FEHUʼI 7
Kotea ʼae ʼe fakakikite ʼi te Tohi-Tapu ʼo ʼuhiga mo totatou temi?
“ ʼE fakafeagai anai he fenua ki he tahi age fenua, pea mo he puleʼaga hau ki he tahi age puleʼaga hau . . . Ko te ʼu aluʼaga fuli ʼaia ʼe ko te kamataʼaga ʼo te ʼu mamahi.”
“ ʼE lahi anai te kau polofeta loi ʼae ka tutuʼu ake pea mo natou fakaheʼi te tokolahi. Pea ʼuhi ko te ʼaʼasili ʼo te agakovi, ʼe momoko anai ia te ʼofa ʼo te tokolahi.”
“ ʼE kotou logo anai ki he ʼu tau pea mo he ʼu fakamatala ʼo ʼuhiga mo ni tau, kae ʼaua naʼa kotou matataku. ʼE tonu ke hoko te ʼu aluʼaga ʼaia kae heʼeki hoko mai te fakaʼosi.”
“ ʼE hoko anai ni mafuike lalahi, pea ʼe ʼi ai anai ni hoge mo ni taʼi mahaki mai he potu ki he tahi age potu. ʼE ʼi ai anai mo he ʼu meʼa fakamataku pea mo he ʼu fakailoga lalahi mai te lagi.”
“ ʼI te ʼu ʼaho fakamuli, ʼe ʼi ai anai he ʼu temi makehe pea mo faigataʼa. Koteʼuhi ʼe ʼoʼofa pe anai te hahaʼi kia natou totonu, mo manako ki te paʼaga, mo laupisiʼi pe ia natou totonu, mo fialahi, mo laukovi ki te ʼAtua mo te hahaʼi, mo talagataʼa ki ʼanatou matuʼā, mo maʼuli galo, mo heʼe agatonu, mo heʼe ʼofa, mole natou maʼuli felogoi, mo faifasituʼu, mole natou lotololomi, mo agafekai, mo fehihiʼa ki te lelei, mo agakaka, mo logogataʼa, mo fiameʼalahi, mo ʼoʼofa ki te ʼu fakafiafia kae mole ki te ʼAtua, pea ʼe natou fia fakaha ʼe natou pipiki ki te ʼAtua kae ʼe mole iloga ʼi ʼonatou maʼuli.”