TE ʼU MEʼA ʼAE NEʼE FAKAHA KIA SOANE (APOKALIPESI)

1 Te ʼu meʼa ʼae neʼe fakaha age e Sesu Kilisito* ki ʼana kaugana,+ ʼae neʼe foaki age e te ʼAtua kia te ia,+ ke natou iloʼi ai te ʼu meʼa ʼae kua vave hoko mai. Neʼe fekauʼi e Sesu tana ʼaselo ke ina fakaha te ʼu meʼa ʼaia ʼaki ni fakailoga ki tana kaugana ko Soane,+ 2 ʼae neʼe fakamoʼoni ki te folafola ʼa te ʼAtua pea ki te fakamoʼoni ʼae neʼe fai e Sesu Kilisito, ʼei, te ʼu meʼa fuli ʼae neʼe sio ki ai. 3 Fiafia ia ia ʼae ʼe ina lau leʼo lahi pea mo natou ʼae ʼe fagono ki te ʼu folafola ʼo te lea fakapolofeta ʼaeni pea mo natou mulimuli ki te ʼu meʼa ʼae ʼe tohi ai,+ he ʼe kua ovi mai te temi ʼae kua fakatuʼutuʼu.

4 Ko au Soane, ʼe au faitohi ki te ʼu kokelekasio ʼe fitu+ ʼae ʼi te potu fenua ʼo Asia:

Ke foaki atu te ʼofa makehe mo te tokalelei e “te ʼAtua ʼae ʼe maʼuli ʼi te temi nei, mo te temi muʼa, pea ʼe haʼu anai,”+ pea mo te ʼu laumalie ʼe fitu+ ʼae ia muʼa ʼo tona hekaʼaga fakahau, 5 pea mo Sesu Kilisito, ʼae ko “te Fakamoʼoni Agatonu,”+ mo “te ʼuluaki tupu kua fakatuʼuake mai te kau mate,”+ pea mo “te Pule ʼo te ʼu hau ʼo te kele.”+

ʼE ʼofa ia tatou+ pea neʼe ina fakaʼateainaʼi tatou mai ʼatatou agahala ʼaki tona taʼataʼa,+ 6 pea neʼe ina fakanofo tatou ko he ʼu hau+ mo he ʼu pelepitelo+ maʼa tona ʼAtua pea mo Tamai, ʼei, ke fakakololiaʼi ai ia ia pea ke ina maʼu te malohi ʼo talu ai. Ameni.

7 Koʼeni ʼe haʼu mo te ʼu ʼao+ pea ʼe sisio anai te hahaʼi fuli kia te ia, pea mo natou ʼae neʼe natou hukiʼi ia ia ʼaki te tao. Pea ʼe tuki fatafata anai te ʼu telepi fuli ʼo te kele ʼi tonatou lotomamahi ʼuhi ko ia.+ ʼEi, Ameni.

8 ʼE ui e Sehova* ʼAtua: “Ko au te Kamataʼaga pea mo te Fakaʼosiʼaga,*+ ia Ia ʼae ʼe maʼuli ʼi te temi nei, mo te temi muʼa, pea ʼe haʼu anai. Ko au te ʼAtua Mafimafi.”+

9 Ko au Soane, tokotou tehina pea ʼe au kau mo koutou ki te puleʼaga+ pea mo te katakiʼi+ ʼo te mamahi+ ʼi taku fakatahi mo Sesu.+ Neʼe au ʼi te motu ʼe higoa ko Patemosi he neʼe au palalau ʼo ʼuhiga mo te ʼAtua pea mo au fakamoʼoni ʼo ʼuhiga mo Sesu. 10 Neʼe ʼave au e te laumalie maʼoniʼoni ki te ʼaho ʼo te ʼAliki, pea neʼe au logo ki te leʼo malohi ʼi ʼoku tuʼa neʼe hage ko he fakatagi pupuhi, 11 ʼe ina ui: “Ko te ʼu meʼa ʼae ʼe ke sio ki ai, haga ʼo tohi ʼi he takaiga tohi pea mo ke momoli ki te ʼu kokelekasio ʼaeni ʼe fitu: ʼi Efeso,+ mo Simena,+ mo Pelekame,+ mo Tiatile,+ mo Sate,+ mo Filatelefia+ pea mo Laotise.”+

12 Neʼe au maliu leva ke au sio pe ko ai ʼae neʼe palalau mai, pea ʼi taku maliu ʼaia, neʼe au sio ki te ʼu tuʼulaga malama aulo ʼe fitu,+ 13 pea ʼi te lotolotoiga ʼo te ʼu tuʼulaga malama ʼaia, neʼe ʼi ai he tahi neʼe hage ko he foha ʼo te tagata,*+ neʼe ina tui he teu neʼe loa ʼo kaku ki ʼona vaʼe pea mo ina ʼai he kiliʼi pipi aulo ʼi tona fatafata. 14 Pea ko tona ʼulu mo ʼona fuluʼi ʼulu neʼe hihina ohage ko te fuluʼi ovi hina mo te nive, pea neʼe hage ʼona mata ko he uloʼi afi,+ 15 pea neʼe hage ʼona vaʼe ko te kapa ʼae kua maʼa+ moka tutu ʼi te gutuʼumu, pea neʼe hage tona leʼo ko te logoaʼa ʼo he toʼaga vai. 16 ʼI tona nima mataʼu neʼe ʼi ai te ʼu fetuʼu ʼe fitu,+ pea neʼe haʼu ki tuʼa mai tona gutu he heleta matalua, neʼe loa mo masila,+ pea neʼe hage tona fofoga ko te laʼa ʼi te temi ʼae ʼe mu malohi ai.+ 17 ʼI taku sio kia te ia, neʼe au to ifo ki ʼona vaʼe ohage kua au mate.

Pea neʼe ina hili tona nima mataʼu kia au ʼo ina ui mai: “ ʼAua naʼa ke mataku. Ko au te ʼUluaki+ pea mo te Fakamuli,+ 18 ia ia ʼae ʼe maʼuli.+ Neʼe au mate,+ kae koʼeni kua au maʼuli ʼo talu ai,+ pea ʼe au maʼu te ʼu kalavi ʼo te mate pea mo te Faitoka.*+ 19 Koia, ke ke tohi te ʼu meʼa ʼae neʼe ke sio ki ai, mo te ʼu meʼa ʼae ʼe lolotoga hoko, pea mo te ʼu meʼa ʼae ka hoko hili te ʼu meʼa ʼaia. 20 Pea koʼeni te fakaʼuhiga ʼo te meʼa fakalilo tapu ʼo te ʼu fetuʼu ʼe fitu ʼae neʼe ke sio ki ai ʼi toku nima mataʼu pea mo te ʼu tuʼulaga malama aulo ʼe fitu: ʼE fakata e te ʼu fetuʼu ʼe fitu te ʼu ʼaselo ʼo te ʼu kokelekasio ʼe fitu, pea ʼe fakata e te ʼu tuʼulaga malama ʼe fitu te ʼu kokelekasio ʼe fitu.+

2 “Tohi ki te ʼaselo+ ʼo te kokelekasio ʼo Efeso:+ Koʼeni te ʼu meʼa ʼae ʼe ui e ia ʼae ʼe ina puke te ʼu fetuʼu ʼe fitu ʼi tona nima mataʼu, ʼae ʼe haʼele ʼi te lotolotoiga ʼo te ʼu tuʼulaga malama aulo ʼe fitu:+ 2 ‘ ʼE au iloʼi ʼau gaue, mo tau kinakina pea mo tau faʼa kataki, pea ʼe mole ke tali te ʼu tagata ʼae ʼe kovi, pea neʼe ke ʼahiʼahiʼi natou ʼae ʼe natou ui ʼe ko he kau apositolo,+ kae ʼe mole natou apositolo, pea kua ke iloʼi ʼe natou gutuloi. 3 ʼE ke toe fakaha foki mo te faʼa kataki, pea neʼe lahi te ʼu faigataʼaʼia neʼe ke ʼutakiʼi ʼuhi ko toku huafa,+ pea neʼe mole ke lotovaivai.+ 4 Kae ʼe mole au leleiʼia te faʼahi ʼaeni: Ko tau mole kei maʼu te ʼofa ʼae neʼe ke maʼu ʼi te kamata.

5 “ ‘Koia, ke ke manatuʼi te meʼa ʼae neʼe ke maʼu kae kua puli,* mo ke fakahemala+ pea mo ke fai te ʼu gaue ʼae neʼe ke fai ʼi te kamata. He ʼe kapau ʼe mole ke fakahemala,+ ʼe au alu atu anai, pea ʼe au toʼo anai tou tuʼulaga malama+ mai tona tuʼuʼaga. 6 Kae ʼe ke maʼu te faʼahi lelei ʼaeni: ʼE ke fehiʼa ki te ʼu gaue ʼo te magaʼi lotu ʼa Nikola,+ ʼae ʼe au toe fehiʼa foki mo au ki ai. 7 Ko ʼae ʼe ʼi ai ʼona taliga ke fagono ki te meʼa ʼaeni ʼe ui e te laumalie maʼoniʼoni ki te ʼu kokelekasio:+ Kia ia ʼae ʼe malo,+ ʼe au fakagafua anai ke kai ki te fuʼu ʼakau ʼo te maʼuli,+ ʼae ʼe ʼi te palatiso ʼo te ʼAtua.’

8 “Pea tohi ki te ʼaselo ʼo te kokelekasio ʼo Simena: Koʼeni te ʼu meʼa ʼae ʼe ui e ‘te ʼUluaki pea mo te Fakamuli,’+ ʼae neʼe mate pea kua toe maʼuli ake:+ 9 ‘ ʼE au iloʼi tou mamahi pea mo tou masiva, kae ʼe ke koloaʼia.+ ʼE au toe iloʼi mo te hahaʼi ʼae ʼe natou ui ʼe ko he kau Sutea pea mo natou laukoviʼi koe. Kae ʼe mole ko he kau Sutea. Ko natou ʼaia ʼe ko he kutuga ʼa* Satana.+ 10 ʼAua naʼa ke mataku ki te ʼu mamahi ʼae ka ʼamanaki hoko kia koe.+ ʼE hoko atu pe anai te pilisoniʼi e te Tevolo niʼihi ia koutou, ke katoa ai tokotou ʼahiʼahiʼi, pea ʼe kotou mamahi anai lolotoga ʼaho ʼe hogofulu. Ke ke agatonu ʼo kaku ki te mate pea ʼe au foaki atu anai te pale ʼo te maʼuli.+ 11 Ko ʼae ʼe ʼi ai ʼona taliga ke fagono+ ki te meʼa ʼaeni ʼe ui e te laumalie maʼoniʼoni ki te ʼu kokelekasio: Kia ia ʼae ʼe malo,+ ʼe mole hoko anai ki ai te lua mate.’*+

12 “Tohi ki te ʼaselo ʼo te kokelekasio ʼo Pelekame: Koʼeni te ʼu meʼa ʼae ʼe ui e ia ʼae ʼe ina maʼu te heleta matalua, ʼae ʼe loa mo masila:+ 13 ‘ ʼE au iloʼi te koga meʼa ʼae ʼe ke nofo ai, ʼae ʼe tuʼu ai te hekaʼaga fakahau ʼo Satana. Kae ʼe ke haga taupau malohi aipe toku huafa,+ pea neʼe mole ke fakafisi ki tau tui ʼae kia te au,+ maʼia ʼi te ʼu ʼaho ʼo Atipasi taku fakamoʼoni agatonu,+ ʼae neʼe matehi+ ʼi tokotou kolo, ʼae ʼe nofo ai ia Satana.

14 “ ‘Kae ʼe ʼi ai te ʼu faʼahi ʼe mole au leleiʼia: ʼE maʼu io koe ʼihi ʼe natou mulimuli ki te akonaki ʼa Palaame,+ ʼae neʼe ina akoʼi kia Palaka+ ke ina fai he meʼa fakatupu higa ki te ʼu foha ʼo Iselaele, ke natou kai ki te ʼu meʼa ʼae neʼe sakilifisioʼi ki te ʼu taula ʼatua pea ke natou fai he ʼu felaveʼi fakasino heʼe ʼaoga.*+ 15 Pea ʼe toe maʼu foki io koe ia natou ʼae ʼe mulimuli ki te akonaki ʼo te magaʼi lotu ʼa Nikola.+ 16 Koia, ke ke fakahemala. He ʼe kapau ʼe mole ke fakahemala, ʼe au alu vave atu pea ʼe au tauʼi anai natou ʼaki te heleta loa ʼae ʼe haʼu mai toku gutu.+

17 “ ‘Ko ʼae ʼe ʼi ai ʼona taliga ke fagono ki te meʼa ʼaeni ʼe ui e te laumalie maʼoniʼoni ki te ʼu kokelekasio:+ Kia ia ʼae ʼe malo,+ ʼe au foaki age anai te mane neʼe fufu,+ pea mo foaki age anai ki ai he foʼi maka hina ʼe tohi ai he higoa foʼou ʼe mole iloʼi e he tahi gata pe kia ia ʼae ʼe foaki age ki ai.’

18 “Tohi ki te ʼaselo ʼo te kokelekasio ʼo Tiatile:+ Koʼeni te ʼu meʼa ʼae ʼe ui e te ʼAlo ʼo te ʼAtua, ia ia ʼae ʼe hage ʼona mata ko he uloʼi afi+ pea mo ʼona vaʼe ko te kapa ʼae kua maʼa:+ 19 ‘ ʼE au iloʼi ʼau gaue, mo tou ʼofa, mo tau tui, mo tau minisitelio pea mo tau faʼa kataki, pea ʼe lahi age ʼau gaue fakamuli ʼaeni ʼi ʼae neʼe ke fai ʼi te kamata.

20 “ ‘Kae ʼe mole au leleiʼia te faʼahi ʼaeni: Ko tau tali te fafine ʼae ko Sesapele,+ ʼae ʼe ina ui ʼe ko he polofeta, pea ʼe ina akoʼi mo fakaheʼi ʼaku kaugana ke natou fai he ʼu felaveʼi fakasino heʼe ʼaoga*+ pea mo natou kai te ʼu meʼa ʼae neʼe sakilifisioʼi ki te ʼu taula ʼatua. 21 Pea neʼe au tuku age ki ai he temi ke fakahemala, kae ʼe mole fia fakahemala ia mai tana fai te ʼu felaveʼi fakasino heʼe ʼaoga.* 22 Koʼeni, ʼe au fakatupu anai hona mahaki kovi pea mo he toe mamahi lahi kia natou ʼae neʼe tono mo ia, mo kapau ʼe mole natou fakahemala mai te ʼu gaue ʼae neʼe ina fakaneke natou ke natou fai. 23 Pea ʼe au matehi anai ʼana fanau ʼaki he mahaki fakatupu mate, ke iloʼi ai e te ʼu kokelekasio fuli ʼe ko au ia ia ʼae ʼe ina vakavakaʼi te ʼu manatu loloto ʼa te tagata pea mo tona loto,* pea ʼe au foaki atu anai kia koutou takitokotahi ʼo mulimuli ki ʼakotou gaue.+

24 “ ‘Kae, koʼeni te meʼa ʼae ʼe au ui atu kia koutou fuli ʼi Tiatile ʼae ʼe mole kotou mulimuli ki te akonaki ʼaia, pea ʼe mole kotou iloʼi te meʼa ʼae ʼe ui ʼe ko te ʼu “meʼa loloto ʼa Satana”:+ ʼE mole au hilifaki atu he tahi age kavega. 25 Kae ke kotou taupau malohi te meʼa ʼae ʼe kotou maʼu ʼo kaku ki taku alu atu.+ 26 Pea kia ia ʼae ʼe malo pea mo mulimuli ki ʼaku gaue ʼo kaku ki te fakaʼosi, ʼe au foaki age anai ki ai te pule ki te ʼu puleʼaga,+ 27 ohage pe ko te foaki mai kia au e taku Tamai ia te pule. Pea ʼe pule anai ki te hahaʼi ʼaki he toko ukamea,+ ke laliki ai natou ohage ko he ʼu ipu kele. 28 Pea ʼe au foaki age anai ki ai te fetuʼu ʼaho.+ 29 Ko ʼae ʼe ʼi ai ʼona taliga ke fagono ki te meʼa ʼae ʼe ui e te laumalie maʼoniʼoni ki te ʼu kokelekasio.’

