Kapite 1

Te ʼu Fagonogono Mai Lagi

KO TE Tohi-Tapu katoa, ʼe ko he fagonogono ia mai lagi, neʼe tuku mai e tatatou Tāmai ʼaē ʼi selo moʼo ako ʼotatou. Kae, ʼi te kua teitei ʼosi kiai taʼu e 2 000, ko te ʼu fagonogono makehe e lua neʼe fakahoko ifo e Kapeliele, te ʼaselo “ ʼe tuʼu ʼo ōvi ia muʼa ʼo te ʼAtua”. Tou vakaʼi muʼa pe koteā te tupuʼaga ʼo tana fai te ʼu ʼaʼahi maʼuhiga e lua ki te kele.

ʼE tou ʼi te taʼu 3 ʼi muʼa ʼo te tupu ʼa Sesu Kilisito. ʼI te ʼu moʼuga ʼo Sutea, e lagi ōvi atu pe ki Selusalemi, neʼe nofo ai te pelepitelo ʼa Sehova ko tona higoa ko Sakalia. Ko te tagata ʼaia pea mo tona ʼohoana ko Elisapeta kua matutuʼa, pea neʼe mole ʼi ai foki hanā fānau. Koʼeni ia Sakalia ʼi Selusalemi ʼi te fale lotu ʼo te ʼAtua, he kua hoko tona temi ʼaē ke fai ai tona tuʼulaga faka pelepitelo. Pea fokifā pe kua hā age ia Kapeliele kia te ia ʼi te faʼahi mataʼu ʼo te ʼaletale ʼo te iseso.

Neʼe mataku ʼaupito ia Sakalia. Ka neʼe tala age e Kapeliele ki ai: “ ʼAua naʼa ke manavasiʼi, Sakalia, heʼe kua tali lelei tau tagi, pea ko tou ʼohoana ia Elisapeta ʼe ina fānauʼi anai maʼa koe he foha, pea ʼe tonu ke ke fakahigoaʼi anai ko Soane.” Pea ina toe tala age ko Soane “ ʼe lahi anai ia muʼa ʼo Sehova” pea ʼe ina ‘teuteuʼi anai maʼa Sehova he hahaʼi kua lelei’.

Ka neʼe mole tui ia Sakalia. Neʼe mata faigataʼa ʼaupito kia ia ke maʼu e Elisapeta mo ia hanā tamasiʼi heʼe kua nā matutuʼa! Koia neʼe toe tala age ai e Kapeliele: “ ʼE ke fakalogologo anai, pea ʼe mole ke toe faʼa palalau anai ʼo aʼu ki te ʼaho ʼaē ʼe hoko ai te ʼu meʼa ʼaia, he neʼe mole ke tui ki ʼaku palalau.”

ʼI te temi ʼaia, ko nātou ʼaē neʼe nonofo ʼi tuʼa neʼe nātou kamata ʼeke pe koʼe ʼe fualoa te nofo ʼa Sakalia ʼi te fale lotu. Kae ʼi tana hū mai leva ʼaē ki tuʼa, ʼo ina fai te ʼu fakaʼiloga ki te hahaʼi ʼaki tona ʼu nima heʼe mole kei feala hana palalau, neʼe nātou mahino ai leva neʼe sio ia ki te meʼa faikehe.

ʼI te ʼosi ʼo tona temi tauhi ʼi te fale lotu, neʼe liliu ia Sakalia ki tona ʼapi. Mole fualoa, pea hoko pe te meʼa ʼaē neʼe fakahā age e te ʼaselo: neʼe faitama ia Elisapeta! ʼI tana nofo ʼo fakalogo fānau, neʼe nofo ia ʼi tona ʼapi, ʼo mamaʼo mo te hahaʼi, lolotoga māhina e nima.

Ki muli age, neʼe toe hā mai ia Kapeliele. Ko ai ʼaē neʼe palalau ki ai? Ko te taʼahine neʼe higoa ko Malia, neʼe mole heʼeki ʼohoana pea ʼe nofo ia ʼi Nasaleti. Ko te fagonogono feafeaʼi ʼaenī ka ina fakahoko age? “Kua leleiʼia koe e te ʼAtua, ko tana tala age ʼaia kia Malia; pea koʼeni ʼe ke faitamaʼi anai pea ʼe ke fānauʼi anai he tama, pea ʼe tonu anai ke ke fakahigoa ko Sesu.” “Ko ia ia, ʼe lahi anai, pea ʼe fakahigoa anai ko te ʼAlo ʼo te Māʼoluga; (...) pea ʼe hau anai ia ki te ʼapi ʼo Sakopo ʼo talu ai, pea ko tona puleʼaga ʼe mole hona gataʼaga.”

ʼE mahino papau ia ko Kapeliele neʼe ina leleiʼia te faka maʼuhiga ʼaē ʼo ia ke ina fakahoko te ʼu fagonogono ʼaia. ʼI tatatou lau anai te ʼu hisitolia ʼo ʼuhiga mo Soane pea mo Sesu, ʼe tou mahino lelei anai pe koʼe ʼe maʼuhiga ʼaupito te ʼu fagonogono ʼaia mai lagi. 2 Timoteo 3:16; Luka 1:​5-33.

▪ Koteā te ʼu fagonogono maʼuhiga e lua ʼaē neʼe fakahoko ifo mai lagi?

▪ Ko ai ʼaē neʼe ina fakahoko te ʼu fagonogono ʼaia, pea neʼe fakahoko kia ai?

▪ He koʼe neʼe faigataʼa te tui ki te ʼu fagonogono ʼaia e lua?