Kua Nātou Fakatuʼutuʼu Moʼo Fai ʼo Te Finegalo ʼo Sehova
Kāpite 12
Tou Lagolago Ki Te ʼu Gāue ʼAē ʼe Pipiki Ki Te Puleʼaga ʼo Te ʼAtua ʼAē ʼe Fakahoko ʼi Totatou Telituale Pea ʼi Te Mālamanei
MOʼO fakahoko ia te lea faka polofetā ʼaē neʼe fai e Sesu ʼo ʼuhiga mo te ʼu ʼaho fakamuli, ʼe faka mafola e te kau Fakamoʼoni ʼa Sehova ia te logo lelei “ ʼo kaku ki te ʼu potu taupotu ʼo te kele.” (Gāue 1:8; Mat. 24:14) ʼI tanatou fai fēia, ʼe natou foaki noa ai tonatou temi pea mo tonatou mālohi moʼo palalau ki te hahaʼi ʼo ʼuhiga mo te ʼu manatu fakalaumālie. ʼI tanatou falala ki te tokoni ʼaē ʼa Sehova ki tana ʼu kaugā gāue, ʼe mole natou tuʼania ai, kae natou haga fakamuʼamuʼa ʼi tonatou maʼuli ia te Puleʼaga ʼo te ʼAtua. (Mat. 6:25-34; 1 Ko. 3:5-9) ʼE tou sio ki te leleiʼia ʼo nātou e Sehova pea mo tana tapuakinaʼi nātou, heʼe fua lelei tanatou gāue.
TOU LAGOLAGO KI TE ʼU GĀUE ʼO TE PULEʼAGA ʼO TE ʼATUA ʼI TE MĀLAMANEI KĀTOA
Kā sisio ʼihi ki te fakaʼaogaʼi e te kau Fakamoʼoni ʼa Sehova he ʼu ʼaluʼaga kehekehe moʼo faka mafola ia te logo lelei iā ʼaho nei, pea mo tufa noa te ʼu tuʼuga tohi faka Tohi-Tapu, ʼe natou fai te fehuʼi ʼaenī: “ ʼE kotou lava fakahoko feafeaʼi te ʼu tuʼuga gāue ʼaia?” ʼE moʼoni, ʼe ʼaoga he paʼaga ke feala ke haʼele te ʼu fale tā tohi ʼaē ʼe faʼu ai te ʼu tuʼuga Tohi-Tapu pea mo te ʼu tohi faka Tohi-Tapu. ʼE toe ʼaoga he falā moʼo laga pea mo taupau ke lelei te ʼu Petele ʼaē ʼe nonofo ai ia nātou ʼaē ʼe gāue ʼi te ʼu foʼi masini tā tohi, mo tokaga ki te gāue fai faka mafola, pea ʼi he tahi selevisi temi kātoa moʼo fakahaʼele ki muʼa ia te logo lelei. Tahi ʼaē meʼa, ʼe akoako te kau misionea pea mo fekauʼi nātou ki te ʼatu ʼu fenua. ʼE toe liliu ʼihi kau fai faka mafola ko he ʼu pioniē makehe, ʼo natou gāue temi kātoa ʼi te ʼu koga meʼa ʼaē ʼe tuʼu mamaʼo peʼe ʼi te ʼu kōkelekāsio ʼaē ʼe mole kaugamālie. Ko te ʼu taupau feʼoloʼaki, ʼaē ʼe natou gāue maʼa te ʼu kōkelekāsio, ʼe foaki kiā nātou he kiʼi tokoni faka paʼaga, ke hoko atu tanatou gāue. ʼE hā lelei mai, ʼe ʼaoga te falā iā ʼaho nei moʼo fakahoko te minisitelio, ʼi totatou telituale peʼe ʼi te mālamanei kātoa. ʼE haʼu koa maifea te falā ʼaia?