3 “Tohi ki te ʼaselo ʼo te kokelekasio ʼo Sate: Koʼeni te ʼu meʼa ʼae ʼe ui e ia ʼae ʼe ina maʼu te ʼu laumalie ʼe fitu ʼo te ʼAtua+ pea mo te ʼu fetuʼu ʼe fitu:+ ‘ ʼE au iloʼi ʼau gaue, ʼe hage ʼe ke maʼuli, kae ʼe kua ke mate.+ 2 Ke ke nofo tokaga+ pea mo ke fakalotomalohiʼi natou* ʼae ʼe kei toe kae kua vave mamate, koteʼuhi ʼe au sio neʼe mole ke fakahoko katoa ʼau gaue ia muʼa ʼo toku ʼAtua. 3 Koia, ke ke haga manatuʼi te meʼa ʼae neʼe ke tali mo logo ki ai, pea mo ke haga taupau, pea ke ke fakahemala.+ ʼE mahino ia, kapau ʼe mole ke ʼala ake, ʼe au alu atu anai ohage ko he tagata kaihaʼa,+ pea ʼe mole ke iloʼi anai te hola ʼae ʼe au alu atu ai kia koe.+

4 “ ‘Kae ʼe ʼi ai ʼihi* io koe, ʼi Sate, neʼe mole natou ʼulihi ʼonatou teu,+ pea ʼe natou haʼele anai mo au ʼaki he ʼu teu hina,+ he ʼe tuha mo natou. 5 Koia ko ʼae ʼe malo,+ ʼe fakatui anai ki ai he ʼu teu hina,+ pea ʼe mole au molehi anai tona higoa ʼi te tohi ʼo te maʼuli,+ kae ʼe au fakamoʼoni anai ki tona higoa ia muʼa ʼo taku Tamai pea ia muʼa ʼo ʼana ʼaselo.+ 6 Ko ʼae ʼe ʼi ai ʼona taliga ke fagono ki te meʼa ʼae ʼe ui e te laumalie maʼoniʼoni ki te ʼu kokelekasio.’

7 “Tohi ki te ʼaselo ʼo te kokelekasio ʼo Filatelefia: Koʼeni te ʼu meʼa ʼae ʼe ui e ia ʼae ʼe maʼoniʼoni+ mo moʼoni,+ ʼae ʼe ina maʼu te kalavi ʼa Tavite,+ ʼe ina avahi ʼo mole feala anai ki he tahi ke ina mapunuʼi, pea ʼe ina mapunuʼi ʼo mole feala anai ki he tahi ke ina avahi: 8 ‘ ʼE au iloʼi ʼau gaue. Koʼeni, neʼe au avahi he matapa ʼi ʼou muʼa,+ ʼe mole feala ke mapunuʼi e he tahi. Pea ʼe au iloʼi ʼe veliveli tou malohi, pea neʼe ke taupau taku folafola pea neʼe ke agatonu ki toku huafa. 9 Koʼeni, ko natou ʼo te kutuga ʼa* Satana, ʼae ʼe natou ui ʼe ko he kau Sutea kae ʼe mole ko he kau Sutea,+ ʼe natou gutuloi, koʼeni, ʼe au taki mai anai natou ke natou tuʼutuli ifo ʼi ʼou vaʼe pea mo au fakaha kia natou neʼe au ʼofa ia koe. 10 Mai tona aluʼaga ʼae neʼe ke taupau te folafola ʼo ʼuhiga mo* taku faʼa kataki,+ ʼe au puipui anai koe ʼi te hola ʼo te ʼahiʼahi+ ʼae ka hoko ki te kele katoa, ke ʼahiʼahiʼi ai te hahaʼi ʼae ʼe nonofo ʼi te kele. 11 Kua au vave alu atu.+ Ke ke taupau malohi te meʼa ʼae ʼe ke maʼu, ke ʼaua naʼa toʼo e he tahi tou pale.+

12 “ ‘Ko ʼae ʼe malo, ʼe au fakaliliu anai ia ia ko he pou ʼi te fale lotu ʼo toku ʼAtua, pea ʼe mole toe hu mai anai ki tuʼa, pea ʼe au tohi anai kia ia te huafa ʼo toku ʼAtua+ pea mo te higoa ʼo te kolo ʼo toku ʼAtua, te Selusalemi Foʼou+ ʼae ʼe hifo ifo mai selo mai toku ʼAtua, pea mo toku huafa foʼou.+ 13 Ko ʼae ʼe ʼi ai ʼona taliga ke fagono ki te meʼa ʼae ʼe ui e te laumalie maʼoniʼoni ki te ʼu kokelekasio.’

14 “Tohi ki te ʼaselo ʼo te kokelekasio ʼo Laotise:+ Koʼeni te ʼu meʼa ʼae ʼe ui e ia ʼae ʼe fakahigoaʼi ko te Ameni,+ te fakamoʼoni+ agatonu mo moʼoni,+ te kamataʼaga ʼo te fakatupu ʼa te ʼAtua:+ 15 ‘ ʼE au iloʼi ʼau gaue, ʼe mole ke momoko peʼe ke vela. Kae neʼe au fakaʼamu feia age la ʼe ke momoko peʼe ke vela. 16 Kae ʼe ke mafana, ʼe mole ke vela+ peʼe ke momoko,+ koia ʼe au luaʼi anai koe mai toku gutu. 17 ʼE ke ui: “ ʼE au koloaʼia,+ ʼe lahi te ʼu koloa kua au maʼu pea ʼe mole ʼaoga mai he meʼa kia au,” kae ʼe mole ke iloʼi ʼe ke lotomamahi, mo fakaʼofaʼofa, mo masiva, mo kivi pea mo telefua. 18 Koia, ʼe au tokoni atu ke ke totogi ia au he aulo neʼe fakamaʼa ʼi te afi ke ke liliu ai ʼo koloaʼia, mo he ʼu teu hina ke ke tui naʼa sisio ʼihi ki tou telefua ʼo ke ufiufi ai,+ pea mo he faitoʼo ki ʼou mata+ ke feala hau sio.+

19 “ ‘Ko natou fuli ʼae ʼe au ʼofa ai, ʼe au fakatonutonuʼi pea mo akonakiʼi natou.+ Koia ke ke faʼafai pea mo ke fakahemala.+ 20 Koʼeni, ʼe au tuʼu ʼi te matapa pea mo au tukituki. Kapau ʼe logo he tahi ki toku leʼo pea mo ina avahi te matapa, ʼe au hu anai ki tona ʼapi pea ʼe ma kakai fakatahi anai ʼi te afiafi. 21 Kia ia ʼae ʼe malo,+ ʼe au fakagafua anai ke heka mo au ʼi toku hekaʼaga fakahau,+ ohage pe ko au neʼe au malo pea mo au heka+ mo taku Tamai ʼi tona hekaʼaga fakahau. 22 Ko ʼae ʼe ʼi ai ʼona taliga ke fagono ki te meʼa ʼae ʼe ui e te laumalie maʼoniʼoni ki te ʼu kokelekasio.’ ”

4 Hili te meʼa ʼaia, neʼe au sio pea koʼeni, he matapa kua ava ʼi selo, pea ko te ʼuluaki leʼo ʼae neʼe au logo ki ai neʼe palalau mai, neʼe hage ko he fakatagi pupuhi, neʼe ina ui: “Hake mai ki heni, pea ʼe au fakaha atu anai te ʼu meʼa ʼae ʼe tonu ke hoko.” 2 Hili ʼaia, neʼe hifo fakafokifa mai kia au te laumalie ʼo te ʼAtua, pea koʼeni, neʼe tuʼu ʼi selo he hekaʼaga fakahau pea neʼe heka ai he tahi.+ 3 Pea ko Ia ʼae neʼe heka ai neʼe gigila ohage ko te maka ʼae ko te sasipa+ pea mo te maka ʼae ko te saletuane,* pea neʼe takatakai te hekaʼaga fakahau e he nuanua neʼe hage ko te maka ʼae ko te emelote.+

4 Neʼe takatakai te hekaʼaga fakahau e te ʼu hekaʼaga fakahau ʼe 24, pea neʼe au sio neʼe heheka ʼi te ʼu hekaʼaga fakahau ʼaia te ʼu tagata ʼafeā ʼe toko 24+ neʼe natou tui he ʼu teu hina pea neʼe ʼi ai te ʼu kolona aulo ʼi ʼonatou ʼulu. 5 Neʼe haʼu mai te hekaʼaga fakahau te hila,+ mo te ʼu leʼo pea mo te mana.+ Pea ia muʼa ʼo te hekaʼaga fakahau, neʼe ulo he ʼu foʼi malama afi ʼe fitu, pea ʼe natou fakata te ʼu laumalie ʼe fitu ʼo te ʼAtua.+ 6 Ia muʼa ʼo te hekaʼaga fakahau, neʼe ʼi ai te meʼa neʼe hage ko he tai neʼe tatau mo te sioʼata+ peʼe ko te kilisitale.

ʼI te lotomalie ʼo te hekaʼaga fakahau* pea ʼi te ʼu tafaʼaki ʼo te hekaʼaga fakahau, neʼe ʼi ai te ʼu kelupimi ʼe toko fa+ pea neʼe fonu ʼonatou sino ko te ʼu mata ʼi muʼa pea mo muli. 7 Neʼe hage te ʼuluaki kelupimi ko he laione,+ pea neʼe hage te lua kelupimi ko he vitulo kei mui,+ pea neʼe hage te fofoga ʼo te tolu kelupimi+ ko te fofoga ʼo he tagata, pea neʼe hage te fa kelupimi+ ko he akuila ʼe lele.+ 8 Neʼe tahi maʼu e te ʼu kelupimi ʼaia ʼe toko fa te ʼu pakakau ʼe ono pea neʼe lahi pe ʼonatou pakakau ko te ʼu mata.+ Pea ʼi te ʼaho mo te po, ʼe natou ui tuʼumaʼu pe: “ ʼE maʼoniʼoni, ʼe maʼoniʼoni, ʼe maʼoniʼoni ia Sehova*+ ʼAtua, te Mafimafi, ʼae neʼe maʼuli ʼi te temi muʼa, mo te temi nei pea ʼe haʼu anai.”+

9 ʼI te temi fuli pe ʼae ʼe fakakololiaʼi ai, mo fakaʼapaʼapaʼi pea mo fakafetaʼi ai ia te ʼu kelupimi ʼaia kia Ia ʼae ʼe heka ʼi te hekaʼaga fakahau, ia Ia ʼae ʼe maʼuli ʼo talu ai,+ 10 ʼe tuʼutuli ifo te ʼu tagata ʼafeā ʼe toko 24+ ia muʼa ʼo Ia ʼae ʼe heka ʼi te hekaʼaga fakahau, ʼae ʼe maʼuli ʼo talu ai, mo natou atolasio kia te Ia pea mo li ʼonatou kolona ia muʼa ʼo te hekaʼaga fakahau, ʼo natou ui: 11 “ ʼE tuha mo koe, Sehova* tomatou ʼAtua, ke ke maʼu te kololia,+ mo te fakaʼapaʼapa+ pea mo te malohi,+ he neʼe ke fakatupu ia meʼa fuli.+ Neʼe fakatupu ia meʼa fuli ʼuhi ko tou finegalo.”

5 Pea neʼe au sio ʼi te nima mataʼu ʼo Ia ʼae neʼe heka ʼi te hekaʼaga fakahau+ ki he takaiga tohi neʼe tohi ʼona faʼahi lua,* pea neʼe fakamaʼu ʼaki te ʼu fakamaʼu ʼe fitu. 2 Pea neʼe au sio ki he ʼaselo malohi ʼe ina tala ʼaki he leʼo lahi: “Ko ai koa ʼae ʼe tuha mo ia ke ina avahi te takaiga tohi mo maumauʼi ʼona fakamaʼu?” 3 Kae neʼe mole he tahi ʼi selo, peʼe ʼi te kele, peʼe ʼi te lalo kele, neʼe feala ke ina avahi te takaiga tohi pea mo ina vakaʼi ia loto. 4 Neʼe au tagi mamahi ai, koteʼuhi neʼe mole maʼu he tahi neʼe tuha mo ia ke ina avahi te takaiga tohi pea mo ina vakaʼi ia loto. 5 Kae neʼe ui mai e he tahi ʼi te kau tagata ʼafeā: “Tuku tau tagi. Koʼeni, kua malo+ te Laione ʼo te telepi ʼo Suta,+ te aka+ ʼo Tavite,+ ʼo feala ai ke ina avahi te takaiga tohi pea mo ʼona fakamaʼu ʼe fitu.”

6 Pea neʼe au sio ki te akeno+ ʼae neʼe hage neʼe matehi.+ Neʼe tuʼu ʼi te lotomalie ʼo te hekaʼaga fakahau pea mo te ʼu kelupimi ʼe toko fa pea ʼi te lotomalie ʼo te kau tagata ʼafeā.+ Neʼe ʼi ai ʼona tala ʼe fitu pea mo ʼona mata ʼe fitu, pea ʼe fakata e te ʼu mata ʼaia te ʼu laumalie ʼe fitu ʼo te ʼAtua+ ʼae neʼe fekauʼi ki te kele katoa. 7 Neʼe alu atu aipe ʼo toʼo te takaiga tohi ʼi te nima mataʼu ʼo Ia ʼae neʼe heka ʼi te hekaʼaga fakahau.+ 8 ʼI tana toʼo te takaiga tohi, neʼe tuʼutuli ifo te ʼu kelupimi ʼe toko fa pea mo te ʼu tagata ʼafeā ʼe toko 24+ ia muʼa ʼo te Akeno, neʼe natou takitahi te alepa pea mo te ʼu ipu aulo neʼe fonu ʼi te iseso. (ʼE fakata e te iseso te ʼu faikole ʼa te kau maʼoniʼoni.)+ 9 Pea ʼe natou hiva he katiko foʼou,+ ʼo natou ui: “ ʼE tuha mo koe ke ke toʼo te takaiga tohi pea mo ke avahi ʼona fakamaʼu, koteʼuhi neʼe matehi koe pea ʼaki tou taʼataʼa neʼe ke totogi maʼa te ʼAtua he hahaʼi+ mai te ʼu telepi fuli, mo te ʼu lea fuli, mo te ʼu lanu fuli pea mo te ʼu fenua fuli,+ 10 pea neʼe ke fakanofo natou ko he ʼu hau+ mo he ʼu pelepitelo maʼa totatou ʼAtua,+ pea ʼe tonu ke natou hau+ ki te kele.”

11 Pea neʼe au sio ki te ʼu ʼaselo ʼe tokolahi ʼe natou takatakai te hekaʼaga fakahau, mo te ʼu kelupimi pea mo te ʼu tagata ʼafeā, pea neʼe au toe logo ki ʼonatou leʼo. Ko tonatou kaugamalie neʼe lauʼi miliate mo miliate* pea lauʼi afe mo afe.+ 12 Neʼe natou ui ʼaki he leʼo lahi: “ ʼE tuha mo te Akeno ʼae neʼe matehi,+ ke ina maʼu te pule, mo te ʼu koloa, mo te poto, mo te malohi, mo te fakaʼapaʼapa, mo te kololia pea mo te fakavikiviki.”+

13 Pea ko te ʼu meʼa fuli ʼae ʼe maʼuli ʼi selo, ʼi te kele, ʼi te lalo kele+ pea ʼi te tai, ʼei ko te ʼu meʼa fuli ʼaia neʼe au logo ki tanatou ui: “Ke maʼu e Ia ʼae ʼe heka ʼi te hekaʼaga fakahau+ pea mo te Akeno+ te fakavikiviki, mo te fakaʼapaʼapa,+ mo te kololia pea mo te mafimafi ʼo talu ai.”+ 14 Neʼe ui e te ʼu kelupimi ʼe toko fa: “Ameni!” pea neʼe tuʼutuli ifo te ʼu tagata ʼafeā ʼo natou atolasio ki te ʼAtua.

