Faʼahi 1
ʼE Tokaga Moʼoni Koa Te ʼAtua Kia Tatou?
1, 2. Koteā koa te fehuʼi ʼa te ʼu hahaʼi ʼo ʼuhiga mo te ʼAtua, pea koteā tona tupuʼaga?
ʼI HE temi ʼo tokotou maʼuli, neʼe lagi koutou fehufehuʼi fēnei: “Kapau ʼe ʼi ai he ʼAtua, pea kapau ʼe tokaga moʼoni kia tatou, he koʼe koa ʼe ina fakagafua te ʼu mamahi? ” Neʼe tou tau fuli mo te mamahi, pe neʼe tou ʼiloʼi he tahi neʼe tau mo he fahaʼi feiā.
2 ʼE moʼoni, lolotoga te Hisitolia, neʼe ʼiloʼi e te tagata te mamahi fakasino pea mo lotomamahi ʼuhi ko te ʼu tau, te ʼu faʼahiga meʼa fakatupu mamahi, te fakapō, te heʼeagatonu, te masiva, te mahaki pea mo te mate ʼo niʼihi neʼe nātou ʼoʼofa mamahi ki ai. ʼI totatou 20 sēkulō pe, ko te ʼu tau neʼe matematehi ai te ʼu hahaʼi ʼo laka age ʼi te 100 miliona. Pea ko te ʼu lauʼi teau miliona hahaʼi, ko ʼihi neʼe lāvevea, neʼe puli ʼonatou nofoʼaga peʼe ko tonatou ʼu koloā. Ko totatou temi neʼe hoko ai te ʼu meʼa fakalialia, ko tona ʼuhiga ki te tokolahi ko te lotomamahi pea mo te maligi ʼo te ʼu loʼimata pea mo te loto heʼe ʼamanaki.
3, 4. Koteā koa te manatu ʼa te tokolahi ʼuhi ko te fakagafua ʼaē e te ʼAtua te mamahi?
3 Ko ʼihi kua nātou lotovaivai pea mo ʼui maʼa nātou kapau ʼe ʼi ai he ʼAtua, ʼe mole ina tokagaʼi moʼoni ia tatou. ʼI te manatu ʼa ʼihi ʼe mole ʼi ai he ʼAtua. Ohage la, ko te tagata, neʼe gaohi koviʼi ʼuhi ko tona lanu lolotoga te ʼUluaki Tau faka malamanei ʼaē neʼe puli ai tona ʼu kaumeʼa pea mo ʼihi ʼi tona famili, neʼe ina fai te fehuʼi ʼaenī: “Neʼe ʼifea koa te ʼAtua ʼi te temi ʼaē neʼe mātou loto ai ke tokoni mai? ” Ko te tahi tagata, neʼe hāo ʼi te ʼu lauʼi miliona hahaʼi ʼaē neʼe matematehi e te kau nasi lolotoga te Lua Tau faka malamanei, ʼaki tona lotomamahi ʼuhi ko tana sio mata ki te ʼu mamahi ʼaia neʼe ina ʼui fēnei: “Ka pau la ʼe feala ha kotou ʼemo toku loto, pea ʼe koutou konahia ai.”
4 Koia foki, ʼe tokolahi te ʼu hahaʼi ʼe mole nātou mahino peʼe feafeaʼi te fakagafua e he ʼAtua agalelei ke hoko he ʼu meʼa fakalialia feiā. ʼE nātou fehufehuʼi peʼe ina tokagaʼi moʼoni koa ia tatou peʼe ʼi ai moʼoni koa he ʼAtua. ʼI te manatu ʼa ʼihi, ko te mamahi ʼe pipiki tahi ia mo te maʼuli ʼo te tagata.
[Paki ʼo te pasina 2, 3]
Ko he mālama foʼou kua pulihi ai te mamahi ʼe kua ōvi mai koa?