SAKALIA

1 Neʼe palalau ia Sehova ki te polofeta ko Sakalia,*+ te foha ʼo Pelekia, te foha ʼo Ito ʼi te valu mahina ʼo te lua taʼu ʼo te pule ʼa Taliusi.+ Neʼe ina ui age ki ai: 2 “Neʼe kovi ʼosi te ita ʼo Sehova ki ʼakotou tamai.+

3 “Ke ke ui kia natou: ‘Koʼeni te meʼa ʼae ʼe ui e Sehova ʼo te ʼatu kautau: “ ‘Kotou toe liliu mai kia te au,’ ko te ui ʼaia ʼa Sehova ʼo te ʼatu kautau, ‘pea ʼe au toe liliu atu anai kia koutou,’+ ko te ui ʼaia ʼa Sehova ʼo te ʼatu kautau.” ’

4 “ ‘ ʼAua naʼa kotou hage ko ʼakotou tamai. Neʼe ui e te kau polofeta ʼo te temi muʼa kia natou: “Koʼeni te meʼa ʼae ʼe ui e Sehova ʼo te ʼatu kautau: ‘Fakalelei siʼokotou ʼu loto, ke kotou liʼaki* ʼakotou aga ʼae ʼe kovi.’ ” ’+

“ ‘Kae neʼe mole natou fakalogo pea neʼe mole natou tokagaʼi au,’+ ko te ui ʼaia ʼa Sehova.

5 “ ‘ ʼE ʼifea koa la ʼakotou tamai ʼi te temi nei? Neʼe maʼuʼuli koa te kau polofeta ʼo heʼe gata? 6 Neʼe sio mata ʼakotou tamai ki te hoko ʼo ʼaku folafola mo ʼaku fakatotonu ʼae neʼe tala e ʼaku tagata faifekau te kau polofeta.’+ Pea neʼe natou toe liliu mai ai kia te au, ʼo natou ui: ‘Neʼe fai e Sehova ʼo te ʼatu kautau kia tatou te meʼa ʼae neʼe ina fakapapauʼi, ʼo mulimuli pe ki ʼatatou aga mo ʼatatou gaue.’ ”+

7 Neʼe palalau ia Sehova ki te polofeta ko Sakalia, te foha ʼo Pelekia, te foha ʼo Ito. Neʼe ina fai te faʼahi ʼaia ʼi te 2 taʼu ʼo te pule ʼa Taliusi,+ ʼi te 24 ʼaho ʼo te 11 mahina, ia te mahina ʼo Sepate.* 8 Neʼe au sio ki he meʼa neʼe ha ʼi te poʼuli. Neʼe ko he tagata neʼe heka ʼi he hosi kula. Neʼe tuʼu maʼu ʼi te vaʼe moʼuga, ʼi he ʼu fuʼu milete. ʼI ʼona tuʼa, neʼe ʼi ai ni hosi kula, mo huʼa vaisi, pea mo hina.

9 Pea neʼe au fehuʼi leva: “Siʼoku ʼaliki, ko ai ia natou?”

Neʼe tali mai e te ʼaselo ʼae neʼe ma palalau: “ ʼE au fakaha atu anai pe ko ai ia natou.”

10 Pea neʼe ui e te tagata ʼae neʼe tuʼu maʼu ʼi te ʼu fuʼu milete: “Ko natou ʼae neʼe fekauʼi mai e Sehova ke natou foli te kele.” 11 Pea neʼe natou ui ki te ʼaselo ʼa Sehova ʼae neʼe tuʼu ʼi te ʼu fuʼu milete: “Neʼe matou foli te kele, pea koʼeni, ʼe tokalelei mo fimalie ia te kele katoa.”+

12 Pea neʼe ui e te ʼaselo ʼa Sehova: “Sehova ʼo te ʼatu kautau, kua taʼu 70+ tau nofo ita ki Selusalemi mo te ʼu kolo ʼo Suta.+ ʼE kaku anai koa ki ʼafea tau mole manavaʼofa kia natou?”

13 Neʼe tali e Sehova ki te ʼaselo ʼae neʼe ma palalau, ʼo ina fai age ni palalau agalelei mo fakalotofimalie. 14 Pea neʼe ui mai e te ʼaselo ʼae neʼe ma palalau: “ ʼE tonu ke ke kalaga: ‘Koʼeni te meʼa ʼae ʼe ui e Sehova ʼo te ʼatu kautau: “ ʼE au ʼofa mamahi mo tokaga ki Selusalemi pea mo Sione.+ 15 ʼE au ita, ʼei, ʼe kovi ʼosi toku ita ki te ʼu puleʼaga ʼae ʼe maʼuli fimalie.+ Neʼe veliveli pe toku ita ki taku hahaʼi,+ kae neʼe fakaʼaʼasili kovi age te malaʼia e te ʼu puleʼaga ʼaia.” ’+

16 “Koʼeni leva te meʼa ʼae ʼe ui e Sehova: ‘ “ ʼE au toe manavaʼofa anai ki Selusalemi.+ ʼE toe laga ai anai toku fale,”+ ko te ui ʼaia ʼa Sehova ʼo te ʼatu kautau, “pea ʼe faoʼi anai he maea moʼo fuafua ʼaki ia Selusalemi.” ’+

17 “Ke ke toe kalaga: ‘Koʼeni te meʼa ʼae ʼe ui e Sehova ʼo te ʼatu kautau: “ ʼE toe lahi anai te meʼa ʼae ʼe lelei* ʼi ʼoku kolo. ʼE toe fakalotofimalieʼi anai e Sehova ia Sione+ pea ʼe ina toe filifili anai ia Selusalemi.” ’ ”+

18 Neʼe au hiki ake leva ʼoku mata pea neʼe au sio kia tala ʼe fa.+ 19 Neʼe au fehuʼi ki te ʼaselo ʼae neʼe ma palalau: “Kotea te ʼu tala ʼaia?” Neʼe ina tali: “Neʼe fakamavetevete e te ʼu tala ʼaia ia Suta,+ mo Iselaele+ pea mo Selusalemi.”+

20 Pea neʼe fakaha mai leva e Sehova ni tagata tufuga ʼe toko fa. 21 Neʼe au fehuʼi: “Kotea ʼae ka fai e te ʼu tagata ʼaia?”

Neʼe ina ui: “Neʼe fakamavetevete e te ʼu tala ia Suta, pea neʼe mole he tahi neʼe lava fakafeagai kia natou.* Kae ʼe ko te ʼu tagata ʼaia ka ʼomai ʼo fakamatakuʼi mo maumauʼi te ʼu tala ʼaia ʼo te ʼu puleʼaga. Neʼe hiki e te ʼu puleʼaga ʼaia ʼonatou tala moʼo fakafeagai ki te fenua ʼo Suta ke mavetevete ai te hahaʼi.”