Logolā ʼe mole totogi tatatou ʼu tohi mokā tou tuku ki te hahaʼi ʼi te fai faka mafola, kae tokolahi ʼe natou loto fakafetaʼi ki te gāue ʼa te kau Fakamoʼoni ʼa Sehova pea mo natou fiafia ʼi te foaki he falā moʼo lagolago ki te gāue ʼi te mālamanei. Pea tahi ʼaē meʼa, ʼe momoli e te kau Fakamoʼoni he falā ki te ʼu filiale ʼa te kau Fakamoʼoni ʼa Sehova. ʼE natou ʼiloʼi te maʼuhiga ʼo te faʼahi ʼaia, ʼo natou faʼifaʼitaki ai te loto fia foaki ʼaē neʼe maʼu e te ʼu kaugana ʼa te ʼAtua ʼi te temi muʼa, ʼaē neʼe natou foaki lahi moʼo lagolago ki te laga ʼo te ʼu fale moʼo tauhi kiā Sehova. (Eke. 35:20-29; 1 Fkma. 29:9) Ko ʼihi ʼe natou foaki tonatou ʼu koloa fuli, kae ʼi te agamāhani ko he meʼa ʼofa ʼe foaki e he tahi, peʼe ko te ʼu kōkelekāsio, pea mo te ʼu silikō, ʼe ko he falā veliveli. Kā fakatahiʼi te ʼu meʼa ʼofa fuli ʼaia, pea ʼe feʼauga moʼo hoko atu te minisitelio.
Koia, ʼe kau te kau Fakamoʼoni ʼa Sehova ki te faka mafola ʼo te logo lelei pea ʼe ko he pilivilēsio maʼa nātou ia te fakaʼaogaʼi ʼo tanatou falā pea mo te tahi atu ʼu koloa moʼo fakahaʼele ki muʼa te gāue ʼaia. Ko Sesu pea mo tana kau tisipulo neʼe natou ʼai te puha ke tuku kiai te falā, ʼaē neʼe fakaʼaogaʼi moʼo tokoni ki te kau māsisiva pea mo totogi te ʼu meʼa ʼaē neʼe ʼaoga kiā nātou. (Soa. 12:6; 13:28, 29) ʼE toe palalau ʼi te Tohi-Tapu ki te ʼu fafine neʼe natou lagolago ʼaki tonatou ʼu koloa ki te minisitelio ʼa Sesu pea mo tana kau tisipulo. (Mko. 15:40, 41; Luka 8:3) ʼAki he loto fakafetaʼi, neʼe tali e te ʼapositolo ko Paulo te tokoni ʼofa faka paʼaga ʼa nātou ʼaē neʼe natou loto ke tuputupu ia te logo lelei pea mo fia kau ki tana minisitelio. (Filp. 4:14-16; 1 Tes. 2:9) ʼI te temi nei, ʼe haga mulimuli te kau Fakamoʼoni ʼa Sehova ki te faʼifaʼitaki ʼaia ʼo te temi muʼa, ʼa te kau Kilisitiano ʼaē neʼe natou faʼafai ʼi te selevisi pea mo foaki he ʼu meʼa ʼofa. Koia, ʼe feala ai ke foaki “noa te vai ʼo te maʼuli” ʼi te potu fuli pē ki te hahaʼi loto fakamālotoloto.—Fakh. 22:17.
TOU LAGOLAGO KI TE ʼU MEʼA ʼAĒ ʼE ʼAOGA KI TE KŌKELEKĀSIO
Ko te falā ʼaē ʼe fakaʼaogaʼi e te kōkelekāsio moʼo totogi te ʼu meʼa ʼaē ʼe ʼaoga, ʼe toe fai ʼaki te ʼu meʼa ʼofa. ʼE mole fai he tae falā pea ʼe mole fakamaʼua ke lī he falā, peʼe kole falā, kae ʼe maʼu ʼi te ʼu fale fono te ʼu kiʼi puha tānaki meʼa ʼofa, ke feala ke tahi foaki he meʼa ʼofa ʼo mulimuli “ki te meʼa kua ina fakatotonu ʼi tona loto.”—2 Ko. 9:7.
