Kapite 4

Faitama Ka Mole Heʼeki ʼOhoana

KUA faitama ia Malia ko tona māhina tolu. ʼE tou ʼiloʼi neʼe nofo ia mo Elisapeta ʼi te kamata ʼo tona faitama, kae ʼi te temi nei kua toe liliu ia ki tona ʼapi ʼi Nasaleti. Kua vave pe, te ʼiloʼi e te hahaʼi fuli ʼi te kolo ʼaia tona faitama. Kua nofo moʼoni ia ʼi te faʼahi fakatuʼania ʼaupito.

Ko te meʼa ʼaē ʼe toe ʼāsili kovi ai, he neʼe kua teu ʼohoana ia Malia mo Sosefo, te tufuga ʼakau. Kae ʼe ina ʼiloʼi lelei pe, ʼi te Lao ʼaē neʼe tuku e te ʼAtua ki Iselaele, ko he taʼahine kua fakapapau ʼohoana ki he tagata kae momoe ia mo he tahi age, ʼe tonu ia ke taumakaʼi. ʼE feafeaʼi anai hana fakamatala tona faitama kia Sosefo?

Neʼe māhina tolu te puli ʼa Malia ʼi Nasaleti, pea ʼe mahino ia kua toe fia sio ia Sosefo ki ai. ʼI te temi neʼe nā felāveʼi ai, neʼe lagi fakahā age e Malia ki ai te logo ʼaia. Logope tana fakamatalatala lelei age neʼe faitama ʼi te gāue ʼa te laumālie maʼoniʼoni ʼo te ʼAtua, ʼe mahino ia, neʼe lagi faigataʼa ʼaupito kia Sosefo tana tui age kia ia.

Neʼe ʼiloʼi lelei pe e Sosefo ko Malia neʼe lelei ʼaupito ʼona logo pea ʼe mahino papau ia ʼe ʼofa mamahi ia ki ai. Kae, logope la pe koteā he faʼahiga meʼa ʼe feala ke ina fakapapau ʼaki age, ko te agaaga ʼo te ʼu meʼa fuli ʼe fakafeagai kia ia. Kae tatau aipe pe ʼe moʼoni peʼe hala, neʼe mole loto ia Sosefo ke taumakaʼi peʼe fakalainoaʼi ʼi te hahaʼi. Koia neʼe ina fakatotonu ke nā mavete fakafūfū. ʼI te temi ʼaia, ko te hahaʼi ʼaē ʼe teu ʼohoana ʼe kua hage pe ia kua ʼosi ʼohoana, koia ʼe tonu ai foki ke ʼi ai he mavete ʼe fai moʼo fakagata ʼo he teu ʼohoana.

Ki muli age, pea ʼalu ia Sosefo ʼo moe, mo te hoha pe ʼo tona loto ʼuhi ko te meʼa ʼaia. Neʼe hā age te ʼaselo ʼa Sehova ki ai ʼi te misi pea ina tala age: “ ʼAua naʼa ke tuʼania te ʼaumai ki tou ʼapi, ia Malia, tou ʼohoana, heʼe ko te meʼa ʼaē kua fakatupu ia te ia, ʼe haʼu ia mai te laumālie maʼoniʼoni. ʼE ina faʼeleʼi anai he tama, pea ʼe tonu anai ke ke fakahigoa ko Sesu, heʼe ina fakamaʼuli anai tana hahaʼi mai tanatou ʼu agahala.”

ʼI te ʼala ake ʼa Sosefo ʼi tana moe, neʼe fonu ia ʼi te loto fakafetaʼi. Neʼe ina fai atu aipe ohage pe ko te meʼa ʼaē neʼe tala age e te ʼaselo kia ia: neʼe ʼalu ʼo ʼaumai ia Malia ki tona loto fale. Ko te fai fakahāhā ʼo te meʼa ʼaia ʼe ko te toʼotoʼoga fakatapu ʼohoana pe ʼaia, heʼe fakahā ʼaki ai ia muʼa ʼo te hahaʼi fuli, ko Sosefo pea mo Malia kua nā ʼohoana. Kae, neʼe mole fai he felāveʼi fakasino ʼa Sosefo mo Malia lolotoga te temi ʼaē neʼe fuafatuʼi ai e Malia ia Sesu.

Koutou sisio! Kua lahi ʼaupito te fatu ʼo Malia, kae koʼeni pe ia ʼe fakaheka ake e Sosefo ki te asino. ʼE nā ʼolo koa kifea? He koʼe ia ʼe nā fai fagona ka kua peipei fānau ia Malia? Luka 1:39-41, 56; Mateo 1:18-25; Teutalonome 22:23, 24.

▪ Neʼe feafeaʼi ia Sosefo ʼi tana ʼiloʼi ʼaē kua faitama ia Malia, pea koteā tona tupuʼaga?

▪ ʼE feala feafeaʼi anai he mavete ʼa Sosefo mo Malia ka heʼeki pe la nā ʼohoana?

▪ Ko te fai fakahāhā ʼo te meʼa fea ʼaē ʼe ko te toʼotoʼoga fakatapu ʼohoana ʼo Sosefo pea mo Malia?