2 Neʼe au hiki ake ʼoku mata pea neʼe au sio ki he tagata neʼe ina toʼo ʼi tona nima he maea moʼo fuafua he meʼa.+ 2 Neʼe au fehuʼi age kia ia: “ ʼE ke alu kifea?”

Neʼe ina tali mai: “ ʼE au alu ʼo fuafua ia Selusalemi, ke au iloʼi ai tona laulahi mo tona loa.”+

3 Neʼe mavae leva te ʼaselo ʼae neʼe ma palalau, pea neʼe alu age te tahi ʼaselo ʼo fakafelaveʼi ki ai. 4 Neʼe ina ui age ki ai: “Lele ki te tupulaga ʼae atu, ʼo ke ui age: ‘ “ ʼE nofoʼi anai ia Selusalemi+ ohage ko te ʼu kolo liliki ʼae ʼe mole hona kaupa, he ʼe liliu anai ʼo kaugamalie te hahaʼi mo te faga manu.+ 5 ʼE au ʼa takai anai ia ia ohage ko he kaupa afi+ pea mo fakafonu ʼaki toku kololia,” ko te ui ʼaia ʼa Sehova.’ ”+

6 ʼE ui e Sehova: “Kotou ʼomai! Kotou ʼomai! Kotou feholaki mai mai te fenua ʼo te potu noleto!”+

ʼE ui e Sehova: “Neʼe au fakamavetevete ia koutou ki te ʼu potu taupotu ʼe fa ʼo te kele.*+

7 “Hahaʼi ʼo Sione, kotou ʼomai! Kotou feholaki mai mai te fale ʼo te taʼahine ʼo Papiloni!+ 8 ʼI te ʼosi fakakololiaʼi ʼo Sehova ʼo te ʼatu kautau, neʼe ina fekauʼi au ke au alu ki te ʼu puleʼaga ʼae neʼe natou ʼave ʼokotou koloa. Koʼeni te meʼa ʼae ʼe ina ui:+ ‘Ko ʼae ʼe fāfā kia koutou, ʼe fāfā ia ki toku kanoʼi mata.+ 9 ʼI te lakaga nei, ʼe au hiki anai toku nima ke au fakamatakuʼi te ʼu puleʼaga ʼaia, pea ʼe natou liliu anai ko he ʼu koloa ʼe ʼave e ʼanatou hahaʼi kaugana.’+ Pea ʼe kotou iloʼi moʼoni anai ʼe ko Sehova ʼo te ʼatu kautau ʼae neʼe ina fekauʼi mai au.”

10 ʼE ui e Sehova: “Taʼahine ʼo Sione, ʼe au alu atu+ pea ʼe au nofo anai io koe.+ Koia, ke ke kalaga fakafiafia!+ 11 ʼI te ʼaho ʼaia, ʼe fakatahi mai anai kia Sehova ni puleʼaga ʼe kaugamalie,+ pea ʼe natou liliu anai ko taku hahaʼi. Pea ʼe au nofo anai io koe.” ʼE kotou iloʼi moʼoni anai ʼe ko Sehova ʼo te ʼatu kautau ʼae neʼe ina fekauʼi mai au kia koutou. 12 ʼE maʼu anai e Sehova ia Suta pea ʼe liliu anai ko hona tofiʼa ʼi te kele taputapu ʼaeni, pea ʼe ina toe filifili anai ia Selusalemi.+ 13 Ke fakalogologo te hahaʼi fuli ia muʼa ʼo Sehova! ʼE mavae mai tona nofoʼaga taputapu ke ina fakahoko tona finegalo.

3 Pea neʼe ina fakaha mai ia te pelepitelo lahi ko Sosue,+ neʼe tuʼu ia muʼa ʼo te ʼaselo ʼa Sehova. Neʼe tuʼu ai mo Satana+ ʼi tona toʼomataʼu ke fakafeagai ki ai. 2 Neʼe ui leva e te ʼaselo ʼa Sehova kia Satana: “Satana,+ ke fakatonutonuʼi koe e Sehova! ʼEi, ke fakatonutonuʼi koe e Sehova ʼae neʼe ina filifili ia Selusalemi!+ ʼE mole hage koa la te tagata ʼaeni ko he motumotu kakaha neʼe toʼo mai te afi?”

3 Neʼe tuʼu ia Sosue ia muʼa ʼo te ʼaselo kae neʼe ʼuli ʼosi ʼona teu. 4 Neʼe ui e te ʼaselo kia natou ʼae neʼe tutuʼu ʼi ʼona muʼa: “Kotou huʼi ʼona teu ʼuli.” Pea neʼe ina ui age kia ia: “Kua au molehi tau agahala,* pea ʼe ke tui anai ni teu matalelei.”+

5 Pea neʼe au ui: “Ke takai tona ʼulu ʼaki he kie ʼe maʼa.”+ Neʼe natou takai ai tona ʼulu ʼaki he kie ʼe maʼa pea mo fakatui hona ʼu teu. Pea neʼe tuʼu ovi age te ʼaselo ʼa Sehova. 6 Pea neʼe ui e te ʼaselo ʼa Sehova kia Sosue: 7 “Koʼeni te meʼa ʼae ʼe ui e Sehova ʼo te ʼatu kautau: ‘Kapau ʼe ke fai te meʼa ʼae ʼe au kole atu pea mo fakahoko te ʼu maʼua ʼae neʼe au foaki atu, ʼe ke liliu anai ko he tuʼi fakamau ʼi toku fale+ pea ʼe ke tokaga anai ki ʼoku malaʼe. Pea ʼe au tuku anai ke ke fealuʼaki faʼifaʼitaliha ia natou ʼae ʼe tutuʼu ʼi heni.’

8 “ ‘Fakalelei siʼokotou ʼu loto, kae ke kotou fakalogo mai, ia koe Sosue, te Pelepitelo Lahi pea mo te ʼu pelepitelo ʼae ʼe heheka ʼi ʼou muʼa. ʼE kotou hage ko he fakailoga ʼo te ʼu meʼa ʼae ka hoko. Koʼeni ʼe au fakaha atu taku tagata faifekau+ ʼae ʼe higoa ko Huli.’+ 9 ʼE ui e Sehova ʼo te ʼatu kautau: ‘Kotou sisio ki te foʼi maka ʼae neʼe au fakatuʼu ia muʼa ʼo Sosue. ʼE ʼi ai te ʼu foʼi mata ʼe fitu ʼi te foʼi maka ʼaia, pea ʼe au togi anai. Pea ʼe au pulihi anai te lakahala ʼo te fenua ʼaeni ʼi he ʼaho pe ʼe tahi.’+

10 “ ʼE ui e Sehova ʼo te ʼatu kautau: ‘ ʼI te ʼaho ʼaia, ʼe kotou tahi fakaafe anai tona vahaʼa fale ke haʼu ʼo heka fakatahi mo koutou ʼi tokotou lalo fuʼu vite pea mo fuʼu fiku.’ ”+

4 Neʼe toe haʼu te ʼaselo ʼae neʼe ma palalau ʼo fafagu au, ohage ko te fafagu ʼo he tahi neʼe moe. 2 Neʼe ina fehuʼi mai: “Kotea ʼae ʼe ke sio ki ai?”