6 Pea neʼe au sio ki te avahi ʼae e te Akeno+ te ʼuluaki fakamaʼu ʼo te ʼu fakamaʼu ʼe fitu,+ pea neʼe au logo ki te ui e te tahi ʼi te ʼu kelupimi ʼe toko fa+ ʼaki he leʼo neʼe hage ko te mana: “Haʼu!” 2 Pea neʼe au sio, pea koʼeni he hosi hina+ pea ko ia ʼae neʼe heka ai neʼe ʼi ai tana nahau pea neʼe foaki age ki ai he kolona,+ pea neʼe alu ke malo katoa ʼi ʼona fili.+

3 ʼI te avahi e te Akeno te lua fakamaʼu, neʼe au logo ki te ui e te lua kelupimi:+ “Haʼu!” 4 Pea neʼe haʼu he tahi hosi neʼe lanu kula, pea neʼe fakagafua age kia ia ʼae neʼe heka ai ke ina toʼo te tokalelei mai te kele ke fematematehiʼaki ai te hahaʼi, pea neʼe foaki age kia ia he heleta lahi.+

5 ʼI te avahi e te Akeno te tolu fakamaʼu,+ neʼe au logo ki te ui e te tolu kelupimi:+ “Haʼu!” Pea neʼe au sio, pea koʼeni he hosi ʼuli, pea ko ia ʼae neʼe heka ai neʼe ina toʼo ʼi tona nima te meʼa fua. 6 Neʼe au logo ohage ko he leʼo ʼi te lotolotoiga ʼo te ʼu kelupimi ʼe toko fa ʼe ina ui: “He kilo fulumeto ʼe tahi ki he tenalio* ʼe tahi+ pea mo he ʼu kilo olose ʼe tolu ki he tenalio ʼe tahi, pea ʼaua naʼa ke maumauʼi te lolo oliveto pea mo te vino.”+

7 ʼI te avahi e te Akeno te fa fakamaʼu, neʼe au logo ki te ui e te fa kelupimi:+ “Haʼu!” 8 Pea neʼe au sio, pea koʼeni he hosi lau tetea pea ko ia ʼae neʼe heka ai neʼe higoa ko Mate. Pea neʼe mulimuli ʼo ovi ki ai te Faitoka.* Pea neʼe foaki age kia naua te pule ki te vahe tahi ki te fa ʼo te kele, ke nā matehi te hahaʼi ʼaki he heleta loa, mo he hoge,+ mo ni taʼi mahaki fakatupu mate pea mo te ʼu manu fekai ʼo te kele.+

9 ʼI te avahi e te Akeno te nima fakamaʼu, neʼe au sio ʼi te lalo ʼaletale+ ki te toto*+ ʼo natou ʼae neʼe matehi ʼuhi ko te folafola ʼa te ʼAtua pea ʼuhi ko te fakamoʼoni ʼae neʼe natou fai.+ 10 Neʼe natou kalaga leʼo lahi, ʼo natou ui: “Tuʼi ʼAliki, maʼoniʼoni mo moʼoni,+ ʼe aʼu koa ki ʼafea tau taʼofi ia tau fakamauʼi ia te hahaʼi ʼo te kele pea mo tau lagavaka ʼo ʼuhiga mo tomatou toto ʼae neʼe natou liligi?”+ 11 Pea neʼe foaki kia natou takitokotahi he teu loa hina,+ pea neʼe ui age kia natou ke natou toe malolo ʼi he kiʼi temi nounou pe, ʼo aʼu ki te kua katoa ʼo te kaugamalie ʼo ʼonatou kaugā gaue* pea mo ʼonatou tehina ʼae neʼe ʼamanaki ke matehi ohage ko natou.+

12 ʼI te avahi e te Akeno te ono fakamaʼu, neʼe au sio neʼe hoko te toe mafuike lahi. Pea neʼe fakapoʼuli te laʼa ohage ko he taga,* pea neʼe liliu te mahina ʼo kula ohage ko te toto,+ 13 pea neʼe maluku ifo te ʼu fetuʼu ʼo te lagi ki te kele ohage ko te maʼofa ʼo te ʼu foʼi fiku ʼae kei mumui moka luluʼi e he tuʼani matagi te fuʼu fiku. 14 Pea neʼe takai te lagi ohage ko he takaiga tohi pea neʼe puli,+ pea ko te ʼu moʼuga mo te ʼu motu fuli neʼe hiki mai ʼonatou tuʼuʼaga.+ 15 Pea ko te ʼu hau ʼo te kele, mo te kau maʼu tuʼulaga, mo te kau kamutoa, mo te hahaʼi maʼu koloa, mo te hahaʼi malolohi, mo te kau kaugana pea mo te hahaʼi ʼateaina neʼe natou fenonoʼi ʼi te ʼu ʼana pea ʼi te ʼu maka ʼo te ʼu moʼuga.+ 16 Pea neʼe natou haga ui ki te ʼu moʼuga pea mo te ʼu maka: “Kotou holo ifo+ ʼo fufu matou mai te fofoga ʼo Ia ʼae ʼe heka ʼi te hekaʼaga fakahau+ pea mai te hauhau ʼo te Akeno,+ 17 he ʼe kua hoko mai te ʼaho lahi ʼo tonā hauhau,+ pea ko ai ʼae ʼe feala ke tuʼu?”+

7 Hili ia, neʼe au sio ki te ʼu ʼaselo ʼe toko fa ʼe natou tutuʼu ʼi te ʼu potu taupotu ʼe fa ʼo te kele, ʼe natou taʼofi te ʼu matagi ʼe fa ʼo te kele, ke ʼaua naʼa agi he matagi ki te kele, peʼe ki te tai, peʼe ki he fuʼu ʼakau. 2 Pea neʼe au sio ki te tahi ʼaselo ʼe haʼu mai te hopoʼaga ʼo te laʼa,* ʼe ina puke he meʼa neʼe foaki age e te ʼAtua maʼuli moʼo fakailoga ʼaki te hahaʼi. Pea neʼe kalaga ʼaki he leʼo lahi ki te ʼu ʼaselo ʼe toko fa ʼae neʼe fakagafua age ke natou fai he meʼa ʼe kovi ki te kele mo te tai, 3 ʼo ina ui: “ ʼAua naʼa kotou fai he meʼa ʼe kovi ki te kele, peʼe ki te tai, peʼe ki te ʼu fuʼu ʼakau, ʼo kaku ki tamatou kua ʼosi fakailoga+ te ʼu kaugana ʼo totatou ʼAtua ʼi ʼonatou laʼe.”+

4 Pea neʼe au logo ki te kaugamalie ʼo natou ʼae neʼe fakailoga, neʼe ko te toko 144 000,+ pea neʼe fakailoga natou mai te ʼu telepi fuli ʼo te ʼu foha ʼo Iselaele:+

9 Hili ia, neʼe au sio, pea koʼeni he toe hahaʼi tokolahi, neʼe mole feala ke lau e he tahi, mai te ʼu puleʼaga fuli, mo te ʼu telepi fuli, mo te ʼu lanu fuli pea mo te ʼu lea fuli,+ ʼe natou tutuʼu ia muʼa ʼo te hekaʼaga fakahau pea ia muʼa ʼo te Akeno, neʼe natou tui he ʼu teu loloa hina+ pea neʼe ʼi ai ni vaʼa palema ʼi ʼonatou nima.+ 10 Pea ʼe natou haga kalaga leʼo lahi, ʼo natou ui: “ ʼE haʼu totatou haofaki mai totatou ʼAtua, ʼae ʼe heka ʼi te hekaʼaga fakahau,+ pea mai te Akeno.”+

11 Neʼe takatakai e te ʼu ʼaselo fuli te hekaʼaga fakahau, mo te ʼu tagata ʼafeā+ pea mo te ʼu kelupimi ʼe toko fa, pea neʼe natou tulolo ia muʼa ʼo te hekaʼaga fakahau pea mo natou atolasio ki te ʼAtua, 12 ʼo natou ui: “Ameni! Ke maʼu e totatou ʼAtua te fakavikiviki, mo te kololia, mo te poto, mo te fakafetaʼi, mo te fakaʼapaʼapa, mo te mafimafi pea mo te malohi ʼo talu ai.+ Ameni.”

13 Pea neʼe fehuʼi mai e te tahi ʼo te ʼu tagata ʼafeā: “Ko ai ia natou ʼaeni ʼe natou tui te ʼu teu loloa hina,+ pea ʼe natou ʼomai koa maifea?” 14 Neʼe au tali atu aipe ki ai: “Toku ʼaliki, ʼe ko koe ʼae ʼe ke iloʼi.” Pea neʼe ina ui mai: “ ʼE ʼomai ia natou ʼaeni mai te toe mamahi lahi,+ pea neʼe natou fo ʼonatou teu loloa pea mo fakahihina ʼi te taʼataʼa ʼo te Akeno.+ 15 Ko te tupuʼaga la ʼaia ʼo tanatou tutuʼu ia muʼa ʼo te hekaʼaga fakahau ʼo te ʼAtua, pea ʼe natou foaki kia te ia he tauhi taputapu ʼi te ʼaho mo te po ʼi tona fale lotu, pea ko Ia ʼae ʼe heka ʼi te hekaʼaga fakahau+ ʼe ina fakamalumaluʼi anai natou ʼi tona fale la.+ 16 ʼE mole natou toe fia kakai anai peʼe fia iinu, ʼe mole natou logoʼi anai te momofi ʼo te laʼa peʼe te kovi ʼo te vevela,+ 17 koteʼuhi ko te Akeno,+ ʼae ʼe ʼi te lotomalie ʼo te hekaʼaga fakahau, ʼe ina taki anai natou ohage ko he tagata tauhi ovi+ ki te ʼu matapuna vai ʼo te maʼuli.+ Pea ʼe holoholoʼi anai e te ʼAtua te ʼu loʼimata fuli ʼi ʼonatou mata.”+

8 ʼI te avahi e te Akeno+ te fitu fakamaʼu,+ neʼe fakalogologo te lagi lolotoga te vaeluaʼi hola. 2 Pea neʼe au sio ki te ʼu ʼaselo ʼe toko fitu,+ ʼae ʼe tutuʼu ia muʼa ʼo te ʼAtua, neʼe foaki age kia natou te ʼu fakatagi pupuhi ʼe fitu.

3 Ko te tahi ʼaselo, ʼae ʼe ina puke te ipu iseso aulo, neʼe haʼu ʼo tuʼu ovi ki te ʼaletale,+ pea neʼe lahi te iseso+ ʼae neʼe foaki age ki ai ke ina momoli ʼi te ʼaletale aulo+ ʼae neʼe tuʼu ʼi te muʼa hekaʼaga fakahau, ʼi te temi ʼae neʼe logo ai ki te ʼu faikole ʼa te kau maʼoniʼoni fuli. 4 Ko te kohu ʼo te iseso ʼae neʼe tutu e te ʼaselo neʼe hake ake kia muʼa ʼo te ʼAtua, fakatahi mo te ʼu faikole+ ʼa te kau maʼoniʼoni. 5 Kae neʼe toʼo atu aipe e te ʼaselo te ipu iseso, ʼo ina fakafonu ʼaki he ʼu mamala kakaha mai te ʼaletale pea neʼe ina li ki te kele. Neʼe mana pea neʼe hila+ te lagi pea neʼe hoko te mafuike. Neʼe au toe logo foki ki he ʼu leʼo. 6 Pea neʼe teuteu te ʼu ʼaselo ʼe toko fitu ke natou pupuhi te ʼu fakatagi pupuhi ʼe fitu.+

7 Neʼe pupuhi e te ʼuluaki ʼaselo tana fakatagi pupuhi. Pea neʼe to ki te kele te ʼuamaka pea mo te afi kua fio ʼaki te toto.+ Pea neʼe vela te vahe tahi ki te tolu ʼo te kele, mo te vahe tahi ki te tolu ʼo te ʼu fuʼu ʼakau pea mo te luna fuli.+

8 Neʼe pupuhi e te lua ʼaselo tana fakatagi pupuhi. Pea neʼe li ki te tai te meʼa neʼe hage ko he moʼuga lahi ʼe ulo.+ Pea neʼe liliu te vahe tahi ki te tolu ʼo te tai ʼo toto,+ 9 pea neʼe mamate te vahe tahi ki te tolu ʼo te ʼu meʼa ʼae ʼe maʼuʼuli ʼi te tai,+ pea neʼe mou te vahe tahi ki te tolu ʼo te ʼu vaka.

10 Neʼe pupuhi e te tolu ʼaselo tana fakatagi pupuhi. Pea neʼe to mai te lagi he fetuʼu lahi ʼe ulo ohage ko he malama, pea neʼe to ki te vahe tahi ki te tolu ʼo te ʼu vai tafe mo te ʼu matapuna vai.+ 11 Ko te higoa ʼo te fetuʼu ʼaia ko Apiseneto.* Pea neʼe liliu te vahe tahi ki te tolu ʼo te ʼu vai ʼo kona ohage ko te apiseneto, pea tokolahi te hahaʼi neʼe mamate koteʼuhi neʼe kona te ʼu vai ʼaia.+

12 Neʼe pupuhi e te fa ʼaselo tana fakatagi pupuhi. Pea neʼe fakapoʼuli te vahe tahi ki te tolu ʼo te laʼa,+ mo te vahe tahi ki te tolu ʼo te mahina pea mo te vahe tahi ki te tolu ʼo te ʼu fetuʼu, pea neʼe mole ʼi ai he malama+ lolotoga te vahe tahi ki te tolu ʼo te ʼaho mo te vahe tahi ki te tolu ʼo te poʼuli.

13 Pea neʼe au sio ki he akuila ʼe lele ʼi te lagi pea neʼe au logo ki tana ui ʼaki he leʼo lahi: “Malaʼia, malaʼia, malaʼia+ kia natou ʼae ʼe nonofo ʼi te kele koteʼuhi ʼe ʼamanaki pupuhi e te tahi ʼu ʼaselo ʼe toko tolu ʼanatou fakatagi pupuhi!”+

9 Neʼe pupuhi e te nima ʼaselo tana fakatagi pupuhi.+ Pea neʼe au sio ki te fetuʼu neʼe to mai te lagi ki te kele, pea neʼe foaki age kia te ia te kalavi ʼo te vanu.+ 2 Neʼe ina avahi te vanu, pea neʼe hake ake mai ai te kohu neʼe hage ko te kohu ʼo he gutuʼumu lahi, pea neʼe fakapoʼuli te laʼa+ mo te ʼaele ʼuhi ko te kohu ʼaia neʼe haʼu mai te vanu. 3 Neʼe ʼomai mai te kohu ʼaia he ʼu heʼe ʼo natou hifo ki te kele,+ pea neʼe foaki age kia natou te malohi, ohage ko te malohi ʼae ʼe maʼu e te ʼu sekolopio ʼi te kele. 4 Neʼe ui age kia natou ke ʼaua naʼa natou fai he meʼa ʼe kovi ki te luna, mo te vao ʼakau pea mo te ʼu fuʼu ʼakau ʼo te kele, kae gata pe ki te hahaʼi ʼae ʼe mole natou maʼu ʼi ʼonatou laʼe te fakailoga ʼo te ʼAtua.+

5 Pea neʼe mole fakagafua age ki te ʼu heʼe ke natou matehi te hahaʼi ʼaia, kae ke natou fakamamahiʼi natou ia mahina ʼe nima, pea neʼe tatau tonatou mamahi ʼaia mo te mamahi ʼo he tahi neʼe ʼuʼusi e he sekolopio.+ 6 ʼI te ʼu ʼaho ʼaia, ʼe kumi anai e te hahaʼi ia te mate, kae ʼe mole natou maʼu anai, pea ʼe natou fia mamate, kae ʼe hola anai te mate mai ia natou.

