+ ko te ui ʼaia ʼa te Tuʼi ʼAliki ko Sehova. ‘ ʼE lahi anai ni sino mate ka laku ʼi te ʼu koga meʼa fuli.+ Fakalogologo!’
4 Kotou fagono ki te meʼa ʼaeni, ia koutou ʼae ʼe kotou molomoloki te kau masisiva,
Pea mo pulihi te kau agavaivai ʼi te fenua,+
5 ʼEi, ia koutou ʼae ʼe kotou ui: ‘ ʼE ʼosi anai koa ʼafea te ʼaho lahi ʼo te tuʼu afiafi ʼo te mahina,+ ke feala ai hatatou fakatau ʼatatou fulumeto?*
Pea ʼe ʼosi anai koa ʼafea te Sapato,+ ke feala ai hatatou fakatau ʼatatou fulumeto?
ʼE feala ai anai ke tou fakaʼaogaʼi he efa* ʼe veliveli age
Pea mo he sikele* ʼe mamafa age.
Pea ʼe tou kakaʼi anai te hahaʼi faifakatau ʼaki ni meʼa fua ʼe hala.+
6 Pea ʼe feala anai ke tou totogi te tagata fakaʼofaʼofa ʼaki he siliva,
Pea mo te tagata masiva ʼaki he hoaʼi sulie.+
Pea ʼe feala anai ke tou fakatau te ʼu ʼotaʼotaʼi pulapula.’
7 Neʼe fakapapau e Sehova ʼaki te Kololia ʼo Sakopo:+
‘ ʼE mole au galoʼi anai ʼi he temi te ʼu meʼa fuli ʼae neʼe natou fai.+
ʼE mole hage anai koa te fenua katoa ko te hake ʼo te vai ʼo te Nile?
ʼE hake ake anai pea ʼe toe hifo anai ohage pe ko te Nile ʼo Esipito.’+
9 ʼE ui e te Tuʼi ʼAliki ko Sehova: ‘ ʼI te ʼaho ʼaia,
ʼE au fakato anai te laʼa kae ʼe kei fetapa,
Pea ʼe au fakaliliu anai te fenua ke fakapoʼuli kae ʼe kei ʼaho.+
10 ʼE au fakaliliu anai ʼokotou ʼaho lalahi ko he ʼu ʼaho mamahi+
Pea mo ʼakotou hiva fuli ko ni hiva mate.
ʼE au ʼai anai he taga* ki te ʼu koga loto fuli pea ʼe au tele anai te ʼu ʼulu fuli.
ʼE hage anai te meʼa ʼae ka au fakahoko kia koutou ko he putu ʼe fai ki he foha ʼulu tokotahi.
Pea ʼe kovi anai te fakaʼosi ʼo te ʼaho ʼaia.’
11 ʼE ui e te Tuʼi ʼAliki ko Sehova: ‘Koʼeni, ʼe hoko mai anai he ʼaho,
ʼE au fakato anai he hoge ki te fenua.
ʼE mole ko he hoge meʼa kai, peʼe ko he hoge vai,
Kae ko te fia kai mo fia inu ki te folafola ʼa Sehova.+
12 ʼE natou olo anai mai te tahi tai ki te tahi tai,
Pea mai te potu noleto ki te potu esite.*
ʼE natou feoloʼaki anai ʼi he mo he ʼo kumi te folafola ʼa Sehova, kae ʼe mole natou maʼu anai.
13 ʼI te ʼaho ʼaia, ʼe pogigia anai ni finemui kei taupoʼou,
ʼO feia mo te ʼu tama tupulaga, ʼuhi ko tanatou fia iinu.
14 ʼE natou fakapapau ʼaki te ʼu ʼatua hala ʼo Samalia,+ pea mo ui:
“Tane, ʼe au tala moʼoni atu ia muʼa ʼo tou ʼatua maʼuli!”+
“ ʼE au tala moʼoni atu ʼi te ala ʼae ʼe alu ki Pele-sepa!”+
Kae ʼe natou fetoki anai pea ʼe mole natou toe tutuʼu ake anai.’ ”+
9 Neʼe au sio kia Sehova+ ʼe tuʼu ʼi te fuga ʼaletale. Neʼe ina ui: “Taʼi te ʼu ʼuluʼi pou, pea ʼe galulu anai te ʼu tafito. Tuʼusi te ʼu ʼulu,* pea ʼe au matehi anai ia natou ʼae ka toe ʼaki te heleta. ʼE mole feala anai ki he tahi ia natou ʼae ʼe feholaki, ke hola mamaʼo peʼe ke hao.+
2 Kapau ʼe natou keli ʼo aʼu ki te Faitoka,*
ʼE au toʼo ake anai ia natou mai ai.