ʼE fakaʼaogaʼi tāfito te ʼu meʼa ʼofa moʼo fakahaʼele pea mo taupau ke lelei te Fale ʼo Te Puleʼaga. ʼE feala ke fai e te kolesi ʼa te kau tagata ʼāfea te tonu ʼaē ke momoli he falā ki te filiale ʼa te kau Fakamoʼoni ʼa Sehova, ke ina fakaʼaogaʼi moʼo fakatuputupu te gāue fai faka mafola ʼi te mālamanei. Kapau koia, pea ko te kōkelekāsio ʼaē kā ina tali anai te fakatuʼutuʼu ʼaia. Koia, ʼe lahi te ʼu kōkelekāsio ʼe natou fai he ʼu meʼa ʼofa moʼo lagolago ki te gāue fai faka mafola ʼi te mālamanei kātoa. ʼI ʼihi temi, ʼe lagi ʼi ai anai he tahi ʼu faʼahi ʼe maʼua ai anai ke lagolago kiai, kae kā mahino te kōkelekāsio kātoa ki te faʼahi ʼaia, pea ʼe mole ʼaoga anai ke tala tuʼumaʼu ia te ʼu meʼa ʼofa.
TE FAKAʼAOGAʼI ʼO TE ʼU MEʼA ʼOFA
ʼI te ʼosi fono fuli, ko he ʼu tagata ʼāfea peʼe ko he ʼu faifekau faka minisitelio e toko lua, neʼe hinoʼi e te kolesi ʼo te kau tagata ʼāfea, ʼe nā tānaki te falā ʼaē neʼe ʼai ki te ʼu kiʼi puha tānaki meʼa ʼofa pea mo nā tohi te lahi ʼo te falā ʼaia ʼi he pepa fakamoʼoni. (2 Ko. 8:20) Ko te kolesi ʼa te kau tagata ʼāfea ʼe ina fai anai he ʼu fakatuʼutuʼu lelei moʼo taupau te falā ʼaia ʼo aʼu ki te temi ʼaē kā momoli ai ki te filiale peʼe fakaʼaogaʼi ki te ʼu meʼa ʼaē ʼe ʼaoga ki te kōkelekāsio. ʼE lagi tonu anai ke ʼavahi he compte ʼi te fale paʼaga maʼa te kōkelekāsio. Ko te tehina ʼaē ʼe tokaga ki te falā ʼo te kōkelekāsio, ʼe ina tohi ʼi te māhina fuli ia te lahi ʼo te falā ʼaē ke lau ki te kōkelekāsio, pea hili māhina e tolu, ko te taupau pelesitā ʼe ina vakaʼi anai te lau ʼo te falā. ʼE fakamanatuʼi te faʼahi ʼaia ʼi Te Minisitelio ʼo Te Puleʼaga.
TE TOTOGI ʼO TE ʼU FAKATAHI FAKA SILIKŌ PEA MO TE ʼU FAKATAHI MAKEHE ʼAHO TAHI
Ko te totogi ʼo te ʼu meʼa ʼaē ʼe fakaʼaogaʼi ʼi te ʼu fakatahi ʼe fai ʼaki te ʼu meʼa ʼofa ʼa te kau Fakamoʼoni ʼo te ʼu silikō. ʼE ʼai te ʼu kiʼi puha tānaki meʼa ʼofa ʼi te ʼu fakatahi lalahi, ohagē pē ko te ʼu fono ʼo te kōkelekāsio. ʼE feala ai ke fai he ʼu meʼa ʼofa ki te silikō. Ko he tehina neʼe filifili e te taupau ʼo te silikō, ʼe tokaga anai ki te lau ʼo te falā, pea ina totogi te ʼu meʼa ʼaē neʼe ʼaoga ki te fakatahi, ʼaki te fakagafua e te taupau ʼo te silikō.
