SONASI
1 Koʼeni te folafola ʼae neʼe fakaha age e Sehova kia Sonasi*+ te foha ʼo Amitai: 2 “Ke ke tuʼu ʼo alu ki Ninive.+ Pea ke ke tala he fakamau ki te kolo lahi ʼaia, he ʼe kua au logo ki te lahi ʼaupito ʼo tana agakovi.”
3 Kae neʼe tuʼu ake ia Sonasi ʼo hola ki Talesisi, ke mamaʼo mai ia Sehova. Neʼe hifo ia ki Sope pea neʼe ina maʼu ai he vaka ʼe alu ki Talesisi. Neʼe ina totogi leva tana heka ki te vaka. Pea neʼe alu leva mo te kau vaka ki Talesisi, ke mamaʼo mai ia Sehova.
4 Pea neʼe fakaagi leva e Sehova he matagi lahi ki te tai. Pea neʼe to ai he afā malohi pea neʼe meihiʼi pe ke mou te vaka. 5 Neʼe matataku ʼaupito te kau vaka. Koia, neʼe natou tahi pauʼi ai ki tona ʼatua ke tokoni age. Pea neʼe natou laku leva te uta ki te tai ke maʼamaʼa ai te vaka.+ Kae neʼe hifo ia Sonasi ki te takele ʼo te vaka. Neʼe alu ia ʼo takoto pea neʼe mate moe ai. 6 Pea neʼe fakaovi age te kapiteni ʼo te vaka kia ia, ʼo ina ui age: “He koʼe ʼe ke moe? Tuʼu ake pea ke pauʼi ki tou ʼatua! ʼE lagi manavaʼofa anai te ʼAtua moʼoni kia tatou. Pea ʼe mole tou mamate anai.”+
7 Pea neʼe feuiʼaki e te kau vaka: “Kotou ʼomai ke tou fai he toho,+ ke iloʼi ai pe ko ai ʼae ʼe tupu ai te malaʼia ʼaeni.” Neʼe natou fai ai he toho, pea neʼe to leva kia Sonasi.+ 8 Neʼe natou fehuʼi age ki ai: “Fakalelei siʼou loto, ke ke fakaha mai pe ko ai ʼae ʼe tupu ai te malaʼia ʼaeni. Kotea la tau gaue? Pea ʼe ke haʼu la maifea? ʼE ke haʼu la mai te fenua fea? Pea ko ai la tau hahaʼi?”
9 Neʼe ina tali age kia natou: “Ko au ko te tagata Hepeleo. Pea ʼe au manavasiʼi* kia Sehova te ʼAtua ʼo te lagi, ia Ia ʼae neʼe ina fakatupu te tai mo te kele.”
10 Pea neʼe ʼaʼasili matataku ai te ʼu tagata, pea neʼe natou fehuʼi age kia ia: “Kotea la ʼae neʼe ke fai?” (Neʼe natou iloʼi neʼe hola ia Sonasi, ke mamaʼo mai ia Sehova, he neʼe ina fakaha age.) 11 Pea neʼe kovi ʼosi te hou ʼo te tai. Koia, neʼe natou fehuʼi age ki ai: “Kotea ʼae ʼe tonu ke matou fai kia koe ke malū ai te tai?” 12 Pea neʼe ina tali age: “Kotou hiki au ʼo li ki te tai. Pea ʼe malū ai anai te tai, koteʼuhi ʼe au iloʼi ʼe tupu la te hoko ʼo te afā lahi ʼaeni ko au.” 13 Kae neʼe tauʼaʼalo malohi pe te ʼu tagata ke natou kaku ki uta. Kae neʼe mole natou lavaʼi, he neʼe toe ʼasili age te hou ʼo te tai.
14 Pea neʼe natou kole mamahi kia Sehova: “Sehova e, fakalelei siʼou loto, ʼaua naʼa ke matehi ia matou ʼuhi ko te tagata ʼaeni! ʼAua naʼa ke tukugakoviʼi matou ʼuhi ko te mate ʼo te tagata ʼaeni neʼe mole ina fai he meʼa ʼe kovi. Sehova e, neʼe ke fai pe te meʼa ʼae neʼe ke loto ki ai.” 15 Neʼe natou hiki ai leva ia Sonasi ʼo li ki te tai, pea neʼe malū ai te tai. 16 Pea neʼe matataku ʼaupito te ʼu tagata kia Sehova.+ Neʼe natou momoli ai he sakilifisio kia Sehova, pea mo fai ni fakapapau.