Neʼe au tali age: “ ʼE au sio ki he tuʼulaga malama aulo+ pea ʼe ʼi ai he ipu ʼi ʼoluga. ʼE ko malama ʼe fitu ʼo te tuʼulaga malama,+ ʼei ko malama ʼe fitu pea ko te ʼu malama ʼae ʼi ʼoluga ʼe ʼi ai ʼonatou kiʼi haliʼaga ʼe fitu. 3 Pea ʼe tuʼu ovi ki ai te ʼu fuʼu oliveto ʼe lua,+ ko te tahi ʼi te faʼahi mataʼu ʼo te ipu pea ko te tahi ʼi tona faʼahi hema.”

4 Pea neʼe au fehuʼi ki te ʼaselo ʼae neʼe ma palalau: “Siʼoku ʼaliki, kotea ʼae ʼe fakata e te ʼu meʼa ʼaia?” 5 Neʼe ui mai e te ʼaselo ʼae neʼe ma palalau: “ ʼE mole ke iloʼi koa la pe ʼe fakata kitea te ʼu meʼa ʼaia?”

Neʼe au tali age: “Kailoa ia, siʼoku ʼaliki.”

6 Pea neʼe ina ui mai: “Koʼeni te meʼa ʼae ʼe ui e Sehova kia Solopapele: ‘ “ ʼE mole hoko anai te ʼu meʼa ʼaia ʼaki he ʼu malohi fakasolia peʼe ʼaki he malohi fakatagata,+ kae ʼaki toku laumalie,”+ ko te ui ʼaia ʼa Sehova ʼo te ʼatu kautau. 7 Ko ai ia koe, moʼuga lahi? ʼE ke liliu anai ia muʼa ʼo Solopapele+ ko he potu fenua laulelei.+ Pea ʼe ina ʼaumai anai te maka maʼuhiga ʼae ʼi ʼoluga, kae ʼe kalaga te hahaʼi: “ ʼI meʼa matalelei leva! ʼI meʼa matalelei leva!” ’ ”

8 Neʼe toe palalau mai ia Sehova ʼo ina ui mai: 9 “Neʼe ko te ʼu nima ʼo Solopapele ʼae neʼe ina fakatuʼu te ʼu fakatafito ʼo te fale ʼaeni,+ pea ʼe ko ʼona nima ʼae ka ina fakaʼosi.”+ Pea ʼe kotou iloʼi moʼoni anai ʼe ko Sehova ʼo te ʼatu kautau ʼae neʼe ina fekauʼi mai au kia koutou. 10 “ ʼAua naʼa kotou meʼa noaʼi te ʼaho ʼae neʼe kamata laga mamalie ai te fale ʼaia.*+ ʼE moʼoni, ʼe natou fakafiafia anai pea mo sisio anai ki te filo ʼae ʼe tautau ai he foʼi pulu* ʼi te nima ʼo Solopapele. Ko te ʼu mata ʼaia ʼe fitu ʼe ko te ʼu mata ʼo Sehova ʼae ʼe taka ʼi te kele katoa.”+

11 Pea neʼe au fehuʼi age ki ai: “Kotea ʼae ʼe fakata e te ʼu fuʼu oliveto ʼe lua ʼae ʼi te faʼahi mataʼu pea mo te faʼahi hema ʼo te tuʼulaga malama?”+ 12 Neʼe au toe fai age te fehuʼi: “Kotea ʼae ʼe fakata e te ʼu vaʼa* ʼo te ʼu fuʼu oliveto ʼe lua ʼae ʼe hali mai ai te lolo ʼi te ʼu haliʼaga aulo ʼe lua?”

13 Pea neʼe ina fehuʼi mai: “ ʼE mole ke iloʼi koa la pe ʼe fakata kitea te ʼu meʼa ʼaia?”

Neʼe au tali age: “Kailoa ia, siʼoku ʼaliki.”

14 Neʼe ina tali mai: “ ʼE ko tagata ʼe toko lua neʼe fakanofo pea ʼe tutuʼu ovi ki te ʼAliki ʼo te kele katoa.”+

5 Neʼe au toe hiki ake ʼoku mata pea neʼe au sio ki he takaiga tohi ʼe lele ʼi te lagi. 2 Neʼe fehuʼi mai e te ʼaselo: “Kotea ʼae ʼe ke sio ki ai?”

Neʼe au tali age: “ ʼE au sio ki he takaiga tohi ʼe lele ʼi te lagi. ʼE fasiga nima* 20 tona loa mo fasiga nima 10 tona laulahi.”

3 Pea neʼe ina ui mai: “ ʼE tohi ʼi te takaiga tohi ʼaia te malaʼia ʼae ʼe mafola ʼi te kele katoa. ʼEi, ʼe mafola te malaʼia koteʼuhi ko he tahi pe ʼe kaihaʼa,+ ohage ko tona tohi ʼi te faʼahi ʼo te takaiga tohi, ʼe mole fakatuʼā. Pea ko he tahi pe ʼe ina fai he fakapapau loi,+ ohage ko tona tohi ʼi te tahi faʼahi ʼo te takaiga tohi, ʼe mole fakatuʼā ia. 4 ʼE ui e Sehova ʼo te ʼatu kautau: ‘Neʼe au fakahoko te malaʼia ʼaia, pea ʼe ulu anai ki te ʼapi ʼo ia ʼae ʼe kaihaʼa mo te ʼapi ʼo ia ʼae ʼe ina fai he fakapapau loi ʼi toku huafa. ʼE nofo anai ʼi te ʼu ʼapi ʼaia ʼo ina maumauʼi, ʼo feia pe mo ʼonā lalago pea mo ʼonā maka.’ ”

5 Pea neʼe fakaovi mai te ʼaselo ʼae neʼe ma palalau, ʼo ina ui mai: “Fakalelei siʼou loto, hiki ake ʼou mata, pea ke sio ki te meʼa ʼae ʼe haʼu.”

6 Neʼe au fehuʼi age ki ai: “ ʼE kotea?”

Neʼe ina tali mai: “Ko te meʼa ʼae ʼe haʼu, ʼe ko he kulo.”* Pea neʼe ina toe ui mai: “ ʼE feia te agaaga ʼo te hahaʼi ʼaia ʼi te kele katoa.” 7 Pea neʼe au sio ki te toʼo ʼo te tapunu pulu takafuafua. Neʼe ʼi ai te fafine neʼe nofo ʼi te loto kulo. 8 Pea neʼe ui e te ʼaselo: “ ʼE higoa te fafine ʼaia ko Agakovi.” Pea neʼe ina humuki ki te loto kulo, ʼo pupunu ʼaki te tapunu pulu mamafa.

