Neʼe Nātou ʼIloʼi Te Huafa ʼo Te ʼAtua
KO TE ʼuluaki kogaʼi tohi ʼiloa neʼe tohi pea neʼe ta ʼi te ʼu koloni fakapilitānia ʼo Amelika neʼe ko te tohi Bay Psalm Book. Ko tona ʼuluaki ta neʼe fai e Stephen Daye ʼi te koloni ʼo te Matatai ʼo Massachusetts ʼi te lolotoga ʼo te taʼu 1640. ʼI te ʼuluaki tohi ʼaia ʼe maʼu ai te tohi faka tohi-tapu ʼo te Pesalemo, neʼe fakaliliu mai te lea faka hepeleo ki te lea fakapilitānia ʼi te palalau pea mo te faitohi ʼo te temi ʼaia.
Ko te meʼa ʼaē ʼe maʼuhiga ʼi te tohi ʼo te Pesalemo ʼa Bay, ʼe ko te lahi ʼo te ʼu vaega ʼe fakaʼaogaʼi ai te huafa ʼo te ʼAtua. Koia, ko he tahi neʼe ina lau te tohi ʼaia kua hili ki ai taʼu e 350 neʼe feala ke ina ʼiloʼi ai te huafa ʼo totatou Tupuʼaga. ʼI te tohi ʼaia, ʼe tou lau fēnei ia Pesalemo 83:17, 18: “Ke nātou nofo ʼo talu ai ʼi te maveuveu pea mo te manavahe, ʼi te ufiufi pea mo te ʼauha! Heʼe nātou ʼiloʼi, ko tou huafa, ko koe tokotahi, IEOVAH ko koe ko te Māʼoluga ʼi te kele katoa!”
ʼE moʼoni, ko te ʼAtua māʼoluga ʼe ina uga tatou ke tou iloʼi ko tona huafa ko Sehova (Ieovah). ʼI te tohi ʼo te Pesalemo ʼa Bay, ʼe tala ʼo fēnei ia Pesalemo 1:1, 2 “ko te tagata manuʼia” ʼe mole haʼele ʼi te tokoni ʼa te kau agakovi, “kae ʼi te lao ʼa Ieovah, ʼe ina maʼu ai tona fiafia”. ʼE fēnei tona tala ʼi te tohi kua toe sivi (New England Psalms) ʼo te taʼu 1648: “Kae ʼe ina maʼu ʼi te lao ʼa Sehova tona fiafia katoa.”
ʼE tou lau ʼo fēnei ʼi te Les Saintes Écritures — Traduction du monde nouveau ʼo te sēkulō 20: “Manuʼia te tagata ʼaē neʼe mole haʼele ʼi te tokoni ʼa te kau agakovi, pea neʼe mole tuʼu ʼi te ala ʼo te kau agahala, pea neʼe mole heka ʼi te hekaʼaga ʼo te hahaʼi vāvā! Kae ko tona ʼu fiafia ʼe ʼi te lao ʼa Sehova, pea ʼi tana lao ʼe ina lau mamalie ʼi te ʼaho mo te po.”
ʼE fiafia moʼoni he tahi mokā ʼe ina liaki te tokoni ʼa te hahaʼi agakovi. ʼE mole tonu ke ina muliʼi te faʼifaʼitaki ʼa te kau agahala pea ʼe mole tonu ke fakatahi mo te hahaʼi vāvā mo heletiko. ʼI te ʼu meʼa ʼaia, ʼe ʼaoga ke fakamamaʼo mai te tokoni pea mo te ʼu aga ʼe feala ke taki ai ia ia ki te ʼu felāveʼi fakasino heʼeʼaoga, ki te fakaʼaoga ʼo te toloke, pea mo te fai ʼo ʼihiʼi atu gāue ʼe fakafeagai ki te lao ʼa te ʼAtua. Ei, ko te fīmālie moʼoni ʼe fakalogo pe ki te ako ʼo te ʼiloʼi ʼo te ʼAtua moʼoni, ʼaē ko tona huafa ko Sehova, pea mo te maʼuliʼi ʼo tana lao ʼaē ʼe fakahā ʼi te Tohi-Tapu.