ʼE ko he meʼa lelei mokā feala ke totogi e te fakatahi ia te ʼu meʼa ʼaē neʼe ʼaoga, ʼaki te ʼu meʼa ʼofa ʼaē ʼe foaki ʼi te fakatahi ʼaia, pea ko te falā ʼaē kā toe ʼe tuku anai ki te compte ʼo te silikō. Kapau ʼe mole feʼauga te falā ʼi te fakaʼosi ʼo te fakatahi kae feala ke totogi ʼaki te falā ʼaē ʼe tuku ʼi te compte, pea ʼe mole ʼaoga ke faitohi ki te ʼu kōkelekāsio moʼo faka kātoa te falā ʼaē ʼe kei toe. Kae kapau ʼe mole feʼauga te falā ʼaē ʼi te compte ʼo te silikō moʼo totogi te ʼu meʼa ʼaē neʼe ʼaoga ki te fakatahi peʼe ki te fakatahi kā hoko mai, ohagē ko he falā ʼe tonu ke huʼi moʼo lue he fale ki te fakatahi, pea ʼe feala ke kole e te taupau ʼo te silikō ke fakahā ki te ʼu kōkelekāsio ia te pilivilēsio ʼaē ke natou tokoni ki te faʼahi ʼaia. ʼI te ʼu kolesi fuli ʼa te kau tagata ʼāfea, ʼe natou palalau anai ki te faʼahi ʼaia pea mo fakatuʼutuʼu te falā ʼaē ʼe feala anai ke lī e tanatou kōkelekāsio ki te compte ʼo te silikō. Pea ʼe natou tala ifo anai te fakatuʼutuʼu ʼaia ki tanatou kōkelekāsio.
Kā fakatahitahi te kau tagata ʼāfea ʼo te silikō ʼi he fakatahi, pea ʼe natou vakaʼi anai te fakaʼaogaʼi ʼo te falā ʼaē ʼe maʼu e te silikō. ʼE natou fai he ʼu tonu ʼo ʼuhiga mo te totogi ʼo te ʼu meʼa ʼaē ʼe ʼaoga moʼo fakahaʼele ʼo te fakatahi, te toʼo ʼa he ʼu meʼa gāue pea mo te falā ʼaē neʼe fakaʼaogaʼi e te ʼu taupau ʼo te silikō ʼi tanatou ʼaʼahi te silikō. ʼE feala ke momoli he falā moʼo lagolago ki te gāue fai faka mafola ʼi te mālamanei, ki te Falā Ki Te ʼu Fale ʼo Te Puleʼaga, ki te Fale ʼo Te Fakatahi peʼe ko he tahi age faʼahi maʼuhiga.
Ko he fakatuʼutuʼu ke foaki he falā ʼo ʼuhiga mo he ʼu meʼa ʼe mole pipiki ki te fakatahi, ʼe tonu ke tohi te fakatuʼutuʼu ʼaia ki he moʼi pepa pea mo fakahā ki te kau tagata ʼāfea. ʼI te fakatuʼutuʼu ʼaia, ʼe tonu ke tohi ai te lahi ʼo te falā ʼaē ʼe fia fakaʼaogaʼi pea mo fakahā ki te ʼu tagata ʼāfea ke natou fakagafua mokā tonu ke fakaʼaogaʼi te falā ʼo te silikō. ʼE mole lelei anai ke fakatuʼutuʼu ke foaki tuʼumaʼu he falā peʼe mole fakahā ia te lahi ʼo te falā ʼaē ʼe fia fakaʼaogaʼi. ʼE feala ke taupau e te filiale ia te falā ʼo te silikō ʼo aʼu ki te temi ʼaē kā ʼaoga ai ki te silikō.
ʼE fakatuʼutuʼu anai e te taupau ʼo te silikō ke vakaʼi te falā ʼo te silikō ʼi te hili ʼo te ʼu fakatahi faka silikō fuli pea mo te ʼu fakatahi makehe ʼaho tahi.
TOU TOKONI KIĀ NĀTOU ʼE MĀSISIVA
Ko te paʼaga ʼaē neʼe taupau e Sesu pea mo tana kau tisipulo ʼi te ʼu puha, neʼe fakaʼaogaʼi tāfito maʼa te kau māsisiva. (Mko. 14:3-5; Soa. 13:29) ʼE tonu anai ki te kau Kilisitiano ke natou hoko atu ia te maʼua ʼaia, he neʼe tala fēnei e Sesu: “Ko te kau māsisiva ʼe maʼu tuʼumaʼu pe iā koutou.” (Mko. 14:7) ʼE fakahoko feafeaʼi e te kau Fakamoʼoni ʼa Sehova tonatou maʼua ʼaia ʼi te temi nei?
