Ko Te Maʼuli ʼo Te Kau Faka Mafola ʼo Te Puleʼaga
Ko Te Fai Faka Mafola ʼi Te ʼu Telituale Mamaʼo ʼo Palakuai ʼe Fua Lelei
KO TE filiale ʼo te Sosiete Watch Tower ʼi Palakuai ʼe mahino lelei ki te maʼuhiga ʼaē ʼo te faka mafola ʼo te logo lelei ʼo te Puleʼaga ʼi tona telituale katoa (Gāue 1:8). Kua hoko te temi ke akoʼi ai e te hahaʼi fuli te Puleʼaga pea mo gāue kia Sehova ʼi muʼa ʼo tana pulihi te mālama agakovi ʼaenī ʼi te “mamahi lahi” ka hoko mai (Mateo 24:21, 22). Ko te ʼu hisitolia ki muli mai ʼe fakahā ai te faʼahiga meʼa neʼe fai moʼo tokoniʼi ai ʼo te hahaʼi ʼi te ʼu telituale ʼaē neʼe mole heʼeki vahe. Neʼe fakamatala e te filiale:
Neʼe fai te ʼu fakatuʼutuʼu ke feala ai te gāueʼi e ni ʼu pionie makehe ʼi he kiʼi temi pe te ʼu telituale ʼaia neʼe mole heʼeki vahe. Lolotoga te ʼu māhina mai novepeli ki sanualio ʼo te taʼu gāue 1990, ko te toko 39 tēhina pea mo tuagaʼane neʼe fai faka mafola ʼi te ʼu kolo e teau, te ʼu kolo lalahi pea mo liliki, neʼe mole heʼeki ʼi ai ni kau fai faka mafola ʼo te Puleʼaga. Neʼe nātou tufa te ʼu tohi e 6 119, te ʼu kaupepa e 4 262 pea mo te ʼu nusipepa e 5 144. ʼE ʼi ai te ʼu kaugā kau fai faka mafola, ʼe teuteuʼi nei ʼi te ʼosi ʼaē ʼo te gāue ʼaia.
◻ Ko te fafine pionie neʼe fai faka mafola ʼi te telituale neʼe heʼeki vahe, neʼe ina tuku ki te fafine te tohi E Feala Keke Mauli O Heegata Ite Palatiso Ite Kele. Neʼe fakahā age e te pionie ki ai ke fai hana ako ʼo te Tohi-Tapu mo ia, ʼo ina tali lelei ʼaki te loto fiafia. ʼI tana toe liliu mai, neʼe mole talitali tokotahi mai te fafine ʼaia: neʼe ʼi ai mo tona ʼohoana pea mo tanā ʼu toe e hogofulu. ʼI te ʼaʼahi ki muli mai, ko tona ʼu famili feiā foki mo tana ʼu kaumeʼa pea mo tana ʼu vahaʼa fale kua nātou nonofo nātou ʼo fakalogo mai ki te ako faka tohi-tapu! Neʼe fakaafe nātou e te fafine ʼaia ʼo ina ʼui age ko te ako faka tohi-tapu ʼe ko he meʼa ʼe lelei pea ko te falala pea mo te ʼu tapuakina ʼaē ʼe foaki mai e Sehova ʼe ko he meʼa taulekaleka ia. ʼE ko te logo lelei ʼaia neʼe mole heʼeki akoʼi age e he tahi kia ia, ko ia ʼaē neʼe manatu ai ia ʼe ʼaoga foki ke logo ki ai tona ʼu vahaʼa fale pea mo tona ʼu kaumeʼa.
