Kapite 78

Koutou Nonofo Teuteu!

ʼI TANA ʼosi fakatokaga ki te hahaʼi ʼo ʼuhiga mo te mānumānu pea mo ʼui age ki tana ʼu tisipulo ke ʼaua naʼa nātou tokaga fakavalevale ki te ʼu koloā fakamālama, neʼe fai age e Sesu te fakaloto mālohi ʼaenī: “ ʼAua naʼa ke manavasiʼi, kiʼi faga ōvi, heʼe ko takotou Tāmai neʼe ina leleiʼia te foaki atu ʼo te puleʼaga kia koutou.” ʼE ina fakahā ʼi henī ko te hahaʼi tokosiʼi (144 000, ohage ko tona fakahā fakalelei anai ki muli age) ʼe nātou faʼufaʼu anai te Puleʼaga ʼo selo. Ko te tokolahi ʼo te hahaʼi ʼaē ka nātou maʼu anai te maʼuli heʼegata ʼe ko te hahaʼi fakalogo anai ʼi te kele ʼo te Puleʼaga ʼaia.

Te “puleʼaga”! ʼI meʼa ʼofa fakatalakitupua leva! ʼI tana fakaviliviliʼi ʼo tana kau tisipulo ke nātou tali te meʼa ʼofa ʼaia ohage ko te meʼa ʼaē ʼe tonu ke fai, neʼe ʼui maʼa Sesu kia nātou: “Koutou fakatau te ʼu meʼa ʼaē ʼakotou pea ke koutou fai he ʼu meʼa ʼofa ʼaki he loto manavaʼofa.” ʼIo, ʼe tonu ke nātou fakaʼaogaʼi te ʼu meʼa ʼaē ʼe nātou maʼu ke ʼaoga ʼi te faʼahi fakalaumālie ki tonatou ʼu kāiga, pea ʼe nātou tānaki ai foki “he koloā ʼe mole toe ʼosi ʼi te lagi”.

ʼOsi ʼaia pea fakaloto mālohiʼi e Sesu tana kau tisipulo ke nātou nonofo teuteu ki tana liliu mai. Neʼe ina ʼui age: “Ke haʼi ʼokotou ʼu koga loto pea ke fakamū ʼokotou ʼu mālama, pea ko koutou totonu, ke koutou tatau mo he ʼu tagata ʼe fakatalitali ki tonatou pule, mokā liliu mai te fai ʼohoana, ke feala te avahi age ki ai ʼi te temi pe ʼaē ʼe haʼu ai ʼo tā te matapā. ʼE manuʼia te ʼu tagata kaugana ʼaia ʼi te kaku mai ʼo tonatou pule, ʼo ina maʼu mai ia nātou ʼe nātou leʼo! ʼE ʼau tala moʼoni atu kia koutou, ʼe ina haʼi anai tona koga loto pea ʼe ina fakanofo anai nātou ki te laupapa kai pea, ʼi tana fakaōvi age, ʼe kaugana anai ia kia nātou.”

ʼI te lea fakatātā ʼaia, ʼe fakahā ai e te ʼu tagata faifekau ʼe nātou nonofo teuteu moʼo tali ʼo tonatou pule ʼi tana liliu mai koteʼuhi he neʼe nātou lokuloku ʼonatou kofu loloa ʼonatou haʼi ʼi tonatou lalo kiliʼi pipi, pea mo nātou haga fai tanatou ʼu gāue ʼo fualoa ʼaupito ʼi te pōʼuli ʼaki te mū ʼo te ʼu mālama neʼe ʼuʼutu ʼo fonu lelei. Neʼe fakamahino age e Sesu: ‘Kapau ʼe haʼu te pule ʼi te lua leʼo [ʼi te hola hiva afiafi ki te māʼupō,] peʼe ko te tolu leʼo [ʼi te māʼupō ki te hola tolu māfoatā], pea ina maʼu mai ia nātou ʼe nātou fai feiā, ʼe manuʼia ia nātou!’

ʼE faikehe te fakapale e te pule tana ʼu tagata kaugana: neʼe ina fakafālō ia nātou ki te laupapa kai pea ina tauhi ia nātou, ʼo mole ina gaohi ia nātou ohage ko he ʼu tagata kaugana, kae ohage ko he ʼu kaumeʼa agatonu. ʼI fakapale lelei leva ʼaia ʼi tanatou gāue ʼi te po katoa maʼa tonatou pule ʼo talitali ki tana liliu mai! Neʼe fakaʼosi fēnei te palalau ʼa Sesu: “Ke toe feiā mo koutou, ke koutou nonofo teuteu, heʼe ko te hola ʼe mole koutou manatu kiai ʼaē ʼe haʼu ai te Foha ʼo te tagata.”

Pea fai age ai e Petelo te fehuʼi ʼaenī: “ ʼAliki, ʼe ko mātou koa ʼaē ʼe ke fai kiai te lea fakatātā ʼaenī, peʼe toe kau ai mo te hahaʼi fuli?”

