“ ʼE Hage Ko He Laione ʼe Gugulu”
ʼE KOUTOU tui koa kia Satana? I te temi nei, tokolahi ʼe mole nātou ʼio ki te faʼahi ʼaia. Kia nātou, ʼe mole ko he manatu “fakapoto” ia. ʼI muʼa ʼo te taʼu 1911, neʼe fēnei te ʼui ʼa te tohi Encyclopédie britannique: “Ko te poto ʼa te tagata neʼe ina fakamahino te ʼu tuʼuga meʼa ʼo te maʼuli feiā ai mo te sino ʼo te tagata, ʼo mole ina maʼu ai he tuʼulaga ʼo Satana.” Ki te manatu ʼa ʼihi teolosia ko Satana ko te fakatātā pe ia, ko te fagana. ʼE fēnei te fakahā e te encyclopédie (The World Book Encyclopedia): “Tokolahi te kau teolosia ʼe nātou ʼui ko te Tevolo ko te fakatātā pe ia ʼo te mālohi ʼo te agakovi, ʼo te ʼu kalitate kovi ʼaupito ʼaē ʼo te tagata.”
Koteā te fakahā ʼo te ʼu meʼa ʼaia? Kapau ʼe koutou tui ki te Tohi-Tapu, pea ʼe tonu ke koutou tui ko Satana ʼe moʼoni. Neʼe mole gata ʼaki pe te tui ʼa Sesu ki te moʼoni ʼa Satana kae neʼe ina fakahigoaʼi ko “te pule ʼo te mālama ʼaenī”. (Soane 14:30.) Ko te ʼapositolo ko Paulo ʼe ina fakahigoaʼi ko “te ʼatua ʼo te faʼahiga meʼa ʼo te tuʼu ʼaenī”. (2 Kolonito 4:4.) Pea ʼe fēnei te ʼui ʼa te ʼapositolo ko Soane, ʼaē kua matuʼa: “Ko te malamanei katoa ʼe takoto ia ʼi te mālohi ʼo te agakovi.” — 1 Soane 5:19.
Kapau ʼe mole ʼalu tahi takotou manatu pea mo Soane, koutou fakakaukauʼi age muʼa te meʼa neʼe hoko mole heʼeki faʼa fualoa. Koutou fakakaukauʼi age ki te ʼu tuʼuga mate pea mo te ʼu meʼa fai fakapō neʼe fakaʼaogaʼi e te ʼu puleʼaga. Koutou manatuʼi age muʼa ki te ʼu tau pea mo te matematehi ʼo te ʼu hahaʼi neʼe sio ki ai totatou taʼiake. Kae feafeaʼi la ki te ʼu fai fakapō ʼe fakahāhā ʼi te ʼu nusipepa — te ʼu fakapō, ko te fakaʼalikiʼi (ʼo te hahaʼi fafine pea mo te hahaʼi tagata), te fakaʼalikiʼi ʼo te tamaliki, pea ʼe kei toe atu? ʼE feala koa ki he tahi age mo kapau mole ko Satana ke liliu ko te ʼatua ʼo te mālama ʼaenī?
ʼE fēnei te fakatokaga ʼa te ʼapositolo kilisitiano ko Petelo: “Koutou nonofo alaʼala, koutou nonofo tokaga. Ko tokotou fili, ia te Tevolo, ʼe hage ko he laione ʼe gugulu, ʼe feʼaluʼaki ke ina kai he tahi.” (1 Petelo 5:8). Kapau neʼe puli he laione ʼi tokotou koga meʼa, ʼe koutou faigaʼi anai ke koutou ʼiloʼi peʼe ko he moʼoni peʼe ko he loi, peʼe ʼe koutou foimo kumi hokotou nonoʼaga?
Ke koutou ʼiloʼi papau ko Satana ʼe maʼuli moʼoni. ʼE mole manavaʼofa pea ʼe agakovi, pea ʼe mālohi age ia ia tatou. Koia koutou lele kia Ia ʼaē ʼe mālohi age. “Ko te huafa ʼo Sehova ʼe ko he tule mālohi. Ko te agatonu ʼe lele ki ai pea ina maʼu ai te fakamaluʼaga.” (Tāʼaga Lea 18:10). Koutou fakamalumalu ia Sehova ʼAtua, pea ʼe koutou ʼiloʼi ai kua vave pe te ʼateainā ʼa te tagata mai te mālohi kovi, ʼaē ko Satana. Ko he ʼāteaina fakafiafia anai! — Fakahā 20:1-3.