Kapite 130

ʼI Te Matatai ʼo Kalilea

ʼI TANATOU fakalogo ki te fakatotonu ʼaē neʼe fai age e Sesu ʼi muʼa atu, kua toe liliu nei te kau ʼapositolo ki Kalilea. Kae, ʼe mole nātou ʼiloʼi he meʼa ke nātou fai. Koia neʼe mole fualoa, pea ʼui age e Petelo kia Tomasi, mo Natanaele, mo Sake, mo tona tēhina ko Soane pea mo te tahi ʼu ʼapositolo e toko lua: “ ʼE ʼau ʼalu ʼo gelu.”

“ ʼE mātou ʼolo mo koe”, ko te ʼui age ʼaia ʼa te toko ono.

Neʼe mole nātou maʼu he meʼa ʼi te po katoa ʼaia. Kae, ʼi te ʼaho ake, neʼe hā age ia Sesu ʼi te mataʼone, kae neʼe mole fakatokagaʼi e te kau ʼapositolo ko ia. Neʼe pāui mamaʼo atu Sesu kia nātou: “Fānau, ʼe ʼi ai koa hakotou meʼa kai?”

“Kailoa!” ko tanatou kalaga ʼaia mai te vaka.

“Koutou ʼaʼau te kupega ʼi te faʼahi mataʼu ʼo te vaka pea ʼe koutou maʼu ai anai”, ko te ʼui ʼaia e Sesu. ʼO mulimuli pe te kau ʼapositolo ki te fakatotonu pea neʼe mole kei nātou lavaʼi te toho mai ʼo tonatou kupega ʼi te kua lahi fau ʼo te ika.

Neʼe kalaga ia Soane: “Ko te ʼAliki!”

ʼI tana logo ki te ʼui ʼaia, neʼe tui e Petelo tona kofu tuʼa, koteʼuhi neʼe ina toʼo ʼona mutuʼi meʼa, pea fakatō ia ki te tai. Pea kāuga ia meta e 90 ʼo aʼu ki te mataʼone. Ko te ʼu ʼapositolo ʼaē neʼe mulimuli ia te ia ʼi te vaka veliveli mo toho te kupega ʼaē kua fonu ko te ika.

ʼI tanatou hake ʼaē ki ʼuta neʼe nātou maʼu te afi kua mamala mo te ʼu ika ʼe tunu ai, pea mo te ʼu foʼi pane. “ ʼAumai he ʼu ika ʼi te ʼu ika ʼaē neʼe koutou maʼu”, ko te ʼui ʼaia ʼa Sesu. Neʼe heka ia Petelo ki te vaka pea ina toho ake te kupega ki te mamaha. Neʼe maʼu ai te ʼu ika lalahi e 153!

“Koutou ʼōmai ʼo kakai”, ko te fakaafe age ʼaia ʼa Sesu.

Neʼe mole he tahi ia nātou neʼe ina lavaʼi te fehuʼi age ki ai: “Ko ai koe?”, heʼe kua nātou ʼiloʼi fuli pe ko Sesu. Ko tana hā tuʼa fitu leva ʼaia talu tona fakatuʼuake, pea ʼe ko tana hā tuʼa tolu leva ʼaia ki te ʼu ʼapositolo e tokolahi. ʼI te temi leva ʼaenī, ʼe ina vahevahe age te meʼa kai, ʼo foaki kia nātou takitokotahi te moʼi pane pea mo te ika.

ʼI tanatou ʼosi kakai fuli, neʼe lagi sio ia Sesu ki te gelu ʼaia neʼe ika, pea ina fehuʼi age kia Petelo: “Simone, foha ʼo Soane, ʼe ke ʼofa koa kia te ʼau ʼo lahi ake ia nātou ʼaenī?” Peʼe, lagi ʼi te tahi ʼu faʼahiga palalau: ʼE lahi koa tau pipiki ki tau ʼu gāue faka tautai ʼi te gāue ia ʼaē neʼe ʼau teuteuʼi koe kiai?

“ ʼE ke ʼiloʼi pe ʼe ʼau ʼofa kia te koe”, ko te tali fakamalotoloto ʼaia ʼa Petelo.

“Fafaga taku ʼu faga akeno”, ko te ʼui ʼaia ʼa Sesu.

ʼI te tuʼa lua, neʼe ina fehuʼi age: “Simone, foha ʼo Soane, ʼe ke ʼofa koa kia te ʼau?”

“ ʼIo, ʼAliki, ʼe ke ʼiloʼi pe ʼe ʼau ʼofa kia te koe”, ko te tali ʼaia ʼa Petelo.

“Taki ʼo fafaga taku ʼu kiʼi faga ōvi”, ko tona toe fakatotonu age ʼaia e Sesu.

ʼOsi ʼaia, pea ʼi te tuʼa tolu, neʼe ina fehuʼi age: “Simone, foha ʼo Soane, ʼe ke ʼofa koa kia te ʼau?”