7 Neʼe hage te ʼu heʼe ʼaia ko ni hosi neʼe teuteuʼi ki te tau.+ Neʼe ʼai ʼi ʼonatou ʼulu te ʼu meʼa neʼe hage ko he ʼu kolona aulo, pea neʼe hage ʼonatou fofoga ko te fofoga ʼo he tagata, 8 kae neʼe hage ʼonatou lauʼulu ko te lauʼulu ʼo he fafine. Pea neʼe hage ʼonatou nifo ko te ʼu nifo ʼo he ʼu laione,+ 9 pea neʼe ʼi ai ʼonatou kofu ukamea. Pea neʼe hage te logoaʼa ʼo ʼonatou pakakau ko te logoaʼa ʼo he ʼu saliote neʼe toho e he ʼu hosi ʼe feleleʼi ki te tau.+ 10 Pea ʼe ʼi ai he ʼu foto kafokona ʼi ʼonatou hiku ohage ko te ʼu sekolopio, pea ʼe nofo ʼi ʼonatou hiku te malohi ʼae ke natou fakamamahiʼi te hahaʼi ia mahina ʼe nima.+ 11 Ko tonatou hau ʼe ko te ʼaselo ʼo te vanu.+ Ko tona higoa ʼi te Fakahepeleo ko Apatone,* pea ko tona higoa ʼi te Fakakeleka, ko Apolione.*

12 Kua fakalaka te malaʼia ʼe tahi. Hili te ʼu meʼa ʼaia, ʼe hoko mai te tahi ʼu malaʼia ʼe lua.+

13 Neʼe pupuhi e te ono ʼaselo+ tana fakatagi pupuhi.+ Pea neʼe au logo ki he leʼo ʼe haʼu mai te ʼu tala ʼo te ʼaletale aulo,+ ʼae ia muʼa ʼo te ʼAtua 14 ʼe ina ui ki te ono ʼaselo ʼae ʼe ina maʼu te fakatagi pupuhi: “Haga ʼo veteki te ʼu ʼaselo ʼe toko fa ʼae ʼe haʼi ʼi te vai tafe lahi ko Efalate.”+ 15 Pea neʼe ina veteki te ʼu ʼaselo ʼaia ʼe toko fa, ʼae neʼe teuteuʼi ki te hola, mo te ʼaho, mo te mahina pea mo te taʼu ke natou matehi te vahe tahi ki te tolu ʼo te hahaʼi.

16 Neʼe au logo, ko te kaugamalie ʼo te ʼu kautau solia heka hosi neʼe ko te toko 200 miliona.* 17 Pea ʼi te meʼa ʼae neʼe ha mai kia au, neʼe fenei te ʼu hosi ʼae neʼe au sio ki ai pea mo natou ʼae neʼe heheka ai: Ko ʼonatou kofu ukamea neʼe lanu kula, mo ʼuʼui pea mo legalega, pea neʼe hage te ʼu ʼulu ʼo te ʼu hosi ko te ʼu ʼulu ʼo he ʼu laione,+ pea neʼe haʼu mai ʼonatou gutu te afi, mo te kohu pea mo te sulifa.* 18 Neʼe mamate te vahe tahi ki te tolu ʼo te hahaʼi ʼaki te ʼu tautea ʼaia ʼe tolu, ia te afi, mo te kohu pea mo te sulifa ʼae neʼe haʼu mai ʼonatou gutu. 19 Koteʼuhi ʼe nofo te malohi ʼo te ʼu hosi ʼi ʼonatou gutu pea ʼi ʼonatou hiku, he ʼe hage ʼonatou hiku ko he ʼu gata mo ʼonatou ʼulu, pea ʼe natou fakamamahiʼi te hahaʼi ʼaki ʼonatou hiku.

20 Kae ko te toe ʼo te hahaʼi ʼae neʼe mole mamate ʼi te ʼu tautea ʼaia, neʼe mole natou fakahemala mai ʼanatou gaue.* Neʼe mole tuku tanatou atolasio ki te ʼu temonio pea mo te ʼu taula ʼatua aulo, mo siliva, mo kapa, mo maka pea mo ʼakau, ʼae ʼe mole feala ke natou sisio ki he meʼa, mo logo ki he meʼa pea mo haʼele.+ 21 Pea neʼe mole natou fakahemala mai ʼanatou faifakapo, mo ʼanatou faifakalauʼakau, mo tanatou fai he ʼu felaveʼi fakasino heʼe ʼaoga* pea mo ʼanatou kaihaʼa.

10 Pea neʼe au sio ki te tahi ʼaselo malohi ʼe hifo mai selo, neʼe kofuʼi* e te ʼao pea neʼe ʼi ai te nuanua ʼi tona ʼulu. Pea neʼe hage tona fofoga ko te laʼa+ pea neʼe hage ʼona vaʼe ko he ʼu pou afi. 2 Neʼe ina puke ʼi tona nima te kiʼi takaiga tohi neʼe mole takai. Neʼe ina fakatuʼu tona vaʼe mataʼu ki te tai, kae ina fakatuʼu tona vaʼe hema ki te kele, 3 pea neʼe kalaga ʼaki he leʼo malohi ohage ko te gugulu ʼo he laione.+ Pea ʼi tana kalaga ʼaia, neʼe au logo ki te leʼo ʼo te ʼu mana ʼe fitu.+

4 Pea ʼi te temi ʼae neʼe palalau ai te ʼu mana ʼe fitu, neʼe au ʼamanaki tohi te ʼu meʼa ʼae neʼe natou ui, kae neʼe au logo ki he leʼo mai selo+ ʼe ina ui: “Taupau fakafufu te ʼu palalau ʼae neʼe fai e te ʼu mana ʼe fitu, pea ʼaua naʼa ke tohi.” 5 Ko te ʼaselo ʼae neʼe au sio ʼe tuʼu ʼi te tai pea mo te kele, neʼe ina hiki ake tona nima mataʼu ki te lagi, 6 pea neʼe ina fai he fakapapau ʼi te huafa ʼo Ia ʼae ʼe maʼuli ʼo talu ai,+ ʼae neʼe ina fakatupu te lagi mo te ʼu meʼa ʼae ʼi ai, pea mo te kele mo te ʼu meʼa ʼae ʼi ai, pea mo te tai mo te ʼu meʼa ʼae ʼi ai, ʼo ina ui:+ “ ʼE mole toe atalitali anai te ʼAtua. 7 Kae ʼi te ʼu ʼaho ʼae ʼe ʼamanaki pupuhi ai e te fitu ʼaselo+ tana fakatagi pupuhi,+ ʼe hoko moʼoni anai te meʼa fakalilo tapu*+ ʼae neʼe tala e te ʼAtua ohage ko he logo lelei ki ʼana kaugana, te kau polofeta.”+

8 Pea neʼe au logo ki te leʼo mai selo+ ʼe toe palalau mai, ʼo ina ui: “Alu ʼo toʼo ʼi te nima ʼo te ʼaselo ʼae ʼe tuʼu ʼi te tai pea mo te kele te takaiga tohi ʼae neʼe tuku ava.”+ 9 Neʼe au alu ki te ʼaselo pea mo au ui age ke ina foaki mai te kiʼi takaiga tohi. Neʼe ina ui mai: “Toʼo ʼo kai,+ pea ʼe liliu anai ʼo kona ʼi tou fatu, kae ʼe malie anai ohage ko te meli ʼi tou gutu.” 10 Neʼe au toʼo te kiʼi takaiga tohi mai te nima ʼo te ʼaselo ʼo kai,+ pea ʼi toku gutu neʼe malie ohage ko te meli,+ kae ʼi toku fatu neʼe liliu ʼo kona. 11 Pea neʼe au logo ki te ui mai e te leʼo: “ ʼE tonu ke ke toe faifakakikite ʼo ʼuhiga mo te ʼu meʼa ka hoko ki ni hahaʼi, mo ni puleʼaga, mo ni lea pea mo ni hau ʼe tokolahi.”

11 Pea neʼe foaki mai kia au te kaho neʼe hage ko he koga ʼakau,*+ pea neʼe ui e te leʼo: “Tuʼu ake ʼo fuafua te fale lotu* ʼo te ʼAtua pea mo te ʼaletale pea mo lau ia natou ʼae ʼe atolasio ʼi loto. 2 Kae ke ke tuku kehe te malaʼe ʼae ʼi tuʼa ʼo te fale lotu pea ʼaua naʼa ke fuafua, koteʼuhi neʼe foaki ki te ʼu puleʼaga, pea ʼe natou molomoloki anai te kolo tapu+ lolotoga mahina ʼe 42.+ 3 ʼE au fekauʼi anai ʼaku fakamoʼoni ʼe toko lua ke nā faifakakikite lolotoga ʼaho ʼe 1 260 ʼo nā kofuʼi he ʼu taga.”* 4 ʼE fakata te ʼu fakamoʼoni ʼaia ʼe lua e te ʼu fuʼu oliveto ʼe lua+ pea mo te ʼu tuʼulaga malama ʼe lua,+ pea ʼe nā tutuʼu ia muʼa ʼo te ʼAliki ʼo te kele.+

5 Kapau ʼe fia fai e he tahi he meʼa ʼe kovi kia naua, ʼe haʼu mai ʼonā gutu he afi ʼo tutu ʼonā fili. Koia, kapau ʼe fia fai e he tahi he meʼa ʼe kovi kia naua, ʼe tonu anai ke feia tona matehi. 6 ʼE nā maʼu te malohi ʼae ke nā pupunu te lagi+ ke ʼaua naʼa ʼua+ lolotoga te ʼu ʼaho ʼae ʼe nā faifakakikite ai, pea ʼe nā maʼu te malohi ke nā fakaliliu te ʼu vai ʼo toto+ pea ke nā tauteaʼi te kele ʼaki he ʼu malaʼia kehekehe, ʼi te temi fuli pe ʼae ʼe nā loto ki ai.

7 Ka ʼosi tanā faifakakikite, ko te manu fekai ʼae ʼe hake ake mai te vanu, ʼe ina tauʼi anai naua pea mo malo pea ʼe ina matehi anai naua.+ 8 Pea ʼe tuku anai ʼonā sino ʼi te ala lahi ʼo te kolo lahi, ʼae ʼi hona aluʼaga fakata, ʼe fakahigoa ko Sotoma pea mo Esipito, ʼae neʼe toe tutuki ai foki mo tonā ʼAliki ki te pou. 9 Pea ko te hahaʼi ʼo te ʼu lanu, mo te ʼu telepi, mo te ʼu lea pea mo te ʼu puleʼaga kehekehe ʼe natou sisio anai ki ʼonā sino lolotoga ʼaho ʼe tolu vaelua,+ pea ʼe mole natou fakagafua anai ke tuku ʼonā sino ki he fale maka. 10 Pea ʼe fiafia anai ia natou ʼae ʼe nonofo ʼi te kele ʼi tanā kua mamate pea ʼe natou fakafiafia lahi anai, pea ʼe natou femomoliʼaki anai he ʼu meʼa ʼofa, he neʼe fakamamahiʼi e te ʼu polofeta ʼaia ʼe lua ia natou ʼae ʼe nonofo ʼi te kele.

11 Hili te ʼu ʼaho ʼe tolu vaelua, neʼe ulu ia naua te maʼuli* ʼae ʼe haʼu mai te ʼAtua.+ Neʼe nā tutuʼu ake ai pea neʼe matataku ʼaupito ia natou ʼae neʼe sisio kia naua. 12 Pea neʼe nā logo ki he leʼo malohi mai te lagi, ʼe ina ui kia naua: “Kolua hahake mai ki heni.” Neʼe nā hahake ai ki te lagi ʼi te ʼao, pea neʼe sisio ʼonā fili kia naua.* 13 ʼI te hola ʼaia, neʼe hoko te mafuike lahi pea neʼe holo te vahe tahi ki te hogofulu ʼo te kolo. Pea neʼe mamate te toko 7 000 ʼi te mafuike, pea neʼe matataku ai te hahaʼi ʼae neʼe kei toe ʼo natou fakakololiaʼi ai te ʼAtua ʼo te lagi.

14 Kua fakalaka te lua malaʼia.+ Koʼeni, ʼe hoko fakavilivili mai te tolu malaʼia.

15 Neʼe pupuhi e te fitu ʼaselo tana fakatagi pupuhi.+ Pea neʼe ui e te ʼu leʼo malohi ʼi te lagi: “Kua pule ki te malamanei ia te Puleʼaga ʼo totatou ʼAliki+ pea mo tana Kilisito,*+ pea ʼe ʼafio anai ʼo talu ai.”+

16 Pea ko te ʼu tagata ʼafeā ʼe toko 24+ ʼae neʼe heheka ia muʼa ʼo te ʼAtua ʼi ʼonatou hekaʼaga fakahau, neʼe natou tulolo ifo pea mo natou atolasio ki te ʼAtua, 17 ʼo natou ui: “ ʼE matou fakafetaʼi atu, Sehova* ʼAtua, te Mafimafi, ia koe ʼae ʼe maʼuli ʼi te temi nei,+ mo te temi muʼa, koteʼuhi kua ke fakaʼaogaʼi tou malohi lahi moʼo kamata ʼafio.+ 18 Kae neʼe iita te ʼu puleʼaga pea neʼe hoko mai tou hauhau, pea mo te temi ʼae kua fakatuʼutuʼu ke fakamauʼi ai te kau mate, ke fakapale+ ai ʼau kaugana te kau polofeta,+ mo te kau maʼoniʼoni pea mo natou ʼae ʼe manavasiʼi ki tou huafa, natou ʼae ʼe liliki pea mo natou ʼae ʼe lalahi, pea mo maumauʼi ia natou ʼae ʼe natou maumauʼi te kele.”+

19 Pea neʼe avahi te fale lotu* ʼo te ʼAtua ʼae ʼe ʼi selo, pea neʼe au sio ki te aleka ʼo tona fuakava ʼi tona fale lotu.+ Pea neʼe hila, mo mana, mo hoko te mafuike, mo to te ʼuamaka lahi pea mo au logo ki he ʼu leʼo.

12 Pea neʼe ha te fakailoga lahi ʼi te lagi: Ko he fafine+ neʼe kofu ʼaki te laʼa, pea ko te mahina neʼe ʼi ʼona lalo vaʼe, pea ʼi tona ʼulu neʼe ʼi ai he kolona neʼe fai ʼaki he ʼu fetuʼu ʼe 12. 2 Neʼe faitama pea ʼi tana kua vave fanau, neʼe kalaga ʼuhi ko ʼona mamahi fanau.

3 Pea neʼe ha te tahi fakailoga ʼi te lagi. Koʼeni, ko he talakone lahi ʼe lanu kula,+ mo ʼona ʼulu ʼe fitu pea mo ʼona tala ʼe hogofulu pea neʼe ʼi ai he ʼu kolona ʼe fitu ʼi ʼona ʼulu. 4 Pea ʼe toho e tona hiku te vahe tahi ki te tolu ʼo te ʼu fetuʼu+ ʼo te lagi, pea neʼe ina li ifo natou ki te kele.+ Pea neʼe tuʼu te talakone ia muʼa ʼo te fafine+ ʼae kua vave fanau, ke feala ai hana kai te tamasiʼi moka fanauʼi.