9 Pea neʼe au hiki ake leva ʼoku mata ʼo sio ki te fakaovi mai ʼo ni fafine ʼe toko lua, neʼe nā feleleʼi ʼi te matagi. Neʼe ʼi ai ʼonā pakakau ohage ko te ʼu pakakau ʼo te motuku. Neʼe nā toʼo te kulo mo ʼave ʼi te vaha ʼo te kele mo te lagi. 10 Pea neʼe au fehuʼi age ki te ʼaselo ʼae neʼe ma palalau: “ ʼE nā ʼave koa kifea te kulo?”

11 Neʼe ina tali mai: “Ki te fenua ʼo Sinea.*+ ʼE nā laga ai anai he ʼapi maʼa te fafine. Pea ka ʼosi, ʼe tuku anai ki ai te fafine, he ʼe tonu ke nofo ai.”

6 Neʼe au toe hiki ake leva ʼoku mata pea neʼe au sio ki ni saliote ʼe fa ʼe ʼomai mai te vaha ʼo te ʼu moʼuga ʼe lua. Neʼe ko te ʼu moʼuga kapa. 2 Neʼe toho te ʼuluaki saliote e ni hosi kula pea neʼe toho te lua saliote e ni hosi ʼuli.+ 3 Neʼe toho te tolu saliote e ni hosi hina pea neʼe toho te fa saliote e ni hosi pulepule.+

4 Neʼe au fehuʼi ki te ʼaselo ʼae neʼe ma palalau: “Siʼoku ʼaliki, kotea te ʼu saliote ʼaia?”

5 Neʼe tali mai e te ʼaselo: “ ʼE ko te ʼu laumalie ʼe fa+ ʼo te lagi ʼae neʼe tutuʼu ia muʼa ʼo te ʼAliki ʼo te kele katoa pea neʼe natou mavae leva mai ai.+ 6 ʼE alu te saliote ʼae ʼe toho e te ʼu hosi ʼuli ki te fenua ʼo te potu noleto.+ Kae ʼe mavae te ʼu hosi hina ʼo fakalaka ʼi te tai. Pea ʼe olo te ʼu hosi pulepule ki te fenua ʼo te potu saute. 7 Pea neʼe kua fakaʼamu e te ʼu hosi pulepule ke olo la ʼo foliʼi te kele.” Pea neʼe ina ui age: “Kotou olo la ʼo foliʼi te kele!” Pea neʼe natou olo ai ʼo foliʼi te kele.

8 Pea neʼe ina pauʼi au ʼo ina ui mai: “Sio! Ko natou ʼae ʼe mavae ʼo olo ki te fenua ʼo te potu noleto neʼe natou fakamalū ifo te hauhau* ʼo Sehova ʼi te fenua ʼo te potu noleto.”

7 Neʼe palalau leva ia Sehova kia Sakalia+ ʼi te fa taʼu ʼo te pule ʼa te Hau ko Taliusi. Neʼe ko te fa ʼaho ʼo te hiva mahina, ko te mahina ʼo Kiseleve.* 2 Neʼe fekauʼi e te hahaʼi ʼo Petele ia Saletesele, mo Lekemi-meleki pea mo ʼana tagata ke olo ʼo kole mamahi te manavaʼofa* ʼo Sehova. 3 Neʼe natou ui ki te ʼu pelepitelo ʼo te fale lotu ʼo Sehova ʼo te ʼatu kautau pea mo te ʼu polofeta: “ ʼE tonu koa ke au tagi pea ke mole au kai ʼi te nima mahina,+ ohage ko taku fai talu mai ni taʼu?”

4 Neʼe toe palalau mai ia Sehova ʼo te ʼatu kautau, ʼo ina ui mai: 5 “Tala ki te hahaʼi fuli ʼo te fenua pea mo te ʼu pelepitelo: ‘Neʼe kotou sesunio moʼoni koa maʼaku, ʼi te ʼu taʼu ʼe 70+ ʼae neʼe kotou sesunio mo tagilaulau ai ʼi te nima mo te fitu mahina?+ 6 ʼI te temi ʼae neʼe kotou kakai mo iinu ai, neʼe mole koa la kotou kakai mo iinu maʼa koutou pe? 7 Neʼe tala atu e Sehova ʼana folafola ʼaki te ʼu polofeta ʼo te temi muʼa.+ Neʼe ina fai te faʼahi ʼaia ʼi te temi ʼae neʼe nofoʼi ai ia Selusalemi mo te ʼu kolo ʼi ʼona tafaʼaki ʼi te tokalelei, pea mo te temi ʼae neʼe nofoʼi ai te Nekepe pea mo te Sefela. ʼE mole tonu koa la ke kotou fakalogo ki te ʼu folafola ʼaia?’ ”

8 Neʼe toe palalau foki ia Sehova kia Sakalia, ʼo ina ui age: 9 “Koʼeni te meʼa ʼae ʼe ui e Sehova ʼo te ʼatu kautau: ‘Kotou faifakamau ʼaki he faitotonu ʼe moʼoni+ pea mo kotou fefakahaʼaki te ʼofa agatonu+ mo te manavaʼofa. 10 ʼAua naʼa kotou kakaʼi he fafine vitua, peʼe ko he tamasiʼi hala mo tamai,+ peʼe ko he matapule,+ peʼe ko he tahi ʼe masiva,+ pea mo fai ni fakatuʼutuʼu kovi ʼi ʼokotou loto ki he tahi ia koutou.’+ 11 Kae neʼe mole natou fia fakalogo.+ Neʼe natou situʼa tuʼumaʼu pe kia te au,+ ʼo natou pupunu ʼonatou taliga ke mole natou logo.+ 12 Neʼe natou fakafefeka ʼonatou loto ohage ko te taimani.*+ Neʼe mole natou fia fakalogo ki te lao* pea mo te ʼu folafola ʼae neʼe fakaha age e Sehova ʼo te ʼatu kautau ʼaki tona laumalie, pea mo te ʼu polofeta ʼo te temi muʼa.+ Neʼe logoʼi ai e Sehova ʼo te ʼatu kautau ia he toe ita lahi.”+

13 “ ʼE ui e Sehova ʼo te ʼatu kautau: ‘Neʼe mole natou fakalogo ʼi taku* pauʼi natou.+ Koia neʼe mole au fakalogo ai ʼi tanatou pauʼi mai au.+ 14 Neʼe au fakato ai he afā ke fakamavetevete ai natou ʼi te ʼu puleʼaga fuli ʼae neʼe mole natou iloʼi.+ Neʼe tuʼu lavaki ai tonatou fenua. Neʼe mole he tahi neʼe fakalaka ai peʼe toe liliu ki ai,+ koteʼuhi kua liliu te fenua matalelei ko he koga meʼa fakalialia.’ ”

8 Neʼe toe palalau mai ia Sehova ʼo te ʼatu kautau, ʼo ina ui mai: 2 “Koʼeni te folafola ʼa Sehova ʼo te ʼatu kautau: ‘ ʼE au ʼofa mamahi anai pea mo tokaga ki Sione.+ ʼE lahi anai toku ita kae ʼe au haofaki anai ia ia.’ ”

