Ko Te Hāofaki ʼo Te Kau Iselaelite Mai Esipito ʼo Aʼu Ki Te ʼUluaki Hau ʼo Iselaele

Neʼe takitaki e Moisese te kau Iselaelite mai tanatou nonofo popūla ʼi Esipito ʼo nātou ʼolo ki te Moʼuga ko Sinai, ʼaia neʼe foaki age ai e Sehova tana ʼu lao kia nātou. Ki muli age, neʼe fekauʼi e Moisese te ʼu malomu e toko 12 ke nātou ʼolo ʼo fakasiosio te fenua ʼo Kanaane. Kae ko te toko 10 ʼo nātou, ʼi tanatou liliu mai neʼe nātou fai tanatou fakamatala ʼe mole lelei. Pea neʼe toe fia liliu ai te hahaʼi ki Esipito. ʼUhi ko tanatou mole tui, neʼe fakatūʼa e te ʼAtua te kau Iselaelite ke nātou fehēʼaki ʼi te toafa ia taʼu e 40.

Pea neʼe fili ia Sosue ke ina taki te kau Iselaelite ki te fenua ʼo Kanaane. Moʼo tokoni kia nātou ke nātou maʼu te fenua, neʼe fakahoko e Sehova te ʼu milakulo. Neʼe ina fakagata te tafe ʼo te Vaitafe ʼo Solotane, neʼe ina holoʼi te ʼu kaupā ʼo Seliko, pea neʼe ina fakatuʼu te laʼā ʼi te ʼaho katoa. ʼI te hili ʼo taʼu e ono, neʼe nātou maʼu leva te fenua ʼo te kau Kanaane.

ʼO kamata mai ia Sosue, neʼe puleʼi ia Iselaele e te ʼu tuʼi fakamāu ia taʼu e 356. ʼE lahi anai te ʼu meʼa ʼaē ka tou ako ʼo ʼuhiga mo nātou ʼaia, ʼaē ʼe kau ai ia Palake, mo Seteone, mo Sefeteo, mo Samisoni pea mo Samuele. Tahi ʼaē meʼa, ʼe tou vakaʼi anai te ʼu fafine ohage ko Laape, mo Tepola, mo Saele, mo Lute, mo Naomi pea mo Talila. Ko tona fakakatoa, ko taʼu e 396 ʼaē neʼe hoko ai te ʼu hisitolia ʼo te Faʼahi TOLU.