Pea kapau ʼe natou hake ki te lagi,
ʼE au fakahifo anai natou mai ai.
3 Kapau ʼe natou fenonoʼi ʼi te tumutumu ʼo Kalemelo,
ʼE au kumi anai natou ʼi ai pea ʼe au ʼave anai natou.+
Kapau ʼe natou fenonoʼi ʼi te takele ʼo te tai,
ʼE au fakatotonu anai ki te gata ke ina ʼuʼusi natou ʼi ai.
4 Kapau ʼe ʼave popula ia natou ki te fenua ʼo ʼonatou fili,
ʼE au fakatotonu anai ke matehi ai ia natou ʼaki te heleta.+
ʼE au faigaʼi anai ke au fakamamahiʼi natou, kae ʼe mole au foaki age anai he meʼa ʼe lelei.+
5 ʼE ko te Tuʼi ʼAliki ko Sehova ʼo te ʼatu kautau, ʼae ka ina tauteaʼi te fenua.*
Koia ʼe galulu ai anai te fenua,+ pea ʼe putu anai te hahaʼi fuli ʼae ʼe nonofo ai.+
ʼE hake anai te fenua katoa ohage ko te hake ʼo te Nile,
Pea ʼe toe hifo anai ohage pe ko te Nile ʼo Esipito.+
6 ‘Ko ia ʼae ʼe ina laga tona mata tuʼuga ʼi te lagi,
Pea mo fakatuʼu tona fale ʼi te fuga kele,
Ko ia ʼae ʼe ina tanaki te ʼu vai,
ʼO fakato ifo ki te fuga kele,+
Ko Sehova, ko tona huafa ʼaia.’+
7 ‘Hahaʼi ʼo Iselaele, ʼe mole kotou hage koa la kia au ko te ʼu foha ʼo te kau Kusi?’ ko te fehuʼi ʼaia ʼa Sehova.
‘Neʼe mole au fakamavae koa la ia Iselaele mai Esipito,+
Mo te kau Filisitini mai Kelete,+ pea mo te kau Silia mai Kile?’+
8 ‘Koʼeni, ʼe au sio ki te puleʼaga agahala, ia au ʼaeni ko te Tuʼi ʼAliki ko Sehova,
Pea ʼe au pulihi anai ʼi te fenua.+
Kae ʼe mole au pulihi katoa anai te hologa ʼo Sakopo,’+ ko te ui ʼaia ʼa Sehova.
9 ‘Koʼeni ʼe au fai he fakatotonu,
Pea ʼe au luluʼi anai te hahaʼi ʼo Iselaele ʼi te lotolotoiga ʼo te ʼu puleʼaga fuli,+
Ohage ko te lulu ʼo he tami,
Kae ʼe mole to he kiʼi foʼi maka ʼe tahi ki te kele.
10 ʼE mamate anai ʼi te heleta, ia natou fuli ʼae ʼe agahala ʼi taku hahaʼi.
Ko natou ʼaia ʼe natou ui:
“ ʼE mole kaku mai anai kia tatou te malaʼia, ʼei, ʼe mole hoko mai anai kia tatou.” ’
11 ‘ ʼI te ʼaho ʼaia, ʼe au toe fakatuʼu anai te fale la* ʼo Tavite+ ʼae neʼe holo,
ʼE au pupunu anai te ʼu pu,
Pea ʼe au toe faʼu anai te ʼu faʼahi ʼae kua maumau.
Pea ʼe au toe laga anai ohage pe ko tona tuʼu ʼi te temi muʼa,+
12 Ke feala hanatou maʼu te ʼu meʼa ʼae neʼe toe ʼi Etome,+
Pea mo te ʼu puleʼaga fuli ʼae neʼe natou fua toku huafa,’ ko te ui ʼaia ʼa Sehova, ʼae ka ina fai te ʼu meʼa ʼaia.
13 ʼE ui e Sehova: ‘Koʼeni ʼe hoko mai anai he ʼaho,
ʼE tonu anai ke fuli te kele kae ʼe heʼeki ʼosi te tanaki ʼo te taʼukai,
Pea ʼe tonu anai ke nunusi te pulapula kae ʼe heʼeki ʼosi te malamalaki ʼo te ʼu fuaʼi vite.+
ʼE tafe anai mai te ʼu moʼuga he vino foʼou,+
ʼO feia mo te ʼu kiʼi moʼuga.+
14 ʼE au toe ʼaumai anai ia natou ʼae neʼe ʼave popula ʼi Iselaele, ʼae ko taku hahaʼi.+
ʼE natou toe laga anai te ʼu kolo ʼae neʼe tuʼu lavaki pea ʼe natou nofoʼi anai.+
ʼE natou to anai ni gaueʼaga vite pea ʼe natou inu anai te vino.+
ʼE natou fai anai ni gaueʼaga pea ʼe natou kai anai ʼona fua.’+
15 ‘ ʼE au to anai natou ki tonatou kele.
