Ko Te ʼu Tokoni Ki Ukraine
KO TE nusipepa mo te televisio ʼe nātou tau fakamatala te ʼu logo ʼe fakatupu mamahi. Ko te ʼu lakilisi faka ekonomike, ko te hoge ʼo te meʼa kai, pea mo te pakupaku, koʼena te ʼu meʼa ʼe mafola ʼi te kele katoa, kae koʼena te meʼa neʼe hoko tāfito ʼi te ʼu koga meʼa kehekehe ʼo te Union Sovietique ʼāfea. Ko te Kolesi pule ʼa te kau Fakamoʼoni ʼa Sehova neʼe ina kole ki te filiale ʼo te Sosiete Watch Tower ʼi Tanemaka ke ina fai he ʼu fakatuʼutuʼu ke ʼave he ʼu tokoni ki te kau Fakamoʼoni ʼaē ʼe nonofo ʼi te faigataʼa ʼi Ukraine. Koteā te ʼu meʼa neʼe fai e te ʼu tēhina ʼo te fenua ʼaia?
Neʼe kamata atu aipe te ʼu gāue ʼa te ʼu tēhina! Ko te filiale neʼe ina kole ki te ʼu tēhina ke nātou ʼolo ʼo foli te ʼu fakatauʼaga moʼo toʼo he ʼu meʼa kai ʼe totogi lelei. Pea ko te tohi neʼe ʼave ki te ʼu kokelekasio fuli ʼa te kau Fakamoʼoni ʼa Sehova ʼi Tanemaka moʼo fakahā age te meʼa ʼofa ka ʼamanaki fai. Koʼeni te fakamatala ʼa te filiale: “Ko te ʼu kokelekasio fuli neʼe nātou fakahā tanatou fia kau ki te tokoni ʼaia. Koia, neʼe kua feala hamatou fakahā tomatou manavaʼofa ki tomatou ʼu tēhina ʼaē ʼe nonofo ʼi te mamahi.” Neʼe ko kamio e nima, feiā mo motokā liliki e lua, pea mo te ʼu tagata taki motokā e 14, neʼe tau mai ki te filiale ʼo Tanemaka ʼi te moeaki ʼaho 7 ʼo tesepeli 1991. Ko te ʼu Fakamoʼoni ʼaē neʼe gāue ʼi te filiale neʼe nātou fakafonu te ʼu kamio ʼaki te ʼu meʼa kai ʼaē neʼe nātou totogi.
Ko te monite ʼaho 9 ʼo tesepeli ʼi te fetapā, ko te ʼu kamio ʼaia mo te ʼu motokā neʼe kamata tanatou ʼolo ʼo feʼaluʼaki ʼi Eulopa, ko he ʼolo ʼaia ki Ukraine. “Koʼena he meʼa neʼe lave loto ʼaē ko te sio ki te famili fuli ʼo te Petele tanatou fakatahi moʼo fai he tauʼīne, ko te fakamatala ʼaia ʼa te filiale. ʼE mātou ʼiloʼi neʼe lahi te ʼu ʼave tokoni feiā neʼe tauʼi; koia neʼe lahi te ʼu faikole neʼe fai moʼo tokoni ki te ʼu tēhina lolotoga tanatou ʼolo.”
ʼI te ʼaho 18 ʼo tesepeli, ko tamatou nonofo ʼi te tuʼania kua gata ia. Neʼe fakahāhā ia ki te filiale ʼo Tanemaka ko te ʼu motokā ʼaia mo te ʼu kamio neʼe tau lelei ia ki Lviv, ʼi Ukraine. Ko te ʼu tēhina ʼo Ukraine neʼe nātou tali lelei te ʼu meʼa ʼofa. Pea kua fakamaʼamaʼa ki te ʼu hahaʼi taki motokā ʼi te fakahifo ʼo te ʼu pake faka famili e 1 100 ʼo taki kilo 20 ʼaia ʼe maʼu ai te pipi, te falaoa, te laisi, te suka pea mo ʼihi meʼa age ʼe maʼuhiga! ʼO fakatahi fuli ʼaia ko tane e 22 ʼo te meʼa kai ʼaē neʼe ʼave e te fua motokā mo te fua kamio. Ko te filiale ʼo Tanemaka neʼe ina tohi fēnei: “Neʼe lahi tomatou fiafia, pea neʼe mātou fakafetaʼi kia Sehova ʼi tana haga ʼo hāofaki aipe te fua motokā mo te fua kamio pea mo maʼu aipe homatou faigamalie ke feala ke mātou fai he ʼu tokoni.”
Neʼe lau foki mo te ʼave mutuʼi meʼa. Ko te filiale ʼaē ʼe ina toe fakamatala, “ko te ʼu kokelekasio neʼe nātou tali te ʼu pāuʼi ʼaē neʼe fai ʼo makehe age”. ʼE moʼoni, ko Sehova ‘ ʼe ina fakakoloa anai tana ʼu kaugana ʼaki he ʼu meʼa manavaʼofa kehekehe’. (2 Kolonito 9:11.) ʼE toe feiā pe ki te ʼu tēhina mo tuagaʼane, neʼe logo ia nātou te fiafia lahi. Ko te ʼofa ʼaē ia nātou ʼe ko he fakaʼiloga makehe ʼo te ʼu tisipulo ʼa Sesu (Soane 13:35). Koʼena he ʼofa ʼe tahitahiga tona maʼu ʼi te mālama ʼaē ʼe lahi ai te ʼu hahaʼi ʼe nonofo ʼi te faigataʼa ia.