ʼI ʼihi temi, ko ʼihi tehina pea mo tuagaʼane agatonu ʼi te kōkelekāsio ʼe ʼaoga kiā nātou he tokoni ʼi te faʼahi faka koloa heʼe kua mātutuʼa, peʼe māʼimoa, peʼe hoko kiā nātou he ʼu ʼaluʼaga neʼe mole natou loto kiai. Ko ʼihi ʼi te kōkelekāsio ʼaē ʼe natou tokagaʼi ia te ʼu faʼahi ʼaia, ʼe lagi uga anai e tonatou loto ke natou mulimuli ki te ʼu palalau ʼaenī ʼa te ʼapositolo ko Soane: “Ko ia ʼaē ʼe ina maʼu te ʼu koloa ʼo te mālama ʼaenī pea ʼe sio ki tona tehina ʼe maʼuli masiva kae ina pupunu te matapā ʼo tona ʼu ʼofa lahi, ʼe feafeaʼi he nofo ʼo te ʼofa ʼo te ʼAtua iā ia? ʼU kiʼi fānau, ʼaua naʼa tou ʼofa ʼaki pē te palalau mo te ʼalelo, kae tou ʼofa ʼaki he ʼu gāue pea mo te moʼoni.” (1 Soa. 3:17, 18; 2 Tes. 3:6-12) ʼE toe kau ki te tauhi moʼoni ia te lagolago ki te kau agatonu ʼaē ʼe ʼaoga kiai he tokoni faka koloa.—Sake 1:27; 2:14-17.
ʼI tana ʼuluaki tohi ʼaē kiā Timoteo, neʼe fakamahino e te ʼapositolo ko Paulo peʼe feafeaʼi te foaki ʼo te tokoni faka koloa kiā nātou ʼaē ʼe tāu mo te faʼahi ʼaia. ʼE tou lava maʼu tana tokoni ʼaia iā 1 Timoteo 5:3-21. Ko te ʼuluaki maʼua ʼa te kau Kilisitiano takitokotahi ke tokaga ki tona loto fale ʼo ia totonu. ʼE feala kiā nātou ʼaē kua mātutuʼa peʼe kua māʼimoa ke natou maʼu he tokoni mai tanatou fānau, peʼe ko tonatou ʼu mokopuna, peʼe ko ihi atu ʼo tonatou fāmili. ʼI ʼihi temi, ʼe feala ke maʼu he tokoni mai te puleʼaga peʼe ko he ʼu kautahi. Ko te fāmili peʼe ko ʼihi atu ʼe natou loto manavaʼofa anai, ʼo tokoni kiā ia ʼaē ʼe faigataʼaʼia ke ina fai ia te ʼu kole ʼaē ke ina maʼu ia te tokoni ʼaia. ʼE lagi hoko anai he ʼaluʼaga ʼe tonu ki te kōkelekāsio kātoa ke tokoni ki he ʼu tehina mo tuagaʼane ʼe faigataʼaʼia, pea kua fualoa tanatou nonofo agatonu. Kapau ʼe mole he tahi ʼi tonatou fāmili peʼe ko honatou kāiga moʼo tokoni kiā nātou peʼe mole maʼu he tokoni mai te puleʼaga, pea ʼe feala ki te kolesi ʼo te kau tagata ʼāfea ke natou fai he ʼu fakatuʼutuʼu lelei moʼo foaki he faʼahiga tokoni kiā nātou. Maʼa te kau Kilisitiano agatonu ʼe ko he pilivilēsio te foaki ʼo he tokoni kiā nātou ʼaē ʼe tau mo te faigataʼaʼia.
Tokolahi ʼo totatou ʼu tehina ʼe lagi nonofo ʼi te faigataʼaʼia ʼuhi ko te fakataga, te ʼu tau, te ʼu mafuike, te ʼu hālofia, te ʼu hoge, peʼe ko he ʼu tuʼutāmaki ʼe hoko māhani ʼi te ʼu temi faigataʼa ʼaenī. (Mat. 24:7-9) ʼI te ʼu ʼaluʼaga ʼaia, ʼe lagi mole feala ki te ʼu kōkelekāsio ʼo te ʼu kolo ʼaia ke natou fetokoniʼaki, koia ʼe tonu ai ki te Kolesi Pule ke ina kole te tokoni ʼo he ʼu tehina ʼo he tahi ʼu kolo. Neʼe fai fēia te kau Kilisitiano ʼi Asia Veliveli, neʼe natou foaki te meʼa kai ki te ʼu tehina ʼi Suta lolotoga te temi hoge. (1 Ko. 16:1-4; 2 Ko. 9:1-5) Kapau ʼe tou mulimuli ki tanatou faʼifaʼitaki, ʼe tou fakamoʼoni ai totatou ʼofa ki totatou ʼu tehina pea mo tou fakahā ai ko tātou ko he ʼu tisipulo moʼoni ʼa Sesu Kilisito.—Soa. 13:35.