17 Pea neʼe fakaʼaogaʼi leva e Sehova he toe ika lahi ke ina folo ia Sonasi. Pea neʼe nofo ia Sonasi ʼi te fatu ʼo te ika ia ʼaho ʼe tolu mo po ʼe tolu.+
2 Neʼe faikole ia Sonasi kia Sehova tona ʼAtua ʼi te fatu ʼo te ika.+ 2 Neʼe ina ui:
“Neʼe au tagi kia Sehova ʼi toku mamahi, pea neʼe ina tali mai.+
Neʼe au kole tokoni atu ʼi te loto* Faitoka.*+
Pea neʼe ke logo ki toku leʼo.
3 Neʼe ke li au ki te loto tai, ʼei, ki te moana,
Pea neʼe ʼave au ʼi te tatafe ʼo te tai.+
Neʼe au mou ʼuhi ko te malohi ʼo ʼau peau fuli.+
4 Pea neʼe au ui: ‘Neʼe kapu au ʼi ʼou muʼa!
ʼE feafeaʼi anai haku toe sio ki tou fale lotu taputapu?’
Neʼe takatakai toku ʼulu e te limu.
6 Neʼe au hifo ki te takele ʼo te tai.*
Neʼe pupunu te ʼu matapa ʼo te faitoka* ʼo talu ai.
Kae Sehova e siʼoku ʼAtua, neʼe ke fakahake ake au mai te luo!+
7 Neʼe au manatuʼi ia Sehova ʼi taku meihiʼi mate.+
Pea neʼe ke logo ki taku faikole, ʼi tau nofo ʼi tou fale lotu taputapu.+
8 ʼE pipiki niʼihi ki te ʼu fakatata vaʼiganoa. Kae ʼe natou situʼa kia ia ʼae ʼe ina fakaha age tona ʼofa agatonu.*
9 Kae ko au, ʼe au momoli atu anai ni sakilifisio pea mo fakaha atu taku fakafetaʼi.
ʼE au fakahoko anai te fakapapau ʼae neʼe au fai.+
ʼEi, ʼe ko Sehova toku haofakiʼaga.”+
10 Ki muli age, neʼe luaʼi e te ika ia Sonasi ki te mataʼone, ʼo mulimuli pe ki te fakatotonu ʼa Sehova.
3 Neʼe toe palalau leva ia Sehova kia Sonasi, ko tona tuʼa lua ʼaia. Pea neʼe ina ui age:+ 2 “Tuʼu ake, ʼo alu ki Ninive,+ te kolo lahi, pea ke ke tala ʼi ai te logo ʼae ʼe au fakaha atu.”
3 Neʼe tuʼu ake ai ia Sonasi ʼo alu ki Ninive,+ ohage pe ko tona fakatotonu age e Sehova.+ Ko Ninive neʼe ko he kolo neʼe lahi ʼaupito:* neʼe ʼaho tolu tona foli.* 4 Neʼe hu leva ia Sonasi ki te kolo, pea neʼe haʼele ʼaho katoa ʼi ai ʼo tala: “ ʼE kei toe pe ʼaho ʼe 40, pea ʼe fakaʼauha anai ia Ninive.”
5 Pea neʼe tui ai leva te hahaʼi ʼo Ninive ki te ʼAtua.+ Neʼe natou tala he sesunio, pea neʼe natou tui fuli ni taga,* mai ia ia ʼae ʼe malalo kia ia ʼae ʼe maʼuhiga. 6 Neʼe fakaha leva ki te hau ʼo Ninive te logo ʼae neʼe fakamafola e Sonasi. Neʼe tuʼu ake ai mai tona hekaʼaga,* ʼo huʼi tona teu fakahau. Neʼe ina tui leva he taga* pea mo nofo ʼi te lefulefu. 7 Pea tahi ʼae, neʼe ina fakatotonu ke tala ʼi Ninive:
“Koʼeni te fakatotonu ʼa te hau pea mo tana kau ʼaliki: ʼE mole tonu anai ke kai he meʼa e te hahaʼi pea mo te ʼu manu, ia te faga pipi peʼe ko te faga ovi. ʼE mole tonu ke natou kai he meʼa peʼe inu vai. 8 Pea ʼe tonu ke tui e te hahaʼi ni taga* ʼo feia mo ʼanatou manu. ʼE tonu ke natou kalaga ki te ʼAtua ʼaki tonatou malohi katoa, pea ke natou situʼa ki ʼanatou agakovi mo ʼanatou agamalohi. 9 ʼE lagi fetogi anai e te ʼAtua moʼoni tana tonu,* pea ʼe malū ifo ai anai tona hauhau. Pea ʼe mole tou mamate ai anai.”