5 Pea neʼe ina fanauʼi he kiʼi tama,+ he tamasiʼi tagata, ʼae ka ina takitaki te ʼu puleʼaga fuli ʼaki he toko ukamea.+ Pea neʼe ʼave fakavilivili tana tamasiʼi ki te ʼAtua mo tona hekaʼaga fakahau. 6 Pea neʼe hola te fafine ki te toafa, ki te koga meʼa ʼae neʼe teuteuʼi e te ʼAtua maʼa ia, ke fafaga ai ia ia lolotoga ʼaho ʼe 1 260.+

7 Pea neʼe hoko te tau ʼi selo: Ko Mikaele*+ mo ʼana ʼaselo neʼe natou tauʼi te talakone. Pea neʼe fakafeagai te talakone mo ʼana ʼaselo 8 kae neʼe mole malolohi age natou,* pea neʼe mole kei ʼi ai honatou nofoʼaga ʼi selo. 9 Koia neʼe li ifo ai te talakone lahi,+ te gata ʼafeā,+ ia ia ʼae ʼe higoa ko te Tevolo+ mo Satana,+ ʼae ʼe ina fakaheʼi te kele katoa.+ Neʼe li ifo ia ia ki te kele+ mo ʼana ʼaselo. 10 Pea neʼe au logo ki he leʼo malohi mai te lagi ʼe ina ui:

“ ʼI te temi nei kua hoko mai te haofaki,+ kua fakaha te malohi ʼo totatou ʼAtua, pea kua fakatuʼu tona Puleʼaga+ pea kua kamata pule tana Kilisito,* koteʼuhi kua li ifo ia ia ʼae ʼe ina tukugakoviʼi ʼotatou tehina, ia ia ʼae ʼe ina tukugakoviʼi natou ʼi te ʼaho mo te po ia muʼa ʼo totatou ʼAtua.+ 11 Pea neʼe natou malo ia ia+ ʼuhi ko te taʼataʼa ʼo te Akeno+ pea mo te logo ʼae neʼe natou tala,+ pea neʼe natou tali ke foaki ʼonatou maʼuli*+ pea mo mamate. 12 Koia, ke kotou fiafia ia koutou ʼae ʼe nonofo ʼi selo. Malaʼia ki te kele pea mo te tai,+ koteʼuhi kua hifo atu kia koutou te Tevolo mo tona ita lahi, ʼi tana iloʼi ʼae kua nounou tona temi.”+

13 Pea ʼi te sio ʼa te talakone ʼae kua li ifo ki te kele,+ neʼe ina fakatagaʼi ai te fafine+ ʼae neʼe ina fanauʼi te tamasiʼi tagata. 14 Kae neʼe foaki age ki te fafine te ʼu pakakau ʼe lua ʼo he akuila lahi,+ ke feala ai hana hola ki te toafa ki te koga meʼa ʼae neʼe teuteuʼi maʼa ia, ʼae ka fafaga ai ʼi he temi pea mo he ʼu temi pea mo he vaeluaʼi temi*+ ʼo mamaʼo mai te ʼu mata ʼo te gata.+

15 Pea neʼe luaʼi mai e te gata mai tona gutu he vai ʼe hage ko he vai tafe ia tuʼa ʼo te fafine, ke tupu ai hana malemo. 16 Kae neʼe haofaki e te kele ia te fafine, pea neʼe avahi e te kele tona gutu ʼo folo te vai tafe ʼae neʼe luaʼi mai e te talakone mai tona gutu. 17 Koia neʼe kovi ai te ita ʼo te talakone ki te fafine, pea neʼe alu ai ʼo tauʼi te toe ʼo tona hakoga,+ ʼae ʼe natou mulimuli ki te ʼu fakatotonu ʼa te ʼAtua pea mo natou maʼu te gaue ʼae ko te fakamoʼoni ʼo ʼuhiga mo Sesu.+

13 Pea neʼe tuʼu* ʼi te ʼone ʼo te tai.

Pea neʼe au sio ki he manu fekai+ ʼe hake ake mai te tai.+ Neʼe ʼi ai ʼona tala ʼe hogofulu pea mo ʼona ʼulu ʼe fitu, pea neʼe ʼi ai he ʼu kolona ʼe hogofulu ʼi ʼona tala, kae ʼi ʼona ʼulu ʼe tohi ai he ʼu higoa ʼe laukovi ki te ʼAtua. 2 Pea ko te manu fekai ʼae neʼe au sio ki ai neʼe hage ko he leopa,* kae ko ʼona vaʼe neʼe hage ko te ʼu vaʼe ʼo he uluso, pea ko tona gutu neʼe hage ko te gutu ʼo he laione. Pea neʼe maʼu e te manu fekai tona malohi, mo tona hekaʼaga fakahau, pea mo he pule lahi+ mai te talakone.+

3 Pea neʼe au sio ki te tahi ʼo ʼona ʼulu neʼe hage neʼe lavea kovi, kae neʼe mole tona lavea kovi ʼaia,+ pea neʼe muliʼi e te hahaʼi fuli ʼo te kele te manu fekai ʼo natou vikiʼi ia ia. 4 Pea neʼe natou atolasio ki te talakone koteʼuhi neʼe ina foaki te pule ki te manu fekai, pea neʼe natou atolasio ki te manu fekai ʼo natou ui: “Ko ai ʼae ʼe hage ko te manu fekai, pea mo ina lava tauʼi ia ia?” 5 Neʼe ina maʼu te pule ke palalau fialahi ai pea mo palalau kovi ʼo ʼuhiga mo te ʼu meʼa taputapu, pea ke ina fai te meʼa ʼae ʼe loto ki ai lolotoga mahina ʼe 42.+ 6 Pea neʼe ina avahi tona gutu ʼo palalau kovi+ ki te ʼAtua, mo palalau kovi ki tona huafa, mo tona nofoʼaga, pea mo natou ʼae ʼe nonofo ʼi selo.+ 7 Pea neʼe fakagafua age ke ina tauʼi te kau maʼoniʼoni pea mo malo ia natou,+ pea neʼe foaki age kia ia te pule ki te ʼu telepi fuli, mo te hahaʼi fuli, mo te ʼu lea fuli, pea mo te ʼu puleʼaga fuli. 8 Pea ko natou fuli ʼae ʼe nonofo ʼi te kele ʼe natou atolasio anai kia ia. Talu mai te kamataʼaga ʼo te malamanei,* neʼe mole ʼi ai he higoa ʼe tahi ʼi ʼonatou higoa neʼe tohi ʼi te takaiga tohi ʼo te maʼuli.+ ʼE ko te tohi ʼaia ʼa te Akeno ʼae neʼe matehi.+

9 Ko ʼae ʼe ʼi ai ʼona taliga ke fagono.+ 10 Kapau ʼe tonu ke pilisoniʼi he tahi pea ʼe pilisoniʼi anai. Pea ko ia ʼae ʼe ina matehi he tahi ʼaki he heleta,* ʼe tonu anai ke matehi ia ia ʼaki te heleta.+ Koia ʼe ʼaoga ki te kau maʼoniʼoni+ ke natou faʼa kataki+ pea mo tui.+

11 Pea neʼe au sio ki he tahi age manu fekai ʼe hake ake mai te kele, ʼe ʼi ai ʼona tala ʼe lua ohage ko he akeno, kae neʼe kamata palalau ia ohage ko he talakone.+ 12 ʼE ina fakaʼaogaʼi te pule katoa ʼo te ʼuluaki manu fekai+ ʼi ʼona muʼa. Pea ʼe ina fakakinauʼi te kele pea mo te hahaʼi ke natou atolasio ki te ʼuluaki manu fekai, ʼae neʼe lavea kovi kae kua mole.+ 13 Pea ʼe ina fai te ʼu fakailoga lalahi, pea mo ina fakahifo mai te lagi he afi ki te kele ia muʼa ʼo te tagata fuli.

14 Pea ʼe ina fakaheʼi ia natou ʼae ʼe nonofo ʼi te kele ʼaki te ʼu fakailoga ʼae neʼe fakagafua age ke ina fai ia muʼa ʼo te manu fekai, pea ʼe ina ui age kia natou ʼae ʼe nonofo ʼi te kele ke natou faʼu he fakatata+ ʼo te manu fekai ʼae neʼe lavea ʼi te heleta pea kua toe maʼuli.+ 15 Pea neʼe fakagafua age ke ina foaki te maʼuli* ki te fakatata ʼo te manu fekai, ke feala ai ki te fakatata ʼo te manu fekai ke palalau pea mo ina fakatotonu ke matehi ia natou fuli ʼae ʼe fakafisi ke atolasio ki te fakatata ʼo te manu fekai.

16 Pea ʼe ina fakakinauʼi te hahaʼi fuli, ia natou ʼae ʼe liliki pea mo natou ʼae ʼe lalahi, ia natou ʼae ʼe maʼu koloa pea mo natou ʼae ʼe masisiva, ia natou ʼae ʼe ʼateaina pea mo natou ʼae ʼe kaugana, ke fakailoga ʼonatou nima mataʼu peʼe ko ʼonatou laʼe,+ 17 pea ʼe mole feala ki he tahi ke faifakatau peʼe fakatau koloa gata pe kia ia ʼae ʼe ina maʼu te fakailoga, te higoa+ ʼo te manu fekai peʼe ko te numelo ʼo tona higoa.+ 18 ʼE gata pe kia ia ʼae ʼe ina maʼu te poto ʼe mahino anai ki te faʼahi ʼaeni: Ko ia ʼae ʼe fakasiosio poto ke ina fakafuafua te numelo ʼo te manu fekai, he ʼe ko te numelo fakatagata, pea ko tona numelo ʼe ko te 666.+

14 Pea neʼe au sio, koʼeni te Akeno+ ʼe tuʼu ʼi te Moʼuga ʼo Sione,+ pea mo te toko 144 000+ ʼae neʼe tohi ʼi ʼonatou laʼe tona huafa pea mo te huafa ʼo tana Tamai.+ 2 Neʼe au logo ki he logoaʼa ʼe haʼu mai te lagi ʼe hage ko te logoaʼa ʼo te tafe malohi ʼo te ʼu vai, pea mo te ʼuʼulu ʼo te mana, pea ko te logoaʼa ʼae neʼe au logo ki ai neʼe hage ko te leʼo ʼo he kau hiva ʼe natou ta alepa. 3 Pea ʼe natou hiva he katiko ʼe hage ko he katiko foʼou+ ia muʼa ʼo te hekaʼaga fakahau, pea mo te ʼu kelupimi ʼe toko fa,+ pea mo te ʼu tagata ʼafeā,+ pea neʼe mole ʼi ai he tahi neʼe feala ke ina ako fakalelei te hiva ʼaia gata pe ki te toko 144 000,+ ʼae neʼe totogi mai te kele. 4 Ko natou ʼaia neʼe mole natou ʼulihi ia natou mo he ʼu fafine, ʼe natou maʼa.+ Ko natou ʼaia ʼe natou mulimuli ʼi te Akeno ʼi te ʼu potu fuli ʼae ʼe alu ki ai.+ Ko natou ʼaia neʼe totogi+ mai te malamanei ohage ko he ʼu ʼuluaki fua+ maʼa te ʼAtua pea mo te Akeno, 5 pea neʼe mole maʼu he kaka ʼi ʼonatou gutu. ʼE natou heʼe mele.+

6 Pea neʼe au sio ki he tahi ʼaselo ʼe lele ʼi te lagi, pea neʼe ina maʼu he logo lelei ʼe heʼe gata ke ina tala kia natou ʼae ʼe nonofo ʼi te kele, ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli.+ 7 Pea neʼe ina ui leʼo lahi: “Kotou manavasiʼi ki te ʼAtua pea mo fakakololiaʼi ia ia, koteʼuhi kua hoko mai te hola ʼo tana fakamau.+ Koia kotou atolasio kia Ia ʼae neʼe ina fakatupu te lagi, mo te kele, mo te tai,+ pea mo te ʼu matapuna vai.”

8 Pea neʼe muli mai te lua ʼaselo, ʼo ina ui: “Kua to ia ia! Kua to+ ia Papiloni Lahi,+ ʼae neʼe ina fakainu ki te ʼu puleʼaga fuli te vino ʼo ʼana felaveʼi fakasino heʼe ʼaoga.”*+

9 Pea neʼe muli mai ia naua te tolu ʼaselo, ʼo ina ui leʼo lahi: “Kapau ʼe atolasio he tahi ki te manu fekai,+ mo tona fakatata, pea mo ina maʼu he fakailoga ʼi tona laʼe peʼe ʼi tona nima,+ 10 ʼe inu anai mo ia ki te vino ʼo te hauhau ʼo te ʼAtua. ʼE ko te vino ʼae neʼe mole huʼi ʼae ʼe huaʼi e te ʼAtua ki te ipu ʼo Tona hauhau.+ Pea ʼe fakamamahiʼi anai ia ia ʼaki te afi pea mo te sulifa*+ ia muʼa ʼo te kau ʼaselo maʼoniʼoni pea mo te Akeno. 11 Pea ko te kohu ʼo te afi ʼae ʼe ina fakamamahiʼi natou, ʼe hake ʼo talu ai,+ pea ʼi te ʼaho mo te po ʼe mole natou malolo anai, ia natou ʼae ʼe atolasio ki te manu fekai, mo tona fakatata, pea mo natou ʼae ʼe natou maʼu te fakailoga ʼo tona higoa.+ 12 Koia ʼe ʼaoga ke faʼa kataki te kau maʼoniʼoni,+ ia natou ʼae ʼe mulimuli ki te ʼu fakatotonu ʼa te ʼAtua pea mo natou taupau malohi te tui+ kia* Sesu.”

13 Pea neʼe au logo ki he leʼo mai te lagi ʼe ina ui: “Tohi: Fiafia ia natou ʼae ʼe mamate ʼo fakatahi mo te ʼAliki+ ʼo kamata atu ʼi te temi nei. ʼEi, ʼe ui e te laumalie ʼo te ʼAtua, ke natou malolo mai tanatou gaue kinakina, koteʼuhi ʼe mole galo anai* te ʼu gaue ʼae neʼe natou fai.”

14 Pea neʼe au sio, koʼeni he ʼao hina, pea ʼe heka ʼi te ʼao ʼaia he tahi ʼe hage ko he foha ʼo te tagata,+ mo he kolona aulo ʼi tona ʼulu, pea mo he hele piko masila ʼi tona nima.

15 Pea neʼe haʼu te tahi ʼaselo mai te fale lotu,* ʼo kalaga leʼo lahi kia ia ʼae ʼe heka ʼi te ʼao: “Toʼo tau hele piko ʼo tuʼusi te ʼu fua, koteʼuhi kua hoko mai te hola ʼae ʼe tonu ke tuʼusi ai, he ʼe kua matutuʼa te taʼukai ʼo te kele.”+ 16 Pea ko ia ʼae neʼe heka ʼi te ʼao neʼe ina fakaʼaogaʼi tana hele piko ki te kele, pea neʼe tanaki ai te taʼukai ʼo te kele.

17 Pea neʼe haʼu te tahi ʼaselo mai te fale lotu ʼae ʼi selo, pea mo ia foki neʼe ina toʼo he hele piko masila ʼi tona nima.

18 Pea neʼe haʼu mo te tahi ʼaselo mai te ʼaletale, pea neʼe ina maʼu te pule ki te afi. Pea neʼe kalaga leʼo lahi kia ia ʼae ʼe ina maʼu te hele piko masila: “Toʼo tau hele piko masila pea mo toli te ʼu fuhiga vite ʼo te fuʼu vite ʼo te kele, koteʼuhi kua momoho ʼona fuaʼi vite.”+ 19 Pea neʼe fakaʼaogaʼi e te ʼaselo tana hele piko ki te kele, ʼo ina tuʼusi te fuʼu vite ʼo te kele, pea mo ina laku ki te lomiʼaga vite lahi ʼo te hauhau ʼo te ʼAtua.+ 20 Pea neʼe molomoloki te vite ʼae ʼi te lomiʼaga vite ʼi te tuʼa kolo, pea neʼe hali te toto mai te lomiʼaga vite ʼo kaku ki te ʼu fakagutu ʼo te ʼu hosi ia kilometa ʼe 296.*

15 Pea neʼe au sio ki te tahi fakailoga lahi mo fakaofoofo ʼi te lagi, ko ʼaselo ʼe toko fitu+ ʼe ʼomai mo te ʼu tautea ʼe fitu. Ko te ʼu tautea fakamuli ʼaia, koteʼuhi ʼe fakaʼosi ai te hauhau ʼo te ʼAtua.+

2 Pea neʼe au sio ki he meʼa neʼe hage ko he tai neʼe tatau mo te sioʼata,+ neʼe fio ʼaki te afi. Pea ko natou ʼae neʼe malo+ ʼi te manu fekai mo tona fakatata+ pea mo tona higoa ʼae ʼe ko he numelo,+ neʼe tutuʼu ovi ki te tai ʼae neʼe tatau mo te sioʼata, ʼo natou toʼo te ʼu alepa ʼa te ʼAtua. 3 Pea neʼe natou hiva te katiko ʼa Moisese,+ te tagata kaugana ʼa te ʼAtua pea mo te katiko ʼa te Akeno:+

“Sehova* ʼAtua, te Mafimafi,+ ʼe lahi mo fakaofoofo ʼau gaue.+ Ko koe te Hau ʼae ʼe heʼe gata,+ pea ʼe faitotonu mo moʼoni ʼou ala.+ 4 Sehova* e, ko ai koa ʼae ʼe mole manavasiʼi moʼoni anai kia te koe pea mo fakakololiaʼi tou huafa? He ʼe ko koe tokotahi pe ʼe agatonu.+ ʼE ʼomai anai te ʼu puleʼaga fuli ʼo atolasio ʼi ʼou muʼa,+ he ʼe kua fakaha ʼau fakamau faitotonu.”

5 ʼOsi ʼaia neʼe au sio, neʼe avahi ʼi selo+ te fale lotu* ʼo te tapenakulo,*+ 6 pea neʼe ʼomai mai te fale lotu te ʼu ʼaselo ʼae ʼe toko fitu mo te ʼu tautea ʼe fitu,+ neʼe natou tui he teu lino* ʼe maʼa mo gigila pea mo natou ʼai he ʼu kiliʼi pipi aulo ʼi ʼonatou fatafata. 7 Pea ko te tahi ʼi te ʼu kelupimi ʼe toko fa neʼe ina ʼavage ki te ʼu ʼaselo ʼe toko fitu he ʼu ipu aulo ʼe fitu ʼe fonu ai ko te hauhau ʼo te ʼAtua,+ ʼae ʼe maʼuli ʼo talu ai. 8 Pea neʼe fonu te fale lotu ko te kohu ʼuhi ko te kololia ʼo te ʼAtua+ mo tona malohi, pea neʼe mole feala ki he tahi ke ulu ki te fale lotu ʼo aʼu ki te ʼosi ʼo te ʼu tautea ʼe fitu+ ʼae neʼe fakahoko e te ʼu ʼaselo ʼe toko fitu.