3 “Koʼeni te folafola ʼa Sehova: ‘ ʼE au toe liliu mai anai ki Sione+ pea ʼe au nofo anai ʼi Selusalemi.+ ʼE fakahigoaʼi anai ia Selusalemi ko te kolo ʼo te moʼoni.*+ Pea ʼe fakahigoaʼi anai te moʼuga ʼo Sehova ʼo te ʼatu kautau ko te moʼuga taputapu.’ ”+

4 “Koʼeni te folafola ʼa Sehova ʼo te ʼatu kautau: ‘ ʼE toe nonofo anai ni kau matuʼa mo ni kau finematuʼa ʼi te ʼu malaʼe lalahi ʼo Selusalemi, ʼo tahi toʼo tona toko ʼi tona nima ʼuhi kua natou vaivai matuʼa.+ 5 Pea ʼe fonu anai te ʼu malaʼe lalahi ʼo te kolo ko ni tama mo ni taʼahine ʼe natou gaoʼi.’ ”+

6 “Koʼeni te folafola ʼa Sehova ʼo te ʼatu kautau: ‘ ʼI te temi ʼaia, ʼe lagi manatu anai e te toega ʼo te hahaʼi ʼaia, ʼe mole feala ke hoko te faʼahi ʼaia. Kae ʼe faigataʼa anai koa he meʼa kia te au?’ Ko te ui ʼaia ʼa Sehova ʼo te ʼatu kautau.”

7 “Koʼeni te folafola ʼa Sehova ʼo te ʼatu kautau: ‘ ʼE au haofaki anai taku hahaʼi mai te ʼu fenua ʼo te potu esite pea mo te ʼu fenua ʼo te potu uesite.+ 8 ʼE au ʼaumai anai ia natou ki Selusalemi pea ʼe natou nonofo ai anai.+ ʼE natou liliu anai ko taku hahaʼi pea ʼe au liliu anai ko tonatou ʼAtua,+ ʼae ʼe moʼoni* mo faitotonu.’ ”

9 “Koʼeni te folafola ʼa Sehova ʼo te ʼatu kautau: ‘Kotou lototoʼa,+ ia koutou ʼae ʼe logo ʼi te ʼaho nei ki te ʼu folafola ʼaeni mai te kau polofeta.+ Neʼe kua ʼosi tala atu te ʼu folafola ʼaia ʼi te ʼaho ʼae neʼe fakatuʼu ai te ʼu fakatafito ʼo te fale ʼo Sehova ʼo te ʼatu kautau ke laga te fale lotu. 10 Ki muʼa atu, neʼe mole he totogi ʼo te tagata peʼe ko te manu ʼo ʼuhiga mo te gaue ʼae neʼe fai.+ Pea neʼe fakatupu tuʼutamaki te feoloʼaki ʼuhi ko te ʼu fili, koteʼuhi neʼe au uga te hahaʼi fuli ke natou fefakafeagaiʼaki.’

11 “Koʼeni te folafola ʼa Sehova ʼo te ʼatu kautau: ‘Kae ʼi te temi leva ʼaeni, ʼe mole au toe fai anai ki te toega ʼo te hahaʼi ʼaia te meʼa ʼae neʼe au fai kia natou ʼi te temi muʼa.+ 12 ʼE to anai te pulapula ʼo te tokalelei. ʼE fua anai te gaueʼaga vite, ʼe maʼuli anai te kele+ pea ʼe hifo anai mai te lagi ia te hahau. ʼE au foaki anai te ʼu meʼa fuli ʼaia ko he tofiʼa ki te toega ʼo te hahaʼi ʼaia.+ 13 Hahaʼi ʼo Suta mo Iselaele, neʼe lau e te hahaʼi ʼo te ʼu puleʼaga ʼokotou higoa ʼi ʼanatou faitutuku.+ Kae ʼe au haofaki anai koutou, pea ʼe natou lau anai ʼokotou higoa ʼi ʼanatou kole tapuakina.+ ʼAua naʼa kotou matataku,+ kae ke kotou lototoʼa!’+

14 “Koʼeni te folafola ʼa Sehova ʼo te ʼatu kautau: ‘ “Neʼe au fakatotonu ʼi muʼa atu ke au fakahoko he malaʼia kia koutou he neʼe au ita ki ʼakotou kui, pea neʼe mole au fakahemala,” ko te ui ʼaia ʼa Sehova ʼo te ʼatu kautau.+ 15 “Kae kua au fakatotonu ʼi te temi nei ke au fai te meʼa ʼae ʼe lelei ki Selusalemi pea mo te hahaʼi ʼo Suta.+ ʼAua naʼa kotou matataku!” ’+

16 “ ‘Koʼeni te ʼu meʼa ʼae ʼe tonu ke kotou fai: Kotou fefakahaʼaki te moʼoni,+ kotou fai ni fakamau ʼi te ʼu matapa ʼo ʼokotou kolo, ʼo kotou lagolago ki te moʼoni pea mo te tokalelei.+ 17 ʼAua naʼa kotou fakakaukauʼi ʼi ʼokotou loto+ ke kotou fai he meʼa ʼe kovi ki he tahi ia koutou pea ʼaua naʼa kotou leleiʼia te ʼu fakapapau loi,+ he ʼe au fehiʼa ki te ʼu meʼa fuli ʼaia,’+ ko te ui ʼaia ʼa Sehova.”

18 Neʼe toe palalau mai ia Sehova ʼo te ʼatu kautau, ʼo ina ui mai: 19 “Koʼeni te folafola ʼa Sehova ʼo te ʼatu kautau: ‘ ʼE liliu anai te ʼu sesunio ʼo te fa mahina,+ mo te nima mahina,+ mo te fitu mahina+ pea mo te hogofulu mahina+ ko he ʼu lakaga fakafiafia, ʼei, ko he ʼu ʼaho lalahi fakafiafia maʼa te hahaʼi ʼo Suta.+ Koia ke kotou manako ki te moʼoni pea mo te tokalelei.’

20 “Koʼeni te folafola ʼa Sehova ʼo te ʼatu kautau: ‘Kae ʼe ʼomai anai te hahaʼi ʼo ni puleʼaga pea mo te hahaʼi ʼo ni kolo kehekehe. 21 ʼE olo anai te hahaʼi ʼo he kolo ki te hahaʼi ʼo he tahi kolo, ʼo natou ui anai: “Kotou ʼomai! Ke tou olo ʼo kole mamahi te manavaʼofa ʼo Sehova. Tou olo ʼo kumi ia Sehova ʼo te ʼatu kautau, he ʼe matou olo matou.”+ 22 ʼE ʼomai anai ni hahaʼi kaugamalie mo ni puleʼaga malohi ʼo kumi ia Sehova ʼo te ʼatu kautau ʼi Selusalemi.+ Pea ʼe natou kole mamahi anai te manavaʼofa ʼo Sehova.’