10 Neʼe sio ai leva te ʼAtua moʼoni ki te ʼu fetogi ʼae neʼe natou fai, ʼei, ki tanatou situʼa ki tanatou agakovi.+ Pea neʼe ina fetogi ai tana tonu.* Pea neʼe mole ina fakahoko kia natou te malaʼia ʼae neʼe palalau ki ai.+
4 Kae neʼe mole leleiʼia e Sonasi te faʼahi ʼaia, pea neʼe kovi ʼosi tona ita. 2 Koia, neʼe faikole ai kia Sehova: “Sehova e, neʼe tonu pe te meʼa ʼae neʼe au ui ʼi taku kei nofo ʼi toku fenua. Koia ʼae neʼe au ʼuluaki hola ai ki Talesisi,+ he ʼe au iloʼi ko koe ko te ʼAtua manavaʼofa,* mo tuai ʼi te ita pea mo fonu ʼi te ʼofa agatonu.+ Ko te ʼAtua ʼe mamahi moka sio ki te malaʼia. 3 Pea ʼi te temi nei, Sehova e, fakalelei siʼou loto, kae ke ke toʼo toku maʼuli, he ʼe lelei age pe ke au mate ʼi taku maʼuli.”+
4 Pea neʼe fehuʼi age e Sehova ki ai: “ ʼE ʼi ai koa he tupuʼaga ʼo tau vale itaita feia?”
5 Neʼe mavae leva ia Sonasi mai Ninive ʼo alu ʼo heka ʼi te potu esite. Neʼe ina laga he pola ke fakamalumalu ai, pea mo nofo ai ke sio pe kotea ʼae ka hoko ki te kolo.+ 6 Pea neʼe fakatupu leva e Sehova ʼAtua he ʼakau totolo,* ke kake ʼi te pola ke malumalu pea mo fimalie ai ia Sonasi. Neʼe fiafia ʼaupito ia Sonasi ʼuhi ko te ʼakau totolo ʼaia.
7 Kae ʼi te ʼaho ake, ʼi te mafoata, neʼe ʼaumai e te ʼAtua moʼoni he ʼunufe ke ina kai te ʼakau totolo, pea neʼe moamoa ai. 8 ʼI te kamata mu ʼo te laʼa, neʼe toe fakaagi e te ʼAtua he matagi vela mai te potu esite. ʼI te sisiga ʼo te laʼa, neʼe logo kovi ai ia Sonasi. Neʼe ina kole ai ke mate ʼo ina ui: “ ʼE lelei age pe ke au mate ʼi taku maʼuli.”+
9 Neʼe fehuʼi age e te ʼAtua kia Sonasi: “ ʼE ʼi ai koa he tupuʼaga ʼo tau vale itaita feia ʼuhi ko te ʼakau totolo ʼaia?”+
Pea neʼe ina tali age: “ ʼEi, ʼe au ita tonu pe au, pea kua au fia mate ʼi te lahi ʼo toku ita.” 10 Kae neʼe ui age e Sehova ki ai: “ ʼE ke fakaʼofaʼofa ki te ʼakau totolo ʼaeni, neʼe mole pe la ke kinakina ki ai, pea neʼe mole ke fakatupu. Neʼe homo ake pe ʼi te po ʼe tahi pea neʼe mate ʼi te po ʼe tahi. 11 Kae ʼe mole tonu koa la ke au fakaʼofaʼofa ki Ninive,+ ʼo feia mo ʼanatou faga manu ʼae ʼe kaugamalie? ʼE maʼuʼuli ʼi te kolo lahi ʼaia te toko 120 000 tupu hahaʼi, pea ʼe mole natou fakakehekeheʼi pe la te meʼa ʼae ʼe lelei pea mo ʼae ʼe kovi.”*+
Ko tona fakaʼuhiga “Lupe.”
Peʼe “atolasio.”
Hep. “fatu ʼo te.”
Vakaʼi Te ʼu Kupu.
Hep. “te ʼu tafito ʼo te ʼu moʼuga.”
Hep. “kele.”
Peʼe lagi “ ʼe mole kei natou agatonu.”
Hep. “kolo lahi ki te ʼAtua.”
Peʼe “ ʼaho tolu te fakalaka ʼi ai.”
Vakaʼi Te ʼu Kupu.
Peʼe “hekaʼaga fakahau.”
Vakaʼi Te ʼu Kupu.
Vakaʼi Te ʼu Kupu.
Peʼe “fakahemala anai te ʼAtua moʼoni.”
Peʼe “neʼe fakahemala ai.”
Peʼe “agaʼofa.”
ʼE mahino ia, ʼe fakaʼuhiga ki he ʼakau ʼe lahi ʼona lau pea ʼe fua.
Peʼe “tonatou nima mataʼu pea mo tonatou nima hema.”