Neʼe mole tali fakahagatonu age ia, ka neʼe fakaʼaogaʼi e Sesu te tahi lea fakatātā. “Ko ai moʼoni koa te tagata tauhi ʼapi agatonu, ko tana fehuʼi age ʼaia, ʼaē ka fakanofo anai e tona pule ki tana kaugā hahaʼi ke ina foaki age kia nātou tonatou ʼinasi meʼa kai ʼi tona temi totonu? Manuʼia te tagata faifekau ʼaia, mo kapau ʼi te kaku mai ʼo tona pule, ʼe ina maʼu ia ʼe ina fai fēnei! Moʼoni, ʼe ʼau tala atu kia koutou, ʼe ina fakanofo anai ia ke pule ki ʼana meʼa fuli.”

Ko te “pule” ʼaē ʼe talanoa ki ai ʼi henī ʼe ko Sesu Kilisito. Ko te “tagata tauhi ʼapi” ʼe ina fakatātā te “kiʼi faga ōvi” ʼo tana ʼu tisipulo mokā talanoa kia nātou fakatahi. Ko te kupu ʼaē ko te “kaugā hahaʼi” ʼe ina toe hinoʼi pe te toko 144 000 kilisitiano ʼaia ʼe nātou maʼu te Puleʼaga ʼo selo, kae ʼe ina fakatokagaʼi mai te ʼu gāue ʼaē ʼe nātou fai takitokotahi. Ko te “ ʼu meʼa fuli” ʼaē neʼe tuku ke taupau e te tagata tauhi ʼapi agatonu ʼe ina fakatātā te ʼu meʼa faka hau ʼo te pule ʼi te kele, ʼaia ʼe kau ai te hahaʼi fakalogo ʼo tona Puleʼaga ʼi te kele.

ʼI te hoko atu ʼo te lea fakatātā, neʼe fakahā age ai e Sesu ko nātou fuli ʼaē ʼe kau ki te kalasi ʼo te tagata tauhi ʼapi, peʼe ko te tagata kaugana ʼe mole nātou nonofo agatonu fuli anai. Neʼe ina fakamahino age: “Kae kapau ko te tagata kaugana ʼaia ʼe ina ʼui fēnei ʼi tona loto: ‘Ko toku pule ʼe tuai tana haʼu’, pea ina kamata tā te kau kaugana tagata pea mo te kau kaugana fafine, pea mo kai mo ʼinu pea mo konahia, ko te pule ʼo te tagata kaugana ʼaia ʼe haʼu anai ʼi he ʼaho ʼe mole talitali ki ai (...), pea ʼe ina tautea anai ia ʼo mamafa ʼaupito.”

Neʼe fakahā e Sesu neʼe ‘fakamū e tana haʼu te afi’ ʼi te kau Sutea, koteʼuhi neʼe tali e ʼihi tana ʼu akonaki kae neʼe fakafisi ʼihi kiai. Kua ʼosi ia taʼu e tolu tupu ki te papitema ʼo Sesu ʼi te vai. Kae ʼi te temi nei kua fakaōvi tona papitema ʼi te mate ki tona fakaʼosi, pea koʼeni te meʼa ʼe ina logoʼi ʼi tona loto: “ ʼE ʼau nofo ʼi te tuʼania ʼo aʼu ki tona iku!”

ʼI te ʼosi ʼo tana fai te ʼu fakatokaga ʼaia ki tana ʼu tisipulo, neʼe toe maliu ia Sesu ki te hahaʼi. Neʼe lotomamahi ʼi tana sio ʼaē ʼe nātou haga fakafisi aipe ki te fakamoʼoni kia ia pea mo te maʼuhiga ʼo ia logope la te ʼu meʼa ʼaē neʼe ina fai. “Ka koutou sisio ki he ʼao ʼe ʼalu ake ʼi te ʼu potu fenua ʼo te potu hihifo, ko tana fakatokagaʼi age ʼaia, pea ʼe koutou ʼui atu aipe: ‘Ko te afā ka haʼu’, pea ʼe hoko te meʼa ʼaia. Pea ka koutou sisio ko te matagi mai te potu toga ʼaē ʼe agiagi, ʼe koutou ʼui: ‘ ʼE ʼi ai anai he vevela kovi’, pea ʼe hoko te meʼa ʼaia. ʼAē kau malualoi! ʼE koutou ʼiloʼi te sioʼi ʼo te agaaga ʼo te kele pea mo te lagi, kae he koʼe ia ʼe mole koutou ʼiloʼi koutou te sioʼi ʼo te temi nei?” Luka 12:32-59.

▪ Ko te tokofia ʼaē ʼe nātou faʼufaʼu te “kiʼi faga ōvi”, pea koteā te meʼa ʼe nātou tali?

▪ Neʼe feafeaʼi te fakahā age e Sesu ki tana kau tisipulo te maʼuhiga ʼaē ʼo te nofo teuteu?

▪ ʼI te lea fakatātā ʼa Sesu, ko ai ʼaē ʼe fakatātā e te “pule”, te “tagata tauhi ʼapi”, te “kaugā hahaʼi”, te “ ʼu meʼa fuli”?