ʼI te ʼaho fuli ʼaē ʼe fai e te pionie te ako faka tohi-tapu, neʼe tokolahi ia nātou ʼaē neʼe ʼomai ʼo mulimuli ki ai ʼo feala ai ke ʼui ko he kokelekasio. Ko nātou fuli ʼaia neʼe fia logo ki te logo lelei neʼe lahi tanatou fai fehuʼi pea mo nātou kau ki te tali ʼi te ako faka tohi-tapu ʼaia. ʼI te fakamahino age e te pionie ko ia mo tana ʼu kaumeʼa ʼe nātou mavae ānai ʼi te telituale mokā ʼosi fuli ʼi tanatou haʼeleʼi ʼo ʼolo ki he tahi fahaʼi, neʼe tuʼania foki te fafine, ʼo ina fehuʼi age pe koteā ānai ka hoko kia nātou. Kae neʼe fai te ʼu fakatuʼutuʼu ʼo feala ai ke hoko atu te ako faka tohi-tapu ʼaia e ni tēhina ʼo te kokelekasio ʼe ōvi mai ki ai. ʼI te temi nei, neʼe fekauʼi te ʼu pionie makehe ki te fahaʼi ʼaia moʼo tokoniʼi ʼo te ʼu hahaʼi ʼaia ʼe hage ko he ʼu ōvi.
◻ ʼI tana ʼalu ʼi te ʼu ʼapi ʼi te tahi telituale neʼe heʼeki vahe, neʼe felāveʼi te pionie mo te tagata neʼe ina toʼo, kua ʼosi ki ai taʼu e hogofulu, te tohi ʼaē La vérité qui conduit à la vie éternelle. Talu mai te temi ʼaia, neʼe mole toe felāveʼi ia mo te kau Fakamoʼoni ʼa Sehova. Kae, neʼe ina ʼiloʼi ko Sehova, ʼe ina higoa ko Sehova ʼo te kautau, e ko te ʼAtua moʼoni ʼaia e tahi pea ko ia tokotahi ʼe tau mo ʼaoga ke ʼatolasioʼi. ʼI tona loto tokotahi, neʼe palalau ia kia Sehova kia nātou fuli ʼaē ʼe ina ʼiloʼi. Ko ia, neʼe ʼalu ai ia ʼi te vahaʼa fuli ʼo ina fai te ʼu kilometa e tolu ʼo ʼaʼahi te tau matuʼa neʼe fia logo ki te logo lelei pea mo fia palalau ki te ʼAtua, heʼe, ʼi tana manatu, ‘kapau ʼe mole ʼau toe ʼalu ʼo ʼaʼahi nāua, ʼe galo ānai ia Sehova ia nāua.’ Kae, neʼe ʼi ai foki mo te toko hogofulu neʼe fia fai tanatou ako faka tohi-tapu, ʼo hoko ʼo lava te fahaʼi ʼaia he neʼe fai faka mafola te tagata kia nātou.
Meʼa makehe foki, ko kiʼi ako siʼi pe ʼi muʼa atu ʼo te haʼu ʼa te pionie ki tona ʼapi, neʼe fakafisi te tagata ʼaia ki te patele ʼo te kolo pea mo te kau polosesio tanatou hu age ki tona ʼapi mo te fakatātā ʼo Malia, ʼo ina fakamahino age ʼe mole tui ia ki te ʼu fakatātā. Neʼe ʼitaʼita te patele ʼaia. ʼI te afiafi ʼaia, neʼe faikole te tagata ʼaia kia Sehova ke tokoni age kia ia. Koutou fakakaukauʼi muʼa tona fiafia ʼi te haʼu ʼa te pionie ki tona ʼapi! ʼI foimo fai ai te ʼu fakatuʼutuʼu ʼo kamata ai tana ako faka tohi-tapu, pea neʼe hoholo ai tana haʼele ki muʼa ʼi tana fakatahi mo te hahaʼi ʼo te kautahi ʼo te ʼAtua.
ʼE moʼoni, ko Sehova ʼe ina tapuakina te tatānaki ʼaē ʼe fai ʼi Palakuai, lolotoga te gāue fakamalotoloto ʼa te ʼu tēhina ʼo faka mafola fakamālohi ʼi te ʼu telituale ʼaia neʼe mole heʼeki vahe. — Mateo 24:14.