Ko Ia ʼe Uhuuhu

ʼI TE fuʼu ʼakau ʼo te ʼu koga meʼa ʼo te tai Metitelanea, ko te fuʼu alimoni ʼe ko he ʼakau ia ʼe maʼuhiga ʼaupito. ʼI te fakaʼosi ʼo te māhina ʼo sanualio peʼe ko te māhina ʼo fepualio — ʼi muʼa ʼo te ʼu fuʼu ʼakau fuli ʼaē — ʼe matala ia ʼi te ʼosi ʼo te temi nive! Ko te ʼakau katoa ʼe matala ai te ʼu teu ʼe huʼalisi mamaʼa pea mo lanu hihina, ʼaē neʼe fakatātā leva ki te lau ʼulu hihina ʼo te hahaʼi matutuʼa. — Vakaʼi ia Tagata Tānaki 12:5.

Ko te kau Hepeleo ʼo te temi ʼĀfea neʼe nātou fakahigoaʼi te fuʼu alimoni “ko he tahi ʼe ʼalaʼala”, ʼaē ʼe tau mo tona matala tautonu. Neʼe fakaʼaoga e Sehova te akau ʼaia moʼo fakatā te logo maʼuhiga. ʼI te kamata ʼo te minisitelio ʼa Selemia, neʼe fakahā ʼi te fakakikite kia te ia te muko ʼo te alimoni. Koteā tona ʼuhiga? ʼE fēnei tona fakamatala e Sehova: “ ʼE ʼau nofo ʼalaʼala ʼo ʼuhiga mo taku folafola, koteʼuhi ke hoko.” — Selemia 1:12.

ʼI ‘matala’ vave ʼo te fuʼu alimoni, koia neʼe ‘tuʼu fakavilivili’ ai Sehova moʼo fekauʼi tana polofeta moʼo vavalo tana hahaʼi ʼo ʼuhiga mo te ʼu ikuʼaga ʼo te talagataʼa (Selemia 7:25). Pea ʼe mole mālōlō anai ia — ʼe ‘nofo ʼalaʼala’ anai ia — ʼo aʼu ki te temi ʼe hoko ai tana lea faka polofeta. Koia ʼaē ʼi te taʼu 607 ʼi muʼa ʼo totatou temi, ʼi te temi fakakatofa, ko te fakamāu ʼa Sehova neʼe hoko ki te fenua ʼaposita ko Suta.

ʼE fakakikite e te Folafola ʼa te ʼAtua te fakamāu feiā ʼe hoko anai ki te ʼu faʼahiga meʼa ʼo te tuʼu agakovi ʼaenī ʼe tou maʼuʼuli ai (Pesalemo 37:9, 10; 2 Petelo 3:10-13). ʼO mulimuli pe ki te taʼi gāue fakamāu ʼaia, ko te polofeta ko Hapakuke neʼe ina fakapapau mai, ʼo fēnei: “Ko te fakakikite ʼe kei tuku ia ki he temi fakakatofa, (...) haga talitali aipe ki ai; koteʼuhi ʼe hoko moʼoni anai ia. ʼE mole tauhala anai ia.” (Hapakuke 2:3). Ko te matala matamatalelei ʼo te fuʼu alimoni ʼe ina fakamanatuʼi mai ke tou nonofo ʼaʼala ʼo ʼuhiga mo te fakahoko ʼo tana folafola.

[Haʼuʼaga ʼo te paki pasina 32]

Pictorial Archive (Near Eastern History) Est.