ʼE Maʼuhiga Age ʼi He ʼu Mātaga Noa

Ko te kau ʼahiʼahi neʼe natou ʼofolele ki te ʼu pou ʼaē ʼi te tai ʼo te Metitelane ʼi Sesale, ko te ʼuafu ʼāfea ʼo te matāfaga ʼo Iselaele. Ko Helote Lahi ʼaē neʼe ina faʼu te taulaga ʼaia pea mo ina foaki te higoa ʼaia ʼo te kolo ʼo fakamanatuʼi ia Aukusito Sesale.

Ko te kau tagata kumi, neʼe lahi tanatou maʼu te ʼu meʼa ʼo te kolo, ohage la ko tona fale faigaoʼi lahi. Neʼe natou toe uku foki ʼi te tai ʼo vakaʼi ai pe neʼe feafeaʼi te faʼu ʼo te taulaga faigataʼa ʼaia ʼi te loaloaga ʼo te matāfaga ʼoneʼonea.

Ko te New York Times ʼo te ʼaho 8 ʼo sanualio 1991 neʼe ina fakahā te maʼu ʼo te ʼu pou ʼi te ʼu toega ʼo te fale matalelei neʼe tuʼu ʼi muʼa ʼi te loto tai. Ko te ʼu pou makehe, ʼe tuʼu ai te ʼu fakaʼiloga ʼo te ʼu higoa ʼo te kau kovana loma, ʼe mole heʼeki ʼiloʼi ʼo aʼu mai ki te temi nei. Ko te “tagata taupau” ʼo te ʼu vaka neʼe tuʼu ai foki tona higoa, pea ʼe “ko te ʼuluaki fakaʼiloga ʼaia ʼo ʼuhiga mo te taulaga ʼaē kua maʼu.”

Ko natou ʼaē ʼe natou ako te Tohi-Tapu ʼe natou ʼiloʼi foki ko te ʼapositolo ko Paulo neʼe tau ki te taulaga ʼaia ʼi te fakaʼosi ʼo tana folau tuʼa lua faka misionea. Neʼe nofo mo Filipe ko te tagata faka mafola, pea lagi ʼaki ʼa nā ʼu fakamatala neʼe nā fakaloto mālohiʼi ai foki te kau tisipulo (Gāue 18:21, 22; 21:7, 8, 16). ʼE feala ke tou lau te ʼu fakamatala fakatalakitupua ʼaia ʼi te Tohi-Tapu ʼi te tohi ʼo Gāue ʼa te ʼu ʼapositolo.

Ko ia ʼaē, ko te ʼu pou ʼaia ʼe tuʼu ʼi te matāfaga ʼo te tai, ʼe mole ko he ʼu toega noa ia ʼo te hisitolia. Ko te ʼu pou ʼaia ʼe fakamanatuʼi ki te ʼatamai ʼo te kau kilisitiano tanatou ʼu ʼuluaki tehina, ʼaē neʼe natou faka mafola mālohi te logo lelei ʼi te ʼu taulaga pea mo “aʼu ki te faʼahi mamaʼo ʼo te kele.” — Gāue 1:8.

[Haʼuʼaga ʼo te paki pasina 32]

Garo Nalbandian