Kapite 58

Te ʼu Pane Pea Mo Te Meʼa Fakatupu

KO TE toe hahaʼi tokolahi neʼe ʼolo kia Sesu ʼi te Tekapole. Ke nātou ʼōmai ʼo logo ki ai pea mo fakamālōlō ʼonatou mahaki, ko te tokolahi neʼe nātou fai te fagona loaloaga ʼi muʼa ʼo tanatou aʼu mai ki te potu fenua ʼaia ʼe nonofo ai te kau Senitile tokolahi. Neʼe nātou ʼōmai mo tanatou ʼu kato lalahi ʼaē ʼe nātou fakaʼaogaʼi ʼi te agamāhani moʼo ʼai ai tanatou ʼu meʼa kai mokā nātou feʼaluʼaki ʼi te ʼu potu fenua ʼo te kau Senitile.

Kae, ʼi he kiʼi temi ki muli age neʼe pāuiʼi e Sesu tana ʼu tisipulo ʼo ina ʼui age kia nātou: “ ʼE ʼau ʼofa mamahi ki te hahaʼi nei, heʼe kua ʼaho tolu tanatou nonofo ʼi ʼoku tafa, pea ʼe mole ʼi ai hanatou meʼa kai; pea kapau ʼe ʼau fakaliliu pakupaku ia nātou ki ʼonatou ʼapi, pea ʼe nātou matapopō anai ʼi te ala. Pea ko ʼihi ia nātou neʼe ʼōmai mai mamaʼo.”

“ ʼE feala feafeaʼi anai ʼi te koga meʼa toafa ʼaenī, te fakamākona ʼaki ni pane ʼo te hahaʼi nei?” ko te tuʼania ʼaia ʼa te kau tisipulo.

Neʼe fehuʼi age e Sesu kia nātou: “Ko foʼi pane e fia ʼe koutou maʼu?”

Pea nātou tali age: “E fitu, pea mo te ʼu kiʼi ika.”

Pea ina fekau ai ki te hahaʼi ke nonofo ki lalo, pea ina toʼo te ʼu foʼi pane pea mo te ʼu ika, pea faikole ki te ʼAtua, pea ʼi te ʼosi ʼo tana fakafetaʼi, neʼe ina tofitofi pea ina tufa ki ʼana tisipulo. Ko nātou ʼaia neʼe nātou tufa ki te hahaʼi, ʼo nātou kakai ʼo makokona ai. Pea ʼi te tānaki ʼo te toe ʼo te meʼa kai, neʼe fonu ai ia kato ʼaiʼaga meʼa kai e fitu, ka ko nātou ʼaē neʼe kakai, neʼe ko te toko 4 000 tagata, pea mo te fafine mo te tamaliki!

ʼOsi ʼaia pea fekau e Sesu te hahaʼi ke ʼolo, pea heka ia mo tana kau tisipulo ki te vaka pea nātou ʼolo ki te potu hihifo ʼo te tai ʼo Kalilea. Neʼe ko te potu ʼaia neʼe faigaʼi ai e te kau Faliseo pea mo te ʼu hahaʼi ʼo te kūtuga ʼo te kau Satuseo, ke nātou fakahalaʼi ia Sesu ʼonatou kole age kia te ia ke ina fakahā age kia nātou he fakaʼiloga mai te lagi.

Neʼe ʼiloʼi lelei pe e Sesu ʼe nātou fia ʼahiʼahiʼi ia ia; neʼe ina tali ʼo ʼui maʼana: “Ka malu te afiafi, kua koutou māhani ʼi te ʼui: ‘ ʼE lāulelei anai, heʼe kulakula te lagi’; pea ʼi te uhu: ‘Ko te ʼaho nei ʼe faka nive anai te temi, pea mo ʼua, heʼe kulakula te lagi, kae fakamataku tona agaaga.’ ʼE koutou popoto ʼi te sivisivi ʼo te agaaga ʼo te lagi, ka mole koutou lavaʼi te sivisivi ʼo te ʼu fakaʼiloga ʼo te ʼu temi.”

ʼOsi pe ʼaia, pea ina ʼui age ko nātou ko te taʼiake agakovi mo fai feʼauʼaki pea mo ina fakatokaga age kia nātou, ohage ko tana fakatokaga ki te kau Faliseo ʼi muʼa atu, ʼe mole toe tuku anai kia nātou he tahi ake fakaʼiloga ʼi te fakaʼiloga ʼa Sonasi. ʼOsi ʼaia pea mavae ia nātou pea ʼalu mo tana kau tisipulo ʼi te vaka ki Petesaita, ʼi te potu tokelau-hahake ʼo te tai ʼo Kalilea. ʼI tanatou ʼosi heheka ki te vaka, neʼe fakatokagaʼi e te kau tisipulo ko tanatou foʼi pane pe e tahi, he neʼe galo ke nātou ʼave hanatou ʼu foʼi pane.