23 “Koʼeni te folafola ʼa Sehova ʼo te ʼatu kautau: ‘ ʼI te temi ʼaia, ʼe puke anai ia te kofu ʼo he tagata Sutea e ni tagata ʼe toko hogofulu ʼe palalau ʼi te ʼu lea fuli ʼo te ʼu puleʼaga.+ ʼEi, ʼe natou puke malohi anai tona kofu, ʼo natou ui: “ ʼE matou fia olo mo koutou,+ he neʼe matou logo ʼe nofo te ʼAtua mo koutou.” ’ ”+

9 Koʼeni te ʼu folafola ʼa te ʼAtua:

 3 Neʼe laga e Tile he kaupa.*

 9 Taʼahine ʼo Sione, fakafiafia!

Taʼahine ʼo Selusalemi, kalaga fakafiafia!

Koʼeni, ʼe haʼu kia koe tou hau.+

ʼE pulihi anai te ʼu nahau tau.

12 Kotou toe liliu mai ki te kolo tau, kau pilisoni kua fonu ʼi te ʼamanaki!+

13 ʼE au fakaʼaogaʼi anai ia Suta ohage ko he nahau,

10 “Kotou kole kia Sehova ke ʼua ʼi te temi ʼua ʼo te temi mātala ʼo te ʼu fisiʼi ʼakau.

Koia ʼae ʼe hehe ai anai te hahaʼi ohage ko ni ovi.

ʼE natou lotomamahi anai, he ʼe mole he tagata tauhi ovi.

4 “Koʼeni te folafola ʼa Sehova siʼoku ʼAtua: ‘Tokaga ki te ʼu ovi ʼae ka tamateʼi.+ 5 Ko natou ʼae ʼe natou totogi te ʼu ovi ʼaia ʼe natou tamateʼi+ kae ʼe ui ia ʼe mole natou lakahala. Pea ʼe ui e natou ʼae ʼe natou fakatau:+ “Ke vikiʼi ia Sehova, he ʼe au maʼu koloa anai!” ʼE mole lotomanavaʼofa ʼanatou tauhi ovi ki ʼanatou manu.’+

6 “ ʼE ui e Sehova: ‘ ʼE mole au toe lotomanavaʼofa anai ki te hahaʼi ʼo te fenua. Koia ʼae ʼe au tuku anai ke puleʼi e te vahaʼa fale tona tehina pea ke toe puleʼi e tona hau. ʼE natou maumauʼi anai te fenua, pea ʼe mole au haofaki anai he tahi mai tanatou pule.’ ”

7 Neʼe au kamata tokaga leva ki te ʼu ovi ʼae neʼe tonu ke tamateʼi.+ Neʼe au fai te meʼa ʼaia ke fua lelei kia koutou, ia te faga ovi ʼae ʼe mamahi. Neʼe au toʼo ai he ʼu moʼi ʼakau ʼe lua. Neʼe au fakahigoaʼi te tahi ko Matalelei, pea ko te tahi ko Logo Tahi.+ Pea neʼe au kamata tokaga ai leva ki te faga ovi. 8 Neʼe au kapu ni tagata tauhi ovi ʼe toko tolu ʼi he mahina pe ʼe tahi. Neʼe mole kei au katakiʼi au ia natou, pea neʼe natou toe fehihiʼa kia au. 9 Pea neʼe au ui: “ ʼE mole toe hoko atu anai taku tokaga kia koutou. Ke mate te ovi ʼae kua vave mate, ʼei, ke mate te ovi ʼae ʼe lolotoga mate. Pea ke fekaiʼaki te ʼu ovi ʼae ʼe kei toe!” 10 Koia neʼe au toʼo ai taku ʼakau ʼae ʼe higoa ko Matalelei,+ pea neʼe au tuʼutuʼusi. Neʼe au fakagata ai te fuakava ʼae neʼe au fai mo te hahaʼi fuli. 11 Neʼe gata ai leva ʼi te ʼaho ʼaia. Pea ʼi te sisio ʼa te faga ovi ʼae neʼe mamahi ki te meʼa ʼae neʼe hoko, neʼe natou iloʼi ai neʼe ko he logo mai ia Sehova.

12 Neʼe au ui age kia natou: “Kapau ʼe ko he meʼa ʼe lelei kia koutou, kotou foaki mai toku totogi, kae kapau ʼe mole koia, ke kotou taupau.” Neʼe natou li* mai ai toku totogi: neʼe ko foʼi piesi siliva ʼe 30.+

13 Neʼe ui mai e Sehova: “Neʼe natou fakafuafua ʼe au tau mo te totogi ʼaia! Li te toe falā ʼaia ki te tanakiʼaga koloa.”+ Neʼe au toʼo ai te ʼu foʼi piesi siliva ʼae ʼe 30 ʼo li ki te tanakiʼaga koloa ʼo te fale lotu ʼo Sehova.+

14 Pea neʼe au tuʼutuʼusi leva taku lua ʼakau, ʼae ʼe higoa ko Logo Tahi.+ Neʼe au fakagata ai te vahaʼa fakatautehina ʼo Suta mo Iselaele.+

15 Pea neʼe ui mai e Sehova: “Ke ke maʼu ʼi te temi nei te ʼu meʼa gaue ʼa he tagata tauhi ovi ʼe mole faʼafai.+ 16 Koteʼuhi ʼe au fakagafua anai ke liliu he tagata ko te tauhi ovi ʼo te fenua. ʼE mole tokaga anai ki te ʼu ovi ʼae kua vave mamate,+ ʼe mole ina kumi anai te ʼu ovi ʼae ʼe kei mui,+ ʼe mole ina faitoʼo anai te ʼu ovi ʼae kua lavevea, pea ʼe mole ina fafaga anai te ʼu ovi ʼae ʼe malolohi. Kae ʼe ina kai anai te ʼu ovi ʼae ʼe sisino+ pea ʼe ina toʼo anai te ʼu vaʼe ʼo te ʼu ovi.+

17 Malaʼia ki taku tagata tauhi ovi ʼae ʼe mole hona ʼuhiga,+ ʼae ʼe ina siʼaki te faga ovi!+

ʼE taʼi anai e te heleta tona nima pea mo tona foʼi mata mataʼu.