Pea ʼe mole toe feala anai honatou taʼaki
Mai te kele ʼae neʼe au foaki age kia natou,’+ ko te ui ʼaia ʼa Sehova tou ʼAtua.”
Ko tona fakaʼuhiga “ ʼE Ko He Kavega,” peʼe “ ʼE ʼAmo He Kavega.”
Peʼe “faifakapo.”
Ko te kupusiga palalau “tuʼa tolu peʼe tuʼa fa,” ʼe fakaʼuhiga ki he aga ʼe fai tuʼumaʼu.
Hep. “ ʼe ina toʼo te tokotoko fakahau.”
Hep. “ ʼe ina toʼo te tokotoko fakahau.”
Peʼe “faifakapo.”
Hep. “tuʼi fakamau.”
Peʼe “akonaki.”
Hep. “fale.”
Hep. nèphèsh. Vakaʼi Te ʼu Kupu.
Hep. nèphèsh. Vakaʼi Te ʼu Kupu.
Peʼe lagi “mole he meʼa kai moʼo fakalalata ʼaki te manulele.”
Peʼe “meʼa fakalilo.”
Peʼe “moeʼaga mai Tamaso.”
Peʼe “fakamoʼoni ki.”
Peʼe “faifakapo.”
ʼE ko he meʼa maʼuhiga ʼe lanu hina pea ʼe haʼu mai te ʼu nifoʼi alefani pea mo ʼihi manu.
Peʼe lagi “ ʼe lahi ʼaupito te ʼu ʼapi ʼae ka pulihi.”
Peʼe “pule.”
Peʼe “agatuʼu.”
Peʼe “Neʼe mole au foaki atu hakotou meʼa kai.”
Peʼe lagi “liliu anai ia Petele ko he meʼa fakamanamana.”
Vakaʼi Te ʼu Kupu.
Peʼe lagi ko ni fetuʼu ʼo te pupuga fetuʼu ʼo te Vitulo, ʼae ʼe higoa ko te ʼu Peleiate.
Peʼe lagi ko te pupuga fetuʼu ʼo Olione.
Peʼe “faifakapo.”
Vakaʼi Te ʼu Kupu.
Vakaʼi Te ʼu Kupu.
Peʼe “meʼa faimaholo kauʼi uka.”
ʼE feala ke fakaʼuhiga te ʼu ʼatua ʼaia ʼe lua ki te palanete ko Satulune, ʼae neʼe atolasioʼi ohage ko he ʼatua.
ʼE lagi ko te ʼu puleʼaga ʼo Suta pea mo Iselaele.
ʼE ko he meʼa maʼuhiga ʼe lanu hina pea ʼe haʼu mai te ʼu nifoʼi alefani pea mo ʼihi manu.
Peʼe “vitulo kei mui.”
Peʼe “te ʼu meʼa faimaholo kauʼi uka.”
Hep. “mahaki ʼuhi ko.”
Pe’e “te huʼaga ʼo Hamate.”
Vakaʼi Te ʼu Kupu.
ʼE fakaʼuhiga ki te ʼu mahina ʼo Sanualio pea mo Fepualio.
Hep. “toe tuʼu ake.”
Peʼe “neʼe fakahemala ia Sehova.”
Hep. “toe tuʼu ake.”
Peʼe “neʼe fakahemala ia Sehova.”
Ko he meʼa gaue ʼe fakaʼaogaʼi ke iloʼi ai pe ʼe totonu he kaupa peʼe kailoa.
Hep. “kai ai tau pane.”
Hep. “fale.”
Peʼe “huki.”
ʼE fakaʼuhiga tafito ki he ʼu fuaʼi fiku pea lagi mo he ʼu fuaʼi palema.
Peʼe lagi ko te olose.
Vakaʼi Te ʼu Fakamahino 2.14.
Vakaʼi Te ʼu Fakamahino 2.14.
Peʼe “kele.”
Vakaʼi Te ʼu Kupu.
Peʼe “te hopoʼaga ʼo te laʼa.”
Peʼe lagi “Taʼi te ʼu ʼuluʼi pou.”
Vakaʼi Te ʼu Kupu.
Peʼe “kele.”
Peʼe “pola.”