Te Temi ʼAē Ke Kumi Ai Te ʼAtua
KO TE paki ʼo te pasina ʼaenī ko te Acropolis ʼi Athènes, ʼi te temi ʼaē neʼe ko he koga meʼa neʼe fai ai te ʼu tauhi ki te ʼu ʼatua. ʼI te loto Acropolis neʼe ʼi ai te Aéropage, neʼe ʼui neʼe ko te koga meʼa ʼaia neʼe ʼi ai te telepinale ʼo te temi ʼāfea. Pea ʼi te koga meʼa ʼaia, kua teitei hili ki ai taʼu e 2 000, ko te ʼapositolo ko Paulo neʼe tuʼu ai ʼo fai te akonaki maʼuhiga. Tou vakaʼi pe koteā te meʼa ʼaē neʼe ina ʼui:
“Pea [ko te ʼAtua] ʼaki te tagata pe e tahi, neʼe ina fai te tagata fuli pe ʼo te ʼu puleʼaga ke nātou nonofo ʼi te fuga kele katoa, pea neʼe ina fakatuʼu ʼaki te lao ia te ʼu temi ʼaē kua foaki pea mo te ʼu tuʼakoi ʼaē kua fakatotonu ʼo te nofoʼaga ʼo te tagata, ke nātou kumi te ʼAtua, kae kapau leva ʼe nātou kumi faka taufā pea ʼe nātou maʼu moʼoni, kae ʼe mole mamaʼo ia tatou takitahi. ʼE tou maʼu te maʼuli mai ia te ia pea mai ia te ia ʼe tou gaūgaūe.” — Gāue 17:26-28.
Neʼe feala ke fetogi te maʼuli ʼo te tagata mo kapau neʼe mulimuli ki te ʼu palalau ʼa Paulo! Ko tau ʼe fia, ko mamahi ʼe fia neʼe feala ke mole hoko mo ka na pau ko te hahaʼi neʼe nātou ʼiloʼi tonatou haʼuʼaga e tahi ko te tagata e tahi neʼe fakatupu e te ʼAliki Pule Maʼoluga ko Sehova.
Ia ʼaho nei, ko te tagata kua logo kehekehe ʼuhi ko te tahi lagolago ki tona fenua, te ʼu ʼuhiga faka sosiale, te fehiʼa ki te tahi lanu, pea mo te tuʼania ʼo ʼuhiga mo te ʼu meʼa faka sosiale. Ko te ʼu palalau ʼa Paulo ʼe kei feala pe tona fakaʼaoga heʼe tou tatau fuli, ʼe tou hifo mai te tagata e tahi neʼe fakatupu e te ʼAtua. Pea ko tatou fuli ko te ʼu tēhina mo tuagaʼane. Pea ʼe mole heʼeki tauhala te kumi ʼo te ʼAtua lolotoga te temi ʼaē kei feala ai tona maʼu ʼo ia.
Ko te ʼu palalau ʼa Paulo kei hoko atu pe tona maʼuhiga mo kapau ʼe tou fakatokagaʼi te ʼu palalau fakamuli ʼaē neʼe ina akonakiʼi. Neʼe fēnei tana ʼui: “[Ko te ʼAtua] neʼe ina fakakatofa he ʼaho ʼe tonu ai ke ina fakamāuʼi te kele katoa ʼaki te faitotonu e he tagata neʼe kua ina fakanofo, ʼo ina tuku ki te hahaʼi fuli ia he fakamoʼoni ʼaki tona fakatuʼuake mai te mate.”
Ko te fakatuʼuake ʼo Sesu mai te mate ko he meʼa faka hisitolia ia, pea ko Paulo neʼe ina fakahā, ʼe hoko moʼoni anai te fakamāu ki te hahaʼi fuli. Ko ʼafea koa ʼaē ka hoko ai? ʼE moʼoni, ʼe tou ʼiloʼi fuli ko te meʼa ʼaenī neʼe hoko kua teitei hili ki ai taʼu e 2 000 te fai e Paulo te ʼu palalau ʼaenī ʼi te Aéropage. Ko te lea faka polofeta ʼo te Tohi-Tapu ʼaē neʼe hoko ʼe ina fakahā mai kua ōvi te temi ʼaia. Koʼena he meʼa ʼe tonu ke tou fakakaukauʼi! Koia ʼe maʼuhiga ke tou kumi te ʼAtua ʼaki totatou loto katoa, ohage ko tona fakamatala e Paulo ki te hahaʼi ʼo Athènes: kua “fakahā e te ʼAtua ʼi te temi nei ki te hahaʼi fuli ʼo te koga meʼa fuli ke nātou fakahemala!” — Gāue 17:30, 31.