16 Pea neʼe au logo ki te leʼo malohi ʼe haʼu mai te fale lotu,*+ ʼe ina ui ki te ʼu ʼaselo ʼe toko fitu: “Kotou olo ʼo huaʼi te ʼu ipu ʼe fitu ʼo te hauhau ʼo te ʼAtua ki te kele.”+

2 Neʼe alu ai te ʼuluaki ʼaselo ʼo huaʼi tona ipu ki te kele.+ Pea ko te hahaʼi ʼae neʼe natou maʼu te fakailoga ʼo te manu fekai+ pea mo atolasio ki tona fakatata,+ neʼe fakamamahiʼi natou ʼaki he papala kovi mo fakamataku.+

3 Neʼe huaʼi e te lua ʼaselo tona ipu ki te tai.+ Pea neʼe liliu ai te tai ʼo toto ohage ko te toto+ ʼo he tagata kua mate, pea neʼe mamate te ʼu meʼa maʼuli* fuli ʼae ʼi te tai.+

4 Neʼe huaʼi e te tolu ʼaselo tona ipu ki te ʼu vai tafe pea mo te ʼu matapuna vai.+ Pea neʼe natou liliu ai ʼo toto.+ 5 Neʼe au logo leva ki te ui e te ʼaselo ʼae ʼe pule ki te ʼu vai: “ ʼE ke faitotonu, ia koe ʼae ʼe maʼuli ʼi te temi nei, mo te temi muʼa,+ ʼae ʼe agatonu,+ koteʼuhi neʼe ke fai te ʼu fakamau ʼaia.+ 6 Neʼe natou liligi te toto ʼo te kau maʼoniʼoni pea mo te kau polofeta,+ koia neʼe ke foaki age kia natou te toto ke natou inu,+ pea ʼe tuha mo natou te faʼahi ʼaia.”+ 7 Pea neʼe au logo ki he leʼo ʼe haʼu mai te ʼaletale, ʼe ina ui: “ ʼEi, Sehova* ʼAtua, te Mafimafi,+ ʼe moʼoni mo faitotonu ʼau fakamau.”+

8 Neʼe huaʼi e te fa ʼaselo tona ipu ki te laʼa,+ pea neʼe fakagafua ki te laʼa ke momofi vela ki te hahaʼi. 9 Pea neʼe mamahi te hahaʼi ʼi te momofi ʼo te vela, kae neʼe natou laukovi ki te huafa ʼo te ʼAtua, ʼae ʼe pule ki te ʼu tautea ʼaia, pea neʼe mole natou fakahemala pea mo fakakololia kia te ia.

10 Neʼe huaʼi e te nima ʼaselo tona ipu ki te hekaʼaga fakahau ʼo te manu fekai. Pea neʼe fakapoʼuli tona puleʼaga,+ pea neʼe kamata ʼusiʼusiʼi ai e te hahaʼi ʼonatou ʼalelo ʼi tonatou mamahi, 11 kae neʼe natou laukovi ki te ʼAtua ʼo te lagi, ʼuhi ko ʼonatou mamahi mo ʼonatou papala pea neʼe mole natou fakahemala mai ʼanatou gaue.

12 Neʼe huaʼi e te ono ʼaselo tona ipu ki te vai tafe lahi ko Efalate,+ pea neʼe mamaha te vai tafe+ ke teuteuʼi ai te ala ki te ʼu hau+ ʼae ʼe ʼomai mai te hopoʼaga ʼo te laʼa.*

13 Pea neʼe au sio ʼe haʼu mai te gutu ʼo te talakone,+ mo te gutu ʼo te manu fekai pea mo te gutu ʼo te polofeta loi ni folafola ʼuli* ʼe tolu ʼe natou hage ko ni kelenui. 14 ʼI tona fakahagatonu, ʼe ko ni folafola ʼe haʼu mai te ʼu temonio pea neʼe logo ki ai te ʼu hau ʼo te kele katoa. ʼE fakahoko e te ʼu folafola ʼaia he ʼu fakailoga+ pea mo natou fakatahitahiʼi te ʼu hau ki te tau+ ʼo te ʼaho lahi ʼo te ʼAtua te Mafimafi.+

15 “Koʼeni, ʼe au haʼu ohage ko he tagata kaihaʼa.+ Fiafia ia ia ʼae ʼe nofo ʼalaʼala+ pea mo ina taupau ʼona kofu tuʼa, ke ʼaua naʼa haʼele telefua pea mo sisio te hahaʼi ki tona ufiufi.”+

16 Pea neʼe fakatahitahiʼi e te ʼu folafola ʼaia te ʼu hau ki te koga meʼa ʼe higoa ko Alamaketone* ʼi te Fakahepeleo.+

17 Neʼe huaʼi e te fitu ʼaselo tona ipu ki te ʼaele. Pea neʼe ui e te leʼo neʼe haʼu mai te fale lotu,*+ mai te hekaʼaga fakahau: “Kua hoko!” 18 Pea neʼe mana, mo hila, pea neʼe au logo ki he ʼu leʼo pea neʼe hoko te mafuike lahi mo fakamataku neʼe heʼeki hoko talu mai te fakatupu ʼo te tagata ʼi te kele.+ 19 Neʼe mafahi tolu te kolo lahi,+ pea neʼe maumau te ʼu kolo ʼo te ʼu puleʼaga. Pea neʼe manatuʼi e te ʼAtua ia Papiloni Lahi,+ ke ina foaki ki ai te ipu vino ʼo tona hauhau lahi.+ 20 Neʼe feholaki foki mo te ʼatu motu fuli, pea neʼe puli te ʼu moʼuga.+ 21 Pea neʼe to ifo mai te lagi ki te hahaʼi te toe ʼuamaka lahi, pea ko te mamafa ʼo te foʼi maka ʼe tahi ʼe tatau mo te mamafa ʼo he taleta* ʼe tahi,+ pea neʼe laukovi te hahaʼi ki te ʼAtua ʼuhi ko te tautea ʼo te ʼuamaka,+ he neʼe lahi ʼaupito te tautea ʼaia.

17 Ko te tahi ʼi te ʼu ʼaselo ʼe toko fitu ʼae neʼe natou toʼo te ʼu ipu ʼe fitu,+ neʼe haʼu pea neʼe ina ui mai: “Haʼu pea ʼe au fakaha atu anai te tautea ʼo te fafine paomutu iloa ʼae ʼe heka ʼi te ʼu vai,+ 2 pea neʼe fai e te ʼu hau ʼo te kele he ʼu felaveʼi fakasino heʼe ʼaoga* mo ia,+ pea neʼe konahihia te hahaʼi ʼo te kele ʼi te vino ʼo ʼana felaveʼi fakasino heʼe ʼaoga.”*+

3 Pea neʼe ina ʼave au ki te toafa ʼaki te malohi ʼo te laumalie ʼo te ʼAtua. Pea neʼe au sio ki he fafine ʼe heka ʼi he manu fekai lanu kula ʼe fonu ko te ʼu higoa ʼe laukovi ki te ʼAtua, pea ʼe ʼi ai ʼona ʼulu ʼe fitu pea mo ʼona tala ʼe hogofulu. 4 Neʼe kofuʼi e te fafine te teu huʼa lotuma fakapoʼuli+ pea mo kula, pea neʼe ina fakamataleleiʼi ia ia ʼaki ni meʼa gigila aulo, mo ni maka maʼuhiga pea mo ni mataʼi tofe,+ pea neʼe ina toʼo ʼi tona nima he ipu aulo neʼe fonu ai ko te ʼu meʼa fakalialia pea mo te ʼu meʼa heʼe maʼa ʼo ʼana felaveʼi fakasino heʼe ʼaoga.* 5 Neʼe tohi ʼi tona laʼe he higoa, ko te higoa ʼaia ʼe ko he misitelio: “Papiloni Lahi, te faʼe ʼa te ʼu fafine paomutu+ pea mo te ʼu meʼa fakalialia ʼo te kele.”+ 6 Pea neʼe au sio neʼe konahia te fafine ʼaia ʼi te toto ʼo te kau maʼoniʼoni pea mo te toto ʼo te kau fakamoʼoni ʼa Sesu.+

Neʼe au punamaʼuli ʼaupito ʼi taku sio ki te fafine. 7 Pea neʼe ui mai e te ʼaselo: “He koʼe koa ʼe ke punamaʼuli? ʼE au fakamahino atu anai te misitelio ʼo te fafine ʼaia+ pea mo te manu fekai ʼae ʼe heka ai, ʼae ʼe ʼi ai ʼona ʼulu ʼe fitu pea mo ʼona tala ʼe hogofulu:+ 8 Ko te manu fekai ʼae neʼe ke sio ki ai, neʼe maʼuli pea kua puli ʼi te temi nei. Kae ʼe ʼamanaki hake ake anai mai te vanu+ pea ʼe fakaʼauha anai ia. Pea ko te hahaʼi ʼo te kele, ʼae neʼe mole tohi ʼonatou higoa ʼi te takaiga tohi ʼo te maʼuli+ talu mai te kamataʼaga ʼo te malamanei,* ʼe natou punamaʼuli anai ʼi tanatou sisio ki te manu fekai ʼaia koteʼuhi neʼe maʼuli, pea kua puli ʼi te temi nei, kae ʼe toe ha anai.

9 “ ʼE ʼaoga te ʼatamai mo te poto ki te hahaʼi ke natou mahino ki te faʼahi ʼaeni: ʼE fakata e te ʼu ʼulu ʼe fitu+ ia te ʼu moʼuga ʼe fitu, ʼae ʼe heka ai te fafine. 10 Pea ʼe natou fakata te ʼu hau ʼe toko fitu: Ko te toko nima kua to, pea kei tuʼu te tahi, pea ʼe heʼeki haʼu te tahi. Kae ka haʼu anai, ʼe tonu ke nofo ʼi he kiʼi temi nounou pe. 11 Pea ko te manu fekai ʼae neʼe maʼuli pea kua puli ʼi te temi nei,+ ʼe ko ia ko te valu hau, kae ʼe haʼu mai te ʼu hau ʼe toko fitu pea ʼe fakaʼauha anai.

12 “Ko te ʼu tala ʼe hogofulu ʼae neʼe ke sio ki ai ʼe natou fakata te ʼu hau ʼe toko hogofulu ʼe heʼeki natou pule, kae ʼe foaki anai kia natou te pule fakahau lolotoga he hola ʼe tahi ʼo fakatahi mo te manu fekai. 13 ʼE natou manatu tahi, pea ʼe natou foaki tonatou malohi mo tanatou pule ki te manu fekai. 14 ʼE natou tauʼi anai te Akeno,+ kae ʼe malo anai ia natou koteʼuhi ʼe ko ia te ʼAliki ʼo te ʼu ʼaliki pea mo te Hau ʼo te ʼu hau.+ ʼE toe malo foki anai mo natou ʼae ʼe kau mo te Akeno,+ ia natou ʼae neʼe pauʼi, mo filifili pea mo agatonu.”+

15 Neʼe toe ui mai e te ʼaselo: “Ko te ʼu vai ʼae neʼe ke sio ki ai, ʼae ʼe heka ai te fafine paomutu, ʼe natou fakata te ʼu lanu, mo te hahaʼi kaugamalie, mo te ʼu puleʼaga, pea mo te ʼu lea.+ 16 Pea ko te ʼu tala ʼe hogofulu+ ʼae neʼe ke sio ki ai pea mo te manu fekai,+ ʼe natou fehihiʼa anai ʼi te fafine paomutu,+ pea ʼe natou toʼo anai ʼana meʼa fuli pea mo tuku telefua ia ia, pea ʼe natou kai anai tona kakano pea mo tutu katoa ia ia ʼaki te afi.+ 17 Koteʼuhi neʼe ʼai e te ʼAtua ki ʼonatou loto te manatu ʼae ke natou fakahoko tana fakatuʼutuʼu,+ ʼei, ke natou fakahoko tanatou fakatuʼutuʼu ʼaki tanatou foaki tanatou pule fakahau ki te manu fekai,+ ʼo aʼu ki te temi ʼae ka fakahoko ai anai te ʼu folafola ʼa te ʼAtua. 18 Pea ko te fafine+ ʼae neʼe ke sio ki ai ʼe ina fakata te kolo lahi pea ʼe pule ki te ʼu hau ʼo te kele.”

18 Hili ʼaia, neʼe au sio ki he tahi ʼaselo ʼe ina maʼu he pule lahi, ʼe hifo mai te lagi, pea neʼe malamagia te kele ʼi tona kololia. 2 Pea neʼe kalaga ʼaki he leʼo lahi: “Kua to ia ia! Kua to ia Papiloni Lahi,+ pea kua liliu ko he nofoʼaga ʼo te kau temonio pea mo he koga meʼa ʼe fenonoʼi ai te kau temonio pea mo te ʼu manulele fuli ʼae ʼe heʼe maʼa mo fehiʼaʼinaʼi!+ 3 Koteʼuhi kua konahihia te ʼu puleʼaga fuli ʼi te vino ʼo ʼana felaveʼi fakasino heʼe ʼaoga,*+ pea neʼe fai e te ʼu hau ʼo te kele he ʼu felaveʼi fakasino heʼe ʼaoga mo ia,+ pea neʼe maʼu koloa te hahaʼi fakatau koloa* ʼo te kele ʼuhi ko te ʼu tuʼuga koloa ʼae neʼe tanaki e te fafine ʼaia pea neʼe mole ufiufi ai.”

4 Pea neʼe au logo ki he tahi leʼo mai te lagi ʼe ina ui: “Siʼaku hahaʼi, kotou mavae mai ia ia,+ mo kapau ʼe mole kotou fia kau mo ia ki ʼana agahala, pea mo kapau ʼe mole kotou loto ke hoko kia koutou he koga ʼo ʼona tautea.+ 5 Koteʼuhi kua lahi ʼana agahala ʼo kaku ki te lagi,+ pea neʼe manatuʼi e te ʼAtua ʼana gaue heʼe faitotonu.*+ 6 Kotou liufaki age ki ai te aga ʼae neʼe ina fai ki te hahaʼi,+ ʼei, kotou liufaki age ki ai ʼo liuga lua te ʼu meʼa ʼae neʼe ina fai.+ ʼI te ipu+ ʼae neʼe ina teuteuʼi ai he meʼa inu, kotou teuteuʼi ʼo liuga lua he meʼa inu maʼa ia.+ 7 Ke lahi tona mamahi pea mo tona lotomamahi ohage pe ko tana fakakololiaʼi ia ia totonu pea mo tana maʼuli koloaʼia ʼo mole ufiufi ai. Koteʼuhi ʼe ina haga ui ʼi tona loto: ‘ ʼE au ʼafio ohage ko he fineʼaliki, ʼe mole au vitua, pea ʼe mole au lotomamahi anai ʼi he temi.’+ 8 Koia, ʼi he ʼaho pe ʼe tahi, ʼe hoko mai anai kia ia ʼona tautea, ʼae ʼe ko te mate, mo te putu pea mo te hoge pea ʼe tutu katoa anai ia ia ʼaki te afi,+ koteʼuhi ʼe malohi ia Sehova* ʼAtua, ʼae neʼe ina fakamauʼi ia ia.+

9 “Pea ko te ʼu hau ʼo te kele ʼae neʼe natou fai he ʼu felaveʼi fakasino heʼe ʼaoga* mo ia pea mo maʼuʼuli mo ia ʼi ʼona tuʼuga koloa ʼae ʼe mole ufiufi ai, ʼe natou fetagihi anai pea mo tuki fatafata ʼi tonatou lotomamahi ʼo ʼuhiga mo ia, ʼi tanatou sisio ʼae ki te kohu ʼo tona vela. 10 ʼE natou tutuʼu anai mai mamaʼo ʼuhi ko tanatou matataku ʼi tona mamahi pea mo natou ui: ‘ ʼI meʼa fakaʼofaʼofa leva, ʼi meʼa fakaʼofaʼofa leva te meʼa ʼaeni kua hoko kia koe, Papiloni, te kolo lahi+ pea mo malohi, koteʼuhi neʼe tauteaʼi koe ʼi he hola pe ʼe tahi!’