12 Koʼeni te logo ʼa te ʼAtua:

2 “ ʼE au fakaliliu anai ia Selusalemi ko he ipu ʼe siʼia ai anai te hahaʼi fuli ʼae ʼi ʼona tafaʼaki. Pea ʼe ʼa takai anai ia Suta pea mo Selusalemi.+ 3 ʼI te ʼaho ʼaia, ʼe au fakaliliu anai ia Selusalemi ko he foʼi maka mamafa ki te hahaʼi fuli. Pea ʼe lavevea kovi anai ia natou fuli ʼae ʼe natou faigaʼi ke natou hiki.+ ʼE fakatahitahi anai te ʼu puleʼaga fuli ʼo te kele ke natou fakafeagai ki ai.”+ 4 ʼE ui e Sehova: “ ʼI te ʼaho ʼaia, ʼe au fakamatakuʼi anai te ʼu hosi fuli. Pea ʼe au fakaʼuluvaleʼi anai te ʼu tagata heka hosi. ʼE au tokaga anai ki te hahaʼi ʼo Suta, kae ʼe au fakakiviʼi anai te ʼu hosi fuli ʼo te ʼu puleʼaga. 5 Pea ʼe ui anai e te ʼu pule telepi ʼo Suta: ‘Ko te hahaʼi ʼo Selusalemi ʼe ko tomatou malohi ʼuhi ko Sehova ʼo te ʼatu kautau, tonatou ʼAtua.’+ 6 ʼI te ʼaho ʼaia, ʼe au fakaliliu anai te ʼu pule telepi ʼo Suta ohage ko ni mamala kakaha ʼi he tuʼuga fafie. Pea ʼe au toe fakaliliu anai ia natou ohage ko he taume ʼe ulo ʼi he ʼatu fuhiga fulumeto neʼe tuʼusi.+ ʼE vela ai anai te hahaʼi fuli ʼi ʼonatou tafaʼaki, ʼi te faʼahi mataʼu mo te faʼahi hema.+ Pea ʼe toe nonofo anai te hahaʼi ʼo Selusalemi ʼi tonatou kolo, ʼei, ʼi Selusalemi.+

7 “ ʼE haofaki muʼa anai e Sehova te ʼu fale la ʼo Suta, ke ʼaua naʼa lahi age te kololia ʼo te hologa* ʼo Tavite pea mo te hahaʼi ʼo Selusalemi ʼi te kololia ʼo Suta. 8 ʼI te ʼaho ʼaia, ʼe puipui anai e Sehova te hahaʼi ʼo Selusalemi.+ ʼI te ʼaho ʼaia, ko ia ʼae ʼe tukia* ia natou ʼe hage anai ko Tavite. Pea ʼe takitaki anai ia natou e te hologa ʼo Tavite ohage ko te ʼAtua, ʼei, ohage ko te ʼaselo ʼa Sehova.+ 9 Pea ʼi te ʼaho ʼaia, ʼe au fakaʼauha anai te ʼu puleʼaga fuli ʼae ʼe ʼomai ʼo tauʼi ia Selusalemi.+

10 “ ʼE au foaki anai toku laumalie ki te hologa ʼo Tavite mo te hahaʼi ʼo Selusalemi. ʼE natou maʼu anai toku ʼofa pea mo faikole mamahi mai anai kia te au. ʼE natou sioʼi anai ia ia ʼae neʼe natou hukiʼi,+ pea ʼe natou tagilaulau anai ki ai ohage ko he tagilaulau ki he foha ʼulu tokotahi. ʼE natou tagi mamahi anai ki tona mate ohage ko he tagilaulau ki te mate ʼo he ʼuluaki foha. 11 ʼI te ʼaho ʼaia, ʼe lahi anai te ʼu tagilaulau ʼi Selusalemi ohage ko te ʼu tagilaulau ʼi Atatilimoni, ʼi te Potu Fenua Laulelei ʼo Mekito.+ 12 ʼE tagilaulau anai te fenua, ʼo tahi nofo te famili ʼi tona faʼahi. ʼE nofo anai te hologa ʼo Tavite ʼi tona faʼahi kae ʼe nonofo pe anai te hahaʼi fafine ʼi tonatou faʼahi. ʼE nofo anai te hologa ʼo Natane+ ʼi tona faʼahi kae ʼe nonofo pe anai te hahaʼi fafine ʼi tonatou faʼahi. 13 ʼE nofo anai te hologa ʼo Levi+ ʼi tona faʼahi kae ʼe nonofo pe anai te hahaʼi fafine ʼi tonatou faʼahi. ʼE nofo anai te hologa ʼo Simei+ ʼi tona faʼahi kae ʼe nonofo pe anai te hahaʼi fafine ʼi tonatou faʼahi. 14 Pea ʼe toe feia pe anai ki te ʼu famili fuli ʼae ka toe. ʼE natou tahi nofo pe anai ʼi tona faʼahi, kae ʼe nonofo pe anai te hahaʼi fafine ʼi tonatou faʼahi.

13 “ ʼI te ʼaho ʼaia, ʼe avahi anai he vai keli maʼa te hologa ʼo Tavite pea mo te hahaʼi ʼo Selusalemi. ʼE feala ai anai ke natou fakamaʼa ia natou mai ʼanatou agahala pea mo tonatou heʼe maʼa.+

2 ʼE ui e Sehova ʼo te ʼatu kautau: “ ʼI te ʼaho ʼaia, ʼe au molehi anai ʼi te fenua te ʼu higoa ʼo te ʼu taula ʼatua,+ pea ʼe mole toe manatuʼi anai e he tahi. ʼE au toe pulihi anai ʼi te fenua te ʼu polofeta+ pea mo te holi ki te heʼe maʼa. 3 Pea kapau ʼe toe faifakakikite he tagata, ʼe ui age anai e tana tamai mo tana faʼe ʼae neʼe nā fakatupu: ‘ ʼE mole ke maʼuli anai he neʼe ke tala ni loi ʼi te huafa ʼo Sehova.’ ʼEi, ʼe hukiʼi anai ia ia e tana tamai mo tana faʼe ʼae neʼe nā fakatupu he neʼe faifakakikite.+

4 “ ʼI te ʼaho ʼaia, ʼe ufiufi anai te ʼu polofeta fuli ʼi te meʼa ʼae ka ha age kia natou moka natou faifakakikite. ʼE mole natou tui anai he pulupulu fuluʼi manu+ moʼo kakaʼi te hahaʼi. 5 ʼE natou ui anai: ‘ ʼE mole ko au ko he polofeta. Ko au ko he tagata gaue kele, he neʼe totogi au e he tagata ʼi taku kei tupulaga.’ 6 Pea kapau ʼe fehuʼi age e he tahi kia natou: ‘Kotea te ʼu mataʼi lavea ʼaena ʼi tou sino?’* ʼe natou tali age anai: ‘Neʼe au lavea ʼi te ʼapi ʼo ʼoku kaumeʼa.’ ”

ʼE au ui age anai: ‘Ko natou ko taku hahaʼi,’+

Pea ʼe natou tali anai: ‘Ko Sehova ko tomatou ʼAtua.’ ”

14 “ ʼE hoko mai anai te ʼaho, ʼei, te ʼaho ʼo Sehova, ʼae ka vaevae ai ʼi ʼou muʼa te koloa ʼae neʼe toʼo mai io koe.* 2 ʼE au fakatahiʼi anai te ʼu puleʼaga fuli ke natou tauʼi ia Selusalemi. ʼE maʼu anai te kolo, ʼe kaihaʼa anai te ʼu ʼapi, pea ʼe fakaʼalikiʼi anai te hahaʼi fafine. ʼE ʼave popula anai te vaelua ʼo te hahaʼi ʼo te kolo, kae ʼe nonofo pe anai te toe ʼo te hahaʼi.

