“Ko Te Fakaʼiloga Mai Te Lagi”
KO TE palalau fakatuketuke ʼāfea ʼo ʼuhiga mo te temi, ʼe ina ʼui fēnei: “Kulakula te afiafi, falala ki te temi; kulakula te uhu, fakanounou tou ala.” ʼI te temi nei, ko te ʼu satelite ʼi te lagi ʼe nātou takafoli te kele, pea ko te olotinatea laulahi ki te ʼu ako ʼo te fua ʼo te māfana, pea mo te meʼa ʼe higoaʼi ko te radar Doppler ke ʼiloʼi te koga meʼa pea mo te mamaʼo ʼo he meʼa, pea mo ʼihi ʼatu ʼu meʼa fēnei ʼe fakaʼaoga moʼo tala fakatomuʼa te temi. Ko te ʼu tala fakatomuʼa ʼe felogoi tuʼumaʼu mo te palalau fakatuketuke ʼaē ʼe talanoa kiai te ʼuluaki palakalafe.
Ko te kau takitaki lotu fakafeagai ʼo Sesu Kilisito neʼe nātou kole age kia ia ʼi te tahi temi “he fakaʼiloga mai te lagi”, he fakaʼiloga fakatalakitupua moʼo fakamoʼoni ko ia ko te Mesia. Neʼe ʼui maʼana: “Ka malū te afiafi,” kua koutou māhani ʼi te ʼui: “ ʼE lāulelei anai,‘heʼe kulakula te lagi’; pea ʼi te uhu: ‘Ko te ʼaho nei ʼe faka nive anai te temi, pea mo ʼua, heʼe kulakula te lagi, kae fakamataku tona agaaga.’ ʼE koutou popoto ʼi te sivisivi ʼo te agaaga ʼo te lagi, ka mole koutou lavaʼi te sivisivi ʼo te ʼu fakaʼiloga ʼo te ʼu temi. Ko he taʼiake agakovi mo fai feʼauʼaki ʼe nātou haga kumi he fakaʼiloga, kae mole toe tuku anai kia nātou he tahi ake fakaʼiloga ʼi te fakaʼiloga ʼa Sonasi.” — Mateo 16:1-4.
Neʼe lava ke tala fakatomuʼa e te ʼu fili ʼo Sesu te temi kae neʼe mole feala hanatou mahino ki te ʼu meʼa fakalaumālie. Ohage la, koteā te ʼui ʼo ʼuhiga mo te “fakaʼiloga ʼa Sonasi”? Hili kia ʼaho e tolu ʼi tana nofo ʼi te fatu ʼo te ika lahi, ko te polofeta ko Sonasi neʼe faka mafola ʼi Ninive pea ʼaki te meʼa ʼaia neʼe liliu ko te fakaʼiloga ʼo te kolo ʼaliki ʼo Asilia. Neʼe maʼu e te taʼiake ʼo Sesu “te fakaʼiloga ʼa Sonasi” ʼi te nofo ʼaē ʼa Sesu ia ʼaho e tolu ʼi te faitoka pea neʼe fakatuʼuake mai te mate. Neʼe fakahā e tana kau tisipulo te moʼoni ʼo te meʼa ʼaia, pea ko Sesu neʼe ko te fakaʼiloga ki te taʼiake ʼaia. — Mateo 12:39-41.
Ko te tahi ʼaluʼaga, neʼe fehuʼi age e te ʼu tisipulo ʼa Sesu kia ia he “fakaʼiloga” ʼo ʼuhiga mo tana “ ʼafio” ʼi te Puleʼaga ka haʼu. Neʼe ina tuku age te fakaʼiloga ʼe koga kehekehe, ohage la ko te ʼu tau fakamataku, te ʼu toe mafuike, te hoge, pea mo te faka mafola ʼi te kele katoa ʼo ʼuhiga mo te Puleʼaga ʼo te ʼAtua ʼi selo kua fakatuʼu. — Mateo 24:3-14.
ʼE koutou ʼiloʼi koa te fakaʼiloga ʼo te ʼafio ʼa Kilisito ʼi tona ʼuhiga Hau fakapulipuli ʼi selo? Ko te ʼu koga ʼo te fakaʼiloga ʼaia ʼe lolotoga hoko ʼi te taʼiake ʼaenī (Mateo 24:34). Pea koteā te ʼui ʼo ʼuhiga mo te temi ka haʼu? ʼE mole gata ʼaki pe te fakahā e te Tohi-Tapu te kua ōvi mai ʼo te fakaʼosi ʼo te ʼu faʼahiga meʼa ʼo te tuʼu ʼaenī kae ʼe ina toe fakakikite te ʼaho foʼou neʼe fakapapau e te ʼAtua ʼaē kua ōvi tana fakamālamaʼi te malamanei. — 2 Petelo 3:13.