11 “ ʼE toe fetagihi mo lotomamahi foki mo te hahaʼi fakatau koloa ʼo te kele ʼo ʼuhiga mo ia, koteʼuhi ʼe mole kei totogi e he tahi ʼonatou tuʼuga koloa: 12 te aulo, mo te siliva, mo te ʼu maka maʼuhiga, mo te ʼu mataʼi tofe, mo te ʼu kie lino, mo te ʼu kie huʼa lotuma fakapoʼuli, mo silika pea mo kula, pea mo te ʼu meʼa fuli ʼae ʼe fai ʼaki te ʼu ʼakau magoni, mo te ʼu meʼa fuli ʼae ʼe fai ʼaki te ivuale,* mo te ʼu ʼakau maʼuhiga, mo te kapa, mo te ukamea pea mo te maka matalelei, 13 pea mo te kasia,* mo te faʼahiga logologoago mai Initia, mo te iseso, mo te lolo magoni, mo te iseso hina,* mo te vino, mo te lolo oliveto, mo te falena ʼae ʼe lelei, mo te fulumeto, mo te ʼu faga pipi, mo te ʼu faga ovi, mo te ʼu hosi, mo te ʼu saliote, mo te ʼu kaugana pea mo te hahaʼi.* 14 ʼEi, kua mamaʼo mai ia koe te ʼu meʼa lelei ʼae neʼe ke* holi ki ai, pea kua puli io koe te ʼu meʼa kai kano lelei fuli mo te ʼu meʼa taulekaleka fuli, pea ʼe mole toe maʼu anai ʼi he temi.

15 “Ko te hahaʼi fakatau koloa ʼae neʼe natou fakatau te ʼu koloa ʼaia pea mo natou maʼu paʼaga ʼuhi ko ia, ʼe natou tutuʼu anai mai mamaʼo ʼuhi ko tanatou matataku ʼi tona mamahi pea ʼe natou fetagihi anai mo lotomamahi, 16 ʼo natou ui: ‘ ʼI meʼa fakaʼofaʼofa leva, ʼi meʼa fakaʼofaʼofa leva te meʼa ʼaeni kua hoko ki te kolo lahi, ʼae neʼe ina kofuʼi te ʼu teu lino, mo huʼa lotuma fakapoʼuli pea mo kula, pea neʼe ina fakamataleleiʼi ia ia ʼaki te ʼu meʼa aulo, mo te ʼu maka maʼuhiga pea mo te ʼu mataʼi tofe!+ 17 Neʼe maumauʼi te ʼu tuʼuga koloa ʼaia ʼi he hola pe ʼe tahi!’

“Pea neʼe tutuʼu mai mamaʼo te ʼu kapiteni vaka fuli, mo te hahaʼi folau vaka, mo te kau vaka pea mo te hahaʼi fuli ʼae ʼe maʼuʼuli ki te tai, 18 pea neʼe natou kalaga ʼi tanatou sisio ki te kohu ʼo tona vela: ‘ ʼE ʼi ai koa he tahi age kolo ʼe tatau mo te kolo lahi ʼaeni?’ 19 Neʼe natou laku te efu ki ʼonatou ʼulu, mo fetagihi, mo lotomamahi pea mo kalaga: ‘ ʼI meʼa fakaʼofaʼofa leva, ʼi meʼa fakaʼofaʼofa leva te meʼa ʼaeni kua hoko ki te kolo lahi, ʼae neʼe liliu ai te hahaʼi fuli ʼae ʼe maʼu vaka ʼo koloaʼia ʼuhi ko ʼona tuʼuga koloa! Neʼe maumauʼi ia ia ʼi he hola pe ʼe tahi!’+

20 “Kotou fakafiafia ʼo ʼuhiga mo te meʼa ʼae neʼe hoko kia ia, ia koutou ʼae ʼi selo+ pea mo koutou kau maʼoniʼoni,+ ʼo feia mo te kau apositolo pea mo te kau polofeta, koteʼuhi kua fakamauʼi ia ia e te ʼAtua ʼuhi ko te ʼu meʼa ʼae neʼe ina fai kia koutou!”+

21 Pea neʼe hiki e te ʼaselo malohi he maka lahi neʼe hage ko he maka momosi fulumeto pea neʼe ina li ki te tai, ʼo ina ui: “ ʼE li tuʼa tahi feia anai ia Papiloni te kolo lahi, pea ʼe mole toe maʼu anai ia ia.+ 22 Pea ʼe mole toe logo anai io koe, Papiloni, te hiva ʼo te kau hiva ʼae ʼe ta alepa, mo he tahi ʼe faimaholo, mo puhi fagufagu pea mo pupuhi he fakatagi pupuhi. Pea ʼe mole toe gaue anai io koe he tagata tufuga, pea ʼe mole toe logo anai io koe he tahi ʼe ina momosi te fulumeto. 23 ʼE mole toe mu anai io koe he malama, pea ʼe mole toe logo anai io koe te ʼu leʼo ʼo te tagata mo te fafine ʼae neʼe hoki ʼohoana age pe, koteʼuhi ko ʼau hahaʼi fakatau koloa neʼe ko ni tagata maʼu tuʼulaga ʼo te kele, pea neʼe ke fakaheʼi te ʼu puleʼaga fuli ʼuhi ko ʼau gaue faifakalauʼakau.+ 24 ʼEi, neʼe maʼu ʼi te kolo ʼaia te toto ʼo te kau polofeta, mo te kau maʼoniʼoni+ pea mo natou fuli ʼae neʼe matehi ʼi te kele.”+

19 Hili ʼaia, neʼe au logo ki he meʼa neʼe hage ko he leʼo malohi ʼo he kaugamalie ʼi selo. Neʼe natou ui: “Kotou fakavikiviki kia Sehova!*+ Ko te haofaki, mo te kololia pea mo te malohi ʼe ʼa totatou ʼAtua, 2 koteʼuhi ʼe moʼoni pea mo faitotonu ʼana fakamau.+ Koteʼuhi neʼe ina tauteaʼi te fafine paomutu ʼae neʼe ina ʼulihi te kele ʼaki ʼana felaveʼi fakasino heʼe ʼaoga,* pea neʼe lagavaka ʼo ʼuhiga mo ʼana kaugana ʼae neʼe matehi e te fafine ʼaia.”+ 3 Pea ʼi te moʼi temi pe ʼaia neʼe natou toe ui: “Kotou fakavikiviki kia Sehova!*+ Pea ko te kohu ʼo te vela ʼo Papiloni ʼe hake ia ʼo talu ai.”+

4 Pea neʼe tuʼutuli ifo te ʼu tagata ʼafeā ʼe toko 24+ mo te ʼu kelupimi ʼe toko fa,+ pea neʼe natou atolasio ki te ʼAtua ʼae ʼe heka ʼi te hekaʼaga fakahau, ʼo natou ui: “Ameni! Kotou fakavikiviki kia Sehova!”*+

5 Pea neʼe haʼu he leʼo mai te hekaʼaga fakahau, neʼe ina ui: “Kotou fakavikiviki ki totatou ʼAtua, koutou fuli ko ʼana kaugana,+ ʼae ʼe manavasiʼi kia te ia, natou ʼae ʼe liliki pea mo natou ʼae ʼe lalahi.”+

6 Pea neʼe au logo ki he meʼa neʼe hage ko te leʼo ʼo he kaugamalie, mo te logoaʼa ʼo te tafe malohi ʼo te ʼu vai pea mo te ʼuʼulu ʼo te ʼu mana malohi. Neʼe natou ui: “Kotou fakavikiviki kia Sehova,*+ koteʼuhi kua kamata ʼafio+ ia Sehova* totatou ʼAtua, te Mafimafi!+ 7 Tou fakafiafia lahi pea mo fakakololia kia te ia, koteʼuhi kua hoko mai te ʼohoana ʼo te Akeno pea kua teuteu tona ʼohoana. 8 ʼEi, neʼe fakagafua age ki tona ʼohoana ke ina kofuʼi he teu lino, mo gigila pea mo maʼa, he ʼe fakata e te lino te ʼu gaue faitotonu ʼa te kau maʼoniʼoni.”+

9 Pea neʼe ui mai e te ʼaselo: “Tohi: Fiafia ia natou ʼae neʼe fakaafe ki te kaitahi ʼo te faiʼohoana ʼo te Akeno.”+ Pea neʼe ina toe ui mai: “Ko te ʼu folafola ʼaia ʼe ko te ʼu folafola moʼoni ʼa te ʼAtua.” 10 Neʼe au tuʼutuli ifo ai ki ʼona vaʼe ke au atolasio kia ia. Kae neʼe ina ui mai: “Tokaga! ʼAua naʼa ke fai te meʼa ʼaia!+ Koteʼuhi ko au ko he kaugana ohage pe ko koe pea mo ʼou tehina, ʼae ʼe natou maʼu te pilivilesio ko te fakamoʼoni ʼo ʼuhiga mo Sesu.+ Ke ke atolasio ki te ʼAtua!+ Koteʼuhi neʼe fai te ʼu lea fakapolofeta moʼo fakamoʼoni kia Sesu.”+

11 Neʼe au sio ʼe ava te lagi, pea koʼeni he hosi hina.+ Ko ia ʼae neʼe heka ai ʼe higoa ko Agatonu+ pea mo Moʼoni,+ pea ʼe ina fakamauʼi mo tau ʼaki te faitotonu.+ 12 ʼE hage ʼona mata ko he uloʼi afi+ pea ʼe lahi te ʼu kolona ʼi tona ʼulu. ʼE tohi ia ia he higoa ʼe mole iloʼi e he tahi gata pe kia ia, 13 pea ʼe ina kofuʼi he kofu tuʼa ʼe piki ai* te toto pea ʼe fakahigoaʼi ia ia ko Te Folafola+ ʼa te ʼAtua. 14 Pea neʼe muli ia te ia te ʼu kautau ʼae ʼi te lagi ʼi he ʼu hosi hina, pea neʼe natou kofuʼi he ʼu teu lino, mo hina pea mo maʼa. 15 Pea neʼe haʼu ki tuʼa mai tona gutu he heleta loa mo masila,+ moʼo taʼi ʼaki te ʼu puleʼaga, pea ʼe pule anai kia natou ʼaki he toko ukamea.+ Tahi ʼae, ʼe ina molomoloki te lomiʼaga vite ʼo te hauhau fakamataku ʼo te ʼAtua, te Mafimafi.+ 16 Pea ʼi tona kofu tuʼa, ʼei, ʼi tona kauaga, ʼe tohi ai he higoa: Hau ʼo te ʼu hau pea mo ʼAliki ʼo te ʼu ʼaliki.+

17 Neʼe au toe sio foki ki he ʼaselo ʼe tuʼu ia muʼa ʼo te laʼa, pea neʼe kalaga ʼaki he leʼo malohi ʼo ina ui ki te ʼu manulele fuli ʼae ʼe lele ʼi te lagi: “Kotou ʼomai ki heni, kotou fakatahitahi ki te kaitahi lahi ʼa te ʼAtua,+ 18 ke kotou kai te kakano ʼo te ʼu hau, mo te kakano ʼo te ʼu kamutoa, mo te kakano ʼo te ʼu tagata malolohi,+ mo te kakano ʼo te ʼu hosi pea mo natou ʼae ʼe heheka ai,+ mo te kakano ʼo te hahaʼi fuli, ʼo natou ʼae ʼe ʼateaina pea mo natou ʼae ʼe kaugana, ʼo natou ʼae ʼe liliki pea mo natou ʼae ʼe lalahi.”

19 Pea neʼe au sio ki te manu fekai mo te ʼu hau ʼo te kele pea mo ʼanatou kautau, neʼe natou fakatahitahi ke natou tauʼi ia ia ʼae ʼe heka ʼi te hosi pea mo tana kautau.+ 20 Pea neʼe puke te manu fekai, ʼo feia mo te polofeta loi+ ʼae neʼe ina fakahoko ni meʼa fakaofoofo ʼi ʼona muʼa moʼo fakaheʼi ia natou ʼae neʼe natou maʼu te fakailoga ʼo te manu fekai+ pea mo natou ʼae ʼe atolasio ki tona fakatata.+ Neʼe li maʼuli ia naua ki te vai ʼae ʼe vela ai te afi kakaha.+ 21 Kae ko natou ʼae neʼe kei toe, neʼe matehi natou ʼaki te heleta loa ʼae neʼe haʼu mai te gutu ʼo ia ʼae ʼe heka ʼi te hosi.+ Pea neʼe makokona te ʼu manulele fuli ʼi ʼonatou kakano.+

20 Pea neʼe au sio ki he ʼaselo ʼe hifo mai te lagi mo te kalavi ʼo te vanu+ pea mo he seini lahi ʼi tona nima. 2 Neʼe ina puke te talakone,+ te gata ʼafeā,+ ia ia ʼae ʼe ko te Tevolo+ mo Satana,+ pea neʼe ina haʼi ia ia kia taʼu ʼe 1 000. 3 Pea neʼe ina li ia ia ki te vanu+ pea neʼe ina pupunu mo fakamaʼu, ke mole ina toe fakaheʼi te ʼu puleʼaga ʼo kaku ki te fakaʼosi ʼo te ʼu taʼu ʼe 1 000. Hili ʼaia, ʼe tonu ke fakaʼateainaʼi ki he kiʼi temi nounou pe.+

4 Pea neʼe au sio ki he ʼu hekaʼaga fakahau, pea neʼe foaki te pule kia natou ʼae neʼe heheka ai ke natou faifakamau. ʼEi, neʼe au sio kia natou* ʼae neʼe matehi* ʼuhi ko tanatou fakamoʼoni ʼo ʼuhiga mo Sesu pea mo tanatou palalau ʼo ʼuhiga mo te ʼAtua, ia natou ʼae neʼe mole atolasio ki te manu fekai peʼe ki tona fakatata pea neʼe mole maʼu te fakailoga ʼi ʼonatou laʼe pea mo ʼonatou nima.+ Pea neʼe natou toe maʼuʼuli ake pea mo natou hau mo Kilisito*+ lolotoga taʼu ʼe 1 000. 5 ʼE ko te ʼuluaki fakatuʼuake ʼaia.+ Ko te toe ʼo te kau mate+ neʼe toe maʼuʼuli ake ʼi te fakaʼosi ʼo te ʼu taʼu ʼe 1 000. 6 Fiafia pea mo maʼoniʼoni ia natou ʼae ʼe kau ki te ʼuluaki fakatuʼuake.+ ʼE mole he malohi ʼo te lua mate kia natou ʼaia,+ kae ʼe natou liliu anai ko he kau pelepitelo+ ʼa te ʼAtua pea mo Kilisito, pea ʼe natou hau anai mo ia lolotoga taʼu ʼe 1000.+

7 Pea ʼi te ʼosi pe ʼo te ʼu taʼu ʼe 1 000, ʼe fakaʼateainaʼi anai ia Satana mai tona fale pilisoni, 8 pea ʼe alu anai ʼo fakaheʼi te ʼu puleʼaga, ia Koke pea mo Makoke, ʼi te ʼu potu taupotu ʼe fa ʼo te kele, ke ina fakatahitahiʼi natou ki te tau. Ko te kaugamalie ʼo natou ʼaia neʼe hage ko te ʼone ʼo te tai. 9 Pea neʼe natou mavetevete ʼi te kele katoa pea neʼe natou ʼa takatakai te nofoʼaga ʼo te kau maʼoniʼoni pea mo te kolo ʼofaina. Kae neʼe hifo ifo mai te lagi te afi ʼo ina tutu natou.+ 10 Pea ko te Tevolo ʼae neʼe ina fakaheʼi natou, neʼe li ki te vai ʼae ʼe vela ai te afi kakaha, ʼae neʼe kua ʼi ai te manu fekai+ pea mo te polofeta loi.+ Pea ʼe fakamamahiʼi* anai natou ʼi te ʼaho mo te po ʼo talu ai.