3 “ ʼE alu anai ia Sehova ʼo tauʼi te ʼu puleʼaga fuli ʼaia+ ohage ko tana fai ʼi te ʼaho ʼo te tau.+ 4 ʼI te ʼaho ʼaia, ʼe tuʼu anai ʼona vaʼe ʼi te Moʼuga ʼo Oliveto,+ ʼae ʼe haga ki Selusalemi ʼi te potu esite. ʼE mafaʼa lua anai te Moʼuga ʼo Oliveto, mai te potu esite ki te potu uesite,* ʼo tupu ai he potu fenua laulelei mo laulahi. ʼE hiki anai te vaelua ʼo te moʼuga ki te potu noleto, pea ko te tahi vaelua ki te potu saute. 5 ʼE kotou feholaki anai ki te potu fenua laulelei ʼae ʼi te vaha ʼo ʼoku moʼuga, he ʼe kaku te potu fenua laulelei ʼaia ki Atesele. ʼE tonu anai ke kotou feholaki ohage ko takotou feholaki ʼi te hoko ʼo te mafuike ʼae ʼi te temi pule ʼo te Hau ʼo Suta ko Osiasi.+ Pea ʼe haʼu anai ia Sehova toku ʼAtua mo te kau maʼoniʼoni fuli.+

6 “ ʼI te ʼaho ʼaia, ʼe mole mu anai he malama taulekaleka.+ ʼE mole gaugaue anai he meʼa.* 7 ʼE liliu anai te ʼaho ʼaia ko he ʼaho makehe, pea ʼe iloʼi anai ko te ʼaho ʼo Sehova.+ ʼE mole ʼaho anai peʼe poʼuli. ʼE malamagia anai te afiafi. 8 ʼI te ʼaho ʼaia, ʼe tafe anai he ʼu vai maʼuli+ mai Selusalemi.+ ʼE tafe anai te tahi vaelua ki te tai ʼo te potu esite,*+ pea ko te tahi vaelua ki te tai ʼo te potu uesite.*+ ʼE hoko anai te aluʼaga ʼaia ʼi te temi mafana pea mo te temi momoko. 9 Pea ʼe hau anai ia Sehova ki te kele katoa.+ ʼI te ʼaho ʼaia, ʼe tokotahi pe anai ia Sehova,+ pea ʼe ko tona huafa pe ʼe tahi.+

10 “ ʼE liliu anai te fenua katoa ohage ko te Alapa,+ mai Kepa+ ʼo aʼu ki Limoni+ ʼi te potu saute ʼo Selusalemi. ʼE toe tuʼu anai ia Selusalemi ʼi tona tuʼuʼaga ʼafeā.+ Pea ʼe nofoʼi anai mai te Matapa ʼo Pesamino+ ʼo aʼu ki te ʼUluaki Matapa, mo te Matapa ʼo Te Tuliki, pea mai te Tule ʼo Ananeele+ ʼo aʼu ki te ʼu lomiʼaga vite ʼo te hau. 11 ʼEi, ʼe nofoʼi anai. ʼE mole toe fakatuʼā anai ia Selusalemi ki te fakaʼauha,+ pea ʼe maʼuli fimalie ai anai te hahaʼi.+

12 “Pea koʼeni te malaʼia ʼae ka fakahoko anai e Sehova ki te hahaʼi fuli ʼae ka natou tauʼi ia Selusalemi:+ ʼe pala anai ʼonatou sino kae ʼe kei natou tutuʼu, ʼe pala anai ʼonatou mata, pea ʼe pala anai ʼonatou ʼalelo ʼi ʼonatou gutu.

13 “ ʼI te ʼaho ʼaia, ʼe natou maveuveu anai ʼuhi ko Sehova. ʼE natou tahi puke anai tona tehina pea mo fetauʼaki.+ 14 ʼE toe kau anai mo Suta ki te tau ʼae ʼi Selusalemi. ʼE tanaki anai te ʼu koloa ʼo te ʼu puleʼaga fuli ʼae ʼi ʼona tafaʼaki: te aulo, mo te siliva, pea mo ni tuʼuga teu.+

15 “Pea ʼe toe hoko anai he malaʼia feia ki te ʼu hosi, mo te ʼu asino lalahi, mo te ʼu kamelo, mo te ʼu asino pea mo te faga manu fuli ʼae ka maʼu ʼi te ʼu nofoʼaga ʼo te ʼu fili.

16 “ ʼI te taʼu fuli, ko natou fuli ʼae ka toe ʼi te ʼu puleʼaga fuli ʼae neʼe ʼomai ʼo tauʼi ia Selusalemi+ ʼe natou hake anai ʼo tulolo ia muʼa ʼo* te Hau, ia Sehova ʼo te ʼatu kautau.+ Pea ʼe natou kau anai ki te ʼAho Lahi ʼo Te ʼu Pola.*+ 17 Kae kapau ʼe mole hake he tahi ʼo te ʼu puleʼaga ʼo te kele ki Selusalemi ʼo tulolo ia muʼa ʼo te Hau, ia Sehova ʼo te ʼatu kautau, ʼe mole to anai te ʼua kia ia.+ 18 Pea kapau ʼe mole hake te hahaʼi ʼo Esipito pea mo feulufi ki te kolo, ʼe mole to anai te ʼua kia natou. Kae ʼe to anai kia natou te malaʼia ʼae ʼe fakahoko e Sehova ki te ʼu puleʼaga ʼae ʼe mole natou hake ʼo kau ki te ʼAho Lahi ʼo Te ʼu Pola. 19 ʼE ko te tautea anai ʼaia ki te agahala ʼo Esipito pea mo te agahala ʼo te ʼu puleʼaga fuli ʼae ʼe mole natou hake ʼo kau ki te ʼAho Lahi ʼo Te ʼu Pola.

20 “ ʼI te ʼaho ʼaia, ʼe tohi anai ʼi te ʼu kiʼi pele ʼo te ʼu hosi te ʼu palalau ʼaeni: ‘Ko te maʼoniʼoni ʼe ʼa Sehova!’+ ʼE hage anai te ʼu kulo+ ʼae ʼi te fale lotu ʼo Sehova ko te ʼu ipu+ ʼae ʼi muʼa ʼo te ʼaletale. 21 Ko te ʼu kulo fuli ʼo Selusalemi mo Suta ʼe taputapu anai pea ʼe maʼu anai e Sehova ʼo te ʼatu kautau. Pea ko natou fuli ʼae ka feulufi anai ʼo momoli ni sakilifisio, ʼe natou fakaʼaogaʼi anai ʼihi kulo moʼo fakamoho te kanoʼi manu. ʼI te ʼaho ʼaia, ʼe mole toe maʼu anai he tagata Kanaane* ʼi te fale lotu ʼo Sehova ʼo te ʼatu kautau.”+