TE TUFA ʼO TE ʼU TOHI
Ko te tufa ʼo te ʼu Tohi-Tapu pea mo te ʼu tohi faka Tohi-Tapu, ʼe ko he faʼahi maʼuhiga moʼo faka mafola ia te logo ʼo te Puleʼaga. ʼI te agamāhani, ʼe hinoʼi e te kolesi ʼa te kau tagata ʼāfea he tagata faifekau faka minisitelio ke tokaga ki te ʼu tohi, te ʼu kaupepa lalahi, pea mo te tahi atu ʼu tohi, pea mo hinoʼi he tahi tagata faifekau faka minisitelio ke tokaga ki te ʼu nusipepa. ʼE feala ke toʼo e te kau fai faka mafola fuli te ʼu tohi fuli ʼaia, ke natou tufa ki te hahaʼi ʼaē ʼe fia logo ki te logo lelei.
Ko te ʼu tehina ʼaē neʼe hinoʼi ki te ʼu gāue ʼaia, ʼe maʼuhiga kiā natou tonatou ʼu maʼua ʼaia. ʼE natou tohi te ʼu fetogi fuli ʼaē ʼe hoko ʼi te tānakiʼaga tohi. ʼE natou ʼiloʼi te ʼu tohi ʼaē ʼi te tānakiʼaga tohi pea mo te ʼu tohi ʼaē kua tufa ʼi te fai faka mafola, pea ko he fakatuʼutuʼu ʼe feala ai ke natou maʼu he ʼu tohi maʼa te kōkelekāsio. Mai tona ʼaluʼaga ʼaē ʼe fua lelei te ʼu tohi faka Tohi-Tapu moʼo tala ia te logo lelei, ʼe fakaloto mālohiʼi te kau fai faka mafola ke natou fakaʼaogaʼi ʼi tanatou minisitelio. ʼE fakahā ʼi Te Minisitelio ʼo Te Puleʼaga te tufa ʼo te ʼu māhina fuli, ke fakahoko kātoa pea mo fakatuʼutuʼu lelei te fai faka mafola ʼi te ʼu telituale.
ʼI totatou ʼuhiga kau Kilisitiano kua tou foaki totatou maʼuli ki te ʼAtua, ko tatatou poto gāue, totatou ʼatamai, mo totatou ʼu koloa, māʼiapē lā mo totatou maʼuli ʼe ko te ʼu meʼa ʼofa ia mai te ʼAtua, pea ʼe tonu ke tou fakaʼaogaʼi moʼo tauhi kiā te ia. (Luka 17:10; 1 Ko. 4:7) Kā tou fakaʼaogaʼi lelei te ʼu meʼa fuli ʼaē ʼe tou maʼu, pea ʼe tou fakahā ai totatou ʼofa lahi pea mo tatatou pipiki ʼaē kiā Sehova. ʼE tou fia faka maʼuhigaʼi ia Sehova ʼaki totatou ʼu koloa, heʼe tou ʼiloʼi ʼe ina leleiʼia te ʼu meʼa ʼofa fuli ʼaē ʼe tou foaki age kiā te ia moʼo fakahā tatatou pipiki lahi ʼaē kiā te ia. (Taag. 3:9; Mko. 14:3-9; Luka 21:1-4; Kol. 3:23, 24) Kapau ʼe tou maʼu te manatu ʼaē ʼe lelei ʼo ʼuhiga mo te ʼu koloa pea mo tou loto fia foaki, ʼe tou sio anai ki te fakahoko ʼo te ʼu palalau ʼaenī ʼa Sesu: “Neʼe kotou maʼu noa, kotou foaki noa.” Pea ʼe tou fiafia lahi anai.—Mat. 10:8b; Gāue 20:35.