11 Pea neʼe au sio ki te hekaʼaga fakahau lahi mo hina pea mo Ia ʼae ʼe heka ai.+ Neʼe feholaki mai ʼi ʼona muʼa te kele mo te lagi,+ pea neʼe mole toe maʼu ia naua. 12 Pea neʼe au sio ki te kau mate, te hahaʼi lalahi mo te hahaʼi liliki, ʼe natou tutuʼu ia muʼa ʼo te hekaʼaga fakahau, pea neʼe avahi he ʼu takaiga tohi. Kae neʼe avahi te tahi age takaiga tohi, ʼe ko te takaiga tohi ʼo te maʼuli.+ Neʼe fakamauʼi te kau mate ʼo mulimuli ki te ʼu meʼa ʼae neʼe tohi ʼi te ʼu takaiga tohi pea mo ʼanatou gaue.+ 13 Pea neʼe liufaki e te tai ʼana mate, pea neʼe liufaki e te mate pea mo te Faitoka* ʼanā mate, pea neʼe fakamauʼi natou takitokotahi ʼo mulimuli ki ʼanatou gaue.+ 14 Pea neʼe li te mate pea mo te Faitoka* ki te vai ʼae ʼe vela ai te afi kakaha.+ ʼE fakata e te vai ʼae ʼe vela ai te afi kakaha+ te lua mate.+ 15 Pea tahi ʼae, ko ia ʼae neʼe mole tuʼu tona higoa ʼi te tohi ʼo te maʼuli+ neʼe li ki te vai ʼae ʼe vela ai te afi kakaha.+

21 Pea neʼe au sio ki he lagi foʼou mo he kele foʼou,+ koteʼuhi neʼe kua puli te lagi ʼafeā pea mo te kele ʼafeā,+ ʼo feia mo te tai.+ 2 Neʼe au toe sio foki ki te kolo tapu, te Selusalemi Foʼou, ʼae ʼe hifo ifo mai selo, mai te ʼAtua+ pea neʼe teuteuʼi ohage ko he fafine ʼohoana neʼe fakamataleleiʼi ki tona ʼohoana.+ 3 Pea neʼe au logo ki he leʼo malohi ʼe haʼu mai te hekaʼaga fakahau, ʼe ina ui: “Koʼeni, ʼe tuʼu te fale la ʼo te ʼAtua ʼi te lotolotoiga ʼo te hahaʼi, pea ʼe nofo anai mo natou, pea ʼe natou liliu anai ko tana hahaʼi. Pea ʼe nofo anai te ʼAtua totonu mo natou.+ 4 Pea ʼe ina holoholoʼi anai te ʼu loʼimata fuli mai ʼonatou mata,+ ʼe mole toe ʼi ai anai te mate,+ mo te putu, mo te lauga pea mo te mamahi.+ Ko te ʼu meʼa ʼafeā kua puli ia.”

5 Pea neʼe ui e Ia ʼae ʼe heka ʼi te hekaʼaga fakahau:+ “Koʼeni, ʼe au fakafoʼou ia meʼa fuli.”+ Pea ʼe ina toe ui: “Tohi, koteʼuhi ko te ʼu folafola ʼaia ʼe tuha mo te falala* pea mo moʼoni.” 6 Pea neʼe ina ui mai: “Kua hoko te ʼu folafola ʼaia! Ko au te Kamataʼaga pea mo te Fakaʼosiʼaga.*+ Ki ʼae ʼe fia inu, ʼe au foaki noa anai ki ai he moʼi vai mai te matapuna vai ʼo te maʼuli.+ 7 Ko ʼae ʼe malo anai, ʼe ina maʼu anai te ʼu meʼa ʼaia, pea ʼe au liliu anai ko tona ʼAtua pea ʼe liliu anai ko toku foha. 8 Kae kia natou ʼae ʼe fula, mo natou ʼae ʼe mole tui,+ mo natou ʼae ʼe heʼe maʼa pea mo fakalialia, mo natou ʼae ʼe faifakapo,+ mo natou ʼae ʼe natou fai he ʼu felaveʼi fakasino heʼe ʼaoga,*+ mo natou ʼae ʼe faifakalauʼakau, mo te hahaʼi tauhi taula ʼatua pea mo te hahaʼi gutuloi fuli,+ ʼe li anai natou ki te vai ʼae ʼe vela ai te afi kakaha.+ ʼE ko te fakata ʼaia ʼo te lua mate.”+

9 Ko te tahi ʼi te ʼu ʼaselo ʼe toko fitu ʼae neʼe natou toʼo te ʼu ipu ʼe fitu ʼae neʼe fonu ko te ʼu tautea fakamuli ʼe fitu,+ neʼe haʼu pea neʼe ina ui mai: “Haʼu, pea ʼe au fakaha atu anai te fafine ʼae ʼe teuteu ʼohoana mo te Akeno.”+ 10 Neʼe ina ʼave ai au ʼaki te malohi ʼo te laumalie ʼo te ʼAtua ki he moʼuga lahi pea mo maʼoluga, pea neʼe ina fakaha mai te kolo tapu, ia Selusalemi, ʼae neʼe hifo ifo mai selo, mai te ʼAtua+ 11 pea neʼe ina maʼu te kololia ʼo te ʼAtua.+ Neʼe gigila ohage ko he maka maʼuhiga ʼaupito, ohage ko te maka sasipa ʼae ʼe gigila ohage ko te kilisitale.+ 12 Neʼe ʼi ai tona kaupa matolu mo maʼoluga pea mo ʼona matapa ʼe 12 mo te ʼu ʼaselo ʼe toko 12 ʼi te ʼu matapa, pea neʼe tohi ʼi te ʼu matapa te ʼu higoa ʼo te ʼu telepi ʼe 12 ʼo te ʼu foha ʼo Iselaele. 13 Neʼe ko matapa ʼe tolu ʼi te potu esite, mo matapa ʼe tolu ʼi te potu noleto, mo matapa ʼe tolu ʼi te potu saute, pea mo matapa ʼe tolu ʼi te potu uesite.+ 14 Pea ko te kaupa ʼo te kolo neʼe fakatuʼu ki ni maka fakatafito ʼe 12, pea neʼe tohi ʼi ai te ʼu higoa ʼe 12 ʼo te ʼu apositolo ʼe toko 12+ ʼa te Akeno.

15 Pea ko ia ʼae neʼe palalau mo au neʼe ina toʼo te kaho aulo ke ina fuafua te kolo, mo ʼona matapa pea mo tona kaupa.+ 16 Pea ko te kolo ʼaia ʼe tapa fa, ʼe tatau tona loa pea mo tona laulahi. Pea neʼe ina fuafua te kolo ʼaki te kaho, pea neʼe ina maʼu ko sitate ʼe 12 000.* Neʼe tatau tona loa, mo tona laulahi pea mo tona maʼoluga. 17 Neʼe ina toe fuafua foki mo te maʼoluga ʼo tona kaupa, pea neʼe ina maʼu fasiga nima ʼe 144* ʼo mulimuli ki te fuafua ʼa he tagata. ʼE ko te fuafua ʼaia ʼae neʼe fakaʼaogaʼi e te ʼaselo. 18 Pea neʼe fai te kaupa ʼaki te sasipa,+ pea ko te kolo neʼe fai ʼaki te aulo maʼa ʼe hage ko te sioʼata. 19 Ko te fakatafito ʼo te kaupa ʼo te kolo neʼe fai ʼaki te ʼu maka maʼuhiga kehekehe: Ko te ʼuluaki maka fakatafito neʼe ko te sasipa, ko te lua neʼe ko te safile, ko te tolu neʼe ko te kalesetuane, ko te fa neʼe ko te emelote, 20 ko te nima neʼe ko te saletone, ko te ono neʼe ko te saletuane, ko te fitu neʼe ko te kisolite, ko te valu neʼe ko te pelile, ko te hiva neʼe ko te topasi, ko te hogofulu neʼe ko te kilisopaso, ko te hogofulu-ma-tahi neʼe ko te iasinita pea ko te hogofulu-ma-lua neʼe ko te ametite.* 21 Pea ko te ʼu matapa ʼe 12 neʼe ko mataʼi tofe ʼe 12. Ko te ʼu matapa takitahi neʼe ko te mataʼi tofe. Pea ko te ala lahi ʼo te kolo neʼe fai ʼaki te aulo maʼa ʼe hage ko te sioʼata.

22 Neʼe mole au sio ki he fale lotu ʼi te loto kolo, koteʼuhi ko tona fale lotu ʼe ko Sehova* ʼAtua, te Mafimafi,+ ʼo toe feia mo te Akeno. 23 Pea ʼe mole ʼaoga te laʼa pea mo te mahina moʼo fakamalamaʼi te kolo, koteʼuhi ʼe fakamalamaʼi e te kololia ʼo te ʼAtua,+ pea ko tona malama ʼe ko te Akeno.+ 24 Pea ʼe haʼele anai te ʼu puleʼaga ʼi te malama ʼo te kolo,+ pea ʼe ʼaumai anai ki ai e te ʼu hau ʼo te kele ʼonatou kololia. 25 ʼE mole pupunu anai ʼona matapa ʼi te ʼaho, koteʼuhi ʼe mole toe poʼuli anai.+ 26 Pea ʼe ʼaumai anai ki ai te kololia pea mo te fakaʼapaʼapa ʼo te ʼu puleʼaga.+ 27 Kae ʼe mole hu anai ki loto he meʼa ʼe ʼuli pea mo he tahi ʼe ina fai ni meʼa fakalialia pea mo kaka. ʼE gata pe kia natou ʼae kua tuʼu ʼonatou higoa ʼi te takaiga tohi ʼo te maʼuli ʼae ka hu ki ai.+ Ko te takaiga tohi ʼaia ʼa te Akeno.+

22 Pea neʼe fakaha mai e te ʼaselo te vai tafe ʼo te vai ʼo te maʼuli,+ ʼae ʼe tasilo ohage ko te kilisitale, ʼe tafe mai te hekaʼaga fakahau ʼo te ʼAtua pea mo te Akeno+ 2 ki te lotomalie ʼo te ala lahi ʼo te kolo. ʼI te ʼu kauvai ʼo te vai tafe neʼe ʼi ai te ʼu fuʼu ʼakau ʼo te maʼuli, ʼae neʼe fua tuʼa 12 ʼi te taʼu, ʼo tuʼa tahi ʼi te mahina. Pea neʼe fakaʼaogaʼi te ʼu lau ʼo te ʼu fuʼu ʼakau moʼo fakamalolo te ʼu puleʼaga.+

3 Pea ʼe mole toe ʼi ai anai he malaʼia. Kae ʼe tuʼu anai te hekaʼaga fakahau ʼo te ʼAtua pea mo te Akeno+ ʼi te kolo, pea ko te ʼu kaugana ʼa te ʼAtua ʼe natou foaki anai kia te ia he tauhi taputapu, 4 pea ʼe natou sisio anai ki tona fofoga+ pea ʼe tohi anai tona huafa ʼi ʼonatou laʼe.+ 5 Pea ʼe mole toe poʼuli anai,+ pea ʼe mole ʼaoga anai he malama peʼe ko te laʼa moʼo fakamalamaʼi natou, koteʼuhi ʼe fakamalamaʼi anai natou e Sehova* ʼAtua,+ pea ʼe natou hau anai ʼo talu ai.+

6 Neʼe ina ui mai: “Ko te ʼu folafola ʼaia ʼe tuha mo te falala* pea mo moʼoni.+ ʼEi, ko Sehova,* te ʼAtua ʼae ʼe palalau ʼaki te kau polofeta,+ neʼe ina fekauʼi tana ʼaselo ke ina fakaha ki ʼana kaugana te ʼu meʼa ʼae ka vave hoko mai. 7 Koʼeni, kua au vave alu atu.+ Fiafia ia ia ʼae ʼe mulimuli ki te ʼu folafola ʼo te lea fakapolofeta ʼae ʼe tuʼu ʼi te takaiga tohi ʼaeni.”+

8 Pea ko au Soane, ʼae neʼe sio pea mo logo ki te ʼu meʼa ʼaia. ʼI taku logo pea mo sio ki te ʼu meʼa ʼaia, neʼe au tuʼutuli ifo ki te ʼu vaʼe ʼo te ʼaselo ʼae neʼe ina fakaha mai te ʼu meʼa ʼaia, ke au atolasio kia ia. 9 Kae neʼe ina ui mai: “Tokaga! ʼAua naʼa ke fai te meʼa ʼaia! Koteʼuhi ko au ko he kaugana ohage pe ko koe, pea mo ʼou tehina te kau polofeta, pea mo natou ʼae ʼe natou mulimuli ki te ʼu folafola ʼae ʼe tuʼu ʼi te takaiga tohi ʼaeni. Ke ke atolasio ki te ʼAtua.”+

10 Neʼe ina toe ui mai: “ ʼAua naʼa ke taupau fakafufu te ʼu folafola ʼo te lea fakapolofeta ʼae ʼe tuʼu ʼi te takaiga tohi ʼaeni, koteʼuhi kua ovi mai te temi ʼae kua fakatuʼutuʼu. 11 Ko ʼae ʼe heʼe faitotonu ke hoko atu tana heʼe faitotonu, pea ko ʼae ʼe aga ʼuli ke hoko atu tana aga ʼuli. Kae ko ʼae ʼe faitotonu ke hoko atu tana faitotonu, pea ko ʼae ʼe maʼoniʼoni ke hoko atu tana maʼoniʼoni.

12 “ ‘Koʼeni, kua au vave alu atu, pea ʼe nofo mo au te fakapale, ke au liufaki ki te hahaʼi takitokotahi ʼo mulimuli ki tana gaue.+ 13 ʼE ko au te Kamataʼaga pea mo te Fakaʼosiʼaga,+ te ʼuluaki pea mo te fakamuli.* 14 Fiafia ia natou ʼae ʼe natou fo ʼonatou teu loloa,+ ke feala ai hanatou olo ki te ʼu fuʼu ʼakau ʼo te maʼuli+ pea ke natou hu ki te kolo ʼi ʼona matapa.+ 15 ʼE nofo ʼi tuʼa te ʼu kuli* pea mo natou ʼae ʼe faifakalauʼakau, mo natou ʼae ʼe natou fai he ʼu felaveʼi fakasino heʼe ʼaoga,* mo natou ʼae ʼe faifakapo, mo te hahaʼi tauhi taula ʼatua pea mo natou fuli ʼae ʼe natou leleiʼia te loi pea mo natou fai.’+

16 “ ‘Ko au Sesu, neʼe au fekauʼi taku ʼaselo ke ina fakamoʼoni atu kia koutou te ʼu meʼa ʼaia ke fua lelei ki te ʼu kokelekasio. Ko au te aka pea mo te hakoga ʼo Tavite+ pea mo te fetuʼu ʼaho gigila.’ ”+

17 Pea ʼe haga ui e te laumalie maʼoniʼoni pea mo te fafine ʼae ʼe teuteu ʼohoana:+ “Haʼu!” pea ko ia ʼae ʼe logo ki ai, ke ina ui: “Haʼu!” pea ko ia ʼae ʼe fia inu ke haʼu.+ Ko ia ʼae ʼe loto ki ai, ke ina toʼo noa te vai ʼo te maʼuli.+

18 “ ʼE au tala kia natou fuli ʼae ʼe logo ki te ʼu folafola ʼo te lea fakapolofeta ʼae ʼe tuʼu ʼi te takaiga tohi ʼaeni: Kapau ʼe hilifaki e he tahi he meʼa ki te ʼu meʼa ʼaeni,+ ʼe hilifaki anai e te ʼAtua kia ia te ʼu tautea ʼae ʼe tohi ʼi te takaiga tohi ʼaeni.+ 19 Pea ko he tahi pe ʼe ina toʼo kehe he meʼa mai te ʼu folafola ʼo te lea fakapolofeta ʼae ʼe tuʼu ʼi te takaiga tohi ʼaeni, ʼe toʼo kehe anai e te ʼAtua tona vahe mai te ʼu fuʼu ʼakau ʼo te maʼuli+ pea mo te kolo tapu,+ te ʼu meʼa ʼae ʼe talanoa ki ai te takaiga tohi ʼaeni.

20 “Ko ia ʼae ʼe fakamoʼoni ki te ʼu meʼa ʼaia, ʼe ina ui: ‘ ʼEi, kua au vave alu atu.’ ”+

“Ameni! Haʼu, ʼAliki Sesu.”

21 Ke nofo mo te kau maʼoniʼoni te ʼofa makehe ʼo te ʼAliki ko Sesu.