ʼI te temi leva ʼaia, kua lotomamahi ia Petelo. E lagi ʼe mahalohalo ia naʼa ʼe mole loko tui ʼapē ia Sesu ki tana agatonu. Koteʼuhi, neʼe mole heʼeki faʼa fualoa atu, ʼi te temi ʼaē neʼe fakatūʼa ai ia Sesu, neʼe fakafisi tuʼa tolu ia Petelo ʼe mole ina ʼiloʼi ia ia. Koia neʼe ʼui age ai e Petelo. “ ʼAliki, ʼe ke ʼiloʼi pe te meʼa fuli, ʼe ke ʼiloʼi pe ʼe ʼau ʼofa kia te koe.”

“Fafaga taku ʼu kiʼi faga ōvi”, ko te fakatotonu tuʼa tolu age leva ʼaia e Sesu.

ʼI henī, neʼe mole ko Petelo tokotahi pe ʼaē neʼe fakahaga ki ai te ʼu palalau, kae ʼe toe kau ai foki mo nātou ʼaē: ʼe fia fakamahino age e Sesu pe ko te gāue feafeaʼi ʼaē ʼe ina loto ke nātou fai. ʼI te kua vave pe ʼo tana mavae ʼi te kele, neʼe loto ia Sesu ke nātou fai te gāue ʼaia ke nātou tokaga lelei ai kia nātou ʼaē ʼe fia ʼōmai anai ki te lotoʼā ʼa te ʼAtua.

ʼE fakahā nei leva e Sesu, ohage pe ko tona haʼi pea mo matehi ʼuhi ko tana fai te gāue ʼaē neʼe foaki age e te ʼAtua, ʼe toe tau anai ia Petelo mo te ʼu faigataʼaʼia. “ ʼI te temi ʼaē neʼe kei ke tūpulaga ai, ko tana ʼui age ʼaia, neʼe ke ʼai tokotahi tou noʼo pea neʼe ke ʼalu ki te koga meʼa ʼaē ʼe ke loto kiai. Kae ka ke liliu anai ʼo matuʼa, ʼe ke faoʼi anai ʼou nima pea ʼe haʼu anai he tahi ʼo haʼi tou noʼo pea ʼe ina ʼave anai koe ki te koga meʼa ʼaē ʼe mole ke loto kiai.” Logope la ko te mate faka maletile ʼe ʼamanaki kia Petelo, neʼe ʼui age fakamamafa e Sesu kia ia: “Haga muli mai ia te ʼau.”

ʼI tana maliu age, neʼe sio ia Petelo kia Soane pea ina fehuʼi age: “ ʼAliki, koteā te meʼa ka fai anai e ia ʼaē?”

“Kapau ʼe ʼau loto ke nofo ʼo kaku ki taku haʼu, koteā ia tona ʼaoga kia te koe? Ko koe, haga muli mai ia te ʼau.” Ko te ʼu palalau ʼaia ʼa Sesu neʼe tupu ai te ʼui ʼa te ʼu tisipulo tokolahi ʼe mole mate anai te ʼapositolo ko Soane. Kae, ohage ko te fakamahino anai e te ʼapositolo ko Soane ki muli age, neʼe mole ʼui age e Sesu ʼe mole mate anai ia; ka neʼe ina ʼui age pe: “Kapau ʼe ʼau loto ke nofo ʼo kaku ki taku haʼu, koteā ia tona ʼaoga kia te koe?”

Ki muli age, neʼe toe fai foki e Soane te fakatokaga ʼaenī ʼaē ʼe hā lelei mai ai tana ʼu manatu: “ ʼIo, ʼe ʼi ai te tahi ʼu meʼa neʼe fai e Sesu. Kapau ʼe tohi te ʼu meʼa fuli ʼaia, ʼe ʼau mahalo, ko te malamanei ʼe mole feala anai ke ina tatānaki te ʼu takaiga tohi ʼaē ka tohi anai.” Soane 21:1-25; Mateo 26:32; 28:7, 10.

▪ Koteā ʼaē neʼe hā mai ai ko te kau ʼapositolo ʼe mole nātou ʼiloʼi he meʼa ke nātou fai ʼi Kalilea?

▪ ʼI te matatai ʼo te tai ʼo Kalilea, neʼe feafeaʼi te ʼiloʼi ʼo Sesu e te kau ʼapositolo?

▪ Neʼe hā tuʼa fia ia Sesu talu mai tona fakatuʼuake?

▪ Neʼe fakahā lelei feafeaʼi e Sesu te gāue ʼaē ʼe ina loto ke fai e tana kau ʼapositolo?

▪ Neʼe fakahā feafeaʼi e Sesu te faʼahiga mate ʼaē ka hoko anai kia Petelo?

▪ Koteā te ʼu fakatokaga ʼa Sesu ʼo ʼuhiga mo Soane ʼaē neʼe mole mahino lelei ki te tokolahi ʼo te kau tisipulo?