ʼI tana manatuʼi tana felogoi fakamuli mo te kau Faliseo pea mo te kau Satuseo ʼaē ʼe kau mo Helote, neʼe fakatokaga age ia Sesu ki tana ʼu tisipulo: “Ke ʼala ʼokotou mata, ke koutou nonofo tokaga ki te meʼa fakatupu ʼa te kau Faliseo pea mo te meʼa fakatupu ʼa Helote.” ʼE ʼiloga mai ia, ʼi tanatou logo ki te palalau ʼa Sesu ʼo ʼuhiga mo te meʼa fakatupu, neʼe ʼui e te kau tisipulo ʼe palalau Sesu ʼo ʼuhiga mo tanatou ʼolo ʼaē kae galo te ʼu pane, koia neʼe kamata ai tanatou fefaipalalauʼaki ʼo ʼuhiga mo te faʼahi ʼaia. ʼI tana fakatokagaʼi ʼaē ʼo tanatou faihala, neʼe ʼui age e Sesu kia nātou: “He koʼe e koutou fefaipalalauʼaki ʼi te mole ʼi ai ʼaē ʼo hakotou ʼu pane?”

Neʼe heʼeki faʼa fualoa atu, e lagi ko he ʼaho e tahi peʼe lua, neʼe fafaga faka milakulo ai e Sesu te ʼu hahaʼi ʼe lauʼi afe ʼaki te ʼu pane. Neʼe tonu la ke mahino ki tana ʼu tisipulo ko te mole ʼi ai ʼaē ʼo he foʼi pane ʼe mole ko te meʼa ʼaia ʼe manatu kiai. “ ʼE mole kei koutou manatuʼi koa la, te temi ʼaē neʼe ʼau tofi ai te ʼu foʼi pane e nima maʼa te ʼu tagata e toko nima afe, neʼe ko kato fofonu e fia ʼaē neʼe koutou tānaki?”

“E hogofulu-ma-lua”, ko tanatou tali age ʼaia.

“ ʼI taku tofi te ʼu foʼi pane e fitu maʼa te ʼu tagata e fā afe, neʼe ko kato fofonu ʼaiʼaga meʼa kai e fia ʼaē neʼe koutou tānaki?”

“E fitu”, ko tanatou tali age ʼaia.

“ ʼE mole koa la heʼeki koutou mahino koutou kiai? ko te fehuʼi age ʼaia ʼa Sesu. E feafeaʼi takotou mole mahino neʼe mole ko he ʼu pane ʼaē neʼe ʼau palalau atu kiai? Kae ke koutou nofo tokaga ki te meʼa fakatupu ʼa te kau Faliseo pea mo te kau Satuseo.”

Neʼe hoki mahino ai leva te kau tisipulo. Ko te meʼa fakatupu, te meʼa ʼaē ʼe ina fakalagaʼi te ʼeho pea mo ina fakatupu te falena ʼaē kua natu ʼo te pane, ʼe ko te kupu ia neʼe fakaʼaogaʼi moʼo fakatātā ʼo te meʼa ʼaē ʼe kovi. Kua hoki mahino leva te kau tisipulo neʼe fakaʼaogaʼi e Sesu te fakatā, ko tana fakatokaga kia nātou ke nātou nofo tokaga ki “te akonaki ʼa te kau Faliseo pea mo te kau Satuseo”, ʼaē ʼe fakatupu kovi. Maleko 8:1-21; Mateo 15:32 ki te 16:12.

▪ He koʼe neʼe ʼolo te hahaʼi mo tanatou ʼu kato lalahi ʼaiʼaga meʼa kai?

▪ ʼI tanatou mavae ʼi Tekapole, ko te ʼu folau fea koa ʼaē neʼe fai e Sesu ʼi te vaka?

▪ Ko te fakatokaga ʼa Sesu ʼo ʼuhiga mo te meʼa fakatupu neʼe fakatupu ʼaki ai te faihala fea ʼa te kau tisipulo?

▪ Koteā te faka ʼuhiga ʼo te ʼu palalau ʼa Sesu ʼaē “ko te meʼa fakatupu ʼa te kau Faliseo pea mo te kau Satuseo”?